KUCHING, 19 April – Sarawak udah nengah fasa transformasyen ke chukup beguna kenyau ari berapa taun ke udah, tu nyengkaum ubah politik ba taun 2018, tang mengkang tegap di baruh iring Gempung Parti Sarawak (GPS) enggau Premier Sarawak Datuk Patinggi Tan Sri Abang Johari Tun Openg.

“Kitai enda agi tinggal baka ke dulu suba. Kitai diatu ba jalai pemansang ke tegap agi,” ku Sapit Premier Sarawak, Datuk Amar Profesor Dr Sim Kui Hian lebuh bejaku ba Konvensyen GPS 2026 di Pusat Konvensyen Borneo Kuching (BCCK), sehari tu tadi.

Terang iya, Sarawak enda agi tinggal baka ke dulu suba, tang diatu udah nengah jalai pemansang ti lebih tegap asil ari penegap politik enggau penerus polisi di baruh GPS.

Dr Sim ke mega Presiden Parti Sa’ati Rayat Sarawak (SUPP) madah, ubah besai tu asil ari pengawa perintah nengeri ti konsisten sereta fokus dalam nentuka Sarawak terus nyingkang ke mua enggau chara ti betukuh.

“Lima taun ti deka datai amat berat dalam pengawa kitai nempa Sarawak nyadi nengeri maju, ukai semina ari segi pemansang fizikal tang mega pemansang komprehensif nyengkaum pelajar, ekonomi enggau pengerai.

“Ari segi pengerai, iya madah pengawa terus disungkak nyengkaum pemansang Palan Perubat Riman Sarawak ti dikearapka nyadi antara palan berubat ti patut ditapatka di rantau tu.

Ba awak sama mega, Sepital Besai Sarawak (HUS) mega terus ditegapka agi nyadi palan klinikal enggau pemansik.

Kelimpah ari nya, Dr Sim ngemeratka pemansang infrastruktur baka jalai alun, bekal ai beresi enggau kuasa karan terus nyadi pekara dikenuluka perintah nengeri dalam nyukung penumbuh ekonomi enggau ningkatka tikas pengidup rayat.

Ku iya, cara pemansand di Sarawak dipejalaika secara inklusif, nyengkaum semua bansa enggau jalai pengarap, nyengkaum sukung ngagai sekula Cina sereta bantu ngagai rumah sembiang enggau komuniti menua pesisir.

Tambah iya, penyerakup rayat nyadi pekara ti chukup beguna ti ngenegapka penguat politik, lalu ulih narit pemeranakka puku ari luar masuk ngagai Sarawak.

Bepelasarka Pelin Pemansang Pengudah COVID-19 2030 (PCDS 2030), Sarawak nagit nyadi nengeri bepenatai pemisi tinggi ba taun 2030.

Berebak enggau nya, Dr Sim ngelalau semua rayat terus ngerapitka penyerakup sereta meri sukung ngagai polisi perintah ngambika agenda pemansang ulih diteruska enggau nadai utai ngachau.

“Pengawa Sarawak jemah ila bepanggai ba penyerakup semua kitai dikena nentuka nengeri tu terus maju, kuat sereta inklusif,” ku iya. -RBI

KUCHING, 19 April – Sarawak udah nengah fasa transformasyen ke chukup beguna kenyau ari berapa taun ke udah, tu nyengkaum ubah politik ba taun 2018, tang mengkang tegap di baruh iring Gempung Parti Sarawak (GPS) enggau Premier Sarawak Datuk Patinggi Tan Sri Abang Johari Tun Openg.

“Kitai enda agi tinggal baka ke dulu suba. Kitai diatu ba jalai pemansang ke tegap agi,” ku Sapit Premier Sarawak, Datuk Amar Profesor Dr Sim Kui Hian lebuh bejaku ba Konvensyen GPS 2026 di Pusat Konvensyen Borneo Kuching (BCCK), sehari tu tadi.

Terang iya, Sarawak enda agi tinggal baka ke dulu suba, tang diatu udah nengah jalai pemansang ti lebih tegap asil ari penegap politik enggau penerus polisi di baruh GPS.

Dr Sim ke mega Presiden Parti Sa’ati Rayat Sarawak (SUPP) madah, ubah besai tu asil ari pengawa perintah nengeri ti konsisten sereta fokus dalam nentuka Sarawak terus nyingkang ke mua enggau chara ti betukuh.

“Lima taun ti deka datai amat berat dalam pengawa kitai nempa Sarawak nyadi nengeri maju, ukai semina ari segi pemansang fizikal tang mega pemansang komprehensif nyengkaum pelajar, ekonomi enggau pengerai.

“Ari segi pengerai, iya madah pengawa terus disungkak nyengkaum pemansang Palan Perubat Riman Sarawak ti dikearapka nyadi antara palan berubat ti patut ditapatka di rantau tu.

Ba awak sama mega, Sepital Besai Sarawak (HUS) mega terus ditegapka agi nyadi palan klinikal enggau pemansik.

Kelimpah ari nya, Dr Sim ngemeratka pemansang infrastruktur baka jalai alun, bekal ai beresi enggau kuasa karan terus nyadi pekara dikenuluka perintah nengeri dalam nyukung penumbuh ekonomi enggau ningkatka tikas pengidup rayat.

Ku iya, cara pemansand di Sarawak dipejalaika secara inklusif, nyengkaum semua bansa enggau jalai pengarap, nyengkaum sukung ngagai sekula Cina sereta bantu ngagai rumah sembiang enggau komuniti menua pesisir.

Tambah iya, penyerakup rayat nyadi pekara ti chukup beguna ti ngenegapka penguat politik, lalu ulih narit pemeranakka puku ari luar masuk ngagai Sarawak.

Bepelasarka Pelin Pemansang Pengudah COVID-19 2030 (PCDS 2030), Sarawak nagit nyadi nengeri bepenatai pemisi tinggi ba taun 2030.

Berebak enggau nya, Dr Sim ngelalau semua rayat terus ngerapitka penyerakup sereta meri sukung ngagai polisi perintah ngambika agenda pemansang ulih diteruska enggau nadai utai ngachau.

“Pengawa Sarawak jemah ila bepanggai ba penyerakup semua kitai dikena nentuka nengeri tu terus maju, kuat sereta inklusif,” ku iya. -RBI

KUCHING, 19 April — Gempung Parti Sarawak (GPS) ngembuan pelin pemansang timpuh panjai ke terang nengah Strategi Pemansang Pengudah COVID-19 2030 (PCDS 2030) enggau tagit ke bestruktur.

Ku Sapit Premier Sarawak Datuk Amar Douglas Uggah Embas, ke pemadu beguna ku iya nya chara nadai orang ditinggalka enda ngira bansa tauka jalai pengarap, laban ketuai kitai nyadi ketuai ungkup semua,” ku iya.

Ngelansa pasal kuing nengeri tu jemah ila, Uggah madahka pemansang Sarawak ukai semina fizikal aja, tang mega mungkur maruah enggau hak rayat.

“Kitai patut ngetanka maruah enggau hak kitai.GPS nyadi kuta ngetanka kedaulatan Sarawak seraya meransang pemansang ti komprehensif.

“Enggau sukung tegap ari rayat, Sarawak ukai semina deka terus maju, tang mega ulih nyadi model pemujur di Malaysia ti ngatika diri, kompetitif sereta beserakup,” ku iya.

Uggah madah munyi nya beserimbai enggau ba Konvensyen GPS 2026 di Palan Konvensyen Borneo Kuching, sehari tu tadi.

Tandu Uggah, semina GPS aja ke ulih nyamin kuing Sarawak jemah ila enggau nadai bepanggai ba piak luar.

Iya nyemetak madahka GPS nyadi gempung parti lokal seruran ngemeratka pemerat rayat Sarawak ba selampur, mungkur kandang mengeri nyentuk ke dalam menua.

Nitih ku iya, GPS meretika penuh pemar rayat nyengkaum isu jalai menua pesisir, bekal ai enggau kuasa karan, pelajar enggau peluang ekonomi.

“Pemutus ke digaga nya semak agi enggau realiti rayat sereta enda dikachau kuasa luar. Semina GPS aja ngembuan rikod, ketuai, visyen enggau pemerani mai Sarawak ngagai tikas ke tinggi agi,” ku iya.

Uggah mega muji pengawa Premier Sarawak, Datuk Patinggi Tan Sri Abang Johari Tun Openg ke dikumbai orang ke bekaliber tinggi sereta nadai banding di Malaysia.

Ke bendar, rayat Sabah mega udah mantaika pengingin ati sida ke Abang Johari nyadi Kepala Menteri sida, ngenang pasal pemansang ke nyadi diatu ba Sabah.

“Nya meh pengering kami laban ketuai ke berani, pintar, bisi visyen sereta lurus ngagai semua,” ku iya.

Berebak enggau nya, iya nyemetak madahka GPS deka terus ngetanka hak Sarawak ari baruh Sempekat Malaysia 1963 (MA63) ngambika ulih dipulaika penuh dalam timpuh ke semak.

Kenu ku iya, GPS mega udah mujur ngetanka pengelantang entara bansa enggau jalai pengarap, lalu enggau nya nempa Sarawak nyadi model penyerakup di Malaysia. – RBI

PAKAN, 19 April – Pengerami Makai Lemai beserimbai enggau Mantar Gawai kediatur Gerempung Raban Pakan (GRP) diinsur ngagai 16 Mei 2026.

Chairman gerempung tu, Jerenang Jawa madahka, pengawa nginsur haribulan pengerami udah dikerandau dalam aum komiti ngintu pengerami kemari.

“Ba perambu asal kitai ngaga pengerami tu 9 Mei tang laban pengawa ke enda ulih diseliahka, haribulan diinsur ngagai 16 Mei 2026 kena Hari Enam.

“Pia mega, pejalai program nadai berubah lalu sapa deka meli mija tau buking diatu ngagai komiti ti udah dipaduka,” ku iya ba siti penerang.

Tampung Jerenang, rega mija mengkang ba RM600 ungkup sebuah lalu tau buking ngagai iya empu ba lumur +60 14-371 3875, Johny Banyang +60 13-894 4828, Jetif Sikos +60 19-827 7587, Thomas Jain +60 13-806 8408 enggau Stephen Fong Kok Fah +60 19-838 1631.

“Penatai semua ba pengerami tu nyadika pengeransing kami dalam mantu komuniti di Pakan ba selampur pengawa.

“Semua belanja ari pengerami endang dikena GRP mantu komuniti di Pakan ti beguna bantu lalu nya endang nyadi pekara dikemaratka GRP ungkup pengelantang komuniti,” tandu Jerenang.

Ungkup penerang, GRP antara gerempung ukai dikuasa perintah (NGO) ditumbuhka ba taun 2016 lalu serura chakah datai ke mua mantu komuniti.

Bepelasarka semengat beserakup nuju pemansang, GRP deka terus ngerembaika kaul dalam komuniti di Pakan ba mayuh bengkas aspek. -RBI

BAU, 19 April – Sepenyampau 13 iku lelaki ditan ungkup peresa keterubah ai kemi dalam Op Nagang Jenayah Begulai ti dipejalaika Polis Diraja Malaysia (PDRM) Bau.

Asil peresa tetemuka dua ari sida nya positif dadah lalu ditan ari baruh Seksyen 15(1)(a) Akta Dadah Berbahaya 1952, lalu tujuh saman dikeluar ketegal penyalah trafik.

Operasyen nya dipejalaika tim pemesai enggau kaban Indu Opis Polis Pelilih (IPD) Bau nya berengkah ari pukul 10.00 malam, 18 April nyentuk pukul 3.00 pagi, 19 April 2026 ngelingi pelilih menua Bau.

Sepemanjai operasyen nya dipejalaika, sepenyampau 81 buah entukar bemacham bansa diperesa ti ngaul 104 iku individu.

Operasyen begulai tu deka terus dipejalai ari setiap maya dikena nentuka pengelantang mensia mayuh enggau pengelantang komuniti seruran dijaga. -RBI

MUKAH, 19 April – Penatai Kaban Kunsil Nengeri (ADUN) Tellian, Royston Valentine, ngerichaka agi pengerami Bazar Malam UiTM Siri 8 lebuh iya ngabas bansal bejual sereta bejalaika sesi nyabut tikit benasit kena Hari Lima tu tadi.

Penatai iya ngayanka sukung iya ti terus ngatur program komuniti ti meri empas positif ngagai pemansang ekonomi kandang menua.

Program ke diatur ba Takan Beramih, Universiti Teknologi MARA Pampang Sarawak, Kampus Mukah, diatur kena 17 ngagai 19 April 2026, lalu enggau nya ngerindang gaya kampus enggau penatai bala nembiak sereta komuniti menua nya.

Berambaika leka jaku “Riuh Raya Street Fiesta Series 8”, pengawa sekali tu bisi mantaika mayuh macham aktiviti ti narit ati ti ukai semina ngerichahka pengerami Hari Raya Aidilfitri, tang mega ngerapitka kaul komuniti dalam gaya ti lantang.

Program tu mega nyadi pelasar ngagai orang dagang mit enggau nembiak ngelakuka produk sida empu, lalu enggau nya nerenakka budaya dagang ba raban nembiak rebak baru.

Sepemanjai bazar tu, bala temuai dipandangka enggau mayuh macham pemakai ke tebilang sereta tradisional, ai irup ke ngelantangka ati sereta bejualka gari raya ke engkeman enggau pengerindu kemaya hari tu.

Kelimpah ari nya, bemacham aktiviti kebukai mega diatur dikena nambahka pengagit ati, lalu enggau nya nyadika program tu siti ari pematak batang ba kampus sepemanjai musin pengerami tu. -RBI

MANCHESTER, 19 April – Gol ari Matheus Cunha chukup meri tiga puin ti berega ngagai Manchester United sepengudah ngalahka Chelsea 1-0 ba Liga Premier England (EPL) di Stamford Bridge tumu pagi tadi.

Gol penyerang antarabansa Brazil nya datai ba minit ke-43 pengudah pasing ke chukup manah ari Bruno Fernandes, lalu enggau nya nyadi penempa bida dalam main ke meda tim tuai rumah nguasa main tang enda mujur nguna peluang ba mua gol.

Chelsea ke dilatih Liam Rosenior, kebendar iya bisi beberapa peluang ke pemadu manah, tang sipak ari Liam Delap enggau Wesley Fofana semina ngasuh palang enggau tiang gol begetar.

Ke bukai, penyikar penyaga gol United, Senne Lammens, nentuka gol tim United mengkang enda lantang nyentuk ke wisel kepenudi.

Ari pemujur nya, ngenegapka penuduk tim dilatih Michael Carrick ba renggat atas liga, lalu enggau nya meri peluang besai dalam ngentaska penuduk ba Liga Champions UEFA musin ti deka datai lalu pemenang ‘malam tadi pemenang dua kali’ ngelaban Chelsea musin tu.

Tang pengalah keempat beturut-turut majak meri pengerugi ngagai Chelsea, enggau ati ti asa sereta sukung tusah ati terang didinga ari bala peminat Chelsea lebuh wisel kepenudi disepu. -RBI

KUCHING, 18 April – Gol dipasukka Petrus Shitembi ba minit ke 30, udah meri Kuching City masuk ngagai renggat final Piala Malaysia menerusi agregat 2-1 ba main kediatur di Stadium Nengeri tadi.

Enggau pemenang tu, Kuching City nempa sejarah ti chukup dikenang kelebih agi kelab tu berengkah ari liga baruh nyentukka datai ba tikas ke tinggi.

Udah tu ila, Kuching City deka betapi enggau Johor Darul Takzim. -RBI

KUCHING, 18 April – Sapit Menteri ba Opis Premier Sarawak, Datuk Abdullah Saidol nyemetak madahka perintah Sarawak ari baruh iring Datuk Patinggi Tan Sri Dr Abang Johari bin Tun Abang Openg nadai kala bisi niat tauka ngambi singkang masuk champur dalam pekara politik tauka pentadbiran nengeri bukai di Malaysia.

Ku iya, pentadbiran ke diatu fokus penuh ngagai pemansang Sarawak, nyengkaum aspek infrastruktur, penumbuh ekonomi enggau pengelantang rayat nengah polisi ke terang sereta bejalaika pengawa enggau betul.

Iya nibarka jaku munyi tu bekaul jaku ti majak viral ba media rama, ti madahka Gerempung Parti Sarawak (GPS) berunding deka bediri minta pilih di Sabah ba pengawa bepilih besai menua ti deka datai, nya berita pelesu sereta ditempa enggau ati ti enda lurus.

“Aku nyemetak madahka nadai sebarang penerang sekalika terus tauka enda kala dipansutka Chairman GPS ke mega Premier Sarawak, bekaul enggau pekara nya.

“Nadai bukti Datuk Patinggi Tan Sri Abang Johari kala mansutka sebarang penerang baka nya.

“Pekara ti dipansutka ba media rama nya terang bendar sebengkah chara petenah politik ti pabu sereta dikena ngenataika saru penemu enggau ngeruga pengelantang entara rayat Sabah enggau Sarawak,” ku iya.

Nitih ku iya, tuduh pelesu ke dikerembai ba platform baka TikTok enggau Facebook nuduh GPS dipelabaka merambu deka ngerembaika pengawa politik ngagai Sabah bediri minta pilih ba penuduk parlimen, enggau tuju ngenegapka sada nyawa blok Borneo.

Abdullah mega nerangka rambai jaku ‘Sarawak First’ ukai semina ngetanka hak nengeri tu aja, tang mega mandangka komitmen perintah nengeri dalam ngemansangka Sarawak nengah ekosistem ekonomi moden, infrastruktur ke manah sereta pengelantang rayat.

Ku iya nambah, perintah Sarawak seruran tebuka ngagai kerejasama ti tegap enggau sebarang nengeri ungkup pemaik pemansang menua enggau pengelantang rayat.

“Sentimen negatif tauka jaku ti enda betul ba politik tau ngasuh penyarut ti enda meri penguntung, tang ulih ngelemika sereta ngachau pengawa bejalaika agenda pemansang ba renggat nengeri enggau menua,” ku iya.

Abdullah Saidol mega nerangka dalam gaya ekonomi dunya ti enda tentu berindik ari penyarut di Timur Tengah, Premier Sarawak bedau lama tu tadi madahka bantu belanja tambah ngagai peranak Sarawak ti kena pangka ketegal ungkus pengidup niki. -RBI

SPAOH, 18 April — Siku lelaki napi pengirau ati lebuh iya tetemuka siku ular sawa ba dapur iya lebuh nyendiaka pemakai ke deka dijual, tumu pagi kena Hari Empat.

Kes nya nyadi urung pukul 4 pagi di Kampung Baru Spaoh, lebuh orang ke ngaga sebana nya beratika penatai ular nya sebedau terus ngaga kaul enggau Palan Kawalan Operasi Pelilih Menua (PKOD) Raban Penyaga Orang Periman Malaysia (APM) Spaoh minta bantu.

Nitihka penerang ari APM Spaoh, tiga iku kaban Tim Alpha udah dianjung ngagai endur nya lebuh nerima kangau ngenyit, mai perengka khas dikena nangkap ular.

“Lebuh datai ba endur nya, bala raban APM bejalaika pengawa meresa kandang endur ke udah dikelala sebedau tetemuka siku ular sawa belalai ba baruh dapur,” ku penerang nya.

Ular ke ngembuan pemanjai urung lima kaki nya dipelabaka udah nelan siku chit, bepelasarka gaya tubuh iya.

Reptilia nya mujur ditangkap ngena chara nyepit sebedau diengkah dalam kutak khas ungkup jelu bisa ngambika atur nangkan ke udah nya ulih dipejalaika enggau silik agi.

Operasyen nya tembu enggau nadai sebarang penusah ke enda manah nyadi, lalu semua raban diripotka selamat sereta dipulaika ngagai PKOD dalam gaya ke manah.

Berindik enggau nya, mensia mayuh dilalau seruran bejaga sereta lengkas betelefon ngagai lumur penusah ngenyit 999 tauka PKOD ke besemak nyema betapi enggau gaya penusah ngenyit ti ngaul ukui siga. — RBI

MIRI, 18 April — Penyikar enggau pengelengkas tim Balai Bomba enggau Penyah Penusah (BBP) Lutong mujur ngerara penusah babas angus ke nyadi ba kandang Padang Golf Pulau Melayu, lemai tu tadi.

Nitihka penerang rasmi ari Opis Bomba enggau Penyah Penusah Malaysia (JBPM) Zon 6 Sarawak, sida nerima kangau ngenyit urung pukul 3.19 lemai.

Sebuah injin Fire Rescue Tender (FRT) Scania terus dianjung ngagai endur nya lalu datai urung pukul 3.27 lemai.

Komander Operasyen ngeripotka penusah angus nya ngaul kandang endur babas enggau pemesai dipelabaka urung 0.081 ekar.

Operasyen madamka api berengkah urung pukul 3.28 lemai ngena arus hos sepemanjai 200 kaki enggau jet ai ari pam injin nyentukka api abis padam.

Operasyen nya mujur tembu urung pukul 3.50 lemai enggau nadai bakal tauka bebadi nyawa.

Tim nya udah nya ninggalka palan nya urung pukul 3.51 lemai lalu selamat datai ba stesyen urung pukul 4.00 lemai.

Operasyen nya betuaika Pemesai Bomba Kanan I (PBK I) Iskandar enggau tiga iku raban, enggau penyampau pengering siku pemesai.

JBPM ngelalau mensia mayuh ngambika seruran bejejaga sereta nyeliahka diri ari aktiviti betunu chara tebuka, kelebih agi ba gaya hari ti angat sereta kemarau ti tau nambahka risiko penusah angus. — RBI