BINTULU, 23 April — Sepital Bintulu ngemeratka selampur kandang sepital nyadi zon enda tau nginsap lalu pengawa neritka atur nya majak ditegapka ari sesiti maya ngagai sesiti maya.

Nengah penerang ba laman Facebook rasmi, sepital nya madahka tagang nya dipejalaika nitihka Akta Kawalan Produk Merokok ungkup Pengerai Mensia Mayuh 2024 (Akta 852), enggau pengawa matau sereta neritka atur dipejalaika ari sesiti maya ngagai sesiti maya ulih Opis Pengerai Bagi Menua (PKB) Bintulu ba semua kandang endur ke digazet.

Nitihka penerang, barang sapa individu ke ditemu nginsap ba kandang endur ke ditagang ulih dikompaun tekala nya, enggau ukum maksimum nyentuk RM5,000 enti dikenuku salah.

“Kemari, beberapa iku individu ke benung nginsap ba kandang sepital nya dikompaun PKB laban ngelanggar atur ke udah ditetapka,” ku penerang nya.

Berindik enggau nya, piak sepital minta kerejasama ari semua penguna enggau temuai ngambika seruran nitihka tagang nya dikena nentuka rampa fasiliti pengerai seruran likun, beresi sereta nadai asap insap.

Orang ti deka badu nginsap mega diperansang ngiga servis sukung nengah program ti disediaka Opis Menteri Pengerai Malaysia, nyengkaum nengah laman web rasmi JomQuit tauka ngelawa klinik pengerai enggau sepital besemak.

“Sama-sama kitai nentuka fasiliti pengerai nadai asap insap enggau produk nginsap,” ku penerang nya nerang. — RBI

PAKAN, 23 April – Tajapan ukai pelilih menua ke besai, tang Pakan ngembuan potensial ke besai mansang enti semua bengkah piak beserakup sereta sepenemu.

Kaban Kunsil Nengeri (ADUN) Pakan, Tan Sri William Mawan Ikom madah, pemujur mega meseti disempulang enggau pengeransing sereta sukung ari komuniti menua tu empu.

“Kitai ukai semina ngelanggur, tang kitai meseti ngaga pemansang seriris enggau juluk kitai ungkup pengidup rayat jemah ila.

“Reti iya, pekara pugu ukai semina ngelanggur tang ngambika inisiatif pemansang amat dipejalaika ungkup pengelantang rayat,” ku iya madah.

Mawan ke mega Penyanding Penemu ba Opis Premier Sarawak ( Industri Pemakai, Komoditi enggau Pemansang Menua), mansutka jaku tu pengudah bejadika Program Ngenegapka Ketuai Komuniti enggau Ketuai Raban Bansa (KMKK) Pelilih Menua Pakan kemari.

“Juluk kitai deka nyadika Pakan nyadi pelilih menua chunto terus ditegapka ngagai pengawa ngatur pemansang ti lebih meruan agi,” ku iya.

Mawan mega madahka, penyerakup enggau kaul ari komuniti nyadi pekara besai ke chukup beguna ambika semua langgur pemansang ari perintah ulih mujur digaga di Pakan.

Ku iya, rayat meseti meretika sida iya bukai semina nerima, tang mega bela bejalaika tangkup pengawa seriris enggau langgur pemansang ke udah ditempa perintah.

“Enti komuniti kitai enda nemu tauka enda beratika polisi perintah, kitai enda ulih ngau ngambi bagi ba selampur iya,” ku Mawan. – RBI

KUCHING, 23 April – Dua iku individu peranak menua tu udah ditan nengah pengawa datai ngenyit raban polis pengudah seduai dipechaya bejalaika pengawa nyadi tukang mungkus enggau nyual dadah dalam sindiket ti ngena sebuah rumah temuai di Santubong nyadi palan operasyen sida.

Komisioner Polis Sarawak Datuk Mohamad Zainal Abdullah madah, operasyen nya kena 7 April 2026 dipejalaika Opis Tasat Jenayah Narkotik (JSJN) Bukit Aman enggau kerejasama JSJN Kontinjen Sarawak.

Nitihku iya, pengawa nyerungkai begulai nya tetemuka aktiviti sindiket ti ngena sebuah rumah temuai nyadi palan mungkus sebedau utai nya disadung ngagai sekeda kandang endur ngelingi Kuching.

“Dalam operasyen nya, polis mujur nangkap siku lelaki beumur 41 taun enggau siku indu beumur 31 taun ke dipelabaka bisi kaul terus enggau raban sindiket,” ku iya ba aum pengarang berita di Indu Opis Polis Sarawak, sehari tu tadi.

Polis mega bisi ngerampas bemacham bansa dadah nyengkaum MDMA, ketamin, pil Erimin 5, pil ekstasi enggau syabu enggau penyampau semua lebih 108 kilogram, dipelabaka berega lebih RM16 juta.

Pengawa ngerampas nya dipelabaka ulih nampung urung 17,000 iku penguna, lalu enggau nya ngayanka skala besai operasyen sindiket nya.

Nerang enggau silik agi, iya madahka sindiket nya beoperasyen enggau chara teratur ngena aplikasyen WhatsApp nyadi pelasar komunikasyen enggau atur ngagih dikena nyeliahka ari ditemu piak bekuasa.

“Kedua-dua saspek dipelabaka nerima bayar urung RM3,000 sebulan enggau komisyen RM5 ungkup tetiap bungkus dadah ke diproses,” ku iya.

Ku iya nambah, pansik keterubah tetemuka bekal dadah nya diulih ari pelasar bukai ngelingi mengeri Kuching lalu sindiket nya dipelaba aktif kenyau ari pun bulan April tu tadi.

Pengawa meresa rikod mega tetemuka saspek indu nya ngembuan sekeda rikod jenayah bekaul enggau dadah sereta penyalah bukai, tang kededua nya ditemu negatif ba peresa nisih ai kemi lebuh ditan.

Ba operasyen ke sama, polis mega ngerampas sebuah entukar ke berega urung RM15,000 enggau mata duit RM1,856 ari baruh Akta Dadah Berbahaya (Perampas Harta) 1988.

Kedua-dua saspek didawa ba Kort Majistret Kuching kena 20 April 2026 ari baruh Akta Dadah Berbahaya 1952 nyengkaum Seksyen 39B.

“Sida diatu benung ditan ba Rumah Jil Puncak Borneo nganti kes nya disebut kena 25 Mei 2026,” ku iya.

Berebak enggau nya, piak polis agi neruska pansik dikena nyidi sekeda individu bukai ke dipelabaka bisi kaul enggau rangkaian sindiket ke sama. -RBI

MIRI, 23 April – Kaban Kunsil Nengeri (ADUN) Mulu, Datuk Gerawat Gala, bejalaika penemuai kereja rasmi ngagai Long Kerong sehari tu begulai enggau Opis Parit enggau Entali Ai (JPS) sereta Kaunsil Pengintu Kampung (SFC) dikena beratika baru pengawa bejalaika projek pemansang enggau utai atur ke diguna peranak ba kandang menua pesisir.

Kenu ku iya, penemuai tu chukup besai reti laban nya penemuai rasmi keterubah iya ngagai Long Kerong, kelimpah dipadahka Ketuai Genturung Pendiau, Douglas Tirong, iya nya pengari rayat keterubah nemuai rasmi ngagai kandang menua nya.

“Penemuai tu ukai semina ngemenuhka peminta pengawa aja, tang mandangka komitmen perintah ti terus nentuka nadai kandang menua entigis tinggal ari arus pemansang,” ku iya.

Iya mantaika asai ati diri teperansang sereta dipebasa meda enggau mata diri empu penyulut ke udah diasai peranak Long Kerong.

Tu nyengkaum nyendiaka bekal kuasa karan, perengka guna telekomunikasyen enggau sistem bekal ai graviti ti dipejalaika nengah inisiatif SFC.

Ku iya, pemujur nya ngayanka enggau komitmen politik ti tegap, pemansang ulih dipejalaika enggau komprehensif enda ngira endur geografi sesebengkah kandang menua.

Rambau penemuai nya, iya mega bisi ngabas projek tebing gabion ti dipejalaika JPS nyadi atur dikena mutarka penanggul tebing sungai tusur ti bisi potensial ngeruga pengelikun peranak sereta ngeruga reta tengkira.

“Aku ngenataika pengaga ati ke pemadu tinggi ngagai JPS ketegal komitmen bejalaika projek tu ke pengelantang enggau pengelikun peranak Long Kerong,” ku iya.

Berebak enggau nya, iya mega ngenataika pengaga ati ngagai SFC ti udah ngaga dua buah jematan gantung ti nyadi perengka guna ti beguna dalam ngemudahka pemindah peranak rumah panjai ninting hari.

Ngenang silik agi, iya nyemetak madahka perintah Sarawak ari baruh iring Premier Sarawak tetap komited nentuka pemansang inklusif ulih diasaika semua rayat enda ngira dini endur, setipak enggau polisi Gempung Parti Sarawak (GPS).

“Chara perintah tu terang, ari mengeri ngagai kandang menua ulu, tetiap rayat bisi hak ngasaika buah penyulut nengeri tu.

“Bemacham projek baka jalai alun, bekal kuasa karan, telekomunikasyen, ai beresi, pelajar enggau pengerai udah dipejalaika, kelebih agi ba kandang menua Ulu Baram,” ku iya.

Iya mega ngenang pasal aum lebih 40 Ketuai Komuniti enggau Ketuai Raban Bansa (KMKK) komuniti Penan enggau Premier Sarawak taun nyin kemari, ti mantaika sukung ngagai agenda pemansang nengeri sereta komitmen bekerejasama enggau perintah dalam ngemansangka kandang menua sida.

Kenu ku iya, penetap tu mandangka penuai runding komuniti dalam pemereti ati ke alai pemansang ti meruan semina ulih dijapai nengah kerejasama rat enggau perintah ti bisi tanggungpengawa, ukai nengah ‘retorik’ ari orang luar ti enda meretika realiti pengidup di menua ulu.

Lebuh nyimpul jaku iya, Gerawat meri jamin deka terus mai sada nyawa rayat Long Kerong ngagai renggat ke pemadu tinggi sereta nentuka tetiap guna ke bedau ditangkup deka terus diangkat.

“Long Kerong ngembuan potensial ke besai ngambika terus mansang. Nengah penyerakup komuniti, ketuai renggat baruh ke tegap sereta sukung perintah ke entap, aku andal sitak tu deka terus mansang sereta ngasaika penyulut ke enda ngetu,” ku iya. – RBI

KUCHING, 23 April — Sarawak sekali agi ngenegapka penuduk iya nyadi palan keterubah endur ngatur aum besai empas tinggi lebuh iya dipilih nyadi tuai rumah Aum Wilayah Asia Pasifik Ke-11 2028 Gerempung Antarabansa Ngelaban Penyakit Tibi enggau Penyakit Lempuang (APRC berengkah ari 23 nyentukka 26 Mac 2028 di Kuching.

Sapit Premier Sarawak ke mega Menteri Pengerai Mensia Mayuh, Pengawa Berumah enggau Perintah Lokal, Datuk Amar Dr Sim Kui Hian ngenataika pengaga ati ke pemadu besai ngagai Gerempung Nagang Penyakit Tibi Malaysia begulai enggau kaban kerejasama iya nya Opis Pengerai Nengeri Sarawak, Gerempung Tuberkulosis Malaysia Sarawak enggau Universiti Malaysia Sarawak (UNIMAS) laban udah mujur sereta menang ba aum minta ngatur program ke besai ti beprestij nya.

Nitihku iya, APRC 2028 dipelabaka ulih matak lebih 1,000 iku pengari ari selampur pelilih menua Asia Pasifik datai ke Kuching, meri anggar empas ekonomi USD8.2 juta ngagai Sarawak.

“Tu ukai semina keterubah iya aum besai tu diatur di Pulau Borneo, tang mega kedua kali di Malaysia pengudah Kuala Lumpur dalam taun 2007.

“Ke manah agi, iya muka ruang ngagai Sarawak ngenegapka kerejasama serantau, meransang inovasyen enggau besilih penemu dalam pengawa ngenyampatka chara mutarka penanggul berat bekaul enggau penyakit ti bekaul,” ku iya.

Ku iya nambah, haribulan aum besai nya ke nyadi urung 24 Mac mega besai reti laban beserimbai enggau pengawa ngintu Hari Tibi Sedunya ninting taun.

Berebak enggau nya, Dr Sim nyemetak madahka penyakit tibi (TB) mengkang nyadi siti ari pemar pengerai mensia mayuh ke pemadu mayuh di dunya, kelebih agi enggau penambah kes pemar ubat, laun diagnosis, isu nitihka chara berubat, “stigma” ke enda ngetu sereta akses ke enda sebaka ngagai servis pengerai.

“Penyakit TB ti nyadi di Johor dalam bulan Februari 2026 ti mungkur empat rebak ari sebuah ruang bilik nyadi pengingat ti nyata kitai patut seruran bejaga,” ku iya.

Ngelansa pasal gaya di Sarawak, iya madahka nengeri tu diatu ba penuduk tiga pemadu atas ba kes TB di Malaysia enggau dipelabaka 2,800 ngagai 3,000 kes setaun ungkup timpuh 2021 ngagai 2025.

Urung 95 peratus kes ngaul peranak menua tu, ti nunjukka tating penyakit nya tebal agi ditapi komuniti menua tu.

Nitih ku iya, entara batang pekara ti meri pangka ngagai penyampau nya nyengkaum palan pengentap pendiau menua pesisir enggau dalam menua ti jauh ari perengka guna pengerai baka lutur, makmal enggau servis X-ray, ruang bilik mayuh rebak ti sekut sereta faktor sosio-ekonomi kelebih agi ba raban orang seranta di mengeri, ti ngujungka laun ngiga perubat.

Taja pia, Sarawak udah ngerikodka tikas pemujur berubat lebih 90 peratus enggau tikas pemati TB ti majak nurun, asil ari pengawa nagang ti konsisten sereta efektif.

“Pengawa ngatur APRC 2028 mega ngayanka nama Sarawak ti majak nambah nyadi palan ti dikerinduka ungkup pengawa dagang ti meri empas tinggi di Malaysia enggau Borneo, enggau urung 70 peratus aum besai ke baru diatur fokus ngagai sektor perubat,” ku iya nambah. -RBI

DEBAK, 22 April — Palan Servis Parlimen P.204 Betong begulai enggau ejensi ti bejalaika pengawa bejalaika pengawa meresa palan enggau tuju ngeluarka Setipikit Tembu Praktikal (CPC) ungkup Projek Ngaga Baru Jalai Penyambung Menua Pesisir (JPD) di Rumah Isa Anak Laman, Babu Kara, pagi tadi.

Penemuai tu ngembuan tuju deka beratika tikas penyedia projek sebedau nyerahka enggau rasmi, kelimpah ari nentuka semua pengawa ngaga udah dipejalaika nitihka spesifikasyen teknikal ti udah ditetapka sereta nitihka standard kualiti enggau pengelikun ti udah dilangkar.

Pengawa meresa ke dipejalaika nya mungkur aspek struktur fizikal jalai alun, sistem parit, pengelikun penguna enggau pemanah fungsyen jalai nya dalam nyukung guna mobiliti ninting hari peranak menua nya.

Pengawa bejalaika projek JPD tu dikearapka ulih mai empas ke besai ngagai komuniti menua pesisir, kelebih agi dalam ngangkatka akses komunikasyen, ngemudahka pengawa ninting hari sereta meransang aktiviti ekonomi kandang menua.

Inisiatif tu mega setipak enggau pengawa perintah ti seruran dipejalaika dikena ngenegapka pemansang infrastruktur menua pesisir nengah chara ti inklusif sereta meruan.

Kaban Parlimen Betong, Dato Dr Richard Rapu, dalam penerang iya mantaika pengarap ngambika perengka guna ke disedia ulih dikena penuh peranak menua nya, lalu enggau nya meri pangka ngagai pengawa ngangkatka tikas pengidup enggau pengelantang komuniti dalam timpuh ke panjai. — RBI

DEBAK, 22 April — Penemuai nyerahka palan ungkup Projek Transformasyen Menua Pesisir (RTP) ungkup kereja ngangkatmanah struktur atap Dewan SMK Saribas udah dipejalaika enggau lanchar sehari tu.

Penemuai nya digulu pemesai ari Palan Servis Rayat Parlimen P204 Betong begulai enggau ejensi ti bejalaika pengawa sereta kunteriktor ti udah dipaduka.

Penatai semua raban dikena nentuka proses nyerahka palan nya bejalai nitihka prosedur ti udah ditetapka sereta nitihka spesifikasyen teknikal ti udah dilangkar.

Nitihka penerang ari Kaban Parlimen Betong Dato Dr Richard Rapu, projek ngangkatmanah tu dikearapka ulih ngangkatka tikas pengelikun, pengelantang enggau fungsyen balai mayuh guna, ukai semina ungkup guna staf sekula aja tang mega ungkup pemaik komuniti menua nya ungkup bemacham program enggau aktiviti.

Iya mega nyemetak madahka inisiatif nya mandangka komitmen perintah ti terus ngenegapka pemansang infrastruktur pelajar, kelebih agi di menua pesisir, setipak enggau pengawa ngangkatka kualiti perengka guna mensia mayuh ungkup pengelantang rayat.

“Komitmen ti terus deka terus diberi dikena nentuka tetiap projek ti dipejalaika amat meri empas positif ngagai rayat,” ku iya nengah sebengkah penerang sehari tu.

Berindik enggau nya, pengawa matau enggau silik deka terus dipejalaika dikena nentuka projek tu ulih tembu nitihka timpuh ke udah ditetapka sereta nyapai standard kualiti ke dikearapka. — RBI

KUCHING, 22 April – Opis Kereja Raya (JKR) Sarawak sehari tu nyain Sempekat Pemereti Ati (MoU) enggau Universiti Teknologi Swinburne Kampus Sarawak dikena ngenegapka kerejasama strategik dalam bidang pansik, pemansang penau enggau pengawa ngenataika infrastruktur di Sarawak.

MoU pengelama lima taun nya disain Ir. Profesor Lau Hieng Ho, Pro Mandal Canselor enggau Ketuai Pemesai Eksekutif Swinburne Sarawak, enggau Direktor JKR Sarawak, Datu Dr. Cassidy anak Morris, ti ngarika kedua-dua ejensi nya.

Kerejasama nya ngemeratka pengawa bejalaika pansik enggau projek perintis begulai, integrasyen elemen Rampa Menua, Sosial enggau Tadbir Urus (ESG) dalam pemansang infrastruktur, kelimpah ari peluang industri enggau penerang profesional ungkup nembiak.

Dr.Cassidy nyemetak madahka kerejasama tu ngayanka komitmen bekunsi ngangkatka pemanah pengawa meri servis mensia mayuh nengah inovasyen, bekunsika penemu enggau pemansang ti meruan.

Iya mega nerangka kerejasama tu nyadi singkang ti beguna dikena ngenegapka ekosistem pemansang infrastruktur ti lebih tegap sereta beguna jemah ila. -RBI

MERADONG, 22 April – Siku lelaki peranak menua tu beumur 32 taun napi ukum jil lima taun enggau dua kali sipat rotan pengudah didawa ari baruh Seksyen 39C(1) Akta Dadah Berbahaya 1952 di Kort Sesyen Sarikei, sehari tu.

Kepala Polis Pelilih Menua Meradong, DSP Tansli Mering madah, dawa nya dibai Bagi Tasat Jenayah Narkotik (BSJND) IPD Meradong kena 22 April 2026 ba mua Akim Yang Arif Puan Stella Augustine Druce.

Nitihku iya, orang ke dituduh dibai ngagai kort pengudah ditemu bisi dua rikod ke udah bekaul enggau penyalah dadah ari baruh Seksyen 15(1)(a) akta ke sama.

“Kort mega netapka pengawa matau dua taun ngagai orang ke dituduh kelimpah ari ukum jil enggau sipat rutan,” ku iya.

Kes nya dipejalaika Sapit Pendawa Raya Sarikei, Aiman ​​Zarith bin Zahrrullail.

Ku iya nambah, Seksyen 39C(1) Akta Dadah Berbahaya 1952 nyendiaka ukum jil enda kurang ari lima taun lalu enda lebih ari tujuh taun enggau tiga kali sipat ngena rutan enti dikenuku salah.

Berebak enggau nya, polis ngemeratka komitmen sida deka terus ngelaban penyalah dadah lalu nadai deka belembut ba sebarang pengawa ngelanggar undang-undang.

Mensia mayuh dilalau ngenataika penerang bekaul enggau aktiviti dadah ngagai polis kelebih agi ba pelilih Meradong nengah chara betanya ngagai Balai Polis Bintangor ba lumur 084-693222. -RBI

MERADONG, 22 April – Dua iku lelaki beumur 24 enggau 18 taun ditan polis ari Indu Opis Polis Pelilih (IPD) Meradong dalam operasyen Ops Tapis di kandang menua Bintangor, urung pukul 2.50 lemai sehari tu tadi.

Ketuai Polis Pelilih Meradong, DSP Tansli Mering madah, kedua-dua saspek ditan laban dipelabaka bisi kaul enggau aktiviti dadah sebedau dibai ngagai IPD Meradong.

Ku iya, asil peresa ai kemi ti dipejalaika ba Opis Bagi Tasat Jenayah Narkotik (BSJND) Pelilih Meradong tetemuka kedua-dua saspek positif dadah bansa amphetamine enggau methamphetamine.

Nitihku iya, pengawa meresa rikod ke udah tetemuka siku ari saspek ngembuan rikod bekaul enggau penyalah dadah, lalu siku agi nadai rikod.

Kes tu dipansik ari baruh Seksyen 15(1)(a) Akta Dadah Berbahaya 1952 ti nyendiaka ukum mata duit enda ngelui RM5,000 tauka jil nyentuk dua taun enti dikenuku salah.

Berebak enggau nya, raban polis IPD Meradong ngemeratka penyalah dadah ba genturung pendiau sereta nadai belembut ba pengawa nya, sereta ngelalau mensia mayuh meri penerang bekaul enggau aktiviti dadah di pelilih Meradong.

Penerang tau dikenataika ngaga