DEBAK, 27 Jun — Pengawa ngatur Saribas International Traditional Archey Inviatation 2026 (SITA2026) ba Dewan Perpaduan Debak terus ngenegapka penuduk main asal nyadi pesaka budaya enggau potensial tinggi dalam sektor dagang temuai lumba enggau main di Sarawak.

Kaban Parlimen Betong, Dato’ Dr. Richard Rapu, nerangka pekit nya nyadi pelasar beguna dalam ngempung pemanah asal ari menua tu enggau menua luar, lalu ari nya ngerapitka kaul bakih sereta ngenegapka penyerakup komuniti.

Ku iya, pengawa ngatur SITA2026 ukai semina nyendiaka ruang endur betukar pengelandik enggau peneleba entara pesereta, tang mega meri pangka ngagai pengawa ngelakuka Sarawak nyadi palan lumba enggau main sereta pesaka budaya entarabansa.

“Aku ngenataika pengaga ati ke pemadu tinggi ngagai Kelab Pemanah Saribas enggau semua piak ke udah ngemujurka pekit tu,” ku iya ba sebengkah penerang.

Pengerami bejadika SITA2026 dipenyadika YB Datuk Dr. Mohammad Razi Sitam ti nyadi Sapit Menteri Pemansang Pengelantang Komuniti Sarawak ti mega Kaban Kunsil Nengeri (ADUN) N.35 Saribas.

Nitih ku Dr.Richard Rapu, pemujur ngatur program ke baka tu nyata ngayanka pengulih komuniti menua tu ngatur pengerami betikas antarabansa sereta bisi potensial digaga nyadi pengerami ninting taun jemah ila. RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KAPIT, 27 Jun – Pengawa muka rentayan jalai nuju Kapit nyadi pematak ngagai transformasyen pemansang bagi menua tu, lalu enggau nya muka jerana baru dikena nyadika Kapit sebuah mengeri ti ngembuan konsep siru eko enggau ruang bilik ti nyelai jemah ila.

Premier Sarawak, Datuk Patinggi Tan Sri (Dr) Abang Haji Abdul Rahman Zohari Tun Datuk Abang Haji Openg, madahka akses jalai alun ke manah agi udah ngubah landskap pemansang Kapit ke sebedau tu bepanggai penuh ba perengka pengangkut sungai, kelimpah ari muka ruang ngagai mayuh agi pengawa beranakka puku, dagang enggau penumbuh ekonomi.

Iya madah munyi nya ba aum pengarang berita pengudah nembuka Program Sarawakku Sayang 2026 Bagi Menua Kapit, ditu, sehari tu.

Nitihku Abang Johari, seriris enggau ubah tu, perintah nengeri merambu deka ngemansangka Kapit nyadi mengeri moden, meruan nengah chara ngemeratka pengawa ngintu rampa menua enggau pengelantang ruang bilik.

Dikena ngamatka pengingin nya ku iya, perintah udah nganjung seraban pemesai ari Kapit ke Bergen, Norway meresa model pemansang mengeri ti tau nyadika malin.

“Aku bemimpi Kapit nyadi sebuah mengeri ti nyelai, siru ke rampa menua enggau ruang bilik,” ku iya.

Ku iya, pemansang baru nya ukai semina ngaul pengawa ngaga infrastruktur moden aja, tang mega ngemeratka aspek perambu mengeri ti komprehensif nyengkaum landskap, palan gadung, palan rekreasyen enggau nyendiaka perengka guna mensia mayuh ti bekualiti.

Nitih ku iya, perintah diatu benung ngatur Pelin Kandang Menua dikena nentuka pemansang Kapit dipejalaika enggau teratur, meruan sereta nangkup guna peranak jemah ila.

Ku iya, pengawa ngemansangka mengeri tu deka dipejalaika berenggat dikena nentuka tetiap projek ulih diperambu enggau silik setipak enggau penumbuh ekonomi enggau penyampau tubuh.

Abang Johari nyemetak madahka transformasyen Kapit deka nyadi entara agenda ke besai perintah Sarawak dalam ngenegapka pemansang kandang menua dalam, lalu enggau nya nempa mengeri moden, meruan sereta bekualiti endur rebak dudi hari diau. – RBI

#ruaiberitaiban#newsiban#beritaiban

Rindu | Titih | Kunsika

KAPIT, 27 Jun – Perintah Sarawak ngenegapka agenda pemansang modal mensia nengah 64 program belajar ari baruh Skim Pelajar Tinggi Percuma (FTES) dikena nyendiaka diri ngasilka pengereja pengawa ti bepengelandik tinggi ti ulih nangkup guna industri jemah ila, setipak enggau pemansang jampat teknologi pemintar tiru (AI), ekonomi gadung enggau makit karbon.

Premier Sarawak, Datuk Patinggi Tan Sri (Dr) Abang Haji Abdul Rahman Zohari Tun Datuk Abang Haji Openg madah, pengawa beranakka puku dalam pelajar enggau pemansang modal mensia nyadi pelasar ti beguna dikena nentuka rayat Sarawak nyikap diri napi ubah ba rampa ekonomi dunya ti majak diiri enggau teknologi.

Nitih ku iya, perintah nengeri deka terus ngeluruska polisi pemansang ngambika setipak enggau ubah dunya, nyengkaum penyulut AI, ekonomi digital, kuasa gadung enggau makit karbon ke diatu muka peluang ekonomi baru.

“Dunya kemaya hari tu jampat amat berubah ketegal pemansang teknologi.Nya kebuah perintah enda tau enda seruran ngaduka polisi pemansang ngambika rayat mega teulihka penguntung ari ubah tu,” ku iya.

Iya madah munyi nya ba aum pengarang berita pengudah nembuka Program Sarawakku Sayang 2026 Bagi Menua Kapit, ditu, kena Hari Enam tu tadi.

Ku Abang Johari, teknologi pemintar tiru nyengkaum ngena Model Jaku Besai (LLM) ngubah chara ekonomi, pentadbiran enggau bemacham sektor strategik beoperasyen, nya alai Sarawak patut nyikap diri enggau polisi ti lebih dinamik dikena nentuka nengeri tu terus mengkang kompetitif.

Ku iya, Sarawak mega ngembuan pengelebih nyadi nengeri elektro-petro, ti ngempung pengeraja asal kuasa hidro enggau petroleum dikena nyukung pemansang industri beteknologi tinggi sereta ngenyampatka pengawa berubah ngagai ekonomi kurang karbon.

Berebak enggau nya ku iya, kampung Sarawak diatu ukai agi semina dipeda nyadi pun penatai kayu, tang lebih agi ngembuan rega ekonomi baru nyadi “penyerap” karbon ti muka peluang dagang karbon nitihka protokol entarabansa setipak enggau Sempekat Paris 2015.

“Kampung diatu nyadi “penyerap” karbon lalu muka peluang dagang karbon nitihka protokol antarabansa,” ku iya.

Abang Johari nyemetak madahka pemansang ekonomi progresif patut disebelaka enggau aspek pengelantang rampa menua, pengerai mensia mayuh enggau pengelantang rayat ngambika penguntung ari transformasyen ulih diasaika enggau komprehensif selampur komuniti Sarawak. – RBI

#ruaiberitaiban#newsiban#beritaiban

Rindu | Titih | Kunsika

KAPIT, 27 Jun – Perintah Sarawak deka majakka pengawa ngangkatmanah urung 5,700 kilometer jalai batang di serata nengeri tu nengah chara berenggat dikena ngenegapka rentayan komunikasyen, ngemanahka akses enggau nyungkak pemansang sosioekonomi, kelebih agi di menua pesisir enggau kandang menua ulu.

Premier Sarawak, Datuk Patinggi Tan Sri (Dr) Abang Haji Abdul Rahman Zohari Tun Datuk Abang Haji Openg madah, pengawa bejalaika projek ke meri empas tinggi nya begunaka agih belanja ke tinggi lalu deka dipejalaika nitihka pemerat bepelasarka guna tetiap kandang menua.

Nitih ku iya, perintah meretika pengarap rayat deka ngasaika perengka guna jalai alun ke manah agi, tang pengawa bejalaika nya begunaka pengawa berenggat berindik ari ungkus ngaga ke besai.

Iya madah munyi nya ba aum pengarang berita pengudah nembuka Program Sarawakku Sayang 2026 Bagi Menua Kapit, di Kapit, sehari tu tadi.

Abang Johari madah, Bagi Menua Kapit aja bisi urung 1,700 kilometer jalai batang ke patut diangkatmanah, lalu Bagi Menua Baram mungkur urung 2,000 kilometer.

Ku iya, kelimpah ari Kapit enggau Baram, projek ngangkatmanah jalai batang di Lawas, Limbang, Sri Aman enggau sekeda bagi menua bukai di Sarawak.

“Semua iya, bisi urung 5,700 kilometer jalai batang di Sarawak ti deka diangkatmanah sereta dirikod nyadi jalai mensia mayuh,” ku iya.

Ku iya, pemansang infrastruktur nya deka meri empas besai ngagai kandang menua pesisir ti jampat mansang, lalu ari nya ulih ngerapitka kaul entara komuniti sereta muka mayuh agi peluang ekonomi.

Nitih ku iya, rampa pemansang di Kapit mega udah jauh berubah enti dibandingka enggau sebedau tu lebuh pemar ungkup peranak enda agi bepanggai ba perengka pengangkut bot ekspres, tang udah ngalih ngagai pematut ngangkatmanah rentayan jalai alun berindik ari pemansang enggau penyampau perengka pengangkut ti majak nambah.

Ku Abang Johari, ubah nya nyadika bukti bemacham inisiatif pemansang ti dipejalaika perintah udah mujur muka akses ti manah agi ngagai rayat, kelimpah ari meransang penumbuh ekonomi di kandang menua ulu.

Iya nyemetak madahka perintah deka terus ngenegapka rentayan jalai alun di serata Sarawak nyadi pematak kunsi pemansang pelilih menua, pengelantang rayat enggau penumbuh ekonomi ti meruan agi. – RBI

#ruaiberitaiban#newsiban#beritaiban

Rindu | Titih | Kunsik

KAPIT, 27 Jun – Perintah Sarawak deka ngerembaika konsep sekula pintar nengah pengawa ngena pelasar belajar digital enggau teknologi ‘pemintar tiru’ (AI) nyadi sebagi ari agenda ngubah sistem pelajar nengeri nuju ngagai sistem pelajar ti lebih moden, inklusif sereta kompetitif.

Premier Sarawak, Datuk Patinggi Tan Sri (Dr) Abang Haji Abdul Rahman Zohari Tun Datuk Abang Haji Openg, madahka perintah nengeri beratika pengerembai teknologi AI ti jampat mansang dalam sektor pelajar dikena nentuka bala anak Sarawak enda tinggal napi jeman digital.

Nitih ku iya, pengawa ngena AI meseti dikena enggau tanggungpengawa sereta dipejalaika nitihka garis lalau ke engkeman ngambika teknologi nya ulih ngangkatka pemanah proses ngajar enggau belajar.

“Kitai deka ngaga kelas pintar ti ngena pelasar digital.Nengah pelasar tu nembiak ulih ngulihka mayuh macham subjek nyengkaum teknologi AI,” ku iya.

Iya madah munyi nya lebuh dikerandau raban media pengudah nemuai ngagai Sekula Kebangsaan Kampung Baru Kapit enggau palan Padang Bilun Lama Kapit, ditu, kena Hari Enam tu tadi.

Ku Abang Johari, transformasyen pelajar ukai agi semina fokus ngagai pengawa ngaga begunan sekula aja, tang lebih agi ngemeratka pengawa ngena teknologi digital dikena ngerembaika akses ngagai pelajar ti bekualiti.

Nitih ku iya, pelasar digital ti deka diberi kelala ulih meri peluang ngagai nembiak kelebih agi di menua pesisir nitihka isi pelajar ti setanding enggau nembiak di kandang mengeri.

Ba pemansang ke sama, iya madahka perintah Sarawak mega majakka pengawa ngangkatmanah sekula repuk di serata nengeri nengah chara berenggat dikena nyendiaka palan belajar ke lebih lantang sereta kondusif.

Ku iya, beberapa buah sekula udah mujur tembu, seraya mayuh agi projek ngangkatmanah deka terus dipejalai dikena nentuka tetiap iku nembiak Sarawak ngasaika perengka guna pelajar ke manah agi.

Iya nyemetak madahka gempung pemansang infrastruktur pelajar enggau aplikasyen teknologi digital enggau AI deka nyadi pengerawang ngagai pengawa ngasilka modal mensia ti bepengelandik tinggi ti udah sedia napi pemar ekonomi jemah ila. – RBI

#ruaiberitaiban#newsiban#beritaiban

Rindu | Titih | Kunsika

KAPIT, 27 Jun – Perintah Sarawak merambu deka ngemansangka palan pengentap pendiau khas ungkup veteran Raban Soldadu Malaysia (ATM) di Kapit dikena meri terima kasih ngagai jasa enggau pengawa sida ngagai menua.

Premier Sarawak Datuk Patinggi Tan Sri (Dr) Abang Haji Abdul Rahman Zohari Bin Tun Datuk Abang Haji Openg madah, kandang endur nya udah dikelala lalu deka dikemansang nyadi palan pengentap pendiau ke lebih diperambu ungkup raban veteran ke bisi tanah ba endur nya.

“Kitai udah ngemendarka siti kandang endur ungkup veteran ke kala gawa nyadi soldadu.

“Sida udah meli tanah ba sitak nya lalu kitai deka ngemansangka rumah enggau genturung pendiau khas ungkup veteran soldadu,” ku iya.

Iya madah munyi nya ngagai media pengudah ngabas Sekolah Kebangsaan Kampung Baru Kapit enggau palan Padang Bilun Lama Kapit, ditu, kena Hari Enam tu tadi.

Nitih ku iya, perambu pemansang nya deka dikenataika ngagai Kaunsil Perambu Nengeri ngambika dipejalaika nangkan ke nya ngambika pengawa bejalaika projek nya ulih diteruska.

Ku iya, pemansang nya mandangka komitmen Perintah Sarawak terus ngintu pengelantang pendiau orang ke kala nyadi soldadu ke udah gawa ke menua tu.

“Enggau penemuai tu, aku empu ulih meda gaya kandang menua tu lalu kami deka mai perambu tu ngagai renggat nangkanka nya ngambika ulih nyadi nyata,” ku iya.

Ba pemansang ke sebaka, Abang Johari madahka kandang endur ngelingi padang bilun lama Kapit ke suba mega deka dikemansang nyadi sebagi ari pelin pemansang baru ungkup mengeri Kapit.

Nitih ku iya, pemansang nya nyengkaum nyendiaka infrastruktur baru, pengawa mindahka peranak ba kandang endur ti likun agi ari risiko ampuh bah enggau pemansang rampa mengeri ti lebih moden sereta meruan.

Ku iya, transformasyen nya dikearapka ulih ngubah menua Kapit nyadi sebuah mengeri ti lebih lantang endur diau diatur, likun sereta ulih diuan, enggau nya nyukung agenda pemansang timpuh panjai perintah Sarawak. – RBI

#ruaiberitaiban#newsiban#beritaiban

Rindu | Titih | Kunsika

KAPIT, 27 Jun – Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg sehari tu udah bejalaika penemuai kereja ngagai Projek Diperambu Ngemansangka Baru Sekula Repuk di Nengeri Sarawak (Renggat 1) ba SK Kampung Baru ti ngena ungkus RM1 billion ti udah tembu penuh dalam bulan November 2025.

Projek beungkus RM12.84 juta ti berengkah dipejalaika dalam taun 2021 nya siti ari inisiatif besai Perintah Sarawak dalam ngenyampatka pengawa ngemansangka baru sekula repuk dikena nyendiaka endur belajar ti lantang agi, likun sereta nangkup guna pelajar kemaya hari tu.

Penatai Premier Sarawak disambut Direktor Kereja Raya Sarawak, Datu Dr.Cassidy anak Morris sebedau iya diberi penerang enggau lenak bekaul pengawa bejalaika projek nya, skop pemansang sereta penguntung ke diasaika sekula enggau komuniti lokal.

Entara batang komponen projek nya nyengkaum ngaga blok akademik empat ringkat enggau blok pentadbiran empat ringkat ti penuh enggau sistem Mekanikal enggau Karan (M&E).

Projek tu mega nyengkaum kereja luar baka ngaga dinding penagang, jalai bejalai kaki konkrit tegap (RC), sistem parit enggau pengawa masang pagar pengelikun.

Perengkaguna baru ke udah dikemansangka nya diatu meri penguntung ngagai 260 iku nembiak begulai enggau 43 iku pengajar sereta staf sekula nengah chara nyendiaka palan belajar ke lebih moden, kondusif sereta likun, lalu enggau nya nganti begunan lama ke udah repuk sereta enda engkeman agi dikena.

Rambau penemuai nya mega, Premier Sarawak bisi ngabas perengka guna ke udah tembu sereta meri pengaga ati iya ngagai semua piak ke bisi kaul dalam nentuka projek nya ulih ditembuka enggau mujur ba tuju ngangkatka kualiti pelajar, kelebih agi di menua pesisir.

Pengawa bejalaika projek tu mandangka komitmen Perintah Sarawak ti seruran bejalaika pengawa begulai enggau Perintah Besai dalam ngenegapka pemansang infrastruktur pelajar sereta nentuka tetiap iku nembiak di nengeri tu bisi akses ngagai perengka guna belajar ti bekualiti ti nitihka standard ke diatu. – RBI

#ruaiberitaiban#newsiban#beritaiban

Rindu | Titih | Kunsik

BAU, 27 Jun — Polis Pelilih Bau benung bejalaika pansik bekaul enggau kes enda beradat enggau enchuri kabel telekomunikasyen ke nyadi ba substesyen CelcomDigi di Jalai Jambusan, Bau.

Nitihka penerang ari Ketuai Polis Pelilih Bau P/Supt. Mohd. Haide bin A.Rahman penusah nya ditemu pengudah siku juruteknik kompeni telekomunikasyen ngaga ripot kena 26 Jun 2026 urung pukul 2.13 lemai, lebuh tetemuka pengerusak enggau pengelenyau sekeda perengka guna ke beguna ba endur nya.

“Penusah nya dipelabaka nyadi kena 25 Jun 2026 urung pukul 3.15 lemai, lebuh orang ke ngaga sebana datai ba endur nya ngambika kereja ngemanah berindik ari putus arus penyambung lalu tetemuka sekeda perengka sistem bekal kuasa udah putus, rusak sereta nadai,” ku penerang nya.

Entara perengka ke diripotka lenyau sereta rusak iya nya set unit rectifier, kabel kuasa AC ngagai rectifier, beberapa unit kabel kuasa DCPD enggau dua bank bateri, enggau pengerugi dipelabaka urung RM30,000.

Pansik tumu tetemuka saspek dipelaba tama ngagai kandang endur substesyen nengah chara muntas pagar ‘chain-link’ sebedau nebuk nengah dinding kabin ngambika ulih tama ngagai premis nya.

Endur ke jauh sereta nadai sistem pengelikun ke befungsyen mega dikelala entara kebuah penusah nya nyadi.

Kes tu dipansik ari baruh Seksyen 431A Kanun Keseksaan enggau Seksyen 235 Akta Komunikasyen enggau Multimedia 1998.

Naka ke diatu, nadai orang ditangkap, tang pengawa nyidi saspek benung dipejalai.

Mensia mayuh ti bisi penerang bekaul enggau penusah tu dipinta datai ke mua mantu tasat nengah chara ngaga kaul enggau IPD Bau tauka pemesai pansik kes.

Polis mega ngelalau semua operator infrastruktur telekomunikasyen ngemanahka sukut pengelikun nyengkaum masang sistem matau ti befungsyen dikena nyeliahka penusah ke sebaka nyadi baru. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KAPIT, 27 Jun — Pengerami Ngiling Bidai Ejensi Pemansang Ulu Rajang (URDA) 2026 nyadi pelasar beguna dalam ngenegapka semengat beserakup sereta ngenegapka komitmen ba pemansang ti enda ngetu di kandang menua Ulu Rajang.

Kaban Parlimen Kapit, Dato Sri Alexander Nanta Linggi madah, pengerami nya ukai semina pengerami nutup pengerami Gawai aja, tang mega kelai penyerakup enggau penyerakup komuniti dalam pengawa nempa pengidup ke lebih lantang jemah ila.

Iya nyemetak madahka tetiap pengari rayat ke nyadi kaban Ejensi Pemansang Ulu Rajang (URDA) bisi pangku pengawa enggau tanggungpengawa diri empu dalam ngiring bala komiti ke udah dilempaika, dikena nentuka tetiap pelin pemansang dipejalaika enggau teratur sereta ngasi.

“Perambu ti teratur, kerejasama rat enggau komitmen ari semua piak beguna amat dikena nentuka agenda pemansang ba kandang URDA terus ditegapka ungkup pengelantang rayat,” ku iya.

Nitihku iya, pengawa bejalaika mayuh macham projek pemansang ari baruh URDA enggau agih belanja sepenyampau RM1.5 bilion ti udah sereta benung dipejalai mandangka komitmen perintah terus dalam pengawa ngenegapka pemansang kandang menua pesisir di Ulu Rajang.

Berindik enggau nya, iya ngenataika pengaga ati ngagai RECODA enggau URDA sereta semua piak ke bisi kaul enggau pemujur projek pemansang nya.

Iya mega nyemetak madahka pengawa tu meseti terus disukung perintah ngambika perambu pemansang ke udah dilangkar ulih diteruska ungkup pemaik rayat, nengeri enggau menua.

Sama bisi datai Ketuai Pemesai Eksekutif RECODA, Datuk Haji Ismawi Haji Ismuni. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SARIKEI, 27 Jun — Sapit Menteri Digital, YB Datuk Wilson Uggak Kumbong bisi datai bejadika Pengerami Ngiling Bidai 2026 ke diatur ba Dewan Sentrak Sarikei, ke diatur Ketuai Kaum enggau Ketuai Komuniti Pelilih Pakan ari kangau YB Dato Rolland Duat anak Jubin.

Kenu ku iya, Ngiling Bidai tu sebengkah tradisyen ti penuh enggau rega budaya sereta simbolik terima kasih ngagai asil taun tu.

Berebak enggau nya, iya bejalaika tanggungpengawa ti beguna dalam pengawa ngenegapka penyerakup, ngerapitka kaul diri sebilik sereta nerenakka semengat beserakup entara komuniti, kelebih agi ba kandang DUN Meluan.

Dalam jaku dipansutka iya, iya mantaika pengarap ati ngambika pengerami ke baka nya terus ditegapka nyadi pelasar dikena ngintu sereta negika pesaka asal, kelimpah ari ngenegapka penyerakup komuniti pupu bansa sereta nerenakka semengat begulai ungkup pemansang Sarawak ti terus dipejalaika.

“Pengerami Ngiling Bidai 2026 ukai semina ngerami tradisyen aja, tang mega mandangka pengelantang enggau penegap kaul komuniti menua pesisir dalam ngetanka identiti budaya ti udah diturun ari serak ngagai serak” ku iya.

Pengerami tu mega diintu enggau penatai ADUN Krian YB Friday Belik enggau ADUN Engkelili YB Dr. Jonichal Rayong Ngipa.

Sama bisi datai Sekretari Politik, ketuai opis enggau ejensi perintah, kelimpah ari ketuai suku bansa enggau komuniti setempat. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika