BETONG, 20 April — Siku lelaki peranak menua tu beumur 34 taun ditan dalam operasyen Ops Tapis ti dipejalaika Bagi Pansik Jenayah Narkotik, Indu Opis Polis Pelilih (IPD) Betong, tengahari tu tadi.

Ketuai Polis Pelilih Betong, Wan Mohamad Ali Wan Malek, nengah penerang media madahka pengawa ngetan nya digaga urung pukul 12.00 tengahari ba menua Betong pengudah saspek dipelaba ngembuan dadah sereta bisi kaul enggau aktiviti salah guna dadah.

Nitihku iya, saspek udah nya dibai ngagai IPD Betong ngambika dipansik silik agi lalu pemutus peresa ai kemi keterubah tetemuka lelaki nya positif amphetamine enggau methamphetamine.

“Meresa baru rikod ke udah mega tetemuka saspek nadai ngembuan sebarang rikod jenayah tauka penyalah bekaul enggau dadah sebedau tu,” ku iya.

Kes tu dipansik ari baruh Seksyen 12(2) Akta Dadah Berbahaya 1952 ketegal bisi ngembuan dadah, ti nyendiaka ukum mata duit enda ngelui RM100,000 tauka jil nyentuk lima taun, enti dikenuku salah.

Kelimpah ari nya, kes tu mega dipansik ari baruh Seksyen 15(1)(a) akta ke sama ketegal salah guna dadah, ke ulih kena ukum enda ngelui ari RM5,000 tauka jil nyentuk dua taun, nyema dikenuku salah.

Berebak enggau nya, polis ngemeratka komitmen sida terus ngelaban aktiviti salah guna dadah ba pelilih tu lalu enda deka belembut ba sebarang pengawa ngelanggar undang-undang.

Berindik enggau nya, mensia mayuh dipinta terus ngenataika penerang bekaul enggau aktiviti dadah ngagai polis nengah chara betelefon ngagai Balai Polis Betong ba lumur 083-472345. -RBI

LUBOK ANTU, 20 April — Sebuah kerita pacuan empat roda (4WD) angus lengis ba penusah angus di Jalai Besai Pan Borneo semak kandang menua Sedarat, pagi tadi.

Nitihka penerang ari Palan Operasyen (PGO) Opis Bomba enggau Penyah Penusah (JBPM) Sarawak, sida nerima kangau ngenyit bekaul enggau penusah nya urung pukul 8.18 pagi.

Tekala nya pengudah nerima kangau nya, seraban raban ari Balai Bomba enggau Penyah Penusah (BBP) Betong digerah ngagai endur penusah nya nyadi.

Operasyen ngerara api nya betuaika Pemesai Bomba Kanan, Masihi begulai enggau lima iku raban ngena mesin Tender Penyelamat Bomba (FRT).

Lebuh datai ba endur nya, raban bomba tetemuka entukar ke bisi kaul nya benung angus.

Pengawa madamka api tekala nya dipejalaika ngena hos bantu tumu enggau pun penatai ai ti dipam terus ari mesin FRT.

Taja kerita nya udah angus 100 peratus tang deriba mujur ngelarika diri nengah chara pansut ari entukar nya sebedau api nyerarai, lalu enggau nya ulih nyeliahka sebarang bakal tauka bebadi nyawa.

JBPM ngentaska nadai orang bukai ke bisi kaul enggau penusah nya.

Operasyen nya tembu enggau penuh pengudah raban bomba bejalaika pengawa meresa enggau silik (overhaul) dikena nentuka nadai agi pun penatai api ti bisi potensi ngasuh penusah angus nyadi baru.

Kebuah penusah nyadi enggau anggar pengerugi agi dipansik Unit Forensik Bomba JBPM. — RBI

MIRI, 20 April — Sepital Miri benung chakah nyidi aris tauka sida sebilik siku pesakit lelaki beumur 29 taun, Steve Paulus anak Jali, ungkup tuju ngatur pengawa berubat enggau pekara bukai.

Nitihka penerang ba laman Facebook rasmi Sepital Miri, pesakit nya dirujuk ari Klinik Pengerai Bekenu lalu dipasuk ngagai Sepital Miri kena 6 Disember 2025 pengudah ditemu enda sedarka diri semak tiang karan.

Lebuh dipasukka, pesakit ditemu nadai mai sebarang dokumen pengelala diri.

Pengawa meresa keterubah piak sepital tetemuka alamat kepenudi dirikod iya nya di Rumah Birai, Sungai Baoh, Dalat.

Piak sepital mega bisi madah, pesakit nya bisi diri sebilik iya nya indai iya enggau siku menyadi indu iya ke biak ke dipelabaka diau ba Rumah Digat, Sungai Sebindang, Selangau, pia mega siku menyadi tuai iya ke diau di Taman Tunku, Miri.

Taja pia, pengawa deka ngaga kaul enggau sida sebilik naka ke diatu enda mujur.

Berindik enggau nya, Sepital Miri minta kerejasama ari mensia mayuh ti ngelala pesakit tauka bisi penerang bekaul enggau aris iya tauka sida sebilik ngambika lengkas datai ke mua mantu.

Aris tauka mensia mayuh tau betanya ngagai ‘Jabatan Kerja Sosial Perubatan’, Sepital Miri ba lumur 085-460633 maya jam opis (Hari Satu ngagai Hari Lima) tauka datai terus ngagai Wad 5B, Blok B, Sepital Miri enggau lengkas ngambika dientas enggau atur ke silik agi. — RBI

KUCHING, 20 April — Parti Rakyat Sarawak (PRS) majak ngenegapka kuing strategik sida lebuh Kaunsil Tertinggi parti ngatur Aum Ke-3 ungkup penggal 2025–2028 kena Hari Satu (sehari tu).

Nitihka penerang ari Ketuai Indu PRS Dato Sri Doris Sophia Brodie ke mega Kaban Parlimen Sri Aman, aum nya ngemeratka sekeda pekara enggau tuju berandauka perambu parti jemah ila.

Ku iya, entara batang fokus randau iya nya ripot enggau penemu ari Gerakan Indu enggau Nembiak PRS ti ngemeratka pengawa strategik kededua sayap dalam ngenegapka parti.

“Bemacham perambu enggau chara udah dibantai dikena nentuka PRS seruran relevan, inklusif sereta nyikap diri napi pemar ke diatu enggau jemah ila,” ku penerang nya.

Ku iya nambah, dikearapka semua perambu ke udah dilanggur ulih dipejalaika enggau manah dikena ngenegapka agi pengawa parti sereta nentuka pengelantang rayat terus dijaga.

Penerang nya mandangka komitmen PRS ti seruran ngenegapka organisasyen parti sereta ngalihka strategi seriris enggau pemansang kemaya hari sereta guna rayat. — RBI

KAPIT, 20 April — Woksyop Asas Ngaga Sementing Manik Iban ke diatur pengelama dua hari berengkah 18 ngagai 19 April 2026 ba Bilik Aum, Dewan Suarah Kapit mujur tembu kemari.

Nitihka penerang ari Facebook Bintang Di Ati, sepemanjai woksyop nya, pesereta dibantai enggau teknik asas ngaga manik Iban, nyengkaum chara nusun, milih chura enggau pengelandik alus ti nyadi pelasar ngasilka kraf asal ti bekualiti tinggi.

Pogram ke diatur Kaunsil Kraf Sarawak digulu 20 iku pesereta ti mandangka komitmen tinggi sepemanjai woksyop nya.

“Pengawa ngatur woksyop tu ukai semina meri kelala praktikal aja, tang mega nyadi pelasar ti beguna dalam pengawa ngetan sereta ngangkatka seni pesaka komuniti Iban ngambika terus meruan relevan sereta dikerinduka” ku iya.

Iya meri besai terima kasih ngagai semua penyereta ketegal komitmen enggau dedikasyen sida sepemanjai program nya, sereta meri besai terima kasih ngagai Kaunsil Kraf Sarawak laban udah meri sukung enggau kerejasama ngemujurka woksyop nya.

Dikearapka penemu enggau pengelandik ke diulih dikena penuh bala pesereta, lalu ari nya muka peluang baru dalam bidang asil pengelandik jari sereta meri pangka ngagai pengawa ngetanka identiti budaya menua tu.

Seni manik ti diasilka ukai semina nyadika pengias aja, tang lebih agi melambangka nilai penyabar, teliti enggau kreativiti ti nyadi kelai komuniti Iban. — RBI

LUBOK ANTU, 20 April — Pengawa ngerembaika akses penerang ngagai komuniti menua pesisir majak ditegapka nengah pengawa bejalaika Program Tanggungpengawa Rama Korporat (CSR) RTM80 ti nyadi ba Rumah Ngindang anak Labang, Rantau Kemayau Manis, Engkari, kena Hari Lima tu tadi.

Program tu diatur begulai enggau Palan Servis Rayat Parlimen Lubok Antu P.203 ti betuaika Kaban Parlimen bagi menua nya, YB Roy Angau anak Gingkoi.

Raban ari Radio Televisyen Malaysia (RTM) ti betuaika Monica Midi, Menijar WAIfm Iban, udah nurun ke palan, beratika terus isu penerima siaran radio Iban WAIfm ti enda manah ba sekeda kandang menua pesisir di Lubok Antu.

Nyadi chara mutarka penanggul nya enggau lengkas, RTM mega bisi meri set radio ngagai peranak ke diau ba kandang menua nya, lalu enggau nya sida ulih terus ngulihka penerang, pelajar enggau penabur pemerindang nengah pelasar WAIfm Iban.

Inisiatif tu ngayanka komitmen RTM ti seruran dipejalaika dikena nentuka pengawa ngenataika penerang ti inklusif sereta komprehensif ngagai semua renggat mensia mayuh kelebih agi komuniti menua pesisir seriris enggau agenda ngerapitka seraka komunikasyen enggau ngenegapka rentayan penabur nasional. — RBI

KUCHING, 20 April — Gerempung Budaya Dayak Sarawak (SDCA) udah nempa siti agi pemujur ke beguna dalam pengawa sida negika pesaka asal lebuh ngatur Woksyop Juri SDCA 2026 keterubah iya di Serapi Hotel baru-baru tu tadi.

Nengah penerang rasmi ba Facebook, SDCA madahka woksyop nya udah ngempuruka aktivis seni enggau main asal ari serata Sarawak, nyengkaum penyereta ari Kuala Lumpur, enggau nya mandangka komitmen tinggi mayuh bengkah piak dalam ngenegapka pesaka asal Dayak.

Nitihka penerang nya, woksyop nya mantaika isi ti ngembuan empas tinggi enggau penatai tokoh budaya ti tebangkar baka Neilson Ilan Mersat enggau Jimbun Anak Tawai ti bekunsika penemu senentang kriteria pansik enggau pemereti budaya dalam konteks ngakim pekit Kumang enggau Keling.

“Bengkel tu nyadi singkang ke beguna dalam nentuka skim meri skor enggau penuh etika ngakim ulih disalin ngagai pengawa ke lebih profesional, integriti sereta lurus,” ku penerang nya.

Penerang ke sama mega nyemetak madahka pengawa tu nyadi inisiatif strategik dikena nentuka pekit Kumang enggau Keling mengkang relevan sereta dipebasa, kelimpah ari nyadi medium dikena ngetanka budaya Dayak ba tikas ke besai agi.

Kelimpah ari nya, SDCA mega mantaika pengarap ngambika kaul bebaik ti ditempa entara penyereta ari mayuh bengkah pelilih menua ulih ditegapka agi dikena nyapai juluk begulai iya nya negika budaya.

Pengerami nutup woksyop nya dipenyadika Sapit Menteri Dagang Temuai, Industri Kreatif enggau Seni Pemerindang Datuk Snowdan Lawan, lalu enggau nya mandangka perintah nengeri terus nyukung pemansang industri kreatif enggau pengawa ngintu pesaka asal menua tu.

“Adat dijaga, budaya dijaga,” ku penerang nya nambah. — RBI

KUCHING, 19 April — Perintah Sarawak nyemetak madahka hak ba aktiviti bedagang karbon mengkang ari baruh kuasa nengeri lalu enda ulih diambi Perintah Besai, laban nya bekaul terus enggau pengawa ngatur pengeraja asal Sarawak.

Premier Sarawak, Datuk Patinggi Tan Sri (Dr) Abang Abdul Rahman Johari Openg madah, pengawa bedagang karbon bisi kaul rat enggau tanah sereta kampung nengeri tu ti terang bendar kena baruh bidang kuasa perintah Sarawak bepelasarka penetap Konstitusyen.

“Pengawa bedagang karbon sebagi ari reta tengkira tanah Sarawak.

“Enti diambi alih, nya ngelanggar hak konstitusyen nengeri,” ku iya lebuh ngenataika jaku nangguh aum ba Konvensyen Gabungan Parti Sarawak (GPS) 2026 di Palan Konvensyen Borneo di Kuching, sehari tu tadi.

Ku iya nerang, perambu keterubah Perintah Besai ngambi alih bidang nya udah diperunding enggau silik, enggau Sarawak ngetanka penegap bepelasarka penetap undang-undang ke udah bisi.

“Asil ari pengawa berunding nya, Sabah enggau Sarawak diberi ‘kelaung’, lalu enggau nya ngemendarka kedua-dua nengeri ngatur dagang karbon chara autonomi,” ku iya nerang.

Berebak enggau nya, iya madahka perintah Sarawak diatu benung mansik baru perambu undang-undang perintah besai bekaul enggau ubah gaya hari dikena nentuka pemerat nengeri tu terus dijaga.

Berindik ari nya, iya nyemetak madahka sebarang inisiatif ba renggat Perintah Besai ti negu isu ubah gaya hari mesti dulu diperundingka enggau Opis Luyar Besai Sarawak (SAG), berindik ari kaul iya ti senutuk enggau dagang karbon.

Iya mega nyemetak madahka pengeraja asal karbon ti diasilka ari kampung Sarawak nyadi aset strategik ungkup nengeri tu ti meseti dijaga sereta diatur enggau meruan.

“Ekosistem kampung Sarawak bejalaika tanggungpengawa beguna amat dalam ngasilka oksigen sereta nagang pemansut gas rumah gadung.

Nya alai, nya hak enggau tanggungpengawa nengeri ngatur iya,” ku iya.

Nerang enggau silik agi, iya nyemetak madahka pengawa bejalaika chukai karbon ba renggat Perintah Besai meseti beratika pemerat enggau penuduk Sarawak nyadi pengatur besai pengeraja asal karbon nengeri tu.

“Taja pan chukai karbon nya bidang kuasa perintah besai, tang pengawa bejalaika iya meseti beratika hak Sarawak ba pengeraja asal karbon ti diatur ba renggat nengeri,” ku iya nyemetak.

Ku iya nambah, perintah Sarawak deka terus ngambi chara bejimat sereta strategik dalam betapi enggau pemansang ekonomi baru nyengkaum dagang karbon dikena nentuka hak enggau pemerat nengeri tu seruran dijaga. — RBI

KUCHING, 19 April — Konvensyen Gempung Parti Sarawak (GPS) 2026 udah nyadi kelai penyerakup enggau penegap parti dalam bejalaika aspirasyen rayat, bepelasarka prinsip “Sarawak First” enggau kuing pemansang timpuh panjai nengeri tu.

Konvensyen nya ke digulu lebih 5,000 iku pengari ari serata Sarawak begempuru enggau semangat deka ngenegapka agi pengawa ngetanka hak nengeri tu, meransang pemansang sereta neruska agenda Sarawak ari baruh iring Premier Sarawak, Datuk Patinggi Tan Sri Abang Johari Tun Openg.

Sapit Premier Sarawak, Datuk Amar Dr Sim Kui Hian madah, penyulut Sarawak sehari tu nyata ngayanka pemanah polisi enggau kuing ti dipejalaika GPS kenyau ari penumbuh iya dalam taun 2018.

Nitih ku iya, pemutus pansut ari gempung Barisan Nasional (BN) lalu numbuhka gempung ungkup menua diri empu ti mungkur Parti Pesaka Bumiputera Bersatu (PBB), Parti Sa’ati Rayat Sarawak (SUPP), Parti Rakyat Sarawak (PRS) enggau Parti Demokratik Progresif (PDP) udah ngengkahka Sarawak ba pelasar ke tegap.

“Suba bisi parti baka Parti Tindakan Demokratik (DAP) ti melabaka Sarawak deka bankrap, tang sehari tu kitai udah mansutka diri nyadi siti ari nengeri ti pemadu lantang enggau penatai pemisi manggai RM13.1 bilion ba taun 2026 enti dibanding enggau RM6.8 bilion ba taun 2017,” ku iya.

Iya nyemetak madahka pemujur nya ukai semina ari sukut ekonomi aja, tang mega mandangka penegap politik, penyerakup rayat enggau polisi progresif ti dipejalaika perintah GPS.

Ku iya nambah, pengawa bejalaika inisiatif baka “Sarawak First”, Langgur Pemansang Pengudah COVID-19 2030 (PCDS 2030) enggau pengeransing minta hak nengeri ari baruh Sempekat Malaysia 1963 nyadi pugu pemansang Sarawak.

Berebak enggau nya, Sarawak mega benung ngemeratka strategi dudi hari nyengkaum pemansang kuasa tau dikena baru enggau nyendiaka pelajar tinggi enda bebayar nyadi pelasar nempa menua ke mujur.

Ku Dr Sim, lima taun ti deka datai iya nya renggat ti meri penguji ngagai Sarawak ngambika terus mansang ngagai tikas ti tuai agi nyadi pelilih menua ti kompetitif sereta ngatika diri.

Berindik enggau nya, iya nyemetak madahka pengawa bepilih nengeri ti deka datai beguna amat dikena nentuka penegap politik diteruska, penyerakup enggau pemansang ti udah dijapai.

“Anang semina meda aja,” ku iya seraya ngelalau peranak Sarawak terus bejalaika tanggungpengawa dalam nentuka kuing nengeri tu jemah ila. -RBI

DARO, 19 April — Pengawa jampat Raban Penyaga Pengelikun Mensia Mayuh Malaysia (APM) Pelilih Daro mujur nagang penusah kebun angus ti diripot nyadi di Kampung Nangar Besar, sehari tu tadi.

Palan Kawalan Operasyen (PKOD) Pelilih Daro nerima kangau ngenyit bekaul enggau penusah nya sebedau ngatur empat iku rabanu ngagai endur nya enggau kereban operasyen ke diguna.

Lebuh datai ba endur nya, raban nya tetemuka api udah nyerarai ngagai beberapa kandang endur kebun nya.

Bala kaban ke bisi kaul udah nya ngaga pengawa nyendiaka diri enggau silik nengah chara ngena perengka pengelikun diri (PPE) sebedau berengkah operasyen madamka api dikena nentuka pengelikun sepemanjai pengawa sida.

Asil ari pengawa ti efisyen sereta teratur ari tim APM, api mujur dijaga ari ke nyerarai jauh agi.

Semua raban enggau perengka diripotka dalam gaya ke manah, seraya gaya ba endur nya diatu udah ulih dijaga.

Berindik enggau nya, mensia mayuh dilalau seruran bejejaga sereta lengkas ngeripot sebarang penusah ngenyit nyadi nengah lumur 999 tauka betanya ngagai talipaun APM Daro ba lumur 084-823911 ti beoperasyen 24 jam. — RBI