KUCHING, 19 April — Pengawa nguruska sumber enggau efektif meseti bepelasarka penemu, pengelurus dalam pentadbiran enggau pengelurus ati ngiring menua, pia ku Premier Sarawak, Datuk Patinggi Tan Sri (Dr) Abang Haji Abdul Rahman Zohari bin Tun Datuk Abang Haji Openg.

Kenu ku iya, penyulut sesebuah nengeri ukai semina bepanggai ba pengaya pengeraja asal aja, tang mega ba pengulih ketuai dalam nentuka pengeraja asal tu diatur enggau adil sereta inklusif ungkup pemaik semua rayat.

Iya nyemetak madahka chara Gabungan Parti Sarawak (GPS) seruran beratika penyelai pupu bansa enggau jalai pengarap di nengeri tu.

Entara nya sukung ngagai sekula China, berindik ari bisi nembiak Bumiputera ke sama bulih penemu sereta belajarka Jaku Mandarin ba sekula nya.

Kelimpah ari nya, perintah nengeri mega mantu institusyen jalai pengarap bukai nengah Unit Pekara Jalai Pengarap Bukai (UNIFOR) dalam pengawa nentuka pengelantang pendiau semua komuniti terus dijaga.

“Di Sarawak kitai bisi model kediri empu. Kitai mantu semua orang enda ngira penatai laban semina peranak Sarawak ke amat meretika budaya enggau pengelantang ti ditempa kitai begulai,” ku iya rambau aum pengarang berita beserimbai enggau Pengerami Bejadika Konvensyen Gabungan Parti Sarawak 2026 ke diatur ba Palan Konvensyen Borneo.

Berebak enggau nya, iya mega nyemetak madahka pengaya pengeraja asal aja enda ulih nyamin pengelantang sesebengkah menua enti bisi penyarut enggau enda tegap.

Iya bechuntoka sekeda menua ti kaya enggau pengeraja asal baka Sudan enggau Nigeria ti agi napi pemar pemansang ketegal penyarut dalam menua.

Berindik enggau nya, iya ngemeratka pemesai guna penegap politik enggau sepakat entara raban ketuai nyadi pelasar pemansang ti meruan.

Nitih ku iya, nengah semengat kerejasama dalam GPS, Sarawak ulih ngelangkar kuing pemansang ti lebih teratur sereta efektif dikena nyamin pengidup rebak dudi hari.

Ngenang sukut ekonomi, iya nyemetak madahka pemansang meseti setipak enggau guna makit kereja.

Raban graduet meseti disikap enggau pengelandik ti bekaul ngambika sida enda napi pemar ngiga pengawa, kelimpah ari nagang pemindah pengereja pengawa bepengelandik ngagai menua luar.

Ku iya nambah, ekonomi ke diatu majak bepelasarka penemu, nya alai Sarawak begunaka nyingkang sesingkang enggau nengeri sereta menua maju.

Dalam konteks tu, pemansang sektor baru baka aeroangkasa mega diberi perati, nyengkaum numbuhka fakulti ti bekaul ba palan pelajar baka ICATS.

Singkang tu ku iya betuju ngenegapka penemu dalam bidang teknologi tinggi, lalu enggau nya muka peluang baru ngagai nembiak rebak baru Sarawak.

“Dikena nyapai penyulut, politik kitai enda tau enda seriris sereta tegap.

“Enti nadai penegap, kitai berisiko napi penanggul baka di menua bukai. Nya alai, penegap nyadi kunchi pengidup ti likun jemah ila,” ku iya. — RBI

KUCHING, 19 April — Gabungan Parti Sarawak terus ngemeranka chara ti sebela entara ketuai ti bepeneleba enggau mua baru nyadi batang pengawa dalam nentuka penegap enggau pengentap parti.

Chairman iya, Tan Sri Abang Johari Tun Openg madah, chara nya diputuska begulai ari ketuai parti dikena ngenegapka organisasyen, seraya mega meri ruang ngagai rebak baru nempa peneleba dalam arena politik.

Nitih ku iya, parti komponen GPS nyengkaum Parti Pesaka Bumiputera Bersatu seruran bebendar deka muka peluang ngagai raban nembiak belajar ari ketuai ti bepeneleba sebedau megai tanggungpengawa ke besai agi.

“Semua kami berengkah ari baruh, nyengkaum aku empu nengah sayap Gerakan Belia PBB lalu proses tu ngemendarka kami belajar sebedau megai tanggungpengawa ke besai agi,” ku iya.

Iya madah munyi nya ba aum pengarang berita pengudah bejadika Konvensyen GPS di Palan Konvensyen Borneo, Kuching, sehari tu tadi.

Ngenang silik agi, iya nyemetak madahka tetiap iku individu ngembuan pengulih ke bebida sereta begunaka pemansang nitihka pematut diri empu enggau enda berumban.

“Dalam perjuangan politik, pengelurus ati enggau penyabar amat beguna.

“Anang mudah lemi semengat enti bedau diberi peluang,” ku iya.

Berebak enggau nya, iya nerangka pengawa besilih nyadi ketuai meseti dipejalaika enggau chara ti sebela enggau enda ngeruga pangku pengawa ketuai ke udah bisi.

“Dalam PBB, abis nadai lima tauka enam mua baru deka diberi kelala ninting pengawa bepilih dikena nentuka penerus,” ku iya nerang.

Ku iya nambah, chara ke sama mega ngaul sayap indu ke nyadi pengeransing ngenegapka struktur parti selampur.

Iya mega nyemetak madahka sebarang penyerekang penemu dalam parti meseti diputar nengah randau ngambika ulih ngetanka semengat diri sebilik dalam GPS.

Nitihka ripot TVS, chara nya ngayanka komitmen ketuai GPS ti terus nentuka pengawa betukar rebak nyadi enggau chara ti diperambu sereta harmoni. — RBI

MERADONG, 19 April – Siku lelaki beumur 30 taun ditan tim “Pasukan Tugas” IPD Meradong dalam operasyen khas “Ops Tapis” ngelingi kandang menua Bintangor, tumu ngalih hari tadi.

Ketuai Polis Pelilih Meradong DSP Tansli Mering, nengah penerang berita madahka pengawa ngetan nya digaga urung pukul 1.00 lemai pengudah saspek dipelaba bisi kaul enggau aktiviti salah guna dadah sebedau dibai ngagai Indu Opis Polis Pelilih (IPD) Meradong ngambika atur ke silik agi dipejalaika.

“Asil peresa ai kemi ti dipejalaika ba Opis Bagian Tasat Jenayah Narkotik (BSJND) Pelilih Meradong tetemuka saspek positif Amphetamine enggau Methamphetamine.

“Pengawa meresa rikod saspek ke udah tetemuka iya nadai ngembuan sebarang rikod jenayah tauka penyalah bekaul enggau dadah sebedau tu,” ku iya.

Kes nya diatu benung dipansik ari baruh Seksyen 15(1)(a) Akta Dadah Berbahaya 1952. Enti dikenuku salah, saspek ulih diukum enda ngelui ari RM5,000 tauka dijil nyentuk dua taun.

Berebak enggau nya, polis ngemeratka komitmen sida terus ngelaban pengawa salah guna dadah di pelilih menua nya lalu enda deka belembut ba sebarang pengawa ke bekaul.

Mensia mayuh mega dilalau ngenataika penerang bekaul enggau aktiviti dadah ngagai piak bekuasa, nyengkaum betelefon ngagai Balai Polis Bintangor nengah lumur 084-693222. -RBI

KUCHING, 19 April – Pengulih enggau penuduk Sarawak diatu ulih dipeda nengah pengangkun ari mayuh bengkah piak, nyengkaum bala ketuai menua enggau komuniti antarabansa.

Premier Sarawak Datuk Patinggi Tan Sri Abang Johari Tun Openg madah, naka ke diatu, orang beratika Sarawak ba beberapa pekara.

“Mayuh orang beratika kitai chukup mansang nyentukka mayuh ketuai menua udah ngelala kami.

“Piak luar mega ngelala kami, lalu nya kelai kami ngereja pengawa ke betul,” ku iya nerang.

Nambahka nya, pemerat ti terus ari pengari menua luar mega mandangka pengandal ngagai kuing Sarawak ari baruh pegai pentadbiran Gempung Parti Sarawak (GPS).

“Bala duta ari mayuh bengkah menua datai nyauka ninting minggu tauka ninting bulan.

“Minggu nyin tadi, aku nerima pengari ari Bangladesh enggau Itali, enggau pengari Itali bisi ati deka mansik kerejasama dalam sektor aeroangkasa,” ku iya.

Bekaul pekara bukai, iya madahka pemanah pengawa GPS ke nyadi perintah ngatur nengeri tu patut diperesa rayat, ukai ari ketuai iya empu.

Ku iya, chara GPS ti seruran bejalaika pengawa nyerenih diri ukai reti gempung nya patut meri puin ngagai prestasi sida empu.

“Aku enda menilai diri empu. Awakka rayat menilai,” ku iya lebuh dikerandau pengudah bejadika Konvensyen GPS 2026 di Palan Aum Borneo Kuching (BCCK) sehari tu tadi.

Berebak enggau nya, pemujur GPS mega narit ati ngagai penatai pemeranak puku ari menua luar nyadika indikator pengarap ngagai penau nengeri tu.

“Ambika chunto, kompeni teknologi global Western Digital ngerembaika puku sida di Samajaya, nyengkaum transisyen teknologi ‘substrat’ ari silikon ngagai kaca.

“Sida ngelala pengereja pengawa enggau nembiak kitai ke bekualiti, nya kebuah sida beranakka puku nyentuk US$2 bilion ungkup pengawa ngerembaika di Samajaya,” ku iya.

Kelimpah ari nya, iya madahka kompeni semikonduktor X-FAB mega majak ngenegapka operasyen di Sarawak, lalu enggau nya ngayanka industri semikonduktor nengeri tu ba tikas ke tinggi.

Taja pia, iya nyemetak madahka semua pemujur nya anang nyadika dalih ngemegahka diri, tang lebih agi muka ruang ngagai rayat meda sereta beratika kediri nama utai ke udah dipejalaika ngelama tu. -RBI

KUCHING, 19 April — Lebih 5,000 iku pengari ari serata Sarawak begempuru ba Konvensyen Kedua Gabungan Parti Sarawak (GPS) ke diatur ba Palan Konvensyen Borneo Kuching sehari tu, mandangka penyerakup ke tegap sereta penegap gempung nya napi pemar ke ditapi nengeri tu jemah ila.

Sapit Premier Sarawak, Datuk Amar Douglas Uggah Embas madah, konvensyen nya ukai semina nyadi pelasar baum aja, tang mega nyadi pelasar ke beguna dikena ngenegapka komitmen ketuai parti enggau renggat baruh dalam negika hak Sarawak sereta ngelanggur kuing pemansang ke lebih strategik.

Ku iya nerang, pengawa ngatur konvensyen kedua tu iya nya pemutus Kaunsil Ketuai Tertinggi GPS ti nyadi siti singkang dikena ngenegapka penyerakup parti, kelimpah ngenataika pesan ti nyemetak iya nya GPS meruan tegap, beserakup sereta entap.

“Sehari tu kitai meda siti momen besejarah lebuh beribu iku pengari GPS ari genap sukut Sarawak begempuru, ukai semina deka begempuru aja, tang mantaika penetap ti terang sereta tegap, kitai beserakup, kitai kering, lalu kitai enda nyurutka diri taja pan sesingkang dalam ngetanka hak enggau pengidup dudi hari Sarawak,” ku iya.

Konvensyen nya ti ngembuan rambai jaku “Strategi Pemansang Pasca COVID 2030: Wawasan Nyadi Nyata”, mega nyadi pelasar besai dikena ngatur strategi pemansang nengeri nuju taun 2030, enggau pemerat nempa mensia mayuh ti maju bepelasarka data, inovasyen, inklusif rampa menua.

Nitih ku iya, Sarawak diatu ba pelasar ke tegap lebuh iya ukai agi semina merambu ungkup jemah ila, tang nganti nya realiti pemansang bepelasarka pengulih ke signifikan.

Entara nya diaku nyadi pelilih menua bepenatai pemisi tinggi ulih Bank Dunya kenyau ari taun 2023 enggau penambah penatai pemisi nengeri ari RM5.6 bilion ba taun 2017 ngagai RM14.2 bilion ba taun 2024.

Kelimpah ari nya, lebih 5,000 kilometer jalai menua pesisir udah digaga sereta diangkatmanah, lalu sektor utiliti udah ngayanka penyulut ti meransang enggau 70 peratus bekal kuasa karan dipansutka ari pun penatai kuasa tau dikena baru.

Bungkur bekal ai diatu lebih ari 85 peratus di serata nengeri lalu terus dikemanah nuju tagit 100 peratus manggai ba taun 2030.

Ari sukut pemansang modal mensia, perintah Sarawak udah meri kelala skim pelajar tinggi enda bebayar dalam bidang strategik ungkup peranak nengeri ba institusyen baka Kampus Universiti Teknologi Swinburne Sarawak, Universiti Curtin Malaysia, Universiti Teknologi Sarawak enggau Kolej Universiti i-CATS, lalu enggau nya muka peluang ke lebih luas ngagai rebak biak agi.

Sarawak mega udah ngenegapka penuduk ekonomi nengah pengawa beranakka puku strategik enggau penumbuh Bank Pemansang Sarawak (DBOS) dikena melanja projek pemansang ke besai, kelimpah ari penumbuh Wang Turu Kekayaan Berdaulat Sarawak Jemah Ila ke beungkus RM8.6 bilion ungkup pemaik timpuh panjai rebak dudi hari.

Ba sektor kuasa, nengeri tu majak diaku nyadi ketuai kuasa gadung di rantau tu setipak enggau aspirasyen nyadi “Bateri ASEAN”, seraya pemansang infrastruktur terus dipejalai nengah pengawa ngaga 20 buah jematan mega ti beungkus RM6.5 bilion ti dipelanja penuh perintah nengeri.

Transformasyen tu mega udah meda ubah ke besai dalam sistem komunikasyen laban bepanggai ba servis feri majak kurang, lalu enggau nya nambahka efisyen mobiliti mensia mayuh enggau nadai beban tol.

Iya nyemetak madahka semua pemujur ke dijapai ukai asil ari kebetulan, tang lebih agi bepun ari perambu ke silik, polisi ke terang sereta ketuai ke bisi visi ari baruh pegai Menteri Besai Sarawak, Abang Tan Sri Abdul Rahman Johari Openg.

“Semua pemujur tu asil ari pengawa ti enda ngetu sereta komitmen ti tegap ari semua ketuai enggau rayat Sarawak dalam nentuka nengeri tu terus maju, inklusif sereta meruan,” ku iya.

Konvensyen GPS Kedua tu nyadi manifestasi penegap enggau penyerakup gempung dalam ngenegapka pelasar politik sereta ngesahka baru komitmen terus meransang pemansang Sarawak nuju nyapai visyen 2030. — RBI

KUCHING, 19 April — Sarawak ba jalai ke betul nyapai status nengeri maju bepenatai pemisi tinggi manggai ba taun 2030, asil ari pengawa bejalaika strategi pemansang ti meruan sereta inklusif.

Nitihku Sapit Premier Sarawak, Datuk Amar Douglas Uggah Embas, bemacham pemujur udah dirikod nyengkaum penambah penatai pemisi nengeri ngagai RM14.2 bilion ba taun 2024 enggau diaku nyadi pelilih menua bepenatai pemisi tinggi kenyau ari taun 2023.

Ku iya, pemansang infrastruktur menua pesisir, nambahka bungkur bekal ai enggau elekterik sereta bejalaika pelajar tinggi enda bebayar entara inisiatif kunsi ti meri penguntung terus ngagai rayat.

“Chara data ti bebatang, inovasyen enggau pengelantang nyadi pelasar strategi pemansang Sarawak ari baruh Pelin PCDS 2030,” ku iya nerang ba pengerami Konvensyen taun 2026 ba Borneo Convention Centre Kuching (BCCK) sehari tu.

Iya nambah, Sarawak diatu benung mansang nyadi ketuai kuasa gadung serantau enggau 70 peratus bekal kuasa karan dipansutka ari pun penatai ti ulih dikena baru. — RBI

KUCHING, 19 April – Semua parti dalam komponen Gempung Parti Sarawak (GPS) begunaka sukung pangan diri sereta ngetanka penuduk sida empu dikena nentuka penegap politik nengeri tu terus dijaga sebedau Pengawa Bepilih Nengeri ti deka datai.

Lenyau siti penuduk ba Dewan Undangan Nengeri (DUN) ulih ngelemika penegap lalu enggau nya ngeruga pengulih perintah nengeri berunding enggau Perintah Besai.

Nya alai, Parti Rakyat Sarawak (PRS) nyemetak madahka GPS nguasa penuh ba DUN nyadi kunchi besai ngenegapka penuduk nengeri tu dalam minta hak ari baruh Sempekat Malaysia 1963 (MA63).

“Pengawa nguasa penuh GPS ba DUN enggau penegap perintah nengeri nyadika batang pekara ti nentuka Sarawak terus nerima perati enggau basa ari Perintah Besai.

“Alah taja pan siti penuduk deka ngelemika penuduk kitai. Kitai enda ulih ngelakka pekara tu nyadi,” ku Presiden PRS Dato Sri John Sikie Tayai.

Iya madah munyi nya lebuh bejaku ba Konvensyen GPS 2026 ba Palan Konvensyen Borneo Kuching (BCCK), ditu sehari tu tadi.

Berebak enggau nya, John Sikie nyemetak madahka PRS ke nyadi komponen GPS mega berasai irau laban pengawa bepilih majak semak, tang andal kerejasama rat dalam gempung nya ulih nentuka pemenang ti komprehensif.

“Kitai dalam PRS seruran meda pemar ke deka datai, tang kitai pechaya bala bakih kitai dalam GPS deka terus bediri begulai ngetanka tetiap penuduk,” ku iya.

Nerang silik, iya madahka penegap politik GPS udah ngasuh Sarawak nyapai penyulut ti jampat, nyengkaum ari sukut pemansang ekonomi, infrastruktur enggau nambahka penatai pemisi nengeri.

Ku iya, ari baruh iring Premier Sarawak, Datuk Patinggi Tan Sri Abang Johari Tun Openg, perintah nengeri udah mujur nambahka penatai pemisi nengeri lebih RM14 bilion kenyau ari taun 2024, asil ari pemujur nuntut hak chukai dalam industri minyak enggau gis.

Kelimpah ari nya, pengawa bejalaika Strategi Pemansang Pengudah COVID-19 2030 (PCDS 2030) mega nyadi pemansut besai transformasyen Sarawak nuju pelilih menua bepenatai pemisi tinggi manggai ba taun 2030.

“Semua pemujur tu enda ulih nyadi nyata enti nadai penegap politik enggau ketuai ti tegap.

“Nya alai, kitai patut terus beserakup sereta nentuka GPS terus mujur ungkup kuing Sarawak jemah ila,” ku iya nyemetak. -RBI

KUCHING, 19 April — Gabungan Parti Sarawak (GPS) mengkang nyadi tiang penegap politik enggau penyerakup di nengeri tu, enggau nya nyamin pengidup ti inklusif sereta meruan ungkup Sarawak jemah ila.

Nitih ku Sapit Premier Sarawak Datuk Amar Douglas Uggah Embas, pemujur GPS ukai semina ba pemansang ekonomi aja, tang mega ngetanka pengelantang komuniti pupu bansa enggau jalai pengarap.

Ku iya, entara inisiatif ke berat iya nya numbuhka Unit Pekara Jalai Pengarap Bukai (UNIFOR) ti bejalaika tanggungpengawa ngatur sereta nyukung pemansang jalai pengarap kelimpah ari Islam di Sarawak.

“Inisiatif tu mandangka komitmen perintah nengeri nentuka nadai siti komuniti dikelaungka, setipak enggau prinsip inklusiviti enggau penyerakup ti nyadi teras GPS,” ku iya.

Ku iya nambah, GPS nyadi sebuah parti menua tu ngembuan pengelebih meretika guna rayat ba semua renggat sereta mengkang tegap ngetanka hak Sarawak ari baruh Sempekat Malaysia 1963 (MA63).

“Penyerakup ti tegap tu nyadi pelasar ngagai penegap enggau penyulut nengeri tu ti majak nyadi,” ku iya lebuh bejaku ba Konvensyen GPS taun 2026 ti diatur ba Borneo Convention Centre Kuching (BCCK) sehari tu tadi.

KUCHING, 19 April — Premier Sarawak Tan Sri Abang Abdul Rahman Johari Openg ngiring Sarawak terus nyadi pemansut besai transformasyen Sarawak nuju ekonomi gadung, digital enggau kompetitif ba renggat dunya.

Sapit Premier, Datuk Amar Douglas Uggah Embas madahka ari baruh iring Premier Sarawak udah bejalaika singkang ti berani ngemansangka sektor kuasa tau dikena baru nyengkaum hidro, hidrogen enggau solar.

Kelimpah ari nya, pengawa ngenegapka industri minyak enggau gis nengah Petroleum Sarawak Berhad (PETROS) sereta mega pengawa numbuhka institusyen wang strategik baka Bank Pemansang Sarawak (DBOS) mega udah ngenegapka ekonomi nengeri tu.

Iya mega nyemetak madahka pengawa nyadi ketuai ti inklusif ti dikemeranka nentuka semua bansa enggau jalai pengarap ngasaika penguntung pemansang enggau sama rata.

“Tu nyadika bukti Sarawak ukai semina ngaga ekonomi aja, tang ngaga pengidup jemah ila ti adil ungkup semua,” ku iya lebuh bejaku ba Konvensyen Gabungan Parti Sarawak (GPS) taun 2026 ti diatur ba Borneo Convention Centre Kuching (BCCK) sehari tu tadi. — RBI

KUCHING, 19 April -Isu bekal ai beresi ti agi nyadi batang sebana rayat ba beberapa kandang menua antara pekara ti patut diperati enggau berat dalam pengawa ngenegapka pengandal rayat ngagai perintah, ku Presiden Parti Demokratik Progresif (PDP), Dato Sri Tiong King Sing.

Ku iya, bekal ai nyadi pekara ke diguna ke enda ulih dikeruga sereta patut diputarka enggau jampat nengah perambu timpuh pandak, tengan enggau timpuh panjai.

“Bisi sitak menua ke agi betapi enggau pemar ngulihka bekal ai beresi ungkup guna ninting hari, tu nyengkaum gaya maya musin pengerami ti ngeruga pekara pemun rayat.

“Rayat ukai semina beratika nengah penerang aja aja, tang asil ke amat diatur deka diasaika ba renggat baruh,” ku iya.

Iya madah munyi nya lebuh bejaku ba Konvensyen Gempung Parti Sarawak (GPS) di Palan Konvensyen Borneo Kuching (BCCK), sehari tu tadi.

Kelimpah ari nya, Tiong mega ngaitka isu ai enggau pemar infrastruktur ke bukai baka sistem parit enggau ampuh bah ti suah nyadi belama, lalu enggau nya minta pengawa ti lebih jampat ari perintah.

Berindik enggau nya, iya ngansak ngambika aspek meri servis terus dikemanah ngambika setiap perambu perintah ulih disalin ngagai penguntung ke nyata ungkup rayat.

“Nyadi perintah ke ngembuan tanggungpengawa, kitai patut nentuka pekara ke diguna rayat kelebih agi bekal ai beresi seruran dijamin ke pengelantang pendiau sida,” ku iya nyemetak.

Bekaul isu nyiri Ketuai Komuniti enggau Ketuai Raban Bansa (KMKK) Tiong nyemetak madahka bisi timbal ari renggat baruh bekaul enggau proses nyiri KMKK ke dikumbai enda setipak enggau pengawa ke udah dipesetuju dalam GPS.

Nitih ku iya, gaya nya kelebih agi ba kandang endur sitak PDP, ngasuh orang betanya lebuh pemutus majoriti enda nerima perati.

“Pekara tu nyangka dipeda mit, tang ke bendar iya meri empas ke besai ngagai pengarap rayat ngagai sistem pentadbiran kitai.

“Pekara ke dibantai ukai dikena ngasuh penyarut nyadi, tang lebih agi dikena ngetanka pelasar kerejasama sereta nentuka proses ke dipesetuju begulai dipejalaika enggau konsisten,” ku iya. -RBI