MARAN, 22 Mac – Nembiak indu beumur 16 taun dipelaba dipasung siku lelaki ke dikelala iya bedau lama ke udah.

Ketuai Polis Pelilih Maran, Superintenden Wong Kim Wai madah, piak iya bisi nerima ripot ari indai nembiak indu nya bekaul enggau kes nya.

Nitihka penerang iya, bepelasarka ripot, penusah nya nyadi pun bulan March tu tadi ba sebuah rumah di Maran lebuh nembiak indu nya pansut enggau saspek.

“Nembiak nya ngeripotka diri dipejal beleman enggau lelaki ke dikelala iya ba sebuah rumah ke bisi kaul sebedau madah ngagai indai iya pasal pekara nya,” ku iya nengah siti penerang kena Hari Enam tu tadi.

Ku iya, berindik ari nya kena Hari Lima tu tadi, seraban pemesai enggau kaban Bagi Pansik Jenayah Indu Opis Polis Pelilih (IPD) Maran udah ngetan saspek ngambika dipansik enggau silik agi.

Ku iya, piak polis benung bejalaika pansik ke silik agi ari baruh Seksyen 376 Kanun Keseksaan dikena ngumpul bukti dalam kes nya.

Ku Kim Wai, pansik agi dipejalai lalu mensia mayuh ke bisi penerang bekaul enggau penusah nya dipinta datai ngagai balai polis ke besemak tauka betanya ngagai IPD Maran ba lumur 09-4771222 mantu mansik.

SIBU, 22 Mac – Inisiatif ungkup orang tuai di Siong Ili mujur nyadi nyata berindik ari pelanja penuh Kaban Parlimen Selangau, Edwin Banta digaga chara ngerupan dikena ngaga jematan baru sepemanjai 100 meter.

Projek tu digaga nengah Palan Servis P214 Selangau, diatu ngemudahka pemindah ninting hari sereta ngangkatka pengelikun orang tuai ba menua nya.

Raban Nembiak Kelab Pasai Siong ti bechairmanka Joshua anak Andrew Naun, ngambi tangunggjawab ngemujurka projek tu, lalu betuaika Pegawai Khas ngagai Kaban Parlimen Selangau, Tr Tony Emat begulai enggau Cr Morris Johnny.

Ba pengawa ngerupan tu mega, nunjukka semangat mantu enggau kerejasama raban nembiak menua tu nyata dipeda sepemanjai pengawa bejalaika program tu.

Berindik ari nya, Edwin Banta ngenataika pengaga ati ti tinggi ngagai semua piak ti bekaul lalu ngemeratka inisiatif tu ukai semina ngangkatka kualiti pengidup orang tuai, tang mega ngenegapka penyerakup enggau pemansang komuniti menua pesisir. – RBI

Kapsyen : PENGAWA MANAH…Raban Nembiak Kelab Pasai Siong ngemujurkan pengawa ngerupan ngaga jematan

MIRI, 22 Mac – Bisi semilan iku orang ke diau ba sebuah rumah di Tudan Desaras ditu selamat enggau nadai sebarang bakal dalam penusah angus ke nyadi malam kemari.

Dalam penusah nya, sebuah rumah struktur tetap setingkat ke ngembuan pemesai urung 30 kaki x 30 kaki napi pengerusak urung 20 peratus, lalu dua buah entukar, sebuah Nissan Almera enggau sebuah Proton Wira, abis rusak.

Nitihka ripot ari Opis Bomba enggau Penyah Penusah Malaysia (JBPM) Zon 6 Sarawak, kangau ngenyit bisi diterima urung pukul 9.29 malam sebedau jentera ari BBP Lutong dipindah ngagai palan penusah nyadi.

Raban bomba betuaika Komander Operasyen, PBT II Henry Anak Jugah datai ba palan nya urung pukul 9.42 malam lalu tekala nya berengkah bejalaika operasyen madamka api urung pukul 9.43 malam.

Api nya mujur dipadam urung pukul 9.47 malam ngena dua tali hos 100 kaki enggau enggau nguna ai ari paip bomba ke besemak.

Operasyen madamka api tembu penuh urung pukul 10.26 malam sebedau semua raban mulaika diri ngagai stesyen lalu datai urung pukul 11.40 malam.

Sama bisi mantu dalam operasyen nya raban ari Opis Bomba enggau Penyah Penusah Lopeng sereta ejensi bukai nyengkaum Polis Diraja Malaysia (PDRM) enggau Sarawak Energy Berhad (SEB).

Kebuah penusah nyadi enggau penyampau pengerugi agi benung dipansik piak bekuasa. – RBI

PAKAN, 21 Mac – Kaban Kunsil Nengeri (ADUN) Pakan ke mega Penyanding Penemu ba Opis Premier Sarawak (Industri Pemakai, Komoditi enggau Pemansang Kandang Menua), Tan Sri William Mawan anak Ikom, ngemeratka pemesai guna pemujur nyadi ketuai ti bepenemu, kerejasama rat sereta ngenataika penanggul rayat nengah chara ke betul.

Bejaku ba Pengerami Bejadika Projek RTP di Rumah Gait anak Chunggut di Ulu Litok, iya madahka bala ketuai komuniti patut seruran bebendar nambahka penemu sereta bekerejasama ungkup penyulut begulai.

“Nyadi siku ketuai mesti nemu begulai enggau pangan diri lalu bebandingka mayuh pekara sereta betukarka penemu,” ku iya.

Kenu ku iya, pemujur pemansang ukai semina bepanggai ba pengeransing siku-siku aja, tang kebendar iya nya begunaka penyerakup semua piak.

“Ngulihka pemansang ukai muntang tang beguna pengepuh, penyabar enggau penyerakup,” ku iya.

Berebak enggau nya, Tan Sri William Mawan nyemetak madahka genap peminta enggau guna rayat patut dikenataika nengah chara ke betul ngambika ulih diputar enggau manah.

Ngenang sekeda tuduh, ti madahka iya nadai kala ngabas penusah rayat, iya madahka jaku nya semina jaku ti ngerichau ba sebelah media rama ngambika rayat saru.

“Aku endang seruran ngabas rayat, lalu sida nuduh bemacham-macham nya jaku ti enda betul ti deka malut rayat enggau penemu enda betul,” ku iya nerang.

Bekaul pemansang infrastruktur, iya mega madahka projek ngaga jalai penyambung Pakan Ulu Kota deka dipejalaika Opis Kereja Raya (JKR) dikena ngemanahka agi pengelantang enggau akses rayat.

Beduduk enggau nya, iya ngelalau komuniti ngembuan runding ti jauh, ngemeratka kerejasama sereta nguna agih belanja projek dikena ngenegapka ekonomi, nyengkaum nengah pengawa ngasilka asil pengelandik jari enggau ngena pelasar digital.

Iya mega madah, komuniti mega patut nyeliahka diri ari teparuk enggau penerang ti salah sereta fokus ngagai utai ti diguna ti amat meri penguntung ngagai komuniti. – RBI

MIRI, 21 MAC – Penusah aksiden ba jalai alun ti ngaul dua buah entukar ke nyadi ba Shell Tamuk Muhibah tumu pagi tadi ngujungka tiga iku sida bakal.

Nitihka ripot operasyen Opis Bomba enggau Penyah Penusah Malaysia (JBPM), kangau ngenyit bisi diterima urung pukul 2.03 pagi sebedau bomba ari BBP Miri Sentral ngesah ngagai endur penusah nyadi ti bepalan urung satu kilometer ari balai nya.

Lebuh datai ba palan nya, raban bomba bisi tetemuka penusah aksiden ti mungkur sebuah entukae Toyota Innova enggau sebuah entukar Proton Waja.

Komander Operasyen, PBKI Mohamad Fairus madahka deriba Toyota Innova nya patah kaki kanan.

Berebak enggau nya, deriba lelaki Proton Waja enggau siku pesinjir iya mega napi pemedis ke sebaka. Pesinjir entukar nya taja pia mujur pansut kediri sebedau penatai raban penyelamat.

Raban bomba udah nya bejalaika pengawa nyelamatka sida ke tepekul sereta meri bantu keterubah sebedau siku ari sida dibai ngena unit EMRS, lalu dua iku ke bukai diserah ngagai Opis Menteri Pengerai Malaysia (KKM) ngambika diperubat enggau silik agi.

Operasyen nya tembu pukul 3.10 pagi pengudah gaya ba palan nya dientaska likun.

Operasyen tu mungkur lima iku raban bomba enggau sebuah injin FRT ari BBP Miri Sentral. – RBI

KUCHING, 20 Mac – Parti Bangsa Malaysia (PBM) majak ngenegapka penuduk diri lebuh nerima penatai kaban baru iya nya Diog anak Dios ke diatu nyereta PBM Pampang Puncak Borneo.

Diog ti kala nyadi Ketuai PKR Puncak Borneo, sebedau tu mega udah bisi komiti iya empu ungkup pampang nya, enggau nya ngemai peneleba nyadi ketuai sereta pengelebih ngagai PBM.

Dalam pemansang ke sama, iya mega dipaduka nyadi Kaunsil Supreme Parti PBM nengah pengawa nyiri khas, kelimpah ari diberi tanggungpengawa nyadi Sekretari PBM Negeri Sarawak.

Diog megai tanggungpengawa nyadi Sekretari PBM Sarawak, siti pangku pengawa strategik ti dikearapka ulih mantu ngatur pengawa parti di serata nengeri enggau lebih teratur sereta ngasi.

Pengawa nyiri enggau penyereta Diog tu mandangka pengandal ketuai PBM ngagai penau sereta peneleba iya dalam ngenegapka parti, kelebih agi napi pemar politik kemaya hari sereta ngenegapka penuduk parti PBM di Sarawak.

Pengawa Diog nyemilik PBM mega bela disereta bala penyukung iya ke mega ngenegapka pengering PBM. -RBI

SONG, 20 Mac — Kaban Kunsil Nengeri (ADUN) Katibas YB Lidam Assan, sehari tu mansik baru pejalai projek ngaga rumah panjai ba kandang menua Sesawa dikena nentuka pejalai projek lanchar sereta pengelantang ngagai peranak menua nya.

YB Lidam Assan nyemetak madahka pengawa ngaga rumah panjai begunaka perambu ti silik sereta teratur dikena nentuka rumah ti nyamai, likun, sereta kondusif ungkup tiap iku diri sebilik.

“Projek tu sebagi ari inisiatif aku ngenyampatka pengelantang pendiau rayat. Projek ngerumban penyamai rayat” ku iya.

“Aku ngarapka peranak menua tu ulih besabar sereta bebendar nembuka rumah panjai nitihka pengulih diri empu.

“Nyadi ADUN, aku deka terus meri sukung enggau bantu ke ulih aku,” ku iya.

Projek tu setipak enggau pengawa Perintah Nengeri ti seruran dipejalaika dikena ngangkatka kualiti pengidup komuniti setempat, nentuka tetiap iku rayat di Katibas bisi peluang ngasaika pengidup ti lantang agi. — RBI

BINTANGOR, 20 Mac – Balai Bomba enggau Penyah Penusah (BBP) Bintangor udah bejalaika pengawa meresa paip bomba nitihka taga ba sekeda endur ngelingi kandang menua Bintangor, pagi tadi.

Operasyen ke berengkah ari pukul 9.30 pagi nyentuk 11.16 pagi nya mungkur tiga iku kaban iya nya PB Hensley anak Benson, PBBK II Philip anak Chuat enggau PBB Aniq Rasydan bin Bohari.

Pengawa meresa nya dipejalaika ba empat palan besai iya nya di SJKC Kai Chung No.106 (1 unit), Jalai Janting Nicolite No.129-132 (4 unit), Berek JKR Batu ½ No.133-135 (3 unit) enggau Jalai Abang Amin No.152-157 (6 unit).

Sepenyampau 14 buah paip bomba udah diperesa dikena nentuka semua nya dalam gaya ke manah sereta manah enti diguna maya penusah ngenyit nyadi.

Pengawa meresa ari setiap maya tu nyadi singkang proaktif JBPM dalam nentuka penyedia perengka bomba seruran ba tikas ti optimum ungkup pengelikun mensia mayuh. – RBI

SELANGAU, 20 Mac — Pengeransing ngenegapka pengawa nyukat Tanah Hak Adat Bansa Asal (NCR) ba kandang menua Siong Ili terus dipejalaika nengah pengawa ngatur Randau Nyukat Tanah NCR ti ngempuruka penyereta komuniti ari lapan buah rumah panjai.

Kaban Parlimen P.214 Selangau, Edwin Banta madah, chara randau komuniti nyadi siti singkang ke besai reti dalam nentuka proses nyukat tanah NCR dipejalaika nengah chara ke terang, betukuh sereta inklusif.

“Pengawa nyukat tanah NCR tu beguna amat dikena nentuka penetap ngempu sereta nyaga hak peranak, kelebih agi di menua pesisir.

“Kerejasama ari semua piak amat diguna dikena nentuka proses tu bejalai enggau lanchar sereta meri pemaik ungkup timpuh ke panjai,” ku iya.

Iya madah munyi nya lebuh nyadi chairman Randau Nyukat Tanah ke diatur ba Rh. John Antieng, ditu, kemari.

Program tu diatur begulai Opis Tanah enggau Survei Sarawak, Bagi Menua Sibu enggau Palan Servis P.214 Selangau, enggau kaul ti chakah ari Komiti Pemansang Siong Ili ti betuaika Tony Emat.

Berebak enggau nya, Pemesai Opis Pengatur Tanah, Vivilyn Anak Wesley Kapi mega bisi ngenataika penerang senentang prosedur nyukat, pemesai guna dokumentasyen enggau singkang ke patut diambi pengempu tanah NCR.

“Pengempu tanah dilalau nentuka semua dokumen bekaul disediaka enggau penuh dikena ngemudahka proses nyukat enggau ngentaska tanah enggau teratur,” ku iya nerang.

Inisiatif tu ngayanka komitmen ti seruran dipejalaika mayuh bengkah piak dalam nentuka bungkur sukat tanah NCR ti lebih komprehensif, lalu enggau nya ngenegapka pengawa ngaku hak ngempu tanah adat sereta ngangkatka pengelantang pendiau komuniti menua pesisir di Siong Ili. — RBI

KUCHING, 20 Mac – Aidilfitri ukai semina ngayanka terima kasih pengudah sebulan bepuasa, tang mega nyadi pelasar ke beguna dalam ngerapitka kaul pangan diri sereta nerenakka pemanah ati entara komuniti ke mayuh macham enda ngira penatai budaya enggau pengarap, ku Dato Sri Dr Stephen Rundi Utom.

Iya ke mega Menteri Industri Pemakai, Komoditi enggau Pemansang Kandang Menua mega madahka, dalam napi rampa sosio-ekonomi ti majak mayuh pemar, penyulut terus Sarawak bepanggai bendar ba integriti penyerakup enggau bebatak asur entara bansa ti udah lama ditempa.

Iya mantaika jaku tu lebih ngenataika jaku tabi basa sereta meri Selamat Hari Raya Aidilfitri ngagai semua raban Islam, kelebih agi di Sarawak, ti ​​ngintu hari pemenang nya enggau penuh terima kasih.

“Ba pekara tu, aku nesau semua rayat ngambika terus ngetanka pengelantang tu nengah tradisyen nemuai, enggau nya ngayanka nilai penyelai nyadi batang penegap dalam nempa jemah ila ti lebih entap sereta lantang ungkup Sarawak,” ku iya. – RBI