DEBAK, 17 April — Premier Sarawak, Datuk Patinggi Tan Sri (Dr) Abang Haji Abdul Rahman Zohari bin Tun Datuk Abang Haji Openg sehari tu bejadika pengerami meri nama Jalai Lubok Tamang di Pelilih Mit Debak, Bagi Menua Betong, ti nyadi kelai komitmen perintah nengeri ti seruran ngenegapka pemansang infrastruktur menua pesisir.

Jalai Lubok Tamang iya nya jalai ke dibelakin sepemanjai 9.5 kilometer ti nyambung Kampung Suri ngagai Kampung Manggut enggau Kampung Tuie, lalu ari nya ulih ngangkatka tikas penyambung enggau akses peranak ba kandang menua nya.

Projek ngaga jalai tu dipejalaika Opis Kereja Raya Sarawak ari baruh kemata Opis Menteri Infrastruktur enggau Pemansang Palan Penyangkai Kapal Sarawak (MIPD) enggau ungkus penyampau RM35,025,775.90 lalu tembu penuh kena 14 April 2023.

Skop projek nya mega mungkur pengawa ngaga dua buah jematan meraka Sungai Jerai enggau Sungai Lubok Selubang, ti bejalaika tanggungpengawa beguna dalam ngenegapka rentayan komunikasyen sereta ngemudahka pemindah ninting hari komuniti lokal.

Nama “Lubok Tamang” diperambu Kaban Kunsil Nengeri (ADUN) Saribas, Datuk Mohammad Razi Sitam kena bulan Oktober 2023 suba.

Bepelasarka sejarah menua tu, nama tu dipelabaka bepun ari kandang menua Lubok ke kala nyadi palan ngetu perau enggau kapal dagang, lalu leka jaku “tamang” nunjukka endur ngetu enda lama.

Nengah penembu projek tu, timpuh pejalai entara Debak enggau Pusa udah dipandakka, kelimpah ari nambahka tikas pengelikun enggau pengelantang penguna jalai alun.

Perengkaguna infrastruktur tu dipelaba ulih meri penguntung ngagai urung 3,000 iku peranak menua nya nengah status sosio-ekonomi ti manah agi sereta meransang ngaul diri enggau chakah agi dalam sektor betanam betupi.

Kelimpah ari nya, Jalai Lubok Tamang mega dikearapka nyadi batang jalai nuju kandang Agropark Lubok Tamang, ti ngembuan potensi besai nyadi pemangkin pemansang ekonomi di kandang menua Saribas nengah pengawa bejalaika aktiviti betanam betupi ti moden sereta kompetitif. — RBI

SARIKEI, 17 April – Rayat mesti ngembuan runding kelas satu ke ulih mida entara utai ke betul enggau salah, berani megai tanggungpengawa sereta nyadika integriti nyadi pugu tetiap pengawa, pia ku Sapit Menteri Kebun Bedandang Besai enggau Komoditi, Dato’ Sri Huang Tiong Sii.

Nitihku iya ke mega Kaban Parlimen Sarikei enggau Kaban Kunsil Nengeri (ADUN) sitak N.45 Repok, rayat Sarawak dilalau nyadika integriti nyadi pelasar batang dalam tetiap pengawa enggau kaul rama dikena nentuka aspirasyen Sarawak Maju Makmur ulih diperambu nengah Pelin Strategi Pemansang Pengudah COVID-19 (PCDS) 2030.

Ku iya, penyulut nengeri tu enda patut disukat semina nengah pemansang fizikal enggau ekonomi aja, tang lebih agi begunaka penegap nengah penumbuh identiti rayat enggau integriti ke tinggi.

Ku iya nambah, ulah bebatak asur ngagai penyalah mit ulih nyadi pun pengerusak ke besai agi dalam raban bansa.

“Pekara ke mit ti enda dikeibuhka kemaya hari tu tau mai empas ti balat agi jemah ila.

“Pengurang integriti ukai semina ngerusak identiti, tang mega tau ngeruga institusyen ruang bilik sereta ngelemika penyerakup komuniti,” ku iya.

Berebak enggau nya, iya nyemetak madahka integriti nyadi batang penegap dalam nulak penyalah makai suap enggau salah guna kuasa, kelebih agi ba bala ketuai komuniti.

“Pengelurus nempa pengandal, tanggungpengawa ngetanka pengelantang lalu integriti ngenegapka penyerakup,” ku iya.

Iya madah munyi nya lebuh bejadika Jelajah Integriti Sarawak Siri 45 di Dewan Masyarakat Sarikei, sehari tu tadi.

Program Jelajah Integriti Sarawak ti diatur Unit Integriti enggau Ombudsman Sarawak (UNIONS), Opis Premier Sarawak enggau kerejasama Opis Sapit Menteri enggau Opis Residen enggau Pelilih Sarikei dianggap nyadi singkang proaktif dalam meri penyedar sereta nerenakka rega integriti ngagai komuniti. -RBI

KUCHING, 17 April – Mensia mayuh dikeingat ngambika enda mudah tepejuh enggau poster ‘Pekit Nangkap Buaya’ ke diatu benung viral ba media rama, lalu nadai nerima sebarang pemendar ari piak bekuasa.

Kaunsil Pengintu Kampung Sarawak (SFC) nengah penerang rasmi nyemetak madahka sida nadai kala ngeluarka sebarang pemendar, sukung tauka bisi ngaul diri ngatur aktiviti nya.

Nitihka penerang ari SFC, sebarang aktiviti ti ngaul jelu siga kelebih agi spesis ti dijaga baka baya, nitihka Ordinan Nyaga Jelu Siga 1998.

“Nangkap, nupi tauka ngemediska jelu siga enggau nadai pemendar rasmi ari SFC nya penyalah ari baruh undang-undang lalu tau kena ditinggang atur,” ku penerang ke dibatak ba laman Facebook rasmi ejensi nya.

Berindik enggau nya, mensia mayuh dilalau bejejimat agi, anang ngerembaika penerang ke enda entas sereta nyeliahka diri ari nyereta sebarang aktiviti ke dikelakuka nengah jalai ke enda rasmi.

SFC mega ngelalau mensia mayuh ngambika enda mudah tekuing runding enggau berita selebubu ti dikerembaika nengah ‘online’, seraya ngemeratka komitmen sida ti seruran nentuka pengawa ngintu jelu siga enggau pengelikun mensia mayuh seruran dijaga nitihka penetap undang-undang.

Dulu ari nya, poster nya madahka pekit nya deka diatur ba Sungai Kampung Meranek, Kota Samarahan kena 25 April tu ila.

Taja pia, pansik tetemuka poster nya dipelabaka diasilka ngena teknologi pemintar tiru (AI), bepelasarka bisi tanda ai betukuh bintang ba baruh gambar ke dikaitka enggau platform Google Gemini. -RBI

DEBAK, 17 April — Kaunsil Pemansang enggau Pengintu Tanah (LCDA) udah ngenataika penerang pasal Projek Pemansang Agropark Lubok Tamang ngagai Premier Sarawak, Datuk Patinggi Tan Sri (Dr) Abang Haji Abdul Rahman Zohari bin Tun Datuk Abang Haji Openg, beserimbai enggau Program Kaunsil Ketuai Rayat di Pelilih Mit Debak.

Projek ti dipejalaika ari baruh inisiatif Projek Rayat nya diperambu berengkah bulan Jun 2026, enggau pengawa bejalaika pengawa nanam deka dipejalaika renggat ti ngaul lima (5) renggat dalam timpuh 20 bulan.

Pemansang ti begempung tu mungkur pemesai 763 hektar ti nyengkaum kandang endur betanam betupi, palan dagang temuai, palan memproses enggau ngumpul, sereta mega zon pemansang jemah ila.

Batang utai tanam ke deka ditanam iya nya kerapa pandan, setipak enggau potensial makit domestik enggau eksport.

Nengah kerejasama strategik enggau Green Borneo Plantation Sdn Bhd, 600 hektar kandang endur nya deka dijaga kompeni nya, lalu 100 hektar agi deka diungkupka ngagai orang bumai menua tu nengah model suwa enggau bekunsi asil.

Projek tu dipelaba ulih ngasilka nyentuk 10 juta igi nyiur setaun, lalu enggau nya ulih mantu nambahka eksport menua sereta ngurangka bepanggai ba import nyiur.

Kelimpah ari nya, pengawa bejalaika projek tu mega deka meri empas positif ngagai pemansang komuniti setempat nengah pengawa ngenegapka ekosistem agropreneur.

Tu nyengkaum pengawa nempa peluang kereja, nyendiaka latih pengelandik enggau ngaul diri enggau chakah dalam pengawa betanam betupi moden.

LCDA bebendar deka nentuka pengawa bejalaika projek tu bejalai enggau lanchar sereta efektif, setipak enggau aspirasyen perintah Sarawak dalam ngenegapka pemansang ekonomi menua pesisir enggau ngangkatka pengelantang pendiau rayat.

Sama bisi datai Sapit Premier Sarawak Datuk Amar Douglas Uggah Embas, Kaban Kunsil Nengeri (ADUN) Saribas Datuk Mohammad Razi Sitam, ADUN Krian Friday Belik sereta temuai dipebasa bukai. — RBI

BETONG, 17 April – Projek Jalai Lubok Tamang ti dipejalaika Opis Kereja Raya (JKR) Sarawak udah nyadi pekara beguna ba pengawa ngangkatka penyambung, pengelikun enggau pengelantang penguna jalai alun di menua pesisir, kelebih agi ngelingi Debak.

Jalai ke udah tembu nya dipelaba meri empas ke besai ngagai peranak menua nya nengah chara ngemudahka akses ngagai perengka guna pemun, ngenyampatka pejalai ninting hari sereta nyungkak aktiviti ekonomi komuniti.

Jalai nya udah dipenyadika Premier Sarawak Datuk Patinggi Tan Sri Abang Johari Tun Abang Openg sehari tu ti bela digulu Sapit Premier Datuk Amar Douglas Uggah Embas, Kaban Kunsik Nengeri (ADUN) Layar Dato Gerald Rentap Jabu, Kaban Parlimen Betong Dato Dr Richard Rapu, Direktor Kereja Raya Sarawak, Datu Dr Cassidy Anak Morris begulai enggau temuai dipebasa ke bukai.

Penatai mayuh bengkah piak ba atur pengawa tu mandangka komitmen perintah ti terus dalam nentuka pemansang infrastruktur ti sebela sereta inklusif di serata nengeri, kelebih agi di menua pesisir.

Nyerumba pengawa nya, bala ke bisi datai mega diberi penerang silik bekaul enggau projek nya ari JKR Sarawak, kelimpah ari penerang bekaul enggau pemansang Agropolitan Lubok Tamang ari Kaunsil Pemansang Tanah Sarawak (LCDA) ke bisi potensial muka mayuh agi peluang ekonomi ngagai peranak menua nya.

Nengah penembu Jalai Lubok Tamang, iya ukai semina deka ngenyampatka pejalai peranak, tang mega nyadi pematak ngagai pemansang sosio-ekonomi ti meruan agi ba kandang ngelingi.

JKR Sarawak tetap komited bejalaika projek infrastruktur ti bekualiti ungkup pengelantang rayat Sarawak. – RBI

JOHOR BAHRU, 17 April — Sapit Menteri Digital, Wilson Ugak Kumbong sehari tu ngelancharka Program Mengeri AI ari baruh kemata Kaunsil Mengeri Johor Bahru nyadi sebagi ari pengawa ti seruran dipejalaika dikena ngenegapka pemansang mengeri pintar ti lebih efisyen, likun sereta kompetitif.

Program tu nyadi inisiatif strategik perintah dalam nguna teknologi pemintar tiru (AI) dikena ngangkatka pemanah pengawa meri servis mensia mayuh, ngelengkaska pengawa ngatur mengeri sereta meransang penumbuh ekonomi digital, kelebih agi di Johor Bahru.

Dalam jaku iya, iya nyemetak madahka pengawa ngena teknologi AI ulih ngangkatka pengulih PBT ngaga pemutus bepelasarka data dalam timpuh ke amat, lalu enggau nya ngenegapka aspek pengelikun, ngatur trafik enggau meri servis ngagai rayat.

“Pengawa bejalaika Program Mengeri AI tu mandangka komitmen perintah dalam ngenyampatka transformasyen digital menua nuju ekosistem mengeri ti lebih pintar, responsif sereta meruan,” ku iya.

Sebagi ari penemuai ke sama, iya mega bisi ngabas Palan Kawalan Operasi Bersepadu Johor Bahru ti befungsyen nyadi palan matau enggau ngatur operasyen mengeri enggau chara bersepadu sereta maya nyata.

Palan kawalan nya bejalaika tanggungpengawa ti beguna dalam nyukung operasyen mengeri nengah integrasyen mayuh macham sistem nyengkaum ngatur trafik, pengelikun mensia mayuh enggau timbal penusah ngenyit, lalu enggau nya nambahka efisyen koordinasyen entara ejensi bekaul.

Iya ngarapka inisiatif tu deka nyadi pemangkin ngagai pemansang mengeri ti lebih moden, inklusif sereta tegap, setipak enggau aspirasyen perintah ngangkatka pengelantang pendiau raya

KUALA BARAM, 17 April – Program Karnival Gadung : Inovasyen Komuniti enggau Pesta Bubuk 2026 ti diatur ba Pasar Ilan Batu 1 enggau Dewan Masyarakat Batu 1 pagi tadi mujur ngempuruka urung 150 iku penyereta enggau semengat kerejasama komuniti.

Program nguna konsep pematut STB tu meda mayuh bengkah ejensi ngaul diri nyengkaum Balai Bomba enggau Penyah Penusah (BBP) Lutong, Polis Diraja Malaysia (PDRM), Raban Soldadu Malaysia (ATM), Kaunsil Mengeri Miri (MBM), Opis Parit enggau Entali Ai (JPS), Ejensi Penerit Adat Maritim Malaysia (APMM) sereta mega mensia mayuh.

Sepemanjai program nya, bala penyereta bekerejasama meresi palan Pesta Bubuk nyadi pengeran dikena nerenakka semengat rinduka rampa menua enggau pemeresi ba palan mensia mayuh.

Kelimpah ari nya, kaban BBP Lutong mega bisi ngatur sesi bekunsika penemu pasal chara madamka api ti ngaul gis nyumai ba Dewan Kampung Batu Satu, Kuala Baram.

Demonstrasyen nya nerima mayuh perati sereta meri penerang ti beguna ngagai komuniti dalam napi gaya ba penusah ngenyit di rumah.

Program tu mega digulu Sapit Datuk Bandar MBM, Cr. Ariffin, ti mantaika sukung ngagai pengawa kerjasama entara ejensi tu ngaul komuniti dalam ngenegapka pengelikun enggau pengelantang.

Ketuai Balai Bomba enggau Penyah Penusah Lutong, PBT II Henry Anak Jugah ti bela bisi datai begulai enggau kaban Tim Charlie madah, program baka tu beguna amat dalam nambahka tikas penyedar mensia mayuh senentang sukut pengelikun penusah angus sereta ngerapitka kaul entara ejensi enggau komuniti.

Ungkup selampur, program tu ukai semina mujur nyapai juluk nitihka atur enggau penyedar pengelikun, tang mega ngenegapka semengat kerejasama begulai entara ejensi enggau peranak kandang menua. – RBI

KOTA SAMARAHAN, 17 April – Universiti Malaysia Sarawak (UNIMAS) deka bejalaika belajar ‘online’ pengelama dua hari iya nya kena 28 ngagai 29 Mei 2026, dikena ngemuntangka bala nembiak ngaga perambu pejalai beserimbai enggau pengerami Hari Raya Aidiladha enggau Gawai Dayak.

Nitihka penerang rasmi ari Unit Komunikasyen Korporat UNIMAS, pemutus nya digaga pengudah beratika guna perambu ngajar enggau belajar (PdP), kelimpah ari nentuka penerus akademik enda tekeruga.

Pengawa bejalaika nya sebagi ari chara belajar fleksibel ti diberi kelala universiti, lalu enggau nya meri ruang ngagai nembiak ngatur pejalai sida enggau sistematik agi sepemanjai musin pengerami.

Taja pia, UNIMAS madahka pengawa bejalaika pengawa belajar nengah online bepanggai ba peneka pengelicha kus ke bekaul.

“Ungkup kus ti ngaul aktiviti praktikal baka makmal tauka sesi ti udah ditetapka fizikal tumu, sida deka terus betunga mua ba kampus nitihka peminta kus,” ku penerang nya.

Berebak enggau nya, pengawa ngena chara ngajar nengah online di luar timpuh ke udah ditetapka bepanggai ba perambu enggau pemutus fakulti ke bekaul.

UNIMAS ngemeratka komitmen nyaga pengelantang pendiau nembiak, kelimpah ari nentuka proses belajar terus bejalai enggau lanchar, efektif sereta efisyen sepemanjai timpuh nya. -RBI

BINTULU, 17 April 2026 – Peranak asal Betong, Chef Own Cheng Xi, mai gelar ngagai Sarawak lebuh iya dipadu nyadi champian dalam kategori “Sarawak Laksa King” Challenge beserimbai enggau Jelajah Kulinari Global Ke-5 Malaysia ke diatur ba pengerami berprestij 2026 SPCC Bintulu & GCCM Global Culinary Challenge.

Pengerami kulinari antarabansa tu entara pekit ke pemadu dianti ninting taun, ngempuruka tukang nyumai profesional enggau bakat kulinari ari lebih 10 buah menua nyengkaum pelilih menua ASEAN enggau renggat entarabansa.

Pekit tu diatur begulai enggau Global Culinary Challenge Malaysia (GCCM) enggau tuju mantaika pemanah seni kulinari sereta ngenegapka kaul industri kulinari global.

Pemujur Chef Own Cheng Xi ba kategori “Sarawak Laksa King” nyata ngayanka pemesai lalu penyamai pemakai asal Sarawak ba panggau dunya.

Laksa Sarawak ke diasilka iya mujur narit ati bala akim nengah gempung penulin asai, chara nyumai ke alus sereta mantaika chara ke kreatif.

Chef Own Cheng Xi ke mega pengempu Own’s Kitchen Betong ukai orang ke baru ba orang ke rinduka pemakai menua tu.

Pemujur tu ukai semina ngemegahka ati iya, tang mega ngangkatka nama Betong nyadi palan ke kaya enggau pesaka kulinari ke nyelai.

Nitihka penerang pengatur, pekit tu ukai semina pelasar endur bepekit aja, tang mega nyadi bidang endur besilih penemu, inovasyen enggau budaya dalam dunya gastronomi.

Penyerta antarabansa ti mayuh nyadika pengawa tu renggat ti beguna dalam ngelakuka penyelai pemakai global.

Dikearapka pemenang tu ulih meri inspirasyen ngagai mayuh agi tukang nyumai menua tu ngambika terus ngaga inovasyen sereta meri kelala penyelai pemakai Sarawak ngagai tikas ke tinggi agi.

KAPIT, 17 April – Pengeransing ngenegapka pengawa ngumpul penerang enggau analisis gaya baru ba salah guna dadah kemaya hari nyadi batang tuju Aum Kaunsil Pengatur Pemuntan Dadah (MTMD) Renggat Bagi Menua Kapit ti diatur ba Opis Residen Bagi Menua Kapit, Hari Tiga tu tadi.

Aum strategik tu dipeda nyadi pelasar ke beguna dalam ngatur pengawa begulai entara ejensi, kelebih agi dalam meretika gaya enggau ubah baru ba pengawa gian enggau salah guna dadah enggau substans ba pelilih Kapit.

Aum nya bechairmanka Pemesai Tadbir, Daniel Batin, ngarika Residen Bagi Menua Kapit.

Dalam randau nya, pemerat diberi ngagai pematut ngangkatka pengulih ngumpul penerang ba renggat baruh enggau chara ti lebih sistematik, betul sereta komprehensif nyengkaum bekunsi penerang entara ejensi penerit atur enggau piak ti bekaul.

Chara bepelasarka penerang tu beguna ngambika analisis gaya baru ulih dipejalaika enggau dalam agi, lalu enggau nya ulih mantu piak bekuasa ngelala gaya baru salah guna dadah, endur ti berisiko enggau raban ke ditagit ti begunaka perati enggau lengkas.

Nyadi chara ke engkeman, aum nya mega nyapai sempekat sepenemu bejalaika Program Palan Gawa Bibas Dadah (TEKAD) ba semua opis perintah, baik nya ba renggat perintah besai enggau nengeri.

Inisiatif tu ukai semina ngembuan tuju deka nagang pengerekai salah guna dadah ba raban pengereja pengawa perintah, tang mega nyadi kelai komitmen begulai dalam nempa kandang endur gawa ti bepengerai sereta nadai dadah.

Sama bisi datai Direktor Ejensi Nagang Dadah Nasional (AADK) Sarawak, Abdul Hamidiee Ibrahim, ti madahka AADK diatu benung ba renggat chakah agi numbuhka opis baru di Bagi Menua Kapit.

Nitih ku iya, perambu numbuhka opis nya deka tekala nya diangkatka ngagai renggat Indu Opis AADK ngambika dikemendarka, dikena nentuka servis nagang, ngubat enggau ngatur ulih dikenataika enggau lebih efisyen sereta komprehensif ngagai komuniti lokal.

Iya mega madah, pengawa beratika palan udah dipejalaika ba sekeda premis ke bisi potensial nyadi opis AADK di Kapit nyadi singkang pemungkal dikena ngamatka penumbuh nya.

Sama bisi ngulu aum nya, Ketuai AADK Pelilih Menua Sibu, Azimah Marsid, Pemesai Pelilih Menua Kapit, Thomas Geoffrey Kandawang, Ketuai Bagi Pansik Jenayah Narkotik, Indu Opis Polis Pelilih Kapit, Suhaimi Rahman, kelimpah ari bala ketuai enggau pengari ari mayuh bengkah opis enggau ejensi ke bekaul.

Aum tu ngayanka komitmen ti terus ari semua piak dalam ngenegapka pengawa bepelasarka penerang enggau analisis gaya baru nyadi senyata besai dalam ngelaban pengawa salah guna dadah di Kapit, seriris enggau aspirasyen nempa komuniti ti lebih likun sereta lantang agi. -RBI