KUCHING, Mei 11 — Ejensi Mutarka Penusah Ngenyit Menua (NADMA) sehari tu bejalaika Operasyen Menih Remang (OPA) di Sarawak dikena mantu nambahka ujan sereta mulaika tikas ai ba kandang endur besai enggau tekat ai nengeri tu.

Operasyen ti dipejalaika ari Pangkalan Langit Kuching nya ngaul kandang endur ti ditagit iya nya Tekat Ai Bakun, Murum enggau Batang Ai nengah kerejasama Soldadu Langit Diraja Malaysia (TUDM), Opis Meteorologi Malaysia (MET Malaysia) enggau Komiti Mutarka Penusah Ngenyit Nengeri Sarawak (JPBN).

Direktor Besai NADMA, Meor Ismail Meor Akim bisi datai matau pengawa bejalaika operasyen nya begulai enggau Direktor Seksyen Pelaksanaan Operasi NADMA, Datuk Mazli Mazlan, pengari JPBN Sarawak sereta mega pemesai enggau staf MET Malaysia.

Sebuah bilun C-130 enggi TUDM dikena bejalaika operasyen nya, mai empat tangki ‘larutan garam’ sepenyampau 6,000 liter ungkup proses ngemenih remang ba kandang endur ke ditagit.

Operasyen berengkah urung pukul 1.05 lemai lebuh bilun terebai nuju kandang endur Tekat Ai Bakun enggau Murum sebedau datai urung pukul 2.06 lemai.

Dua tangki larutan garam dilepaska pukul 2.25 lemai ba kandang endur nya.

Bilun nya udah nya neruska penerebai ngagai kandang endur Tekat Ai Batang Ai lalu datai urung pukul 3.30 lemai sebedau dua tangki larutan garam ke agi tinggal disembur ba kandang endur ngelingi. Operasyen nya tembu enggau penuh pukul 4.00 lemai.

Nitihka penerang ari MET Malaysia, gaya awan ngelingi kandang endur ke ditagit nunjukka bisi remang cumulus ke engkeman dikena bejalaika operasyen nanam awan.

Peratika radar gaya hari mega tetemuka ujan berengkah labuh urung pukul 3.30 lemai ba kandang endur Tekat Ai Bakun enggau Murum, lalu kandang endur Tekat Ai Batang Ai nerima ujan berengkah ari pukul 4.30 lemai lalu majak nyadi nyentuk ke diatu.

Pengawa bejalaika OPA sehari tu dianggap mujur lebuh ujan ulih dibai nurun ba semua kandang endur ke ditagit.

Ungkup rikod, kepenudi operasyen nanam remang dipejalaika di Sarawak iya nya ba taun 2019.

Pengawa bejalaika tu digaga berindik ari peminta ari Opis Penyangga Penusah Ngenyit Sarawak berindik ari tikas ai nurun ba kandang endur nakung ai enggau tekat ai ti nyadi pun penatai bekal ai domestik di nengeri tu. — RBI

KUCHING, 11 Mei – Tuai Pemegai Menua (TYT) Negeri Sarawak, Tun Pehin Sri Wan Junaidi Tuanku Jaafar, sehari tu udah Bejadika Aum Kelima Dewan Undangan Nengeri (DUN) Sarawak Ke-19 ba Dewan Aum Kunsil Negeri Sarawak.

Penatai Tun Pehin Sri begulai enggau Toh Puan Datuk Patinggi Fauziah Mohd Sanusi disambut enggau pengawa bebaris sebedau tama ngagai balai aum lalu ngemujurka pengawa bejadika aum nya enggau rasmi.

Tun Pehin Sri disempulang Tan Sri Datuk Amar Mohamad Asfia Awang Nassar nyadi Speaker Dewan Undangan Negeri Sarawak, Sekretari Dewan Undangan Nengeri Sarawak enggau Bentara Aum.

Berebak enggau nya, TYT Tun Pehin Sri nerima teks jaku polisi ari Datuk Patinggi Tan Sri Abang Abdul Rahman Johari Abang Openg sebedau ngenataika jaku bejadika aum.

Dalam jaku dipansutka iya, TYT Tun Pehin Sri ngemeratka pemesai guna penegap politik, pengawa merintah ti efisyen enggau penyikap Sarawak napi pemar dunya nyengkaum ekonomi dunya ti enda tentu, ubah gaya hari enggau pemansang teknologi ti jampat.

Iya mega mantaika pengandal ngagai pengawa bejalaika Strategi Pemansang Pengudah COVID-19 2030 (PCDS 2030) nyadi pemansut besai transformasyen Sarawak nuju ekonomi bepenatai pemisi tinggi, kelebih agi nengah pemansang sektor kuasa tau dikena baru, ekonomi digital, industri teknologi tinggi enggau aeroangkasa.

Kelimpah ari nya, Tun Pehin Sri mega ngemeratka pengawa perintah ti seruran bebendar dalam ngerapitka seraka pemansang entara kandang mengeri enggau menua pesisir nengah pengawa ngemanahka infrastruktur pemun, penyambung, pemansang modal mensia enggau pengawa ngenataika servis mensia mayuh ti lebih efisyen, inklusif sereta bepelasarka integriti.

Iya mega minta semua Kaban Dewan terus ngenegapka penyerakup, pengelantang enggau ketuai ti bisi visyen dikena nentuka Sarawak terus mansang enggau meruan sereta lantang ngambika semua rayat ulih ngasaika.

TYT Tun Pehin Sri mega mantaika pengandal iya ngambika sesi tu bejalai enggau lanchar lalu ngambika semua Kaban Dewan ulih berandau enggau chara tuai runding, betukuh sereta bisi tanggungpengawa ungkup pemaik rayat enggau pemansang nengeri Sarawak. -RBI

PAKAN, 11 Mei – Kaunsil Pemansang Industri Getah Pekebun Mit (RISDA) diatu mangku pengawa nyadi pemeli besai produk getah ari pekebun mit dalam pengawa ngetanka rega makit sereta nentuka raban nya ngasaika penguntung ke manah sereta konsisten.

Nengah chara baru nya, pengawa meli peku getah, kelapis getah enggau getah rangkai dipejalaika terus ba rumah panjai tauka kebun dandang besai nengah pengawa ngatur RISDA Plantation Sdn Bhd enggau bayar mata duit diberi tekala nya ngagai pekebun mit.

Direktor RISDA Sarawak, Shaharuddin Saberi madah, inisiatif nya ukai semina mantu nyungkak penatai pemisi pekebun mit tang mega ulih ngurangka sida bepanggai ba orang tengah ti sebedau tu siti ari batang pemar industri getah.

Nitihku iya, RISDA mega bebendar ngemeratka pengawa bejalaika Program Getah Tebiar dikena nentuka pun getah ke udah tuai enda ditejuka tauka enda diguna, lalu ari nya ulih nyungkak produktiviti sektor nya.

Ku iya, program tu dipechaya ulih muka peluang ngagai mayuh agi pekebun mit ngambika chakah baru dalam sektor nangkal getah ke sebedau tu kurang nerima perati ketegal rega makit ke enda entap.

Iya madah munyi nya lebuh bejadi Program Pengelantang Pekebun Mit (PKPK) RISDA Bagi Menua Betong di Rumah Indit Munang, Pakan pagi tadi ke mega siti ari Genturung Pendiau Hevea Lestari ari baruh kemata RISDA Bagi Menua Betong.

Ba pemansang ke sama, RISDA pechaya ulih nyapai tagit pemansut getah menua sepenyampau satu juta metrik tan ujung taun 2030 nengah pengawa bejalaika PKPK ari baruh Pelin Strategik Pengelantang Lestari Pekebun Mit (SKEMA).

Ku Shaharuddin, program nya digaga dikena ngenegapka sosio-ekonomi komuniti pekebun mit nengah chara ti lebih fokus sereta meri empas tinggi, kelimpah ari nagit penyereta dua juta iku pekebun mit tauka Kaban Ruang Bilik (AIR) di serata menua.

Nitih ku iya, pengeransing nya berat dikena nentuka pekebun mit enda tinggal ari arus pemansang industri komoditi menua seraya meransang sida pulai gawa ba kebun dandang besai ke udah ditinggalka.

“Kitai dekaka pekebun mit chakah baru betanamka kebun dandang besai sida empu lalu RISDA deka terus ngiring sereta nyukung sida ngambika ulih ngamatka aspirasyen Sapit Menteri Besai ke mega Menteri Pemansang Menua Pesisir enggau Kandang Menua, Datuk Seri Dr Ahmad Zahid Hamidi, ngambika Malaysia nyadi sebuah ari pengeluar getah ke pemadu tebilang di dunya,” ku iya.

Kelimpah ari ngenegapka sukut ekonomi, RISDA mega mantaika pengirau ati ke pengelantang pendiau komuniti pekebun mit nengah pengawa nganjung 100 bakul pemakai ke ngundan barang ke diguna baka beras, minyak makai, tepung enggau gula.

Pemeri tu dikena mantu ngelempungka tating ungkus pengidup bala pekebun mit getah, kelebih agi dikena nyendiaka diri ngintu Hari Gawai kena 1 Jun tu ila.

Sama bisi datai Pemesai RISDA Bagi Menua Betong, Siti Hajrah Mohamed Gaus, Menijar Wilayah RISDA Plantation Sdn Bhd Sarawak, Fakrul Azfar Saadan@Sa’adon enggau Tuai Rumah Indit Munang. – RBI

SPAOH, 11 Mei — Sepenyampau 94 buah rumah panjai ba sitak Kunsil Nengeri (DUN) Bukit Saban udah nerima bantu Projek Mit Menua Pesisir (MRP) ti nyadi sebagi ari pengawa perintah Sarawak ti majak dipejalaika dikena ngenegapka pemansang komuniti sereta ngangkatka pengelantang pendiau komuniti menua pesisir.

Sapit Premier Sarawak, Datuk Amar Douglas Uggah Embas madah, bantu ke diungkupka nya ngaul pemeri ngagai Komiti Pemansang enggau Pengelikun Genturung Pendiau (JKKK) enggau Biro Indu rumah panjai dikena nyukung pengawa bejalaika program komuniti, pemansang rama enggau aktiviti komuniti besemak.

Iya madah munyi nya lebuh bejaku ba Pengerami Nyuaka Chek MRP DUN Bukit Saban ke diatur ba Spaoh, kena Hari Minggu tu tadi.

Nitihku iya, perintah Sarawak komited nentuka pemansang menua pesisir terus ditegapka nengah bemacham inisiatif ti meri penguntung terus ngagai rayat, kelebih agi ba pengawa ngangkatka tikas pengidup enggau ngenegapka ekonomi komuniti.

Berebak enggau nya, iya mega madahka sekeda projek pemansang ekonomi benung diperambu ba sitak nya, nyengkaum projek nanam sawit enggau lada dikena muka peluang mansutka penatai pemisi ngagai peranak menua pesisir.

Kelimpah ari nya, perintah mega bisi nyendiaka agih belanja sepenyampau RM5,000 ungkup tetiap pintu rumah panjai dikena bejalaika projek ngemanahka genturung pendiau dikena nentuka pengelantang enggau pengelikun peranak dijaga.

Berebak enggau nya, Kaban Parlimen Betong, Dato Dr Richard Rapu ngarapka bantu MRP ti disalur ulih dikena penuh bala penerima bejalaika program enggau aktiviti ti meri empas positif ngagai genturung pendiau rumah panjai sida empu.

Sama bisi datai Residen Bagi Menua Betong Richard Datu Michael Abunawas, Pemesai Pelilih Betong Laga Kueh, Pemesai Tadbir Spaoh Denny Lim enggau Sekretari Kaunsil Pelilih Betong Lister Clement Guwie. — RBI

MIRI, 11 Mei — Menteri Pelajar, Fadhlina Sidek ngulu Program Randau di Palan Pematih Institut Pengajar (IPG) Kampus Sarawak begulai enggau raban ari Opis Menteri Pelajar Malaysia (KPM), sehari tu tadi.

Program tu nyadi pelasar interaksyen enggau kaul entara Menteri Pelajar enggau staf IPG Kampus Sarawak, kelimpah ari meri penerang senentang Langgur Pelajar Malaysia (RPM) 2026–2035 ngagai pengelicha enggau nembiak.

Dalam sesi nya, Fadhlina Sidek mega ngemeratka komitmen KPM ngenegapka sistem pelajar menua nengah chara pelajar mensia, pemansang modal mensia ti bekualiti sereta ngenegapka profesyen pengajar setipak enggau aspirasyen Malaysia MADANI.

Iya mega nyemetak madahka pangku pengawa institusyen pelajar pengajar beguna amat dalam ngadaka raban pendidik ti bekualiti sereta kompetitif dikena napi guna sistem pelajar menua jemah ila.

Udah nya, iya ngulu Pengerami Nyambut Pelajar Cemerlang SPM 2025 Pelilih Miri, Baram enggau Subis ti diatur ba SMK Baru Miri.

Sepenyampau 99 iku nembiak dirami ba pengerami ti ngaul mayuh bengkah sekula ari pelilih menua nya meri puji ngagai penyulut sida ba peresa Sijil Pelajaran Malaysia (SPM) 2025.

Pengerami nya mega dirichah enggau penatai bala apai indai sereta komuniti menua nya kelai sukung ngagai pemanah pelajar bala anak sereta pengawa ti enda ngetu dikena ngenegapka sektor pelajar di Sarawak.

Program tu setipak enggau aspirasyen Opis Menteri Pelajar nengah rambai jaku “Guru Bitara, Nadi Negara” ti ngemeratka pangku pengawa pengajar nyadi pengerembai besai pemansang pelajar enggau kuing menua jemah ila.

Sama bisi datai Sapit Ketuai Direktor Pelajar Malaysia (Sektor Operasyen Sekula), Zainal Abas; Direktor Pelajar Nengeri Sarawak, Omar Mahli; pemesai kanan KPM, staf Opis Pelajar Nengeri Sarawak, staf enggau nembiak IPG Kampus Sarawak. — RBI

BINTULU, 11 Mei — Projek Pemansang Pengelandik Komuniti (PPKK) Bintulu terus komited ngenegapka pemansang sosio-ekonomi komuniti nengah pengawa ngatur Makmal Pemansang enggau Pemansut Produk Kraf Aksesori Sugu Tinggi (Renggat 1) ti diatur kena 7 Mei, 2020 tu tadi ba Dewan Suarah Bintulu.

Program pengelama empat hari nya digulu 35 iku pesereta ari komuniti menua nya ti bepeluang ngulu latih intensif bekaul enggau pemansang sereta ngasilka produk kraf aksesori ti diiri enggau pesaka asal menua nya.

Sepemanjai program nya, bala pesereta diembing Pemesai Kraf Jari Sarawak begulai enggau orang dagang kraf menua tu, Louise Anak Kelaman, nengah sesi belajar teori enggau latih praktikal dikena ngangkatka pengelandik sida ngasilka produk kraf ti bekualiti enggau potensial ulih dikomersial.

Pengawa bejalaika program tu ngembuan tuju deka ngenegapka penemu enggau pengelandik komuniti dalam bidang asil pengelandik jari, lalu enggau nya muka peluang penatai pemisi sereta ngangkatka tikas ekonomi komuniti lokal.

Kelimpah ari nerenakka kreativiti enggau inovasyen ba pengawa ngasilka produk kraf, program tu mega nyadi pelasar dikena ngetan sereta ngangkatka seni pesaka asal Sarawak ngambika seruran relevan sereta kompetitif.

Raban pengatur mega meri besai terima kasih ngagai semua pesereta ketegal komitmen enggau pengeran ti dipandangka sepemanjai program nya lalu ngarapka penemu enggau peneleba ke diulih ulih dikena ungkup pemansang ekonomi komuniti di Bintulu.

Program tu mai aspirasyen “Kraf Ngenegapka Sosio-Ekonomi Rayat” setipak enggau pengawa ti seruran dipejalaika dikena ngenegapka industri kraf menua tu nyadi siti ari pemangkin pemansang komuniti. — RBI

SIBU, 11 Mei – Siku baya lelaki ke ngembuan lebih 13 kaki pemanjai sereta dianggarka pemerat urung 280 kilogram udah mujur ditangkap Tim Nangkap Baya Belesen Sibu di Kampung Sebenak, Daro, kena Hari Enam nyin tadi.

Operasyen nya dipejalaika berindik ari jelu reptilia nya suah dipeda ba kandang sungai kampung nya ti ngasuh peranak menua nya irau ati.

Ketuai tim, Jeferry Siew madah, operasyen nya asal iya diperambu deka dipejalaika pengelama dua minggu, tang dalam kandang beberapa hari dua iku baya udah ditangkap dalam panjuk ke udah ditetapka.

Nitihku iya, siku ari baya nya mujur mutuska tali panjuk sebedau ngelarika diri lalu dipelabaka besai agi sereta agi ba endur nya.

Ku iya, raban iya terus berumban ngelawa palan nya, ti ngambi timpuh semak dua jam pejalai sebedau nepan perau ngagai kandang endur panjuk ke udah diengkah.

Ku iya, baya nya ditemu mati pengudah mengkang ba umpan sebedau ditanchang lalu ditarit ngagai perau.

Iya nandu baru madahka, urung 10 iku individu ti mungkur kaban tim enggau peranak rumah panjai bekerejasama narit baya nya ke darat sebedau ditepu ngagai sebuah entukar.

“Kami udah mai baya tu ke Sibu kena tumu pagi 10 Mei tu tadi sebedau nyerah ngagai Opis Penyaga Kampung Sarawak (SFC) ngambika atur ke bukai dipejalaika,” ku iya.

Ku iya nambah, bepelasarka timbal ari peranak menua nya, pemayuh baya ba sungai ba kandang genturung menua nya dipelabaka chukup mayuh lalu majak meri pengirau ati ngagai komuniti dia.

Berindik enggau nya ku iya, sida iya deka terus bekerejasama enggau peranak rumah panjai ngaga panjuk dikena neruska operasyen nangkap baya ba kandang menua nya. -RBI

KAPIT, 11 Mei – Gaya tumu pagi di Simpang Pantu, Jalai Selirik begau lebuh siku lelaki besai tuai ditemu enda ngeleda dalam sebuah kerita Perodua Kancil pengudah kerita nya dipechayaka tepawah ketegal eksiden deriba kediri, pagi tadi.

Balai Bomba enggau Penyah Penusah (BBP) Kapit nerima kangau ngenyit bekaul enggau penusah nya urung pukul 5.10 pagi sebedau raban bomba dianjung ngagai endur nya bejalaika operasyen nyelamat.

Lebuh datai ba endur nya, bomba bejalaika pengawa meresa keterubah lalu tetemuka sebuah kerita Perodua Kancil udah tepawah lebuh aksiden deriba kediri.

Tudah dalam kerita nya ditemu enda ngeleda, tang enda tepekul sereta nadai bakal luar ke nyata.

Raban bomba udah nya bejalaika pengawa mansutka iya ngena chara ‘manual’ enggau nadai bantu perengka penyelamat khas sebedau nyerahka tudah ngagai tim Opis Menteri Pengerai Malaysia (KKM) ngambika diperubat enggau silik agi.

Operasyen nya tembu pengudah raban bomba nentuka gaya ba endur nya likun sereta ulih dijaga. -RBI

MIRI, 11 Mei — Pengerami ti richah deka ngias Bandar Baru Permyjaya nengah pengawa ngatur Demonstrasyen Ngepan Asal beserimbai enggau Bazaar Gawai Dayak & Festival Etnobudaya 2026 ti diperambu deka diatur sehari tu, pukul 6.00 lemai.

Program ke deka diatur ba Bandar Baru Permyjaya, sepiak enggau Bank Rakyat, dikearapka ulih ngempuru pupu raban bansa di Sarawak mantaika penyelai pekayan asal enggau pesaka asal sida.

Pengerami tu deka dirami enggau penatai Temuai Dipebasa, YB Datuk Dr Penguang Anak Manggil, Sapit Menteri Pengerai Mensia Mayuh, Pengawa Berumah enggau Kaunsil Kandang Menua ke mega Kaban Kunsil Nengeri (ADUN) Marudi.

Bela ngerichahka agi pengerami tu iya nya penatai khas ari artis temuai tebilang, NK Yongai, kelimpah ari bemacham pengawa mandangka budaya ti mandangka penyelai enggau pemanah pesaka asal komuniti Sarawak.

Pengawa ngatur pengerami tu ukai semina dikena ngerichahka pengerami Gawai Dayak Renggat Sarawak 2026, tang mega nyadi pelasar dikena ngenegapka penyerakup sereta ngelakuka pesaka asal pupu bansa ngagai komuniti lokal enggau bala temuai.

Mensia mayuh dipinta datai sama bela ngerichahka agi pengerami nya enggau semengat “Segulai Sejalai”. — RBI

MIRI, 11 Mei – Komuniti Kayan di Sarawak dipinta terus ngenegapka penyerakup enggau semengat begulai dikena nentuka sada enggau pemerat komuniti terus diberi kuasa dalam pemansang nengeri tu.

Kaban Kunsil Nengeri (ADUN) Telang Usan, Dato Dennis Ngau madah, Serakup Kayan Sarawak (PKS) ti ditumbuhka kenyau ari taun 1990-an ngembuan juluk enggau visyen ke besai dikena ngetanka pengidup dudi hari komuniti Kayan di nengeri tu.

Kenu ku iya, penumbuh PKS ukai semina dikena ngatur pengawa rama tauka pengerami budaya aja, tang lebih agi nyadi pelasar beguna dalam nyerakupka komuniti Kayan di serata Sarawak.

“PKS mega bejalaika tanggungpengawa ngetanka identiti, jaku enggau budaya bansa Kayan kelimpah ari ngangkatka pelajar anak bansa Kayan, mantu ba pemansang ekonomi komuniti sereta nyadi sada nyawa komuniti Kayan ba pengawa ngemansangka nengeri tu,” ku iya.

Iya madah munyi nya lebuh bejaku ba pengerami ngintu Dau Ledoh ke diatur apin lama ke udah.

Ku iya nambah, juluk tu beguna amat beratika penyampau komuniti Kayan di Sarawak enda mayuh, dipelabaka urung lebih mimit ari 100,000 iku.

“Nya alai, kitai enda ulih bepechah.Kitai enda ulih diau kediri nitihka rumah panjai, pelilih menua tauka pengarap kitai.

“Enti kitai beserakup, sada nyawa kitai deka didinga, enti kitai beserakup, pemerat kitai deka muntang agi diperebutka, enti kitai beserakup, nembiak rebak baru kitai kering agi napi pengidup jemah ila,” ku iya.

Ngelansa pasal pengerami Dau Ledoh, iya nerangka pengerami nya kelai penyerakup, pesaka asal, terima kasih enggau aspirasyen jemah ila komuniti Kayan di Sarawak.

“Iya ukai semina pengerami aja, tang mandangka semengat enggau identiti komuniti Kayan ti meseti terus ditanka rebak kemaya hari tu enggau jemah ila,” ku iya. -RBI