JULAU, 18 Mac – Kaban Kunsil Nengeri (ADUN) Meluan, Datuk Rolland Duat Jubin madahka projek ngaga Jalai Nanga Lasi nuju Suchong enggau Balut ke beungkus RM82 juta entara inisiatif ke besai Perintah Sarawak dalam ngenegapka rentayan penyambung menua pesisir ba sitak Meluan.

Nitihku iya, projek ti dipejalaika Opis Kereja Raya (JKR) Sarawak mungkur pengawa ngemanahka jalai tanah enggau batu ke sepemanjai 8.5 kilometer ngagai standard belakin JKR R1.

Iya madah munyi nya lebuh ngulu Pengerami Nasih Tanah ungkup projek nya ke nyadi ba Rh Inting, Nanga Lasi, Julau kemari.

Kelimpah ari melakin jalai, projek nya mega nyengkaum pengawa ngaga enam buah jematan semin, nyendiaka perengka jalai, kereja nyaga tinting enggau ngemanahka sistem parit.

Ku iya, projek nya berengkah dipejalaika kena 12 Februari 2026 lalu dipelaba tembu penuh kena 12 Februari 2029, enggau timpuh bejalaika pengawa nya dalam timpuh 36 bulan.

Tambah Rolland, projek nya mega entara pemansang ti udah dipadahka Premier Sarawak rambau Pengerami Bejadika Jematan Nanga Lasi dalam bulan Ogos taun nyin tadi.

Berebak enggau nya, pengerami nya mega nyadi saksi pengawa nyuaka simbolik chek pampas tanah ke beungkus RM2 juta.

Sama bisi datai Sekretari Politik Premier Sarawak, Brian Fung enggau Paulus Dandee Banyang, Injinir Bagi Menua JKR Sarikei, Ir. Ts. Kennedy Kedo, Penguasa JTS Bagi Menua Sarikei, Awan Amal, Pemesai Pelilih Menua Julau, Minggu Jampong, wakil ejensi bekaul, ketua komuniti enggau ketuai raban bansa sereta komuniti lokal. -RBI

MIRI, 18 Mac — Polis Diraja Malaysia (PDRM) nengah Bagi Pansik Jenayah, Indu Opis Polis Pelilih (IPD) Miri bekerejasama enggau Sarawak Energy Berhad (SEB) Pampang Miri udah bejalaika operasyen dikena ngelaban aktiviti judi online ti enda entas ti beoperasyen ngelingi pelilih menua tu.

Operasyen ke dipejalaika kena 16 enggau 17 Mac 2026 meda atur ke terit dipejalaika lebuh bekal kuasa karan ngagai semilan premis ke dikelala bisi kaul enggau aktiviti judi online nadai lisin ke entas diputuska.

Pengawa nya dipejalaika ari baruh atur Seksyen 21A(1), Akta Rumah Judi Tebuka 1953 nyadi sebagi ari pengawa piak bekuasa ti seruran dipejalaika dikena nagang pengawa salah guna premis komersial ungkup aktiviti ti enda beradat.

Operasyen tu mega ngayanka kerejasama strategik entara PDRM enggau penyendia utiliti dalam ngenegapka pengawa neritka atur ngelaban aktiviti judi belalai ti majak ngerembai.

PDRM beratika isu judi ‘online’ enggau berat laban meri empas ke enda manah ngagai mensia mayuh, nyengkaum meri pangka ngagai penambah penanggul rama enggau pengawa salah.

Berindik ari nya, pengawa neritka atur ti begempung deka terus chakah agi dipejalaika ari sesiti maya ngagai sesiti maya. — RBI

KUCHING, 18 Mac – Perintah Sarawak netapka Hari Besai Kemisi tambah beserimbai enggau pengerami Hari Raya Aidilfitri 1447H.

Dalam penerang ti dikenataika Opis Sekretari Perintah Sarawak madahka, enti 1 Syawal 1447H labuh kena Hari Lima, 20 Mac 2026, Hari Satu, 23 Mac 2026 deka nyadi Hari Besai Kemisi tambah di serata Sarawak.

“Tang, enti 1 Syawal labuh kena Hari Enam, 21 Mac 2026, dia Hari Lima, 20 Mac 2026 deka ditetapka nyadi Hari Besai Kemisi tambah,” ku penerang nya.

Deklarasyen tu nyadika penambah ngagai hari besai ke udah bisi ti disediaka dalam Taga Keterubah Ordinan Hari Besai. – RBI

KUCHING, 18 Mac — Sapit Menteri Kereja Raya YB Datuk Seri Ahmad Maslan nemuai seraya gawa ngagai palan Projek Ngaga Begunan Gunasama Perintah Besai (BGP) Kuching dikena beratika pejalai projek ke diatu.

Dalam sesi meri penerang, iya madahka urung 75 peratus projek ke sakit dikelala ketegal pengelemi ari piak kunteriktor.

Berindik enggau nya, iya ngemeratka pemesai guna neladan kunteriktor ti mujur nembuka projek dulu ari timpuh “ahead of time”, laban chara tu ulih meri empas positif ngagai rayat sereta nambahka penyikar pengawa meri servis perintah.

Projek ke beungkus RM140.79 juta ti dipejalaika Eastbourne Corporation Berhad diatu udah ngerikodka penyulut fizikal iya nya 17.03 peratus, iya nya 5.59 peratus dulu ari timpuh tauka sebaka enggau 134 hari dulu ari timpuh.

Projek tu dipelaba tembu penuh kena 28 November 2028.

Enti udah tembu ila, kompleks nya deka endur 25 buah ejensi Perintah Besai ba baruh siti perabung, lalu enggau nya ngemuntangka pengawa rayat.

Projek tu mega ngena teknologi Sistem Binaan Industri (IBS) pemadu mimit 70 peratus sereta ngena Building Information Modelling (BIM) enggau nadai ngaul ungkus tambah.

Opis Menteri Kereja Raya ngemeratka komitmen sida ti terus dalam matau pengawa bejalaika projek dikena nentuka iya tembu nitihka timpuh, ungkus enggau spesifikasyen ti udah ditetapka, setipak enggau aspirasyen Perintah MADANI. — RBI

BETONG, 18 Mac — Sarawak terus bejalaika singkang ngenegapka rentayan infrastruktur lebuh Pengerami Pra Ngelancharka Pengawa Ngaga enggau Nembuka Projek Jematan Sungai Krian udah dipenyadika Sapit Premier Sarawak, Datuk Amar Douglas Uggah Embas, sehari tu.

Iya ke mega Menteri Wang enggau Ekonomi Baru II sereta Menteri Infrastruktur enggau Pemansang Palan Penyangkai Kapal Sarawak madah, projek ti meri empas ke tinggi tu sebagi ari pemansang Jalai Pesisir Sarawak ari baruh Pakej D4, ti dipejalaika Opis Kereja Raya Sarawak nyadi ejensi besai bejalaika pengawa.

Nengah ungkus kunterik RM112.5 juta, jematan sepemanjai 1.227 kilometer tu digaga enggau spesifikasyen moden ti mungkur struktur besai 690 meter pemanjai enggau 12 span, lalu disikap enggau dua lurung 8 meter pemesai ba kededua piak dikena nentuka pengelantang enggau pengelikun penguna.

Nitih ku iya, pengawa ngaga jematan tu ukai semina nyendiaka jalai alternatif ti efisyen agi, tang mega nyadi penyambung strategik entara Jematan Batang Saribas No.2 enggau Simpang Roban di Jalai Besai Pan Borneo.

Iya mega deka meri penguntung ke besai ngagai peranak menua tu laban timpuh pejalai ke sebedau tu bepanggai ba servis feri urung 15 minit ulih dipandakka ngagai semina beberapa minit aja.

“Pengawa muka Jematan Sungai Krian mandangka komitmen perintah Sarawak terus ngenegapka pemansang infrastruktur menua pesisir enggau ngemanahka agi penyambung kandang menua,” ku iya.

Berebak enggau nya, iya mega ngemeratka projek tu siti agi pemujur ke beguna dalam pengawa bejalaika rentayan jalai tebing tasik Sarawak, nyadika jematan tu ke-10 ke deka ditembuka ari baruh inisiatif nya.

Opis Kereja Raya Sarawak tetap komited nentuka tetiap projek infrastruktur dipejalaika enggau standard ti bekualiti tinggi, likun sereta tegap ungkup pengelantang rayat sereta pemansang nengeri ti meruan. — RBI

Miri, 18 Mac — Siku orang ke nepan mutosikal bebadi nyawa ba penusah eksiden ba jalai alun ti ngaul sebuah kerita ba KM822.1 Jalai Pan Borneo semak Jalai Suai, Batu Niah, lemai kemari.

Ketuai Polis Pelilih Miri, ACP Mohd Farhan Lee Abdullah madah, piak iya nerima ripot bekaul enggau penusah nya urung pukul 4.30 lemai.

“Bepelasarka pansik tumu ba palan penusah nyadi, sebuah kerita ke dideriba siku lelaki peranak menua nya ke beumur 36 taun ke bejalai ari Miri ke Bintulu dipelabaka ngelantak siku orang ke nepan mutosikal ke udah pansut ari lurung kiba sebedau ngenyit nukar lurung ke kanan tama ngagai lurung P-turn (Bintulu–Miri ),” ku iya.

Nitihka penerang iya, mansa lelaki peranak menua tu beumur 53 taun disahka bebadi nyawa ba palan penusah nyadi ketegal belantak, lalu deriba kerita nadai bakal.

Ku iya nambah, diatu kes nya benung dipansik ari baruh Seksyen 41(1) Akta Pengangkutan Jalan 1987.

Berindik enggau nya, mensia mayuh ke bisi penerang bekaul enggau penusah nya dipinta datai ke mua mantu tasat nengah chara ngaga kaul enggau Pemesai Pemansik Trafik, Insp. Afifah Nordin nengah lumur 019-5264640 tauka 085-430479, tauka sebarang balai polis ke besemak.

Berebak enggau nya, iya mega ngelalau penguna jalai alun ngambika seruran ngemeranka chara deriba enggau likun sereta ngasika atur jalai alun, kelebih agi sebedau musin pengerami Hari Raya Aidilfitri, dikena nyeliahka penusah ke enda dikedekaka nyadi. — RBI

SELANGAU, 18 Mac – Penembu Projek Ngaga Gelanggang Futsal Rumah Panjai Utul, Dijih Maga mandangka komitmen ti seruran dipejalai dikena nentuka tetiap renggat mensia mayuh nyengkaum raban nembiak di menua pesisir terus diberi perati nengah pengawa nyendiaka perengkaguna ti meri pemaik timpuh panjai ngagai komuniti lokal.

Nitihku Kaban Kunsil Nengeri (ADUN) Tamin, Ir Christopher Gira Sambang, iya ngarapka perengkaguna gelanggang futsal tu ulih dikena penuh ulih raban nembiak, lalu nyadi palan endur belepa, ngenegapka penyerakup sereta nyeliahka ulah ti enda menuku, kelimpah ari nempa rebak biak ti regas, bisi disiplin sereta kompetitif.

Inisiatif tu seriris enggau komitmen iya ti seruran meri perati ngagai guna pemansang raban nembiak menua pesisir ngambika sida bisi ruang ti positif ngaul diri dalam aktiviti ti bepengerai.

Pengawa ngaga gelanggang futsal tu dipeda ulih nyadi palan aktiviti komuniti ti ukai semina ngangkatka gaya pengidup ti bepengerai ba raban nembiak, tang mega nyadi pelasar dikena ngerapitka kaul rama sereta nerenakka semengat lumba enggau main ba peranak menua nya.

Projek ke berengkah digaga kena 30 November 2025 lalu tembu penuh kena 1 Mac 2026, nyadi siti ari inisiatif ke beguna dalam nyendiaka perengka guna rekreasyen ke lebih nyamai sereta teratur, kelebih agi ungkup raban nembiak ba kandang rumah panjai.

Projek ngaga gelanggang tu ari baruh agih belanja Program Transformasyen Menua Pesisir (RTP) mujur tembu sereta disua enggau rasmi kemari.

Pengawa nyerahka palan projek ke udah tembu mega digulu Rashidah ti ngarika Opis Kereja Raya (JKR) Bagi Menua Sibu nyadi ejensi ti bejalaika pengawa, kunteriktor projek enggau Kaunsilor Ajan Dau ti ngarika Palan Servis DUN Tamin. -RBI

SANDAKAN, 18 Mac — Siku lelaki beumur 28 taun diripotka lenyau pengudah iya dipelabaka diserang baya maya nyala udang ba Sungai Segaliud, Kampung Segaliud, kena malam Hari Dua tu tadi.

Tudah benama Mohd Rayyan Abdullah benung ba palan penusah nyadi begulai enggau apai iya lebuh reptilia nya enda mukai-mukai ayan lalu nyambar tudah dalam penusah ke nyadi urung pukul 8.22 malam nya.

Nitihka ripot, penusah nya nyadi enggau naka pengelengkas nyentukka apai iya ke bisi besemak enda sempat meri sebarang bantu.

Mansa udah nya lenyau ari peda pengudah ditabanka arus sungai dalam petang.

Ketuai Balai Bomba enggau Penyah Penusah Kinabatangan, Penulung Ketuai Bomba Hairi Otuh, madahka piak iya nerima kangau ngenyit tekala nya pengudah penusah nyadi sebedau ngatur tim ngagai endur nya.

“Lebuh datai ba palan nya, komander operasyen ngeripotka siku mansa lelaki dipechayaka ditagup baya maya bejalaika aktiviti nyala udang ba sungai.

Operasyen ngiga enggau nyelamat (SAR) benung dipejalai dikena nyidi tudah,” ku iya ba sebengkah penerang.

Iya mega madahka gaya petang maya malam hari enggau faktor pengelikun nyekat operasyen ngiga keterubah ba atas sungai.

Operasyen SAR diteruska sehari tu enggau ngerembaika kandang endur ngiga ti ngaul mayuh bengkah ejensi kelimpah ari bantu peranak menua nya dikena nyidi sebarang kelai bekaul enggau tudah.

Piak bekuasa ngelalau mensia mayuh ngambika seruran bejejaga sereta ngemeratka sukut pengelikun maya bejalaika sebarang aktiviti ba kandang sungai, kelebih agi ba palan berisiko tinggi enggau jelu siga. — RBI

SONG, 18 Mac — Siku deriba napi penusah lebuh kerita pacuan empat roda ti ditepan iya lenyau jaga dalam penusah eksiden kediri empu ba Jalai Embuau, urung pukul 7.20 pagi, kemari.

Taja pan kerita Isuzu D-Max nya napi pengerusak ketegal penusah nya, tang deriba kerita nya diripotka nadai bakal ti begunaka servis nyelamat khas.

Pengari Palan Gerakan Operasyen Bomba (PGO) Sarawak madah, kangau penusah ngenyit nya diterima urung pukul 7.22 pagi.

Sebuah unit jentera enggau raban ari Balai Bomba enggau Penyah Penusah (BBP) Song dianjung ngagai palan nya ke bepalan urung semilan kilometer ari balai nya.

Raban penyelamat datai ba palan penusah nyadi urung pukul 7.31 pagi dikena nentuka gaya mansa enggau pengelikun penguna jalai alun ke bukai.

“Lebuh datai ba endur nya, ditemu nadai mansa tepekul. Deriba diripotka mujur mansutka diri lalu nyelamatka diri empu sebedau penatai raban bomba ba palan penusah nyadi,”

Ketegal nadai operasyen mansutka mansa diguna, raban bomba fokus meresi reba penusah bebadi ba jalai alun dikena nyeliahka risiko ngagai perengka pengangkut bukai ke nengah jalai nya.

Penguna jalai alun ngelingi Song kelebih agi ba kandang menua Jalai Embuau ti ngembuan gaya tanah ti mayuh pemar dilalau ngambika seruran bejejaga enggau gaya jalai ti nyangka lichin maya pagi hari.

Faktor teknikal perengka pengangkut baka gaya tayar enggau sistem brem mega patut diperesa enggau tetap dikena nentuka deriba likun.

Operasyen nya tembu enggau penuh pengudah raban bomba nentuka palan penusah nyadi likun enggau nadai penusah minyak siuh ti tau ngeruga mensia mayuh. — RBI

BINTANGOR, 17 Mac – Balai Bomba enggau Penyah Penusah (BBP) Bintangor sehari tu bejalaika latih operasyen ti ngaul FMB F225i Nozzle dikena ngangkatka penyikar raban dalam napi penusah angus enggau lebih efektif.

Latih ti berengkah urung pukul 9.30 pagi nya ngemeratka pengelandik bejalaika perengka pengerara api kelimpah ari teknik ngerara api ngena bansa bepupu enggau sistematik sereta efisyen.

Latih nya betuaika PBK II Herman Ak Basa, dibantu PBK II Zulfaiza Mohammad begulai enggau raban bomba PB Hensley ak Benson, PBB Amirul, PBB Luther enggau PBB Awg Azman.

Sama bisi nyereta latih tu iya nya Ketuai BBP Bintangor PPgB Mahmudin Narudin ke nyadi pematau enggau koordinator dikena nentuka latih bejalai enggau lanchar sereta nyapai juluk ke udah ditetapka.

Latih baka tu beguna dalam nentuka penyikap raban seruran ba tikas ke pemadu manah setipak enggau komitmen Opis Bomba enggau Penyah Penusah Malaysia nyendiaka servis beprestasi tinggi, jampat sereta mesra. – RBI