KUCHING, 17 Mac – Urung 120 iku pemain golf enggau penyukung begempuru dalam pekit golf pengasih Kelab Kaban Golf Samarahan (KABAN) ba Kelab Golf Samarahan Country kena Hari Enam tu tadi, mujur ngumpul penyampau RM4,530 dikena mantu melanja pengawa mindahka ati siku anak mit peranak Sarawak, Maxy Perez.

Pemeri ke digumpul maya pengawa nya disua ngagai sida Maxy sebilik dikena mantu nampung ungkus berubat iya di Shanghai, China.

Chairman KABAN, Peter Umak madah, Maxy begunaka pengawa mindahka ati enggau lengkas pengudah ditemu bisi penyakit Biliary Atresia, iya nya penyakit ti jarang nyadi ti ngerusak salur empedu sereta tau ngasuh ati ba anak mit enda ulih gawa.

Penyanding penemu pengawa nya, Tan Sri William Mawan Ikom, ke mega Penyanding Penemu ba Opis Menteri Besai Sarawak (Indistri Pemakai, Komoditi enggau Pemansang Kandang Menua) sereta Kaban Kunsil Nengeri (ADUN) Pakan, bisi datai nyuaka pemeri nya ngagai indai Maxy, Stephanie Munira Sulan Muking.

Maxy ke ada di Kuching sebedau tu udah ngaga prosedur Kasai enggau pengarap ulih mulaika alir empedu sereta ngetanka gaya iya.

Taja pia, pengerai iya majak berubah baru beberapa minggu udah nya, sebedau peresa ke silik agi ngentaska penyakit nya udah datai ba tikas raya.

Bala pakar perubat udah nya mutuska pengawa mindahka ati nya aja peluang dikena nyelamatka nyawa iya.

Indai iya, Stephanie, udah dientaska nyadi pemeri ke engekeman lalu sanggup meri sebagi ari ati iya ungkup prosedur mindahka ati ke udah nerima pemendar ari tim perubat di Shanghai.

Dilanchar dalam bulan Mac 2025, KABAN ngembuan juluk deka ngenegapka kaul bakih enggau pengelantang entara bansa enggau komuniti Sarawak nengah main golf enggau bemacham aktiviti rama, kelimpah ari mantu individu enggau ruang bilik ti begunaka bantu.

Sama bisi datai ADUN Serembu Miro Simuh ke mega Sapit Presiden Samarahan Country Club, ADUN Ba Kelalan Baru Bian, ADUN Tebedu Dr Simon Sinang, Direktor Urusan Konsortium Kumpulan Bumi Janang Bunsu ke mega Penyanding Penemu KABAN, enggau Menijar Besai SALCRA Joseph Blandoi ke mega nyadi penyanding penemu kelab nya.-RBI

DARO, 17 Mac — Opis Bomba enggau Penyah Penusah Malaysia (JBPM) Sarawak ngenukuka siku indu mujur diselamatka pengudah tepekul ba sebuah kerita berindik ari penusah eksiden ba simpang tiga jalai nuju Jematan Muara Lassa urung pukul 3.30 lemai kemari.

Eksiden nya nyadi ketegal belantak entara entukar pacuan empat roda enggau sebuah kerita, ti ngujungka mansa ba penuduk penumpang mua enda ulih pansut kediri ketegal pengerusak struktur pintu.

Nitihka penerang ari Opis Bomba enggau Penyah Penusah Sarawak, kangau ngenyit bisi diterima urung pukul 3.28 lemai. Seraban raban ari Balai Bomba enggau Penyah Penusah (BBP) Daro pen datai ba endur nya dalam timpuh tujuh minit dikena bejalaika operasyen nyelamat.

“Bala raban bejalaika pengawa enggau lengkas ngena perengka khas dikena nyerungkai pintu mua entukar sebedau mansa dipansutka enggau likun,” ku penerang nya.

Tudah udah nya diserahka ngagai tim perubat ngambika diperesa enggau silik agi. Nadai penusah bebadi nyawa diripotka nyadi ba penusah tu.

JBPM Sarawak ngelalau semua penguna jalai alun ngambika seruran bejejaga sereta ngelaunka diri lebuh mansang semak ngagai simpang jalai, kelebih agi jalai nuju jematan besai, ke alai risiko penusah tau nambah ketegal ‘blind spot’ enggau enda ngasika tanda jalai alun. -RBI

PAKAN, 17 Mac – Pemansang teknologi kelebih agi pemintar tiru (AI) diatu jampat ngubah chara mensia gawa enggau berunding, ku Kaban Parlimen Julau Datuk Larry Sng Wei Shien.

Nitihku Chairman Kaunsil Industri Kayu Ramu Malaysia (MTIB) nya, mayuh pekara udah berubah enti dibandingka enggau suba, nyengkaum chara ngasilka utai baka logo sekula, ke diatu ulih diasilka enggau jampat ngena aplikasyen baka ChatGPT semina nengah telefon pintar aja.

Kenu ku iya, pemansang teknologi mandangka mesin diatu udah bepenau ngereja mayuh bengkah pengawa ti sebedau tu semina dikereja mensia aja. Pekara ti kala dikumbai mimpi tang diatu udah nyadi nyata.

Iya madah munyi nya lebuh bejaku ba program “Read 15” di Sekula Kebangsaan (SK) Nanga Kara kena 14 Mac tu tadi.

Dalam program nya, iya mega meri tujuh unit televisyen pintar dikena mantu bala pengajar enggau nembiak ngena teknologi digital dalam proses ngajar enggau belajar di sekula nya.

Kelimpah ari nya, iya mega ngenataika pemeri ngagai Gerempung Apai Indai enggau Pengajar (PIBG) sekula dikena mantu sida bejalaika mayuh macham aktiviti sekula.

Semua penyampau pemeri ke diagih sehari nya manggai RM18,000.

Berindik enggau nya, iya ngarapka bala nembiak deka ngemeratka pengelandik digital sereta belajarka pekara baru ngambika enda tinggal ari arus pemansang teknologi kelebih agi ngaul AI.

Berebak enggau nya, iya ngarapka pengawa bekenaka televisyen pintar ulih mantu bala nembiak ngulihka mayuh agi penerang sereta meri peluang ngagai bala nembiak di menua pesisir mansang setikas enggau nembiak di mengeri -RBI

TEBEDU, 17 Mac — Program nyerahka pelan projek ari baruh Program Projek Transformasyen Menua Pesisir (RTP) ungkup kandang menua Kunsil Nengeri (DUN) Tebedu dipejalaika kemari, ti mungkur inisiatif ngemanahka infrastruktur ti meri penguntung terus ngagai peranak menua nya.

Kaban Kunsil Nengeri (ADUN) Tebedu, YB Dr. Simon Sinang madah, projek nya nyengkaum kereja ngemanahka sistem parit di Kampung Krisen Siu dikena ngangkatka pemanah parit sereta ngurangka risiko ampuh bah ba kandang endur nya.

Nitih ku iya, projek nya mega mungkur pengawa masang pagar bansa ‘chain link’ ba tisi padang Kampung Batu Lin ti nyadika chara ngangkatka pengelikun enggau pengelantang guna padang ulih komuniti menua nya.

“Ejensi bejalaika projek tu iya nya Opis Parit enggau Entali Ai Sarawak, Bagi Menua Serian (JPS),” ku iya nengah sebengkah penerang.

Ku iya nambah, pengawa bejalaika projek RTP tu dikearapka ulih ngemanahka agi perengkaguna infrastruktur menua pesisir, lalu ari nya ulih meri pemaik ti enda ngetu ngagai peranak di kandang menua Tebedu. -RBI

MIRI, 17 Mac – Siku lelaki lesi pengudah mutosikal ke ditepan iya akisden enggau sebuah kerita semak SMK Agama, Jalai Bakam, tumu pagi tadi.

Ba penusah ke nyadi urung pukul 12.32 tengah malam, tudah ke nepan mutosikal Yamaha LC ditemu labuh ke dalam parit besemak enggau endur penusah nyadi.

Komander Operasyen, PBKI Abdul Rahman madah, lebuh datai ba palan penusah nya, raban bomba tetemuka aksiden nya mungkur sebuah kerita Perodua Aruz enggau sebuah mutosikal.

Nitihku iya, deriba kerita Perodua Aruz nya mujur nyelamatka diri sebedau penatai raban bomba ba palan penusah nyadi.

“Taja pia, lelaki ke deriba mutosikal beumur urung 30 taun udah dientaska Opis Menteri Pengerai Malaysia (KKM) bebadi ba palan penusah nyadi,” ku iya.

Raban bomba udah nya ngangkatka tudah ari parit sebedau nyerahka ngagai polis ungkup pengawa ke lanjut.

Operasyen ti ngaul raban ari Balai Bomba enggau Penyah Penusah (BBP) Miri Sentral mega dibantu empat iku anggota Polis Diraja Malaysia (PDRM) enggau dua iku petugas KKM.

Operasyen nya tembu enggau penuh urung pukul 2.07 pagi pengudah gaya ba endur nya dientaska likun.-RBI

BETONG, 16 Mac — Sepenyampau 211 ruang bilik ba kandang menua ari baruh DUN Bukit Saban udah dirintaika nyadi penerima Skim Bantu Nanam Baru Sawit enggau pemesai maksimum dua hektar ungkup siku ruang bilik, dalam pengawa perintah ti majak dipejalaika dikena ngenegapka ekonomi menua pesisir nengah pengawa betanam betupi ti berega tinggi.
Sapit Premier Sarawak, Datuk Amar Douglas Uggah Embas madahka bantu nya mandangka komitmen perintah nentuka komuniti rumah panjai enggau peranak menua pesisir terus nerima sukung ti bestruktur dikena nambahka pun penatai pemisi ruang bilik nengah aktiviti betanam betupi ti lebih meruan sereta ulih dipejalaika.
Iya ke mega Kaban Kunsil Nengeri (ADUN) Bukit Saban madah munyi nya lebuh bejaku ba Pengerami Bejadika Pesta Pemakai enggau Lumba enggau Main Bukit Saban ke diatur ba Rumah Panjai Mendit anak Unsu, Penom, Ulu Paku kena Hari Enam tu tadi.
Nitihku iya, kelimpah ari skim nanam baru sawit, penerima Skim Bantu Nanam Lada Baru ba sitak nya mega udah dikelala, nyengkaum nyendiaka bantu baja lada dikena mantu nambahka pemansut enggau penatai pemisi pekebun mit.
“Sepenyampau 211 ruang bilik ari Bukit Saban udah dirintai nyadi penerima Skim Bantu Nanam Sawit Baru enggau pemesai maksimum dua hektar.
Berebak enggau nya, penerima Skim Bantu Nanam Lada Baru mega udah dikelala nyengkaum bantu baja lada,” ku iya.
Ba pengerami ke sama, Sarawak Economic Development Corporation (SEDC) Betong begulai enggau Opis Orang Indu enggau Ruang Bilik Sarawak mega bisi nyuaka ‘Geran Modal Pemerkasaan Wanita Sarawak’ sepenyampau RM62,789.59 ngagai 13 iku orang dagang pemakai ari kandang menua nya.
Inisiatif nya dipeda setipak enggau pengawa ngenegapka ekonomi rayat ba renggat baruh nengah gempung bantu betanam betupi, sukung dagang enggau pemansang komuniti ti lebih komprehensif.
Sama bisi datai Datin Amar Dato Doreen Mayang, Kaban Parlimen Betong Dato Dr. Richard Rapu, Sekretari Politik ngagai Premier Sarawak Roseline Mapong Sabai, Ketuai Parti Pesaka Bumiputera Bersatu (PBB) Indu N.37 Bukit Saban Natasha Nasa Douglas, Pemesai Pelilih Menua Betong Laga Kueh kelimpah bala ketuai komuniti menua nya enggau tuai rumah. — RBI

KUCHING, 16 MAC – AirBorneo deka terus matau pengerembai rega kuasa dunya nyengkaum rega minyak dikena nentuka singkang sida nangkanka nya.
Ketuai Pemesai Eksekutif AirBorneo, Megat Ardian Wira Mohd Aminuddin, madahka mayuh pekara agi ba renggat tumu nyengkaum isu rega minyak, lalu piak iya mega enda tentu nemu baka ni gaya rega kuasa diguna dunya jemah ila.
“Nya alai, kitai deka terus matau ukai semina rega minyak aja tang mega rega kuasa global dikena meda nama singkang ke ulih diambi,” ku iya.
Iya madah munyi nya lebuh ngulu pengerami bebuka puasa AirBorneo begulai enggau media di Kuching, sehari tu tadi.
Nitih ku iya, bisi niki mimit ba belanja operasyen kompeni kelebih agi bekaul enggau ungkus minyak.
“Endang amat bisi niki mimit ba belanja kelebih agi ungkus minyak. Taja pia, misyen kami mega bisi tanggungpengawa rama, kelebih agi ari sukut penyambung menua pesisir,” ku iya.
Ku iya nambah, servis penerebai bilun ngagai menua pesisir meseti diteruska laban nya mega sebagi ari sempekat enggau perintah.
“Sebarang bayar tambah minyak patut diperundingka tumu enggau raban ke bekaul.
“Naka ke diatu nadai nikika tambang ti diletak ngagai pesinjir. Ungkup ke diatu rega tikit agi sebaka.
“Ungkup perambu dudi hari, kelebih agi maya kitai berengkah bejalaika operasyen bilun jet, ungkus operasyen deka diambi kira dalam perambu nya,” ku iya nerang.
Berebak enggau nya, iya nyemetak madahka perambu ngerembaika AirBorneo deka diteruska baka ke udah diperambu laban nya beguna ungkup Sarawak jemah ila.
Ungkup rikod, industri penerebai bilun global diatu mega napi rega minyak ti enda tentu berindik ari penyarut geopolitik di Asia Barat ti ngeruga jalai dagang kuasa dunya nengah Selat Hormuz, lalu enggau nya ngeruga ungkus operasyen kompeni penerebai bilun. -RBI

DARO, 16 Mac — Raban Penyaga Pengelikun Mensia Mayuh Malaysia (APM) di Pelilih Daro mujur nangkap siku ular kobra chelum urung tiga meter pemanjai ti ditemu ba atas padung kasut ba mua pintu sebuah rumah di Kampung Pangtray, ditu, sehari tu tadi.
“PKOD Daro nerima kangau ngenyit ari mensia mayuh ti madahka bisi ular kobra chelum ba atas padung kasut ba mua pintu rumah orang ke ngaga sebana di Kampung Pangtray,” ku penerang nya.
Tekala nya pengudah nerima ripot nya, raban APM berumban ngelawa endur nya bejalaika operasyen nangkap jelu reptilia nya.
“Kobra chelum urung tiga meter pemanjai nya mujur ditangkap ngena chara nyepit lalu gaya ba endur nya udah dijaga,” ku penerang nya.
Berebak enggau nya, APM madahka seruran sedia mantu mensia mayuh dalam penusah ngenyit, setipak enggau komitmen ejensi bejalaika pengawa enggau lengkas dikena nentuka pengelikun komuniti. — RBI

MIRI, 16 MAC – Perintah Sarawak tetap komited ngenegapka industri dagang temuai komuniti di tanah tinggi lebuh perambu ngatur Festival Homestay Tanah Tinggi Bario 2026 dipejurai dalam aum begulai enggau Gerempung Homestay Tanah Tinggi Bario, lemai tu tadi.
Sapit Menteri ba Opis Premier Sarawak (Buruh, Imigresen enggau Pematau Projek) ke mega Kaban Kunsil Nengeri (ADUN) Mulu, Datuk Gerawat Gala madah, perambu ngatur pengerami nya dipeda nyadi pelasar beguna dikena ngelakuka Bario nyadi palan dagang temuai bepelasarka komuniti ke nyelai di Sarawak. 
Nitihku iya, naka ke diatu bisi 66 buah rumah dagang temuai udah direjista di Bario, enggau nya mandangka sambut ke chukup manah ari peranak menua nya dalam nyereta industri dagang temuai komuniti.
“Industri dagang temuai bejalaika tanggungpengawa ti besai dalam meri kelala penyelai budaya, jalai pengidup komuniti Kelabit sereta mega pemanah rampa menua Bario ngagai temuai ari menua tu enggau menua luar,” ku iya.
Ku iya nambah, kelimpah ari meri peneleba ke tulin ngagai temuai, program nya mega muka peluang ekonomi ngagai peranak menua nya nengah pengawa nyendiaka endur diau, pemakai asal, asil pengelandik jari enggau aktiviti budaya.
Ku Datuk Gerawat, perintah nengeri seruran nyukung pengawa ngenegapka industri dagang temuai ba kandang endur tanah tinggi baka Bario laban nya ulih mansutka penatai pemisi ngagai komuniti lokal kelimpah ngelakuka kandang menua nya nyadi siti ari palan dagang temuai ke nyelai di Sarawak.
Berebak enggau nya, iya mega ngelalau operator rumah dagang temuai ngambika seruran nyaga standard servis, pemeresi, pengelikun enggau kualiti peneleba ungkup temuai.
“Standard ke manah beguna amat dikena nentuka nama Rumah Dagang Temuai di Bario terus dijaga lalu ulih matak mayuh agi temuai datai jemah ila,” ku iya nambah. -RBI

KUCHING, 16 Mac — Opis Menteri Pelajar Malaysia (KPM) madahka naka ke diatu bedau bisi atur rasmi dikeluarka bekaul enggau pengawa bejalaika Atur Ngajar enggau Belajar ari Rumah (PdPR) ba semua sekula ari baruh opis menteri nya.

Nitihka penerang rasmi ti dikunsi Opis Pelajar Nengeri Sarawak ba ruai rasmi Facebook sida, semua institusyen pelajar ari baruh pegai KPM terus bejalaika pengawa ngajar enggau belajar betunga mua baka selama, setipak enggau kelinda sekula ke diatu.

Mensia mayuh dilalau anang nyadung tauka pechayaka sebarang penerang ke enda dientas.

Sebarang pemutus tauka atur rasmi bekaul enggau pekara tu deka dipadah KPM ari setiap maya nengah jalai rasmi opis menteri.

KPM ngemeratka pengelikun enggau pengelantang nembiak seruran dikemeratka dalam tiap pemutus ke digaga. — RBI