SIBU, 4 Mei — Gerempung Veteran Soldadu Tasik Diraja Malaysia (PVTLDM) Pampang Nengeri Sarawak deka ngatur Aum Besai Nengeri (MAN) Ke-17 ungkup Taun 2026 kena 9 Mei tu ba Hotel Li Hua, Sibu berengkah ari pukul 8.00 pagi.

Nitihka penerang ti dipansutka, notis aum nya udah disadung ngagai bala kaban kena 6 April tu tadi nengah ‘WhatsApp group’ rasmi gerempung nya.

Berindik enggau nya, pemadah tambah nengah ditaburka terus ari radio mega bisi digaga dikena nentuka penerang nya datai ba semua kaban, kelebih agi sida ke engka nadai agi dalam raban komunikasyen ketegal ubah lumur telefon.

Semua kaban ke udah berejista enggau veteran TLDM ke bedau ngerejista diri dipinta datai ngambika aum ninting taun tu mujur diatur.

Penatai kaban beguna amat dikena berandauka pekara ti bekaul enggau pengelantang pendiau, kuing enggau pemansang kemaya hari gerempung ba renggat nengeri.

Bala ke datai mega dipinta nitihka kod pekayan kemas baka ke udah ditetapka dalam notis rasmi.

Ngagai raban ke deka nganjung pekara ungkup dipejurai, sida dipinta ngisi Pom C ke dilekatka ba notis aum kena 6 April 2026 lalu nganjung ngagai Sekretari enda laun ari 30 April 2026 tu tadi.

Berebak enggau nya, kaban ke udah ngerejista diri dipinta datai nitihka timpuh ke udah ditetapka, lalu bala pinchin TLDM ke bedau ngerejista diri mega dikelaluka datai laban kaunter ngerejista deka dibuka ba hari aum nya ila.

Semua kaban mega dipinta ngentaska penatai diri nengah aplikasyen WhatsApp ngagai Sekretari sebedau tauka kena 25 April 2026 ke tuju koordinasyen enggau pengawa nyendiaka diri ari pengatur.

Penerang silik, mensia mayuh tau betanya ngagai Presiden, PW I (B) Unyok Anak Dasi nengah lumur 011-14738612; Sapit Presiden, BM (B) Hussain bin Abdul Rani ba lumur 019-8858094; tauka Sekretari, PW I (B) Enda Anak Nyanggau ba lumur 014-8214345. -RBI

MIRI, 4 Mei — Sebuah rumah ke dikena nyadi bilik suwa ba Jalai 1B, Kampung Pujut Sungai Adong udah angus lengis ba penusah angus ke nyadi tumu pagi tadi.

Nitihka penerang ari Opis Bomba enggau Penyah Penusah Malaysia (JBPM) Zon 6 Sarawak, Balai Bomba enggau Penyah Penusah (BBP) Lopeng nerima kangau ngenyit urung pukul 1.42 pagi sebedau tim dianjung ngagai palan penusah nyadi.

Injin bomba keterubah datai urung pukul 1.49 pagi lalu tetemuka penusah angus nya ngaul sebuah rumah struktur ukai tetap ke udah angus nyau deka 100 peratus enggau pemesai dipelabaka 60 x 40 kaki persegi.

Operasyen madamka api nya betuaika TPgB 11 Mashidi bin Taha ngena dua batang hos sepemanjai 200 kaki begulai enggau dua muncung sereta siti hos bantu ke disambung ngagai paip bomba ke besemak.

Api mujur dijaga urung pukul 2.00 pagi sebedau kereja ‘overhaul’ dipejalaika dikena nentuka nadai agi bara api tauka pun penatai api ti tau ngepunka api baru.

Rumah nya diuan dua ruang bilik ti ngaul lapan iku orang ke nguan rumah nya.

Semua orang ke ngani rumah diripotka selamat sereta nadai bakal.

Operasyen nya tembu enggau penuh pukul 4.40 pagi lalu semua raban pulai ngagai stesyen pukul 5.09 pagi.

Sama bisi mantu ba palan penusah nya, Polis Diraja Malaysia (PDRM), Angkatan Pengelikun Mensia Mayuh Malaysia (APAM), Opis Bomba enggau Penyah Penusah Miri enggau Sarawak Energy (SESCO).

Pun penusah nyadi enggau anggar pengerugi agi benung dipansik piak bomba. — RBI

MANCHESTER, 4 Mei — Manchester United ngentaska diri pulai ngagai renggat elit Eropah lebuh sida ngalahka tim Liverpool 3-2 ba main Liga Premier ke chukup manah di Old Trafford, tumu pagi tadi.

Gol laun ari Kobbie Mainoo ke mega meri pemenang ngulihka tiga puin berega ungkup United, lalu enggau nya sida layak masuk Liga Champions UEFA pengudah dua musin nadai bemain ba pekit nya.

United keterubah iya nguasa main enggau nguluka 2-0 ba setengah main keterubah nengah gol ari Matheus Cunha enggau Benjamin Sesko.

Taja pia, Liverpool majak nyerang pengudah masa kedua lebuh Dominik Szoboszlai enggau Cody Gakpo beambi ulih ari pengilap pemain beretan United lalu ulih ngenyamaka gol.

Main ke nyadi dalam gaya ke chukup ngalitka ati, pengujung iya diputuska ba minit kepenudi lebuh pasing Luke Shaw enda mujur dibuai ulih pemain beretan Liverpool sebedau datai ba Mainoo enggau siti serangan keterubah iya ke ngalahka penyaga gol Liverpool.

Gol nya datai semina tiga hari sepengudah pemain biak nya nyain kontrak baru pengelama lima taun enggau United, lalu nambahka reti agi ngagai pemanah main iya.

Dalam pemansang ke bekaul, legenda kelab Sir Alex Ferguson diripotka dibai pansut ari stadium ngena ambulans nyadika chara bejejaga pengudah napi isu pengerai maya meda main nya.

Pemenang nya ukai semina ngujungka United pulai ngagai Liga Champions, tang mega meda sida ngerikod pemenang dua kali ngelaban Liverpool keterubah iya kenyau ari musim 2015/2016.

Berebak enggau nya, pemujur nya mega ngenegapka penuduk Michael Carrick nyadi chalun jurulatih ke deka dipadu nyadi kepala jurulatih belama, sepengudah mujur nguluka United ngalahka semua kelab pemadu nyulut England nyengkaum Manchester City, Arsenal, Tottenham Hotspur enggau Chelsea musim tu. -RBI

PAKAN, 3 Mei – Chairman Kaunsil Industri Kayu Ramu Malaysia (MTIB) Datuk Larry Sng Wei Shien ngemeratka pemesai guna dalam ngenegapka organisasyen ba raban nembiak nyadika pelasar pemansang komuniti ti lebih teratur sereta progresif.

Nitih ku iya, genap iku individu patut meretika pangku pengawa gerempung dalam serakup, kelab, Komiti Pemansang enggau Pengelikun Genturung Pendiau (JKKK) enggau Biro Indu nentuka pengawa ngatur lanchar sereta efektif.

Iya madah munyi nya lebuh bejaku ba Woksop Penegap Organisasyen Nembiak Pelilih Pakan, ke diatur Kelab Nembiak Pakan Pakan enggau kerejasama Opis Nembiak enggau Lumba Sarikei sereta dipelanja Yayasan Hasanah sereta disukung APPGM-SDG.

“Nengah organisasyen ti tegap, kitai ulih ngenataika peminta bantu ari perintah tauka ejensi bukai enggau chara ti lebih teratur sereta meri empas,” ku iya.

Program tu dipeda nyadi pelasar ke beguna dalam meransang raban nembiak menua pesisir ngambika lebih chakah sereta bejalaika tanggungpengawa ke engkeman dalam pemansang komuniti lokal.

Kaban Parlimen Julau nya nambah, sukut pentadbiran mega patut diberi perati, kelebih agi ba pengawa ngatur rumah panjai, kelab enggau gerempung ngambika tetiap perambu ulih dipejalaika enggau sistematik.

Ngenang silik agi, iya ngaku penyampau enggau penegap kelab enggau gerempung ba sitak Parlimen Julau bedau datai ba tikas ti ke patut

Berindik enggau nya, iya nesau bala nembiak datai ke mua numbuhka mayuh agi gerempung enggau kelab nyadi pelasar dikena ngatur aktiviti ti meri penguntung sereta ngerembaika penemu ti positif dalam komuniti.

Berebak enggau nya, iya mega bisi madahka agih belanja penyampau RM5,000 ngagai Kelab Belia Pekan Pakan dikena nyukung pengawa bejalaika aktiviti sida.

“Aku deka seruran mendingka peminta rayat enggau raban nembiak sereta enggau naka ulih mantu,” ku iya.

Berebak enggau nya, iya madahka Opis Servis Parlimen Julau nyendiaka Wang Turu Pelajar Larry Sng (LSEF) dikena mantu peranak Julau nampung pelajar sida ngagai tikas ke tinggi agi.

Ku iya nerang, bantu nya mungkur pelajar di universiti tauka palan pelajar tinggi ungkup renggat Diploma enggau Ijazah, kelimpah ulih minta pelajar Sarjana enggau Doktor Falsafah. – RBI

#ruaiberitaiban#newsiban#beritaiban

Rindu | Titih | Kunsika

MELAKA, 3 Mei – Pengangkun Tati Clarissa Jane Ahap Fred Michael dalam nyaguka pesaka asal ngemujurka iya dichiri nyadi Champion Unduk Ngadau Kaamatan KDCA Melaka 2026.

Pemenang nya meri iya mandat besai ngarika nengeri Melaka ba Pekit Unduk Ngadau Renggat Nasional 2026, mai pengarap komuniti dalam ngangkatka basa budaya Kaamatan ngagai renggat ke tinggi agi.

Penuduk lumur dua iya nya Tati Ocelynevia Julian, ke mega enchuri perati bala akim enggau gamal iya ke chukup manah, lalu penuduk lumur tiga diempu Tati Goleret Rasmin.

Kelimpah ari kategori besai, sekeda anugerah khas mega bisi dipadahka.

Tati Ocelynevia Julian menang gelar Tati Kaanangan enggau penyampau undi 2,640, lalu Tati Sentrycella Floryana Juakim dipadu nyadi Tati Tosuau.

Gelar Tati Topiodo pulai ngagai champian, Tati Clarissa Jane Ahap Fred Michael.

Pekit tu ukai semina ngakim pemanah ari luar aja, tang mega mantaika pemanah budaya, pengalus pesaka enggau semengat Kaamatan ti majak ngerembai ba raban nembiak rebak baru. -RBI

#ruaiberitaiban#newsiban#beritaiban

Rindu | Titih | Kunsika

LIMBANG, 3 Mei — Kaban Kunsil Nengeri (ADUN) N.80 Batu Danau, YB Dato Paulus Palu Gumbang enggau bini iya, Datin Mary Sindang kemari udah ngabas Klinik Pengerai Kuala Mendalam ti napi pengerusak ketegal ribut kudi kena 1 Mei tu tadi.

Penemuai nya ngembuan tuju deka meresa takah pengerusak sereta ngulihka penerang pemadu baru bekaul enggau atur lengkas ti dipejalaika ejensi bekaul dikena nentuka pengelikun perengka guna enggau penerus servis pengerai ngagai peranak menua nya.

Berindik ari penusah nya, operasyen klinik nya dipindah sementara ngagai begunan lama klinik nya nyentuk pengawa ngemanah begunan baru nya tembu penuh.

Singkang tu diambi dikena nentuka servis pengerai terus bejalai enggau nadai putus.

Dato Paulus mega mantaika pengarap ati ngambika semua pengawa mulaika pemanah ti dipejalaika agensi perintah ti bisi kaul ulih dilengkaska sereta bejalai enggau lanchar, ke pemaik enggau pengelantang rayat di menua nya.

Sama bisi datai maya penemuai nya, Hjh Aspalela Bt Mohd Sahmoni (Sapit Residen Bagi Menua Limbang), Pn. Mariati Bt Samat (Sapit Pemesai Pelilih Limbang), Dr Norliza Bte Jusoh (Pemesai Pengerai Bagi Menua Limbang), Razemy Bin Badas (Pemesai Bomba Bagi Menua 2, Opis Bomba Bagi Menua Limbang), Puan Endrawati Anak Tuah (Pemesai UKAS Pelilih Menua Limbang) enggau Cr. Aaron Rachel (Pemesai Pentadbiran Khas PKWR N.80) — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

BETONG, 3 Mei – Pengawa nyiri baru enggau ngelantik baru tujuh iku Tuai Rumah ungkup sitak Spak nyadi batang fokus Program Ketuai Begulai Enggau Rayat ke diatur ba Rumah Panjai TR Gawan, Tapih, sehari tu.

Pengerami nya meda pengawa nyadi ketuai renggat baruh terus ditegapka nengah pengawa milih individu ti dipechaya ulih megai tanggungpengawa ngintu pengelantang sereta matak pemansang komuniti rumah panjai.

Pengerami nya dipunka enggau jaku pengelalu ari pengari pengatur pengerami sebedau dipenyadi enggau jaku pemuka ari Sapit Menteri Pemansang Nembiak Lumba enggau Main sereta Orang Dagang Sarawak ke mega Kaban Kunsil Nengeri (ADUN) sitak N.36 Layar, Dato Gerald Rentap Jabu ke disempulang bini iya, Datin Rosemarie.

Kelimpah ari pengawa nyiri tujuh iku Tuai Rumah nya, pengerami nya mega bisi meda pengawa nyuaka surat chiri ngagai Penghulu Ajang ti mangku pengawa ari ex-Penghulu Libau ke udah pinchin, lalu enggau nya nentuka penerus pengawa nyadi ketuai ba renggat komuniti.

Pengawa nyiri tu dipeda nyadi siti singkang ti beguna dalam ngenegapka struktur pentadbiran komuniti rumah panjai, kelimpah ari nentuka sada nyawa tetiap genturung pendiau ulih dikenataika enggau nyengala agi ngagai piak ti bekaul.

Program ti ngempuruka urung 20 iku pengari rumah panjai ari ngelingi Spak nya diatur dalam gaya ti penuh enggau penyerakup, mandangka kaul rat entara ketuai enggau rayat.

Penatai enggau kaul peranak ti chakah terang ngayanka sukung ti tegap ngagai pengawa ngenegapka ketuai kandang menua, kelimpah ari nyadika program tu nyadi pelasar ti beguna dikena mantaika utai ti diguna enggau aspirasyen komuniti.

Dikearapka pengawa ngatur program baka tu ulih terus dikena nentuka kaul entara ketuai enggau rayat seruran rat, ari nya meri pangka ngagai pemansang enggau pengelantang komuniti menua pesisir.

Sama bisi datai iya nya Kaban Parlimen Betong, Dato Dr Richard Rapu, Pemesai UKAS Betong Tony Malang enggau temuai kebukai.-RBI

Info & gambar kredit BetongXcess

#ruaiberitaiban#newsiban#beritaiban

Rindu | Titih | Kunsika

Raban indu Iban endang iya ngembuan pemajik, penau enggau penemu ke suah diangkat ba pengerami pemajik gamal tauka dikelala enggau Pekit Kumang.

Ngena awak tu, Ruai Berita Iban mantaika siku indu dara ke udah menggi gelar Kumang Menua Kakus 2026

Priscilla anak Sidi dipadu nyadi pemenang gelar Kumang ba Pekit Kumang 2026 ke diatur Parti Pesaka Bumiputera Bersatu (PBB) N.60 Kakus ke diatur ba Dinner World, ditu malam ensanus.

Pemenang Priscilla mandangka elegan, pengandal enggau nguasa budaya ti nyadi batang peminta ba pengawa milih pemenang Pekit Kumang, senipak enggau pengeransing negika pesaka enggau identiti indu Dayak, kelebih agi komuniti Iban.

Pengerami nya dipeda lebuh penyereta pansut mandangka pemanah pekayan asal sereta mantaika penau diri empu ba mua akim enggau temuai ke bisi datai, lalu enggau nya ngayanka penyelai seni menua tu enggau budaya ke chukup manah.

Program baka tu ukai semina nyadika pelasar dikena nyerungkai penau baru, tang mega nyadika pelasar dikena ngenegapka semengat beserakup sereta ngetanka pesaka asal ba raban nembiak rebak baru.

Pengawa ngatur Pekit Kumang ari PBB N.60 Kakus mega nerima sambut ke chukup manah ari komuniti menua nya ke bisi datai ngerichahka agi pengerami nya, lalu enggau nya mandangka komitmen ti meruan dikena negika seni enggau main asal di Sarawak.

Ngenang pasal pemujur iya, Priscilla nerangka pemenang nya siti basa ke besai sereta asil ari sukung ke tegap ari sida sebilik enggau komuniti ke ngelingi.

“Peturun apai aku ari Tatau, lalu peturun indai aku ari Song.

“Aku amat temegah ati enggau asal sereta pesaka kami sebilik ti nyadi pengering sepemanjai pejalai tu.

“Aku nyerahka pemenang tu kelebih agi ngagai apai indai aku ti seruran nyadi peransang enggau sukung,” ku iya enggau tuchum lebuh dirandau Ruai Berita Iban.

Iya mega mantaika juluk ati iya deka ngena pelasar nya terus ngangkatka budaya Iban sereta meransang rebak baru ngambika lebih agi ngemerat sereta ngetanka pesaka asal.

“Aku ngarapka ulih nyadi chunto ngagai raban nembiak ngambika terus berani mantaika identiti budaya kitai enggau temegah ati,” ku iya. -RBi

#ruaiberitaiban#newsiban#beritaiban

Rindu | Titih | Kunsika

KUCHING, 3 Mei — Kaban Parlimen Sri Aman, Dato’ Sri Doris Sophia Brodie, bisi datai meri basa kepenudi ngagai niang James Joshua Guang ba St Thomas Funeral Service Parlour, ditu sehari tu.

Kenu ku iya, pemidang niang ukai semina diasaika baka pengelenyau bakih lama, tang mega ninggalka empas ke chukup dalam ngagai dunya media menua tu.

“Niang siku penyukung tegap sereta kaban strategik media ti balat dikerinduka aku.Iya dikelala enggau pengawa ti silik, ulah ti jampat sereta komitmen ti tinggi dalam tetiap pengawa,” ku iya.

Ku iya nambah, jasa enggau dedikasyen niang sepemanjai pengidup iya deka terus dikingat semua ke udah gawa enggau iya.

Pemidang niang tu nyadi pengerugi besai, kelebih agi ngagai sida sebilik, bala bakih enggau komuniti media ke kala gawa enggau iya.

Dato’ Sri Doris Sophia Brodie mega ngenataika penyinu ati ngagai sida niang sebilik sereta besampi ngambika sida diberi pengering enggau penegap ati napi maya ti tusah tu.

Sama bisi nyempulang Sekretari Politik ngagai YAB Premier Sarawak Rosaline Neging —RBI

#ruaiberitaiban#newsiban#beritaiban

Rindu | Titih | Kunsika

KUALA LUMPUR, 3 Mei – Opis Menteri Pengerai Malaysia (KKM) mansutka jaku tangkan terit ngagai mensia mayuh ngambika lebih bejaga-jaga berindik ari gaya hari ti angat ke diatu benung nuntung sekeda nengeri, enggau tikas pengangat manggai entara 35°C enggau 37°C pengelama tiga hari bejurut.

Nitihka data ti dipansutka Opis Meteorologi Malaysia (METMalaysia) naka pukul 6.00 pagi sehari tu, nengeri Kedah, Kelantan enggau Sabah diatu ba tikas Jaku Tangkan Tikas 1 (Bejaga-jaga).

Ari 1 Januari nyentuk 3 Mei 2026, KKM ngerikod sepenyampau 56 kes penyakit bekaul enggau pengangat di serata menua.

Ari penyampau nya, 47 kes bekaul enggau penanggul lelak ketegal angat, ditangkan enggau empat kes strok angat ketegal bebendar gawa, empat kes strok angat enggau siti kes kelalu angat.

Lebih ngirauka ati, dua kes pemati ketegal strok panas mega diripotka taun tu. Kes keterubah bekaul enggau siku anak mit beumur dua taun ti ditinggal dalam sebuah entukar, lalu kes kedua bekaul enggau siku lelaki beumur 42 taun ti nyereta pekit marathon di Pulau Pinang.

Opis Menteri Pengerai nerangka, lama kena pengangat ke balat kelebih agi dalam rumah enggau maya aktiviti fizikal ke berat, nyadi faktor besai ke ngasuh penusah nya nyadi. Penusah tu tau ngasuh tubuh balat lenyau ai dalam tubuh sereta enda ulih ngatur pengangat tubuh enggau manah.

Analisis nya mega tetemuka 58 peratus kes bekaul enggau pengangat ketegal aktiviti fizikal maya hari angat. Urung setengah ari penyampau nya ngaul aktiviti lumba enggau main baka belanda neresa menua, latih enggau marathon, kelimpah ari latih intensif ari raban pengelikun.

Berindik enggau nya, Opis Menteri Pengerai minta mensia mayuh lengkas ngambi atur nagang dikena nyaga diri enggau diri sebilik. Tu nyengkaum nyekat aktiviti luar, ngirup mayuh agi ai amat, belelak ba endur ti teduh, sereta ngena gari ti enda tebal sereta ngelindung diri baka ngena selapuk tauka payung.

Raban ke bisi risiko baka anak mit, nembiak mit, orang tuai enggau individu ke bisi penyakit kronik mega patut diberi perati khas dikena nentuka sida mengkang gerai sereta enda kena pengangat ke balat.

Mensia mayuh mega diingatka anang ninggalka anak mit kediri dalam perengka pengangkut taja pan dalam timpuh ke pandak, lalu berubat enggau lengkas nyema bisi ngasaika kelai baka sebening, besintak isi tauka balat lelak.

Opis Menteri Pengerai mega minta semua piak nyengkaum ejensi perintah, institusyen pelajar enggau pengatur aktiviti luar beratika baru perambu program sida empu dikena ngurangka risiko penyakit bekaul enggau pengangat.

Penerang pemadu baru pasal status gaya hari angat ulih diambi nengah laman web rasmi Opis Meteorologi Malaysia, lalu garis lalau pengerai ulih diperunding ba portal Opis Menteri Pengerai Malaysia. -RBI

#ruaiberitaiban#newsiban#beritaiban

Rindu | Titih | Kunsika