SEBAUH, 24 Mac — Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom minta peranak Kampung Hilir Sebauh merambu pelin besai sosio-ekonomi komuniti ke komprehensif dikena napi pemar pemansang pengelikun pemakai dalam infrastruktur ke lebih lama.

Dr Rundi enggau bini iya, Datin Sri Loreta Sawot udah ngulu Pengerami Nerima Pengabang Hari Raya Aidilfitri Kampung Hilir Sebauh ba Balai Raya Kampung Hilir Sebauh kena Hari Dua.

Dalam jaku iya, iya ngemeratka pemerat jampat ngalih ari pengawa betanam betupi skala mit ngagai chara kluster komersial ti lebih diperambu sereta kompetitif.

“Enda ulih ‘in silo’, enda ulih kediri. Meseti beraban. Enti siku orang bisi lima ekar, 10 iku bisi 50 ekar,” ku Dr Rundi.

Ngenang pasal model kluster pemakai metropolitan di Belanda, chara betanam betupi bepusat ti begulaika pengawa ngeluarka, memproses enggau ngagih dalam ekosistem ti begempung, iya madahka model ke sebaka, dikelala enggau nama Kluster Pemakai Metropolitan (MFC), diatu benung digaga di Lundu nyadi perintis ungkup Sarawak.

Iya mega mantaika bida ke besai ba pemansut beras entara Sarawak enggau menua sepiak Kalimantan nyadika bukti pemerat jampat ngenegapka pengelikun pemakai menua tu.

Nitih ku Dr Rundi, Kalimantan di Sambas ngeluarka lebih tiga juta tan metrik beras setaun, dibanding enggau Sarawak ti semina ulih ngeluarka 21,000 tan metrik, seraka ti digambarka iya nyadi jaku tangkan ti berat ba tengah-tengah penusah global ti enda tegap ti majak nyadi.

“Maya ke diatu kitai ninga mayuh penyarut, dunya kiruh belaya. Nya alai kitai patut besedia nyendiaka pemakai kediri empu,” ku iya.

Bekaul enggau pekara infrastruktur, Dr Rundi ngerintaika perambu deka ngaga sebuah bandar baru meraka sungai nyadi chara proaktif dikena mutarka penusah ampuh bah ke majak nuntung genturung pendiau ke baruh di Sebauh.

Nengah pemendar jematan baru nya, rampa menua topografi enggau akses kandang endur nya dipelaba deka berubah enggau jampat, lalu begunaka agi pengawa neritka pengelikun komuniti enggau sistematik agi.

Iya ngingatka peranak ngambika ngaktifka baru skim matau rukun tetangga berindik ari kes enchuri ti diripot majak nambah.

Iya mega muji pengelantang rama komuniti ti mayuh macham di rantau tu.

Dr Rundi madah, perintah nengeri nengah Opis Tanah enggau Survei benung ba renggat kepenudi merambu ngaga pendam bersepadu ti mungkur lebih 50 ekar endur ngengkahka komuniti Dayak, Melayu enggau China ba siti kandang endur ke besemak, ti ​​ngayanka prinsip idup begulai ti udah lama nyadi teras identiti Sarawak.

Dikena nentuka pemansang pelilih menua tu terus dipejalaika, iya ngansak apai indai ngiring bala anak sida nuju pelajar Sains, Teknologi, Kejuruteraan enggau Matematik (STEM), ti dianggap beguna amat dikena ngamatka aspirasyen pelilih menua tu nyadi pelilih menua bepenatai pemisi tinggi manggai ba taun 2030.

Pengelandik teknikal mega dipeda nyadi benteng dikena nyaga raban nembiak menua tu ari ke tepekul enggau penyakit rama baka judi online enggau salah guna dadah.

Dikena nyukung pengawa merambu renggat baruh, opis menteri iya ngemendarka belanja pemungkal sepenyampau RM40,000, dibagi ngagai RM10,000 ungkup Biro Indu Kampung Hilir Sebauh enggau RM30,000 ungkup JKKK Kampung Hilir Sebauh, dikena melanja proses pelan induk kampung nya.

“Visyen kitai ba rumah panjai tu iya nya kitai enggai tinggal ari sukut sosio-ekonomi, kitai enggai tinggal ari sukut infrastruktur,” ku Dr Rundi nutup jaku iya.

MIRI, 24 Mac – Pengawa jampat raban Opis Bomba enggau Penyah Penusah (BBP) Lutong mujur nyelamatka siku burung beruie ke ditemu labuh ba kandang endur kilang Daiken Miri Sdn Bhd, tengah hari tu tadi.

Ba penusah ke nyadi urung pukul 4.30 lemai nya, raban bomba terus ngelawa endur nya sebedau ngambi burung nya dikena nyeliahka sebarang risiko.

“Burung tu dipelabaka ngelantak dinding kilang nya lalu ngujungka iya labuh,” ku Ketuai BBP Lutong, PBT II Henry AK Jugah.

Udah nya burung beruie nya dianjung ngagai Kem Piasau lalu diserahka ngagai Kaunsil Penyaga Kampung Sarawak (SFC), lalu diterima Harry AK Morris enggau Rolland AK Ajong ngambika dipejalaika enggau dijaga enggau silik agi.

Operasyen nya betuaika Henry begulai enggau PB Steward AK Lanting. – RBI

BINTULU, 24 Mac — Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom ngelalau peranak menua pesisir kelebih agi di Kampung Pandan, Sebauh ngubah ari runding asal ngagai pengawa nempa pengaya ekonomi nengah pengawa ngaga Pelin Besai ti komprehensif.

Bejaku ba Pengerami Nerima Pengabang Aidilfitri Kampung Pandan Sebauh, iya nyemetak madahka transformasyen rampa fizikal enggau runding beguna amat dikena nentuka komuniti enda tinggal dalam nangkup tagit Strategi Pemansang Pasca COVID-19 (PCDS) 2030 nengeri tu.

Dikena nyukung perambu renggat baruh, iya madahka geran pemungkal sepenyampau RM30,000 ngagai Komiti Pemansang enggau Pengelikun Genturung Pendiau (JKKK) dikena ngatur pengawa nyendiaka keretas kereja strategik ungkup pemansang Kampung Pandan, kelimpah ari nangkup guna keterubah dikena ngangkatmanah kaunsil kandang menua.

“Sebarang pemansang mesti diperambu enggau sistem ke betul. Aku deka komiti beratika potensial kandang endur tu lalu ngaga pelin besai dikena ngubah gaya sosio-ekonomi ngambika meruan agi,” ku iya seraya madahka perengka guna infrastruktur baru, nyengkaum pengawa ngaga jalai alun 700 meter enggau perambu nyendiaka servis feri, ti benung diatur dikena ngenyampatka akses enggau mobiliti peranak.

Berebak enggau nya, Dr.Rundi mega mansutka jaku tangkan ngagai pengempu tanah ngambika enda mindah tauka nyual aset reta tengkira sida ketegal deka ngulihka penguntung timpuh pandak.

Iya nerangka pengawa ngelengkaka hak tanah nya pengerugi ke meruan ti deka ngeruga pengidup rebak dudi hari.

Ngenang isu pengelikun pemakai lebuh napi gaya dunya ti enda tentu sereta tekan inflasyen, iya meri perambu ngambika peranak ngena tanah ke udah bisi ungkup pengawa betanam betupi ti meruan.

Inisiatif ngatika diri tu nyadika batang pengering komuniti lebuh napi rega komoditi ti majak niki, ungkus baja, sereta empas terus ari konflik geopolitik entarabansa baka di Timur Tengah.

Iya mega enchabar raban nembiak ke bepelajar ke mindah ngagai mengeri ngambika pulai meri pengelandik sida ngemansangka kandang menua asal sida.

Komuniti menua pesisir dilalau nunda chara ekonomi ti progresif, iya nya ngaga peneleba gawa nyadi pelasar dikena ngaga dagang sereta nempa pengaya , lalu ukai semina bepanggai ba gaji tauka penatai pemisi tetap.

Pemujur visyen pemansang tu ku iya nyemetak, begunaka pengawa nulak enggau mutlak elemen penyarut enggau dengki ba renggat kampung.

“Beambika chunto penegap struktur ketuai Parti Pesaka Bumiputera Bersatu (PBB) ti tegap sereta mindah nyadi siti tim ari baruh iring Premier Sarawak, iya nandu baru penetap iya ti madahka penyerakup ketuai renggat baruh ti terang nyadi kunchi besai dalam ngenyampatka agenda pemansang kandang menua” ku iya.

KUCHING, 24 Mac – Opis Kereja Raya (JKR) Sarawak tetap komited ngamatka agenda pemansang nengeri nengah pengawa bejalaika projek ari baruh Langgur Pemansang Malaysia Lumpar Ke-12 (RMK-12).

Naka ke diatu, penyampau semua rega projek RMK-12 Sarawak enggau Perintah Besai nyengkaum RTP 2025 udah manggai RM72.70 bilion ti mungkur 15,107 projek di serata Sarawak.

Pemujur tu mandangka pengulih bejalaika projek enggau efektif sereta komitmen JKR Sarawak ti terus ngenegapka infrastruktur, meransang penumbuh ekonomi, sereta ngangkatka pengelantang pendiau rayat.

JKR Sarawak deka terus nentuka tetiap projek dipejalaika enggau efisyen, ngembuan kualiti sereta meri empas terus ngagai komuniti. – RBI

BETONG, 24 MAC – Palan baru Rumah Mambu di Gerugu, Spak dipelabaka tembu penuh dalam bulan April 2026.

Pekara nya dipadahka rambau penemuai ngagai palan ke betuaika Sapit Menteri Pemansang Nembiak Lumba enggau Orang Dagang Sarawak ke mega Kaban Kunsil Nengeri (ADUN) Layar, Datuk Gerald Rentap Jabu enggau Kaban Parlimen Betong Dato Dr Richard Rapu.

Penemuai nya ngembuan tuju deka beratika pejalai projek ke diatu sereta nentuka pengawa bejalai nitihka pelin ke udah ditetapka ungkup pengelantang peranak rumah panjai nya.

Sama bisi datai rambau penemuai nya, Injinir Opis Kereja Raya (JKR) Bagi Menua Betong, Jason Ng Boon Tuan, Superintenden Morris Nayub ari Opis Tanah enggau Survei Bagi Menua Betong, Injinir JKR Steward Ludan, Pemesai UKAS Tony Malang, Pemancha Norman, Penghulu Ajang, Kaunselor Horace Entoi enggau ejensi ti bekaul.

Projek tu dikearap ulih meri penguntung ke besai ngagai peranak menua tu nengah chara nyendiaka palan pengentap pendiau ke baru, ke lantang agi, seriris enggau pengawa perintah ti majak ngangkatka tikas pengidup komuniti menua pesisir.

Kapsyen : DEKA TEMBU… Palan berumah baru deka tembu lalu ngemai pengelantang ngagai peranak menua

Info kredit Betong Xcess

KUCHING, 24 Mac — Presiden Parti Rakyat Sarawak (PRS), Parti Se’ati Rayat Sarawak (SUPP) enggau Parti Demokratik Progresif (PDP) bisi hak ngantung nama pilih sida empu, tang jaku kepenudi ba jari Datuk Patinggi Tan Sri Abang Johari Tun Openg ke nyadi ketuai GPS.

Penganalisis politik Profesor Dr Jayum Jawan, pechaya berita pasal pengawa nukar chalun nya nyadika tanda tumu baka “angin sebedau ribut”, ti tau ngayanka peluang dinamik dalam ti mansang dalam komuniti Dayak Parti Bumiputera Bersatu (PBB).

“Pengawa nentuka chalun ba sebarang pengawa bepilih dalam PBB tetap bepanggai ba pemutus ketuai tinggi parti,” ku iya ngenang pasal tulis Sekretari Besai PBB, Datuk Seri Alexander Nanta Linggi.

Ba penerang Facebook, Nanta meri tanda Datuk Alvin Runggah Jimbun nyangka nyadi penganti iya nyadi chalun ba Parlimen Kapit enti sema iya nadai agi bediri minta pilih jemah ila.

Dr Jayum Jawan mega madahka dalam gempung parti, tetiap parti komponen ulih merambu chalun kediri empu, tang pemutus kepenudi tetap ditentuka ketuai gempung nya.

“Chalun Pesaka ba sebarang pengawa bepilih deka ditentuka Presiden PBB Abang Johari.

“Iya mega Chairman Gempung Parti Sarawak (GPS), nya alai chalun baka PRS, SUPP enggau PDP mega meseti bisi berekat Abang Johari nyadi chalun,” ku iya madah.

Info asal kredit : Suara Sarawak.

BETONG, 24 Mac — Siku nembiak lelaki beumur 17 taun ditan Raban Nasat Jenayah Narkotik, Indu Opis Polis Pelilih Menua (IPD) Betong dalam operasyen Ops Tapis di kandang menua Betong, urung pukul 1.00 lemai.

Ketuai Polis Pelilih Betong, Wan Mohamads Ali Wan Malek madah, saspek ditan ketegal ngembuan dadah sereta dipelabaka bisi kaul enggau aktiviti salah guna dadah sebedau dibai ngagai IPD Betong ngambika atur ke silik agi dipejalaika.

“Asil peresa ai kemi tetemuka saspek positif amphetamine enggau methamphetamine.

Pengawa meresa baru rikod iya ke udah tetemuka saspek nadai ngembuan sebarang rikod jenayah tauka penyalah bekaul enggau dadah sebedau tu,” ku iya nengah sebengkah penerang sehari tu.

Kes tu dipansik ari baruh Seksyen 12(2) enggau Seksyen 15(1)(a) Akta Dadah Berbahaya 1952.

Enti dikenuku salah, saspek ulih diukum mata duit nyentuk RM100,000 tauka dijil enda ngelui ari lima taun ketegal penyalah ngembuan dadah, lalu ungkup penyalah salah guna dadah, iya tau diukum mata duit nyentuk RM5,000 tauka dijil enda ngelui dua taun.

Berebak enggau nya, polis beratika penyalah bekaul enggau dadah ba genturung pendiau enggau berat lalu bebendar madahka sida enda deka belemi enggau sebarang pengawa ke baka nya.

Berindik enggau nya, mensia mayuh dilalau ngenataika penerang bekaul enggau aktiviti dadah di pelilih menua Betong nengah chara betanya ngagai Balai Polis Betong nengah lumur 083-472345. -RBI

SEBAUH, 24 Mac — Perintah Sarawak tetap komited ngenegapka pemansang sosioekonomi menua pesisir nengah chara ngemeratka timbang entara pemansang infrastruktur enggau ngetanka penyerakup komuniti.

Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom madah, pemansang fizikal aja enda chukup enti enda disukung penegap rama enggau nentuka pengelikun pemakai.

Nitih ku iya, chara nya setipak enggau aspirasyen Strategi Pemansang Pengudah COVID-19 2030 (PCDS 2030) ti ngeletakka inklusiviti nyadi batang pengawa nentuka penguntung ari pemansang diasaika enggau lantang ba rayat.

Iya madah munyi nya lebuh bejaku ba Pengerami Ramah Tamah Aidilfitri begulai enggau peranak di Kampung Labang, Sebauh.

Ba pemansang ke bekaul, iya madahka perambu nyendiaka perengka guna feri beungkus RM19 juta ungkup jalai nuju rumah panjai nya, ke diatu benung diserenih Opis Kereja Raya (JKR).

“Projek tu nyadi singkang pemungkal sebedau pengawa bejalaika ngaga jematan timpuh panjai nya nyadi nyata,” ku iya.

Ku iya nambah, palan nya deka nangkup pemansang ke udah bisi nyengkaum nyendiaka klinik enggau sekula baru ba sitak nya.

Ngelansa pasal sukut penyerakup, iya ngenang sejarah Kampung Labang ke kala nyadi palan pengenduh maya Jipun nguasa, enggau nya mandangka semengat liat ati enggau pengelantang komuniti pupu bansa.

Berindik enggau nya, iya minta bala ketuai komuniti enggau peranak menua nya terus ngetanka penyerakup lalu anang ngambi mudah pengelantang ti udah lama digaga, seraya mega bejejaga ari sebarang elemen ti tau ngeruga penegap nengeri tu, ti diuan urung 2.8 juta iku mensia.

Kelai sukung ngagai pemansang modal mensia enggau sosio-ekonomi komuniti, iya mega bisi madahka agih belanja penyampau RM30,000 ngagai Komiti Pemansang enggau Pengelikun Genturung Pendiau (JKKK) Kampung Labang enggau RM10,000 ngagai Gerempung Apai Indai (PIBG) SK Labang. – RBI

GEORGE TOWN, 24 Mac — Polis udah mujur nangkap dua iku individu pengudah seduai iya dipelaba bisi kaul ngereja pengawa enda menuku ba sebuah pendam di Batu Gantung, Air Itam, apin lama ke udah.

Ketuai Polis Pelilih Timur Laut, ACP Abdul Rozak Muhammad madahka, piak iya nerima ripot ari siku lelaki peranak menua nya ke beumur 69 taun bekaul enggau video ke viral ba media rama ke ngayanka sepasang lelaki enggau indu ngereja pengawa ke enda menuku ba sebuah pendam Cina.

Ku iya, pansik tumu mandangka penusah nya nyadi kena 22 Mac, enggau kededua individu ke bisi kaul dipelaba peranak menua nya.

“Saspek keterubah iya nya siku indu beumur 37 taun ditangkap kemari urung pukul 8.35 malam ba sebuah flat semak Jalai Padang Tembak, ditu.

“Saspek kedua, siku lelaki beumur 58 taun, ditangkap ba hari ke sama urung pukul 11.10 malam ba mua sebuah begunan semak Jalai Paya Terubong, Bayan Lepas, semak ditu,” ku iya nengah sebengkah penerang sehari tu tadi.

Ku Abdul Rozak, kededua saspek ngaku bisi kaul enggau pengawa enda menuku nya lalu ditan riman pengelama tiga hari berengkah sehari tu nyentuk 26 Mac dikena mantu pansik ke silik ari baruh Seksyen 294(a) enggau Seksyen 509 Kanun Keseksaan sereta Seksyen 233 Akta Komunikasi enggau Multimedia 1998.

Sebedau tu, video pengelama 38 saat udah viral ngayanka sepasang lelaki enggau indu ngereja ulah ke enda menuku ba sebuah pendam, lalu nya dirikod siku indu ke mega ngerara seduai nya, ngelalau iya deka ngeripot ngagai polis. — RBI

Sumber, — Bernama

BETONG, 24 Mac – Sesi meri penerang pasal projek ngaga selepat tanah tusur pemanjai 150 meter di belakang Rumah Jilan, Kerapa Spak udah diatur sehari tu dikena mutarka isu tusur enggau pengelikun ba kandang rumah panjai nya.

Kelimpah ari pengawa ngaga selapat nya, projek tu mega mungkur pengawa ngaga parit semin pemanjai 150 meter enggau pelaman semin pemesai 10 kaki ba belakang rumah panjai dikena ngenegapka sistem parit enggau perengka guna peranak.

Projek tu dikearapka ulih ngangkatka pengelikun peranak Rumah Jilan, Kerapa Spak sereta ngurangka risiko tanah tusur ba kandang menua nya.

Injinir Bagi Menua Opis Kereja Raya (JKR) Betong, Jason Ng Boon Tuan madah, projek nya dipelaba deka ditinda dalam bulan April 2026 enggau timpuh dipejalaika empat bulan pengudah kereja berengkah.

Pekara tu dikenataika lebuh penemuai Sapit Menteri Pemansang Nembiak, Lumba enggau Orang Dagang Sarawak ke mega Kaban Kunsil Nengeri (ADUN) N.36 Layar, Dato Gerald Rentap Jabu, begulai enggau Kaban Parlimen P.204 Betong, Dato Dr Richard Rapu @ Aman Begri, ti udah ngabas endur nya sereta mendingka penerang.

Sama bisi datai Superintenden Morris Nayub ari Opis Tanah enggau Survei Bagi Menua Betong, Injinir JKR Steward Ludan, Pemesai Unit Komunikasyen Mensia Mayuh Sarawak (UKAS) Tony Malang, Pemanca Norman, Kaunsilor Horace Entoi sereta mega pemesai ari ejensi ke bekaul. – RBI

Kredit Betong Xcess