BETONG, 21 April — Palan Servis Rayat Parlimen P.204 Betong begulai enggau ejensi ti bejalaika pengawa sehari tu udah ngatur sesi nyerahka ungkup Projek Mesra Rayat (PMR) 2025 di Rumah Panjai Sungai Kepayang, Layar.

Projek ti dipejalaika nya mungkur pengawa nyemin palan endur ngengkahka entukar, enggau tuju deka nambahka pengelantang enggau pengelikun peranak menua nya kelimpah nentuka pengawa ngena palan endur ngengkahka entukar lebih teratur sereta sistematik.

Inisiatif tu sebagi ari komitmen ti seruran dipejalai dikena ngenegapka perengka guna asas di menua pesisir, seriris enggau pengawa ngangkatka kualiti pengidup komuniti lokal.

Kaban Parlimen Betong, Dato Dr Richard Rapu madah, pengawa bejalaika projek ke bansa nya dikearap ulih meri pemaik ungkup timpuh ke panjai ngagai komuniti sereta nyukung guna ninting hari peranak menua nya.

“Dikearapka perengka guna ke disedia ulih dikena penuh peranak sereta diintu enggau manah ungkup pengelantang begulai,” ku iya.

Ku iya nambah, piak iya deka terus komited nentuka pengawa bejalaika projek pemansang ti meri empas terus ngagai rayat ba sitak Parlimen Betong. — RBI

KUCHING, 21 April – Pemujur terus dijapai Kaunsil Pemansang enggau Pengintu Tanah (LCDA) ba renggat serantau majak tegap, ti ngungkuka nerima aku ba Anugerah Pemujur Korporat & Kelestarian Asia 2025 di Bali ungkup pemansang enggau penumbuh ti meruan.

Neruska pemujur tu, dua buah anak kompeni ke diempu sepenuh iya, LCDA Holdings Sdn Bhd (LHSB) enggau LCDA Agri Business Sdn Bhd (LABSB), sekali agi ngasuh kaunsil nya temegah ati lebuh sida nerima kelala ti beprestij ba Pengerami Malam Anugerah Pemenang Asia dalam taun 2026 di Jakarta.

Pengerami nyuaka anugerah ke diatur Mediatama Awards Management ke nyadi ba Holiday Inn & Suites Jakarta Gajah Mada ngempuruka pemain industri tebilang ari serata Asia, lalu enggau nya nyadi panggau endur ngaku pemanah enggau inovasyen.

Ketuai Pemesai Eksekutif LABSB, Bibi Umizah Osman ngarika LCDA nerima anugerah ti disuaka Leo Setiawan.

Nitihka penerang ari LCDA, LHSB diberi Anugerah Penyedia Servis Korporat Pilihan Terbaik Asia enggau Penyedia Servis Korporat Terbaik 2026 dikena ngaku pemanah pengawa enggau pengulih ngenataika servis korporat ti bekualiti tinggi.

Berebak enggau nya, LABSB nerima Anugerah Pemansang Ladang Aktiviti Betanam Betupi Pilihan Terbaik Asia 2026 ketegal pemujur ti meransang dalam aktiviti betanam betupi enggau pemansang ladang, kelimpah ari pangku pengawa iya meransang pengawa dagang betanam betupi ti meruan.

LCDA madahka pemujur tu ngayanka komitmen kaunsil ti terus meri kuasa ngagai inisiatif pemansang ti meruan ti meri empas tinggi, kelimpah ari nentuka nilai dikenataika ba selampur portfolio.

Ku iya nambah, anugerah nya nengah proses pematau ti terit ari panel akim enggau sukung gerempung profesional sereta pengari media, bepelasarka kriteria kunsi baka kualiti, prestasi, tanggungpengawa enggau efektiviti.

“Pengawa menilai nya mega ngambi kira penemu ari mayuh bengkah piak nyengkaum mensia mayuh, pengatur organisasyen enggau pemeranak puku dikena nentuka proses milih ti terang, komprehensif sereta bepelasarka integriti,” ku penerang nya.

Pengerami Malam Anugerah Pemenang Asia 2026 nyadi pelasar ke beguna dalam meri puji ngagai gerempung ti mandangka pengawa nyadi ketuai, inovasyen enggau pemanah ba mayuh macham industri ba renggat Asia. -RBI

BAU, 21 April — Raban Penyaga Orang Periman Malaysia (APM) Pelilih Bau nengah Palan Kawalan Operasyen Pelilih Menua (PKOD) nerima kangau ngenyit ari mensia mayuh pukul 12.05 tengahari bekaul enggau penusah pun kayu tumbang di Kampung Sebobok, Bau.

Berindik ari nya, seraban APM Bau dianjung ngagai palan penusah nyadi ngambika bejalaika pengawa netak, ngupas sereta meresi dikena nentuka pengelikun peranak enggau pengelanchar kandang menua nya.

Gaya endur nya diripotka ulih dijaga lalu nadai sebarang bakal diripotka naka ke diatu.

Pengawa ti jampat dipejalaika nya ngayanka APM ti seruran nyikap diri napi penusah ngenyit, setipak enggau pangku pengawa nyadi ejensi baris mua ba pengawa mutarka penusah ngenyit enggau pengelikun mensia mayuh.

Berindik enggau nya, mensia mayuh dilalau ngambika seruran bejaga-jaga, kelebih agi maya gaya hari ti enda tentu ti bisi potensi ngenataika penusah baka pun kayu tumbang.

Sebarang penusah ngenyit tau disalur terus ngagai APM Bau nengah lumur 082-762925 tauka talipaun penusah ngenyit 999. — RBI

KOTA SAMARAHAN, 21 April – Universiti Teknologi MARA Pampang Sarawak mantah dawa bekaul bisi kuasa nyiri vendor balai makai kampus, berindik ari isu rega, pemeresi enggau atur pengawa ti dikemegau ba sebelah media rama ngaul kampus Samarahan nya.

Raban pengatur universiti ba siti penerang rasmi madah, pengawa nyiri vendor dipejalaika nitih atur sereta kompetitif nengah iklan tebuka ba surat berita menua tu enggau media rama.

Iya nyemetak madah, bala vendor ti ngenah pemakai ba Balai Makai Seri Mulu enggau Balai Makai Seri Gading bebida sereta nadai kaul enggau pangan diri.

Bepelasarka penerang nya, pengelantang pendiau nembiak mengkang nyadi pekara dikemerat lalu pengawa matau ti terit seruran dipejalai nyengkaum nentuka rega pemakai di kampus murah agi ari di luar.

Pia mega, sukut kualiti enggau pemeresi bela diberi perati.

Ungkup tuju matau, Komiti Pematau Palan Komersial (JKPRN) ti ditumbuh staf enggau nembiak deka bejalaika pengawa meresa sebarang maya penyuah empat kali sebulan ba semua premis makai.

Bala vendor mega dipinta nitih ke rega ti dipesetuju ba dokumen sebut rega enggau atur pengawa ti terit baka meri kompaun, surat tangkan, ngurangka tanda merit nyentuk ngetu kunterik enti ditemu ngelanggar atur.

Berindik ari sebana pemadu baru ba Balai Makai Seri Gading, JKPRN bisi bejalaika pengawa meresa ngenyit lengkas kena 10 enggau 14 April tu tadi.

Nangkan nya, jaku tangkan tumu bisi dipansut ngagai bala vendor bekaul.

Sida ke bejual mega digerah mandangka tanda rega enggau terang agi nengah chara masang banner, seraya ngeluarka resit nyadi mandatori ungkup tetiap transaksyen dikena nambahka penerang sereta ngemuntang pengawa mansik enti bisi sebana rega ke enda patut.

Berebak enggau nya, universiti nesau semua peranak kampus mantaika sebana sida nengah chara rasmi ke disedia ngambi pengawa mutar ulih dipejalai lengkas sereta efektif agi.

Pengawa mantai sebana mega udah ditambah nengah pengawa nyendia Kod QR ungkup Portal Sebana Palan Komersial ba palan ke strategik ngelingi kampus.

UiTM Sarawak nyemetak madah, raban sida enda belembut enggau sebarang pedagang ti enda nitih ke standard pemeresi enggau etika netap rega barang. -RBI

KUCHING, 21 April — Premier Sarawak, Datuk Patinggi Tan Sri (Dr) Abang Johari bin Tun Datuk Abang Haji Openg, bejadika Pengerami Muzium Pesaka Industri Brooke Dockyard, ditu kemari.

Bejaku ba pengawa nya, Premier Sarawak madahka bisi perambu deka ngemansangka projek tebing sungai sepemanjai 4.8 kilometer ti deka nyambung kandang endur Brooke Dockyard enggau Jematan Satok dikena nempa koridor dagang temuai besepadu bepelasarka pesaka enggau main asal.

Renggat keterubah projek nya dipelaba deka berengkah taun baru enggau agih belanja urung RM160 juta, lalu ditangkan enggau renggat kedua ti beungkus RM400 juta, ti deka ngayanka langkar arkitektur ti nyelai nyengkaum jalai bejalai kaki ti tinggi dikena nyaga pengelantang komuniti lokal.

“Pemansang tu deka meri peneleba ke bebida ngagai temuai, kelimpah nyambung elemen sejarah, budaya enggau pengidup komuniti ba kededua tebing sungai,” ku iya.

Iya mega nambah, Sarawak diatu bulih kelala antarabansa enggau sekeda kelala global nyengkaum Palan Pesaka Dunya Taman Negara Gunung Mulu enggau Taman Negara Niah, kelimpah ari kelai Kuching nyadi mengeri gastronomi.

Ku iya nambah, pengawa ngulihka kelala geopark ari UNESCO ungkup kandang menua Kuching Delta deka muka siti agi dimensi baru dalam ngenegapka penuduk Sarawak nyadi palan dagang temuai tikas dunya.

Berebak enggau nya, iya mega madahka penambah aksesibiliti nengah inisiatif penerebai bilun serantau AirBorneo deka nyadi pelasar ke beguna dalam mai mayuh agi temuai ngagai nengeri tu.

Iya mega meri besai terima kasih ngagai Opis Menteri Dagang Temuai, Industri Kreatif enggau Seni Persembahan Sarawak sereta Opis Muzium Sarawak ti seruran bebendar ngemujurka projek nya.

Sama bisi datai Sapit Premier Sarawak Datuk Amar Prof Dr Sim Kui Hian, Speaker Kaunsil Nengeri (DUN) Sarawak Tan Sri Datuk Amar Mohamad Asfia Awang Nassar, Menteri Dagang Temuai, Industri Kreatif enggau Seni Pemerindang Dato Sri Abdul Karim Rahman Hamzah, Menteri Industri Pemakai, Komoditi enggau Pemansang Kandang Menua Sarawak Dato Sri Dr Stephen Rundi Utom, Menteri Perengka Pengangkut Sarawak Dato Sri Lee Kim Shin, Sekretari Mendam Perintah (Perambu Ekonomi enggau Pemansang) Sarawak Dato Sri Dr Muhammad Abdullah Zaidel, Sapit-sapit Menteri sereta temuai dipebasa bukai. — RBI

TOKYO, 20 April — Ejensi Meteorologi Jepun mansutka gerah tsunami berindik ari penusah tanah berenyang ke nyadi ba tebing tasik timur laut Jipun urung pukul 4.53 lemai jam menua nya, sehari tu.

Opis Kedutaan Malaysia di Tokyo nengah siti penerang ngelalau semua rayat Malaysia enggau temuai ngambika seruran bejaga-jaga sereta nitihka penuh atur ari piak bekuasa kandang menua, kelebih agi ba kandang endur ke kena penusah nya.

Entara pelilih menua ke dikelala bisi risiko iya nya Hokkaido, Aomori enggau Iwate.

Nitihka penerang nya, mensia mayuh dipinta nyeliahka diri ngelawa pantai, lalu nitihka pengerembai berita bekau penusah nya sereta lengkas mindah ngagai endur ke tinggi agi enti diasuh piak bekuasa.

Ba penusah ngenyit, rayat Malaysia tau betanya ngagai Opis Kedutaan Malaysia di Tokyo nengah talipaun opis +81-3-3476-3840 (jam opis) tauka talipaun penusah ngenyit +81-80-4322-3366.

Tanya mega tau dianjung nengah email ngagai [email protected] tauka [email protected].

Ungkup ke diatu, piak bekuasa Jipun terus matau gaya nya lalu pemansang ke nangkanka nya deka dipadah ari setiap maya. -RBI

SIBU, 20 April – Aum Komiti Gerempung Pengajar Sarawak (STU) Ke-4 ungkup sesi 2026-2028 kena 17-18 April 2026 setuju nambahka pengari orang indu pemadu mimit 40 peratus dalam pengawa nyadi ketuai.

Presiden STU Kullin Djayang madahka, atur tu deka ngemunaska diskriminasyen penempa, sereta nempa budaya kereja ti likun ari pengawa ti enda manah ke “ngachau” bepelasarka penempa.

“STU setuju ngemeranka Polisi Penempa, iya nya polisi ari Gerempung Pengajar Antarabansa (EI).

“Semua kaban komiti setuju ngenukuka komitmen STU ngagai prinsip penyemaka, pengelurus enggau inklusif setipak enggau penetap undang-undang menua enggau standard antarabansa.

“Polisi tu ngembuan tuju deka nentuka semua kaban enda ngira lelaki tauka indu nerima hak, peluang enggau akses ke sama ngagai pengawa nyadi ketuai enggau latih,” ku jaku Kullin.

Penemu tu dipesetuju enggau semua pengawa STU ti diiring prinsip kunsi baka penyemaka, basa, meri kuasa enggau akauntabiliti.

Kelimpah ari nya, STU mega ngemeratka penempa dalam semua program enggau polisi, nyengkaum nengah latih, kimpin penyedar enggau ngena komunikasyen inklusif.

“Kerejasama enggau mayuh bengkah piak mega ditegapka dikena ngelaban pengawa ti enda betul ti bekaul enggau penempa dalam sektor pelajar.

“Semua prinsip tu engkeman ungkup tiap gerempung enggau tebal agi gerempung di menua tu,” ku iya. -RBISTU setuju nambahka pengari ari orang indu 40 peratus dalam pengawa nyadi ketuai

KUCHING, 20 April — Projek ngaga Jematan Sejingkat diatu udah ngerikodka penyulut fizikal 84.86 peratus, lalu enggau nya ngayanka penyulut ti meransang nuju penembu penuh.

Direktor Kereja Raya Sarawak, Datu Adj. Prof. Ir. Ts. Gs. Br. PMr. Dr. Cassidy anak Morris Cassidy, udah bejalaika pengawa ngabas palan dikena beratika baru pejalai projek nya sereta nentuka kereja ngaga bejalai nitihka spesifikasyen, standard teknikal enggau timpuh ke udah ditetapka.

Rambau penemuai nya, penerang silik pasal status projek ke diatu diberi Ir. Ts. Wang Say Kwang, mungkur pemansang pemadu baru enggau pemujur penyulut pengawa ngaga.

Berebak enggau nya, iya mega ngemeratka pemesai guna pengawa matau ti seruran dipejalai, nitihka sukut pengelikun enggau kerejasama rat entara semua raban dikena nentuka projek nya ulih ditembu dalam timpuh ti udah ditetapka.

Projek Jematan Sejingkat dikearap ulih ngemanahka agi rangkaian komunikasyen sereta nyukung pemansang sosio-ekonomi kandang menua enti udah tembu ila. — RBI

KUCHING, 20 April – Urung 714,000 penguna domestik di serata Sarawak deka ngasaika diskaun bil kuasa karan sepenyampau 25 peratus ungkup timpuh ari bulan April ngagai Disember 2026, berindik ari penerang dibantaika Premier Sarawak, Datuk Patinggi Tan Sri Abang Johari Tun Openg kena 16 April tu tadi.

Sarawak Energy nengah siti penerang madahka inisiatif nya ngembuan tuju deka ngelempungka tating belanja ngagai ruang bilik ti betapi enggau pemar ungkus pengidup dalam gaya ekonomi dunya ti mayuh pemar.

Nitihka penerang nya, diskaun nya mungkur guna kuasa karan ari bulan April nyentuk Disember 2026 lalu deka dipandangka enggau chara automatik dalam bil ninting bulan enggau nadai begunaka sebarang pengawa ngerejista tauka peminta.

“Ungkup bil April 2026, diskaun nya semina deka dipandangka ba bil Jun 2026,” ku penerang nya nerang.

Berebak enggau nya, Sarawak Energy nyemetak meri sukung penuh ngagai pengawa Perintah Sarawak dalam mantu rayat ngurangka tating belanja sida ninting hari.

Penguna ke nerima anggar bil diperansang ngaga kaul enggau Sarawak Energy dikena nentuka diskaun ke diterima ngayanka guna ke bendar.

“Dikena ngemudahka pengawa ngeluruska nya, penguna tau nganjung dokumen sukung baka gambar anggar bil enggau bacha meter nengah email [email protected], ejen maya CARINA tauka aplikasyen SEB Cares nengah guna ‘Make a Report’,” ku iya.

Ku SEB nambah, pengudah dientaska, penyampau bil deka disebela ngambika diskaun diberi bepelasarka guna ke bendar.

Penerang silik deka dikunsi nengah laman web rasmi, media rama enggau saluran servis penguna Sarawak Energy.

“Penguna dilalau ngambika nganjung ngagai platform rasmi dikena ngulihka penerang ke betul sereta bejimat enggau isi ke enda entas ari pun penatai ke enda rasmi,” ku iya.

Sebarang penerang tau ditanya ngagai Palan Servis Penguna Sarawak Energy ti beoperasyen 24 jam ba lumur 1300-88-3111, tauka nengah email enggau aplikasyen SEB Cares. -RBI

LAWAS, 20 April — Pesta Berau Adan Ba’ Kelalan 2026 deka diatur pengelama dua hari iya nya berengkah 24 Apri nyentuk 25 April tu bepalan ba Buduk Nur, Ba’ Kelalan Sarawak.

Sepemanjai pengerami tu ila, temuai deka bepaluang ngasaika diri empu enggau pengidup sereta main asal komuniti Lun Bawang nengah bemacham aktiviti interaktif baka nyendiaka Nuba Laya, kupi beras enggau ngaga pemakai asal baka kelupis enggau pansuh.

Kelimpah ari nya, bemacham program mega bisi diatur nyengkaum pengawa mandangka asil pengelandik jari, raun ngagai umai padi ba tanah tinggi Ba Kelalan kelimpah ari nemuai ngagai palan besejarah baka Memorial Konfrontasi di Long Langai, Telaga Garam Bukit enggau Pa’ Sarui Viewpoint.

Nambah mega, bemacham aktiviti kebukai bisi diatur baka lumba main rayat, pekit bol tampar, pekit nyumpit, pekit batak tali enggau pekit main bol 9 sepiak.

Pesta Berau Adan Ba’Kelalan 2026 ukai semina pengawa ninting taun aja, tang nyadi manifestasyen pesaka budaya, penyerakup pelilih menua enggau penyelai pengidup komuniti tanah tinggi ti majak dijaga nyentuk ke sehari tu.

Penerang ti silik, tau betelipun ngagai Lisa Buing ba lumur 0128936187 enggau Jeffery Balang 0138411001. — RBI