KUCHING, 9 Mac — Malaysia dipinta belajar ari model penyerakup ti dikemeranka di Sarawak, ke alai penyelai bansa enggau jalai pengarap nyadi pelasar penegap komuniti lalu ukai nyadi pun penyarut.

Sapit Presiden Gerempung Hak Asasi Mensia (Malaysia), Peter John Jaban madah, rayat Sarawak udah lama idup dalam pengelantang bepelasarka ulah bebasaka pangan diri, bebatak asur enggau identiti bekunsi nyadi peranak Sarawak.

Nitih ku iya, rayat di nengeri tu selalu ngumbai diri “Sarawakian”, enda ngira bansa enggau jalai pengarap, lalu enggau nya nempa semengat penyerakup ti tegap sereta fokus ngagai pemerat begulai.

Ku iya, penyerakup moden Sarawak mega ditegapka maya jeman ketuai ex-Kepala Menteri Sarawak, niang Pehin Sri Haji Adenan bin Haji Satem tauka dikelala agi enggau nama Tok Nan.

Taja dikelala seruran ngemaruhka diri sereta siru enggau rayat, iya tegap ngetanka hak enggau maruah Sarawak, mujur ngidupka baru asai temegah ati enggau penyerakup rayat nengeri tu.

Ku iya nambah, legasi nya diatu diteruska Premier Sarawak, Datuk Patinggi Tan Sri Abang Johari Tun Openg ti mengkang komited ngetanka hak Sarawak, ngenegapka penyerakup rayat sereta meransang pemansang nengeri jemah ila.

Dalam pemansang ke sama, rayat Sarawak begulai enggau parti politik di nengeri tu mega mandangka penyerakup dalam negika hak ke udah ditulis ari baruh Sempekat Malaysia 1963 (MA63), taja pan ideologi politik bebida.

Ku iya, raban aktivis enggau gerempung mensia mayuh mega bejalaika tanggungpengawa ba pengawa ngangkatka penyedar rayat nengah licha, kimpin, bantah likun enggau demonstrasyen dikena ngenegapka pemereti ati senentang hak enggau autonomi Sarawak.

Nitihku iya, semengat ngelaban rayat Sarawak mega diayanka nengah rambai jaku baka “Agi Idup Agi Ngelaban”, “Sarawak ungkup Orang Sarawak”, “Sarawak First” enggau “Saya Anak Sarawak”, ti mandangka pengeran deka ngetanka hak, maruah enggau pengidup dudi hari nengeri tu.

Berebak enggau nya, Tuai Pemegai Menua (TYT) Negeri Sarawak, Tun Pehin Sri Dr Wan Junaidi Tuanku Jaafar mega ngelalau rayat nengeri tu ngambika terus ngetanka penyerakup laban penyerakup beguna amat dalam nentuka kuing Sarawak jemah ila seruran dijaga.

Berindik enggau nya, Peter John madahka bala ketuai di serata menua Malaysia patut ngetu beambi ulih ba isu jalai pengarap enggau bansa dikena ngulihka penguntung politik laban pengawa baka nya semina deka mambarka mensia mayuh sereta ngeruga penyerakup bansa.

Kelimpah ari nya ku iya, bala ketuai di menua tu patut neladan chara Sarawak ti ngemeratka basa, inklusif enggau identiti bekunsi dalam nempa raban bansa ti beserakup.

“Enti Malaysia amat deka nyapai penyerakup ti tegap, menua tu begunaka pemungkal enggau chara belajar ari Sarawak,” ku iya. -RBI

KUCHING, 9 Mac – Bantu Barang Pemun Sarawak (SKAS) 2026 deka diagih dalam tiga renggat sepemanjai taun tu, enggau pengawa nyuaka renggat keterubah diperambu deka berengkah kena 10 Mac ti mungkur agih belanja sepenyampau RM179.6 juta.

Pengawa nyuaka bantu ke nangkanka tu deka diteruska kena 15 Mei 2026 ungkup Renggat Kedua enggau agih belanja ke sama iya nya RM179.6 juta, lalu Renggat Ketiga diperambu kena 10 November 2026 enggau agih belanja RM180.6 juta.

Nitihka penerang rasmi, sepenyampau 857,814 penerima udah dikelala layak nerima bantu nya bepelasarka data ari penerima Bantu Tunai Rahmah (STR) Renggat 1 2026.

Semua iya, lebih 850,000 iku rayat di Sarawak deka ngasaika pemaik ari inisiatif perintah nengeri ti ngembuan tuju deka mantu ngelempungka ungkus pengidup sereta nentuka belanja pemun ruang bilik terus diintu.

Perintah nengeri nyemetak madahka pengawa bejalaika SKAS mandangka komitmen sida ti seruran ngenegapka pengelantang pendiau rayat, kelimpah ari nentuka tetiap ruang bilik bisi akses ngagai perengka guna pemun.

Nengah inisiatif tu, perintah ngarapka bantu ke diberi ulih mantu rayat napi ungkus pengidup ke majak niki, kelebih agi sida ke amat begunaka bantu. -RBI

KUCHING, 9 Mac — Direktor Opis Kereja Raya Sarawak YBhg. Datu Adj. Prof. Ir. Ts. Gs. Br. PMr. Dr. Cassidy anak Morris nemuai basa ngagai Unit Pekara Jalai Pengarap Bukai (UNIFOR) sehari tu dikena ngenegapka kerejasama strategik entara Opis Kereja Raya Sarawak enggau ejensi nya.

Penatai iya disambut Direktor UNIFOR, Dato Georgina Apphia Ngau, begulai enggau pemesai kanan unit nya.

Penemuai nya mega nyadi pelasar endur berandau, nyerungkai kerejasama dalam bejalaika projek pemansang enggau ngintu rumah sembiang di serata Sarawak.

Penemuai nya mandangka komitmen kededua piak ti terus bebendar dalam nentuka pengawa bejalaika projek pemansang bekaul enggau rumah sembiang ulih dipejalaika enggau efisyen agi sereta teratur, lalu enggau nya meri penguntung ngagai komuniti pupu bansa enggau jalai pengarap di nengeri tu.

Kelimpah ari nya, kerejasama rat entara kededua ejensi nya mega dipeda ulih ngenegapka agi pengawa perintah dalam nentuka perengkaguna jalai pengarap di Sarawak terus diintu sereta dikemanah ungkup pengelantang rayat. — RBI

KANOWIT, 9 Mac – Siku tukang kimpal diripotka lenyau pengudah iya dipelabaka tama ngagai kandang kampung besemak enggau Rumah Ricky di Jalai Penyulau/Lukut, ditu, ba sebengkah penusah ti ngirauka ati sida sebilik.

Mansa dikelala enggau nama Richard Lee anak Apang, 22, diripotka lenyau kenyau pukul 4 lemai ensanus, tang ripot polis semina digaga urung pukul 10.19 pagi kemari pengudah pengawa ngiga keterubah sida sebilik enda mujur.

Ketuai Polis Pelilih Kanowit, DSP Junical Ujal, madahka mansa ke bebansa Iban baru datai ba endur nya kena 5 Mac tu tadi ari Kuala Baram, Miri laban deka ngabiska peremisi begulai enggau sida sebilik ke ngaga kompelin ba rumah entua indu iya.

Bepelasarka penerang saksi, mansa kepenudi dipeda ba baruh rumah sebedau mindah nuju kandang kampung ke bepalan urung 150 meter ari jalai besai.

“Bepelasarka ripot, kepenudi mansa dipeda pansut ari rumah urung pukul 4 lemai ensanus pengudah tembu makai deka nginsap.

Pemindah mansa nuju kandang kampung belakang rumah dikemataka siku nembiak lelaki beumur 13 taun,” ku iya nengah siti penerang kemar.

Berindik ari ripot nya, Indu Opis Polis Pelilih (IPD) Kanowit udah ngaktifka operasyen SAR dikena nyidi penunga mansa.

Raban penyelamat ngemeratka pengawa ngiga dalam radius urung dua kilometer ari palan endur mansa kepenudi dipeda.

Taja pia, pengawa ngiga ba hari keterubah nya betapi pemar ketegal ‘faktor alam’ ti nyekat pejalai tim penyelamat.

DSP Junical nerang, operasyen ngiga kemari tepasa ditangguh pukul 4 lemai ketegal ujan bangat ba kandang endur ngiga, lalu ngujungka mar deka nyidi bekau mansa.

Naka ke diatu, mansa bedau ditemu lalu nadai penerang baru diripotka.

“Operasyen SAR diperambu deka disambung baru pukul 8 pagila (sehari tu) enggau raban ke lebih komprehensif dikena ngerembaika kandang endur ngiga” ku penerang nya kemari.

Piak polis minta kerejasama ari mensia mayuh ti bisi penerang senentang penunga mansa ngambika jampat betanya ngagai balai polis ke besemak ngambika ulih mantu pengawa mansik enggau nyelamat mansa.

Arap ke mansa ditemu enggau selamat. — RBI

PAKAN, 9 Mac – Siku lelaki bebadi nyawa pengudah mutosikal ke dikena iya belantak enggau sebuah lori ba Jalai Pakan semak Simpang Wak, Pakan pagi tadi.

Ketuai Polis Pelilih Menua Julau, DSP Alif Haiqal Ramesh bin Abdullah madah, penusah ke nyadi urung pukul 10.30 pagi nya mungkur sebuah lori rigid Nissan enggau mutosikal Honda Wave.

Nitihku iya, pansik tumu tetemuka lori ke dideriba seiku lelaki peranak menua nya benung bejalai ari Bintangor nuju ngagai Pakan nengah Jalai Pakan.

“Lebuh datai ba endur penusah nyadi semak Simpang Wak, sebuah mutosikal ke datai ari jalai ke betentang dipelabaka ngenyit tama ngagai jalai lori nya sebedau ngelantak tayar belakang kiba lori nya lebuh deriba lori nguji nyeliahka diri ke kanan jalai,” ku iya nengah sebengkah penerang sehari tu.

Berindik ari penusah belantak nya, orang ke ngena mutosikal nya tegelinchir lalu tepawah ngagai sepiak jalai lalu balat bakal ba pala.

Tudah benama Malayu anak Asom, 59, ari Rumah William Tanjing Sungai Ulu Kura, Pakan udah dientaska Pemesai Perubat ari Klinik Pengerai Pakan bebadi ba palan penusah nyadi.

Berebak enggau nya mega, deriba lori ke beumur 57 taun nya nadai bakal.

DSP Alif Haiqal nambah, kes nya diatu benung dipansik ari baruh Seksyen 41(1) Akta Pengangkutan Jalan 1987.

Iya mega ngelalau penguna jalai alun ngambika seruran bejimat sereta ngasika atur jalai alun dikena nyeliahka sebarang penusah ke enda manah nyadi. -RBI

KOTA SAMARAHAN, 9 Mac — Pengawa ngaga Jematan Batang Lupar 1 diatu nyau semak renggat kepenudi lalu dipelaba tembu penuh dalam timpuh ke semak sebedau dibuka ngagai mensia mayuh ba tengan bulan Mei 2026.

Nitihka penerang ari Opis Kereja Raya (JKR) Sarawak, projek infrastruktur ikonik nya entara pemansang strategik perintah nengeri dikena ngenegapka rentayan penyambung jalai di Sarawak.

“Pengawa ngaga Jematan Batang Lupar 1 diatu nyau semak renggat kepenudi lalu deka tembu penuh enda lama agi.”

“Projek tu dipelaba deka dibuka ngagai mensia mayuh ba tengan bulan Mei 2026,” ku penerang nya.

JKR Sarawak nambah, sida tetap komited bejalaika bemacham projek infrastruktur strategik dikena ngemanahka perengkaguna komunikasyen sereta nyukung pemansang sosioekonomi nengeri.

Jematan nya dikearap ulih meri pemaik ke besai ngagai peranak menua nya nengah chara ngemudahka pemindah sereta nambahka akses entara kandang endur ke sebedau tu bepanggai ba servis feri. — RBI

LUNDU, 9 Mac — Perintah Sarawak komited ngenegapka transformasyen sektor betanam betupi nengeri tu nengah pemansang Sarawak Metropolitan Food Cluster (SMFC) di Opar, ti mandangka pengawa ngena teknologi moden dikena ngasilka produk pemakai ti berega tinggi.

Menteri Industri Pemakai, Komoditi enggau Pemansang Kandang Menua, Dato Sri Dr Stephen Rundi Utom, madahka SMFC semina siti aja kluster pemakai metropolitan bansa nya di Malaysia ti ngempung teknologi maju nyengkaum Internet of Things (IoT) enggau chara betanam betupi ti semitan.

Nitih ku iya, pemansang kluster nya nyerakupka semua rentayan pemansut pemakai nengah konsep ekonomi pelingkar, berengkah ari pemansut ba ladang nyentuk ngagai makit enggau pemakai.

“Tu integrasyen ti komprehensif ari A ngagai Z, nyengkaum konsep ari ladang ngagai ‘hidangan’.

Sida mega udah nyambung makit menua tu enggau makit dunya, ti beguna amat dalam nambahka rega produk betanam betupi,” ku iya.

Iya madah munyi nya lebuh nemuai ngagai palan projek SMFC di Opar beratika pejalai projek nya sehari tu.

Nitih ku Rundi, projek ke mungkur pemesai urung 84 hektar nya mega nyadi palan belajar meri kelala teknologi betanam betupi moden ngagai komuniti ngelingi.

“Kitai deka belajar enggau naka ulih ari projek tu lalu berebak enggau nya meransang komuniti ngelingi kandang menua tu ngaul diri ngambika sida meretika baka ni teknologi moden ulih dikena dalam sektor betanam betupi,” ku iya nerang.

Iya mega nerangka palan projek nya sebedau tu iya nya Pusat Penumbuh Menua Pesisir (RGC) Opar, ke asal ari baruh pegai Lembaga Penyatuan dan Pemulihan Tanah Sarawak (LCDA) sebedau iya diatu dipegai Lembaga Pembangunan Tanah Sarawak (SLDB).

Ku iya nambah, perintah nengeri mega bisi sekeda projek betanam betupi moden bukai nyengkaum ladang betanam betupi tepat di Kabuloh, Bintulu enggau Sibu ti deka dikoordinasyen dikena nentuka pemansang sektor betanam betupi nengeri tu nyingkang setipak enggau pemansang teknologi.

Berebak enggau nya, Rundi nyemetak madahka penerima enggau adaptasyen teknologi baru nyadi batang kunchi dikena nentuka sektor betanam betupi Sarawak terus mansang.

“Enti kitai enda ngemeranka teknologi baru, kitai deka mengkang ba jalai lama ke sama.

Pengawa bumai ngidupka diri enda mai kitai sebarang endur,” ku iya.

Ku iya, taja pan pengawa bejalaika projek beteknologi tinggi nyangka betapi enggau pemar sereta pemuntan ba renggat keterubah tang proses belajar nya beguna dikena ngemansangka sistem betanam betupi ti lebih moden sereta tan.

Berindik enggau nya, iya mega meransang raban nembiak mansang ke mua sereta ngemeranka pengawa betanam betupi bepelasarka teknologi moden dikena ngubah persepsyen sektor nya ti suah dikaitka enggau konsep 3D mar, tau mai penusah sereta kamah.

“Kitai dekaka raban nembiak ti mayuh agi penemu sereta muntang nelebaka diri enggau teknologi ngaul diri dalam dagang betanam betupi ngambika Sarawak ulih besemekih enggau menua luar baka Vietnam, Taiwan enggau Thailand,” ku iya.

Nitihku iya, Sarawak ngembuan pemesai tanah ti besai sereta bisi potensial besai dikena enggau optimum dikena nentuka jemah ila sektor betanam betupi enggau pengelikun pemakai di nengeri tu. — RBI

LIMBANG, 9 Mac — Ketuai Polis Pelilih Limbang, Supt Parum Niot, sehari tu, udah bejalaika pengawa matau ba endur tanah tusur ti diripotka nyadi ba Jalai Buangsiol / Pandaruan (7th Mile Round) kena 7 Mac tu tadi.

Mensia mayuh dilalau enda nengah jalai nya nyentuk piak bekuasa ngentaska jalai nya likun.

Nyadi atur pengelikun, penguna jalai alun diperansang ngena jalai alternatif sereta seruran ngasika atur ari piak bekuasa.

Kerejasama komuniti beguna dikena nentuka pengelikun semua piak. — RBI

KUCHING, 9 Mac — Raban nembiak rebak baru di Spaoh dilalau lengkas ngiga peluang ekonomi baru bepelasarka dagang temuai enggau produk menua tu, setipak enggau pengawa bejalaika sekeda projek pemansang besai di kandang menua nya.

Sapit Premier Sarawak, Datuk Amar Douglas Uggah Embas nyemetak madahka raban nembiak ukai semina nyadi pemerati aja pemansang ke nyadi, tang patut nyikap diri nempa penatai pemisi baru nengah dagang temuai, pemakai menua tu, asil pengelandik jari, ‘homestay’ sereta mega produk ke bekaul enggau budaya enggau pesaka asal menua tu.

Ku iya, pemansang infrastruktur baka Palan Endur Terebai enggau Penyangkai Pandak (STOLport) Bebuling, CPPC, Jalai Sri Aman–Betong ke baru enggau Jematan Sungai Paku deka muka mayuh agi ruang ungkup penumbuh ekonomi menua tu sereta nambahka penatai temuai ngagai kandang menua nya.

“Raban nembiak Spaoh patut berengkah beratika peluang ekonomi baru ke ulih dikemansang setipak enggau penarit produk dagang temuai, kelebih agi enggau perambu deka ngemansangka palan ngelantangka ati di Bukit Sadok.

Tu meh maya sida nyikap diri, berunding ke mua sereta nyereta ubah ekonomi ba kandang menua sida empu,” ku iya lebuh bejaku ba Pengerami Makai Lemai Taun Baru Cina Peranak Spaoh (Kuching) 2026 ba Kompleks UNIFOR, ditu kemari.

Kelimpah ari sukut dagang temuai, Uggah mega nesau komuniti Cina di Spaoh ngambika terus chakah nyereta aktiviti ekonomi ti deka ngerembai berindik ari penembu projek strategik tu, ti dipechaya ulih ngenegapka rentayan komunikasyen sereta matak puku ngagai kandang menua nya.

Iya mega madah, kaunsil pelilih menua merambu deka ngemansangka mayuh agi rumah ke ulih dibeli enggau rega ke patut dikena nangkup peminta peranak menua nya, seraya Kaunsil Pemansang Pembangunan enggau Pengintu Tanah (LCDA) bisi ati deka nambahka pengawa ngaga lot kedai dikena ngerembaika peluang dagang menua tu.

Uggah nyemetak madahka semua inisiatif tu bela begunaka pangan diri dalam pengawa ngenyampatka pemansang Spaoh enggau chara ti lebih bestruktur, inklusif sereta kompetitif, lalu enggau nya meri penguntung ngagai peranak ari semua serak pengidup.

Sama bisi ngulu atur pengawa nya, Datin Amar Dato Doreen Mayang, Kaban Parlimen Betong Dato Dr Richard Rapu enggau bini iya Datin Lucy Mary Johnson, Sekretari Politik ngagai Premier Sarawak Puan Roseline Mapong Sabai, enggau Ketuai Indu Parti Pesaka Bumiputera Bersatu (PBB) N.37 Bukit Saban Puan Natasha Nasa Douglas. — RBI

LUNDU, 9 Mac — Menteri Industri Pemakai, Komoditi enggau Pemansang Kandang Menua Sarawak (MFICORD) Dato Sri Dr. Stephen Rundi Utom sehari tu nemuai gawa ngagai palan Projek Metropolitan Food Cluster (MFC) Opar dikena beratika pengawa bejalaika projek nya, ke sebedau tu dikelala enggau nama Palan Penumbuh Menua Pesisir (RGC) Opar.

Penemuai nya bela digulu Sapit Menteri Industri Pemakai, Komoditi enggau Pemansang Kandang Menua Sarawak, Datuk Abdul Rahman Ismail; Penyanding Penemu ba Opis Premier Sarawak, Tan Sri William Mawan Ikom; enggau Kaban Kunsil Nengeri (ADUN) Opar, Billy Sujang.

Projek Opar MFC ke bepalan di Lundu berengkah digaga kena 30 Jun 2025 lalu dipelabaka ptembu penuh kena 29 Jun 2027.

Projek tu entara inisiatif strategik perintah Sarawak dalam ngenegapka pemansang sektor agro-pemakai sereta meransang penumbuh ekonomi menua tu.

Entara batang komponen projek tu nyengkaum Palan Ngumpul Asil, Loji Proses Ai Irup, Loji Proses Pemakai Jelu Tupi, Palan Servis Rumah Gadung, Rumah Gadung enggau Palan Fasiliti ti nyengkaum dewan, pasar runchit, lobi enggau palan opis.

Pengawa bejalaika projek tu dikearapka ulih nyadi pemangkin pemansang sektor agro-pemakai sereta muka peluang ekonomi baru ngagai komuniti setempat, kelebih agi ba kandang menua Opar enggau pelilih Lundu selampur. — RBI