PAKAN, 19 April — Siku lelaki beumur 55 taun bakal mimit pengudah kerita ke dideriba iya betempuh enggau sebuah bas di Jalai Pakan senentang menua Babai, lemai tu tadi.

Ketuai Polis Pelilih Julau, DSP Alif Haiqal Ramesh Abdullah madah, penusah nya nyadi urung pukul 6.20 lemai lebuh sebuah kerita Perodua Axia ti bekejang ari Sibu ke Pakan ensayar sebedau tama ngagai jalai sepiak lalu betempuh enggau sebuah bas.

Nitihka penerang iya, entukar nya udah nya ngelantak mua kanan sebuah bas ngujungka kerita nya bepusin ke kiba jalai.

“Berindik ari aksiden nya, deriba kerita nya, bisi bakal mimit lalu dibai berubat ngagai Klinik Pengerai Pakan,” ku iya nengah sebengkah penerang.

Ku iya nambah, deriba bas nya nadai bakal ba penusah nya.

Pansik keterubah tetemuka penusah aksiden nya nyadi ketegal ari deriba kerita, ngujungka kerita nya belantak.

Gaya jalai alun ba palan penusah nyadi diripotka lurus, dua lurung sereta rangkai maya penusah nya nyadi.

Kes tu dipansik ari baruh Atur 10 LN 166/59 lalu nadai penusah jalai sekut diripot nyadi. -RBI

KUCHING, 19 April – Pengawa nyiri akim agi digaga Yang di-Pertuan Agong, tang proses berunding enggau Sarawak dikena nentuka pemerat nengeri tu terus dijaga.

Premier Sarawak, Datuk Patinggi Tan Sri (Dr) Abang Haji Abdul Rahman Zohari bin Tun Datuk Abang Haji Openg mantaika bisi piak ti agi ‘temil’ bekaul enggau isu tu.

“Pengawa nyiri akim ungkup Kort Sabah enggau Sarawak ti enda tau enda nengah proses berunding enggau Tuai Pemegai Menua (TYT) enda patut ditanya agi lalu nya udah dipesetuju ba renggat Komiti Teknikal Sempekat Malaysia 1963 (MA63).

“Sebarang pengawa nyiri akim ti ngaul Kort Sabah enggau Sarawak enda tau enda ngambi kira penemu kedua-dua nengeri, setipak enggau pengawa ke bisi diatu.

“Udah nyadi adat kitai iya nya enda tau enda bisi pengawa berunding.Pekara nya udah diputarka, udah diputarka dalam komiti MA63,” ku iya lebuh ti ngenataika jaku nangguhka Konvensyen Gempung Parti Sarawak (GPS) 2026 di Palan Konvensyen Borneo Kuching (BCCK), kena Hari Minggu tu tadi.

Iya nyemetak madahka akim dichiri Yang di-Pertuan Agong, tang nama-nama nya patut dimalin ngagai TYT.

“Kitai bisi Kort Tinggi Sabah enggau Sarawak, nya alai pengawa berunding nya enda tau enda bisi dia,” ku iya nerang.

Berebak enggau nya, iya nerangka isu nya enda nyadi polemik agi laban udah nyapai konsensus.

“Kitai enda ibuh nanya pekara tu baru laban udah diputarka. Anang mai pekara ke udah diputarka,” ku iya nyemetak.

Iya mega nyemetak madahka pengawa GPS seruran bepelasarka undang-undang enggau MA63 dalam negika hak Sarawak.

“Kami nguna pengawa dalam parameter undang-undang enggau sempekat sereta begunaka fakta,” ku iya. – RBI

KUCHING, 19 April — Aum Komiti (AJK) PELASAR Sesi 2026/2028 Bil 1/2026, disempulang enggau sesi nyerah pangku pengawa ari Komiti Sesi 2024/2026, udah diatur enggau lanchar ba SDGA iNVENT Pending, lemai tu tadi.

Aum ke diatur ari pukul 2.00 ngagai 4.30 lemai nya ngembuan tuju deka berandauka kuing strategik organisasyen kelimpah ari merambu aktiviti ke deka dipejalaika PELASAR ungkup timpuh sesi 2026 ngagai 2028.

Nyadi sebagi ari batang agenda, sesi nyerahka pangku pengawa rasmi diatur dikena nentuka pengawa ngatur gerempung nya terus dipejalaika.

Sapit Chairman PELASAR Sesi 2024/2026, Dr.Amee Joan ti ngarika kaban komiti sebedau tu nyuaka fail rasmi PELASAR ngagai Sapit Chairman PELASAR Sesi 2026/2028, ngagai Ts. Kr. Matthew Igoh, ti ngarika chairman enggau kaban komiti baru.

Aum nya mega nyadi saksi pengawa nyuaka surat chiri ngagai semua kaban Komiti PELASAR, penyanding penemu enggau penaung ungkup sesi 2026/2028 kelai pengawa nyiri rasmi enggau pengarap ke dilempaika ngagai sida.

Sama bisi datai iya nya Penaung PELASAR, Jugah Muyang ke mega kala nyadi Kaban Parlimen P203 Lubok Antu, enggau Penyanding Penemu PELASAR, Mawang Kayan.

Berebak enggau nya, PELASAR meri besai terima kasih ngagai kaban Komiti Sesi 2024/2026 ketegal komitmen enggau pemeri sida sepemanjai timpuh sida gawa.

“Tabi puji mega diberi ngagai kaban Komiti Sesi 2026/2028 ke baru, enggau pengarap PELASAR terus mansang sereta bejalaika tanggungpengawa enggau chakah meri bantu ngagai pemansang komuniti” ku penerang nya. — RBI

KUCHING, 19 April — Sebuah kerita Proton Saga diripotka angus lengis dalam penusah angus ke nyadi ba palan paking ba mua sebuah pasaraya di Batu 10, ditu tengahari tu tadi.

Penusah ke nyadi ba kandang endur ke mayuh mensia nya ngasuh orang tekenyit, tang nadai penusah bebadi nyawa tauka bakal diripotka nyadi.

Komander Operasyen ari Balai Bomba enggau Penyah Penusah (BBP) Siburan, PBK I Ismail bin Zulkifli madah, raban iya nerima kangau ngenyit urung pukul 12.03 tengah hari.

Tekala nya, seraban raban dianjung ngagai endur nya ngambika bejalaika operasyen madamka api enggau lengkas.

“Lebuh datai ba palan penusah nyadi, ditemu api benung mau lalu penusah angus nya udah ngaul sebuah entukar ke udah angus 100 peratus.

Taja pia, pengawa meresa enggau silik agi ngentaska nadai orang dalam entukar nya maya penusah nyadi,” ku iya nengah sebengkah penerang.

Raban Bomba enggau Penyah Penusah (PKO) bejalaika pengawa enggau jampat ngena arus tunggal hos bantu tumu dikena nagang api ari ngerekai ngagai perengka pengangkut bukai ke diengkah besemak nya.

Pengudah api padam abis, raban bomba bejalaika pengawa meresi reba api enggau silik (*overhaul*) dikena nentuka nadai pun penatai api ti agi tinggal.

Injin bomba enggau raban nya pulai ngagai stesyen nya pengudah gaya ba endur nya disahka likun bendar ungkup mensia mayuh.

Kebuah ke bendar penusah angus nyadi enggau penyampau pengerugi ke ditapi sida ke ngempu entukar agi dipansik unit forensik bomba.

Penguna jalai alun dilalau ngambika seruran bejalaika pengawa meresa wayar enggau sistem minyak entukar ari sesiti maya ngagai sesiti maya dikena nyeliahka penusah ke sebaka nyadi. — RBI

KUCHING, 19 April — Muzium Pesaka Industri Brooke Dockyard deka dipenyadika enggau rasmi kena Hari Satu, 20 April 2026, pukul 8.30 malam ulih Premier Sarawak YAB Datuk Patinggi Tan Sri (Dr) Abang Haji Abdul Rahman Zohari bin Tun Datuk Abang Haji Openg.

Pengerami bejadi nya nyadika sebengkah agi pemujur ke besai reti ba pengawa nengeri Sarawak ti deka ngetan sereta mantaika pesaka industri enggau sejarah pemansang palan ngaga kapal di nengeri tu.

Muzium Pesaka Industri Brooke Dockyard deka dibuka ngagai mensia mayuh kena 21 April 2026 enggau tama enda bebayar.

Muzium tu deka beoperasyen ninting hari nitihka timpuh ke udah ditetapka, iya nya ari pukul 9.00 pagi nyentuk 4.45 lemai kena Hari Satu ngagai Hari Lima, lalu kena Hari Enam, Hari Minggu enggau hari besai iya deka dibuka ari pukul 9.30 pagi nyentuk 4.30 lemai.

Bepalan ba kandang menua tebing sungai Kuching ke besejarah, muzium tu mandangka sejarah pemansang industri enggau palan ngaga kapal Sarawak, meri awak ngagai temuai meretika evolusyen sektor kapal, ke nyadi sebagi ari ekonomi nengeri tu kenyau ari jeman Brooke.

Pengawa muka muzium tu dikearapka ulih nambahka siti agi pematak dagang temuai pesaka besai ngagai mengeri Kuching sereta ngenegapka agi pengawa ngetanka sejarah industri Sarawak ungkup rebak dudi hari. — RBI

KUCHING, 19 April – Sepenyampau lapan projek pemansang ari baruh Ejensi Pemansang Delta Rajang (RADDA) benung sereta deka dipejalaika ba sitak Dewan Undangan Nengeri (DUN) N.47 Pakan dikena ngenegapka perengka guna pemun sereta nyungkak ekonomi komuniti lokal.

Kaban Kunsil Nengeri (ADUN) Pakan, Tan Sri Dato Sri William Mawan Anak Ikom ke mega Penyanding Penemu ba Opis Premier Sarawak (Industri Pemakai, Komoditi enggau Pemansang Kandang Menua) madahka projek nya mungkur sektor ekonomi, rama enggau infrastruktur.

Entara batang projek ke dirintai iya nya pemansang Palan Pesta Pakan, Waterfront Pakan enggau pengawa ngaga Dewan Pakan Sentral ti dikearap nyadi pematak ngagai aktiviti komuniti lokal enggau dagang temuai.

Kelimpah ari nya, sekeda projek ngemanahka jalai mega diperambu nyengkaum Jalai Pelilih Pakan–Entabai–Pakan, Jalai Nunggang (Renggat 1), Jalai Dayu Lama (Renggat 1), Jalai Buku (Renggat 1) enggau Jalai Ulu Wak (Renggat 1).

Projek-projek tu ngembuan tuju deka ngangkatka penyambung, lalu enggau nya ngemudahka pemindah peranak menua pesisir.

Pengawa bejalaika inisiatif tu dipeda setipak enggau pengawa perintah Sarawak ti deka ngenyampatka pemansang menua pesisir kelebih agi di kandang menua tengah, ngambika penguntung ekonomi ulih diasaika enggau lebih komprehensif.

Nengah pemisi projek RADDA tu, kandang menua Pakan disadang deka ngasaika transformasyen ke besai ari sukut perengkaguna, rentayan jalai alun enggau peluang ekonomi dalam kandang beberapa taun ke deka datai. -RBI

SAMARAHAN, 19 April — Opis Kereja Raya Sarawak majak chakah agi bejalaika pengawa matau projek infrastruktur strategik lebuh Direktor Kereja Raya Sarawak, YBhg. Datu Adj. Prof. Ir. Ts. Gs. Br. PMr. Dr. Cassidy anak Morris bejalaika penemuai gawa, meresa projek Jematan Batang Lupar 1 sehari tu.

Penemuai nya ngembuan tuju deka beratika baru pejalai projek ke diatu sereta nentuka tetiap sukut pengawa bejalaika nitihka standard kualiti, spesifikasyen teknikal enggau timpuh nembuka projek ke udah ditetapka.

Rambau penemuai nya, iya diberi penerang silik ari tim projek bekaul enggau status pejalai pengawa, pemar bejalaika pengawa enggau atur ngemanahka ti benung dipejalaika dikena nentuka pengelanchar pejalai projek.

Pengawa nemuai ngagai palan nya mega diatur ngambika iya ulih beratika terus pejalai pengawa ba palan nya.

Berebak enggau nya, sesi randau enggau raban ke bisi pemerat mega diatur dikena ngenegapka koordinasyen sereta ngangkatka penyikar pengawa ngenataika projek, setipak enggau pengawa perintah nengeri ti enda ngetu dalam meri kuasa ngagai pemansang infrastruktur ti meruan sereta meri empas tinggi.

Projek Jematan Batang Lupar 1 nyadi siti ari batang inisiatif dalam ngemanahka rentayan penyambung jalai enggau aksesibiliti di Sarawak, kelebih agi ungkup komuniti setempat.

Pengawa bejalaika iya dikearap ulih meri empas positif ngagai pemansang sosioekonomi, ngemudahka mobiliti mensia mayuh sereta ngerapitka kaul entara kandang menua.

Opis Kereja Raya Sarawak tetap komited nentuka projek tu mujur ditembuka ungkup pengelantang rayat enggau penyulut terus nengeri tu. — RBI

KUCHING, 19 April – Presiden Parti Pesaka Bumiputera Bersatu (PBB) ke mega Chairman Gempung Parti Sarawak (GPS) madahka budaya meri peluang ngagai nembiak rebak baru udah lama dikemeran dalam ngenegpaka parti.

“Tu endang amat proses kitai, kelebih agi parti PBB lalu aku pechaya parti komponen kitai mega patut meri peluang enggau ruang ngagai rebak baru ngambika sida ulih belajar ari sida ke tuai agi.

“Kami semua agi biak maya agi menya, belajar ari bala sida ke tuai.Pia mega Datuk Amar Douglas Uggah Embas, Datuk Amar Awang Tengah Ali Hasan enggau ke bukai.

“Aku nganti niang Tan Sri Datuk Amar Adenan Satem lalu kami duai sama diiring Tun Pehin Sri Abdul Taib Mahmud enggau Tan Sri Datuk Amar Jabu Numpang.

“Diatu udah nyadi tanggungpengawa kami ngembing nembiak rebak baru, anang kitai nulak chalun ke agi biak,” ku iya ba aum pengarang berita pengudah Konvensyen GPS, ditu, sehari tu.

Ku iya, gempung peneleba sida ke tuai enggau pengeransing sida ke biak nyengkaum indu enggau lelaki beguna amat dikena nyamin kuing parti enggau nengeri jemah ila.

Bekaul pengawa bepilih ila, Abang Johari madahka PBB dipelabaka deka mandangka abis nadai lima tauka enam iku mua baru ti deka datai ti nyadi sebagi ari proses neruska pengawa sereta ngemaru ketuai parti.

Ku Premier, pengawa meri kelala chalun baru ukai pekara ke baru, tang udah nyadi budaya dalam parti dikena meri ruang ngagai nembiak rebak baru belajar ari ketuai ke tuai agi.

“Proses nya begunaka perening positif ari semua piak, dikena nentuka penerus ketuai parti dalam komponen GPS jemah ila.

“Kitai patut meri ruang enggau peluang ngagai nembiak rebak baru nyingkang sereta megai tanggungpengawa,” ku iya. -RBI

KUCHING, 19 April — Pengawa nguruska sumber enggau efektif meseti bepelasarka penemu, pengelurus dalam pentadbiran enggau pengelurus ati ngiring menua, pia ku Premier Sarawak, Datuk Patinggi Tan Sri (Dr) Abang Haji Abdul Rahman Zohari bin Tun Datuk Abang Haji Openg.

Kenu ku iya, penyulut sesebuah nengeri ukai semina bepanggai ba pengaya pengeraja asal aja, tang mega ba pengulih ketuai dalam nentuka pengeraja asal tu diatur enggau adil sereta inklusif ungkup pemaik semua rayat.

Iya nyemetak madahka chara Gabungan Parti Sarawak (GPS) seruran beratika penyelai pupu bansa enggau jalai pengarap di nengeri tu.

Entara nya sukung ngagai sekula China, berindik ari bisi nembiak Bumiputera ke sama bulih penemu sereta belajarka Jaku Mandarin ba sekula nya.

Kelimpah ari nya, perintah nengeri mega mantu institusyen jalai pengarap bukai nengah Unit Pekara Jalai Pengarap Bukai (UNIFOR) dalam pengawa nentuka pengelantang pendiau semua komuniti terus dijaga.

“Di Sarawak kitai bisi model kediri empu. Kitai mantu semua orang enda ngira penatai laban semina peranak Sarawak ke amat meretika budaya enggau pengelantang ti ditempa kitai begulai,” ku iya rambau aum pengarang berita beserimbai enggau Pengerami Bejadika Konvensyen Gabungan Parti Sarawak 2026 ke diatur ba Palan Konvensyen Borneo.

Berebak enggau nya, iya mega nyemetak madahka pengaya pengeraja asal aja enda ulih nyamin pengelantang sesebengkah menua enti bisi penyarut enggau enda tegap.

Iya bechuntoka sekeda menua ti kaya enggau pengeraja asal baka Sudan enggau Nigeria ti agi napi pemar pemansang ketegal penyarut dalam menua.

Berindik enggau nya, iya ngemeratka pemesai guna penegap politik enggau sepakat entara raban ketuai nyadi pelasar pemansang ti meruan.

Nitih ku iya, nengah semengat kerejasama dalam GPS, Sarawak ulih ngelangkar kuing pemansang ti lebih teratur sereta efektif dikena nyamin pengidup rebak dudi hari.

Ngenang sukut ekonomi, iya nyemetak madahka pemansang meseti setipak enggau guna makit kereja.

Raban graduet meseti disikap enggau pengelandik ti bekaul ngambika sida enda napi pemar ngiga pengawa, kelimpah ari nagang pemindah pengereja pengawa bepengelandik ngagai menua luar.

Ku iya nambah, ekonomi ke diatu majak bepelasarka penemu, nya alai Sarawak begunaka nyingkang sesingkang enggau nengeri sereta menua maju.

Dalam konteks tu, pemansang sektor baru baka aeroangkasa mega diberi perati, nyengkaum numbuhka fakulti ti bekaul ba palan pelajar baka ICATS.

Singkang tu ku iya betuju ngenegapka penemu dalam bidang teknologi tinggi, lalu enggau nya muka peluang baru ngagai nembiak rebak baru Sarawak.

“Dikena nyapai penyulut, politik kitai enda tau enda seriris sereta tegap.

“Enti nadai penegap, kitai berisiko napi penanggul baka di menua bukai. Nya alai, penegap nyadi kunchi pengidup ti likun jemah ila,” ku iya. — RBI

KUCHING, 19 April — Gabungan Parti Sarawak terus ngemeranka chara ti sebela entara ketuai ti bepeneleba enggau mua baru nyadi batang pengawa dalam nentuka penegap enggau pengentap parti.

Chairman iya, Tan Sri Abang Johari Tun Openg madah, chara nya diputuska begulai ari ketuai parti dikena ngenegapka organisasyen, seraya mega meri ruang ngagai rebak baru nempa peneleba dalam arena politik.

Nitih ku iya, parti komponen GPS nyengkaum Parti Pesaka Bumiputera Bersatu seruran bebendar deka muka peluang ngagai raban nembiak belajar ari ketuai ti bepeneleba sebedau megai tanggungpengawa ke besai agi.

“Semua kami berengkah ari baruh, nyengkaum aku empu nengah sayap Gerakan Belia PBB lalu proses tu ngemendarka kami belajar sebedau megai tanggungpengawa ke besai agi,” ku iya.

Iya madah munyi nya ba aum pengarang berita pengudah bejadika Konvensyen GPS di Palan Konvensyen Borneo, Kuching, sehari tu tadi.

Ngenang silik agi, iya nyemetak madahka tetiap iku individu ngembuan pengulih ke bebida sereta begunaka pemansang nitihka pematut diri empu enggau enda berumban.

“Dalam perjuangan politik, pengelurus ati enggau penyabar amat beguna.

“Anang mudah lemi semengat enti bedau diberi peluang,” ku iya.

Berebak enggau nya, iya nerangka pengawa besilih nyadi ketuai meseti dipejalaika enggau chara ti sebela enggau enda ngeruga pangku pengawa ketuai ke udah bisi.

“Dalam PBB, abis nadai lima tauka enam mua baru deka diberi kelala ninting pengawa bepilih dikena nentuka penerus,” ku iya nerang.

Ku iya nambah, chara ke sama mega ngaul sayap indu ke nyadi pengeransing ngenegapka struktur parti selampur.

Iya mega nyemetak madahka sebarang penyerekang penemu dalam parti meseti diputar nengah randau ngambika ulih ngetanka semengat diri sebilik dalam GPS.

Nitihka ripot TVS, chara nya ngayanka komitmen ketuai GPS ti terus nentuka pengawa betukar rebak nyadi enggau chara ti diperambu sereta harmoni. — RBI