KUALA LUMPUR, 1 MEI – Opis Kereja Raya (JKR) Sarawak majak ngenegapka pengelandik teknikal sida ba pengawa ngatur tinting bukit nengah pengawa nyereta International Conference on Slope 2026 (ICOS 2026) ti diatur ba Royale Chulan Kuala Lumpur kena 29 hingga 30 April lalu

Aum antarabansa nya ngempuruka pakar injinir geoteknikal, pemansik enggau pemekuh industri ari dalam enggau luar menua berandauka isu kemaya hari enggau inovasyen pemadu baru bekaul enggau pengawa ngatur tinting.

Sepemanjai program nya, mayuh macham pengawa mantaika teknikal enggau sesi bekunsi penemu diatur, mungkur aspek penegap tinting, ngurangka risiko tanah tusur, teknologi matau tinting enggau chara ngaga tukuh ti meruan sereta tan.

Penyereta JKR Sarawak mandangka komitmen opis nya terus ngangkatka penemu enggau penau teknikal, kelebih agi ungkup pengawa bejalaika projek infrastruktur ba kandang endur bebukit enggau berisiko tinggi di nengeri tu.

Penemu enggau peneleba ke diulih dikearapka ulih dikena enggau penuh dalam pengawa bejalaika projek, lalu enggau nya meri pangka ngagai pemansang infrastruktur ke lebih likun, efisyen sereta meruan di Sarawak. -RBI

#ruaiberitaiban#newsiban#beritaiban

Rindu | Titih | Kunsika

MIRI, 1 Mei — Perintah Sarawak chakah agi bejalaika pengawa neritka atur nagang betunu tebuka kelebih agi ba kandang tanah kerapa dikena nagang risiko penusah angus besai sereta nyeliahka gaya sebun asap majak balat.

Sapit Premier Sarawak, Datuk Amar Douglas Uggah Embas nyemetak madahka pengawa betunuka chara tebuka ti dikereja mensia mayuh ukai semina ngeruga kualiti angin, tang mega bisi potensial ngepunka penusah angus ti mar dijaga, kelebih agi maya musin kemarau.

“Semua piak meseti bejalaika tanggungpengawa nentuka pengelikun rayat enggau pemanah rampa menua dijaga,” ku iya lebuh ngulu penerang Komiti Mutarka Penusah Ngenyit Bagi Menua (JPBB) Miri, ditu, baru-baru tu.

Iya ke mega Chairman Komiti Mutarka Penusah Ngenyit Nengeri madah, semua aset, injin enggau kereban operasyen meseti dalam gaya ke manah sereta sedia digerakka sebarang maya dikena napi sebarang penusah ke tau nyadi.

Nitih ku iya, JPBB Miri mega dilalau ngangkatka pengawa nyikap diri nyengkaum ngenegapka pengawa matau ‘hot spot’ enggau chakah agi neritka atur nagang betunu tebuka di serata bagi menua.

Berebak enggau nya, Lembaga Pengeraja Asal enggau Rampa Menua (NREB) madahka bisi 23 ‘hotspot’ udah ditemu naka ke diatu di Bagi Menua Miri, enggau tujuh kes diatu benung dipansik.

Nitihka penerang ari NREB, pengawa matau enda ngetu udah dipejalaika, kelebih agi ba kandang endur paya kerapa Kuala Baram kenyau ari pun bulan Mac, nyengkaum ngentaska ‘hotspot’ ba kandang endur kebun komersial enggau kebun sawit.

“Asil ari pengawa matau nya, tujuh iti keretas pansik benung disediaka, kelimpah ari jaku tangkan diberi ngagai pekebun mit enggau mensia mayuh ke ditemu bisi risiko betunu chara tebuka,” ku penerang nya, baka ke dipansutka Utusan Sarawak.

NREB nambah, pengawa meri penyedar ngagai mensia mayuh mega udah diangkatka nengah pengawa nyadung poster, ‘risalah’ enggau kimpin pelajar bekaul enggau tagang betunu chara tebuka.

Berebak enggau nya, ejensi nya mega udah ngaktifka bilik operasyen sebun, chakah agi bejalaika pengawa matau ba palan, ngetuka permit betunu ke dikuasa sereta ngeluarka notis tagang betunu tebuka ngagai pemaju projek.

Mensia mayuh mega dilalau ngambi atur bejejaga maya hari angat nengah chara nentuka pengambi ai ke chukup, ngurangka aktiviti di luar sereta ngena sengkabung idung enggau mulut, kelebih agi ngagai raban berisiko tinggi.

Nitihka NREB, barang sapa individu ke ditemu ngereja pengawa nunu chara tebuka ti ngasuh angin kamah tau diukum ari baruh Seksyen 30(1)(a) enggau Seksyen 30(2) Ordinan Pengeraja Asal enggau Rampa Menua (NREO), enggau ukum mata duit nyentuk RM100,000 tauka jil maksimum lima taun tauka kedua-dua nya sekali.

Penerang nya bela digulu Menteri Perengka Pengangkut Sarawak, Lee Kim Shin; Residen Bagi Menua Miri Galong Luang, sereta mega pengari ari mayuh bengkah ejensi nyengkaum PDRM, JBPM, Opis Rampa Menua, Opis Meteorologi enggau Angkatan Pertahanan Awam Malaysia.

Penemuai kereja nya mega ngembuan tuju deka beratika tikas penyikap ejensi bekaul dalam napi risiko penusah ngenyit maya musin kemarau tu, lalu enggau nya nentuka pengawa mutarka penusah ngenyit di Bagi Menua Miri mengkang efisyen sereta efektif. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber — Utusan Sarawak

Photo — UKAS

KOTA SAMARAHAN, 30 April – Serakup Main Asal Dayak Sarawak (PEMADAS) muka peluang ngagai komuniti belajarka seni pesaka asal nengah pengawa ngatur Kelas Main Asal ti diperambu berengkah ujung bulan Jun tu ila.

Inisiatif tu ngembuan tuju deka ngenegapka agi pengawa ngetan sereta ngemansangka budaya komuniti Dayak, kelebih agi dalam bidang main asal enggau muzik ke majak bulih perati ari nembiak rebak baru.

Entara kelas ke bisi disedia baka kelas Ngajat (Indu/Lelaki), Ngajat Batang Rajang, Ngajat Pua Kumbu, Ngajat Lama Indu, Betaboh (muzik asal) enggau Ngajat Orang Ulu.

Bayar nyereta berengkah ari RM100 ngagai RM200 bepanggai ba bansa kelas enggau penyampau sesi ke bisi disediaka.

Nitihka penerang ari pengatur, kelas tu deka diatur ari setiap sekali tauka dua kali seminggu, lalu enggau nya meri pilih ngagai penyereta ari mayuh macham renggat umur nyengkaum nembiak mit, bujang dara enggau orang besai tuai.

“Program tu ukai semina muka ruang belajar, tang mega nyadi pelasar nerenakka pengerindu enggau temegah ati ngagai pesaka asal diri empu,” ku penerang ari PEMADAS.

Bala penyereta ke ngambi kelas tu deka nerima setipikit penyereta nyadika kelala, lalu pengerami nutup deka digaga enggau Malam Graduasyen Main Asal Dayak ti deka mandangka pengawa pemerindang khas ari bala penyereta.

Mensia mayuh ke bisi ati tau ngulihka penerang silik nengah chara betanya ngagai PEMADAS tauka ngelawa opis sida di Pelilih Menua Muara Tuang, Kota Samarahan.

Pengawa ngatur kelas tu setipak enggau aspirasyen dikena nentuka seni pesaka baka Ngajat enggau muzik asal terus idup sereta ditampung rebak dudi hari. – RBI

#ruaiberitaiban#newsiban#beritaiban

Rindu | Titih | Kunsika

SPAOH, 30 April – Siku ular sawa urung 20 kaki pemanjai ke sebedau tu mujur ngerarika diri pengujung iya ditangkap dalam kes ke nyadi di Kampung Hilir Bungin, ditu, sehari tu tadi.

Penusah nya berengkah nyadi lebuh siku peranak menua nya, betelefon minta bantu ngagai Palan Penyaga Operasyen Pelilih Menua (PKOD) Raban Penyaga Orang Periman Malaysia (APM) Spaoh pengudah tetemuka ular nya semak enggau rumah iya, lalu enggau nya ngasuh pengirau ati ngagai pengelikun sida sebilik.

Berindik ari penerang nya, Tim Bravo ti mungkur empat iku kaban tekala nya ngesah ngagai endur nya sereta disikap ngena perengka khas nangkap ular.

Lebuh datai ba endur nya, raban nya tetemuka ular sawa nya nguji ngelarika diri ngagai babas semak rumah orang ke ngaga sebana nya.

Taja pia, ular nya mujur ditangkap ngena teknik sintak pengudah operasyen ke dipejalaika urung 30 minit.

Ular sawa nya udah nya dibai ngagai PKOD ngambika dipejalaika enggau silik agi.

Nadai sebarang bakal diripotka ngaul raban tauka orang periman maya operasyen nya dipejalaika.

Operasyen nya sekali agi ngayanka penyikar enggau penyikap APM dalam napi gaya penusah ngenyit dikena nentuka pengelikun komuniti menua nya seruran dijaga. -RBI

#ruaiberitaiban#newsiban#beritaiban

Rindu | Titih | Kunsika

JULAU, 30 April – Peranak ngelingi pelilih Julau dilalau anang tegepang berindik ari pengawa bejalaika Latih Soldadu ti ngaul Soldadu Malaysia (9 Briged Woksyop) nengah Eks Pasak Bumi Renggat 1/2026 ti diperambu deka berengkah 10 ngagai 15 Mei tu.

Latih ti deka dipejalaika maya siang enggau malam nya mungkur pemindah raban soldadu senyata ba sekeda endur nyengkaum kandang kampung, kebun dandang besai enggau sekeda jalai alun ngelingi pelilih menua nya.

Berindik enggau nya, mensia mayuh dikeingatka semua pemindah enggau pengawa ke dipeda nya sebagi ari latih rasmi raban pengelikun, nya alai enda ibuh meri sebarang pengirau ati.

Berebak enggau nya, piak bekuasa mega nyemetak madahka sebarang aktiviti ngasu ditagang enggau terit sekumbang timpuh latih, kelimpah ari mensia mayuh enda dikemendarka tama ngagai kandang endur ke bisi kaul ungkup pengelikun semua piak.

Peranak mega dipinta meri kerejasama penuh dikena nentuka pengelanchar pengawa latih sereta nitihka semua atur ti dipansutka piak bekuasa.

Sebarang penusah ngenyit tauka tanya silik tau ditanya ngagai Balai Polis Julau ba lumur 084-734216.

Kerejasama komuniti amat beguna dalam nentuka sukut pengelikun seruran dijaga, setipak enggau prinsip “Polis dan Masyarakat Berpisah Tiada” kelimpah ari tanggungpengawa bekunsi dalam nyaga pengelantang mensia mayuh. – RBI

Sumber Polis IPD Julau

#ruaiberitaiban#newsiban#beritaiban

Rindu | Titih | Kunsika

ASAJAYA, 30 April – Pengawa meri basa nyadi kelai Pengerami Ramah Tamah Kelab Komuniti enggau Ketuai Raban Bansa (KMKK) Pelilih Asajaya 2026 lebuh pemeri khas diberi ngagai ex-Ketuai Kaum Tanjung Apong, Morsalin Tahir kelai meri terima kasih ngagai jasa enggau dedikasyen iya sepemanjai timpuh iya mangku pengawa.

Pengerami ke diatur dalam gaya ke penuh enggau semengat diri sebilik dikearapka ulih meri peransang ngagai bala ketuai kandang menua ngambika terus meri servis ke pemadu manah ungkup pengelantang rayat.

Pengerami ke diatur ba Dewan Tan Sri Ikhwan Zaini, Opis Pelilih Asajaya kena Hari Empat tu tadi mega nyadi pelasar beguna dalam ngenegapka penyerakup sereta ngelengkaska koordinasyen pentadbiran genturung pendiau ba renggat baruh.

Program tu nyadi siti ari batang pengerami dalam kelinda ninting taun KMKK pelilih menua tu, setipak enggau pengeransing nentuka pengawa komuniti ulih dipejalaika enggau lebih ngasi sereta lantang.

Pengerami nya diintu enggau pengawa ngatur mayuh macham pengerami besai baka Taun Baru Cina, Ramah Tamah Aidilfitri enggau Pengerami Mantar Gawai ti nyadi kelai penyerakup komuniti pupu bansa di Pelilih Asajaya.

Kelimpah ari nya, pengawa tu mega nyadi pelasar dikena meri terima kasih ngagai semua staf KMKK enggau Pentadbiran Opis Pelilih Asajaya ketegal dedikasyen enggau komitmen sida ngemansangka kandang menua sida empu.

Entara ke bisi datai iya nya Pemesai Opis Pelilih Asajaya, Jerry Zanuddin Bidin, Penulung Pemesai Pelilih Asajaya, Hasanah Bujang, Temenggong Bagi Menua Samarahan, Chek Bujang sereta mega pemesai ari Opis Pelilih Menua Asajaya enggau Opis Pengintu Pengelantang Raban Bansa (JKM). -RBI

Sumber UKAS

#ruaiberitaiban#newsiban#beritaiban

Rindu | Titih | Kunsika

TANJUNG MANIS, 30 April – Sepenyampau 15 unit kereban pengerara api udah diagihka ngagai rumah panjai ngelingi Kampung Stalon ke nyadi siti singkang proaktif dalam ngenegapka pengawa nagang penusah angus tumu di kandang menua pesisir.

Kaban Parlimen P.206 Tanjong Manis ke mega Chairman CIDB Malaysia, Dato’ Ir. Yusuf bin Haji Abdul Wahab madah, pengawa nya ngayanka komitmen ti seruran dikena ngenegapka aspek pengelikun nagang penusah angus sereta nambahka tikas penyedia komuniti lokal.

Iya mantaika penemu tu ba Pengerami Nyerahka Perengka Pengelikun Diri (PPE) enggau pengawa nasih tanah simbolik Taba Bilik Operasyen Opis Bomba Volunteer (PBS) Stalon udah diatur ba TR. Mut anak Rumah Bohom.

Tampung Yusuf, tu nyadika kelai sukung terus ngenegapka tanggungpengawa PBS ba renggat komuniti.

Sama bisi datai ba pengerami nya Direktor Opis Bomba enggau Penyah Penusah Sarawak, PKPjB Jamri bin Masran, Pemesai Pelilih Menua Tanjong Manis Ismail bin Kasah, PgKB I Andy anak Alie sereta pemesai kanan opis bekaul. -RBI

#ruaiberitaiban#newsiban#beritaiban

Rindu | Titih | Kunsika

SEBUYAU, 30 April — Pengawa ngaga palan baru meresi ai 5 juta liter sehari (MLD) di Hulu Sebangan diatu udah manggai 61 peratus penyulut lalu diperambu tembu penuh dalam bulan Julai 2026.

Nitihku Menteri Utiliti Enggau Telekomunikasyen Sarawak, Dato Sri Julaihi Narawi, projek ke beungkus RM12 juta nya dipelanja penuh Perintah Sarawak ngena teknologi sistem akut dikena ngangkatka pemanah pengawa meresi ai ba kandang menua nya.

Ku iya, pengawa masang paip diameter 355 milimeter enggau pemanjai 11 kilometer diatu benung dipejalaika, nyambung loji nya ngagai tangki tikas tinggi ba simpang empat jalai Sebangan.

“Loji baru tu beguna amat berindik ari loji ke diatu semina ulih ngeluarka 0.88 MLD ai ke udah diperubat, ke enda chukup dikena nangkup guna ke diatu enggau jemah ila,” ku iya nengah penerang sehari tu.

Diatu, kandang menua Sebuyau nyengkaum Sebangan enggau selampur Bagi Menua Samarahan nerima bekal ai beresi urung 45 MLD ari palan meresi ai di Batu Kitang, Kuching.

Ku iya nambah, pengawa ngaga loji baru di Hulu Sebangan dikearap ulih bejalaika pengawa nyadi sistem dikena nentuka penegap bekal ai, kelebih agi napi peminta ke majak nambah.

Loji Meresi Ai Batu Kitang ti ngembuan kapasiti 868 MLD diatu nyadi pun penatai bekal ai ngagai Bagi Menua Kuching enggau Samarahan.

Berindik enggau nya, pengawa bejalaika projek tu dipeda nyadi siti singkang proaktif ari Perintah Sarawak dalam ngenegapka infrastruktur bekal ai sereta nentuka akses ai beresi enggau beresi terus ungkup peranak menua nya. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SRI AMAN, 30 April — Kaban Parlimen Sri Aman YB Dato’ Sri Doris Sophia Brodie sehari tu ngulu ‘Pengerami Santai: Prihatin Menyantuni Rakyat’ ke diatur ba Rumah Edwin, Sungai Indai Atas, Pusat Pelilih Menua (PDM) Kedumpai.

Pengerami nya mega digulu pengari Opis Pelilih Menua Pantu, Penghulu Jeli enggau 27 iku Tuai Rumah ari kandang menua ngelingi PDM Kedumpai.

Penatai ketuai komuniti tu ngayanka komitmen ti seruran dipejalai dikena ngerapitka kaul entara ketuai enggau komuniti ba renggat baruh.

Dalam jaku dipansutka iya, Dato’ Sri Doris nyemetak madahka rayat Sarawak chukup betuah laban taja napi pemar ekonomi dunya ti enda tentu, Perintah Gabungan Parti Sarawak (GPS) agi ulih terus bejalaika mayuh macham inisiatif ungkup pengelantang rayat.

Entara batang inisiatif ti dikemerat iya nya ‘Sumbangan Keperluan Asas Sarawak ‘(SKAS) ti meri penguntung ngagai urung 900,000 iku penerima di serata nengeri.

Ku iya nerang, pengawa bejalaika bantu tu asil ari penegap belanja nengeri sereta chara ngatur penatai pemisi Sarawak enggau bejimat sereta meruan.

Kelimpah ari nya, iya mega nyemetak madahka Sarawak terus ngetanka diskaun bil karan 25 peratus ungkup rayat, ti disukung enggau penegap pengeraja asal kuasa hidro nengeri tu sereta enda bepanggai ba nurun niki rega kuasa global.

“Kitai patut beterima kasih laban ngembuan ketuai enggau perintah GPS ti jauh runding sereta seruran ngemeratka pengelantang rayat enggau pemansang Sarawak, ngambika kitai ulih besemekih taja dalam gaya ekonomi global ti balat enchabar,” ku iya.

Pengawa santai nya mega nyadi pelasar ke beguna dalam ngenataika penerang perintah kelimpah ngerapitka kaul entara ketuai enggau komuniti setempat dalam gaya ke manah sereta bebaik. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — Doris Sophia Brodie

SPAOH, 30 April — Projek ngemanahka Jalai Ladang di kandang rumah panjai Tuai Rumah William Rabong, Pelawa, Spaoh udah mujur tembu sereta diserah ngagai peranak menua nya.

Projek tu dipejalaika nengah agih belanja ari Perintah Sarawak nengah Ejensi Pemansang Bagi Menua Betong (BDDA), nyadi sebagi ari pengawa ti seruran dipejalai dikena ngenegapka pemansang infrastruktur menua pesisir di nengeri tu.

Nengah penembu projek nya, peranak diatu ngasaika perengka guna jalai alun ke manah agi, likun sereta lantang agi, lalu enggau nya meri empas positif ngagai pengelanchar pengawa ninting hari enggau aktiviti ekonomi komuniti setempat.

Nitihka penerang berita ari DUN Bukit Saban, pengawa bejalaika projek tu entara inisiatif ti seruran dipejalai dalam nentuka pemansang menua pesisir terus diberi perati.

“Projek tu dipelanja Perintah Sarawak nengah Ejensi Pemansang Bagi Menua Betong (BDDA) ti nyadi pengawa ti enda ngetu dikena ngemanahka perengkaguna infrastruktur menua pesisir,” ku penerang nya.

Penembu projek tu ngayanka komitmen perintah ti terus nyendiaka perengka guna asas ti manah agi ungkup pengelantang rayat di menua pesisir. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika