ALOR SETAR, 13 Jun — Kontinjen Sarawak ngerikod penyulut ti ngemegahka ati lebuh 10 buah sekula asrama ari nengeri tu dipilih ngarika Sarawak ba Anugerah Transformasyen Asrama MADANI 2025 ti diatur ba Frazel Expo and Convention Hall, ditu, kemari.

Penyereta nya mandangka komitmen enggau dedikasyen tinggi raban pelajar Sarawak dalam ngemujurka agenda Transformasyen Asrama MADANI ti diberi kelala Opis Menteri Pelajar Malaysia (KPM) dikena ngenegapka pengawa ngatur enggau ngemansangka nembiak ba institusyen asrama.

Lebih temegah agi, SMK Julau No.2 mujur ngemegahka Sarawak lebuh bulih Penuduk Keempat Anugerah Transformasyen Asrama MADANI 2025 Kategori Utama, lalu enggau nya nyadi pemujur pemadu manah kontinjen nengeri ba pekit tu.

Pemujur nya digambarka asil ari pengawa begempung semua staf sekula, nyengkaum pentadbir, pengajar, warden, staf sukung enggau sukung ti seruran ari apai indai enggau komuniti lokal dalam nempa ekosistem asrama ti kondusif sereta bekualiti.

Berebak enggau nya, pemujur ke dijapai mega ngayanka pengeran komuniti pelajar Sarawak dalam ngenegapka penyulut institusyen pelajar asrama setipak enggau aspirasyen Malaysia MADANI sereta agenda transformasyen pelajar nasional.

Kontinjen Sarawak diarika 10 buah sekula asrama ninting hari iya nya SMK Kubong, Limbang, SMK Merapok, Lawas, SMK Semop, Daro, SMK Jalan Oya, Sibu, SMK Julau No. 2, Julau, SK Lubok Tekurok, Limbang, SK Sungai Bukit Balai, Tatau/Sebauh, SK Nanga Machan, Kanowit, SK Melugu, Sri Aman enggau SK Saint Bernard, Padawan.

Pemujur nya dikearap ulih nyadi pemangkin ngagai semua komuniti pelajar Sarawak ngambika terus ngenegapka budaya nyulut sereta ngadaka rebak nembiak ti holistik, kompetitif sereta bepelasarka nilai MADANI. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SRI AMAN, 13 Jun – Pengawa ngenegapka penyedar rampa menua ba raban nembiak rebak baru majak ditegapka nengah Program Komunikasyen, Pelajar enggau Penyedar Mensia Mayuh (CEPA) enggau Kem Kampung ke diatur Opis Kampung Sarawak nengah Opis Kampung Wilayah Sri Aman ke diatur ba Sekula Primari (SK) Paku kena 11 enggau 12 Jun tu tadi.

Program dua hari berunggu nya mujur ngempuruka 65 iku penyereta ti mungkur bala nembiak enggau staf sekula enggau bemacham aktiviti bepelasarka pelajar rampa menua, nyaga kampung sereta nerenakka nilai sayauka pengeraja asal nengeri tu.

Entara batang isi program iya nya randau bekaul enggau pengawa ngaga gazet enggau ngintu kampung ti dikenataika Dr.Ahmad Ampeng enggau Rowina Ruth.

Sesi nya meri penerang senentang pemesai guna Rizab Kampung Kekal di Bagi Menua Sri Aman sereta mega pangku pengawa komuniti nyaga pengeraja asal kampung ungkup rebak dudi hari.

Bala penyereta mega bisi ngulu licha penyedar CEPA ti dikenataika Tingsan Kudang, ti ngemeratka pemesai guna ngaul komuniti dalam pengawa ngintu enggau ngatur pengeraja asal enggau meruan.

Nyadi kelai komitmen ngagai pengawa ngintu rampa menua, program nya mega bisi meda pengawa nanam 70 pun kayu bemacham bansa, nyengkaum pun tebelian, engkabang, doa enggau pun buah baka rian ba kandang sekula nya.

Pekara ti narit ati, bala penyereta mega dipeda enggau peneleba belajar bepelasarka konsep “Belajar sambil Nelusur” nengah mayuh macham aktiviti interaktif maya malam hari baka Kem Bomba enggau Becherita, ti ngembuan tuju nerenakka pengerindu sereta nambahka pemereti ati pasal pemesai guna kampung enggau biodiversiti enggau chara ti lebih santai sereta efektif.

Pengawa nutup program nya dipenyadika Syafiani Osman, ti ngarika Direktor Kampung Sarawak. Pengawa nya dipenyadi enggau pengawa nanam pun kayu simbolik ba kandang sekula ti ngaul temuai dipebasa, pengari UKAS, pengajar enggau penyereta.

Sama bisi datai Dr.Ahmad Ampeng, Kanang Anak Impin enggau Ting Sing Ren.

Program tu ngayanka komitmen Opis Kampung Sarawak ti seruran deka ngerembaika pelajar rampa menua sereta nempa rebak ti lebih sensitif, betanggungjawap sereta ulih ngaga ubah dalam ngintu pengeraja kampung Sarawak ungkup pemanah jemah ila. – RBI

#ruaiberitaiban#newsiban#beritaiban

Rindu | Titih | Kunsika

LONG BEMANG, 13 Jun — Sepenyampau 608 iku peranak ari 103 buah rumah di Kampung Long Bemang dituntung penusah ampuh bah ti nuntung kandang endur nya berindik ari ujan enda ngetu kenyau ari lemai kemari.

Nitihka ripot ari Gerempung Bomba Sukarela Long Bemang, penusah ampuh bah berengkah nyadi urung pukul 3.45 lemai, 12 Jun 2026.

Naka pukul 6.44 pagi sehari tu, tikas ai dirikodka peninggi 2.2 kaki lalu ngayanka trend ti majak niki, seraya gaya hari diripotka mendung.

Entara pekara ti dikelala nyadika kebuah penusah ampuh bah nyadi iya nya ujan ti enda ngetu sereta endur beberapa buah rumah besemak enggau sungai.

Taja pia, nadai pengawa mindah ngagai Palan Pengenduh Sementara (PPS) udah dipejalaika naka ke diatu lalu semua peranak ke kena penusah nya agi ba rumah sida empu.

Gerempung Bomba Volunteer Long Bemang mega ngelalau peranak ti kena penusah ngambika seruran bejejaga sereta ngambi atur bejejaga berindik ari tikas ai ti agi niki.

“Ripot pemadu baru deka diberi ari sesiti maya ngagai sesiti maya bepelasarka gaya ke nyadi diatu” ku penerang nya. RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SIBU, 13 Jun — Komitmen ti semampai ngenegapka sektor pelajar disalin ngagai pengawa nyuaka pemeri sepenyampau RM45,000 ari Kaban Kunsil Nengeri (ADUN) ungkup sitak N.59 Tamin, YB Ir. Christopher Gira Anak Sambang ngagai sekeda palan pelajar beserimbai enggau Pengerami Ngiling Tikai Opis Pelajar Pelilih Menua (PPD) Selangau ti diatur ba Hotel Kingwood, ditu, sehari tu.

Pengerami ke ngempuruka urung 830 iku apai indai, kepala pengajar, pengajar, staf pelajar enggau temuai ke dikangau ari serata Pelilih Selangau nya diatur nyadi pengerami nutup pengerami Gawai Dayak 2026 ungkup pengerami pelasar pelajar pelilih menua nya dikena ngenegapka baru komuniti pelajar, semengat begulai entara kaban komuniti pelajar enggau ketuai komuniti.

Datai nyadi temuai dipebasa, Christopher Gira ba jaku iya nyemetak madahka pelajar nyadi pelasar ke beguna dalam pemansang komuniti sereta puku ke pemadu manah dikena nyamin pengidup rayat jemah ila enggau penyulut nengeri.

Ba pengawa nya, iya nyuaka pemeri RM30,000 ngagai Gerempung Pelajar Pelilih Selangau, RM10,000 ngagai Gerempung Apai Indai enggau Pengajar (PIBG) SMK Julau enggau RM5,000 ngagai PIBG SK Dijih Selangau dikena nyukung pengawa bejalaika mayuh bengkah program pemansang akademik, kokurikulum nembiak.

Iya ngarapka pemeri nya ulih dikena enggau naka pemanah dalam pengawa ngangkatka pemanah pelajar, kelebih agi di menua pesisir.

Nitih ku iya, Perintah Sarawak seruran ngemeratka sektor pelajar laban nya kunchi besai dalam ngangkatka tikas pengidup rayat sereta ngadaka rebak ti bepenemu, bepengelandik sereta kompetitif.

“Perintah Sarawak seruran ngemeratka sektor pelajar laban kitai pechaya pelajar nyadi kunchi besai dikena ngangkatka tikas pengidup rayat.

“Nengah pelajar, kitai ulih ngadaka rebak ti bepenemu, bepengelandik sereta besemekih ngemansangka Sarawak enggau Malaysia,” ku iya.

Iya mega mantaika pengandal ngagai Selangau bisi penau nyadi palan pelajar ke beguna di tengah Sarawak setipak enggau pengawa bejalaika mayuh bengkah projek pemansang pelajar, nyengkaum ngaga SMK Selangau Baharu ke beungkus RM81 juta enggau Opis Pelajar Pelilih Selangau Baharu ke beungkus RM35 juta.

Ba pengerami ke sama, iya meri pengaga ati ngagai SMK Ulu Balingian ke nyulut ba peresa Sijil Pelajaran Malaysia (SPM) 2025 ke alai sekula nya ngerikodka 99.01 peratus chalun ke layak nerima setipikit nya enggau Gred Purata Sekolah (GPS) 4.13.

Pemujur ti ngemegahka nya mega mandangka dua iku nembiak bulih semua pemutus peresa A, siku teulihka 9A seraya 21 iku nembiak mujur teulihka pemutus peresa 5A ke atas. Kelimpah ari nya, 11 ari 15 subjek ke bisi diberi ngerikod tikas pas 100 peratus.

Christopher Gira madahka pemujur nya nyadika bukti sekula menua pesisir bisi penau nyapai penyulut sebaka enggau sekula bukai enti nerima sukung enggau komitmen ti tegap ari bala pengajar, apai indai enggau komuniti.

Pengerami nya diatur dalam gaya pemanah ati enggau penyerakup, lalu enggau nya mandangka komitmen begulai semua pengereja pengawa pelajar ngambika terus ngangkatka kualiti pelajar sereta ngadaka modal mensia ti bekualiti ungkup penyulut Selangau, Sarawak enggau menua tu.

Sama bisi datai Pemesai Opis Pelajar Pelilih Menua Selangau, Encik Ringgit @ Gawan anak Saut; Pemesai Opis Pelajar Pelilih Julau, Encik Dali; Kepala Pengajar SMK Ulu Balingian, Encik Echi, pia mega bala prinsipal, kepala pengajar, pemesai pelajar enggau pengari sekula ari baruh PPD Selangau. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

MUKAH, 13 Jun – Kaban Kunsil Nengeri (ADUN) Tellian, Royston Valentine, nyadi chairman Aum Pengatur Komiti Kereja Pengerami Fiesta Rakan Muda @ Mukah Tikas Nengeri Sarawak 2026 ti diatur kemari.

Aum nya dikena ngatur pengawa nyendiaka diri ke penudi sereta ngenegapka kerejasama entara mayuh bengkah ejensi enggau komiti kereja ti bisi kaul ngemujurka program nya.

Sama bisi datai iya nya Pemangku Sapit Direktor Opis Nembiak enggau Lumba Nengeri Sarawak (JBSN Sarawak), Hafizah Dahlan, begulai enggau pengari ejensi perintah sereta raban ke bisi pemerat.

Dalam aum nya, Royston ngemeratka pemesai guna komitmen enggau koordinasyen ti efektif entara semua piak dikena nentuka pengawa ngatur Fiesta Rakan Muda @ Mukah 2026 bejalai enggau lanchar sereta nyapai juluk ti ditagit.

Penerang program nya dikenataika Hafizah Dahlan ti nerangka enggau silik aktiviti, perambu logistik enggau pangku pengawa tetiap komiti dalam nentuka pengawa bejalaika program nya lanchar.

Bemacham penemu enggau timbal ari ejensi ke bekaul mega bisi dikerandau nyadi singkang dikena ngelengkaska pengawa nyendiaka diri sebedau ngatur program nya.

Program Fiesta Rakan Muda @ Mukah Renggat Nengeri Sarawak 2026 diperambu deka diatur kena 27 ngagai 28 Jun 2026 ba UiTM Pampang Sarawak, Kampus Mukah.

Program tu deka mantaika bemacham aktiviti ti ngerinduka ati ti ngemeratka pemansang raban nembiak, volunteer, nyadi ketuai, lumba enggau main, rekreasyen enggau ngaul komuniti.

Pengawa ngatur program tu dikearap ulih nyadi pelasar pemadu manah dikena ngenegapka raban nembiak, meransang penyereta chakah dalam aktiviti komuniti sereta ngenegapka rentayan kerejasama entara raban nembiak enggau komuniti di serata Sarawak. – RBI

#ruaiberitaiban#newsiban#beritaiban

Rindu | Titih | Kunsika

KOTA SAMARAHAN, 13 Jun — Siku lelaki peranak menua tu beumur 41 taun ditangkap ketegal dipelabaka bisi kaul enggau pengawa nyual ai ketum dalam operasyen ti dipejalaika Bagi Pansik Jenayah Narkotik Pelilih Menua (BSJND), Indu Opis Polis Pelilih Menua (IPD) Kota Samarahan Samarahan ba Kampung Binyok R/Scheme KCH/Kota Samarahan Expressway, tengahari kena Hari Satu tu tadi.

Nitihka penerang IPD Samarahn, operasyen ke dipejalaika urung pukul 12 tengah hari nya betuaika Insp. Jasni anak Nimos begulai enggau tim kaban BSJND berindik ari pengawa pemansik enggau meresa ti dipejalaika ba belakang sebuah rumah ba genturung pendiau nya.

“Asil peresa nya tetemuka tiga butul ngundan ai bechura gadung keruh ti dipelabaka ai ketum kelimpah ari tong cat bechura kuning-putih ti ditanda ‘Nippon Paint’ ti dipelaba dikena ungkup tuju proses tauka nyimpan utai nya,” ku penerang nya.

Polis madahka penyampau semua ke dirampas dipelabaka 4,500 mililiter enggau rega makit urung RM135.

Pansik tumu tetemuka saspek ngaku ai ketum ke dirampas nya enggi iya lalu ngaku bisi kaul enggau pengawa nyual utai nya kenyau ari bulan Januari taun tu tadi.

Bekal nya dipelabaka diulih ari siku individu ti semina dikelala enggau nama “Mie” nengah pengawa betunga mua.

Nitihka penerang, peresa nisih keterubah ti dipejalaika ba saspek tetemuka lelaki nya negatif dadah, lalu pengawa meresa rikod iya ke udah tetemuka iya nadai ngembuan sebarang rikod jenayah ke bekaul.

Diatu saspek ditan ba lokap Balai Polis Kota Samarahan dikena mantu pengawa mansik silik agi, seraya kes dipansik ari baruh Seksyen 30(3) Akta Racun 1952.

Polis ngingatka mensia mayuh iya nya pengawa proses, nyadung tauka nyual ai ketum nyadi penyalah berat nitihka undang-undang.

Enti dikenuku salah, pesalah tau diukum mata duit nyentuk RM100,000 tauka dijil nyentuk lima taun tauka kededua ukum nya.

IPD Kota Samarahan mega ngemeratka komitmen sida deka terus chakah agi bejalaika pengawa ngelaban pengawa salah guna sereta ngagihka ai ketum dikena nentuka pengelikun enggau pengelantang komuniti seruran dijaga.

BETONG, 13 Jun — Eksibisyen Raja Kita 2026 renggat Sarawak, ke diatur beserimbai enggau Pengerami Ngintu Hari Pengada Rasmi Yang Di-Pertuan Agong, udah nyadi medium ke efektif agi dalam mai institusyen Raja Perlembagaan semak agi enggau rayat.

Sapit Menteri Nembiak, Lumba enggau Pemansang Orang Dagang Sarawak ke mega Kaban Kunsil Nengeri (ADUN) sitak Layar, Datuk Gerald Rentap Jabu ngulu pengawa ngelancharka program keterubah nya ke nyadi ba Reruai Eksibisyen Raja Kita.

Ku iya, pengawa pemandang nya ukai semina mandangka sejarah enggau pemansang institusyen Yang di-Pertuan Agong, tang mega nyadi pelasar pelajar ti mantu rayat meretika chara enggau penuduk institusyen diraja nyadi tiang penegap menua, penyerakup enggau pengelantang.

Nitih ku iya, pengawa ti angkunka sejarah enggau pangku pengawa Institusyen Diraja beguna amat dalam nempa raban bansa ti angkunka pesaka bansa sereta ngetanka nilai patriotisme ti nyadi pelasar penyulut bansa.

“Program baka tu meri peluang ngagai rayat kelebih agi rebak baru ngelala enggau semak agi pejalai sejarah institusyen diraja enggau pemeri iya dalam nempa identiti Malaysia nyadi sebuah menua ti bedaulat sereta beserakup,” ku iya.

Berindik enggau nya, iya meransang rayat Layar enggau selampur Bagi Menua Betong ngambi awak nya ngabas pengawa pemandang ti bisi mandangka bemacham kereban sejarah, dokumentasyen enggau penerang ti ngerinduka ati bekaul enggau institusyen diraja menua tu.

Kelimpah ari ngulihka penemu, bala temuai mega bisi awak ngasaika mayuh macham pemakai menua tu ke disedia nengah Betong Kitchen sepemanjai program nya, lalu enggau nya meransang pengerami ti mesra rayat.

Eksibisyen Raja Kita Renggat Sarawak 2026 dikearap nyadi siti ari pematak besai di Betong nengah chara ngempung elemen pelajar, pesaka asal enggau dagang temuai komuniti, lalu enggau nya ulih ngerapitka kaul entara institusyen diraja enggau rayat dikena ngenegapka semengat bansa. – RBI

#ruaiberitaiban#newsiban#beritaiban

Rindu | Titih | Kunsika

KUCHING, 13 Jun — Platform media rama ‘Facebook’ diripotka napi pengeruga servis ti balat berindik ari beribu iku penguna di serata dunya bepenanggul ngulihka aplikasyen enggau laman web nya.

Nitihka penerang ari palan nyidi pengawa ngachau servis, IsDown, lebih 5,700 ripot penguna dirikod dalam timpuh 24 jam ke udah, ti nunjukka penanggul udah nyadi ti benung ngeruga operasyen platform nya.

IsDown ngentaska sida udah tetemuka pengawa ngachau ke aktif ngaul Facebook, enggau isu nya dipelabaka nuntung penguna ba sekeda menua.

Entara menua ke ngerikodka penyampau sebana ke pemadu mayuh iya nya Amerika Syarikat enggau Filipina, ti nunjukka pengawa ngachau nya nyadi enggau mayuh sereta ukai semina ba siti kandang endur ke spesifik.

Bepelasarka rikod IsDown, pelasar matau nya udah nyidi pengerai servis Facebook kenyau ari bulan Januari 2023 lalu ngerikod 137 insiden dalam timpuh nya.

Berebak enggau nya, ripot media antarabansa madahka pengawa ngachau nya mega ngeruga sekeda servis bukai ari baruh Meta nyengkaum Instagram enggau Messenger.

Meta ngaku bisi penanggul ti ngeruga akses ngagai servis iya lalu madahka iya benung gawa mulaika gaya nya enggau naka pengelengkas.

Taja pia, kebuah ke bendar penusah nya bedau ditemu lalu timpuh pemulihan penuh bedau ditetapka.

Penguna ke ngasaika penanggul nguna Facebook dilalau ngambika terus nitihka pemansang ke diatu sereta nganti penerang pemadu baru ari Meta bekaul enggau pengawa ngachau nya. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUCHING, 12 Jun — Orang indu di Bukit Saban diperansang terus ngangkatka pengelandik diri sereta beambi ulih ari mayuh macham program pemansang kapasiti enggau pengawa dagang dikena mantu ngulihka penatai pemisi sereta ngenegapka ekonomi ruang bilik.

Sapit Premier Sarawak Datuk Amar Douglas Uggah Embas ke mega Kaban Kunsil Nengeri (ADUN) sitak N.37 Bukit Saban madah, pengawa ngenegapka orang indu deka terus nyadi entara batang agenda perintah berindik ari pemesai guna raban tu dalam pemansang ruang bilik enggau komuniti.

Nitihku iya, pengawa ti enda ngetu deka dipejalaika begulai enggau Kaban Parlimen Betong, Dato Dr Richard Rapu, dikena nentuka mayuh agi program pemansang enggau ngangkatka pengelandik ulih diberi kelala ungkup pemaik orang indu ba kandang menua Betong.

“Kitai dekaka orang indu ngembuan pengelandik ke ulih disalin ngagai peluang ekonomi sereta nyadi pun penatai pemisi ke meruan ungkup ruang bilik sida,” ku iya lebuh bejaku ba Program Ngangkatka Pengelandik Manduk Orang Indu N.37 Bukit Saban ke diatur Indu PBB Pampang Bukit Saban ke diatur ditu sehari tu tadi.

Ku iya, pesereta patut ngena penuh penemu enggau peneleba ke diulih sepemanjai program tu lalu bekunsika penemu nya enggau komuniti ba kandang menua sida empu ngambika pemaik iya ulih dikerembaika ngagai mayuh agi orang indu.

Program pengelama tiga hari nya meri eksposur teori enggau praktikal ngagai pesereta dalam mayuh bengkah sukut nyendiaka pemakai, nyengkaum latih ngaga enggau nggoreng mi kuning, nyendiaka mayuh macham menu kulinari enggau kus mantaika pemakai.

Datuk Amar Douglas Uggah mega madah, sekeda program nangkan nya udah diperambu dikena ngerembaika peluang ekonomi ngagai orang indu menua pesisir, nyengkaum latih ngaga manik enggau dabung, seni beranyam enggau betanam betupi moden nengah chara fertigasyen.

Nitih ku iya, inisiatif tu sebagi ari pengawa perintah ti seruran dipejalaika kena ngenegapka orang indu nengah bemacham program pemansang kapasiti enggau pengawa dagang, lalu enggau nya ulih mantu nyungkak penatai pemisi ruang bilik enggau pengelantang ruang bilik ba kandang menua Bukit Saban.

Sama bisi ngulu program nya Datin Amar Dato Doreen Mayang enggau Ketuai Indu PBB Pampang Bukit Saban, Natasha Nasa Uggah. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SELANGAU, 12 Jun – Perintah terus ngayanka komitmen dalam ngenegapka agenda pelajar menua pesisir lebuh pengawa ngaga baru Opis Pelajar Pelilih Menua (PPD) Selangau ke beungkus RM35 juta deka nyadi pengepun ngemanahka agi sistem meri pelajar di pelilih tu.

Ku Kaban Kunsil Nengeri (ADUN) sitak Tamin, Ir. Christopher Gira Sambang, pengawa beranakka puku ke besai dalam sektor pelajar nyata ngayanka penegap perintah nentuka tetiap nembiak di Selangau bisi akses ngagai perengka guna pelajar ke lebih bekualiti, moden sereta kondusif.

Iya madah munyi nya lebuh bejadika Pengerami Nasih Tanah Taba ungkup pengawa ngaga PPD Selangau ti nyadi sehari tu.

Dalam jaku dipansutka iya, Gira nyemetak madahka pelajar nyadi batang pelasar pemansang sesebengkah raban bansa sereta patut diberi perati ti seruran dikena ngadaka rebak ti bepenemu, bepengelandik sereta ulih meransang penyulut nengeri enggau menua.

“Pengawa ngaga PPD baru Selangau ukai semina nyendiaka begunan pentadbiran aja, tang nyadi puku strategik dikena ngenegapka pengawa ngatur pelajar, ngangkatka pemanah pengawa meri servis sereta nyukung pemanah sekula ari baruh pentadbiran pelilih menua,” ku iya.

Nitih ku iya, begunan baru ke disikap enggau perengka guna pentadbiran moden deka mantu ngangkatka koordinasyen enggau aktiviti ngatur pelajar, lalu enggau nya meri penguntung terus ngagai raban pengajar enggau nembiak di serata pelilih menua Selangau.

Gira mega nyemetak madahka pemansang pelajar di Selangau ukai semina ngaga PPD aja, tang perintah benung bejalaika projek ngaga baru ungkup Sekula Sekondari (SMK) Selangau ke beungkus RM81 juta kelimpah bemacham projek ngaga baru enggau ngangkatmanah sekula repuk di menua pesisir.

“Lebuh perengka guna pelajar dikemanah, kitai ukai semina nyendiaka palan belajar ke manah agi, tang mega ngadaka modal mensia ke bekualiti ke ulih nyaup pemansang Selangau, Sarawak enggau menua tu jemah ila,” ku iya.

Iya mega madahka sekeda projek pelajar bukai benung sereta deka dipejalaika nyengkaum ngaga ganti baru buding nembiak lelaki enggau dewan makai kelimpah ari kereja ngangkatmanah sistem bekal ai berubat di SMK Ulu Balingian.

Kelimpah ari nya, perintah mega beratika pengawa ngaga baru sereta ngangkatmanah sekula ti begunaka perengka guna ke manah agi baka SK Sungai Sepiring, SK Batu 36, SK Dijih enggau SK Penghulu Imban.

Iya ngarapka semua projek ti udah diperambu ulih dipejalaika nitihka timpuh ngambika penguntung nya ulih diasaika komuniti menua nya sereta nyadi pematak ngagai penyulut pelajar enggau pemansang sosio-ekonomi di kandang menua Selangau selampur.

Sama bisi datai Pemesai Pelilih Selangau, Yalin Assan ngarika Residen Bagi Menua Sibu enggau Sapit Pemesai Pelajar Pelilih Selangau, Joanes Tulang. – RBI

#ruaiberitaiban#newsiban#beritaiban

Rindu | Titih | Kunsika