KAPIT, 17 April – Pengeransing ngenegapka pengawa ngumpul penerang enggau analisis gaya baru ba salah guna dadah kemaya hari nyadi batang tuju Aum Kaunsil Pengatur Pemuntan Dadah (MTMD) Renggat Bagi Menua Kapit ti diatur ba Opis Residen Bagi Menua Kapit, Hari Tiga tu tadi.
Aum strategik tu dipeda nyadi pelasar ke beguna dalam ngatur pengawa begulai entara ejensi, kelebih agi dalam meretika gaya enggau ubah baru ba pengawa gian enggau salah guna dadah enggau substans ba pelilih Kapit.
Aum nya bechairmanka Pemesai Tadbir, Daniel Batin, ngarika Residen Bagi Menua Kapit.
Dalam randau nya, pemerat diberi ngagai pematut ngangkatka pengulih ngumpul penerang ba renggat baruh enggau chara ti lebih sistematik, betul sereta komprehensif nyengkaum bekunsi penerang entara ejensi penerit atur enggau piak ti bekaul.
Chara bepelasarka penerang tu beguna ngambika analisis gaya baru ulih dipejalaika enggau dalam agi, lalu enggau nya ulih mantu piak bekuasa ngelala gaya baru salah guna dadah, endur ti berisiko enggau raban ke ditagit ti begunaka perati enggau lengkas.
Nyadi chara ke engkeman, aum nya mega nyapai sempekat sepenemu bejalaika Program Palan Gawa Bibas Dadah (TEKAD) ba semua opis perintah, baik nya ba renggat perintah besai enggau nengeri.
Inisiatif tu ukai semina ngembuan tuju deka nagang pengerekai salah guna dadah ba raban pengereja pengawa perintah, tang mega nyadi kelai komitmen begulai dalam nempa kandang endur gawa ti bepengerai sereta nadai dadah.
Sama bisi datai Direktor Ejensi Nagang Dadah Nasional (AADK) Sarawak, Abdul Hamidiee Ibrahim, ti madahka AADK diatu benung ba renggat chakah agi numbuhka opis baru di Bagi Menua Kapit.
Nitih ku iya, perambu numbuhka opis nya deka tekala nya diangkatka ngagai renggat Indu Opis AADK ngambika dikemendarka, dikena nentuka servis nagang, ngubat enggau ngatur ulih dikenataika enggau lebih efisyen sereta komprehensif ngagai komuniti lokal.
Iya mega madah, pengawa beratika palan udah dipejalaika ba sekeda premis ke bisi potensial nyadi opis AADK di Kapit nyadi singkang pemungkal dikena ngamatka penumbuh nya.
Sama bisi ngulu aum nya, Ketuai AADK Pelilih Menua Sibu, Azimah Marsid, Pemesai Pelilih Menua Kapit, Thomas Geoffrey Kandawang, Ketuai Bagi Pansik Jenayah Narkotik, Indu Opis Polis Pelilih Kapit, Suhaimi Rahman, kelimpah ari bala ketuai enggau pengari ari mayuh bengkah opis enggau ejensi ke bekaul.
Aum tu ngayanka komitmen ti terus ari semua piak dalam ngenegapka pengawa bepelasarka penerang enggau analisis gaya baru nyadi senyata besai dalam ngelaban pengawa salah guna dadah di Kapit, seriris enggau aspirasyen nempa komuniti ti lebih likun sereta lantang agi. -RBI
