BETONG, 22 Mac – Sepenyampau 17 iku Tuai Rumah nerima setipikit dichiri enggau ngelanjarka timpuh mangku pengawa ba Program Ketuai Begulai enggau Rayat di Rh Spell Anak Gelayan, lalu enggau nya ngenegapka pengawa nyadi ketuai komuniti rumah panjai di sitak Layar.

Ari penyampau nya, empat iku Tuai Rumah baru dipadu iya nya Lillie Anak Entrie (Dabok, Layar), Nicholas Apit Anak Laja (Malayu Ili), Lanchang Anak Kudi (Jelau Atas) enggau Guma Anak Jeman (Pasa Ata).

Berebak enggau nya, bisi 13 iku agi Tuai Rumah nerima sambung pangku pengawa dikena ngaku servis enggau nyadi ketuai sida ngintu pengelantang pendiau komuniti lokal.

Antara sida tu iya nya Margrette Anak Achik (Bebanggai Kanan), Sunang Anak Amam (Bebanggai Kiba), Veriland Godon Anak Gagat (Engkeranji), Mohamad Bin Abdullah @ Entinggi (Lubau Lama), Frida Anak Dasu (Melayu Ulu), Cosmas Anak Rumpa (Meribong), David Kalum Anak Gundie (Nanga Tebalau Baru), Ngaoh Anak Ngawat (Penyelanih Kiba), Kallung Anak Gurang (Penyelanih Raba), Spell Anak Gelayan (Selulap), Edward Jawi Rangian (Serian Ulu), Johnson Iba Anak Mandi (Skatap) enggau Lipa Anak Nyawai (Tanu).

Pengerami nya dipenyadika Sapit Menteri Pemansang Nembiak, Lumba enggau Orang Dagang ke mega Kaban Kunsil Nengeri (ADUN) Layar, Datuk Gerald Rentap Jabu begulai enggau Kaban Parlimen Betong, Dato Dr. Richard Rapu sereta ejensi ke bekaul.

Program tu mega ngayanka sepenyampau 30 buah rumah panjai ngelingi kandang menua Layar mega bisi datai ti mandangka komitmen perintah ti terus ngelawa rayat, sereta nentuka pengawa nyadi ketuai ba renggat seruran tegap sereta beguna enggau efektif.

Inisiatif tu dipeda beguna dalam nentuka penerus pemansang enggau pengelantang komuniti menua pesisir, kelebih agi ba kandang menua Betong.

Info enggau gambar : Kredit Betong Xcess

PETRA JAYA, 22 Mac – Perambu deka mantaika chalun baru ungkup penuduk tambah Kunsil Nengeri (DUN) Sarawak bedau ulih diperunding agi seagi proses ngaga garis entara DUN bedau dipejuraika Komiti Pengawa Bepilih Malaysia (SPR).

Chairman tetap Parti Pesaka Bumiputera Bersatu (PBB), Tan Sri Datuk Amar Mohamad Asfia Awang Nasar nyemetak madahka sebarang randau pasal chalun semina ulih digaga pengudah sitak baru udah ditetapka sereta dientaska penuh.

“Kitai enda ulih merambu chalun seagi sitak bedau ditentuka.Batang fokus diatu iya nya nentuka proses ngaga garis entara DUN bejalai enggau lanchar,” ku iya.

Nitih ku iya, pekara ti dikemeratka maya ke diatu iya nya ngenegapka agi pengandal enggau penegap parti, ari ti berundingka chalun kelalu tumu.

Iya bejaku munyi nya lebuh ngabang ngagai Rumah Terbuka Aidilfitri Sapit Menteri Infrastruktur enggau Pemansang Palan Penyangkai Kapal, Datuk Len Talif Salleh, seharitu tadi.

Berebak enggau nya, iya mega nerangka timpuh Dewan Undangan Negeri Sarawak (DUN) iya nya nyentuk Februari 2027 lalu pengawa ngererak DUN nya semina ulih digaga Tuai Pemegai Menua (TYT) Negeri Sarawak nitihka lalau Premier Sarawak.

“Premier deka ngelalau TYT lalu kuasa ngererak Dewan nya ba TYT, ukai ba Premier,” ku iya.

Dalam pemansang ke sama, iya nerangka 17 penuduk baru ke udah dikemendarka sebedau tu agi nganti pengawa ke bukai ari SPR, nyengkaum pengawa mansik ba renggat baruh, pengawa pemandang mensia mayuh ungkup pengawa mantah enggau proses ngaga gazet sebedau dibai ngagai Parlimen.

Ngelansa pasal peluang penuduk tu diperebut ba Pengawa Bepilih Nengeri (PRN) ti deka datai, iya madahka nya bepanggai bendar ba pengelanchar proses ba renggat perintah besai.

“Enti bisi awak, nya baru ulih diperebutka maya PRN. Taja pia, naka ke diatu, kami agi nganti pemutus lalu bedau bisi timbal,” ku iya.

Ku iya nambah, pemerat kerusi tambah di Sarawak mega patut diperatika ari sukut geografi ti besai sereta mayuh pemar, ukai semina bepelasarka pemayuh tubuh mensia. – RBI

Gambar : Kredit Utusan Sarawak

BETONG, 22 Mac — Program Ngabang Hari Raya ke diatur ba Kampung Melayu Betong diatur penuh pengerichah sereta bebaik, mandangka semengat beserakup enggau pengawa nemuai ke majak ngerembai ba komuniti menua nya.

Program tu bela digulu Sapit Menteri Pemansang Nembiak & Lumba enggau Pemansang Orang Dagang Datuk Gerald Rentap Jabu, ke mega ADUN N.36 Layar begulai enggau bini iya, Datin Rosemarie Wong.

Penatai iya diterima enggau manah peranak rumah panjai ti ngambi awak begulai dalam ngintu pengerami Aidilfitri.

Entara rumah ke bisi dilawa iya nya ex-Penghulu Abang Suhaili Bin Abang Pay, Ketua Kaum Abang Dahlan Bin Abang Sulaiman di Kampung Masjid, Penghulu Kon @ Sapawi Bin Yahu, Haji Abang Ullie Bin Abang Pay ke mega Sapit Ketuai PBB Cawangan Layar, sereta Ketuai Kaum Abang Shafadilla Bin Abang Ullie di Kampung Hilir.

“Program tu ukai semina ngerapitka kaul entara ketuai enggau komuniti, tang mega ngerapitka nilai begulai enggau harmoni ti nyadi pelasar pengidup komuniti di nengeri tu” ku Dr Richard Rapu.

Nitih ku Kaban Parlimen Betong Dato Dr. Richard Rapu, inisiatif baka tu patut dipajakka nyadi medium dikena ngenyemakka bala ketuai enggau rayat, pia mega nerenakka agi semengat beserakup entara komuniti ari mayuh macham asal penatai. — RBI

KANOWIT, 22 Mac – Komitmen perintah Sarawak dalam nentuka pemansang di menua tu, lebih agi di menua pesisir seruran dipejalaika ungku penguntung rayat, ku jaku dipansutka Kaban Dewan Undangan Negeri (ADUN) Machan, Allan Siden Gramong.

Dalam jaku pengelalu iya, Allan mega ngemeratka pengawa pemansang infrastruktur mesti diteruska ngambika semua rayat ulih ngasaika penguntung ke nyata, lalu enggau nya ngenegapka penyerakup komuniti.

Iya mansutka jaku tu lebuh iya bejadika Pengerami Belepa enggau Rayat ba Rumah Bobby, Bukit Munggu Mawang, Sungai Poi.

“Kitai deka nentuka genap senentang pemansang ulih nyadi peransang ngagai penyerakup rayat.

“Kerjasama entara ketuai komuniti enggau ketuai raban bansa (KMKK) sereta opis perintah chukup besai guna dalam nentuka juluk Sarawak Maju 2030 ulih dijapai kitai semua,” ku iya.

Allan mega ngemeratka, enti nadai kerjasama ti penuh ari rayat enggau ketuai lokal, semua pelin pemansang enda ulih bejalai enggau lanchar. Nya alai, semangat beserakup amat digaga dalam nentuka pemansang menua.

Ba awak ke sebaka mega, Allan meri puji ngagai peranak Sungai Poi ke seruran meri sukung teguh ngagai pengawa perintah, lebih agi dalam ngemansangka Kanowit, kelebih agi di DUN Machan.

Program nya mega nyadi pelasar ke beguna dikena ngerapitka kaul entara ketuai enggau rayat, kelimpah ari meri peluang berunding terus ba ba renggat baruh.

Antara pemesai ke datai nya Pemancha Charlie Salang, Pemesai Opis Pelilih Menua, Jabang Juntan, raban penghulu, kaunselor, tuai rumah, raban Exco PBB Pampang Machan enggau bala temuai ke bukai. -RBI

MIRI, 22 Mac — Siku indu beumur 22 taun bebadi nyawa ba penusah bebadi ba jalai alun ti mungkur sebuah kerita enggau sebuah pikap ba simpang lampu trafik Vista Perdana, Jalai Miri-Bypass, tumu pagi tadi.

Ketuai Polis Pelilih Miri, ACP Mohd Farhan Lee Abdullah, madahka pansik tumu tetemuka penusah nya nyadi lebuh sebuah kerita ke dideriba siku lelaki peranak menua nya beumur 24 taun, ari arah Permyjaya nuju Padang Bilun Miri, dipelabaka ngelantak belakang sebuah kerita pikap ke diketuka ba lampu trafik.

“Polis nerima ripot bekaul enggau penusah tu urung pukul 3 pagi,” ku iya nengah sebengkah penerang sehari tu tadi.

Ku iya nambah, deriba kerita enggau deriba pikap nya bakal lalu dianjung ngagai Sepital Miri ngambika diperubat enggau silik agi.

Nitihka penerang iya, berindik ari penusah belantak nya, penumpang kerita nya siku indu peranak menua nya beumur 22 taun disahka parai ba palan penusah nyadi.

Diatu kes nya benung dipansik ari baruh Seksyen 41(1) Akta Pengangkutan Jalan 1987. — RBI

SELANGAU, 22 Mac — Siku indu bakal ba penusah aksiden kerita deriba kediri empu semak Sekula Menengah Kebangsaan (SMK) Selangau Selangau, pagi Hari Enam tu tadi.

Palan Kawalan Operasi Pelilih Menua Selangau nerima kangau ngenyit sebedau tim raban Angkatan Pertahanan Awam Malaysia (APM) dianjung ngagai palan penusah nyadi.

Lebuh datai ba palan nya, raban penyelamat tetemuka tudah napi pemedis ba kandang pah ketegal eksiden ti ngaul sebuah kerita.

Tudah udah nya diberi perubat keterubah ba endur nya sebedau dianjung ngagai Klinik Pengerai Selangau ngambika diperubat enggau silik agi.

Dipelabaka mansa sedar, entap sereta ulih berandau sepemanjai operasyen nya. — RBI

KUCHING, 21 Mac — Opis Pengerai Nengeri (JKN) Sarawak udah ngentaska siti kes baru mensia kena penyakit rabies di Sarawak ti mungkur siku nembiak lelaki beumur 10 taun ari Kuching, ti ngujungka penyampau semua kes rabies kenyau ari taun 2017 bisi 93 kes.

Tudah nembiak nya diripotka bisi sejarah diketup ukui lelang kena 11 Februari 2026, tang semina nuchi abi nya kediri enggau nadai minta perubat enggau silik agi.

Pengerai iya majak nurun kena 11 Mac tu tadi enggau kelai baka nadai pengingin makai, muntah, kerim rekung enggau hidrofobia sebedau dientaska positif rabies kena 14 Mac tu tadi.

Nitihka penerang ari JKN Sarawak dikeluarka 19 Mac 2026, kes pemadu baru tu mai penyampau semua kes rabies taun tu ngagai tiga, enggau kesemua tikas pemati 92.5 peratus ari 93 kes ke dirikod kenyau pengelekai nya dipadahka dalam bulan Julai 2017.

Dalam timpuh 1 Januari nyentuk 14 Mac 2026, sepenyampau 4,623 kes diketup jelu diripotka di Sarawak enggau pukul rata 462 kes seminggu.

Ari penyampau tu, majoriti bekaul enggau kes diketul tauka dikeramak mayau (62.2 peratus), ditangkan ukui (36.5 peratus), lalu ke bukai nya bekaul enggau jelu bukai.

Pansik tetemuka laun berubat pengudah diketul nyadi batang risiko kena rampit.

Berindik enggau nya, mensia mayuh diingat ngambika lengkas nuchi telih ngena ai beresi enggau sabun enda kurang ari 15 minit sereta berubat ba fasiliti pengerai enggau lengkas.

Kelimpah ari nya, mensia mayuh dilalau ngambika enda meri pemakai ngagai jelu ke nadai orang ngempu ke nadai status vaksinasyen iya, pia mega nyeliahka diri ari megai bangkai jelu ke enda dijaga.

Orang ke ngempu ukui mega dilalau nentuka ukui enggau mayau dituchuk vaksin penuh ninting taun sereta enda ditinggalka bejalai nadai dikemataka.

Seraya musin pengerami, mensia mayuh mega diingat ngambika bejimat agi, kelebih agi lebuh ngelawa kandang endur ke bisi ukui tauka jelu siga.

Nembiak mit patut dipatau sereta diseliahka ari semak tauka ngachau jelu dikena nyeliahka penusah ke enda dikedekaka nyadi.

JKN Sarawak nyemetak madahka rabies tu penyakit ti tau nabanka nyawa tang ulih ditagang nengah chara berubat tumu ‘Post-Exposure Prophylaxis’ (PEP).

Kerejasama ari semua piak beguna amat dalam nentuka pengelekai igi penyakit tu ulih ditagang ungkup pengelikun komuniti. – RBI

BINTULU, 21 Mac – Tubuh siku nembiak ke dikelala enggau nama Tristan Mariss Marissa Erna, 12, ditemu lemas, lalu siku agi, Daren Dakun Paruscrum, 13, bedau ditemu dalam penusah ke nyadi ba ai wong semak Sungai Plan ditu, lemai tu tadi.

Penusah nyadi lebuh seraban nembiak benung mandi ba endur nya sebedau pengaga ati sida betukar nyadi penusah ngenyit lebuh dua iku ari sida dipelaba lemas.

Pengari Palan Operasyen (PGO) Opis Bomba enggau Penyah Penusah Malaysia (JBPM) Sarawak madah, sida nerima kangau ngenyit bekaul enggau penusah nya urung pukul 3.22 lemai.

Berindik ari nya, enam iku raban ari Balai Bomba enggau Penyah Penusah (BBP) Kidurong begulai enggau empat iku raban Tim Penyah Penusah Ai (PPDA) dianjung ngagai endur nya bejalaika operasyen ngiga enggau nyelamat (SAR).

“Bepelasarka penerang keterubah, bisi dua iku nembiak lelaki dipelaba lemas.

“Siku udah ditemu urung pukul 5.20 lemai ba penyauh urung lima meter ari tebing enggau penalam semilan meter, lalu siku agi agi lenyau,” ku iya nengah siti penerang sehari tu.

Nitihku iya, sebedau penusah nya nyadi, dua iku nembiak begulai enggau dua iku bakih seduai ke bukai iya nya siku nembiak lelaki beumur 13 taun enggau siku nembiak indu beumur 14 taun benung mandi ba kandang endur ai wong nya urung pukul 2 lemai.

“Kedua-dua nembiak nya kepenudi dipeda urung pukul 2.30 lemai sebedau seduai dipelaba lemas.

“Operasyen nyidi ba atas ai udah dipejalaika, tang naka ke diatu operasyen SAR ditangguh dulu,” ku iya. – RBI

BINTULU, 22 Mac — Tubuh siku nembiak lelaki beumur 12 taun ditemu lesi pengudah dipechayaka lemas ba kandang endur ai wong Sungai Plan Lot malam kemari.

Tudah ke benama, Daren Dakun anak Paruscrum ditemu mensia mayuh urung pukul 11.19 malam ba penyauh 1.5 meter ari tebing enggau penalam ai dipelabaka tiga meter sebedau penatai raban bomba ba palan penusah nyadi.

Nitihka ripot operasyen, Opis Bomba enggau Penyah Penusah Malaysia (JBPM) nerima kangau ngenyit pukul 11.20 malam sebedau raban bomba ari Balai Bomba enggau Penyah Penusah (BBP) Kidurong ngesah ngagai endur ke bepalan urung tiga kilometer ari balai nya.

Raban bomba datai urung pukul 11.24 malam lalu tekala nya bejalaika operasyen enggau chara ngangkatka tudah lalu nyerahka tubuh nembiak nya ngagai Polis DiRaja Malaysia (PDRM) ngambika atur nangkanka nya dipejalaika.

Operasyen ke mega mungkur empat iku kaban PDRM enggau lapan iku orang periman nya tembu urung pukul 12.33 tengah malam pengudah gaya ba palan nya dientaska likun. – RBI

KANOWIT, 22 Mac – Pengerami Bejadika Pengawa Ngangkatmanah Pengkalan Ulin B, Rumah Penny, Lebak Menuang, Sungai Poi, diatur enggau mujur ari baruh Projek Transformasyen Menua Pesisir (RTP), meri perengka guna baru ngagai peranak menua nya.

Pengawa ngangkatmanah pengkalan tu dikearap ulih ngemuntangka komunikasyen ninting hari peranak kelimpah ari nyukung aktiviti ekonomi enggau rama komuniti.

Pengerami bejadika palan nya dipenyadika Allan Siden Gramong, Kaban Kunsil Nengeri (ADUN) Machan, ti nyemetak madahka pemansang infrastruktur baka pengkalan beguna dikena ngangkatka kualiti pengidup komuniti menua pesisir, sereta nentuka perengka guna lebih lantang sereta likun.

Iya mega ngarapka perengkaguna ke udah diangkatmanah nya ulih diintu enggau manah sereta dikena penuh peranak menua nya.

“Ngarapka fasiliti tu terus nyadi pengerawang ngagai pemansang enggau pengelantang komuniti ba kandang menua DUN Machan,” ku Allan.

Sama bisi datai ba pengerami nya, Pemancha Charlie Salang, raban penghulu, kaunselor, tuai-tuai rumah, pengari Opis Pelilih Menua Kanowit, Exco PBB Machan, sereta bala temuai bukai. – RBI