BINTULU, 18 Mac —Kaunsil Industri Getah Sarawak (SARIB) udah ngambi singkang strategik ngambi alih Stesyen Pemansik Institut Pemansik Getah Malaysia ari baruh Kaunsil Getah Malaysia ti bepalan di Similajau, Bintulu, nyadi pengeran ngenegapka pemansang industri getah nengeri tu.

Pekara tu dibantai pengudah aum ti bechairmanka Menteri Industri Pemakai, Komoditi enggau Pemansang Kandang Menua Sarawak, Dato Sri Dr.Stephen Rundi Utom, pagi tadi.

Pengawa ngulihka tu mungkur pemesai urung 490 hektar ba KM70, Jalai Bintulu–Miri ti ngembuan potensial besai dikemansang nyadi hab besai ungkup transformasyen industri getah Sarawak, kelebih agi dalam meri kuasa ngagai komuniti pekebun mit ba Wilayah Tengah enggau Utara.

Pengerami nya bela digulu raban Kaunsil Direktor SARIB, nyengkaum Datuk Gerald Rentap Jabu ke nyadi Sapit Chairman SARIB, Ir Christopher Gira Anak Sambang enggau Azizul Annuar, begulai enggau pengari ejensi enggau opis menteri ke bekaul.

Ba pengerami ke sama, pengawa nyuaka kunchi simbolik nya udah dipenyadika pengari Kaunsil Getah Malaysia, Tuan Haji Ismail Bin Haji Ibrahim, kelai pengawa nyerah rasmi pengatur stesyen nya ngagai SARIB.

Pengawa ngulihka tu muka cherita baru dalam pemansang industri getah nengeri tu lebuh stesyen nya deka digaga nyadi palan bersepadu ti nyengkaum pentadbiran pelilih menua, latih enggau pengerembai, pansik enggau pemansang (R&D), sereta pengawa ngasilka paung getah ti bekualiti.

Entara batang perambu iya nya ngaga stesyen tu nyadi palan pentadbiran ungkup Wilayah Tengah ti mungkur kandang menua Bintulu, Miri, Limbang enggau Lawas, kelimpah ari nyadi palan latih ngadaka pengereja pengawa ti landik dalam bidang agronomi moden enggau mekanisasyen ladang.

Kelimpah ari nya, iya mega nyadi palan inkubasyen orang dagang dikena ngenegapka pengawa ngasilka produk bepelasarka getah hiliran enggau agro-pemakai, seraya nagit ngasilka nyentuk 500,000 paung getah bekualiti ninting taun.

Ari sukut empas ekonomi, inisiatif tu dikearapka ulih mansutka penatai pemisi nyentuk RM9 juta setaun sereta muka peluang kereja ti ngaul 25 ngagai 50 staf pengatur pengawa enggau urung 65 pengereja pengawa bepengelandik.

Berebak enggau nya, potensial pemansang agrodagang temuai mega udah dikelala nengah chara beambi ulih ari penyelai rampa menua asal ba kandang menua nya, ti bepalan ba jalai strategik entara Bintulu enggau Miri.

Perintah Sarawak nengah SARIB mega udah ngungkupka puku keterubah urung RM5.23 juta ungkup tuju pemansang enggau operasyen, nyadi komitmen dikena nentuka industri getah nengeri tu terus kompetitif sereta meruan.

Inisiatif tu mega seriris enggau pengawa perintah nengeri ti deka ngerapitka servis ngagai pekebun mit sereta optimumka guna tanah dikena nambahka produktiviti enggau penatai pemisi komuniti menua pesisir.

Sama bisi datai Sekretari Tetap Opis Menteri Industri Pemakai, Komoditi enggau Pemansang Wilayah Sarawak Datu Sirai Anak Daha, Direktor Unit Perambu Ekonomi Sarawak (SARIB) Ir. Ts. Awang Mohammad Fadillah Bin Awang Redzuan (SARIB) enggau Sekretari Pekara Wang Nengeri (SARIB) Noor Rasyidah Abdullah. — RBI

BETONG, 18 Mac — Projek Jalai Pesisir Sarawak ari baruh Pakej A5 ti mungkur kandang menua ari Jematan Batang Saribas 2 ngagai Simpang Roban diatu udah ngerikod penyulut fizikal 61.81 peratus.

Sapit Premier Sarawak, Datuk Amar Douglas Uggah Embas madah, projek ke ngembuan pemanjai urung 29.5 kilometer nya dipelaba tembu penuh ba suku keterubah taun 2027, lalu ari nya ulih ngemanahka rentayan penyambung jalai sereta nyungkak pemansang ekonomi di Bagi Menua Betong.

“Perintah Sarawak komited nentuka projek tu dipejalaika nitihka timpuh ke udah ditetapka.

“Penyulut ke diatu mandangka pemansang ke positif taja betapi enggau bemacham pemar teknikal ba renggat baruh,” ku iya lebuh Pengerami Pra-Ngelanchar Jematan Sungai Krian sehari tu tadi.

Iya ke mega Menteri Infrastruktur enggau Pemansang Palan Penyangkai Kapal Sarawak nerangka, skop kereja ungkup Pakej A5 nyengkaum ngaga jalai baru berengkah pengudah Jematan Batang Saribas di Kuala Saribas niki ngagai Simpang Roban ti nyambung ngagai Jalai Besai Pan Borneo.

“Entara komponen besai projek tu nyengkaum kereja meresi palan, nyendiaka jalai sementara, ngali tanah enggau batu, ngaga struktur penagang konkrit enggau kereja stabilisasyen lereng.

Bela dipejalaika iya nya pengawa ngaga sistem parit ti komprehensif baka parit, parit tisi jalai, parit lintas enggau struktur parit ke bukai dikena nentuka alir ai efisyen sereta ngurangka risiko ampuh bah,” ku iya nerang.

Ku Uggah nambah, projek tu mega ngaul pengawa ngaga simpang besai, jematan meraka parit, pelakin jalai ngena asfalt lengkap enggau bau sereta perabot jalai.

Aspek ngatur rampa menua mega diberi perati nengah pengawa bejalaika Pelin Ngatur Rampa Menua (EMP), matau sereta nagang pengerusak enggau mendap sepemanjai timpuh ngaga.

Pelin Pengatur Trafik mega udah disedia nyengkaum tim pengatur trafik enggau perengkaguna jalai sementara dikena nentuka pengelikun penguna jalai alun seruran dijamin.

“Perintah ngarapka projek tu ulih meri penguntung ke besai ngagai rayat, kelebih agi ba pengawa ngemanahka aksesibiliti, ngurangka timpuh pejalai sereta meransang penumbuh sosio-ekonomi di menua pesisir Sarawak,” ku iya.

Pengawa muka Jematan Sungai Krian ke beungkus RM112,499,580.09 dipadahka nyadi momen ke besejarah ngagai peranak menua pesisir Bagi Menua Betong ke sebedau tu bepanggai ba servis feri.

“Pengawa ngena jematan tu ukai semina deka ngemuntangka pemindah ninting hari, tang mega dikearap ulih meri empas positif ngagai pemansang sosio-ekonomi kandang menua nya,” tambah Uggah.

Pengerami nya mega digulu Kaban Parlimen Betong Dato Dr Richard Rapu, Kaban Parlimen Batang Lupar Mohamad Shafizan Haji Kepli, Senator Pele Peter Tinggom, Kaban Kunsil Nengeri (ADUN) Kalaka Mohamad Bin Duri, ADUN Krian Friday Anak Belik, ADUN Beting Maro Dato Haji Razaili Haji Gapor, Sekretari ngagai YAB Premier Sarawak Puan Roseline Mapong Sabai, Sekretari Mendam MIPD Datu Chiew Chee Jau, Residen Betong Datu Richard Michael Abunawas, Direktor Kereja Raya Sarawak Datu Dr Cassidy Morris sereta mega ketuai opis, ketuai raban bansa enggau ketuai komuniti kandang menua. — RBI

SAMARAHAN, 18 Mac — Perintah Sarawak terus ngenegapka tikas nyikap diri napi penusah ngenyit nengah perambu ngaga ‘Satelit Warehouse’ endur nyimpan aset kritikal di nengeri tu.

Berindik enggau nya, pengawa ngabas palan nya udah diatur pagi tadi ba Stor Nyimpan Barang, Opis Kereja Raya (JKR) Bagi Menua Samarahan dikena beratika pematut palan ke diperambu endur ngaga projek nya.

Penemuai nya betuaika Sekretari Mendam Perintah Menua Sarawak, YBhg. Datu Felicia Tan Ya Hua, enggau penyereta pengari ari mayuh bengkah ejensi bekaul nyengkaum Unit Pengelikun enggau Penerit Adat Sarawak (UKPS), Opis Residen Bagi Menua Samarahan, Opis Pelilih Kota Samarahan, JKR Sarawak, Opis Tanah enggau Survei Bagi Menua Samarahan enggau Sarawak Energy Berhad (SEB).

Nitihka penerang, penemuai nya ngembuan tuju beratika pematut palan nya sereta ngelala guna infrastruktur dikena nentuka pengawa ngatur enggau nyimpan aset penusah ngenyit ulih dipejalaika enggau lebih sistematik, efisyen sereta likun.

Perambu ngaga ‘Satelit Warehouse’ nya dipeda nyadi singkang strategik enggau proaktif dalam ngenegapka pengulih mutarka penusah ngenyit Sarawak, kelebih agi dalam nentuka aset kritikal ulih dikoordinasyen sereta diagih enggau jampat agi sereta ngasi maya situasyen penusah ngenyit nyadi.

Asil ari penemuai tu dikearapka ulih nyukung perambu ke lebih bestruktur, lalu enggau nya ulih nambahka tikas nyikap diri enggau efisyen nimbal penusah ngenyit ba renggat nengeri. — RBI

KINABATANGAN, 18 Mac — Siku lelaki ke diripotka lenyau pengudah ditagup baya maya nyala undang ditemu dalam gaya ke enda manah gamal ulih raban penyidi enggau penyelamat (SAR) di Sungai Kampung Segaliud ditu kena Hari Enam.

Tubuh niang Mohd Rayyan Abdullah, 28, ditemu melepung pukul 9.55 pagi, urung 500 meter ari endur iya diripotka lenyau.

Ketuai Balai Bomba enggau Penyah Penusah (BBP) Kinabatangan, Hairi Otuh madah, tudah ditemu ba hari kedua operasyen SAR dipejalaika.

“Operasyen sehari tu berengkah pukul 9.15 pagi enggau kerejasama ejensi penyelamat ke bukai enggau peranak genturung pendiau nya sebedau tudah ditemu ba tebing sungai ulih raban bomba.

“Gaya tudaj enda menyana agi enggau kededua kaki enggau lengan dipelabaka putus,” ku iya lebuh ditelefon Sinar Harian kena Hari Tiga tu tadi.

Nitihku iya, tudah udah nya dibai ke darat ngena juli sebedau diserah ngagai polis ngambika atur nangkanka nya dipejalaika.

“Operasyen nya tembu enggau penuh urung pukul 10.30 pagi,” ku iya.

Sebedau nya, tudah diripotka nyala undang ba sungai begulai enggau apai iya sebedau ditagup baya lalu lenyau ari peda mata.

Ba penusah nya, apai iya meda anak iya ditagup jelu reptilia nya sebedau minta bantu ari raban penyelamat.

Sumber, photo — Sinar Harian

MULU, 18 Mac – Perintah Sarawak udah ngaga pemutus ngambi jalai kayu balak di serata nengeri ngambika kereja ngemanah enggau ngangkatmanah ulih dipejalaika enggau meruan agi ungkup pengelantang enggau pengelikun rayat, kelebih agi di menua pesisir.

Kaban Kunsil Nengeri (ADUN) sitak N.78 Mulu ke mega Sapit Menteri ba Opis Premier Sarawak (Buruh, Imigresen enggau Pemantau Projek), Datuk Gerawat Gala madah, sebedau tu jalai nya diempu kompeni batang enggau pengawa ngintu ke mimit.

Ku iya nerang, singkang ngambi alih tu beguna amat laban mayuh kandang menua pesisir bepanggai ba jalai ke disebut nya dikena ngelawa sekula, klinik, pasar enggau palan pentadbiran.

Iya madah munyi nya lebuh nampung aum iya enggau EXCO Parti Pesaka Bumiputera Bersatu (PBB) Pampang Banga/Peluan, Pampang N.78 Mulu berandauka bemacham pekara bekaul enggau pemansang kandang menua sereta ngenegapka parti ba renggat baruh.

Rambau randau nya mega, iya bekunsika tuju ketuai parti sereta mega perambu perintah dikena nentuka pemansang terus dipejalaika ba kandang menua Mulu, kelebih agi ngaul genturung pendiau di Banga/Peluan.

Kenu ku iya, pangku pengawa nyadi ketuai ba renggat pampang beguna amat dalam nentuka sada enggau peneka rayat ulih dikenataika enggau terus ngagai perintah.

Dalam pemansang ke sama, iya madahka Sapit Premier Sarawak, Datuk Amar Douglas Uggah Embas diperambu deka nemuai ngagai Long Banga bejadika Jematan Sungai Balui, ti dikearap ulih meri pemaik ke besai ngagai peranak menua nya ari sukut perengka guna komunikasyen enggau pemansang kandang menua.

Gerawat mega meri besai terima kasih ngagai semua EXCO PBB Pampang Banga/Peluan ketegal komitmen enggau kerejasama ti enda ngetu dalam pengawa ngenegapka parti sereta nentuka pemansang terus dikembuan rayat ba kandang menua N.78 Mulu. – RBI

KUALA RAJANG, 18 Mac — Projek Pansik enggau Pemansang (R&D) ungkup pengawa nanam buah melon hibrid ti dipejalaika Lembaga Amanah Kebajikan Islam Kuala Rajang (LAKIKR) udah ngerikod pemujur ti meransang lebuh renggat keterubah utai tumbuh nyapai tikas penumbuh 100 peratus.

Nitihku Sapit Menteri Perambu Mengeri, Pengatur Tanah enggau Rampa Menua Sarawak, Datuk Len Talif Salleh, pemujur nya ngayanka pemanah guna teknologi betanam betupi moden ti diberi kelala ba sitak nya.

“Utai tumbuh ke berengkah ditabur kena 6 Mac tu tadi udah mandangka pemansang ke chukup positif, lalu enggau nya meri empas ke besai ngagai pemanah teknologi betanam betupi pintar ti dipejalaika,” ku iya ba sebengkah penerang.

Ku iya, projek ti ngempung chara fertigasyen enggau hidroponik nya dipelanja Unit Perambu Ekonomi Sarawak enggau iring teknikal ari Skyscraper Airhydro Industries Sdn Bhd.

“Pendekatan Smart & Precision Farming” ti dibai nengah kerejasama tu ngemendarka pengawa ngawal kualiti produk baka pemesai, pemerat, tekstur enggau tikas pemanis (Brix) ditentuka ngena chara saintifik ari renggat tumu nanam,” ku iya nerang.

Ku iya nambah, enam unit rumah gadung udah dikemansang ti ngaul urung 6,600 pun melon ari dua bansa hibrid eksklusif iya nya Lily enggau Rose keterubah iya ditanam di Sarawak.

“Enggau kapasiti empat ‘pusingan’ setaun, projek tu ditagit ulih ngeluarka nyentuk 30 tan metrik setaun, lalu enggau nya nentuka bekal buah premium ti konsisten ungkup makit menua tu,” ku iya.

Berebak enggau nya, iya mega nyemetak madahka projek nya ukai semina meri kelala inovasyen dalam sektor betanam betupi, tang mega nyadi pemangkin ngagai ekonomi komuniti setempat nengah chara nyendiaka peluang kereja ungkup peranak setempat.

“Asil keterubah dipelabaka deka dipasar nengah pengerami Gawai Dayak enggau Hari Raya Aidiladha, lalu enggau nya muka peluang ngagai makit menua tu ngasaika buah premium ti bekualiti tinggi sebaka enggau tikas antarabansa,” ku iya nambah.

Iya optimis projek tu bisi potensial dikerembaika jemah ila bepanggai ba prestasi pemansut enggau peminta makit. — RBI

SARIKEI, 18 MAC – Program Bantu Lisin Deriba (BLM) MyLesen Renggat Parlimen Julau diatu dibuka ungkup pengerejista nyentuk 24 April 2026, meri peluang ngagai peranak menua nya ngulihka lisin deriba ti entas enggau ungkus ke mudah.

Nitihku Kaban Parlimen Julau, Datuk Larry Sng Wei Shien, mensia mayuh ke bisi ati dipinta lengkas ngerejista diri lalu ngerebut peluang tu ngulihka lisin deriba nitihka prosedur ke betul.

“Taun tu, program tu semina nagit 1,000 iku pesereta aja.

“Naka ​​ke diatu, timbal chukup meransang lebuh mayuh udah ngisi pom sereta nganjung ngagai Palan Servis Parlimen Julau enggau Institut Memandu di Sarikei.”

“Taja pia, semua peminta meseti dientaska Opis Servis Parlimen Julau enggau pemerat diberi ngagai peranak menua Julau,” ku iya lebuh ditelefon.

Nengah program tu, penyereta semina patut mayar RM250 enti dibandingka enggau ungkus biasa iya nya entara RM700 ngagai RM800 di luar program, enggau nya meri jimat ke besai ngagai rayat, kelebih agi di menua pesisir.

“Dalam timpuh dua taun program tu dipejalaika, sepenyampau 1,176 iku penyereta udah mujur bulih lisin deriba nengah inisiatif tu,” ku iya nerang.

Larry ke mega Chairman Kaunsil Industri Kayu Ramu Malaysia (MTIB) mega madahka program tu ngembuan tuju deka ngadaka deriba ke bepenemu pasal undang-undang jalai alun, kelimpah ari ngemeranka chara deriba enggau likun.

“Nengah program tu mega mantu sida bulih lisin, kelebih agi ungkup tuju kereja ti begunaka lisin ti entas.

“Kelimpah ari nya, ngembuan lisin ti entas mega ngemendarka rayat ngasaika perengkaguna perintah baka subsidi Budi Madani ungkup minyak petrol RON95,” ku iya nambah.

Berindik enggau nya, Larry ngarapka rayat Julau dilalau anang muai awak tu lalu datai ke mua ngerejista diri sebedau haribulan nutup. – RBI

SONG, 18 Mac — Palan Kawalan Operasyen (PKOD) Pelilih Song udah nerima kangau ngenyit bekaul enggau penusah bebadi jalai alun (KJR) ke nyadi ba Simpang 4 Jalai Takan, ditu.

Nitihka penerang, penusah nya ngaul penusah bebadi kediri ti ngaul tiga iku individu iya nya siku lelaki besai tuai enggau dua iku orang tuai, siku lelaki enggau siku indu.

“Semua ke bisi kaul penusah nadai bakal,” ku ripot ti dipansutka Angkatan Pertahanan Awam Malaysia (APM) Pelilih Song.

Penerang nya nambah, operasyen bejalai enggau lanchar nadai sebarang penusah ke enda dikedekaka ngaul petugas tauka mensia mayuh ba palan penusah nyadi.

Berindik enggau nya, mensia mayuh diingat ngambika seruran bejejaga sereta ngasika atur jalai alun dikena nentuka pengelikun diri enggau penguna ke bukai.

Sebarang penusah ngenyit tau dipadah terus ngagai PKOD Song nengah talipaun penusah ngenyit 999 tauka lumur ke disediaka APM. — RBI

BELADIN, 18 Mac — Sebuah rumah ukai tetap seringkat angus lengis ba penusah angus di Lorong Cempaka 17, Kampung Hulu Beladin, urung pukul 12.00 tengah malam, tumu pagi tadi.

Nitihka penerang ari Palan Operasyen Operasyen (PGO), Opis Bomba enggau Penyah Penusah Malaysia (JBPM) Sarawak, kangau ngenyit bekaul enggau penusah nya diterima urung pukul 11.59 malam sebedau seraban raban ari Balai Bomba enggau Penyah Penusah (BBP) Saratok dipindah ngagai siti endur ke bepalan urung 60 kilometer balai.

Penusah angus nya udah nganguska semua struktur rumah nya sebedau raban bomba datai.

Lebuh datai ba endur nya urung pukul 1.10 pagi, raban operasyen betapi enggau pemar lebuh jentera berat Fire Rescue Tender (FRT) enda ulih tama ngagai kandang endur penusah nyadi ketegal jalai ke sempit.

Dikena mutarka penanggul tu, kaban ngena perengka pengangkut empat roda enggau Unit Servis Nyelamat Perubat Penusah Ngenyit (EMRS) mai pam enggau perengka pemadam api ngagai palan nya.

Taja betapi enggau penanggul logistik tang api mujur dirara urung pukul 1.40 pagi.

Nadai penusah bakal tauka bebadi nyawa diripot nyadi, laban semua peranak dipelabaka mujur ngelarika diri sebedau api nyerarai lalu nganguska palan pengentap nya.

Operasyen ti betuaika PBK II Abdul Rahman begulai enggau tujuh iku raban mega bejalaika pengawa ‘overhaul’ dikena nentuka nadai teda bara api ti tau ngepunka api baru.

JBPM ngelalau peranak kelebih agi ba kandang genturung pendiau ke bisi rumah betukuh kayu ngambika seruran nentuka sistem wayar elekterik dalam gaya ke likun sereta diintu enggau manah.

Kelimpah ari nya, endur rumah ke semak enggau jalai akses ke mimit dikelala entara batang risiko ke tau nambahka tikas pengerusak enti sema bisi penusah angus nyadi.

Unit Forensik Bomba deka bejalaika pansik silik dikena ngelala kebuah kebendar penusah nya nyadi. — RBI

PAKAN, 18 Mac – Pemesai 50 hektar tanah NCR di Wong Mengilas, Ulu Sungai diatu nyadi kedap ekonomi komuniti menua pesisir dia nengah Projek Bekebun Chara Bedandang (TSB) RISDA.

Program tu disereta 21 iku penyereta ari beberapa buah rumah panjai ti mungkur peranak ari Rumah Anita Unjong, Rumah Levis Anak Pana enggau Rumah Bunyau Anak Belut.

Projek tu dibagi ngagai dua renggat iya nya ba Renggat 1 mungkur 20 hektar enggau Renggat 2 mungkur 30 hektar enggau pengawa nanam getah nyadika batang pugu projek tu.

Kaban Kunsil Nengeri (ADUN) Pakan, Tan Sri William Mawan Ikom ke mega Penyanding Penemu ba Opis Premier Sarawak (Industri Pemakai, Komoditi enggau Pemansang Kandang Menua), nyemetak madahka projek tu ngenegapka struktur rama komuniti sereta ngangkatka tikas ekonomi peranak menua nya.

Ku iya nambah, RISDA meri bantu ngagai penyereta nyengkaum bekal benih, rachun enggau kereja ngintu pengelama enam taun, enggau ungkus bantu sepenyampau RM23,000 sehektar.

Asil getah dipelaba berengkah meri asil pengudah tujuh taun, lalu enggau nya nentuka penatai pemisi ti terus ungkup pesereta.

Iya mansutka penemu tu lebuh ngulu Program Nasih Tanah enggau Miring TSB NCR Wong Mengilas di Ulu Sugai begulai enggau Opis RISDA Stesyen Sarikei kilah ensanus.

Kelimpah ari nya, iya meransang raban penyereta ngemayuhka pun penatai pemisi sida nengah aktiviti tambah baka nupi manuk enggau kambin ba kandang endur projek, dikena ngangkatka agi tikas pengidup komuniti.

Pia mega, ba jaku dikenataika Tuai Rumah Anita ke mega chairman projek, nerangka pengawa meresi tanah enggau ngaga tiris diatu benung dipejalai dikena nentuka projek bejalai enggau lanchar nitihka perambu.

Anita mega ngarika peranak menua nya meri langgur penemu ngambika jalai kayu batang ke suba diangkatmanah nyadi jalai kebun dikena ngemudahka pengawa ngangkut asil betanam betupi sereta nyukung pengawa ngemansangka tanah NCR ba kandang menua nya.

Sama bisi datai ba program tu iya nya Pemesai RISDA Bagi Menua Betong, Muhamad Taqiyuddin Mohamad Khori, Penulung Pemesai Opis Betanam Betupi RISDA Stesyen Sarikei, Jalack Anak Bujang, ketuai komuniti enggau ketuai raban bansa (KMKK) enggau peranak ngelinggi nya. -RBI