BAU, 10 April – Siku lelaki enggau siku indu ditan raban Bagi Tasat Jenayah Narkotik Pelilih Bau ba pengawa ngenyit ba sebuah langkau kayu di Jalai Serasot Utama B, urung pukul 8.30 malam kemari.

Ketuai Polis Pelilih Bau, P/SUPT Mohd Haide bin A. Rahman madah, kedua-dua saspek ke beumur entara 30 ngagai 33 taun dipelabaka bisi kaul enggau penyalah salah guna dadah.

“Asil peresa saspek tetemuka sida bisi ngembuan 17 bungkus plastik senayau ti ngundan leka kristal ti dipelaba syabu,” ku iya.

Nitihku iya, kededua saspek nya ditan ari baruh Seksyen 39A(1) Akta Dadah Berbahaya 1952 ketegal penyalah ngembuan dadah.

Ku iya nambah, asil peresa tisih ai kemi keterubah mega tetemuka kededua saspek positif dadah lalu mega ditan ari baruh Seksyen 15(1)(a) akta ke sama.

Berindik enggau nya, iya nyemetak madahka Polis DiRaja Malaysia (PDRM) enda belembut ba sebarang pengawa ngaul diri dalam aktiviti salah guna dadah.

Mensia mayuh ke bisi penerang bekaul enggau aktiviti dadah dipinta ngenataika penerang nya ngagai polis nengah talipaun ‘hotline’ Opis Tasat Jenayah Narkotik (JSJN) Bukit Aman. -RBI

SIBU, 10 April – Sapit Menteri Pengerai Malaysia, Dato Hajjah Hanifah Hajar Taib ngulu Pengerami Nyuaka Mesin Magnetic Resonancer Imaging (MRI) ke diatur ba Sepital Sibu.

Pengawa nyerahka pangku pengawa nya udah dipenyadika Sapit Premier Sarawak ti mega Menteri Pengerai Mensia Mayuh, Pengawa Berumah enggau Kaunsil Kandang Menua Sarawak, Datuk Amar Profesor Dr. Sik Kui Hian.

Mesin MRI nya diberi Yayasan Jantung Sarawak enggau sekeda gerempung sereta orang individu enggau penyampau semua RM9 juta.

Mesin MRI ke diterima nya teknologi pemadu baru ke ulih beratika struktur enggau guna jantung nyengkaum pejalai darah sereta isi enggau chara ke likun sereta silik.

Perengkaguna tu dikearapka ulih nyungkak pengulih Sepital Sibu meri diagnosis ti lebih betul, jampat sereta efisyen.

Nengah penambah aset beteknologi tinggi tu, kualiti nyaga pengerai ba kandang menua tengah Sarawak mega udah diangkatka manah agi, lalu enggau nya meri penguntung ke besai ngagai peranak menua nya.

Dalam jaku iya, Hanifah mantaika pengaga ati enggau terima kasih ke pemeri nya ti dikumbai sukung ti signifikan dalam ngenegapka sistem servis pengerai, kelebih agi di nengeri Sarawak. – RBI

SPAOH, 10 April — Perintah Sarawak majak ngenegapka agenda pemansang menua pesisir nengah pengawa bejalaika mayuh bengkah projek strategik ba kandang Kunsil Nengeri (DUN) Bukit Saban.

Sapit Premier Sarawak, Datuk Amar Douglas Uggah Embas madah, komitmen perintah nengeri ti seruran dipejalai nengah chara besepadu dikena nentuka pemansang inklusif sereta meri pemaik ti komprehensif ngagai komuniti lokal.

Nitihku iya, penemuai kereja ke diatur begulai enggau Kaban Parlimen Betong, Dato Dr. Richard Rapu ngaul sekeda projek besai ke diatu sereta deka dipejalaika ngelingi Spaoh enggau Tanjung Sebekut.

Entara batang pekara ti dikemerat iya nya pengawa nyerahka 32 surat pemendar projek ari baruh Program Transformasyen Menua Pesisir (RTP) ti beungkus RM5 juta ungkup DUN Bukit Saban, ti mungkur bemacham inisiatif skala mit enggau tengan pemesai nyengkaum ngemanahka infrastruktur, perengka guna mensia mayuh enggau guna komuniti ti meri empas terus ngagai rayat.

Ba sektor pengerai, iya mega diberi penerang pasal perambu ngaga Klinik Spaoh baru ti beungkus RM35 juta ti dipejalaika nengah kerejasama Opis Pengerai enggau Ejensi Pemansang Bagi Menua Betong (BDDA).

Projek nya diatu benung ba renggat tender lalu dipelaba deka berengkah enda lama agi, lalu enggau nya ulih nambahka akses ngagai servis pengerai ti bekualiti.

Kelimpah ari nya, pemansang modal mensia mega diberi perati lebuh iya ngabas begunan GiatMara Spaoh ke udah tembu sereta diperambu deka beoperasyen bulan Julai tu.

Institusyen tu deka meri kus pengelandik baka bejait enggau kuasa karan ngagai raban nembiak menua tu, setipak enggau pengawa ngadaka pengereja pengawa ke landik sereta nambahka makit raban nembiak menua pesisir.

Ba pemansang ke bukai, iya mega bisi ngabas pengawa ngangkatmanah opis BDDA di Spaoh ti disadang tembu kena bulan September taun tu, kelimpah ari matau pejalai projek pemansang di Tanjung Sebekut.

Ungkup kandang menua nya, projek nyambung bekal ai beungkus RM3 juta enggau bekal elekterik beungkus RM3.5 juta udah dikemendarka lalu nyadika penyampau semua RM6.5 juta dikena nyukung penumbuh genturung pendiau baru.

Ngenang silik agi, iya madahka pemansang kandang menua nya mega diperansang ari pengawa bejalaika projek besai Agropark Bebuling ti ngembuan pemesai 750 hektar.

Inisiatif tu disukung perengka guna infrastruktur baka Padang Penerebai enggau Penyangkai Pandak Bilun Bebuling (STOLport) enggau Palan Ngumpul, Proses enggau Mungkus (CPPC) Bebuling, ti bisi potensial muka peluang gawa sereta ngerembaika akses makit, nyengkaum nengah perengka pengangkut langit.

Iya mega mantaika potensial sektor dagang temuai nengah pengawa ngemansangka produk dagang temuai Bukit Sadok, nyengkaum pengawa ngaga Replika Kuta Rentap ti dikearapka ulih matak mayuh agi temuai ngagai kandang menua Betong.

“Semua projek tu mandangka strategi timpuh panjai perintah ngangkatka tikas pengidup rayat, ngenegapka ekonomi menua pesisir sereta nentuka pemansang meruan datai ba taun 2030,” ku iya. — RBI

PUTRAJAYA, 10 APRIL — Opis Menteri Sains, Teknologi enggau Inovasi (MOSTI) nengah Bagian Kaunsil Angkasa (BPAngkasa) ngentaska udah nerima penerang keterubah bekaul enggau pengawa meda objek ke dipelabaka kerimpak angkasa ba kandang langit Sarawak kena 7 April 2026.

Naka kediatu, bedau bisi ripot rasmi pasal penemu kerimpak ba darat tauka ba ai.

Bepelasarka peresa keterubah video viral nya, objek nya dipelabaka sebagi ari objek kerimpak angkasa, tang penetap ke silik agi benung dipansik.

Pengawa matau benung chakah dipejalaika BPAngkasa enggau kerejasama Ejensi Angkasa Malaysia (MYSA).

Mensia mayuh dilalau anang negu sebarang utai ti disangka sereta lengkas ngeripot ngagai piak bekuasa tauka talipaun penusah ngenyit 999 tauka terus nuju BPAngkasa ba lumur 03-8885 8685 tauka email ngagai [email protected]. — RBI

MUKAH, 10 April 10 — Siku indu bebadi nyawa ba penusah aksiden kediri empu ba jalai alun ke nyadi ba Kilometer 65, Jalai Pan Borneo Sibu-Bintulu semak Jalai Sungai Kua, Selangau, tumu pagi tadi.

Ketuai Polis Pelilih Mukah, DSP Muhamad Rizal bin Alias ​​dalam siti penerang madahka penusah nya nyadi urung pukul 1.40 pagi ti ngaul sebuah entukar Perodua Myvi ke dideriba siku indu ke beumur 34 taun.

Nitihku iya, pansik tumu tetemuka tudah ti benung bejalai ari Bintulu nuju ke Sibu dipelabaka kerita iya lenyau jaga maya nengah tiku ba endur penusah nya nyadi sebedau kerita nya tegelinchir lalu ngelantak empang jalai.

“Berindik ari eksiden nya, mansa dipelabaka tepelanting ari entukar lalu balat bakal ba pala, tubuh enggau kaki kanan,” ku iya.

Mansa ke beasal ari RPR Kidurong, Bintulu dientaska bebadi nyawa ba palan penusah ke nyadi.

Diatu kes nya benung dipansik ari baruh Seksyen 41(1) Akta Pengangkutan Jalan 1987.

Berindik enggau nya, mensia mayuh ke bisi penerang bekaul enggau penusah tu dipinta datai ke mua mantu tasat nengah chara betalipaun ngagai Pemesai Pemansik Kes, Inspektor Mohd Rahmat bin Jalimin nengah lumur 011-31627137 tauka sebarang balai polis ke besemak.

Berebak enggau nya, iya mega ngelalau penguna jalai alun ngambika seruran bejejimat maya deriba kelebih agi maya malam hari, sereta ngasika tikas pengelaju ti udah ditetapka dikena nyeliahka penusah bebadi. — RBI

SPAOH, 10 April — Perintah Sarawak terus ngenegapka komitmen meransang pemansang menua pesisir lebuh Sapit Premier Sarawak, Datuk Amar Douglas Uggah Embas bejalaika penemuai kereja ngagai sekeda projek strategik ngelingi Spaoh, Betong, kemari.

Penemuai nya dipunka enggau sesi meri penerang ari Opis Kereja Raya Sarawak nengah Cawangan Bangunan begulai enggau Opis Kereja Raya Bagi Menua Betong ti mantaika status pejalai projek – projek ungkup pengerai di kandang menua nya.

Entara projek ti dikemerat iya nya ngaga Klinik Pengerai Spaoh enggau kuarters, Palan Hemodialisis Spaoh enggau Klinik Pengerai Debak ti dikearap ulih ngangkatka akses enggau kualiti servis pengerai ngagai peranak menua nya.

Iya udah nya nampung penemuai nya enggau ngabas terus pengawa bejalaika sekeda projek pemansang ke benung dipejalai diatu.

Tu nyengkaum projek ngangkatmanah GIATMARA ti ngemeratka pemansang pengelandik raban nembiak, projek ngangkatmanah Opis Mit Pelilih Spaoh dikena ngangkatka pemanah pengawa meri servis mensia mayuh, enggau pengawa ngaga Jematan Sungai Paku ti dikearap ulih ngenegapka rentayan komunikasyen sereta nyungkak aktiviti ekonomi kandang menua.

Chara nurun ke palan, meresa enggau berati tu mandangka pengeran ketuai nengeri nentuka tetiap projek dipejalaika nitihka timpuh, nitihka spesifikasyen sereta meri penguntung ngagai rayat.

Penemuai nya mega ngemeratka pengawa beguna Opis Kereja Raya Sarawak nyadi ejensi besai bejalaika pengawa dalam ngamatka pemansang infrastruktur ti inklusif, meruan sereta meri empas tinggi di serata Sarawak. — RBI

SARATOK, 10 April — Peranak Rumah Simon Tabau diatu ulih nyintak seput lantang lebuh projek nyambung baru tali karan ke dianti ngelama tu pengujung iya tembu penuh sereta diserah enggau rasmi.

Projek ti mungkur 32 pintu rumah panjai enggau ungkus penyampau RM200,000 nya dipejalaika dikena mutarka pengirau ati peranak bekaul enggau risiko angus ketegal sistem tali karan lama ti enda likun agi.

Kaban Senator Negara, Tuan Pele Peter Tinggom madah, pengawa bejalaika projek nya siti singkang ke besai reti dalam nentuka pengelikun enggau pengelantang komuniti menua pesisir terus diberi perati.

“Peranak ditu udah lama idup nangika risiko penusah angus. Enggau penembu projek tu ukai semina deka ngangkatka tikas pengelikun, tang mega meri pengelantang ngagai semua peranak,” ku iya lebuh ngemataka pengawa nyerahka projek nya.

Iya mega meri besai terima kasih ngagai Opis Pemansang Nengeri Sarawak (SDO) enggau ejensi Perintah Besai ari baruh Opis Menteri Besai ketegal kerejasama rat ngemujurka projek nya.

Pengerindu khas mega diberi ngagai Ketuai Penulung Direktor SDO Betong, Puan Radiah ketegal komitmen enggau sukung tegap sepemanjai projek nya dipejalaika.

Berebak enggau nya, iya ngarapka peranak Rumah Simon Tabau terus meri sukung ngagai perintah ke diatu, kelebih agi Gabungan Parti Sarawak (GPS), dikena nentuka agenda pemansang di kandang menua Saratok enggau ngelingi nya ulih diteruska belama sereta inklusif.

“Kerejasama enggau sukung rayat beguna amat ngambika mayuh agi projek pemansang ulih dipejalaika ungkup pengelantang begulai,” ku iya. — RBI

LUBOK ANTU, 9 April – Siku lelaki beumur urung 40 taun ditan polis ari Bagi Pansik Jenayah Narkotik IPD Lubok Antu di kandang menua Engkilili ketegal ngaul diri enggau aktiviti dadah tengahari tu tadi.

Peresa tisih ai kemi ti dipejalaika polis tetemuka saspek positif Amphetamine enggau Methamphetamine.

Kes tu dipansik ari baruh Seksyen 15(1)(a) Akta Dadah Berbahaya 1952.

Mensia mayuh ulih terus nyadung penerang pasal aktiviti dadah ba kandang endur diri empu ngagai sebarang Balai Polis ke besemak dikena mantu IPD Lubok Antu, ngelaban aktiviti dadah dikena nentuka pengelikun enggau pengelantang komuniti di Pelilih Lubok Antu enggau Pelilih Mit Engkilili terus dijamin. -RBI

KAPIT, 9 April — Pekit Catur Kaunsil Lumba Sekula Bagi Menua Kapit (MSSB) 2026 ke diatur SMK Kapit No.2 udah tembu tengahari tu tadi, lalu enggau nya ngemataka pemujur ti meransang ati ba bala penyereta ke bepekit.

Bala pengatur meri jaku puji enggau terima kasih ke pemadu tinggi ngagai raban penyereta enggau pengajar ke udah meri komitmen ke tegap dalam nentuka pengelanchar sepemanjai pekit.

Ba kategori individu Indu Baruh 15 taun (P15), Erica Kiu Yee Xuan mujur nyadi lumur dua, lalu Chloe Lin Jing Xuan enggau Elsie Kong Zhi Shuen ba penuduk lumur empat enggau lima.

Ungkup kategori Nembiak Indu Baruh 18 taun (P18), Arbila anak Hendry Dino mujur bulih gelar champion, ditangkan Fyone Kiu Yee Jie ba penuduk lumur tiga enggau Cressida Magdelina Raen ba penuduk lumur empat.

Berebak enggau nya, ba kategori Nembiak Lelaki Baruh 15 taun (L15), Adiel Izzat bin Nurul Amin ba penuduk lumur lima.

Ungkup kategori Lelaki Baruh 18 taun (L18), Jason Fontaine anak Jackson bulih lumur tiga, lalu Jovillian Jalak anak Jamil ba penuduk lumur enam.

Ari sukut pemujur kategori, tim tu mujur bulih gelar champion ungkup kategori P15 enggau P18, kelimpah ari lumur dua ungkup kategori L18, lalu enggau nya ngenegapka agi pemanah pengawa kontinjen ba pekit tu.

Pemujur nya ngemuntangka sepenyampau semilan iku nembiak dipilih ngarika bagi menua nya ba Pekit Catur Kaunsil Lumba enggau Main Sekula Sarawak (MSSS) ti diperambu deka diatur di Miri dalam awak ke semak tu.

Pemujur tu ngayanka pengeran, disiplin enggau semengat besemekih ti tinggi ba bala penyereta, kelimpah ari sukung ti seruran diberi ari sekula enggau jurulatih dalam nerenakka penyulut main catur ba renggat baruh. — RBI

MIRI, 9 April — Sebuah lori ke ngundan sawit diripotka aksiden ba Jalai Miri–Marudi, semak Ladang BLD, Miri, sehari tu tadi.

Nitihka penerang tumu, deriba lori nya diripotka selamat sereta nadai balat bakal.

Jalai Miri–Marudi dikelala nyadi jalai ti betiku sereta sunyi, nya alai penguna jalai alun dilalau seruran bejimat lebuh deriba.

Fokus ngagai jalai alun, ngasika takah pengelaju sereta seruran nitihka atur dikena nyeliahka penusah ke enda dikedekaka nyadi. — RBI