BARAM, 17 April — Program Ketuai Begulai enggau Rayat ke nyadi ba Rumah Diana Fidelis Antas, Munggu Sikup, Sungai Peking, Tinjar kena Hari Enam tu tadi mujur dipejalaika enggau semengat sepenemu sereta kerejasama rat entara komuniti menua nya.

Program tu diperindang enggau penatai Kaban Kunsil Nengeri (ADUN) Marudi YB Datuk Dr. Penguang Anak Manggil begulai enggau bini iya, Datin Monica Ukong, sereta mega beberapa iku ketuai enggau pengari ejensi nyengkaum pengari Pemesai Pelilih Beluru, SAO Deo Kenneth, Chairman Kaunsil Pelilih Marudi, Cr. Edward Mendai, pia mega Pemanca Enggah Muga, bala penghulu sereta tuai-tuai rumah ari kandang Tinjar.

Dalam penerang ti dipansutka nengah Facebook Rh Diana Fidelis Antas, Munggu Sikup Sungai Peking Tinjar Baram, jaku puji ti pemadu tinggi dikenataika ngagai semua piak ti bisi datai sereta meri sukung ti tegap dalam ngemujurka program nya.

Penatai bala ketuai enggau komuniti nyata mandangka komitmen begulai dalam ngerapitka kaul entara ketuai enggau rayat ba renggat baruh.

“Terima kasih mega dikenataika ngagai semua peranak Munggu Sikup ti udah bebendar nyediaka semua peminta program nyengkaum makai makai, ngirup enggau pengawa nyediaka diri ke bukai dikena nentuka pengelanchar pengerami nya.

“Semengat kerejasama ti dipandangka peranak Munggu Sikup endang patut dipuji sereta nyadi chunto pemadu manah dalam nerenakka penyerakup komuniti,” ku penerang nya.

Program baka tu dipeda nyadi pelasar ke beguna dalam mai bala ketuai ngenyemakka diri enggau rayat kelimpah ngenegapka semengat begulai, setipak enggau aspirasyen pemansang komuniti menua pesisir ti meruan sereta inklusif. — RBI

SIBU, 17 April — Sapit Menteri Kebun Bedandang Besai enggau Komoditi, Huang Tiong Sii bejalaika penemuai kereja kemari ngagai tiga buah kilang minyak sawit ngelingi Sibu enggau Mukah dikena beratika industri nya nitihka atur ke udah dikena.

Penemuai nya ngaul Kilang Sawit Syarikat Palm Group Palm Oil Mill Sdn. Bhd., RH Balingian Palm Oil Mill Sdn. Bhd. sereta Mukah Kilang Kelapa Sawit Sdn. Bhd. enggau fokus ngagai aspek nitihka lisin ari baruh Lembaga Minyak Sawit Malaysia (MPOB), Pensijilan Minyak Sawit Lestari Malaysia (MSPO), kelimpah ari nitihka standard rampa menua enggau operasyen.

Asil pengawa matau nya tetemuka ketetiga kompeni nya nitihka penetap industri nyengkaum ngembuan lisin operasyen ke entas, setipikit MSPO sereta ngemeranka pengawa ngatur rampa menua enggau manah.

Berebak enggau nya, iya mega meri pengaga ati ngagai komitmen tinggi industri dalam nentuka operasyen dipejalaika nitihka garis lalau ke udah ditetapka.

Taja pia, iya nyemetak madahka pengawa ngemanahka ti seruran dipejalaika patut diberi perati, kelebih agi ba sukut ngatur operasyen, dokumentasyen enggau ngenegapka pengawa ti meruan.

Nitihku iya, opis menteri deka terus ngenegapka pengawa matau sereta meri sukung ke patut dikena nentuka industri minyak sawit menua tu meruan meruan, tan sereta terus kompetitif ba renggat dunya. — RBI

KUCHING, 17 April – Perintah dalam Gempung Parti Sarawak (GPS) seruran mantu lalu mayuh nulung rayat dalam aspek pemansang.

Kaban Kunsil Nengeri (ADUN) Pakan, Tan Sri William Mawan Ikom madahka tu nyengkaum mutarka penanggul ti ditapi rayat sereta ngemajuka menua Sarawak.

Mawan ke mega Penyanding Penemu ba Opis Premier Sarawak (Industri Pemakai, Komoditi enggau Pemansang Kandang Menua), mansutka jaku tu lebuh nerima penemuai basa ari 58 iku bala tuai rumah enggau Biro Indu ba genturung pendiau Pedanum, ti bepalan ba Opis Servis ADUN Pakan kemari.

Penemuai ti betuaika Penghulu Undi ari sitak Pedanum, ngembuan tuju minta bantu ari Mawan nerangka ngagai rayat senentang atur kuasa sereta pemansang ke dipegai Perintah Besai enggau Perintah Sarawak.

“Atur pemansang ba sekula tauka pekara pelajar, polis, klinik, sepital tauka pengerai, pengintu pengelantang, jalai besai enggau autr pemansang ke dipegai Perintah Besai di baruh kuasa pengari rayat ungkup Parlimen,” ku iya nerang.

Ba pengawa nya mega, Mawan bisi ngelansa sekeda penemu dikena ngemansangka tanah ungkup rayat bejalaika pengawa betanam betupi.

Ku iya, pengeransing rayat ti nguna tanah enggau betul ulih ngerawang tikas pengidup rayat di selampur menua Pakn, nyentukka entigis Ulu Julau. -RBI

KAPIT, 16 April — Kandang menua Kapit enggau Song bisi potensial besai dikemansang nyadi hab pemansut madu engkelulut bekualiti tinggi di Sarawak, lalu enggau nya ulih ngenegapka ekonomi menua pesisir sereta muka ruang ngagai pemansang produk bepelasarka ekodagang temuai.

Ketuai Pemesai Eksekutif Kaunsil Pemansang Koridar Wilayah (RECODA) Ismawi Ismuni madah, perambu pemansang Palan Madu Ulu Rajang dipelaba ulih ngangkatka Kapit nyadi palan besai ungkup industri madu engkelulut di nengeri tu.

Nitih ku iya, inisiatif tu ukai semina ulih nambahka pemansut madu engkelulut menua tu, tang mega bisi potensial ngaga kandang menua nya nyadi palan baru bepelasarka ekodagang temuai ti kompetitif.

“Enti dikeamatka, pemansang palan tu deka meri nilai tambah ngagai ekonomi kandang menua sereta nyungkak penatai pemisi enggau tikas pengidup komuniti, kelebih agi ba raban orang dagang mit,” ku iya.

Iya madah munyi nya rambau penemuai kereja ngagai sekeda projek sosio-ekonomi ti dipejalaika RECODA ba pelilih menua Song enggau Kapit, sehari tu tadi.

Rambau penemuai nya, iya mega bisi ngabas projek nginang engkelulut ti digaga Koperasi Pedagang Bumiputera Kapit Berhad ti bepalan besemak enggau mengeri Kapit.

Projek tu diatu ngembuan lebih 109 tikung engkelulut lalu ulih ngasilka entara 30 ngagai 50 kilogram madu dalam timpuh urung sebulan, bepanggai ba faktor gaya hari enggau musin bungai.

Pemansut ditemu majak nambah maya musin bungai, lalu enggau nya nyukung potensial industri tu nyadi pun penatai pemisi ti meruan.

Berebak enggau nya, rega makit madu engkelulut dipelabaka urung RM90 sekilogram, ti mandangka rega komersial ti tinggi sereta peminta ti majak nambah.

Ku iya nambah, pengawa ngerembaika ngagai makit produk tikas ke lebih besai nyengkaum rembus ngagai makit antarabansa deka terus dikemerat dikena nambahka daya besemekih produk menua tu.

Ngenang silik agi, iya madahka RECODA benung ngelala palan ke strategik sekalika di Song tauka Kapit ungkup pemansang Palan Madu Ulu Rajang, ti deka nyadi palan memproses, pansik enggau pemansang (R&D) ungkup industri madu kelulut.

“Pengawa milih palan tu deka beratika penyemak enggau komuniti sereta orang dagang menua tu dikena nentuka operasyen lanchar sereta penyereta komuniti ti chakah.

“Kitai ngembuan juluk ngambika palan tu dikemansang nyadi inisiatif diempu komuniti ti meruan, lalu ari nya ulih ngurangka bepanggai ba ejensi perintah dalam timpuh ke panjai,” ku iya nerang.

Sama bisi datai Kaban Kunsil Nengeri (ADUN) Katibas, YB Lidam Assan enggau Kaban Kunsil Nengeri (ADUN) Pelagus, YB Wilson Nyabong Ijang. — RBI

PAPAR, 16 April — Sebuah setor nyimpan barang rumah enggau dua buah kerita angus ba penusah angus semak Taman Seri Kinarut Selatan, Kinarut, tengahari tu tadi.

Palan Operasyen Opis Bomba enggau Penyah Penusah (JBPM) Sabah nerima kangau ngenyit pukul 5.59 lemai sebedau jentera ari Balai Bomba enggau Penyah Penusah (BBP) Papar datai ba endur nya urung 31 minit udah nya.

Komander Operasyen, PBK II Hamdani Harith madah, penusah angus nya mungkur sebuah stor pemesai 6×7 kaki ti udah angus lengis.

“Bela kena empas ari penusah tu iya nya dua buah kerita iya nya sebuah kerita Proton Persona enggau sebuah kerita Toyota Hardtop AE70 ke bela urung 90 peratus angus,” ku iya nengah siti penerang sehari tu.

Nitihku iya, raban bomba bejalaika operasyen madamka api ngena hos bantu tunggal dikena nagang sereta madamka api.

Penusah angus nya mujur dijaga urung pukul 7 malam sebedau operasyen tembu enggau penuh urung pukul 7.34 malam.

Sepenyampau 11 iku raban enggau tiga buah entukar iya nya sebuah Tender Penyelamat Bomba (FRT), sebuah Servis Penyelamat Perubat Penusah Ngenyit (EMRS) enggau sebuah entukar utiliti udah dianjung ngagai palan penusah nyadi.

Nadai penusah bebadi nyawa diripotka nyadi ba penusah nya. — RBI

Palan Operasyen Opis Bomba enggau Penyah Penusah (JBPM) Sabah nerima kangau ngenyit pukul 10.38 pagi sebedau jentera ari Balai Bomba enggau Penyah Penusah (BBP) Kudat datai ba endur nya urung tiga minit udah nya.

Komander Operasyen, PBK I Mohd Najib Jasri madah, penusah angus nya mungkur lima buah rumah setengah tetap ke udah angus 90 peratus, dua buah rumah ukai tetap angus abis, lalu sebuah rumah tetap semina napi pengerusak urung 10 peratus.

“Kelimpah ari nya, sebuah kerita Proton Satria enggau dua buah mutosikal mega angus lengis dalam penusah angus nya,” ku iya nengah sebengkah penerang sehari tu tadi.

Nitihku iya, operasyen madamka api nya dipejalaika ngena dua batang ai enggau tiga jet ai, ngaul pun penatai ai ari jentera enggau paip bomba ke besemak.

Siku lelaki ke bakal ba bau belakang diberi perubat keterubah ulih raban bomba ba palan penusah nyadi.

Operasyen nya mujur dijaga urung pukul 11.47 pagi lalu tembu enggau penuh pukul 2.15 lemai.

Sepenyampau 25 iku raban ngaul diri dalam operasyen nya nyengkaum 16 iku kaban ari BBP Kudat enggau tujuh iku raban Bomba Sukarela (PBS) Kampung Air Kudat, enggau bantu ejensi bukai nyengkaum SESB, Angkatan Pertahanan Awam Malaysia (APM) enggau Polis Diraja Malaysia (PDRM).

Kebuah penusah nyadi enggau penyampau pengerugi agi dalam pansik. — RBI

KUDAT, 16 APR — Lapan buah rumah angus ba penusah angus ke nyadi ba Kampung Gumpa, pagi tadi, ngujungka siku lelaki beumur 46 taun bakal ketegal angus.

Palan Operasyen Opis Bomba enggau Penyah Penusah (JBPM) Sabah nerima kangau ngenyit pukul 10.38 pagi sebedau jentera ari Balai Bomba enggau Penyah Penusah (BBP) Kudat datai ba endur nya urung tiga minit udah nya.

Komander Operasyen, PBK I Mohd Najib Jasri madah, penusah angus nya mungkur lima buah rumah setengah tetap ke udah angus 90 peratus, dua buah rumah ukai tetap angus abis, lalu sebuah rumah tetap semina napi pengerusak urung 10 peratus.

“Kelimpah ari nya, sebuah kerita Proton Satria enggau dua buah mutosikal mega angus lengis dalam penusah angus nya,” ku iya nengah sebengkah penerang sehari tu tadi.

Nitihku iya, operasyen madamka api nya dipejalaika ngena dua batang ai enggau tiga jet ai, ngaul pun penatai ai ari jentera enggau paip bomba ke besemak.

Siku lelaki ke bakal ba bau belakang diberi perubat keterubah ulih raban bomba ba palan penusah nyadi.

Operasyen nya mujur dijaga urung pukul 11.47 pagi lalu tembu enggau penuh pukul 2.15 lemai.

Sepenyampau 25 iku raban ngaul diri dalam operasyen nya nyengkaum 16 iku kaban ari BBP Kudat enggau tujuh iku raban Bomba Sukarela (PBS) Kampung Air Kudat, enggau bantu ejensi bukai nyengkaum SESB, Angkatan Pertahanan Awam Malaysia (APM) enggau Polis Diraja Malaysia (PDRM).

Kebuah penusah nyadi enggau penyampau pengerugi agi dalam pansik. — RBI

KAPIT, 16 April — Penemuai meresa kepenudi udah dipejalaika ungkup Projek Transformasyen Menua Pesisir (RTP) ti mungkur pengawa ngaga perengka guna ‘awning’ ba Rumah Ajai, Nanga Senuang, sehari tu.

Penemuai nya diarika Puan Jara enggau Puan Florence ari Palan Servis Komuniti N.64 Baleh begulai enggau ejensi ti bejalaika pengawa, Opis Kereja Raya (JKR) enggau kunteriktor ti megai tanggungpengawa bejalaika projek nya.

Pengawa meresa kepenudi tu ngembuan tuju deka beratika tikas penyedia projek kelimpah ari nentuka semua pengawa ngaga udah dipejalaika nitihka spesifikasyen teknikal, garis lalau enggau standard kualiti ti udah ditetapka sebedau penembu projek dientaska henggau rasmi.

Projek ngaga ‘awning’ tu dikearap ulih meri penguntung ke besai ngagai peranak Rumah Ajai, kelebih agi ba pengawa nyendiaka palan betutup ke lantang agi, likun sereta praktikal ungkup guna ninting hari sereta ngatur aktiviti komuniti.

Palan Servis Komuniti Baleh deka terus komited matau pengawa bejalaika projek pemansang ba sitak DUN Baleh N.64 dikena nentuka tetiap inisiatif ti dipejalaika ulih nyungkak pengelantang enggau kualiti pengidup komuniti setempat. — RBI

SPAOH, 16 April — Projek ngaga jamban baru Masjid Baru Kampung Manggut, Spaoh ti dipejalaika ari baruh Projek Mesra Rakyat Pelilih Parlimen P.204 Betong udah dientask tembu penuh nengah pengawa ngabas palan ke diatur sehari tu.

Kaban Parlimen Betong, Richard Rapu madah, penemuai nya betuju nentuka pengawa bejalaika projek nya nitihka spesifikasyen ke udah ditetapka sereta dalam gaya ke manah ungkup pemaik komuniti menua nya.

“Projek tu dikearap ulih meri penguntung ke besai, kelebih agi ngagai orang ke besembiang ba masjid nengah chara nyendiaka perengka guna ke lebih lantang sereta teratur dikena nyukung pengawa bejalaika pengawa sembiang enggau aktiviti komuniti,” ku iya.

Iya mega nyemetak madahka komitmen ngemanahka perengka guna pemun di menua pesisir deka terus nyadi pemerat ungkup pengelantang pendiau rayat.

Penemuai nya mega digulu pengari Palan Servis Komuniti Parlimen P.204 Betong begulai enggau ejensi bejalaika pengawa ti megai tanggungpengawa nentuka pengelanchar sereta nitihka standard dalam bejalaika projek nya. — RBI

SPAOH, April 16 – Siku indu selamat sereta nadai sebarang bakal pengudah entukar pikap bansa Toyota Hilux ke dipasang iya tepawah sebedau ngelantak pemagi jalai ba penusah aksiden betunga mua ba Jalai Serudit, Jalai Besai Pan Borneo, lemai tu tadi.

Nitihka ripot, penusah nya diperatika siku orang periman ke benung nengah endur nya sebedau terus ngaga kangau ngagai talipaun penusah ngenyit Palan Penyaga Operasyen Pelilih Menua (PKOD) Raban Penyaga Orang Periman Malaysia (APM) Spaoh minta bantu.

Berindik ari penerang nya, seraban APM betuaika Sjn (PA) Hasla Bin Deli begulai enggau empat iku kaban bukai berumban ngesah ngagai palan nya ngena ambulans.

Lebuh datai ba palan penusah nyadi, pengawa meresa tetemuka tudah nadai bakal. Tudah udah nya dibai sida sebilik pulai ke rumah.

Kebuah penusah nya nyadi, taja pia, agi benung dipansik piak bekuasa.

Operasyen nya diketuka pengudah gaya dientaska likun, enggau semua kaban APM Spaoh pulai ngagai PKOD begulai enggau logistik dalam gaya ke manah.

Mensia mayuh dilalau ngambika seruran bejejimat maya deriba, kelebih agi ba jalai besai, lalu lengkas betelefon ngagai talipaun penusah ngenyit 999 nyema bisi sebarang penusah nyadi.-RBI

MIRI, 16 April — Aum koordinasyen udah diatur dikena ngenegapka pengawa nyendiaka diri ngatur Bazaar Gawai Dayak enggau Pengerami Etnobudaya, nyadi singkang pemungkal sebedau Aum Komiti Pengatur Ke-2.

Aum nya berengkah ari pukul 2.30 lemai nyentuk 4.30 lemai ba Bilik Aum, Ringkat 9, Opis Residen Miri lalu bechairmanka Tuan Galong Luang.

Sama bisi datai bala chairman komiti bekaul enggau pengari ejensi ti bisi kaul ngatur program nya.

Randau nya ngemeratka pengawa ngatur program bejadi enggau nutup, kelimpah ari ngulihka ripot pemadu baru bekaul enggau status pengawa nyendiaka diri ungkup Pesta Etnobudaya enggau program bazar.

Aum tu mega ngemeratka sukut koordinasyen entara komiti, ngatur logistik, enggau nyikap diri selampur dikena nentuka tetiap pelin ulih dipejalaika enggau teratur sereta efektif.

Pengawa ngatur Bazaar Gawai Dayak enggau Festival Etnobudaya dipeda nyadi pelasar ke beguna dalam ngangkatka pesaka asal komuniti Dayak, kelimpah ari nyungkak aktiviti ekonomi menua tu.

Berindik ari nya, aum koordinasyen tu diatur dikena nentuka semua sukut organisasyen ba tikas penyedia ti optimum, lalu enggau nya nyamin pengawa bejalaika program enggau lanchar nitihka haribulan ti udah ditetapka. — RBI