BETONG, 11 April — Pengeransing ngenegapka raban nembiak rebak baru majak dipejalaika nengah pengawa ngatur Townhall Pelajar Betong ti berambaika leka jaku “Ari Betong Ke Panggau Dunya” ti udah diatur ba Dewan Tan Sri Alfred Jabu, SMK Saint Augustine, sehari tu.

Program ke diatur Komiti Pemansang Pelajar Layar (LEDC) nengah kerejasama Sekula Sekondari (SMK) Saint Augustine ngempuruka mayuh bengkah renggat mensia mayuh nyengkaum ejensi perintah, institusyen pelajar, ketuai komuniti enggau komuniti lokal begulai enggau bala nembiak.

Pengawa nya bisi ngayanka rintai panel ti tebangkar dalam bidang pelajar enggau pemansang komuniti.

Datuk Gerald Rentap Jabu, Sapit Menteri Pemansang Nembiak, Lumba enggau Orang Dagang Sarawak (Pemansang Nembiak enggau Lumba) ke mega Kaban Kunsil Nengeri (ADUN) sitak N.36 Layar, bisi datai nyadi panel besai.

Sama bisi ngisi sesi randau nya, Datu Ronnie Edward, Ketuai Kaunsil Adat Istiadat Sarawak, Watson Chunggat Anak Leonard Doo, Sapit Direktor Pelajar Yayasan Sarawak enggau Uging Gadong, Jurulatih Pakar Pemanah Sekula Plus (SISC+) Sains enggau Matematik ke mega Koorinator Program Dua Jaku (DLP), Opis Pelajar Pelilih Betong.

Aleksey Anak Aman, Penulung Kanan Pentadbir SMK Saint Augustine nyadi pematak randau.

Pengawa bejalaika program tu ngembuan tuju deka nambahka pemereti ati komuniti ba polisi pelajar ke diatu, kelimpah ari nyendiaka pelasar randau tebuka entara komuniti enggau ketuai pelajar.

Iya mega ngenegapka kerejasama entara sekula enggau komuniti sereta nambahka penyedar pasal peluang pelajar ba renggat dunya, kelimpah ari meransang kaul apai indai enggau chakah dalam pemansang pelajar anak.

Empat batang pekara transformasyen pelajar nyadi fokus randau iya nya Inisiatif Pelajar Pechuma, Program Dual Jaku (DLP), pelajar antarabansa nengah YSISS, enggau pengawa nyadi apai indai di menua pesisir dalam nyukung pelajar.

Sesi randau tu nyadi pelasar ke besai reti dalam ngenegapka kualiti pelajar, pengelandik jaku enggau sukung komuniti, setipak enggau juluk deka ngadaka rebak baru Betong ke ulih besemekih sereta nempa pemujur ba renggat dunya. -RBI

MERADONG, 11 April — Siku indu peranak menua tu ke beumur urung 30 taun ditan polis ketegal dipelabaka bisi kaul enggau aktiviti bejudi maya pengawa datai ngenyit raban polis ba sebuah kedai runchit ke nadai lumur di Jalai KJD, Bintangor, lemai kemari.

Ketuai Polis Pelilih Meradong, DSP Tansli Mering madah, pengawa ngetan nya digaga urung pukul 4.35 lemai kena 10 April 2026 ari tim Bagi Pansik Jenayah (BSJ) Indu Opis Polis Pelilih (IPD) Meradong.

Nitih ku iya, asil pengawa meresa saspek ba premis nya bisi tetemuka sekeda perengka ke dipelabaka dikena bejalaika aktiviti bejudi.

“Entara barang ke dirampas iya nya telefon binching, keretas chelak ke dipelabaka ngundan lumur loteri mensia mayuh ke nadai lisin, penyampau duit tunai enggau kontena plastik chura oren ke dikena nyimpan duit enggau keretas nya,” ku iya nengah penerang berita.

Ku iya, saspek enggau semua barang kes udah dibai ngagai Balai Polis Bintangor ngambika atur ke silik agi dipejalaika.

Ku iya nambah, kes tu dipansik ari baruh Seksyen 4A(a) Akta Rumah Judi Terbuka 1953 ti nyendiaka ukum mata duit enda kurang ari RM1,000 enggau enda lebih ari RM100,000 enggau ukum jil enda lebih ari lima taun tauka kededua ukum nya.

Berebak enggau nya, DSP Tansli ngelalau mensia mayuh anang ngaul diri enggau sebarang aktiviti bejudi lalu ngelalau komuniti meri penerang bekaul enggau aktiviti jenayah dikena nentuka pengelikun enggau atur mensia mayuh dijaga. -RBI

KUALA LUMPUR, 11 April – Menteri Pengelikun Menua, Dato ‘ Seri Mohamed Khaled Nordin nyemetak madahka nadai belembut ba sebarang pengawa salah berindik ari penusah ke nyadi di Bentong, Pahang ti ngujungka pemidang raban Soldadu Malaysia, Peribit Muhammad Amirul Raziq bin Rosafindi.

Iya ngenataika penyinu ati berindik ari pemidang niang sereta ngenataika penyinu ati ngagai sida sebilik.

“Ngarapka sida sebilik diberi pengering enggau penegap ati napi maya ti tusah tu, lalu semua kitai besampi ngambika niang diengkah entara orang ti arap sereta lurus,” ku iya.

Nitih ku iya, Opis Menteri Pengelikun Malaysia beratika penusah nya enggau berat sereta enda ngemeratka sebarang bansa pengawa kasar, salah ulah tauka ngelanggar disiplin ti enda ngayanka nilai integriti enggau profesionalisme ti dikemeranka Raban Soldadu Malaysia.

“Atur ke terit deka dipejalaika enggau nadai sebarang chara belembut ngagai sebarang piak ke bisi kaul,” ku iya nyemetak.

Diatu kes tu benung dalam proses undang-undang lalu deka ditentuka penuh ulih kort nitihka undang-undang.

Berebak enggau nya, opis menteri nya udah ngasuh Raban Soldadu Malaysia ngenegapka agi disiplin enggau integriti raban nya dikena nentuka penusah baka tu enda nyadi agi. -RBI

KUALA LUMPUR, 11 April — Perintah nengah Opis Menteri Kebun Bedandang Besai enggau Komoditi udah meri kelala insentif sepenyampau RM3.5 juta dikena nyukung orang dagang buah sawit ngulihka setipikit ‘Malaysian Sustainable Palm Oil’ (MSPO), setipak enggau pengawa ngenegapka industri sawit menua tu.

Menteri Kebun Bedandang Besai enggau Komoditi, Dr. Noraini Ahmad madahka inisiatif nya nyadi singkang proaktif Perintah dalam mantu orang dagang nangkup peminta pematut ke diatu, seraya mega ngangkatka daya penegap rentayan bekal minyak sawit menua.

“Lebih 3,000 pedagang buah sawit ke patut di serata menua dipelaba deka bulih penguntung ari insentif tu, nitihka syarat enggau pengelandik ke udah ditetapka,” ku iya nengah penerang berita sehari tu.

Peminta insentif tu tau dianjung ngagai Minyak Sawit Lestari Malaysia (MSPO) berengkah 15 April 2026 nengah sistem e-MSPO.

Nitihku iya, atur bejalaika inisiatif tu setipak enggau singkang ngenegapka pengawa bejalaika ti komprehensif MSPO 2.0, seraya nyukung agenda nasional dikena nentuka industri minyak sawit Malaysia terus ngerembai enggau meruan sereta kompetitif.

Perintah ngarapka singkang tu ulih ngerembaika bungkur pengawa meri setipikit ba orang dagang sawit, lalu ari nya ulih ngenegapka kesemua ekosistem rentayan bekal minyak sawit nasional.

Berebak enggau nya, perintah deka terus ngemeranka chara ti betanggungjawap sereta fokus dikena nentuka industri minyak sawit nasional mengkang tegap sereta dikearapka makit, baik nya dalam menua enggau antarabansa.

“Tetiap singkang ke dipejalaika meseti meri sukung ke efektif ngagai pemain industri, kelebih agi sida ke bisi kaul terus enggau rentayan bekal minyak sawit nasional,” ku iya nambah.

Inisiatif tu mandangka komitmen perintah ti terus nyaga pengelantang pendiau rayat sereta ngenegapka pengandal ba sektor minyak sawit nyadi penyaup ti beguna ngagai ekonomi menua. — RBI

KUCHING, 11 April — Dua iku lelaki beumur 20 taun diripotka bakal pengudah dituntung penusah aksiden ba jalai alun ti ngaul tiga buah entukar ba kandang Politeknik Kuching, Jalai Matang, tengahari kemari.

Opis Bomba enggau Penyah Penusah Malaysia (JBPM) Sarawak nerima kangau ngenyit bekaul enggau penusah nya urung pukul 1.27 lemai.

Berindik ari ripot nya, seraban tujuh iku raban ari Balai Bomba enggau Penyah Penusah (BBP) Petra Jaya begulai enggau sebuah injin FRT udah dianjung ngagai endur nya.

Komander Operasyen, PBK I Mohd Nizam Bujang madah, penusah bebadi nya mungkur sebuah entukar pacuan empat roda, sebuah kerita Perodua Myvi enggau sebuah kerita Perodua Kancil.

Deriba enggau penumpang sama bela lelaki beumur 20 taun bakal.

Taja pia, sida diripotka enda tepekul dalam kerita znya.

Deriba lelaki ke beumur 20 taun nya diripotka selamat sereta nadai bakal.

Deriba lelaki beumur 21 taun ke nepan kerita Perodua Kancil nya mega diripotka selamat.

‘Pasukan Keluaran Operasi’ (PKO) bejalaika pengawa meri bantu keterubah enggau muai mansa sebedau nyerah ngagai Opis Menteri Pengerai (KKM) ngambika diperubat enggau silik agi ba sepital.

Kelimpah ari nyelamatka mansa, raban bomba mega bisi bejalaika pengawa meresi minyak ke siuh ba atas jalai dikena nyeliahka risiko penusah bebadi ke bukai nyadi ngagai penguna jalai alun ti nengah kandang endur nya.

Operasyen nya tembu enggau penuh enggau naka pengelengkas lebuh gaya ba endur nya disahka likun sereta ulih dijaga. — RBI

BETONG, 11 April — Pengerami Rumah Tebuka Aidilfitri Pentadbiran Bagi Menua Betong 2026 diatur enggau chukup pengeransing sereta begulai ba Dewan Sukan Tan Sri Datuk Amar Stephen Kalong Ningkan, Betong, lemai tu kemari.

Pengerami nya dirami enggau penatai raban pengereja pengawa perintah nengeri enggau perintah besai sereta mega bala ketuai opis, lalu enggau nya mandangka semengat pemaik enggau penyerakup rayat Bagi Menua Betong.

Nitihka penerang ari Kaban Parlimen Betong, Dato Dr Richard Rapu, ngatur pengerami ke bansa nya bejalaika tanggungpengawa ti beguna amat dalam ngerapitka kaul entara ejensi perintah enggau komuniti menua nya.

“Kelimpah ari nyadi palan endur betemu, pengerami tu mega nyadi pelasar dalam nerenakka semangat beserakup, kerejasama enggau pengelantang rayat Bagi Menua Betong,” ku penerang nya.

Pengerami nya mega diisi enggau bemacham pengawa ke ngerinduka ati nyengkaum pengawa pemerindang bejadi, pengawa bejadi simbolik, penemuai bala temuai ke dipebasa ngagai bansal pemakai, pekit karaoke, pengawa nyuaka perais enggau barang pengingat sereta sesi begambar sebedau tembu enggau rami ke manah.

Penatai Dato Dr Richard Rapu ngulu pengerami nya ngarika Sapit Premier Sarawak, ke mega Menteri Wang enggau Ekonomi Baru II enggau Menteri Infrastruktur enggau Pemansang Palan Penyangkai Kapal, YB Datuk Amar Douglas Uggah Embas.

“Dikearapka pengerami Aidilfitri tu ulih terus ngerapitka kaul ke udah bisi sereta nanam rega begulai dalam pengawa ti enda ngetu meri servis ke pemadu manah ngagai rayat,” ku penerang nya nambah. — RBI

LIMBANG, 11 April — Malam Main Asal Sarawak ke diatur beserimbai enggau Program Sarawakku Sayau 2026 udah mujur diatur ba Kompleks Lumba enggau Main Limbang, ari baruh kemata Kaunsil Seni Sarawak.

Program nya mandangka bemacham pengawa mandangka seni enggau main asal ti mandangka pemanah enggau penyelai pesaka asal komuniti Sarawak, nyengkaum pengawa pemerindang Sarawak Harmoni, Ethnic Warisan enggau Bermukun ti nerima sambut ti chukup meransang ari bala ke bisi datai.

Pengerami nya mega diias enggau penatai khas ari artis menua tu baka Mawat, Ekrisen, Spinney, Carrie enggau Rozy Usok, kelimpah ari ngaul bala artis ari Limbang ti mega mantaika penau enggau kreativiti menua tu.

Penatai temuai ti meransang terang mandangka program ke baka tu majak narit ba ati komuniti.

Pengerami ti richah sereta ngagitka ati sepemanjai pengawa nya ngayanka pemujur gerempung nya meri kuasa sereta ngelakuka seni enggau budaya di nengeri tu.

Pengawa ngatur program tu ukai semina nyadi pelasar dikena ngintu sereta ngangkatka pesaka asal, tang mega bejalaika tanggungpengawa ngenegapka penyerakup enggau identiti komuniti pupu bansa di Sarawak. — RBI

LIMBANG, 11 April — Premier Sarawak, Datuk Patinggi Tan Sri (Dr) Abang Haji Abdul Rahman Zohari Tun Datuk Abang Haji Openg nguluka program bejalai kaki laju urung 3.5 kilometer ba Tebing Ai Limbang, ditu, sehari tu.

Program ke berengkah tumu pukul 6.30 pagi nya bela disempulang Sapit Menteri Besai Datuk Seri Fadillah Yusof enggau nengah jalai ari Tebing Ai Limbang ngagai Mijum Limbang.

Sepemanjai program nya, Abang Johari mega bisi ngelimpangka awak begulai enggau mensia mayuh sereta peranak menua nya ke bisi datai ngelantangka ati ba palan nya, lalu ditangkan enggau ngirup pagi ba Pasar Tamu Limbang.

Sama bisi datai Sekretari Perintah Nengeri Sarawak Datuk Amar Mohamad Abu Bakar Marzuki, Sapit Menteri Perengka Pengangkut Datuk Hasbi Habibollah enggau Sapit Menteri Industri Pemakai, Komoditi enggau Pemansang Kandang Menua Datuk Dr Abdul Rahman Ismail, begulai enggau bala pemesai ke bukai. -RBI

LIMBANG, 11 April — Limbang Agrofest 2026 deka diatur pengelama tiga hari berengkah ari 24 ngagai 26 April 2026 ba Lot 777, Limbang, nyadi pelasar ngenegapka sektor betanam betupi nengah aplikasyen inovasyen enggau ngelakuka produk menua tu ngagai komuniti.

Nengah rambai jaku “Innovation Agriculture for Food Security”, agrofest tu ngemeratka pengawa teknologi enggau inovasyen ti beguna dalam nambahka produktiviti betanam betupi sereta nentuka pengelikun pemakai ti meruan.

Pengerami bejadika program nya diperambu deka diatur kena 25 April 2026, ti dikearapka ulih ngempuruka mayuh bengkah ejensi perintah, pengemeran industri, orang dagang agro enggau komuniti setempat.

Sepemanjai pengerami nya, bala temuai deka dipandangka enggau mayuh macham aktiviti ti ngerinduka ati nyengkaum pengawa pemandang inovasyen betanam betupi, pengawa nyual produk betanam betupi ti baru, segmen Dapur Limbang ti mandangka produk pemakai menua tu, pengawa mandangka panggau budaya enggau program Agro Run.

Kelimpah ari nyadi pelasar promosyen enggau makit, program tu mega befungsyen nyadi pelasar interaksyen strategik entara raban dalam sektor betanam betupi, lalu enggau nya ngenegapka jaringan kerejasama enggau bekunsi penemu.

Limbang Agrofest 2026 mega dipeda nyadi inisiatif ti beguna dalam nyukung agenda pemansang betanam betupi nengeri tu sereta meri kuasa ngagai komuniti agro nuju jemah ila ti lebih kompetitif sereta meruan.

Mensia mayuh dilalau datai ngerichahka agi pengawa tu sereta nyukung produk menua tu, setipak enggau pengawa begulai nentuka pengelikun pemakai menua. — RBI

SIBU, 11 April — Pengawa Bebaris Meri Terima Kasih enggau Nyerahka Pangku Pengawa Sarjan Mejar Kompeni (KSM) Ke-9 Kor Polis Tentera Diraja (KPTD) udah dipejalaika enggau pengerami ti besai sereta mujur di Padang Kawad KPTD Kompeni Ke-9, Kem RASCOM, ditu.

Pengerami nya nyadi saksi pengawa nyerahka pangku pengawa ari Pegawai Waran II (PW II) Abdul Rahman bin Johan ngagai Staf Sarjan (SSjn) Mohd Redzuan bin Ahmat Termizi, nyadi penerus pengawa nyadi ketuai enggau ngatur pengawa dalam tim nya.

Program dipunka enggau pengawa meresa pengawa bebaris ari PW II Abdul Rahman bin Johan.

Dalam jaku terima kasih iya, iya mega mantaika pengaga ati ke pemadu tinggi ngagai semua raban tim ketegal komitmen enggau dedikasyen ke dipandangka sepemanjai servis sida.

Iya mega ngemeratka pemesai guna ngetanka penaluk ngagai ketuai, seraya terus ngenegapka disiplin, profesionalisme enggau penyulut tim.

Pekara ti pemadu dikerinduka pengerami nya iya nya pengawa nyain Nota Nyerahka Pangku Pengawa ti dikemataka Pemesai Pemerintah, Mejar Mohamad Azri bin Ahmad.

Pengerami nya mega diintu enggau Pengerami Ngena Pangkat ungkup dua iku raban ke udah niki pangkat ari Lans Koperal (LKpl) ngagai Koperal (Kpl), berengkah 1 Mac 2026, iya nya Kpl Muhammad Amirul Akmal bin Sabri enggau Kpl Nor Affiq Afzan bin.

Pengawa ngatur pengawa bebaris tu mandangka tikas disiplin ti tinggi sereta komitmen ti enda ngetu ari Kompeni Ke-9 KPTD dalam nentuka penyulut servis enggau penyedia tim seruran ba tikas pemadu manah. — RBI