BINTULU, 11 Mac — Mensia mayuh enggau bala pengereja pengawa ba Sepital Bintulu dilalau beratika peluang trafik enggau operasyen tejanggal ba kandang Opis Penusah Ngenyit enggau Trauma berindik ari pengawa ngaga fasiliti baru ungkup fasiliti Pencitraan Resonans Magnetik (MRI) enggau Mamogram.

Nitihka penerang ari piak pengatur sepital, projek ngaga nya dipejalaika besemak enggau kandang endur Opis Penusah Ngenyit enggau Trauma lalu dipelaba deka meri empas sementara ngagai endur nya enggau arus trafik ba kandang endur nya.

“Pengawa ngaga tu dipelaba deka ngasuh tikas bunyi nambah kelebih agi ba kandang endur ‘triage’, kelimpah ari bisi debu tauka kamah ba kandang endur ngengkahka barang,” ku penerang nya.

Dikena nentuka pengelikun enggau pengelanchar pejalai perengka pengangkut, piak pengelikun sepital deka bejalaika pengawa nagang trafik, kelebih agi maya ‘peak hours’.

Taja pia, penanggul arus trafik tau nyadi ari sesiti maya ngagai sesiti maya ketegal pejalai injin berat baka lori semin enggau jentolak ke tama enggau pansut ari palan projek.

Nitihka penerang ari sepital nya, projek ngaga nya dipelaba deka dipejalaika pengelama setaun berengkah 2 Mac 2026 nyentuk 10 Mac 2027.

Berindik enggau nya, piak pengatur sepital minta penyabar enggau kerejasama ari semua piak sepemanjai timpuh bejalaika projek tu ngambika ulih ngemanahka agi perengka guna servis pengerai ungkup komuniti jemah ila.

“Sebarang penusah ti tau nyadi dalam timpuh tu amat dikeirauka” ku penerang nya. — RBI

KUCHING, 11 Mac — Sapit Premier Sarawak Datuk Amar Douglas Uggah Embas nemuai gawa ngagai sekeda Palan Pengenduh Sementara (PPS) dikena meresa gaya enggau pengelantang pendiau mansa ti dituntung penusah ampuh bah di nengeri tu.

Iya ke mega Chairman Komiti Mutarka Penusah Ngenyit Nengeri Sarawak (JPBNS) madah, penemuai nya ngembuan tuju deka meda kediri empu gaya ke diatu ba PPS kelimpah ari nentuka semua pemun enggau bantu ngagai sida ke tasah ampuh bah seruran bisi atur sereta chukup.

Entara endur ke bisi dilawa iya nya PPS Dewan R-Piang, Kampung Sinar Budi enggau PPS Dewan Masyarakat Stapok, ke alai endur sida ke tasah ketegal tikas ai niki kenyau beberapa hari ke udah.

Nitih ku iya, pengawa matau ti enda ngetu beguna amat dikena nentuka pengawa ngatur palan pemindah bejalai enggau lanchar, kelimpah ari nentuka pengelantang pendiau mansa seruran diberi perati ti patut.

Penemuai nya mega digulu bala ketuai enggau pengari ari mayuh bengkah ejensi ke bekaul ti bejalaika tanggungpengawa ke berat ba pengawa mutarka penusah ngenyit enggau koordinasyen bantu ngagai mansa ke tasah.

Nengah penemuai tu, dikearap pengawa ngatur pengawa meri koordinasyen bantu sereta ngatur pengelantang pendiau mansa bah ulih terus ditegapka dikena nentuka pengelikun enggau pengelantang semua mansa seruran dijaga. — RBI

BAU, 11 Mac — Siku lelaki Orang Nyelai Pendiau (OKU) ti diripotka lenyau ba kandang endur kebun Kampung Opar, ditu, kenyau ari kemari mujur ditemu selamat dalam operasyen Ngiga enggau Nyelamat (SAR) ti dipejalaika pagi tadi.

Nitihka penerang ari Polis DiRaja Malaysia (PDRM) Pelilih Bau, ripot lenyau lelaki nya diterima kena 10 Mac tu tadi pengudah iya dipelabaka pansut ngagai kandang kebun di Kampung Opar tang nadai pulai ke rumah.

Berindik ari nya, operasyen SAR udah dilanchar sehari tu berengkah ari pukul 8.30 pagi enggau kaul mayuh bengkah ejensi nyengkaum PDRM, Opis Bomba enggau Penyah Penusah Malaysia (JBPM), Raban Pengelikun Mensia Mayuh Malaysia (APM), RELA enggau peranak rumah panjai.

“Operasyen ti ngaul 25 iku kaban ari mayuh bengkah ejensi mujur tetemuka lelaki ti diripotka lenyau pukul 10.15 pagi ba kandang endur ladang sawit SALCRA Opar,” ku penerang nya.

Tudah udah nya dibai ngagai Sepital Bau ngambika diperesa enggau silik agi sereta diripotka dalam gaya ke likun.

Operasyen SAR udah tembu enggau rasmi urung pukul 11.00 pagi pengudah mansa mujur ditemu.

Berebak enggau nya, PDRM IPD Bau ngenataika pengaga ati enggau terima kasih ngagai semua ejensi ti bisi kaul enggau peranak rumah panjai ketegal kerejasama enggau semengat volunteer ti dipandangka sepemanjai operasyen nya dipejalaika.

Mensia mayuh mega dilalau ngambika seruran matau pemindah diri sebilik kelebih agi individu OKU ti bisi penanggul pengerai, dikena nyeliahka sida ari pansut ari rumah enti nadai dikemataka sereta dikena nyeliahka sebarang penusah ke enda dikedekaka nyadi.

Bela bisi meri sukung, ngabas sereta ngesah penusah Kaban Kunsil Nengeri (ADUN) Opar YB Billy Sujang. — RBI

KUCHING, 11 Mac — Opis Kereja Raya (JKR) Sarawak nerima aku entarabansa lebuh diterima enggau rasmi nyadi raban International Road Federation (IRF) Global ungkup taun 2026.

Direktor Kereja Raya Sarawak, YBhg Datu Adj. Prof. Ir. Ts. Gs. Br. PMr. Dr. Cassidy anak Morris madahka pengangkun nya siti pemujur ke besai reti mandangka komitmen opis nya terus ngangkatka standard pemansang infrastruktur jalai alun nengeri tu ngagai tikas global.

Nitihku iya, nyadi raban dalam organisasyen antarabansa nya muka peluang ngagai JKR Sarawak ngerembaika pengawa bekunsi penemu, akses chara pemadu manah dunya sereta ngenegapka pengulih teknikal staf jabatan dalam merambu enggau bejalaika projek infrastruktur ti lebih moden, likun sereta meruan.

“Nengah pengawa ngaul diri dalam IRF Global, JKR Sarawak bisi peluang nambahka kerejasama antarabansa sereta beambi ulih ari inovasyen pemadu baru ba pengawa ngemansangka rentayan jalai alun ti lebih efisyen sereta tegap,” ku iya.

Ku iya nambah, pengawa nya mega setipak enggau aspirasyen pemansang Sarawak ti deka nyendiaka infrastruktur ti bekualiti tinggi ti ulih nyukung penumbuh ekonomi sereta ngangkatka pengelantang pendiau rayat di nengeri tu.

JKR Sarawak tetap komited deka seruran ngangkatka kualiti pengawa ngenataika projek infrastruktur dikena nentuka pemansang ti inklusif sereta kompetitif seriris enggau pemansang dunya. — RBI

MERADONG, 11 Mac – Polis mujur ngetan dua iku lelaki ti ditemu positif dadah dalam Ops Tapis ti dipejalaika Raban Petugas Khas Indu Opis Polis Pelilih (IPD) Meradong ba kandang menua Bintangor, pagi tadi.

Ketuai Polis Pelilih (IPD) Meradong, DSP Tansli Mering madah, kedua-dua saspek ke beumur 26 enggau 27 taun nya ditan urung pukul 9.40 pagi pengudah dipelaba bisi kaul enggau aktiviti salah guna dadah.

Nitihku iya, saspek udah nya dibai ngagai IPD Meradong ngambika diperesa enggau silik agi.

“Asil peresa ai kemi ke dipejalaika ba Opis Pansik Jenayah Narkotik (BSJND) Meradong tetemuka kedua saspek positif Amphetamine enggau Methamphetamine,” ku iya nengah sebengkah penerang sehari tu tadi.

Iya mega madahka, pengawa meresa rikod ke udah tetemuka kedua individu nya bisi rikod penyalah bekaul enggau dadah.

Kes tu diatu benung dipansik ari baruh Seksyen 15(1)(a) Akta Dadah Berbahaya 1952. Enti ditemu salah, pesalah nya ulih diukum enda ngelui ari RM5,000 tauka dijil nyentuk dua taun.

DSP Tansli nyemetak madahka polis beratika penyalah bekaul enggau dadah dalam komuniti enggau berat lalu enda deka belembut ba sebarang pengawa ti bekaul enggau pengawa salah guna utai ke ditagang nya.

Berindik enggau nya, mensia mayuh ke bisi penerang bekaul enggau aktiviti dadah di pelilih Meradong dipinta ngenataika penerang nya ngagai polis.

Penerang tau dikenataika nengah telefon ngagai Balai Polis Bintangor nengah lumur 084-693222. -RBI

BETONG, 11 Mac — Siti agi momen beguna ba pemansang infrastruktur Sarawak deka ditempa lebuh Jematan Sungai Krian diperambu deka dibuka ngagai mensia mayuh kena 18 Mac 2026 tu ila.

Pengawa muka jematan tu dikearap ulih meri pemaik ke besai ngagai peranak di Bagi Menua Betong nengah nyendiaka perengka guna rentayan penyambung jalai ke lanchar agi, lalu ari nya ulih ngemandakka timpuh pejalai sereta nambahka tikas pengelikun enggau pengelantang penguna jalai alun.

Ke lebih besai reti, pengawa muka jematan nya mega dipeda nyadi pemeri khas Aidilfitri ngagai komuniti ngelingi ti deka ngasaika perengka guna jalai penyambung ke manah agi sebedau pengerami nya.

Kelimpah ari ngemuntangka pemindah peranak, perengka guna infrastruktur nya mega dikearapka ulih nyungkak aktiviti ekonomi kandang menua sereta ngenegapka kaul entara komuniti di kandang menua ngelingi.

Opis Kereja Raya (JKR) Sarawak tetap komited ngenegapka pemansang infrastruktur nengeri tu dikena ngangkatka pengelantang pendiau rayat. — RBI

KAPIT, 11 Mac — Opis ‘Tenaga Kerja’ bagi menua Kapit udah bejalaika Operasyen Penerit Adat ba palan endur ngaga Tekat Ai Baleh pengelama tiga hari berengkah ari 4 ngagai 6 Mac 2026 tu tadi dikena nentuka pengaji nitihka penetap undang-undang pengereja pengawa.

Nitihka penerang ti dikunsika ba laman Facebook rasmi Opis Tenaga Kerja Kapit, operasyen nya ngaul sepenyampau 16 iku pemesai pengereja pengawa ti mungkur pemesai ari Opis Tenaga Kerja Kapit, Opis Tenaga Kerja Sibu enggau Opis Tenaga Kerja Sarikei.

Berindik ari operasyen nya, lima iti keretas pansik udah dibuka ngagai pengaji ke dipelabaka ngelanggar atur undang-undang pengereja pengawa.

Pansik nya mungkur penyalah ari baruh Subseksyen 104(6) bekaul enggau enda mayar upah gawa maya hari besai sereta mega Subseksyen 109 bekaul enggau enda mayar upah dalam timpuh ke udah ditetapka.

Kes ke udah dikelala diatu benung dalam proses mansik enggau silik agi ngambika atur ke silik agi dipejalaika nitihka penetap undang-undang ke dikena. — RBI

KENA TEKNOLOGI BAKA AI, SISTEM ANALISIS DATA DALAM AKSYEN TUMU MUTARKA PENUSAH NGENYIT

KUCHING, 11 Mac — Agensi mutarka penusah ngenyit di Sarawak dilalau ngerembaika pengawa ngena teknologi pemadu baru nyengkaum pemintar artifisyel (AI) enggau sistem analisis data dikena ngangkatka pengulih sida melaba enggau bejalaika aksyen tumu agi ba sebarang bagi penusah ngenyit ke nyadi.

Sapit Premier Sarawak, Datuk Amar Douglas Uggah Embas madahka agensi nya nyengkaum Komiti Penyangga Penusah Ngenyit Nengeri Sarawak (JPBNS) empu, Opis Parit enggau Entali Ai (JPS); Opis Meteorologi Malaysia; sereta Unit Pengelikun enggau Penerit Undang-Undang Sarawak (UKPS) patut nyerungkai pengawa ngena teknologi pemadu baru dikena negapka ‘sistem amaran awal’ enggau mutarka penusah ngenyit ba nengeri tu.

“Aku ngelalau agensi baka JPS, Opis Meteorologi, JPBNS enggau UKPS ngena teknologi.

“Kitai patut ngena teknologi ke pemadu baru ngambika kitai ulih melabaka enggau tumu agi kandang endur ke bisi potensyel ampuh bah,” ku iya ti mega Chairman JPBNS, bepelasarka ripot Unit Komunikasi Awam Sarawak (UKAS).

Uggah madahka pekara nya lebuh meri lalau ba sebengkah pengerami ke diatur ba sebuah hotel ditu, kemari.

Nitih ke iya, peneleba ba pengawa ngatur krisis di menua luar mandangka teknologi ulih mantu opis ti bekaul melabaka penusah ngenyit nyadi beberapa hari tumu, lalu enggau nya meri awak ke chukup dikena mindahka rayat sereta nyediaka logistik.

“Enti kitai bisi teknologi melaba ti manah agi, engka dua tauka tiga ari tumu agi kitai ulih merambu kandang endur ti bisi risiko lalu ulih besedia tumu agi,” ku iya.

Iya mega ngenang pasal peneleba ampuh bah sebedau tu di Selangau ti mandangka pemar logistik lebuh aset ke patut dibai ari Kuching, begunaka timpuh ke chukup lama.

Nitih ke Uggah, chara tu beguna amat berindik ari pemesai menua Sarawak ti begunaka perambu ti silik dikena nentuka aset enggau bantu ulih dipejalaika enggau efisyen agi maya penusah ngenyit nyadi.

Bisi datai Sapit Sekretari Perintah Sarawak (Administrasyen) ke lalu nyadi Sapit Chairman JPBNS, Datu Felicia Tan Ya Hua; Direktor UKPS ke lalu nyadi Ketuai Sekretari JPBNS, Abdul Wahab Rahim enggau bala pemesai ke bukai.

Sumber berita — Utusan Borneo

Photo — Polis Sarawak

SEMATAN, 11 Mac — Puan Mimi Grifford, anak Adot udah dipadu nyadi Penulung Kanan Pentadbiran Sekolah Menengah Kebangsaan (SMK) Sematan, berengkah Hari Satu, 9 Mac 2026 tu tadi.

Pengawa nyiri iya disambut enggau jaku pengaga ati sereta puji ari rayat Sekolah Menengah Kebangsaan (SMK) Senibong ti mantaika pengandal penuh ngagai pengulih iya megai tanggungpengawa baru enggau penyulut.

Sepemanjai lebih sedekad gawa ba SMK Senibong, Puan Mimi digambarka siku pendidik ti komited sereta bejalaika tanggungpengawa ti beguna dalam meri pangka ngagai pemansang akademik enggau diri staf sekula nya.

Rayat SMK Senibong, begulai enggau Gerempung Apai Indai enggau Pengajar (PIBG) sereta komuniti menua nya mega meri pengaga ati ngagai pemeri iya sepemanjai 10 taun gawa ba sekula nya.

Sida ngarapka peneleba enggau dedikasyen Puan Mimi deka terus meri pangka ngagai penyulut pelajar di SMK Sematan, kelimpah ari meri empas positif ngagai pemansang modal mensia di sekula nya. — RBI

ISTANBUL, 11 Mac — Liverpool F.C. napi jalai ke repa nuju suku penudi Liga Juara UEFA pengudah alah 0-1 ngelaban Galatasaray S.K. ba main keterubah renggat 16 di Istanbul, tumu pagi tadi.

Pengalah nya mega ‘ngamahka’ main ke-100 Arne Slot nyadi menijar Liverpool lebuh bala pemain iya pulai enggau jari puang ari Istanbul kedua kali musin tu enggau pemutus ke sama.

Sebedau tu, Liverpool mega alah 0-1 ngelaban Galatasaray ba renggat liga bulan September tu tadi, lalu enggau nya ngayanka pengasa sida Liverpool nagang peniki tim besai Turki ba bemain ba menua sida empu.

Semina sigi gol ti dipasukka Mario Lemina ba setengah main keterubah pengudah beambi ulih ari gaya sipak sukut ke diambi Victor Osimhen, ke mega udah ngemasukka gol lebuh kedua-dua tim nya betemu ba main sebedau tu.

Gol nya meri pengelebih ngagai Galatasaray sebedau main timbal pulai ba Anfield minggu baru.

Taja pia, Liverpool ulih ngumbai diri betuah laban enda ngelepaska mayuh agi gol sepengudah Galatasaray nempa mayuh peluang ke tau mai pemujur agi sepemanjai main nya.

Nengah pengelebih gol ba jari Galatasaray, Liverpool patut bebendar ba mua peminat kandang menua sida ba Anfield enti sida deka ngetanka peluang sida terus mansang ba pekit elit Eropah idup. — RBI