KAPIT, 18 April — Pengawa nemuai ngagai palan projek sosioekonomi ari baruh Ejensi Pemansang Ulu Rajang (URDA) diatur kena Hari Empat dikena beratika pejalai pengawa bejalaika sereta ngenegapka pemanah inisiatif pemansang menua pesisir ba kandang menua nya.

Penemuai nya betuaika Ketuai Pemesai Eksekutif Kaunsil Pemansang Koridor Wilayah (RECODA), Datuk Haji Ismawi bin Haji Ismuni, ti disereta Kaban Kunsil Nengeri (ADUN) Katibas, YB Lidam Assan, Direktor Wilayah URDA, Encik Sagu Unting, sereta pengari RECODA, URDA enggau TERAJU.

Nitihku Kaban Kunsil Nengeri (ADUN) Pelagus, YB Wilson Nyabung Ijang, penemuai nya ngembuan tuju deka matau pejalai projek sosio-ekonomi ke benung dipejalaika, kelimpah ari ngelala pemar ke bendar ditapi orang dagang menua tu.

“Entara pemar ke dikelala iya nya penanggul ari sukut puku, perengka, latih enggau perengkaguna infrastruktur ke patut diberi perati ke patut,” ku iya nengah siti penerang.

Ku iya, penemuai nya mega ngemeratka pengawa nentuka tetiap inisiatif pemansang ti diperambu ulih dipejalaika enggau manah sereta meri penguntung terus ngagai komuniti.

“Mayuh agi pengawa ngemanahka sereta sukung tambah ti ditagit sereta meri empas tinggi patut diperambu dikena nentuka projek tu ulih ngerembai enggau meruan,” ku iya nerang.

Rambau penemuai nya, raban nya beratika sekeda projek besai nyengkaum pengawa nupi itit betelu (Lulut’s Ducks) ti nyerakupka utai tanam pisang enggau azolla, projek nupi madu kelulut di Tatai Mas Raweng enggau Palan Berubat Tradisional Kapit.

Ku iya nambah, asil pansik nya tetemuka Kapit bisi potensial besai dalam pemansang ekonomi kandang menua, kelebih agi dalam sektor agro enggau pengawa dagang menua pesisir.

“Kitai enda ulih merambu ba atas keretas aja. Nama ke beguna agi iya nya nentuka tetiap projek tu ulih ngerembai, mansutka penatai pemisi lalu nangkan nya ngangkatka tikas pengidup rayat di menua pesisir,” ku iya.

Muak ke malam, raban nya mega bisi ngulu pengerami makai lemai begulai enggau Datuk Haji Ismawi sereta raban nya nyadi sebagi ari program nemuai rasmi. — RBI

Dalam dunya muzik Iban, nama Rickie Andrewson chukup tebangkar. Di belakang nama panggau nya, bisi cherita pejalai siku artis ti berengkah ari menua pesisir Sarawak, ditempa enggau gaya muzik asal lalu pengujung iya nempa legasyen iya empu dalam industri pemerindang.

Ngempu nama asal, Alan Rickie Anak Ngalai, iya milih nama “Rickie Andrewson” nyadika identiti panggau iya, diiri enggau inspirasyen ari nama apai iya, Pengulu Andrewson Ngalai, siku penanyi ke chukup tebilang maya jeman iya.

Ditu meh semua utai berengkah nyengkaum benih ti tumbuh dalam belagu kenyau ari mit.

Dibesaika ba rumah panjai di Sekuau, Batu 28 Jalai Oya, Sibu, Rickie idup enggau pengerindu dalam seni pemerindang.

“Dikelingi bala bakih artis enggau pemuzik ti suah nemuai enggau apai aku, aku besai ba gaya ti seruran disempulang enggau muzik.

“Ke berat agi, sada nyawa apai aku empu nyadi “pengajar keterubah” ti nempa semengat ngagai aku nyadi penanyi,” ku Rickie lebuh dirandau Ruai Berita Iban.

Utai ti narit ati, Rickie nadai kala nerima latih dalam pengawa belagu. Taja pia, penau asal iya nyata bendar dipeda lebuh diuji ba studio rekoding sida iya, ANP Music Production.

“Utai ti berengkah nyadi semina nguji aja tang betukar nyadi pun karier seni aku lebuh apai aku pechayaka sada nyawa aku ulih jauh ba industri tu,” tampung Ricke ke ngembuan patah nyawa ke chukup lunak.

Pengarap nya nyata amat. Dalam taun 2001, Rickie mansutka album keterubah iya ke diberi nama Anak Umbung, nerima sambut ti manah lebuh album nya ngerikod lebih 80,000 unit dijual, pemujur ti chukup besai ba jeman nya.

Ari nya, singkang iya nyadi artis profesional nyau majak tegap sereta majak dikelala mensia mayuh.

Sepemanjai lebih dua dekad dalam industri tu, Rickie udah dikelala nyadi orang ti silik sereta bedisiplin tinggi.

Iya ukai semina ngetanka kualiti vokal iya, tang mega amat milih lagu.

Ba iya, sebengkah lagu ukai semina merindang aja, tang meseti ulih negu semengat sereta meruan dalam pengingat peninga.

“Naka ke diatu, aku udah ngasilka lebih 20 iti album solo, enda nyengkaum album duet enggau lagu pengerami, ngaga penyampau lebih kurang 30 iti album,” ku Rickie nusui pejalai pemerindang iya.

Lebih temegah ati agi, Rickie nadai kala nengah pelasar pekit belagu, tang mujur bediri sebaka enggau nama-nama besai dalam industri tu berindik ari penau diri.

Iya mega nerima aku sepengudah pengangkun iya nyempulang pejalai seni iya, nyengkaum anugerah Vokal Pemadu Manah, Penyanyi Pemadu Tebilang enggau Penyanyi Pemadu Dikerindu ari Cats Radio enggau RTM urung taun 2009 ngagai 2016.

“Lagu baka Anak Umbung, Siti Penanggul Antara Tua, Enda Ulih Telai Belalai, Nyabak Sebulan, Petara Nentu Ke Pengerindu Tua, Enda Sanggup Lemas Di Pantai, Atas Nama Pengerindu, lalu mayuh agi kebukai ke nyadi insparasyen nembiak enggau ‘influencer’.

“Ari sukut muzik, aku rindu agi ngagai genre dangdut, gogo enggau slow rock, rentak ti semak enggau pemgerindu peninga.

“Tebal agi lagu aku ditengkebang komposer tebilang nyengkaum apai aku empu, Andrewson Ngalai, sida niang Jeffery Nyaloi, niang Jackson Dana, niang Ganing Assan, Ricky Jay enggau Johnny Aman.

“Aku enda kala ngaga lagu kediri empu, aku semina ulih belagu aja.

“Bisi ga siti dua lagu ke digaga aku empu ( enda ingat ke tajuk ) dalam album Atas Nama Pengerindu.,” tusui iya enggau lenak.

Beratika pemansang industri muzik Iban kemaya hari tu, Rickie ngaku mayuh ubah positif udah nyadi.

Ku iya, kualiti produksyen majak nambah, penau baru majak mansang, lalu mayuh artis diatu ulih ngasilka lagu kediri empu.

“Pengawa berubah ngagai pelasar digital mega muka mayuh agi ruang ngagai muzik Iban mansang ba renggat global.

“Semina diatu udah nadai bejualka vcd agi, diatu udah penuh enggau cara digital, lalu kediatu mega, lagu-lagu kitai Iban udah jauh mansang lalu bisi sekeda udah sebela enggau taraf lagu antarabangsa,” kenang iya senentang industri jeman diatu.

Tampung iya, mayuh penengkebang lagu diatu ngembuan lagu serta leka lagu ti lebih engkeman agi.

“Mayuh mega raban artis ke baru diatu ulih ngaga lagu sereta lirik kediri empu, ti siti ari penambah tikas dalam indusri muzik kitai Iban.

“Naka kediatu Puji Tuhan, atas berekat serta sukung bala peminat, ti nadai kala berubah, agi mengkang baka suba balat rindu nyentuk ke diatu, kelebih agi bala peminat ti serebak enggau era aku.

“Peminat aku endang seruran mengkang nitih ke pengerembai singkang aku dalam industri muzik, kelebih agi bala peminat di menua pesisir,” ku iya.

Bekaul kenang ti seruran dikeingat, Rickie madahka mayuh lalu siti kenang ke pemadu berega iya peneleba ti enda ulih dibuai iya nya lebuh maya iya belagu ba panggau ti paling berprestij, merindang ba mua bala Ketuai Pemesai seluruh Asia, maya pengawa ASEAN SUMMIT 2015.

Bekaul berita pemadu baru, kediatu Rickie agi merambu ke lagu-lagi baru, penguda lama enda mansut ke lagu baru dalam lapan taun ke udah.

“Nyadi kediatu aku bisi deka mansutka beberapa buah lagu single terbaru ari aku, lalu ngarap ke bala peminat sabar nganti dalam kandang ti semak tu ila,” ku ngarapka peminat nganti lagu ari iya.

Rickie mega ngembuan pengarap ke besai dalam industri muzik kitai Iban.

Ku Rickie, iya ngarapka lagu-lagu kitai Dayak ulih besemekih enggau menua bukai ngagai peringkat ti pemadu tinggi lalu dikala orang ba selampur dunya.

“Pesan aku ngagai artis serta bakat biak, anang lenyau identiti kitai Iban, gaga lagu ti meruan, anang ngemasukka budaya muzik bukai dalam lagu kitai Iban.

“Laban kitai Iban bisi chuan lagu kitai empu. Enda senang deka bulih gelar penanyi “ evergreen”, jaga seraka ulah jaga disiplin enggau seruran ngemaruh kediri, taja kitai udah tinggi nama, laban orang ke di kaki bukit nya meh ke nyagu ke kitai sampai kitai ulih datai di tuchung bukit,” ku iya ngujungka randau enggau Ruai Berita Iban.

Taja pan semua pemujur iya, Rickie mengkang baruh ati sereta enda ngelalaika pun budaya iya.

Iya ngelalau nembiak rebak baru terus ngetanka identiti muzik Iban lalu anang kelalu teparuk enggau budaya menua luar. — RBI

KOTA KINABALU, 17 April — Sepenyampau 52 iku pemesai enggau pangkat bukai Soldadu Tasik Diraja Malaysia (TLDM) kena Hari Tiga tu tadi nerima Lencana Pengelandik Kapal Selam dalam sebengkah pengerami penuh istiadat ba Markas Angkatan Kapal Selam, Pangkalan TLDM Kota Kinabalu.

Pengawa meri anugerah nya nyadika pemujur 10 iku pemesai enggau 42 iku raban ke udah mujur ba mayuh bengkah renggat latih kapal selam ke balat mar, mungkur sukut fizikal, mental enggau teknikal, dalam timpuh bebulan nyentuk betaun.

Pengerami besejarah nya dipenyadika Panglima Tentera Laut, Laksamana Tan Sri (Dr.) Zulhelmy bin Ithnain, ti nyemetak madahka pengawa ngena lencana nya ukai semina kelai pemujur, tang mai pengarap ke besai dalam bejalaika aset pengelikun strategik menua.

Kenu ku iya, penegap TLDM ukai semina bepanggai ba aset manah aja, tang mega ditentuka tikas penyikap enggau penyikap enggau peyuluf tetiap iku raban pasukan nya.

“Lencana tu datai enggau tanggungpengawa ke besai.

“Dalam dunya kapal selam ukai semina bekaul enggau aset aja, tang bekaul enggau pengulih sereta daya tahan orang ke bejalaika iya,” ku iya.

Iya mega ngingatka pemujur ngulihka lencana nya semina pemungkal pemar ke besai agi dalam nentuka standard profesionalisme enggau pengulih operasyen seruran diangkatka.

“Tu mih bagi ke muntang. Pemar ke bendar iya nya ngetanka tikas ‘kompetensi’ enggau integriti nyadi kaban tim elit TLDM,” ku iya.

Pengawa meri Lencana Pengelandik Kapal Selam nyadi kelai pengangkun pemadu tinggi ngagai penau raban dalam nguasa operasyen kapal selam, lalu enggau nya ngenegapka agi penyedia TLDM dalam ngetanka kedaulatan kandang tasik menua tu. — RBI

KUCHING, 17 April — TVS bebendar nyangkal pengawa ngerembaika poster pelesu ngena logo rasmi stesyen penabur nya, ti udah ditemu viral ba media rama kenyau ari Hari Empat, 16 April 2026.

Nitihka penerang ari TVS, teks enggau isi penerang ti dipandangka ba poster nya enda betul lalu nyadi tempa ari piak ti nadai tanggungpengawa ti udah salah guna identiti rasmi organisasyen nya.

Berindik enggau nya, TVS beratika pengawa nya enggau berat sereta mantaika pengesal ati ketegal pengawa ngerembaika penerang ke enda betul ti tau ngasuh mensia mayuh saru sereta ngeruga kredibiliti stesyen nya.

Mensia mayuh mega dilalau ngambika lebih bejejaga sereta anang mudah pechaya tauka ngerembaika sebarang isi ti bedau disah, tang lebih agi nganjung ngagai saluran rasmi TVS dikena ngulihka penerang ti betul sereta tulin. — RBI

KUCHING, 17 April — Sapit Menteri ba Opis Premier Sarawak (Buruh, Imigresyen enggau Pematau Projek), Datuk Gerawat Gala meri penerang bekaul enggau tuduh ti udah viral ba media rama ti ngaitka kerejasama entara Sarawak enggau Bangladesh dalam pemansang PETROS, ti enda amat sereta saru penemu.

Nitih ku iya, aum ke diatur bedau lama tu tadi entara Suruhanjaya Tinggi Bangladesh enggau Premier Sarawak nadai ngaul terus PETROS, lalu ke bendar, nadai randau tauka sempekat dijapai bekaul enggau pekara nya.

Ku iya nerang, aum nya diatur ketegal peminta Suruhanjaya Tinggi Bangladesh dikena mansik potensial kerejasama entara Perintah Bangladesh enggau Perintah Sarawak dalam mayuh bengkah bidang ke patut.

Entara pekara ti dibantaika dalam aum nya iya nya perambu ari perintah Bangladesh ngambika mayuh agi peranak menua sida diberi peluang gawa di Sarawak, berindik ari penyampau pengereja pengawa Bangladesh di nengeri tu diatu mimit enti dibandingka enggau pengereja pengawa ari menua luar ke bukai.

Berebak enggau nya, opis kedutaan Bangladesh mega madahka bisi Sempekat Pemereti Ati (MoU) ke udah bisi enggau Perintah Besai Malaysia bekaul enggau pengawa ngambi pengereja pengawa, lalu nanya sekalika Sarawak deka berundingka sempekat ke sebaka ba renggat nengeri.

Berindik enggau nya, Premier Sarawak udah ngasuh opis menteri ke bekaul mansik sereta berundingka perambu nya enggau silik.

Taja pia, Datuk Gerawat nyemetak madahka nadai pemutus, sempekat tauka komitmen udah digaga naka ke diatu dikena nambahka penyampau pengereja pengawa Bangladesh di Sarawak.

Iya bebendar madahka sebarang runding enggau pemutus semina deka digaga bepelasarka utai ke amat diguna industri di nengeri tu.

Iya mega minta mensia mayuh seruran meresa pengamat sebarang penerang lalu anang mudah tekuing runding enggau pengerembai berita ti enda betul tauka saru penemu. – RBI

SUBIS, 17 April — Pengawa ngenegapka ekosistem pelajar di sitak Subis majak nerima perati lebuh Gerempung Apai Indai enggau Pengajar (PIBG) Sekula Kebangsaan (SK) Batu Telinggai nerima agih belanja RM30,000 ba sebengkah pengerami ke diatur pagi tadi.

Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom, dalam jaku iya ngemeratka pemesai guna nembiak terus bebendar ngulihka pemujur dalam akademik enggau pengelandik.

Iya mega meransang nembiak ke kurang nyulut ba penyulut akademik anang mudah putus pengarap, tang ngalih ngagai peluang dalam pelajar teknikal enggau vokasional nyadi jalai kereja ke kompetitif.

Ba pengerami ke sama, iya mega bisi ngenang pasal pemar pengawa nyadi apai indai dalam jeman digital, kelebih agi bekaul enggau guna perengka elektronik ba bala anak.

Rundi mansutka jaku nya lebuh ngulu Pengerami Gong Xi Raya kediatur ba sekula nya nengah kerejasama PIBG SK Batu Telinggai.

Iya nyemetak madahka apai indai enda patut meri anak pengelepas penuh ngena telefon pintar enti nadai pengawa matau enggau betul.

“Media rama enggau teknologi bisi penguntung enggau risiko kediri empu.

“Apai indai enda patut nyerahka pengawa ngena gajet enggau penuh ngagai bala anak sida dikena nyeliahka ari ngachau pengawa besehari-sehari.

“Enti nadai pengawa nagang enggau ngasi, sida berisiko tekena ke berita pelesu (fake news) enggau keruga pekara negatif,” ku iya nerang lebuh bejaku ngulu pengerami Gong Xi Raya SK Batu Telinggai sehari tu tadi.

Iya mega nyemetak madahka PIBG bejalaika tanggungpengawa beguna nyadi pelasar penyambung entara sekula enggau apai indai dalam ngenegapka komunikasyen, matau disiplin enggau pemujur nembiak.

Kerejasama ti enda ngetu dipeda ulih mantu mutarka isu nembiak ti badu besekula sereta mutarka penanggul ba renggat tumu.

Kelimpah ari nya, iya mega ngingatka pemesai guna ngetanka penyerakup entara rayat Sarawak nyadi pelasar penegap enggau penyulut nengeri tu.

Nitihku iya, penegap politik ari baruh iring perintah ti tegap ngemendarka pengawa bejalaika agenda pemansang sosioekonomi rayat dipejalaika enggau ngasi agi, nyengkaum inisiatif dalam sektor betanam betupi baka subsidi minyak sawit enggau pengawa ngenegapka jamin pengelikun pemakai nengeri.

Pengerami nya diatur enggau penatai raban pentadbir sekula, pengajar enggau apai indai nembiak SK Batu Telinggai. -RBI

MIRI, 17 April – Balai Bomba enggau Penyah Penusah (BBP) Lutong sehari tu nerima penemuai basa ari bala pemesai Palan Servis Parlimen P219 Miri dalam sesi berandau ke diatur ba Bilik Aum BBP Lutong, ditu.

Penemuai nya berengkah ari pukul 2.20 nyentuk 3.30 lemai nya diatur dikena ngerapitka kaul kerejasama sereta berandauka mayuh macham pekara bekaul enggau pengawa bejalaika aktiviti ninting taun stesyen nya, kelimpah ari mansik utai ke diguna enggau isu kemaya hari ke ditapi Lutong BBP.

Raban ari Pusat Khidmat Parlimen P219 Miri iya nya Christopher Jemat @ Amie nyadi Pemesai Tugas Khas Parlimen P219 Miri, Izz Ahmad Irfan Jaidin nyadi Pemesai Khas Parlimen Miri, enggau Hazfyra Zalisha binti Hir Azlan ke nyadi Sekretari Opis Parlimen Miri.

Sesi randau nya mega ngemeratka aspek ngemanahka operasyen kelimpah ari sukung ngagai guna stesyen ke diatu dikena nentuka penyedia operasyen ba tikas ke optimum.

Sama bisi ngulu sesi nya Ketuai Stesyen BBP Lutong, PBT II Henry anak Jugah, begulai enggau kaban PBB Marcellinus bin Mek.

Penemuai tu dipeda nyadi pelasar ke beguna dalam ngenegapka kaul strategik entara ejensi pengelikun enggau pengari rayat kandang menua ungkup pengelantang komuniti. -RBI

KAPIT, 17 April — Kaban Kunsil Nengeri (ADUN) Pelagus, YB Wilson Nyabong Ijang nerima penemuai ari sida Asin anak Mambang sebilik ba opis iya di Kapit berandauka penusah ke ditapi pesakit nya, ditu kemari.

Asin, peranak Rumah Paul Kakek, Nanga Danau, Batang Rajang, Kapit diatu benung berubat ba Sepital Sibu pengudah ngasaika penanggul pengerai ti begunaka perati enggau lengkas.

Taja pia, iya betapi enggau pemar ketegal nadai dokumen pengelala diri ke lengkap.

Rambau penenuai nya, YB ADUN Pelagus ninga penerang enggau apil ari sida sebilik lalu beratika baru pekara ti diguna enggau lengkas dikena nentuka pengelanchar pengawa berubat pesakit.

Berindik enggau nya, iya udah ngeluarka surat sukung rasmi dikena mantu ngemuntangka pengawa sida sebilik enggau sepital sereta Opis Pengerejista Bansa (JPN), kelebih agi ba pengawa ngenyampatka proses bekaul enggau pengawa berubat sereta dokumentasyen ti diguna.

YB ADUN Pelagus mega ngenataika pengaga ati iya ngagai sida serumah enggau piak ti udah mai pekara tu ngagai iya.

Iya ngarapka nengah sukung ke udah diberi, semua pekara ke bekaul enggau pengawa berubat Asin ulih dimuntangka, lalu ari nya iya ulih nerima perubat ke patut enggau nadai sebarang penanggul.

Berebak enggau nya, iya minta sida pesakit sebilik terus diberi pengering sereta besampika Asin jampat gerai ari penyakit ke ditapi iya. — RBI

KOTA SAMARAHAN, 17 April – Sapit Menteri Pemansang Menua Pesisir enggau Kandang Menua, Datuk Hajah Rubiah binti Wang bepeluang beratika diri empu pejalai projek Tasik Taman Desa Ilmu ke diatu ti udah dipunka enggau rasmi dalam bulan November 2024.

Nitih ku iya, projek nya bisi ngasaika pengelaun mimit ari taga asal ketegal pengawa enda betanggunjawab enchuri kabel ti ngeruga pengawa masang, lalu enggau nya begunaka kunteriktor ngudar baru kereban ti bisi kaul.

Taja pia, pemansang ke pemadu baru ngayanka penyulut ke manah amat lalu kunteriktor madahka projek nya dipelaba tembu penuh ujung bulan Mei 2026.

Iya ngarapka nadai agi penanggul udah tu ngambika projek nya ulih ditembuka baka ke udah diperambu, laban nya sebengkah ari tanda ke beguna di Samarahan.

Tasik Taman Desa Ilmu deka disikap enggau bemacham perengkaguna nyengkaum palan entepan kerita, agu mensia mayuh enggau jalai juging ke lebih lantang sereta meruan.

Kelimpah ari nya, sebuah jematan mit mega deka digaga dikena nyambung kandang ngelingi tasik nya, lalu enggau nya nambahka pematak temuai.

Iya mega ngarapka projek nya ulih dibuka baru ngagai mensia mayuh pengudah tembu ungkup pengelantang begulai. -RBI

MIRI, 17 April — Ejensi Penerit Adat Maritim Malaysia (Maritim Malaysia) terus ngenegapka kaul strategik enggau komuniti lokal nengah pengawa ngatur Program Komuniti di Long Lama, Miri ti ngaul penyereta 30 pemesai enggau kaban ari Zon Maritim Miri.

Program ke diatur Kelab Sosial enggau Rekreasyen Maritim Sarawak (SUKMAS) Zon Maritim Miri dipejalaika enggau chara dua bengkah iya nya ngerapitka kaul enggau komuniti pesisir seraya nambahka penyedar mensia mayuh pasal pangku pengawa Maritim Malaysia ari sukut pengelikun enggau eksposur ngagai peluang kereja dalam sektor maritim menua.

Sepemanjai program nya, delegasyen Maritim Malaysia nemuai ngagai Rumah Panjai Morgan ti diuan komuniti etnik Iban sereta bejalaika aktiviti ngerupan begulai enggau peranak menua nya dikena nempa rampa kampung ti beresi, bepengerai sereta lantang agi.

Program nya betuaika Chairman SUKMAS Miri, Leftenan Komander Maritim Mohammad Hafeiz Hussein, enggau penyereta ti chakah ari bala pemesai enggau kaban dalam tetiap aktiviti ti udah diperambu.

Direktor Zon Maritim Miri, Kepten Maritim Mohd Khairol Anuar Saad madah, pengawa ngatur program ke baka nya entara pengawa ke enda ngetu dipejalaika Maritim Malaysia dalam ngelawa komuniti, kelebih agi ba kandang menua ulu, kelimpah ari ngenegapka rentayan kerejasama komuniti lokal.

“Chara renggat baruh tu beguna amat dalam nentuka penerang bekaul enggau pengelikun maritim ulih dikenataika enggau ngasi agi ngagai komuniti, kelimpah ari nambahka pemereti ati senentang pangku pengawa Maritim Malaysia nyaga pengelikun menua,” ku iya.

Program tembu enggau pengawa nyuaka tepa pengingat ngagai Ketuai Rumah Panjang Morgan kelai meri terima kasih ngagai kerejasama rat entara Maritim Malaysia enggau komuniti menua nya. — RBI