KUCHING, 10 Mac — Raban Penyaga Pengelikun Mensia Mayuh Malaysia (APM) Nengeri Sarawak udah bejalaika operasyen mindahka peranak ke dituntung penusah ampuh bah di Kampung Sinar Budi enggau Taman Desa Wira ngagai Palan Pengenduh Sementara (PPS) dikena nentuka pengelikun enggau pengelantang sida dijaga.

Nitihku penerang APM Sarawak, kaban APM dipindah ngagai endur ke kena penusah nya ngambika ulih mantu pengawa mindahka mansa enggau barang ke diguna ngagai PPS ke udah ditetapka.

Operasyen tu dipejalaika enggau chara proaktif dikena ngurangka risiko sereta nentuka mansa ba endur ke likun agi sepemanjai timpuh ampuh bah.

“APM Sarawak komited deka terus matau gaya enggau bejalaika operasyen meri bantu dikena nentuka pengelikun peranak seruran dikemeratka,” ku penerang nya.

APM Sarawak nyemetak madahka pengawa nyikap diri enggau integriti mengkang nyadi batang prinsip dalam tetiap operasyen bantu tasah ngenyit. — RBI

MUKAH, 10 Mac — Siku indu peranak menua tu bebadi nyawa pengudah eksiden kerita kediri empu ba Kilometer 46, Jalai Mukah–Balingian, Balingian urung pukul 7.00 pagi tadi.

Ketuai Polis Pelilih Mukah, DSP Muhamad Rizal Alias ​​madah, eksiden nya ngaul sebuah kerita Perodua Myvi ke dideriba mansa kediri ari tunga Bintulu nuju Mukah.

Nitihku iya, lebuh datai ba palan penusah nyadi, entukar ke dideriba mansa dipelabaka lenyau jaga sebedau tepawah ngagai kandang semak betentang ba sepiak kanan jalai alun.

“Mansa ke enda ngeleda pengudah penusah nya dibai ngena ambulans ngagai Klinik Pengerai Balingian ngambika diperubat.

Taja pia, indu ke beumur 33 taun ke gawa nyadi pemantu kedai dientaska pemesai perubat midang ketegal balat bakal ba pala,” ku iya ba sebengkah penerang sehari tu tadi.

Ku iya, asil pansik tumu tetemuka gaya jalai ba palan penusah nyadi iya nya jalai dua hala ke betiku sereta lichin. Kerita mansa mega balat rusak ba selampur tubuh.

Diatu kes nya benung dipansik ari baruh Seksyen 41(1) Akta Pengangkutan Jalan 1987.

Berindik enggau nya, mensia mayuh ke bisi penerang bekaul enggau penusah tu dipinta datai ke mua mantu tasat nengah chara betanya ngagai Pemesai Pemansik Kes, Inspektor Mohd Rahmat Jalimin ba lumur 011-31627137 tauka sebarang balai polis ke besemak. — RBI

KAPIT, 10 Mac — Kaban Parlimen Kapit, YB Dato Sri Alexander Nanta Linggi nyangkal tuduh ti bisi disadung ba media rama ti madahka iya kala mansutka penerang bekaul enggau kerejasama politik.

Iya nyemetak madahka penerang ke dikerembaika nya nadai kala dikeluarka iya lalu tuduh nya enda amat sereta bula.

“Aku bebendar deka nyangkal tuduh ke udah ‘viral’ apin lama ke udah ti madahka aku kala mansutka sekeda penerang bekaul enggau kerejasama politik.

Aku nadai kala mansutka penerang nya lalu nya enda amat,” ku iya nengah penerang ba laman Facebook rasmi.

Kenu ku iya, pengawa sekeda piak ti nadai betanggungjawap nyadung penerang ti enda betul amat ngasaka ati laban tau nyaruka bemacham piak.

Berindik enggau nya, iya ngelalau mensia mayuh ngetu ngerembaika penerang ke enda dientas lalu nentuka pengamat penerang nengah chara meresa pengamat dulu sebedau dikunsi ba media rama.

Alexander Nanta ke mega Kaban Parlimen sitak Kapit nyemetak madah, pengawa ngerembaika berita pelesu ukai semina ulih ngasuh saru penemu, tang mega bisi potensial ngeruga nama individu enggau pengelantang mensia mayuh enti enda diputarka enggau betanggungjawap. — RBI

BAU, 10 Mac — Raban Penyaga Pengelikun Mensia Mayuh Malaysia (APM) Pelilih Bau bejalaika pengawa enggau lengkas bejalaika operasyen mindahka nembiak Sekolah Kebangsaan (SK Segong) berindik kandang sekula nya ampuh bah pengudah ujan enda ngengetu ti nuntung pelilih nya.

Operasyen mindah nya dipejalaika nyadika chara pengelikun dikena nentuka semua nembiak likun lebuh tikas ai berengkah niki sereta ngeruga rampa sekula.

Taja pan gaya nya balat ngenyinuka ati lebuh bala nembiak sekula nya patut ninggalka sekula endur sida belajar, tang pengelikun sida mengkang dikemeratka piak bekuasa.

Bala nembiak nya mega diripotka meri kerejasama ke manah sepemanjai proses mindah ti dipejalaika kaban APM.

APM Pelilih Bau deka terus matau kandang endur ke kena penusah nya ari sesiti maya ngagai sesiti maya dikena nentuka gaya nya seruran ulih dijaga sereta sedia ngambi atur lengkas nyema bisi pematut.

Mensia mayuh mega dilalau ngambika seruran nemu pemansang gaya hari sereta nitihka atur piak bekuasa ungkup pengelikun begulai.

Dikearapka tikas ai deka surut enda lama agi ngambika sesi sekula ulih diteruska baka selama enggau chara ti likun. — RBI

KUCHING, 10 Mac — Ketegal ujang ke enda ngengetu kenyau ari pagi Hari Satu ngujungka sekeda kandang endur ngelingi Kampung Tabuan Dayak ditu ngasaika tikas ai majak niki ngujungka jalai alun enda ulih ditengah sementara.

Nitihka penerang ari Angkatan Pertahanan Awam Malaysia (APM) Pelilih Kuching, pengawa matau keterubah dipejalaika dikena beratika gaya ke diatu sereta nentuka pengelikun peranak ba kandang endur ke kena penusah nya seruran dijaga.

Asil pengawa matau nya tetemuka tikas ai ba endur nya ngayanka gaya nurun taja pan jalai alun agi bedau ulih ditengah.

“Entara pekara ti dikelala iya nya penanggul sistem parit ti sumbat, ngujungka ai tejanggal ba beberapa kandang endur,” ku penerang nya.

Penerang nya mega madahka raban pematau ti mungkur pemesai enggau raban APM Kuching udah bejalaika tanggungpengawa sida enggau penuh komitmen dikena nentuka tetiap pemansang ba kandang endur ti kena bungkur ulih dipatau enggau silik.

Berindik enggau nya, mensia mayuh dilalau ngambika seruran bejejaga sereta nitihka atur piak bekuasa dikena nentuka pengelikun semua piak terus dijamin. — RBI

Bungai kechala ukai semina nyadi kereban ti beguna dalam mayuh macham pemakai asal baka laksa enggau nasi ulam, tang utai tumbuh herba tu mega muntang ditanam ba kandang menua asal enti chara nanam ti betul dikemeranka.

Nitihka penerang ari Opis Betanam Betupi Malaysia, pun kechala tauka kechala ti dikelala ari sukut saintifik enggau nama Etlingera elatior iya nya utai tumbuh tropika ti dipelabaka datai ari pelilih menua Asia Tenggara, lalu ulih manggai entara empat ngagai lima meter peninggi enti udah tumbuh manah.

Pun kechala tu tumbuh enggau manah ba endur tanah ti embap ti kaya enggau utai organik.

Iya mega engkeman ditanam ba endur ke ayung sereta lindap lalu mega ba endur ke embap.

Kechala tu suah ditemu tumbuh semak sungai tauka kandang endur ti embap, nya alai iya engkeman ditanam ba kebun, rumah tauka kandang endur betanam betupi ti mit.

Ari sukut pengerembai, pun kechala suah agi ditanam ngena paung.

Dikena nentuka penumbuh ti manah agi, penyauh nanam entara satu ngagai dua meter entara pun dikemendarka ngambika penumbuh nya ulih mansang enggau manah.

Utai tumbuh tu deka tumbuh mayuh enggau batang ti segala sereta daun ti panjai bechura gadung.

Kesuah iya, pun kechala deka berengkah mansutka bungai pengudah urung setaun ditanam.

Dikena ngulihka bungai ti bekualiti, iya begunaka pengawa ngumpul lebuh iya bedau mansang penuh nengah chara nebang ba pun batang.

Kelimpah ari mayuh dikena dalam pemakai menua tu, pun kechala mega ngembuan mayuh macham guna dalam pengawa asal.

Batang iya dipelabaka ulih dikena ngubat penanggul ‘isi kembai’, lalu buah iya dipadahka ulih mantu meransang pengingin makai.

Opis Betanam Betupi mega meransang orang ti bisi ati deka nanam utai tumbuh herba tu minta iring ke silik agi pasal chara nanam, ngintu enggau chara ngetau asil ti betul dikena nentuka asil ti bekualiti. — RBI

SAMARAHAN, 10 Mac — Peranak di Samarahan kelebih agi ba kandang endur ke baruh, berisiko ampuh bah dilalau seruran bejejaga berindik ari ujan ke enda ngengetu kenyau tumu pagi tadi.

Sekeda kandang endur baka Samarindah ba Lorong 29, Lorong 30 dituntung penusah ampuh bah ngenyit naka jam 8:30 pagi tu.

Naka kediatu ujan mengkang bangat. Ngarapka peranak ba genturung ti kena ampuh tu nyikap diri sereta beratika tikas ai.

Peranak ba kandang ke berisiko ampuh dilalau seruran ngadang, nyikap diri enggau sebarang penusah ti enda disadang nyadi. — RBI

SRI AMAN, 9 Mac — Kaban Parlimen Sri Aman, Dato Sri Doris Sophia Brodie, udah bejadika Pengerami Nutup Woksyop Ngenegapka Pengelandik ICT ungkup Ketuai Komuniti ke diatur ba Palan Pemansang Pengelandik Sarawak (Sarawak Skills) Sri Aman, lemai tu tadi.

Woksyop sebagi ari siri keterubah ungkup taun 2026 lalu keempat diatur kenyau ari program tu diberi kelala pun taun 2025, enggau penyereta 25 iku ketuai komuniti ari kandang ngelingi.

Dalam jaku iya, iya nyemetak madahka bala ketuai ba renggat baruh patut landik ba teknologi sereta ngembuan pengelandik asas dalam bidang teknologi pemadah setipak enggau pemansang dunya digital kemaya hari ti jampat.

Nitih ku iya, nguasa pengelandik baka ngena Microsoft Word, Google Workspace, ChatGPT enggau ngatur dokumen rasmi beguna amat dalam mantu ngangkatka pemanah pentadbiran, kelimpah ari ngenegapka pengawa ngenataika penerang enggau servis ngagai komuniti setempat.

Iya mega ngenataika pengaga ati ngagai bala pengajar ti bekunsika penemu enggau peneleba sepemanjai woksyop nya, kelimpah ari meri pengaga ati ngagai semua pesereta ti mujur nembuka program nya.

Berebak enggau nya, iya ngarapka bala pesereta ulih ngena penuh penemu enggau pengelandik ke diulih sida dikena ngangkatka pemanah pengawa sida nyadi ketuai komuniti.

Woksyop Ngenegapka Pengelandik ICT ungkup Ketuai Komuniti tu diatur nengah kerejasama Palan Servis Komuniti P.202 Sri Aman enggau Palan Pemansang Pengelandik Sarawak Sri Aman.

Sama bisi datai ba pengawa nutup pengerami nya Menijar Pengelandik Sarawak Sri Aman, Pn. Dester Jagit enggau; Pemesai Pelilih Menua Pantu, Enr. Raca Mulong; Temenggong Leonard Libau; Temenggong Mohd Shah; Pemanca Daniel Saweng; pia mega beberapa iku penghulu enggau ketuai raban bansa menua ngelingi. — RBI

KUCHING, 9 MAC – Struktur Jematan Batang Lupar 1 sepemanjai 4.84 kilometer dipelabaka deka disambung penuh dalam minggu tu lalu nyadika renggat kepenudi pengawa ngaga iya.

Pengawa kepenudi jematan nya diatu benung dipejalaika enggau jampat sereta bejimat.

Direktor Opis Kereja Raya (JKR) Sarawak, Datu Dr Cassidy anak Morris nyemetak madahka mensia mayuh dipinta besabar laban projek tu dipelaba tembu penuh tengan bulan Mei 2026.

Nitih ku iya lebuh dirandau Ruai Berita Iban, jematan tu deka ngemuntangka pejalai, ngemanahka agi penyambung sereta meri penguntung ekonomi ngagai peranak ke diau ngelingi.

“Kereja kepenudi benung dipejalaika enggau pemerat diberi ngagai pengelikun enggau kualiti struktur, dikena nentuka jematan tu ulih dikena enggau likun lebuh tembu ila,” ku iya.

Projek nya dikearapka ulih nyadi siti ari batang penyambung, lalu ari nya ulih ngemanahka agi akses ngagai pelilih menua ngelingi sereta nyukung pemansang timpuh panjai nengeri Sarawak. -RBI

BINTANGOR, 9 Mac — Empat premis dagang di Bintangor ditemu nitihka peminta pengelikun ari nagang penusah angus pengudah pengawa meresa Munas Penusah Angus (MBK) beserimbai enggau musim pengerami ti dipejalaika Balai Bomba enggau Penyah Penusah (BBP) Bintangor, sehari tu.

Pengawa meresa ke diatur ari pukul 3.20 lemai nyentuk 4.20 lemai nya ngaul premis Inn Cheong Hardware Sdn Bhd, Hock Hing Motor, C & K Enterprise enggau Kedai Chee Seng (1989).

Asil peresa tetemuka semua premis dalam gaya ke manah sereta nitihka penetap ari baruh Akta Perkhidmatan Bomba 1988 (Akta 341). Nadai perambu notis dikeluarka lalu nadai penyalah ditemu maya pengawa meresa nya.

Kelimpah ari pengawa meresa nya, raban bomba mega bisi meri licha bekaul enggau chara ngena perengka pengerara api sereta mega meri lalau ngagai menijar tauka pengari pengatur premis nya.

Sida mega dikeingat ngambika seruran nentuka kereban dikena nyeliahka penusah angus baka perengka pengerara api dalam gaya ke manah sereta ulih dikena nyema bisi penusah angus nyadi.

Operasyen meresa nya dipejalaika PBK I Bakar bin Ujang enggau PBB Jimmy anak Kasin. -RBI