KUCHING, 15 April — Perintah Sarawak benung mansik pemansang rentayan kereta api gadung ti nyambung Bintulu, Kidurong enggau Samalaju dikena ngenegapka logistik industri sereta nentuka penumbuh ekonomi nengeri tu meruan sereta ulih besemekih.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Openg madah, pansik diatu benung dipejalaika ungkup perambu jalai kereta api ti nyambung Palan Penyangkai Kapal Bintulu enggau Palan Penyangkai Kapal Samalaju, lalu enggau nya numbuhka rangkaian “tiga satelit” ungkup pemindah barang enggau pesinjir ti lebih efisyen ngena teknologi ti meruan.
Nitihku iya, pemansang rentayan kereta api deka nambahka penyambung, ngelengkaska rentayan bekal sereta nyukung agenda logistik gadung setipak enggau strategi pemansang Sarawak.
Iya madah munyi nya lebuh bejadika pengerami ngintu genap 30 taun Bintulu Port Holdings Berhad ditumbuhka ba Hotel Sheraton, ditu.
Abang Johari nambah, perambu sistem kereta api nya deka nangkup pemansang industri ti jampat di Samalaju kelimpah ari ngenegapka pangku pengawa Bintulu nyadi pintu penama ekonomi besai, kelebih agi nyukung industri kuasa enggau berat.
Seriris enggau pengawa bejalaika Strategi Pemansang Pengudah COVID-19 2030 (PCDS 2030), iya nyemetak madahka infrastruktur pengangkut ti efisyen sereta meruan beguna amat ba pengawa narit puku sereta nentuka daya besemekih nengeri tu dalam timpuh ke panjai.
Ari sukut pemansang industri, iya madahka Zon Bibas Samalaju ngembuan potensial nyadi pematak penatai puku baru sereta ngenegapka aktiviti ili.
“Zon bibas ti ditusun enggau manah ukai semina meri insentif, tang begunaka pengawa ngaga ekosistem ti penuh ti ngangkatka inovasyen, efisyen enggau penumbuh industri timpuh panjai,” ku iya. -RBI
