KAPIT, 25 Mac — Kaban Parlimen Kapit, Dato Sri Alexander Nanta Linggi nyemetak madahka pemutus nganjung nama chalun ungkup sesebengkah sitak mengkang nyadi prerogatif ketuai tetinggi parti.

Ku iya, pekara nya ukai pekara baru, tang udah lama nyadi pengawa dalam parti.

“Pemutus senentang pengawa ngantung nama chalun ungkup sesebengkah sitak nyengkaum Parlimen Kapit endang amat dibaruh prerogatif ketuai tetinggi parti.”

Pengudah enam penggal nyadi penyandang enggau Kaban Parlimen, aku meretika pemutus kepenudi mengkang ba jari ketuai tetinggi parti,” ku iya.

Nitih ku iya, dalam konteks Sarawak, pemutus nya ari baruh bidang kuasa YAB Premier Sarawak nyadi Presiden Gabungan Parti Sarawak (GPS) enggau Presiden Parti Pesaka Bumiputera Bersatu (PBB).

Dulu agi ari nya, Nanta nerangka iya bisi negu sentang pemesai guna nyikap penganti nyadi ketuai ba sebengkah pengawa komuniti, nyengkaum nyebut nama Sekretari Politik iya, Datuk Alvin Runggah Jimbun nyadi siku ari orang ke bisi potensial jemah ila.

Penerang nya taja pia narit ati mayuh orang lalu ngujungka mayuh macham reaksyen.

Ngenang silik agi, iya nyemetak madahka batang fokus maya ke diatu ukai ba sapa chalun, tang lebih agi ba pengawa nempa sereta ngenegapka garis penurun ketuai ba renggat baruh.

“Pekara ke beguna agi maya ke diatu ukai ba sapa chalun, tang baka ni kitai terus ngansah sereta nyikap penau nyadi ketuai ba renggat baruh.

“Fokus kami iya nya nempa penurun ketuai ngambika parti seruran bisi rintai ketuai ti sedia megai tanggungpengawa maya diguna,” ku iya.

Iya mega ngenang pasal penemu penganalisis politik, Jayum Jawan ti negu pemesai guna ngemansangka penau nyadi ketuai nyadika pelasar pengelantang parti.

Berebak enggau nya, Nanta nyemetak madah penerus pemansang di Kapit meseti diteruska enggau ketuai ti tau dipechaya, komited sereta meretika guna rayat.

“Penerus ‘perjuangan’ enggau pemansang di Kapit meseti diteruska enggau ketuai ti tau dipechaya, komited sereta meretika guna rayat,” ku iya.

Nyadi siku ketuai ukai Islam, iya mega ngemeratka pemesai guna rega begulai, bebasaka pangan diri sereta beserakup dalam raban bansa enggau mayuh jalai pengarap.

“Seagi-agi aku diberi mandat nya, aku deka terus meri servis enggau penuh tanggungpengawa ungkup pengelantang rayat,” ku iya seraya meri pengaga ati ngagai sukung ti seruran diberi komuniti. — RBI

KUCHING, 25 Mac — Aum Komiti Pengatur Pengerami Gawai Dayak Sarawak 2026 (No. 1/2026) udah mujur diatur di Kuching, sehari tu, nyadi singkang pemungkal ngelengkaska perambu pengerami renggat nengeri ungkup taun tu.

Aum nya bechairmanka Sapit Menteri Pengerai Mensia Mayuh, Pengawa Berumah enggau Perintah Lokal Sarawak, Datuk Dr Penguang Manggil ti nyadi Chairman Pengatur Pengerami Gawai Dayak Sarawak 2026, ba Bilik Mesyuarat Utama, Wisma Bapa Malaysia sehari tu tadi.

Aum tu ngemeratka pengawa ngatur pengawa bejalaika enggau silik batang program ti deka nyadika program besai pengerami Gawai Dayak 2026.

Entara pekara ti bisi dikerandau iya nya pengawa mantaika program enggau anggar ungkus ungkup beberapa batang pengerami iya nya Bazaar Gawai Dayak & Pengerami Etno Budaya, Gawai Niti Daun enggau Pengerami Makai Lemai Gawai Dayak 2026 ti disadang nyadi ka batang pengerami nya.

Kelimpah ari nya, aum nya mega mansik pekara bukai bekaul enggau logistik, koordinasyen entara ejensi enggau peminta sukung dikena nentuka pengelanchar pengawa bejalaika program nya.

Randau ke nyadi nya ngayanka komitmen tegap semua piak dalam nentuka tetiap inisiatif ke diperambu ulih dipejalaika enggau sistematik, efisyen sereta meri empas ke tinggi.

Pengawa ngatur Pengerami Gawai Dayak 2026 dikearapka ukai semina ulih ngenegapka agi penyerakup komuniti, tang mega ulih terus negika pesaka, main asal enggau identiti komuniti Dayak di Sarawak.

Sama bisi datai Menteri ba Opis Premier Sarawak YB Dato Sri John Sikie Tayai ke mega Kaban Kunsil Nengeri (ADUN) Kakus, Sapit Menteri ba Opis Premier Sarawak (Undang-Undang enggau Adat Bumiputera) ke mega ADUN Bukit Goram, Datuk Jefferson Jamit, Sapit Menteri Infrastruktur enggau Pemansang Penyangkai Kapal Sarawak, Datuk Majang Renggi ke mega ADUN Samalaju, Sapit Menteri Nembiak Lumba enggau Main enggau Pemansang Orang Dagang Sarawak, Datuk Gerald Rentap Jabu ke mega ADUN Layar, ADUN Krian Friday Belik, ADUN Meluan Datu Rolland Duat, ADUN Engkilili Dr Johnical Rayong Ngipa, Sekretari Mendam M-FICORD Datu Sirai Daha, Direktor Opis Kereja Raya Sarawak Datu Adj. Prof. Ts. Gs. Br. PMr. Dr Cassidy anak Morris enggau ketuai ejensi ke bukai. — RBI

Kami Ruai Berita Iban deka bekunsika pemujur pemansang infrastruktur dibai Perintah Sarawak enggau rayat semua.

Nitihka penerang ari JKR Sarawak tujuh (7) buah Jematan ba Sarawak deka tembu taun tu (2026):

1. Jematan Batang Lupar 1

2. Jematan Batang Lupar 2

3. Jematan Sungai Limbang

4. Jematan Sejingkat

5. Jematan Paloh

6. Jematan Saribas 2

7. Jematan Rambungan

Semua rayat tentu enda sabar deka nengah jematan tu. Tabi puji sereta terima kasih ngagai JKR Sarawak, MIPD kelebih agi Perintah Sarawak.

Sumber — JKR Sarawak

Kredit Photo — CREC

MIRI, 24 Mac — Sesi Aum Komiti Mit Pekit Kumang Iban, Dayung Sangon, Keligit Orang Ulu enggau Keling Belawan beserimbai enggau pengawa ngatur Gawai Dayak Bazaar & Ethnocultural Festival 2026 udah diatur kena malam 23 Mac2026.

Aum nya ngemeratka pengawa deka nentuka koordinasyen batang sukut ngatur pekit nyengkaum atur enggau syarat penyereta, kelimpah ari ngenegapka kriteria ngakim sereta ngena pom skor ke sebaka.

Singkang tu dipeda beguna dikena nentuka tetiap pekit dipejalaika enggau lebih teratur, terang sereta adil di serata Sarawak.

Kelimpah ari nya, pengawa koordinasyen nya mega mantu nambahka tikas profesionalisme ngatur pengawa sereta nentuka pengawa pansik digaga enggau konsisten sereta enggau integriti.

Inisiatif tu mega seriris enggau pengawa ngetan sereta ngenegapka pesaka ‘Ethnocultural Festival’ Dayak, pia mega ngangkatka kualiti pemerindang pesereta ngambika lebih kompetitif sereta beprestij ba renggat nengeri. — RBI

Sumber, photo — Sambutan Gawai Dayak Peringkat Sarawak 2026

JULAU, 25 Mac : Sepenyampau RM44,000 bantu belanja projek udah diagih ngagai komuniti di Rumah Liba, Nanga Bua ba Program Ketuai Begulai Enggau Rayat di ti dipenyadika Datuk Larry Sng Wei Shien, Chairman Kaunsil Industri Kayu Ramu Malaysia (MTIB) ke mega Kaban Parlimen Julau.

Entara penerima bantu nya JKKK Rumah Liba Nanga Bua, JKKK Rumah Tungku Tanjung Udol, Biro Indu Rumah Liba, Biro Indu Rumah Kampit Sangkung, Biro Indu Rumah Philip Janting enggau Gerija Methodist Nanga Matop.

Ba program ke sama, iya mega ngemeratka rayat patut nyikap diri napi penambah ungkus pengidup berindik ari rega minyak dunya niki apin lama ke udah.

Nitih ku iya, gaya geopolitik ti ngaul Iran, Amerika Syarikat enggau Israel meri empas enda terus ngagai rega minyak baka diesel enggau binjin, lalu enggau nya ngeruga ungkus pengangkut enggau rega barang ti beguna.

“Taja pan Malaysia enda ngaul diri terus tang empas rentayan bekal minyak agi diasai, kelebih agi ba peniki rega produk bepelasarka petroleum,” ku iya.

Berindik enggau nya, iya ngelalau rayat ngemeranka chara bebelanja enggau bejimat sereta ngiga chara nyimpan ke engkeman ungkup pengidup sida ninting hari.

Berebak enggau nya, iya meransang penyereta dalam program MyLesen ti dipeda ulih mantu rayat ngasaika subsidi minyak nengah ngembuan lisin deriba ti entas.

Ungkus penyereta ke baruh urung RM250 muka peluang ngagai mayuh agi rayat bulih lisin ke entas.

Iya mega minta peranak Julau ngerebut peluang nya sebedau haribulan kepenudi ngerejista kena 24 April 2026, enggau naka ke diatu urung 400 ari 1,000 kuota udah diisi. – RBI

SIMANGGANG, 25 Mac – Kerejasama semua peranak enggau ejensi ti bejalaika projek beguna amat dikena nentuka pengawa bejalaika projek bejalai enggau lanchar sereta meri penguntung ngagai komuniti lokal, ku Datuk Francis Harden Hollis.

Dulu ari nya, iya ke mega Sapit Menteri Pemansang Bakat Sarawak bisi ngatur pengawa nemuai ngagai palan projek ke diperambu ari baruh agih belanja RTP DUN N.32 Simanggang.

Endur keterubah penemuai iya nya di Rh Jacktola Beranchar, Kampung Sungai Labi ungkup perambu projek ngaga baru endur entepan kerita nitihka peminta JKKK Kampung Sungai Labi.

Nangkanka nya, palan kedua iya nya di Rh Bericha Jumpu, Temiang Baru ungkup projek ngangkatmanah jalai tama ari Rh Bericha ngagai Jematan Temiang.

Penemuai nya diperambu nyadi timbal ari pengari rayat ngagai peminta ti dikenataika JKKK dalam pengawa ngemanahka perengka guna infrastruktur ba kandang menua diri empu.

Asil ari penemuai nya deka dikerembaika ngagai ejensi ti bejalaika pengawa ngambika ulih dipejalaika enggau silik agi.

Ejensi ti bejalaika pengawa udah nya deka bejalaika pengawa nemuai ngagai palan nya begulai enggau Chairman JKKK dikena nentuka endur ke bendar projek, sereta nyendiaka keretas kereja nyengkaum anggar ungkus sebedau dikenataika ngagai pengari rayat ngambika dikemendarka agih nengah belanja RTP.

Pengudah bulih pemendar ari pengari rayat, perambu projek nya deka nengah proses ke nangkanka nya sebedau masuk ngagai renggat kepenudi iya nya pengawa meri projek ari Panel Milih Projek RTP ti bechairmanka Residen Bagi Menua nengah chara chabut undi, pengawa nyiri kunteriktor ari JKKK enggau pengawa bejalaika nengah chara ngerupan. – RBI

BAU, 24 Mac – Dua iku lelaki ke beumur entara 20 ngagai 50 taun ditan dalam operasyen Op Tapis ti dipejalaika Polis Diraja Malaysia di Kampung Jugan Si Nawan enggau Kampung Bijuray Krokong, lemai tu tadi.

Nitihka penerang ari Ketuai Polis Pelilih Bau, P/Supt Mohd Haide bin A. Rahman, pengawa ngetan nya digaga entara pukul 4.00 ngagai 9.00 malam ari Bagi Tasat Jenayah Narkotik begulai enggau kaban Indu Opis Polis Pelilih Bau.

Peresa nisih ai kemi keterubah tetemuka kededua saspek positif dadah, sebedau ditan nengah Seksyen 15(1)(a) Akta Dadah Berbahaya 1952.

Iya nyemetak madahka polis deka terus bejalaika atur ke terit ngagai sebarang pengawa ngaul diri enggau salah guna dadah.

Mensia mayuh ke bisi penerang bekaul enggau aktiviti dadah dipinta datai ke mua lalu meri penerang nengah talipaun JSJN Bukit Aman ba lumur 012-208 7222 tauka talipaun JSJN IPK Sarawak ba lumur 017-592 9211. – RBI

SELANGAU, 24 Mac — Komitmen ti seruran dipejalaika dikena nentuka pengelantang rayat menua pesisir terus nyadi pemerat dipandangka nengah pengawa bejalaika Projek Ngerataka Taba Rumah Panjai Baru Rh. Udin Letan di Ulu Bunau, ti disua ngena chara simbolik sehari tu ari baruh agih belanja Program Transformasyen Menua Pesisir (RTP) ungkup sitak DUN N.59 Tamin.

Projek tu entara inisiatif dipejalaika Kaban Kunsil Nengeri (ADUN) Tamin, Ir. Christopher Gira Sambang dalam pengawa ngangkatka kualiti pengidup peranak di menua pesisir nengah pengawa nyendiaka palan pengentap pendiau ti lebih likun sereta lebih teratur.

Rumah panjai Udin Letan ke digaga dalam taun 1976 lalu keterubah iya diuan dalam taun 1979 diatu nyau deka manggai lima dekad.

Gaya struktur ke majak berubah sereta risiko ampuh bah ke suah nyadi maya musim pengujan ngasuh pengawa begunaka palan pengentap pendiau baru nyadi pekara ti dikemeratka enggau lengkas.

Asil ari randau begulai enggau komuniti menua nya ti betuaika Tuai Rumah Udin Letan, peranak menua nya udah nyapai sepenemu minta agih belanja dikena ngaga rumah panjai baru ba endur ke tinggi sereta likun agi.

Perambu ngaga nya mungkur pengabis kurang 20 pintu dikena napi guna peranak ke diatu.

Pengawa ngerataka taba nya berengkah kena 5 Mac 2026 lalu diperambu tembu kena 4 Jun 2026.

Pengawa bejalaika projek tu nyadi singkang pemungkal ti beguna dikena ngamatka pengawa ngaga rumah panjai baru ti lebih moden, likun sereta teratur.

Peranak rumah panjai nya mega meri besai terima kasih ngagai Ir. Christopher Gira Sambang ketegal pengibuh enggau sukung iya ti seruran mantu pengawa mindah ngagai palan pengentap pendiau baru ti lebih lantang sereta kondusif.

Nitih ku iya, pengawa ngenegapka pemansang menua pesisir deka terus chakah dipejalaika enda ngira dini alai nyengkaum ba kandang menua pesisir enggau ulu sungai, ngambika tetiap genturung pendiau ulih ngasaika perengka guna endur diau ke manah agi setipak enggau gaya pemansang kemaya hari.

Iya mega nyemetak madahka pengawa ngemansangka rumah panjai baru ukai semina betuju ngangkatka tikas pengidup peranak menua nya aja, tang mega ngemeratka sukut pengelikun, kelebih agi dalam ngurangka risiko penusah ngenyit baka ampuh bah, kelimpah ari nempa rampa menua ke lebih teratur ungkup rebak dudi hari.

Pengerami nya bela digulu pengari Opis Kereja Raya Bagi Menua Sibu, Puan Diana, Kaunsilor Ajan Dau enggau Kaunsilor Nyireng Saleh ti ngarika Palan Servis DUN Tamin, Tuai Rumah Udin Letan, peranak rumah panjai enggau kunteriktor projek ti bisi kaul enggau pengawa nya. -RBI

KUALA LUMPUR, 24 Mac – Menteri Besai Dato Sri Anwar Ibrahim nyemetak madahka Malaysia tetap komited ngagai semua penyarut meseti diputarka nengah chara bebaik.

Iya nyemetak madahka randau, diplomasi enggau kerejasama rat entara menua semina jalai ke mua dikena mutarka penyarut sereta mulaika penegap, setipak enggau peminta mensia sereta prinsip keadilan.

Iya madah munyi nya pengudah ngatur randau nengah telefon enggau Putera Mahkota ke mega Menteri Besai Bahrain Putera Salman Hamad Al Khalifa sereta Presiden Emiriah Arab Bersatu (UAE) Sheikh Mohamed Zayed Al Nahyan sehari tu tadi.

Nitihku iya, randau nya mega betatika pekara ke nyadi diatu di Asia Barat ke majak balat nyadi.

Berebak enggau nya, iya mantaika pengirau ati ke balat bekaul enggau penyarut ke majak nyadi sereta empas iya ngagai pengelikun pelilih menua enggau pengelantang rayat.

Ku iya nambah, penyinu ati mega dikenataika ketegal pengelenyau nyawa enggau pengerusak reta tengkira ketegal serang ke nyadi.

Ba randau nya mega, Anwar enggau Putera Mahkota betukar jaku Aidilfitri seraya besampi minta pengelantang, pemaik enggau pengelantang ungkup semua rayat di menua diri empu. – RBI

KUCHING, 24 Mac – Siku lelaki ke sebedau tu diripotka lenyau ditemu selamat kena lemai 19 Mac.

Individu nya, Fredenick Anak Petrus, 21 taun, bansa Iban sereta gawa nyadi soldadu ari Kem 6 RRD Ulu Tiram, Johor ditemu lalu dibai Polis Soldadu (MP) ngagai Kem Muara Tuang, Kota Samarahan urung pukul 5.00 lemai.

Nitihka penerang ari Pemesai Pemansik, Asp. Mohammad Ali Bin Amat, kes nya diatu dianggap udah tembu pengudah tudah nya ditemu.

Dulu ari tu, iya ke gawa nyadi soldadu diripotka lenyau ari Pos Pengentap Pendiau Pulau Pandanan pengudah enda ngayanka diri maya pengawa bebaris pagi urung pukul 7.00 pagi.

Piak bekuasa mega meri besai terima kasih ngagai kerejasama semua piak ti bisi kaul enggau pengawa ngiga endur individu nya. – RBI