CYBERJAYA, 3 Mei 2026 — Suruhanjaya Komunikasyen enggau Multimedia Malaysia (SKMM) udah mansutka jaku tangkan ti terit ngagai semua piak ngambika enda ngasilka tauka ngerembaika isi ti bekaul enggau bansa, pengarap enggau institusyen diraja (3R).

Tu kelebih agi ti provokatif, ngemaruh tauka ngasut pemenchi mensia mayuh ti tau ngasuh mensia mayuh begedi.

Nitihka penerang MCMC, iya beratika enggau berat pengawa salah guna servis rentayan enggau pelasar online ti bisi potensial ngeruga pengelantang komuniti pupu bansa di menua tu.

Berindik enggau nya, mensia mayuh dilalau ngambika seruran meresa pengamat sebarang penerang sebedau dikunsi dikena nyeliahka saru penemu enggau pengerembai sentimen ti ngasuh penyarut nyadi.

Berebak enggau nya, MCMC madahka sida deka terus bekerejasama rat enggau Polis Diraja Malaysia sereta ejensi ke bekaul dikena matau, mansik sereta ngambi atur ngagai sebarang isi ke ngelanggar undang-undang.

Iya nyemetak madahka individu ti ditemu salah ulih ditinggang atur ari baruh Seksyen 233 Akta Komunikasi dan Multimedia 1998, ti nyendiaka ukum mata duit nyentuk RM500,000, ukum jil maksimum dua taun, tauka kededua ukum nya.

Kelimpah ari nya, MCMC mega ngelalau penyendia pelantar digital ngambika nitihka undang-undang ke udah bisi sereta bekerejasama dalam pengawa nagang salah guna servis sida. -RBI

#ruaiberitaiban#newsiban#beritaiban

Rindu | Titih | Kunsika

BINTULU, 3 Mei — Peluang pelajar tinggi enda bebayar ti disediaka Perintah Sarawak enda tau enda dikena enggau penuh, ke alai apai indai bejalaika tanggungpengawa ke beguna amat ngembing bala anak nuju pemujur.

Sapit Premier Sarawak, Datuk Amar Douglas Uggah Embas nyemetak madahka sukung ti enda ngetu ari ruang bilik nyadi pekara ti beguna dalam mantu nembiak nyapai penyulut ba akademik.

Ku iya, inisiatif pelajar enda bebayar ti diberi kelala perintah tu dibuka ngagai semua rayat Sarawak enda ngira penatai, enggau pemerat ba bidang sains, akauntan enggau undang-undang.

“Bala anak meseti seruran diberi perati enggau peransang belajar bebendar ngambika bulih pemutus peresa ke nyulut sereta nangkanka nya layak sida ngasaika perengka guna pelajar tinggi enda bebayar,” ku iya.

Iya madah munyi nya lebuh bejaku ba Pengerami Ngabang Gawai Begulai Enggau Datuk Amar Douglas Uggah Embas ke diatur Parti Bumiputera Bersatu (PBB) Pampang N.60 Kakus ba Dinner World Restaurant, ditu, kena Hari Enam tu tadi.

Ba pemansang ke bekaul, Uggah mega madahka projek ngaga Jalai Sungai Arip udah dikemendarka Perintah Sarawak lalu diperambu deka dipejalaika proses tinda bulan Julai tu enggau anggar ungkus RM50 juta.

Nitih ku iya, projek nya nyengkaum ngaga jalai ari Sekula Primari (SK) Arip ngagai Rumah Mambang, Rumah Laja enggau Rumah Anas dikena ngemanahka agi rentayan komunikasyen peranak di menua pesisir.

Kelimpah ari nya, pemeri penyampau RM30,000 mega bisi disalur dikena mantu Komiti Pengatur pengawa nya. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, — DUN Bukit Saban

SPAOH, 3 Mei – Raban Penyaga Orang Periman Malaysia (APM) Pelilih Spaoh mujur nangkap siku ular sawa ke pemanjai urung 14 kaki dalam operasyen di Kampung Hulu Serembang, pagi tadi.

Palan Penyaga Operasyen (PKOD) Pelilih Menua APM Spaoh nerima kangau ngenyit ari mensia mayuh urung pukul 11.03 pagi pengudah siku peranak menua nya tepedaka ular nya maya benung meresi pelaman rumah iya.

Berindik enggau jampat, Skuad Alpha ti betuaika Sjn (PA) Kamarrul Badarudin enggau tiga iku kaban berumban ngesah ngagai endur nya ngena enggau perengka khas dikena nangkap ular.

Nitihku Kamarrul, lebuh datai ba endur nya, sida tetemuka ular sawa nya ba babas ba mua rumah orang ke ngaga kangau.

“Ular nya mujur ditangkap ngena chara sintak lalu ulih raban ke bejalaika pengawa,” ku iya.

Ular sawa udah nya dibai ngagai PKOD APM Spaoh ngambika atur silik agi dipejalaika. Nadai penusah bakal diripotka ngaul sekalika kaban tauka mensia mayuh.

Tu pemujur kedua APM Spaoh dalam timpuh ke pandak, pengudah sebedau tu mujur nangkap ular sawa sepemanjai 20 kaki ujung bulan April tu tadi.

Mensia mayuh dilalau ngambika seruran bejaga-jaga sereta lengkas ngentaika minta sah ngagai talipaun penusah ngenyit 999 tauka PKOD APM ke besemak nyema betapi enggau penusah ngenyit. – RBI

#ruaiberitaiban#newsiban#beritaiban

Rindu | Titih | Kunsika

MERADONG, 3 Mei – Siku lelaki peranak menua tu beumur 33 taun ditan polis pengudah dipelabaka bisi kaul enggau aktiviti salah guna dadah ba pengawa ngerap ngenyit ngagai kandang endur nanam sawit, Jalai Sungai Ruan Batu 5, Bintangor, lemai kemari.

Ketuai Polis Pelilih Meradong, DSP Tansli Mering madah, pengawa ngenyit urung pukul 4.50 lemai kena 2 Mei tu tadi dipejalaika seraban polis ari Unit Tasat Jenayah Narkotik (BSJND) Pelilih IPD Meradong.

“Asil ari pengawa meresa saspek, polis tetemuka dua batang straw bechura putih ti ngundan gumpal kristal ti dipelaba methamphetamine (syabu) dalam beg sandik betulis ‘SWAT’ enggi saspek,” ku iya ba sebengkah penerang.

Nitihku iya, suspek udah nya dibai ngagai opis BSJND Meradong ngambika atur silik agi dipejalaika lalu pemutus peresa ai kemi mandangka lelaki nya positif amphetamine enggau methamphetamine.

“Peresa rikod ke udah mega tetemuka saspek ngembuan rikod jenayah bekaul enggau dadah,” ku iya nambah.

Kes tu dipansik nengah Seksyen 12(3) enggau Seksyen 15(1)(a) Akta Dadah Berbahaya 1952. Enti dikenuku salah, saspek ulih diukum mata duit nyentuk RM100,000 tauka dijil enda ngelui ari lima taun tauka kededua ukum nya ungkup Seksyen 12(3), lalu ungkup Seksyen(1)a) tau diukum nyentuk RM100,000. dijil enda lebih ari dua taun.

Berebak enggau nya, raban polis nyemetak madahka sida nadai belembut ba sebarang aktiviti salah guna dadah lalu nesau mensia mayuh datai ke mua meri penerang.

Sebarang penerang bekaul tau dikenataika ngagai Balai Polis Bintangor nengah lumur 084-693222.-RBI

#ruaiberitaiban#newsiban#beritaiban

Rindu | Titih | Kunsika

MIRI, 3 Mei – Penusah bebadi ba jalai alun ti nabanka nyawa ti ngaul dua buah kerita nyadi urung pukul 2.00 pagi ba Jalai Miri Bypass, semak enggau lampu trafik, tumu pagi tadi.

Ketuai Polis Pelilih Miri, ACP Mohd Farhan Lee Abdullah, nengah siti penerang madahka penusah bebadi nya mungkur sebuah kerita pikap enggau sebuah kerita mit.

Nitihku iya, penusah nya nyadi lebuh kerita pikap nya ke dipasang siku lelaki peranak menua nya ke beumur urung 25 taun, dalam pejalai iya ari Permyjaya nuju Taman Tunku, dipelabaka ensayar sebedau tama ngagai lurung seberai.

“Kerita mit ke dipsang siku lelaki peranak menua tu beumur 39 taun enggau tiga iku pesinjir enda sempat nyeliah lalu ngelantak sepiak kiba kerita pikap nya,” ku iya.

Berindik ari penusah belantak nya, pesinjir ba mua kerita mit nya, siku lelaki peranak menua nya beumur 43 taun, dientaska bebadi ba palan penusah nyadi.

Berebak enggau nya, deriba kerita mit enggau dua iku pesinjir lelaki menua tu ke bukai ke beumur 19 enggau 20 taun bakal lalu dianjung ngagai Sepital Besai Miri ngambika diperubat enggau silik agi.

Deriba kerita pikap nya mega napi mayuh macham bakal lalu diatu benung diperubat ba Unit Penusah Ngenyit sepital ke sama.

Kes tu dipansik ari baruh Seksyen 41(1) Akta Pengangkutan Jalan 1987.

Berindik enggau nya, mensia mayuh ke bisi penerang bekaul enggau penusah nya dipinta ngenataika penerang ngagai Pemesai Pemansik Trafik, Insp. Mohd Faizul enggau Ab. Rahim ba lumur 014-8582582 tauka 085-430479, tauka sebarang balai polis ke besemak dikena mantu tasat.

Berebak enggau nya, piak polis ngelalau semua penguna jalai alun ambika seruran deriba enggau bejimat sereta ngasika atur jalai alun dikena nyeliahka penusah ke enda dikedekaka nyadi. -RBI

#ruaiberitaiban#newsiban#beritaiban

Rindu | Titih | Kunsika

LIMBANG, 3 Mei – Opis Menteri Pengerai Malaysia nengah Opis Pengerai Nengeri (JKN) Sarawak madahka kudi ti disempulang ribut deras enggau ujan bangat nyadi urung pukul 4.00 lemai Hari Lima tu tadi, ngujungka sebagi pengerusak ba struktur begunan Klinik Pengerai Kuala Medalam ditu.

Ngambi penerang ari JKN Sarawak, asil peresa keterubah ngenukuka nadai bakal diripotka ngaul pesakit, mensia mayuh tauka pengereja pengawa pengerai dalam penusah nya.

Dikena nentuka pengelikun mensia mayuh enggau penerus servis pengerai, atur tekala nya dipejalaika Opis Pengerai Bagi Menua Limbang nengah chara mindahka sementara operasyen klinik ngagai begunan bukai ke likun agi ba kandang endur ke sama nyentuk ke dipadah baru.

JKN Sarawak mega meri jamin akses peranak menua nya ngagai servis pengerai deka terus dikemerat sepemanjai timpuh tu.

Sebarang ubah bekaul enggau operasyen servis deka dipadah ari setiap maya nengah jalai komunikasyen rasmi JKN Sarawak enggau Opis Pengerai Bagi Menua Limbang.

Berebak enggau nya, JKN Sarawak meri besai terima kasih ngagai semua pengereja pengawa pengerai, ejensi pengelikun, ketuai kandang menua enggau komuniti kandang menua nya ke udah meri kerejasama enggau sukung dalam napi gaya nya. -RBI

Gambar kredit Jabatan Penerangan Daerah Limbang

#ruaiberitaiban#newsiban#beritaiban

Rindu | Titih | Kunsika

SAMARAHAN, 3 Mei – Direktor Kereja Raya, Datu Dr.Cassidy anak Morris bejalaika penemuai matau pejalai projek infrastruktur di Bagi Menua Samarahan enggau Bagi Menua Sri Aman.

Penemuai tu dikena nentuka pengawa bejalaika projek nya bejalai enggau lanchar sereta nitihka timpuh ke udah ditetapka.

Nitih ku iya, penemuai nya ngembuan tuju deka beratika gaya projek ke diatu ba palan, nentuka tetiap kereja dipejalai nitihka perambu sereta ngelala sebarang isu teknikal ti begunaka pengawa koordinasyen lengkas.

Penemuai nya dipunka enggau ngabas Projek Pakej D2A: Jalai Penyambung ngagai Jematan Batang Lupar 1 sebedau iya empu ngabas pejalai pengawa ba palan Jematan Batang Lupar 1.

Kedua-dua bengkah projek strategik tu disadang tembu ujung bulan Mei 2026 lalu deka dikena rayat sebedau pengerami Hari Gawai.

Raban iya udah nya nampung penemuai ngagai Bagi Menua Sri Aman enggau beratika baru Projek Pakej B1: Perambu Ngaga Jalai Besai ari Sebuyau ngagai Lingga ke diatu udah nyapai penyulut fizikal 77.30 peratus.

Pekara ti narit ati, projek tu ngena teknologi beg ai nyadika chara surcaj dalam pengawa meresi tanah, ti nyadi guna keterubah di Malaysia.

Inovasyen tu ngayanka komitmen Opis Kereja Raya Sarawak bejalaika chara injinir moden ti lebih praktikal sereta efektif, kelebih agi ungkup kandang endur ti bisi pemar geoteknikal.

Penemuai nya diteruska ngagai Jematan Lingga ti udah tembu digaga penuh, sebedau beratika baru Projek Pakej B2 Fasa 2 ti ngaul pengawa ngaga simpang ti nyambung Jalai Penyambung Jematan Sungai Lingga ngagai Jalai Lingga–Sri Aman ke diatu, ke diatu udah ngerikodka penyulut 99 peratus.

Dikena nyimpul penemuai nya, iya mega beratika pejalai pengawa ngaga Jematan Batang Lupar 2 ke diatu ba ikas 88.82 peratus lalu dipelaba tembu penuh dalam bulan Ogos 2026.

Penemuai tu mandangka komitmen Opis Kereja Raya Sarawak ti terus nentuka tetiap projek infrastruktur dipejalaika enggau efisyen, bisi kualiti sereta meri pemaik ti optimum ngagai rayat, setipak enggau aspirasyen pemansang nengeri. -RBI

#ruaiberitaiban#newsiban#beritaiban

Rindu | Titih | Kunsika

BINTULU, 2 Mei – Menteri Industri Pemakai, Komoditi enggau Pemansang Kandang Menua Sarawak (M-FICORD) Dato Sri Dr Stephen Rundi Utom nyemetak madahka pengawa bejalaika Komiti Pemansang Menua Pesisir Bintulu (BIRDCOM) ditu setipak enggau pengeransing ejensi pemansang bukai ngerembaika rentayan infrastruktur pemun di menua pesisir.

Iya ke mega Kaban Kunsil Nengeri (ADUN) Kemena madah, perambu pemansang infrastruktur nyengkaum pengawa ngaga sereta ngangkatmanah jalai alun di kandang menua Tatau, Sebauh, Bintulu enggau Samalaju udah dikenataika dikena nangkup guna rayat.

“Agi mayuh kandang endur ke bedau bisi akses jalai ke meruan lalu dipelabaka urung RM1.17 bilion diguna dikena ngemansangka infrastruktur nya,” ku iya nerang.

Iya madah munyi nya lebuh bejaku ba Pengerami Mantar Gawai Dayak Sebauh 2026 di Restoran Dinner World ditu kena Hari Lima tu tadi.

Pengawa ke seruran dipejalai ku iya, mandangka komitmen perintah nengeri nentuka pemansang menua pesisir dipejalaika enggau komprehensif, meruan sereta meri penguntung terus ngagai rayat.

Sama bisi ngulu pengerami nya Sapit Premier Sarawak Datuk Amar Douglas Uggah Embas, Sapit Menteri Infrastruktur enggau Pemansang Palan Penyangkai Kapal Sarawak enggau Kaban Kunsil Nengeri (ADUN) Samalaju Datuk Majang Renggi, Kaban Kunsil Nengeri (ADUN) Jepak Iskandar Turkee enggau Residen Bagi Menua Bintulu Datu Nyurak Keti. – RBI

Gambar & info kredit UKAS

#ruaiberitaiban#newsiban#beritaiban

Rindu | Titih | Kunsika

BINTULU, 2 Mei – Projek jalai (jematan) baru ti nyambung beberapa buah rumah panjai di Sebauh dikemendar ngena ungkus RM27 juta dikena ngenegapka rentayan komunikasyen menua pesisir.

Sapit Premier Sarawak, Datuk Amar Douglas Uggah Embas madah pengawa ngaga jematan nya udah ngemanahka aksesibiliti, lalu ari nya ngurangka bepanggai ba servis feri.

“Operasyen feri di Sebauh deka dipindah ngagai kandang menua Pandan berindik ari penembu Jematan Sebauh, ke diatu nyadi batang jalai peranak menua nya.

“Perambu keterubah mindahka feri ngagai Kampung Labang udah dipansik, tang asil ari randau nya tetemuka pengawa ngaga jematan ba kandang menua nya engkeman agi nyadika atur timpuh panjai.

“Peminta peranak menua nya minta feri nya dipindah ngagai Pandan mega udah dipesetuju lalu pekara tu deka dibai ngagai renggat opis menteri ngambika ulih dipejalaika,” ku iya.

Iya madah munyi nya lebuh bejaku ba Pengerami Mantar Gawai Dayak Sebauh 2026 di Restoran Dinner World ditu kena Hari Lima tu tadi.

Berebak enggau nya, Uggah madah numbuhka Komiti Pemansang Menua Pesisir Bintulu (BIRDCOM) dipeda nyadi singkang strategik Perintah Sarawak dikena ngenegapka pemansang komuniti menua pesisir nengah chara teratur, inklusif sereta meri empas tinggi.

“Komiti tu bejalaika tanggungpengawa beguna amat dalam nentuka pengawa ngenataika pemansang meri empas positif ngagai rayat, kelebih agi ba kandang menua ulu.

“Berebak enggau nya, perintah mega udah ngambi chara ti engkeman iya nya setuju ngambi jalai batang lama lalu dikemansang ngambika diangkatmanah, lalu ari nya ulih ngemanahka agi akses enggau perengkaguna ungkup peranak menua nya,” ku iya.

Ku Uggah, chara ke baka nya deka nentuka komuniti menua pesisir enda tinggal ari arus penyulut, lalu ari nya sida ulih terus ngasaika perengka guna ke sebaka enggau kandang menua bukai di mengeri.

Sama bisi ngulu pengerami nya Menteri Industri Pemakai, Komoditi enggau Pemansang Kandang Menua Sarawak (M-FICORD) Dato Sri Dr Stephen Rundi Utom, Sapit Menteri Infrastruktur enggau Pemansang Palan Penyangkai Kapal Sarawak enggau Kaban Kunsil Nengeri (ADUN) Samalaju Datuk Majang Renggi, Kaban Kunsil Nengeri (ADUN) Jepak Iskandar Turkee enggau Residen Bagi Menua Bintulu Datu Nyurak Keti. -RBI

Gambar & info kredit UKAS

#ruaiberitaiban#newsiban#beritaiban

Rindu | Titih | Kunsika

BINTULU, 2 Mei 2026 — Shalinie Agnes anak Ali dipadu nyadi champion ba pekit Kumang Gawai Sebauh 2026 ti diatur enggau richah ba Restoran Dinner World, kemari.

Pengerami ke berengkah tumu pukul 7 lemai nya udah disereta penyereta ti ukai semina mandangka pengalus pekayan asal, tang mega mantaika personaliti, pengandal enggau nguasa adat enggau budaya komuniti Iban.

Nengah jaku ti chukup gaga, Shalinie mantaika pengaga ati ketegal pemenang iya ba pekit nya.

Iya nerangka pemujur nya siti basa ke besai, ukai semina ungkup iya empu, tang mega ungkup sida sebilik enggau komuniti ke seruran nyukung iya.

“Aku amat beterima kasih sereta enda nyangka diri dipilih nyadi pemenang malam tu.

“Aku nyerahka pemenang tu ngagai kami sebilik, bala bakih enggau semua orang ti seruran nyukung pejalai aku.

“Aku ngarapka aku ulih ngena pelasar tu terus negika budaya Iban sereta meri inspirasyen ngagai nembiak rebak baru,” ku iya ngagai pemberita Ruai Berita Iban.

Perais pemenang disuaka Dato Doreen Mayang, ti bela ngerami pengawa ke nyadi kelai pengangkun ngagai pesaka asal beserimbai enggau pengerami Gawai Dayak.

Pekit Kumang Gawai nyadi pelasar ke beguna dalam negika identiti indu Dayak, pia mega ngenegapka semengat beserakup enggau sayau ke adat ba raban nembiak rebak baru. – RBI

#ruaiberitaiban#newsiban#beritaiban

Rindu | Titih | Kunsika