Miri, 23 April – Sebuah rumah ukai tetap udah angus ba Jalai Sealine 2, Kampung Sealine, Lutong malam tadi.
Taja pia, semua enam iku orang ke nguan rumah nya diripotka selamat enggau nadai sebarang bakal.
Balai Bomba enggau Penyah Penusah (BBP) Lutong nerima kangau ngenyit urung pukul 7.48 malam sebedau raban bomba datai ba endur nya urung pukul 7.53 malam, enggau penyauh pejalai urung 5 kilometer.
Komander Operasyen, PBT II Henry anak Jugah, madahka lebuh datai ba endur nya, raban bomba meda api benung mau ti udah nganguska urung 100 peratus struktur rumah ke ngembuan pemesai urung 15×10 kaki.
“Operasyen madamka api tekala nya dipejalaika ngena arus 200 kaki enggau pam ai ari pun penatai tebuka dikena nyaga sereta madamka api.
“Penusah angus nya mujur dijaga enggau penuh sebedau operasyen tembu urung pukul 8.40 malam,” ku Henry ke mega ketuai BBP Lutong.
Entara jentera ke bisi enggau iya nya sebuah FRT enggau empat buah entukar pikap enggau pengering tujuh iku raban bomba.
Sama bisi ba endur nya empat iku raban Polis Diraja Malaysia (PDRM) mantu nyaga ba palan penusah nya.
Orang ke bisi kaul iya nya dua iku lelaki ke besai tuai, dua iku indu besai tuai enggau dua iku nembiak mit (siku lelaki enggau siku indu). Semua sida diripotka selamat magang.
“Kebuah penusah nyadi agi benung dipansik piak bekuasa,” tampung Henry.
Operasyen nya tembu penuh lalu bomba mulaika diri ngagai stesyen pukul 8.58 malam. -RBI
