PADAWAN, 10 Mac – Pengari Komiti Pemansang enggau Pengelikun Genturung Pendiau (JKKK) ari Kampung Emperoh Karu enggau Kampung Simboh nemuai meri basa ngagai Sapit Menteri Perengka Pengangkut (Langit enggau Jalai Alun) Sarawak ke mega Kaban Kunsil Nengeri (ADUN) ungkup N.19 Mambong, Datuk Dr Jerip Susil, ba opis iya di Kuching.

Penemuai nya betuju deka madah senentang pejalai projek pemansang papan pengentap pendiau ke udah tembu sereta mega projek ke agi dipejalaika ba kedua-dua buah palan nya.

Rambau aum nya, pengari JKKK mega bisi mantaika sekeda isu komuniti ti patut diperatika, nyengkaum penanggul ampuh bah, jalai genturung pendiau ti rusak sereta pematut masang lampu jalai ba lurung genturung pendiau dikena ngangkatka pengelikun peranak.

Kelimpah ari nya, sida mega merambu pemansang palan rekreasyen enggau jalai “juging” ngelingi padang main bol dikena ngelakuka gaya pengidup bepengerai ba komuniti lokal.

Sama bisi dikerandau iya nya perambu ngatur program Mantar Gawai 2026 ti dipeda ulih ngenegapka penyerakup sereta nerenakka semengat begulai ba peranak rumah panjai.

Penemuai nya mandangka komitmen ketuai komuniti ti seruran bebendar gawa rat enggau pengari rayat dikena nentuka pemansang menua pesisir terus ditegapka ungkup pengelantang rayat, kelebih agi ba kandang DUN Mambong.-RBI

KUCHING, 10 Mac — Pengawa mutarka penusah ngenyit di Sarawak dipejalaika bepelasarka penerang teknikal enggau data ke tulin ke diulih ari ejensi ke bekaul dikena nentuka pengelikun rayat seruran dijamin.

Chairman Komiti Mutarka Penusah Ngenyit Nengeri (JPBN) Sarawak, Datuk Amar Douglas Uggah Embas madahka tetiap pemutus operasyen nyengkaum pengawa mindahka mansa enggau pengawa muka Palan Pengenduh Sementara (PPS) digaga bepelasarka penerang ti diberi ejensi teknikal baka Opis Parit enggau Entali Ai tauka Opis Meteorologi Malaysia.

Nitih ku iya, pengawa ngena data hidrologi, perambu gaya hari enggau analisis teknikal ngemendarka piak bekuasa ngaga penyikap tumu sereta ngambi atur ke betul agi dalam napi situasyen penusah ngenyit, kelebih agi ampuh bah ke udah nyadi berenggat ba beberapa kandang menua di Sarawak.

Chara bepelasarka data tu mega mantu piak bekuasa merambu sereta ngatur operasyen mutarka penusah ngenyit enggau sistematik agi dikena nentuka pengelikun mensia mayuh seruran dikemerat.

Penerang nya dikunsi nengah Facebook Bahagian Operasyen Opis Bomba enggau Penyah Penusah Malaysia (JBPM) Sarawak. — RBI

KUALA LUMPUR, Mac 10 — Sarawak terus ngemeratka pemesai guna autonomi Raban Bekuasa Perintah Lokal (PBT) nengeri tu dalam Aum Menteri Pengawa Berumah enggau Kaunsil Kandang Menua enggau EXCO-EXCO Pengawa Berumah enggau Kandang Menua Nengeri (MEXCOPT).

Aum ninting taun nya bechairmanka Menteri Pengawa Berumah enggau Kaunsil Kandang Menua, Nga Kor Ming, sereta ngaul pengari perintah nengeri ari serata menua Malaysia berandauka pekara pentadbiran enggau pemansang PBT.

Sarawak nyemetak madahka nengeri tu begulai enggau Sabah ngembuan kuasa autonomi dalam pentadbiran PBT, enda sebaka enggau kaunsil kandang menua di Semenanjung Malaysia.

Ari penyampau 158 PBT di Malaysia, 27 di Sarawak seraya 25 di Sabah.

Nitihka penerang ke dikunsi Sapit Premier Sarawak, Datuk Amar Professor Dr Sim Kui Hian, aum baka MEXCOPT nyadi pelasar beguna dikena ngingatka Perintah Besai enggau deligit nengeri ke bukai pasal penuduk autonomi Sabah enggau Sarawak.

“Taja pan chara “one policy fits all” suah dikena ba renggat nasional tang enda tentu engkeman ungkup Sarawak berindik ari pemesai tanah enggau pemar geografi enti dibandingka enggau nengeri bukai.

“Taja pia, Sarawak tetap komited bekerejasama enggau perintah Besai.

“Enti undang-undang Parlimen Malaysia tauka garis lalau Opis Menteri Pengawa Berumah enggau Kaunsil Kandang Menua (KPKT) ditemu engkeman, Sarawak deka ngalih tauka ngubah undang-undang nengeri ngambika setipak enggau undang-undang Perintah Besai,” ku tulis iya nengah Facebook iya seharitu.

Berebak enggau nya, aum nya mega nyadi pengingat ti besai reti lebuh pemesai servis mensia mayuh Perintah Besai ari Sarawak ngambi peluang betemu sereta besilih jaku enggau penemu.

Ari sukut protokol, Sarawak ngemeratka pemesai guna bebasaka penuduk nengeri dalam pengawa rasmi Perintah Besai.

Ke pemadu baru, penuduk Sarawak dalam protokol Perintah Besai diatu diengkah dulu ari nengeri bukai, lalu ditangkan Sabah, setipak enggau ubah pengudah pekara nyadi dalam bulan Disember 2023, lebuh Yang di-Pertuan Agong minta Premier Sarawak mindah ngagai mija besai maya pengawa ngangkat sumpah Kabinet Perintah Penyerakup.

Nitihka protokol Perintah Besai, Premier Sarawak enggau Kepala Menteri Sabah ba penuduk ke sebaka enggau Sapit Menteri Besai Malaysia, lalu Menteri Besai enggau Kepala Menteri nengeri bukai ba penuduk ke sebaka enggau Menteri Perintah Besai. -RBI

PAKAN, 10 Mac – Pengawa ngelaban penyalah gian dadah begunaka pengawa begempung ari mayuh bengkah ejensi penerit adat berindik ari pengawa nyadung utai ke enda beradat ke dipelabaka bisi nyadi ba sekeda kandang endur.

Kaban Kunsil Nengeri (ADUN) Pakan, Tan Sri William Mawan Ikom madah, gaya nya mai reti pengawa ngelaban penanggul nya enda ulih ditanggung sebengkah piak aja, tang lebih agi begunaka kerejasama ti rapit ti ngaul perintah, opis bekuasa enggau komuniti lokal.

Kenu ku iya, penanggul gian dadah ke majak ngirauka ati kelebih agi ba raban nembiak menua pesisir patut diberi perati ke berat laban nya bekaul rat enggau pengidup nembiak rebak baru jemah ila.

“Faktor kaul sosial bejalaika tanggungpengawa ke besai dalam ngasuh nembiak rebak baru nyadi teparuk. Dalam mayuh kes tu, gian berengkah lebuh sida dibai bala bakih sebedau pengujung iya ngaul diri jauh agi enggau pengawa salah tu,” ku iya.

Iya madah munyi nya ngagai media pengudah bejadika Pengerami Ngelancharka SKAS Tikas DUN Pakan, sehari tu tadi.

Ku iya nambah, bisi mega peluang sekeda kes nyadi berindik ari kurang pengawa matau nembiak, nyengkaum ngempung sida, palan ke suah dilawa sida enggau rampa rama ke tau ngachau ulah sida.

“Faktor rampa endur diau mega ulih ngeruga pemansang rama nembiak rebak baru, kelebih agi lebuh sida mayuh agi awak di luar rumah sereta kena bemacham pekara negatif,” ku iya nerang.

Berindik enggau nya, iya nyemetak madahka mensia mayuh mega patut bejalaika tanggungpengawa nengah chara ngintu komuniti diri empu lalu begulai nempa kerejasama ti tegap dikena mutar sereta ngurangka penanggul nya.

Nitih ku iya, entara atur ke diatu sereta deka dipejalaika nyengkaum nambahka program penyedar enggau komuniti nengah pelasar baka Rukun Tetangga kelimpah ari kerejasama enggau Ejensi Anti Dadah Menua dikena nambahka penyedar mensia mayuh pasal penusah dadah.

“Ba aku, penanggul tu isu ke berat endar lalu enti enda diputarka enggau lengkas, iya bisi potensial ngeruga penegap mensia mayuh enggau menua dudi hari,” ku iya.

KUALA LUMPUR, 10 Mac — Opis Menteri Pelajar Malaysia (KPM) madahka hari besai tambah kena 18 Mac 2026 (Hari Tiga) ungkup semua sekula di serata menua beserimbai enggau pengerami Hari Raya Aidilfitri 2026.

Nitihka penerang ari Menteri Pelajar, pengawa meri hari besai tambah tu dikena nyendiaka ruang ngagai bala pengajar, nembiak, enggau apai indai nyendiaka diri ngintu Hari Raya Aidilfitri enggau chara ke lebih teratur sereta lantang.

Bepelasarka Kalendar Akademik Sesi 2026, sekula dalam Kumpula A deka diungkupka hari besai tambah kena 19 Mac 2026 (Hari Empat), lalu sekula dalam Kumpulan B deka diungkupka dua hari besai tambah kena 19 enggau 20 Mac 2026 (Hari Empat enggau Hari Lima).

Opis Menteri ngemeratka atur tu setipak enggau pengawa KPM ti seruran ngemeratka pengelantang pendiau pengereja pengawa pelajar di serata menua. — RBI

JULAU, 10 Mac — Raban Penyaga Orang Periman Malaysia (APM) Pelilih Julau udah meri bantu tumu ngagai tudah ke dituntung penusah eksiden di Jalai Entabai semak simpang Batu Matop, lemai tu tadi.

Nitihka penerang ari APM Julau, lima iku raban udah dianjung ngagai palan penusah nyadi pengudah nerima kangau ngenyit urung pukul 4.30 lemai bekaul enggau penusah ke nyadi ti ngaul sebuah entukar pikap ke dipelabaka tepawah sebedau labuh ngagai tisi jalai alun.

Aksiden nya mungkur tujuh iku individu ke beumur antara 12 ngagai 58 taun.

Raban penyelamat APM ke datai ba endur nya terus meri bantu tumu ngagai enam iku sida ke bakal, seraya siku agi diripotka nadai bakal.

Semua sida udah nya dibai ngagai Klinik Pengerai Pelilih Julau ngena ambulans APM Julau ngambika diperubat enggau silik agi.

Berebak enggau nya, APM Julau ngelalau mensia mayuh ngambika seruran bejimat maya deriba lalu lengkas betelefon ngagai lumur penusah ngenyit 999 tauka talipaun APM Julau ba lumur 011-4037 5527 nyema bisi sebarang penusah ngenyit nyadi. -RBI

KAPIT, 10 Mac – Menteri Kereja Raya Malaysia, Dato Sri Alexander Nanta Linggi nesau raban pengereja pengawa perintah ditu bekerejasama rat nyadi siti tim nyendiaka servis ngenataika penyulut dikena nangkup pengarap enggau peminta mensia mayuh ke tinggi.

Kelimpah ari nerenakka semengat kereja beraban dalam ejensi, kerejasama entara perintah enggau ketuai politik endang pemadu beguna, ti nyadi pelasar dikena nentuka pemujur pengawa bejalaika mayuh macham projek pemansang ti ngaul mayuh bengkah ejensi.

“Baka kami ke nyadi pengari rayat di Kapit, kami bisi kaul kereja ke manah entara pangan diri, nya alai asil ari nya mayuh projek pemansang ke besai ulih dipejalaika enggau mujur” ku Nanta bejaku ba gempuru ti diatur Opis Residen enggau Opis Pelilih Menua (RANDO) ujung minggu tu tadi.

Nanta ke mega Kaban Parlimen P215 Kapit madah, dalam arena politik, ukai muntang nya ngulih sereta minta belanja dikena melanja bemacham projek pemansang nya.

“Taja pia ketegal kerejasama kereja ke manah entara pengari rayat ditu , kami ulih bulih iya. Nya meh pemesai guna kereja beraban,” terang Nanta.

Nanta ke mega chairman URDA madah, URDA udah bejalaika tanggungpengawa ke beguna amat dikena ngenyampatka pemansang Kapit seraya nambah, kenyau ari tiga taun tambah iya nyadi Menteri Kereja , beberapa projek besai udah dipejalaika ditu ba mayuh bengkah renggat pemansang.

Tu nyengkaum Balai Polis Kapit ke baru diperambu, kolej MARA, perambu jematan baru menua Kapit ke semak jematan di Nanga Yong/Belawai meraka Sungai Rajang beungkus urung RM1 bilion.

Residen Kapit, Elvis Didit ke bisi bejaku dulu ari nya ba pengerami nya madahka gempuru nya nyadika tanda terima kasih ngagai bala staf ketegal pengangkun enggau servis ke chukup manah sekumbang setaun ke udah.

Bisi begulai ba gempuru nya Sapit Menteri ba Opis Premier Sarawak (Undang-Undang enggau Adat Asal) Datuk Jefferson Jamit Anak Unyat ke mega Kaban Kunsil Nengeri (ADUN) N63 Bukit Goram, Kaban Kunsil Nengeri (ADUN) N61 Pelagus, Wilson Nyabong Ijang, Sekretari Politik ngagai Menteri Kereja, Datuk Alvin Runggah, ketuai mayuh bengkah opis perintah, ketuai raban bansa enggau staf RANDO. -RBI

MIRI, 10 Mac – Balai Bomba enggau Penyah Penusah (BBP) Lutong udah ngatur Kimpin Penyedar Pengelikun Penusah Angus enggau demonstrasyen ngena perengka pengerara api ungkup mensia mayuh ba Bazar Ramadan Lutong, palan entepan kerita New World Mart (Miri) Sdn Bhd, seharitu tu tadi.

Program ke diatur ari pukul 4.30 lemai nyentuk 6.00 lemai nya diatur beserimbai enggau Kimpin Pengelikun Penusah Angus Musin Pengerami 2026 Opis Bomba enggau Penyah Penusah (JBPM) Sarawak ba renggat Balai Bomba enggau Penyah Penusah Lutong.

Nyerumba program nya, raban bomba udah ngatur demonstrasyen pengelikun ari penusah angus ungkup 10 iku orang ke bisi datai kelimpah ari nyuaka 30 bup kimpin pengelikun ari penusah angus musin pengerami ngagai orang dagang ba Bazar Ramadan Lutong.

Kelimpah ari nya, 100 iti bup mega bisi disadung ngagai bala temuai ke datai ngagai bazar nya dalam pengawa nambahka penyedar mensia mayuh senentang chara nyeliahka penusah angus, kelebih agi maya musin pengerami.

Ketuai Balai Bomba enggau Penyah Penusah Lutong, PBT II Henry anak Jugah, madahka program nya ngembuan tuju deka meri penerang tumu ngagai mensia mayuh enggau orang dagang senentang atur pengelikun ari penusah angus dikena nyeliahka sebarang penusah ke enda dikedekaka nyadi.

“Nengah kimpin tu, mensia mayuh ulih meretika pemesai guna atur nagang penusah angus sereta chara bejalaika pengawa ke betul nyema bisi penusah ngenyit nyadi,” ku iya.

Sama bisi datai Menijar New World Mart (Miri) Sdn Bhd, Kan Wrn Chung.

Entara pemesai enggau kaban ti ngaul diri iya nya PBK II (KUP) Awang Arizal bin Awang Affandy, PB Francklin Jerry, PBB Gabriel anak Gundi, PBB Nashrulhisyam bin Kudri, PBB Abang Azri bin Abang Raya enggau PBB Georgetian bin Guden. -RBI

KANOWIT, 10 Mac — Operasyen Ngiga enggau Nyelamat (SAR) ungkup kes orang ke lenyau ba kandang kampung semak Jalai Penyulau/Lukut, Kanowit diteruska ngagai hari ketiga sehari tu enggau operasyen berengkah tumu pukul 8.00 pagi.

Operasyen ke diatur ba kandang belakang Rumah Ricky betuaika Komander Operasyen, Ketuai Polis Pelilih Kanowit, DSP Junical Anak Ujal, ke mega meri penerang ngagai semua pemesai sebedau pengawa ngiga nya berengkah.

Sepenyampau 46 iku raban ari mayuh bengkah ejensi ngaul diri dalam operasyen nya, iya nya 10 iku raban Polis Diraja Malaysia (PDRM), lima iku ari Opis Bomba enggau Penyah Penusah Malaysia (JBPM), enam iku ari Raban Penyaga Orang Periman Malaysia (APM) enggau 25 iku peranak rumah panjai.

Raban penyelamat nya dibagi ngagai tiga raban ngambika ngiga ba kandang kampung dalam radius urung tiga ngagai lima kilometer ari palan operasyen.

Taja pia, nyentuk ke sehari tu tudah ke lenyau bedau temu.

Menua ke bebukit sereta paya, sereta mega bisi beberapa sungai mit, dikelala nyadi entara batang penanggul ke ngasuh operasyen ngiga nya betapi enggau pemar.

Dikena ngenegapka agi pengawa ngiga tudah nya, operasyen nya mega ngena sekeda aset nyengkaum entukar pikap enggau Unit K9 Opis Bomba enggau Penyah Penusah Malaysia.

PAKAN, 10 Mac – Komuniti dilalau beambi ulih ari Bantu Barang Pemun Sarawak (SKAS) Sarawak dikena nangkup guna pemun ruang bilik baka pemakai enggau barang ke diguna ninting hari sereta nyeliahka pengawa ke enda manah ke pengerai ti tau ngeruga pengelantang diri enggau diri sebilik.

Kaban Kunsil Nengeri (ADUN) Pakan, Tan Sri William Mawan Ikom madah, bisi sekeda individu ke ditemu betukar tauka nyual bantu nya dikena ngulihka mata duit ungkup tuju ke nadai meri penguntung.

Berindik enggau nya, iya ngingatka bala penerima ngambika ngena bantu ke diberi enggau betanggungjawap.

Berebak enggau nya, iya madahka pengawa Perintah Sarawak meri kelala SKAS patut diberi puji laban inisiatif nya meri pengelantang ngagai rayat, kelebih agi sida ti begunaka bantu dikena nampung ungkus pengidup ninting hari.

Nitih ku iya, bantu nya mandangka komitmen perintah ti terus dalam nentuka pengelantang pendiau rayat seruran dijaga taja betapi enggau pemar ekonomi dunya ti enda tentu.

Ku iya, program tu beguna amat kelebih agi ngagai raban ke kurang penatai pemisi laban nya mantu sida ngulihka barang pemun ke diguna dalam pengidup sida ninting hari.

“Bantu baka tu mandangka pengibuh bala ketuai nengeri ti seruran ngemeratka pengelantang rayat.

“Kitai patut beterima kasih ngagai pengepuh bala ketuai ti nentuka rayat ulih ngasaika pengidup ti lantang agi,” ku iya lebuh bejadika Pengerami Ngelancharka SKAS Renggat DUN Pakan ba Dewan Masyarakt Pakan seharitu tadi.

Ku iya, taja pan penyampau tubuh peranak Sarawak enda entu mayuh enti dibandingka enggau nengeri bukai, tang nengeri tu ngembuan pengeraja asal ke manah ke ulih dikena ungkup pemansang enggau pengelantang rayat.

“Nengah pengawa baka tu (SKAS), ambika rayat ulih nyendiaka utai ke diguna sida sebilik,” ku iya nerang. – RBI