BELAGA, 25 Mac — Siku orang tuai diripotka lenyau ba kandang menua Sungai Asap, Belaga kenyau ari 23 Mac tu tadi, nitihka ripot polis ba penerang sehari tu.

Ketuai Polis Pelilih Belaga, DSP Jimbai Ak Bala madahka tudah udah dikelala enggau nama Lazarus Kulleh, 67, ari Uma Sambop, Sungai Asap.

“Bepelasarka ripot polis kena 23 Mac 2026 urung pukul 3.55 lemai, iya kepenudi dipeda ba rumah panjai Uma Sambop sebedau diripotka lenyau,” ku iya ba siti penerang.

Tudah diripotka ngena baju T chura biru muda/burak enggau tanchut pandak biru/burak lebuh kepenudi dipeda.

Berindik enggau nya, mensia mayuh ke bisi penerang bekaul enggau tudah ke lenyau dipinta datai ke mua mantu dalam pengawa mansik nengah chara ngenataika penerang ngagai Pemesai Pemansik, SJN Saprie bin Azman @ Ajang ba lumur 013-8234484 tauka ngenataika penerang ngagai sebarang balai polis ke besemak.

Polis mega ngelalau mensia mayuh ngambika lengkas ngeripot enti bisi meda individu ke setipak enggau tukuh tudah ngambika ulih mantu pengawa ngiga mansa. — RBI

Sumber, photo — Polis Pelilih Belaga

KUALA LUMPUR, 25 Mac – Opis Menteri Wang Malaysia madahka rega runchit produk petroleum ungkup timpuh 26 Mac ngagai 1 April 2026 bekaul rega petrol RON97 enggau RON95 mengkang enda berubah, lalu rega diesel ngayanka bida nitihka pelilih menua.

Bepelasarka penerang nya, rega minyak petrol RON97 ditetapka RM5.15 seliter, lalu RON95 nadai subsidi iya nya RM3.87 seliter.

Ungkup penerima subsidi ari baruh inisiatif Budi MADANI, rega RON95 ditan ba RM1.99 seliter.

Berebak enggau nya, rega minyak diesel di Semenanjung Malaysia ditetapka RM5.52 seliter.

Enti dibida di Sabah, Sarawak enggau Labuan, rega diesel mengkang baruh iya nya RM2.15 seliter.

Pengawa netapka rega tu setipak enggau mekanisme rega automatik (APM) ti ngambi kira ubah rega minyak mata dunya sereta mega rega mata duit ke diatu.

Perintah tetap komited nentuka penegap rega minyak sereta nyaga pengelantang pendiau rayat nengah pengawa bejalaika subsidi ke ditagit enggau inisiatif ke bekaul. – RBI

KUCHING, 25 Mac — Sebana rasmi bekaul enggau aktiviti ngulihka pasir ba tebing Sungai Sarawak besemak enggau Kampung Sandong udah dikenataika ngagai Lembaga Sungai-Sungai Sarawak (LSS) ngambika atur ke bukai dipejalaika.

Sebana nya digaga berindik ari aktiviti sebuah kapal ke dipeda ngulihka pasir ba endur nya pagi tadi, urung pukul 8.32 pagi.

Nitihka pengari komuniti, nengah laman Facebook SDG Team-Sandong De Generation Team, aktiviti nya udah ngenataika pengirau ati peranak menua nya laban bisi potensial ngeruga penegap tebing sungai enggau pengelikun reta tengkira ke besemak.

“Peranak irau pengawa tu tau ngasuh tebing sungai tusur, lalu enggau nya nambahka risiko pengerusak ke bepalan besemak enggau kandang endur nya,” ku sebengkah penerang nya.

Kelimpah ari nya, dikeirauka mega aktiviti nya tau ngeruga timbang ekosistem sungai enti enda dijaga nitihka atur ti udah ditetapka.

Berindik enggau nya, orang ke ngaga kompelin minta LSS bejalaika pansik enggau lengkas bekaul enggau pekara nya sereta ngambi atur ke patut nyema bisi ditemu ngelanggar undang-undang tauka garis lalau ke udah bisi.

Peranak menua nya ngarapka pengawa proaktif ulih dipejalai dikena nentuka pengelantang sungai enggau pengelantang komuniti dijaga. — RBI

Sumber, photo — SDG Team-Sandong De Generation Team

KUCHING, 25 Mac — Opis Kereja Raya (JKR) Sarawak ngemeratka sida nadai kala ngeluar tauka nyadung sebarang dokumen ti berambaika leka jaku “Senarai Semak Dokumen Tuntutan Ganti Rugi Kerosakan Kenderaan” ti diatu benung viral ba media rama.

Nitihka penerang rasmi, dokumen ti dikerandau nya enda entas lalu ukai dikeluarka JKR Sarawak.

Beduduk enggau nya, mensia mayuh dilalau anang pechaya tauka ngerembaika penerang ti enda dientaska dikena nyeliahka saru penemu.

JKR Sarawak mega ngelalau mensia mayuh ngambika seruran meda penerang ngagai ruai rasmi opis nya dikena ngulihka penerang ke betul sereta pemadu baru.

Tu nyengkaum laman Facebook rasmi, portal servis talikhidmat enggau talipaun JKR Sarawak Care.

Berebak enggau nya, penguna jalai alun ti kena empas ti deka ngaga sebana tauka ngulihka penerang silik tau betanya terus ngagai JKR Sarawak nengah pelasar rasmi ti disediaka.

JKR Sarawak ngemeratka komitmen seruran dikena nentuka pengawa ngenataika penerang ke tulin sereta meri servis ke pemadu manah ngagai rayat. -RBI

MERADONG, 25 Mac – Datuk Ding Kuong Hiing, Kaban Kunsil Nengeri (ADUN) Meradong minta kaul rat entara komuniti enggau Polis Diraja Malaysia (PDRM) terus ditegapka dikena nentuka pengelikun enggau pengelantang rayat seruran dijaga.

Kenu ku iya, kerejasama rat entara kededua piak nyadi kunchi besai dikena ngetanka pemaik enggau pengelantang ba kandang menua nya.

Iya madah munyi nya lebuh ngulu Pengerami Ngintu Hari Polis Ke-219 diatur Indu Opis Polis Pelilih (IPD) Meradong ti nyadi ba Dewan Opis Pelilih Lama, Meradong, lemai tu tadi.

Dalam jaku dipansutka iya, Datuk Ding mega ngenataika pengaga ati ke pemadu tinggi ngagai raban polis ketegal jasa enggau pengawa sida dalam nentuka pengelantang enggau pengelikun menua terus dijamin.

Ku iya, pengawa nyadi pemesai polis ukai muntang laban seruran betapi enggau bemacham pemar enggau risiko ba tuju nyaga pengelantang mensia mayuh sereta nyaga pengelantang rayat.

Berindik enggau nya, iya meri besai terima kasih sereta meri pengaga ati ngagai semua kaban IPD Meradong, laban udah bebendar bejalaika tanggungpengawa enggau penuh profesionalisme.

“Pemaik ke diasaika kitai sehari tu asil ari kerejasama rat entara polis enggau komuniti menua tu,” ku iya.

Lebuh nyimpul jaku iya, iya meri Selamat Hari Polis Ke-219 ngagai semua kaban PDRM sereta ngarapka raban nya terus nyulut, ngembuan integriti sereta komited dalam bejalaika tanggungpengawa ungkup pemaik pengelikun menua.

Bela ngulu pengerami tu iya Ketuai Polis Pelilih Meradong, DSP Tansli Mering, pengari ngagai Sapit Menteri Pengawa Bekebun enggau Komoditi, Wong Zee Yeng, Ting Kai Sing, Pemesai Pelilih Menua Meradong, pengarai ejensi perintah, ketuai komuniti enggau ketuai raban bansa, raban polis, raban media enggau komuniti menua nya. -RBI

MERADONG – Sapit Menteri Bekebun enggau Komoditi Dato’ Sri Huang Tiong Sii, ngenataika pemeri penyampau RM10,000 dikena nyukung aktiviti ninting taun IPD Meradong beserimbai enggau Pengerami Ngintu Hari Polis Ke-219.

Iya ke mega Kaban Parlimen Sarikei enggau Kaban Kunsil Nengeri (ADUN) Repok, minta raban bansa terus meri sukung enggau kerejasama ngagai Polis Diraja Malaysia (PDRM) dalam pengawa sida ngetanka pemaik enggau pengelantang ba kandang menua nya.

Ku iya, mensia mayuh patut seruran nemu sereta ngeripot sebarang aktiviti ti disangka dikena mantu raban polis bejalaika tanggungpengawa sida enggau lebih ngasi.

Iya mansutka jaku tu nengah teks ke dibacha pengari iya, Wong Zee Yeng.

Dulu agi ari nya, iya meri besai terima kasih ngagai raban polis di Meradong sereta serata menua ketegal komitmen sida ti seruran bejalaika pengawa nyaga pengelikun peranak, lalu enggau nya ngemuntangka komuniti ngasaika pengidup ti lantang asil ari kerejasama rat entara polis enggau komuniti menua nya.

Ba pengerami ke sama, iya ngaku pangku pengawa ke berat raban polis ke nyadi batang penyaga pengelikun menua.

Sama bisi datai iya nya Ketuai Polis Pelilih Meradong, DSP Tansli Mering, ADUN Meradong, Datuk Ding Kuong Hiing, Pemesai Pelilih Menua Meradong, Ting Kai Sing, ketuai opis perintah, ketuai komuniti enggau ketuai raban bansa, raban polis IPD Meradong, raban media, raban pinchin polis enggau komuniti menua nya.- RBI

MERADONG, 25 Mac — Indeks penyalah selampur ba pelilih menua Meradong ngerikodka penurun ke nyata iya nya 59 peratus ungkup timpuh Januari ngagai 25 Mac 2026 enti dibandingka enggau timpuh ke sama taun nyin kemari.

Ketuai Polis Pelilih Menua Meradong, DSP Tansli Mering madah, penyampau kes jenayah indeks nurun ari 22 kes ba taun 2025 ngagai semina semilan kes taun tu, lalu enggau nya mandangka pemanah atur nagang enggau neritka atur ti dipejalaika.

Nitih ku iya, penyalah ganas ngerikodka penurun ari lima kes ngagai dua kes, iya nya penurun tiga kes tauka 60 peratus.

Berebak enggau nya, penyalah reta tengkira mega bisi nurun ari 17 kes ngagai tujuh kes iya nya nurun 10 kes tauka 59 peratus.

“Penurun kesemua indeks jenayah ukai semina asil ari pengawa polis aja, tang asil ari kerejasama rat entara polis enggau komuniti ti majak manah maya tu,” ku iya.

DSP Tansli Mering bejaku munyi tu beserimbai enggau Pengerami Ngintu Hari Polis Ke-219 Taun Tikas IPD Meradong, ba Dewan Opis Pelilih Meradong, seharitu tadi.

“Aku mega ngarapka kerejasama tu ulih dipajakka dikena nentuka pengelikun enggau pengelantang mensia mayuh di pelilih Meradong seruran dijaga,” ku iya.

Berebak enggau nya, iya nesau semua staf IPD Meradong ngambika terus ngetanka pengandal sida enggau penuh integriti sereta bejalaika tanggungpengawa sida enggau proaktif sereta progresif dalam betapi enggau sebarang bansa penyalah. – RBI

Ngisi petrol tauka diesel ngagai tong tauka gilin semina dikemendarka ngagai pemegai PERMIT KHAS ti entas.

Peminta ungkup permit khas tu ulih digaga nengah chara ‘online’ nengah portal https://spb.kpdn.gov.my .

Taja pia, ungkup gaya penusah ngenyit, takah ngisi enda lebih ari 20 liter aja.

Pengawa nitihka atur tu beguna dikena nyeliahka sebarang atur undang-undang.

#ruaiberitaiban#newsiban#beritaiban

Rindu | Titih | Kunsika

KAPIT, 25 Mac — Kaban Parlimen Kapit, YB Dato Sri Alexander Nanta Linggai, ngemeratka komitmen iya nentuka pemansang di sitak Parlimen Kapit terus dipejalaika, taja pan tanggungpengawa iya nyadi Menteri Kereja Raya ba renggat menua begunaka perati ba projek infrastruktur besai menua tu.

“Nyadi siku menteri ti megai tanggungpengawa ba infrastruktur menua nyengkaum Jalai Besai Pan Borneo, Jalai Perintah Besai enggau mayuh macham projek perintah Besai, awak aku endang amat sekat.”

Taja pia, aku tetap nguji ngatur jam enggau belanja aku enggau manah dikena nentuka pemansang ba sitak Parlimen Kapit terus dipejalaika,” ku iya nerang lebuh bejaku ba Pengerami Bejadi Projek RTP enggau Ketuai Begulai Enggau Rayat di Rumah Annie Isop, Nanga Pelagus, Batang Rajang.

Iya nyemetak madahka kerejasama rat entara pengari rayat ari baruh Gabungan Parti Sarawak (GPS) balat ngemudahka pengawa merambu enggau bejalaika pemansang.

“Ba DUN Pelagus, aku gawa rat enggau YB Wilson Nyabung;ba DUN Bukit Goram begulai enggau YB Datuk Jefferson Jamit Unyat;lalu ba DUN Katibas begulai enggau YB Lidam Assan.

“Lebuh kitai dalam siti tim, semua perambu nyadi lebih teratur lalu pengawa bejalaika iya lanchar agi,” ku iya.

Nyadi Chairman URDA, iya madahka bemacham projek besai udah mujur dipejalaika, nyengkaum ngaga jematan meraka Sungai Batang Rajang ti beungkus lebih RM300 juta, ngaga Indu Opis Polis Pelilih Menua (IPD) baru, enggau projek ngaga jalai alun ari Semaram ngagai Nanga Belawai.

Ku iya nambah, “Penyampau semua agih belanja pemansang ungkup Bagi Menua Kapit diatu udah ngelui RM1 bilion.

Teruska semengat ‘segulai segulai’, bekerejasama sereta nyingkang begulai ungkup jemah ila ke lebih mansang ungkup Kapit.”

Iya mega minta rayat beserakup lalu anang bepechah, seraya nyemetak madahka proses ngulihka agih belanja pemansang ukai pekara ke muntang.

“Tim ke bisi diatu entara ADUN enggau Kaban Parlimen chukup manah, aram meh kitai ngetan sereta terus nyukung,” ku iya.

Ba pengerami nya, YB Dato Sri Alexander mega bisi madahka agih belanja RM30,000 ungkup pengawa dapur rumah panjai enggau RM5,000 ngagai tetiap Biro Indu, lalu penyampau semua nya manggai RM150,000.

Iya nyemetak madahka pengawa nempa ketuai rebak baru mega deka terus dipejalai, taja pan pemutus kepenudi deka mengkang bepanggai ba ketuai tetinggi nengeri tu.

“Aku deka ngemeratka komitmen aku terus ngelawa rayat ba renggat baruh sebarang maya ke ulih, lalu pengudah lebih 30 taun dalam politik, aku seruran bebendar ngasah penau nembiak rebak baru nyadi ketuai baru,” ku iya nambah.

Iya nyimpul jaku iya enggau meri besai terima kasih ngagai sukung enggau pengandal rayat, seraya ngemeratka pengawa beperang ngemansangka Kapit deka diteruska. — RBI

Sumber, photo — Alexander Nanta Linggi

KUCHING, 25 Mac — Perintah Sarawak chakah agi nyikap diri dikena napi peluang kemarau ti disadang nuntung nengeri tu berindik ari pengujung Monsun Timur Laut (MTL).

Sapit Premier Sarawak, Douglas Uggah Embas madah, ubah gaya hari dipelabaka deka ngujungka gaya hari angat enggau kemarau ti bisi potensial ngepunka bemacham risiko nyengkaum penusah angus tebuka, suntuk ai enggau penambah ‘hotspot’ ba beberapa kandang endur.

Nitihku iya, Ejensi Mutarka Penusah Ngenyit Menua (NADMA) mega udah ngelalau menua tu nyangka deka napi musim panas baka selama pengudah musim monsun abis.

“Dikena napi gaya tu, Komiti Mutarka Penusah Ngenyit Nengeri deka ngatur aum lalu ngasuh semua komiti renggat bagi menua enggau pelilih menua nyikap diri.

“Atur tu beguna dikena napi peluang kemarau enggau gaya hari kemarau,” ku iya.

Iya madah munyi nya ba pengerami Hari Raya Aidilfitri Sapit Menteri ba Opis Premier Sarawak (Koordinator Projek Pemansang Wilayah, DBKU enggau Hal Ehwal Islam), Datuk Abdul Rahman Junaidi, di Kuching sehari tu tadi.

Uggah ke mega Chairman Komiti Mutarka Penusah Ngenyit Nengeri (JPBN) Sarawak madah, entara batang atur nyengkaum ngenegapka pengawa matau tumu dikena nyidi bisi ‘hot spot’, kelebih agi ba kandang tanah kerapa ke mudah angus maya hari kemarau.

“Pengawa nyidi tumu beguna amat dikena nyeliahka penusah angus ari nyerarai ngagai kandang endur ke lebih luas.”

“Kitai enggai nganti api nyau mau baru kitai bejalaika pengawa.

“Enti ulih ditemu tumu, kitai ulih nagang sereta nyeliah ari majak balat,” ku iya nerang.

Kelimpah ari nya, perintah nengeri mega beratika guna infrastruktur ba kandang endur ti berisiko baka Kuala Baram dikena nentuka pengawa jampat ulih diambi nyema bisi penusah ngenyit nyadi.

Berebak enggau nya, iya nesau mensia mayuh bejalaika tanggungpengawa diri nengah chara enda betunu, api tebuka sepemanjai musim panas dikena nyeliahka penusah ke enda dikedekaka nyadi.

Sumber — TVS