MUKAH, 10 Mac — Peranak di Bagi Menua Mukah deka ngasaika perengka guna penyambung jalai ti lanchar agi lebuh Jematan Batang Igan disadang deka dibuka ngagai mensia mayuh kena 16 Mac 2026 tu ila.

Nitihka penerang berita ari Opis Kereja Raya (JKR) Sarawak, pengawa muka jematan nya dikearap ulih meri pemaik ke besai ngagai peranak menua nya, kelebih agi ba pengawa ngemudahka atur pejalai ninting hari kelimpah ngurangka bepanggai ba servis feri ke sebedau tu dikena meraka Batang Igan.

Perengka guna infrastruktur nya mega dikearapka ulih nambahka tikas penyambung ba kandang menua nya sereta nyukung pemansang aktiviti ekonomi enggau rama ba genturung pendiau ti ngelingi.

Berebak enggau nya, pengawa muka jematan nya mega nyadi berita manah ngagai peranak di kandang menua nya lalu ulih dikumbai pemeri khas beserimbai enggau pengerami Aidilfitri ke deka datai enda lama agi.

JKR Sarawak nandu baru komitmen sida deka terus nyendiaka infrastruktur ti bekualiti tinggi nyadi pengawa ti enda ngetu dikena ngangkatka pengelantang enggau kualiti pengidup rayat di nengeri tu. — RBI

MIRI, 10 Mac – Balai Bomba enggau Penyah Penusah (BBP) Lutong udah ngatur Kimpin Penyedar Pengelikun Penusah Angus enggau demonstrasyen ngena perengka pengerara api ungkup mensia mayuh ba Bazar Ramadan Lutong, palan entepan kerita New World Mart (Miri) Sdn Bhd, seharitu tu tadi.

Program ke diatur ari pukul 4.30 lemai nyentuk 6.00 lemai nya diatur beserimbai enggau Kimpin Pengelikun Penusah Angus Musin Pengerami 2026 Opis Bomba enggau Penyah Penusah (JBPM) Sarawak ba renggat Balai Bomba enggau Penyah Penusah Lutong.

Nyerumba program nya, raban bomba udah ngatur demonstrasyen pengelikun ari penusah angus ungkup 10 iku orang ke bisi datai kelimpah ari nyuaka 30 bup kimpin pengelikun ari penusah angus musin pengerami ngagai orang dagang ba Bazar Ramadan Lutong.

Kelimpah ari nya, 100 iti bup mega bisi disadung ngagai bala temuai ke datai ngagai bazar nya dalam pengawa nambahka penyedar mensia mayuh senentang chara nyeliahka penusah angus, kelebih agi maya musin pengerami.

Ketuai Balai Bomba enggau Penyah Penusah Lutong, PBT II Henry anak Jugah, madahka program nya ngembuan tuju deka meri penerang tumu ngagai mensia mayuh enggau orang dagang senentang atur pengelikun ari penusah angus dikena nyeliahka sebarang penusah ke enda dikedekaka nyadi.

“Nengah kimpin tu, mensia mayuh ulih meretika pemesai guna atur nagang penusah angus sereta chara bejalaika pengawa ke betul nyema bisi penusah ngenyit nyadi,” ku iya.

Sama bisi datai Menijar New World Mart (Miri) Sdn Bhd, Kan Wrn Chung.

Entara pemesai enggau kaban ti ngaul diri iya nya PBK II (KUP) Awang Arizal bin Awang Affandy, PB Francklin Jerry, PBB Gabriel anak Gundi, PBB Nashrulhisyam bin Kudri, PBB Abang Azri bin Abang Raya enggau PBB Georgetian bin Guden. -RBI

#ruaiberitaiban#newsiban#beritaiban

Rindu | Titih | Kunsika

KANOWIT, 10 Mac — Operasyen Ngiga enggau Nyelamat (SAR) ungkup kes orang ke lenyau ba kandang kampung semak Jalai Penyulau/Lukut, Kanowit diteruska ngagai hari ketiga sehari tu enggau operasyen berengkah tumu pukul 8.00 pagi.

Operasyen ke diatur ba kandang belakang Rumah Ricky betuaika Komander Operasyen, Ketuai Polis Pelilih Kanowit, DSP Junical Anak Ujal, ke mega meri penerang ngagai semua pemesai sebedau pengawa ngiga nya berengkah.

Sepenyampau 46 iku raban ari mayuh bengkah ejensi ngaul diri dalam operasyen nya, iya nya 10 iku raban Polis Diraja Malaysia (PDRM), lima iku ari Opis Bomba enggau Penyah Penusah Malaysia (JBPM), enam iku ari Raban Penyaga Orang Periman Malaysia (APM) enggau 25 iku peranak rumah panjai.

Raban penyelamat nya dibagi ngagai tiga raban ngambika ngiga ba kandang kampung dalam radius urung tiga ngagai lima kilometer ari palan operasyen.

Taja pia, nyentuk ke sehari tu tudah ke lenyau bedau temu.

Menua ke bebukit sereta paya, sereta mega bisi beberapa sungai mit, dikelala nyadi entara batang penanggul ke ngasuh operasyen ngiga nya betapi enggau pemar.

Dikena ngenegapka agi pengawa ngiga tudah nya, operasyen nya mega ngena sekeda aset nyengkaum entukar pikap enggau Unit K9 Opis Bomba enggau Penyah Penusah Malaysia.

#ruaiberitaiban#newsiban#beritaiban

Rindu | Titih | Kunsika

PAKAN, 10 Mac – Komuniti dilalau beambi ulih ari Bantu Barang Pemun Sarawak (SKAS) Sarawak dikena nangkup guna pemun ruang bilik baka pemakai enggau barang ke diguna ninting hari sereta nyeliahka pengawa ke enda manah ke pengerai ti tau ngeruga pengelantang diri enggau diri sebilik.

Kaban Kunsil Nengeri (ADUN) Pakan, Tan Sri William Mawan Ikom madah, bisi sekeda individu ke ditemu betukar tauka nyual bantu nya dikena ngulihka mata duit ungkup tuju ke nadai meri penguntung.

Berindik enggau nya, iya ngingatka bala penerima ngambika ngena bantu ke diberi enggau betanggungjawap.

Berebak enggau nya, iya madahka pengawa Perintah Sarawak meri kelala SKAS patut diberi puji laban inisiatif nya meri pengelantang ngagai rayat, kelebih agi sida ti begunaka bantu dikena nampung ungkus pengidup ninting hari.

Nitih ku iya, bantu nya mandangka komitmen perintah ti terus dalam nentuka pengelantang pendiau rayat seruran dijaga taja betapi enggau pemar ekonomi dunya ti enda tentu.

Ku iya, program tu beguna amat kelebih agi ngagai raban ke kurang penatai pemisi laban nya mantu sida ngulihka barang pemun ke diguna dalam pengidup sida ninting hari.

“Bantu baka tu mandangka pengibuh bala ketuai nengeri ti seruran ngemeratka pengelantang rayat.

“Kitai patut beterima kasih ngagai pengepuh bala ketuai ti nentuka rayat ulih ngasaika pengidup ti lantang agi,” ku iya lebuh bejadika Pengerami Ngelancharka SKAS Renggat DUN Pakan ba Dewan Masyarakt Pakan seharitu tadi.

Ku iya, taja pan penyampau tubuh peranak Sarawak enda entu mayuh enti dibandingka enggau nengeri bukai, tang nengeri tu ngembuan pengeraja asal ke manah ke ulih dikena ungkup pemansang enggau pengelantang rayat.

“Nengah pengawa baka tu (SKAS), ambika rayat ulih nyendiaka utai ke diguna sida sebilik,” ku iya nerang. – RBI

#ruaiberitaiban#newsiban#beritaiban

Rindu | Titih | Kunsika

MUKAH, 10 Mac — Peranak di Bagi Menua Mukah deka ngasaika perengka guna penyambung jalai ti lanchar agi lebuh Jematan Batang Igan disadang deka dibuka ngagai mensia mayuh kena 16 Mac 2026 tu ila.

Nitihka penerang berita ari Opis Kereja Raya (JKR) Sarawak, pengawa muka jematan nya dikearap ulih meri pemaik ke besai ngagai peranak menua nya, kelebih agi ba pengawa ngemudahka atur pejalai ninting hari kelimpah ngurangka bepanggai ba servis feri ke sebedau tu dikena meraka Batang Igan.

Perengka guna infrastruktur nya mega dikearapka ulih nambahka tikas penyambung ba kandang menua nya sereta nyukung pemansang aktiviti ekonomi enggau rama ba genturung pendiau ti ngelingi.

Berebak enggau nya, pengawa muka jematan nya mega nyadi berita manah ngagai peranak di kandang menua nya lalu ulih dikumbai pemeri khas beserimbai enggau pengerami Aidilfitri ke deka datai enda lama agi.

JKR Sarawak nandu baru komitmen sida deka terus nyendiaka infrastruktur ti bekualiti tinggi nyadi pengawa ti enda ngetu dikena ngangkatka pengelantang enggau kualiti pengidup rayat di nengeri tu. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KAPIT, 10 Mac – Menteri Kereja Raya Malaysia, Dato Sri Alexander Nanta Linggi nesau raban pengereja pengawa perintah ditu bekerejasama rat nyadi siti tim nyendiaka servis ngenataika penyulut dikena nangkup pengarap enggau peminta mensia mayuh ke tinggi.
Kelimpah ari nerenakka semengat kereja beraban dalam ejensi, kerejasama entara perintah enggau ketuai politik endang pemadu beguna, ti nyadi pelasar dikena nentuka pemujur pengawa bejalaika mayuh macham projek pemansang ti ngaul mayuh bengkah ejensi.
“Baka kami ke nyadi pengari rayat di Kapit, kami bisi kaul kereja ke manah entara pangan diri, nya alai asil ari nya mayuh projek pemansang ke besai ulih dipejalaika enggau mujur” ku Nanta bejaku ba gempuru ti diatur Opis Residen enggau Opis Pelilih Menua (RANDO) ujung minggu tu tadi.
Nanta ke mega Kaban Parlimen P215 Kapit madah, dalam arena politik, ukai muntang nya ngulih sereta minta belanja dikena melanja bemacham projek pemansang nya.
“Taja pia ketegal kerejasama kereja ke manah entara pengari rayat ditu , kami ulih bulih iya. Nya meh pemesai guna kereja beraban,” terang Nanta.
Nanta ke mega chairman URDA madah, URDA udah bejalaika tanggungpengawa ke beguna amat dikena ngenyampatka pemansang Kapit seraya nambah, kenyau ari tiga taun tambah iya nyadi Menteri Kereja , beberapa projek besai udah dipejalaika ditu ba mayuh bengkah renggat pemansang.
Tu nyengkaum Balai Polis Kapit ke baru diperambu, kolej MARA, perambu jematan baru menua Kapit ke semak jematan di Nanga Yong/Belawai meraka Sungai Rajang beungkus urung RM1 bilion.
Residen Kapit, Elvis Didit ke bisi bejaku dulu ari nya ba pengerami nya madahka gempuru nya nyadika tanda terima kasih ngagai bala staf ketegal pengangkun enggau servis ke chukup manah sekumbang setaun ke udah.
Bisi begulai ba gempuru nya Sapit Menteri ba Opis Premier Sarawak (Undang-Undang enggau Adat Asal) Datuk Jefferson Jamit Anak Unyat ke mega Kaban Kunsil Nengeri (ADUN) N63 Bukit Goram, Kaban Kunsil Nengeri (ADUN) N61 Pelagus, Wilson Nyabong Ijang, Sekretari Politik ngagai Menteri Kereja, Datuk Alvin Runggah, ketuai mayuh bengkah opis perintah, ketuai raban bansa enggau staf RANDO.

SEBUYAU, 10 Mac — Raban Penyaga Pengelikun Mensia Mayuh Malaysia (APM) Pelilih Menua Sebuyau neruska pengawa matau kandang endur ti berisiko ampuh bah di Zon Sebangan dikena nentuka pengelikun peranak menua nya seruran dijaga.

Nitihka penerang ari APM Sebuyau, pengawa matau ti dipejalaika sehari tu tadi mungkur beberapa buah genturung pendiau iya nya Kampung Bajong Hulu, Kampung Bajong Hilir enggau Kampung Bajong Tengah.

“Asil pansik tetemuka tikas ai sungai ba semua kandang endur ke dipatau ngayanka trend nurun, seraya gaya ngelingi agi ulih dijaga,” ku penerang nya.

Penerang nya nambah, pengawa matau enggau beratika risiko ti enda ngetu deka terus dipejalaika ari sesiti maya ngagai sesiti maya dikena nentuka tikas nyikap diri seruran ba tikas ti optimum.

Singkang tu beguna dikena nentuka sebarang ubah ba gaya ulih dikelala enggau lengkas lalu atur ke patut ulih dipejalaika dikena nyamin pengelikun peranak ba kandang endur ke kena penusah nya. — RBI

LIMBANG, 10 Mac — Sapit Menteri Industri Pemakai, Komoditi enggau Pemansang Kandang Menua Sarawak ke mega Kaban Kunsil Nengeri ( ADUN) Bukit Kota, Datuk Dr Haji Abdul Rahman Haji Ismail bejalaika penemuai gawa ngagai endur tanah tusur di Jalai Buangsiol/Pandaruan, sehari tu tadi.

Penemuai nya ngembuan tuju deka beratika pejalai pengawa meresi jalai ti benung dipejalai kelimpah ari ngulihka penerang ke pemadu baru bekaul enggau gaya jalai ke kena penusah tanah tusur nya.

Rambau penemuai nya, iya mega mendingka penerang bekaul enggau pengawa bejalaika pengawa meresi ti dikenataika Injinir Opis Kereja Raya (JKR) Bagi Menua Limbang, Ir. Ts. Br. PMr. Louis Anak Jonathan Philip.

Sama bisi datai Sapit Residen Bagi Menua Limbang, Rozita Kulai; Pemesai Pelilih Menua Limbang, Sulaiman Engal; enggau Ketuai Bomba ke mega Ketuai Zon 7 Limbang, Opis Bomba enggau Penyah Penusah Malaysia, Ramlan Marajan. — RBI

BETONG, 10 Mac — Sapit Premier Sarawak, Datuk Amar Douglas Uggah Embas, ngelalau rayat nengeri tu ngambika terus ngenegapka penyerakup sereta meri sukung ti tegap ngagai Premier Sarawak, Datuk Patinggi Tan Sri (Dr) Abang Johari Tun Openg, deka neruska agenda pemansang nengeri taja pan betapi enggau mayuh pemar.

Iya nyemetak madahka penyerakup entara bansa enggau jalai pengarap nyadi aset pemadu beguna ngagai Sarawak, kelimpah ari nyadi pelasar ti ngemudahka pengawa perintah nengeri ngatur sereta bejalaika pemansang ungkup pengelantang rayat.

“Dalam gaya ke diatu ke mayuh pemar, kitai patut terus ngenegapka penyerakup entara kitai sereta meri sukung ke tegap ngagai Premier Sarawak ngambika iya ulih terus ngemansangka Sarawak sereta napi sebarang pemar ke datai ba jalai iya,” ku iya madah ngagai media pengudah bejadika Pengerami Nyuaka Bubur Lambuk enggau Spaoh Bersungkey Begulai enggau Ketuai ditu, Hari Enam tu tadi.

Ku iya nerang, asil ari penegap enggau penyerakup rayat, Sarawak diatu meda bemacham pemansang nyengkaum infrastruktur baru enggau projek ekonomi ti betuju ngangkatka tikas pengidup rayat, kelebih agi di Spaoh.

Entara projek ke diatu sereta deka meri pemaik ngagai kandang menua tu iya nya STOLport Bebuling, CPPC Bebuling, Jematan Sungai Paku ti disadang tembu bulan April tu, lalu pia mega bemacham projek bukai ari baruh pegai Ejensi Pemansang Bagi Menua Betong (BDDA).

Ba pengawa ke sama, Uggah mega nerangka pemendar RM20 juta ari Premier Sarawak dikena ngangkatmanah masjid enggau rumah temuai di Kampung Spaoh nyadi pemeri ke chukup besai reti ngagai peranak menua nya.

Kelimpah ari nya, pemeri mega bisi disuaka ngagai komuniti menua nya, nyengkaum 10 buah surau di Spaoh ke tiap bengkah nerima RM5,000, lalu Masjid Al Syifa Spaoh nerima RM10,000.

Sepenyampau 942 Ketuai Ruang Bilik nerima RM300 siku, lalu empat Komiti Pemansang enggau Pengelikun Genturung Pendiau (JKKK) nerima RM5,000 seiku, dikena mantu bejalaika aktiviti komuniti enggau ngemanahka perengkaguna kandang menua.

Sama bisi datai bini iya, Datin Amar Dato Doreen Mayang, Kaban Parlimen Betong Dato Dr Richard Rapu, Sekretari Politik ngagai Premier Sarawak, Puan Roseline Mapong Sabai, enggau Ketuai Indu PBB N.37 Bukit Saban, Puan Natasha Nasa Douglas. — RBI

KUCHING, 10 Mac — Raban Penyaga Pengelikun Mensia Mayuh Malaysia (APM) Sarawak udah muka dua (2) buah Palan Pengenduh Sementara (PPS) dikena nampung mansa ampuh bah ari Kampung Sinar Budi Baru berindik ari ujan ti enda ngengetu ti nuntung kandang menua nya.

Nitihka penerang APM, PPS ke udah diaktifka iya nya Dewan Serbaguna Sinar Budi Baru enggau Dewan Mensia Mayuh Stapok.

Atur tu ngembuan tuju deka meri pengelikun sementara sereta nentuka pengelantang enggau pengelikun mansa.

“Raban pengelikun enggau penyelamat seruran matau gaya ke diatu dikena nentuka operasyen bejalai enggau lanchar,” ku penerang APM Kuching.

Mensia mayuh dilalau ngambika seruran ngasika atur piak bekuasa sereta bejejaga sepemanjai musin pengujan tu.

Sebarang penusah ngenyit tau dikenatai ngagai lumur 082-252940 / 082-252941 tauka lumur penusah ngenyit 999. — RBI