KUCHING, 12 Mei – Kaban Kunsil Nengeri (ADUN) Tamin, Ir. Christopher Gira Sambang mantaika sukung penuh ngagai Rang Undang-undang (RUU) Kaunsil Padi enggau Beras Sarawak 2026 ti dibantaika Menteri Industri Pemakai, Komoditi enggau Pemansang Wilayah Sarawak, Dato Sri Dr Stephen Rundi Utom ba Aum Kunsil Nengeri (DUN) Sarawak sehari tu.

Dalam jurai iya, iya nyemetak madahka rang undang-undang nya ukai semina ngaul sektor betanam betupi aja, tang nyadi atur strategik dikena nentuka pengelantang, pengeliat ati enggau penjamin pemakai Sarawak jemah ila.

Nitih ku iya, dunya diatu betapi enggau bekal pemakai global ti enda tentu berindik ari ubah gaya hari, penyarut geopolitik, pengeruga rentayan bekal, ungkus import ti majak nambah enggau ekonomi global ti enda tegap, enggau nya minta Sarawak ngurangka bepanggai ba import beras.

“Pengelikun pemakai ukai agi semina isu betanam betupi aja, tang diatu nyadi isu kedaulatan, pengelikun strategik enggau penegap ekonomi timpuh panjai nengeri tu,” ku iya.

Iya mega nyemetak madahka penumbuh Kaunsil Padi enggau Beras Sarawak setipak enggau aspirasyen Strategi Pemansang Pengudah COVID-19 2030 (PCDS 2030) ti ngemeratka pengelantang ekonomi nengah pemansang ti meruan sereta pengelikun pemakai.

Ku iya, kaunsil nya deka bejalaika tanggungpengawa ti beguna nyadi institusyen pemansang strategik nengeri ti bisi kuasa merambu sereta ngemansangka industri padi enggau beras, ngatur belanja, nyendiaka belanja, bejalaika pengawa beranakka puku, numbuhka kompeni, ngaku kandang endur pemansang sereta ngumpul data industri ti komprehensif.

“Tu ngayanka pengeran Perintah Sarawak deka nempa sektor pemakai siti ari tiang strategik ekonomi nengeri tu.

“Sarawak udah mansutka diri nyadi kuasa besai lalu diatu kitai patut nyingkang nuju nyadi kuasa besai pengelikun pemakai,” ku iya.

Berebak enggau nya, iya meda rang undang-undang nya mega muka peluang besai ngagai menua pesisir nyengkaum Tamin, Selangau, Mukah, Kanowit enggau Kapit ti ngembuan pemesai tanah sereta potensial besai ungkup pemansang betanam betupi moden.

Iya ngarapka perintah ulih ngerembaika sistem ai moden, meri kelala teknologi betanam betupi pintar, ngena dron, mekanisasyen betanam betupi, palan ngumpul asil ketau enggau pansik benih padi ti bekualiti tinggi dikena nambahka produktiviti orang bumai menua pesisir.

Kelimpah ari nya, iya mega ngemeratka pemesai guna ngaul raban nembiak dalam sektor betanam betupi moden.

Kenu ku iya, anggap ti ngumbai pengawa betanam betupi nadai jemah ila patut diubah laban sektor nya diatu majak mansang senipak enggau teknologi, inovasyen, automasyen, pemintar tiru (AI) enggau sektor betanam betupi moden.

Berindik enggau nya, iya merambu ngambika kaunsil nya meri kelala program latih betanam betupi nembiak, skim agropreneur muda, geran pemungkal enggau latih teknologi betanam betupi moden dikena ngadaka rebak baru orang dagang agro di Sarawak.

Dalam jaku iya Iya mega ngelaluka kuasa kaunsil ngumpul data industri laban data ke betul beguna amat dikena mantu perintah merambu tagit ngatika diri, rizab beras strategik, peragam peminta enggau ngatur bekal pemakai timpuh panjai ungkup nengeri tu.

Berebak enggau nya, iya ngemeratka pemesai guna pengawa tadbir urus enggau akauntabiliti laban kaunsil nya deka ngembuan kuasa wang ke besai nyengkaum ngaga duit injau, beranakka puku enggau numbuhka kompeni.

Berindik ari nya, iya ngarapka pengawa audit ninting taun, ripot ti terang, matau prestasi enggau integriti ngatur pengawa diberi perati ti berat dikena nentuka penguntung nya amat diasaika rayat.

Lebuh nyimpul jurai nya, Gira nerangka rang undang-undang nya siti singkang ti strategik sereta beguna dikena nempa pengidup dudi hari ti lebih tegap ungkup Sarawak.

“Kitai enggaika rayat bisi duit tang betapi enggau suntuk pemakai.

“Minyak enggau gis nyangka ulih ngenegapka ekonomi Sarawak, tang beras nyamin pengidup rayat,” ku iya. -RBI

#ruaiberitaiban#newsiban#beritaiban

Rindu | Titih | Kunsika

PETRA JAYA, 12 Mei – Penumbuh Kaunsil Padi enggau Beras Sarawak nengah rang undang-undang deka nyadi pelasar beguna dalam ngenegapka pengelikun pemakai nengeri tu.

“Tu nyengkaum aspek perambu pemansut, ngatur pengawa ngagih, pemansang orang bumai enggau sistem matau industri ti lebih bestruktur.”

“Atur tu mega muka ruang ngagai Sarawak bejalaika sekeda pengawa nengah pengawa nurunka kuasa ari Perintah Besai nyema patut enggau enda ngeruga bidang kuasa ke udah bisi,” ku Menteri Industri Pemakai, Komoditi enggau Pemansang Kandang Menua, Dato Sri Dr Stephen Rundi Utom

Ungkup rikod, Rang Undang-Undang Kaunsil Padi enggau Beras Sarawak 2026 iya nya rang undang-undang baru ti dibantai ba DUN dikena nempa langkar undang-undang ti spesifik dikena ngatur sereta ngemansangka industri padi enggau padi di Sarawak.

Iya madah munyi nya lebuh mantaika Rang Undang-Undang nya ungkup bacha keterubah ba Aum Dewan Undangan Negeri sehari tu.

Berebak enggau nya mega, Rundi madahka Rang Undang-Undang Kaunsil Padi enggau Beras Sarawak 2026 ti dibantai ba Aum Kunsil Nengeri (DUN) sehari tu ngembuan tuju deka nangkup langkar Perintah Besai ke bisi diatu, ukai belaban enggau sistem pengatur menua.

Ku iya, Rang Undang-Undang baru nya dilangkar dikena ngenegapka agi pangku pengawa Sarawak dalam pemansang enggau koordinasyen industri padi ungkup pemaik rayat dalam timpuh ke panjai.

“Dalam pekara tu, kitai udah ngambi singkang ke besai reti dikena ngenegapka agi kuasa Sarawak ba industri padi enggau beras.

“Rang Undang-Undang tu digaga dikena meri kuasa ngagai Sarawak ngatur, ngemansang sereta ngetanka industri padi enggau beras ungkup pemaik rayat kitai, ukai semina kemaya hari tu tang mega ngagai rebak dudi hari,” ku iya.

Stephen Rundi madah, industri padi enggau beras ba renggat menua diatu dipegai Akta Kawalan Padi enggau Beras 1994 enggau pengawa matau polisi enggau atur ti dipejalaika Opis Menteri Betanam Betupi enggau Pengelikun Pemakai, lalu sukung operasyen dipegai Padiberas Nasional Berhad (Bernas).

“Perintah nengeri ngemeratka Rang Undang-undang tu ukai ngembuan tuju deka nganti tauka ngelabuhka undang-undang Perintah Besai, tang lebih agi deka ngenegapka agi pangku pengawa Sarawak dalam pemansang enggau ngemanahka industri.

“Rang Undang-Undang tu ukai ngembuan tuju deka nganti tauka ngelaban langkar Perintah Besai ke diatu, tang lebih agi ngemenuhka sistem, kelebih agi dalam ngenegapka pangku pengawa Sarawak dalam industri padi enggau beras di nengeri tu,” ku iya nerang. -RBI

#ruaiberitaiban#newsiban#beritaiban

Rindu | Titih | Kunsika

PETRA JAYA, 12 Mei – Projek besai palan penyangkai kapal tasik dalam enggau terminal gis di Tanjung Embang diatu benung chakah diperambu Perintah Sarawak enggau kerejasama Petroleum Sarawak Berhad (Petros), enggau renggat keterubah dipelaba berengkah beoperasyen dalam taun 2032.

Nitih ku Menteri Infrastruktur enggau Pemansang Palan Penyangkai Kapal, Datuk Majang Renggi, kelimpah ari nya, sekeda inisiatif bukai mega benung dipejalaika nyengkaum ‘The Dredging and Associated Works Project’ di Kuala Baram ti disadang tembu dalam bulan Oktober 2026 enggau pengawa numbuhka ‘Borneo Oil and Gas Supply Base’ ti majak ngenegapka Bintulu nyadi hab minya enggau gis.

“Perintah Sarawak mega ngemeratka pemansang Zon Bebas di Kuching, Bintulu, Samalaju enggau Miri dikena nambahka aktiviti ti bisi nilai tambah sereta matak puku dalam industri ti beorientasyenka eksport,” ku iya.

Iya madah munyi nya lebuh nyaut tanya ari Kennedy Chukpai Ugon (GPS Murum) ba Aum DUN Sarawak, ba Kompleks DUN sehari tu tadi.

Tampung Majang, Perintah Sarawak diatu ngenegapka struktur tadbir urus sektor palan penyangkai kapal nengeri tu nengah pengawa ti bepalan ari baruh Kaunsil Penyangkai Kapal Sarawak (SPA) ti deka nyadi kaunsil pengatur tunggal ungkup semua palan penyangkai kapal di Sarawak.

Terang Majang, pengawa nya sebagi ari pelin strategik perintah ngenegapka pemansang palan penyangkai kapal setipak enggau tagit penumbuh ekonomi ari baruh Strategi Pemansang Pengudah COVID-19 2030 (PCDS 2030).

“SPA deka ngambi guna pengatur mayuh bengkah palan penyangkai kapal nengeri nyengkaum Palan Penyangkai Kapal Bintulu pengudah proses nyerah rasmi ari Perintah Besai dipejurai.

“Enggau penumbuh Kaunsil Penyankai Kapal Sarawak, perintah Sarawak ngambi beberapa singkang strategik nyengkaum mindahka guna pengatur palan penyangkai kapal di Sarawak.

“SPA deka nyadi kaunsil pengatur tunggal ungkup semua palan penyangkai kapal nengeri,” ku iya.

Ngenang silik agi, perintah mega bejalaika proses ngaga piak bekuasa palan penyangkai kapal nyadi korporat nitihka renggat dikena nentuka semua palan penyangkai kapal dipejalaika nyadi entiti komersial ti lebih efisyen, kompetitif enggau pengawa ngatur korporat ti tegap.

Ku iya nambah, SPA mega deka ngatur pelin pemansang palan penyangkai kapal begulai nengah chara ‘clustering’ dikena ngangkatka pemanah guna tetiap palan penyangkai kapal nitihka pengelebih sida empu.

“Tu ngembuan tuju ngurangka pengawa betimpa guna kelimpah ari ngenegapka rentayan logistik enggau pemansang kandang menua,” ku iya nerang.

Ba pemansang ke bekaul, iya madahka

Berebak enggau nya, lebuh nimbal tanya tambah, iya madahka perintah benung beratika potensial pemansang palan penyangkai kapal dalam menua ba kandang menua garis entara menua.

Tu nyadi pengawa timpuh panjai dikena ngenegapka rentayan logistik enggau dagang meraka garis entara menua, kelebih agi di Tebedu-Entikong nengah kerejasama serantau entara BIMP-EAGA enggau SOSEK MALINDO. -RBI

#ruaiberitaiban#newsiban#beritaiban

Rindu | Titih | Kunsika

MERADONG, 12 Mei – Sepenyampau 85 iku individu nyengkaum 55 iku lelaki enggau 30 iku indu udah diperesa, seraya 78 buah entukar mega diperesa dalam Operasyen Nagang Penyalah Begulai ti dipejalaika Indu Opis Polis Pelilih (IPD) Meradong kena Hari Satu tu tadi.

Ketuai Polis Pelilih Meradong, DSP Tansli Mering madah, operasyen nya mega meda enam iti saman trafik dikeluarka ketegal mayuh macham penyalah jalai alun.

Nitih ku iya, operasyen nya ti berengkah ari pukul 8 pagi nyentuk pukul 5 lemai nya dipejalaika dikena nambahka penatai raban polis, nagang aktiviti jenayah sereta nentuka pengelikun enggau atur mensia mayuh di pelilih Meradong dijaga.

Ku iya, operasyen nya betuaika Insp. Mohd Salman Zulfitri Sheekandar begulai enggau Insp. Norfadilah Zainal nggau pengawa ngaul 16 iku pemesai enggau raban polis.

“Fokus operasyen tu iya nya bejalaika pengawa matau, meresa enggau ngenyit sereta ngempang jalai alun ba sekeda kandang endur ‘angat’ palan jenayah ngelingi Meradong nyengkaum Jalai Kelupu, Jalai KJD, Jalai Bakong, Jalai Kilang, kandang genturung pendiau enggau pintu penama ngagai Bintangor,” ku iya nengah sebengkah penerang sehari tu.

Ku iya, nadai kes ditangkap tauka dirampas dirikodka maya operasyen nya dipejalaika.

Ku iya nambah, operasyen ke baka nya deka terus dipejalai ari setiap maya lalu nyadi atur proaktif raban polis dalam ngelaban penyalah sereta nambahka pengandal mensia mayuh ngagai tikas pengelikun pelilih menua nya. -RBI

MERADONG, 12 Mei – Tiga iku lelaki peranak menua tu beumur 50, 33 enggau 29 taun udah ditan Raban Petugas Indu Opis Polis Pelilih Menua (IPD) Meradong dalam operasyen “Ops Saringan Khas Sarawak” kemari.

Ketuai Polis Pelilih Meradong, DSP Tansli Mering madah, pengawa ngetan nya digaga urung pukul 9.30 malam kena 11 Mei tu tadi pengudah polis nyangka semua individu nya bisi kaul enggau aktiviti salah guna dadah.

Nitihku iya, semua saspek udah nya dibai ngagai Opis Bagian Tasat Jenayah Narkotik (BSJND) Pelilih Meradong ngambika atur ke silik agi dipejalaika.

“Asil peresa ai kemi tetemuka ketiga-tiga saspek ditemu positif Amphetamine enggau Methamphetamine,” ku iya nengah penerang media sehari tu.

Ku iya, pengawa meresa rikod ke udah tetemuka saspek keterubah bisi rikod penyalah bekaul enggau dadah, lalu dua iku saspek ke bukai nadai ngembuan sebarang rikod jenayah tauka dadah.

Kes tu dipansik ari baruh Seksyen 15(1)(a) Akta Dadah Berbahaya 1952 ti nyendiaka ukum mata duit enda ngelui RM5,000 tauka jil nyentuk dua taun enti dikenuku salah.

Berebak enggau nya, polis nyemetak madahka sida beratika penyalah bekaul enggau dadah enggau berat lalu enda deka belembut ba sebarang aktiviti salah guna dadah ke enda beradat di pelilih menua nya.

Mensia mayuh ke bisi penerang bekaul enggau aktiviti dadah di pelilih Meradong dipinta ngenataika penerang ngagai polis nengah Indu Opis Polis Pelilih Meradong tauka betanya ngagai Balai Polis Bintangor nengah lumur 084-693222. -RBI

KUCHING, 11 Mei — Kompeni penerebai bilun ke diempu Sarawak, AirBorneo dipelaba deka berengkah bejalaika operasyen jet keterubah bulan Julai tu enggau jalai pemungkal ti mungkur Kuala Lumpur, Singapura, Kota Kinabalu enggau Jakarta.

Premier Sarawak, Datuk Patinggi Tan Sri Abang Abdul Rahman Johari Abang Openg madah, penumbuh serikat penerebai bilun nya ukai semina deka ngenegapka rentayan pengangkut langit nengeri tu, tang mega muka mayuh agi peluang gawa ngagai peranak Sarawak, kelebih agi dalam sektor penerebai bilun enggau industri ke bekaul.

Nitihku iya, pemansang AirBorneo setipak enggau agenda transformasyen Sarawak nuju sistem pengangkut moden sereta beteknologi tinggi.

“Ukai semina ngemansangka ART (Autonomous Rail Transit), kitai mega numbuhka kompeni penerebai bilun kitai empu ti begunaka mayuh orang ti landik nyengkaum deriba bilun.

“Insya-Allah bulan Julai tu, AirBorneo deka berengkah beoperasyen enggau jalai pemungkal ngagai Kuala Lumpur, Singapura, Kota Kinabalu enggau Jakarta,” ku iya.

Iya madah munyi nya lebuh bejaku ba Pengerami Ngintu Hari Pengereja Pengawa Renggat Sarawak 2026 ke diatur ba Palan Konvensyen Borneo Kuching kena Hari Minggu tu tadi.

Ba pemansang ke sama, iya madah projek ART ke diatu benung chakah dipejalaika nyata ngayanka pengulih Sarawak ngemansangka sistem perengka pengangkut mensia mayuh ke moden ngena belanja nengeri empu.

Ku iya, sistem pengangkut autonomi ngena teknologi hidrogen setipak enggau komitmen Sarawak ngagai pemansang gadung enggau inovasyen teknologi.

Premier Sarawak mega madahka pemansang ekonomi nengeri tu ke jampat mansang diatu matak mayuh agi peranak Sarawak ke gawa di Semenanjung pulai gawa di nengeri tu berindik ari penambah peluang kereja enggau pemansang ke majak ngerembai.

Nambahka nya, iya madahka pemansang infrastruktur nyengkaum ngaga 22 buah jematan baru enggau rentayan jalai alun di kandang menua ulu deka terus ngenegapka penumbuh ekonomi sereta ngangkatka pengelantang pendiau rayat.

“Ba bulan tu, Insya-Allah ba minggu ketiga, rayat ulih meraka Batang Lupar nengah jematan ke pemadu panjai di Malaysia ke meraka sungai,” ku iya. — RBI

LUMUT, 12 Mei — Ejensi Penerit Adat Maritim Malaysia (Maritim Malaysia) Nengeri Perak udah ngaktifka operasyen ngiga enggau nyelamat (CARILAMAT) berindik ari penusah bot ke dipelabaka ngundan Peranak Menua Luar Nadai Pemendar (PATI) ke diripotka karam ba kandang tasik Pulau Pangkor tumu pagi kemari.

Direktor Maritim Nengeri Perak, Mohamad Shukri Khotob madahka, piak iya nerima penerang pasal penusah nya urung pukul 5.30 pagi ari siku orang berikan ke tetemuka orang melepung ba tasik sebedau bantu tekala nya digaga.

“Berindik ari ripot ke diterima, Op CARILAMAT udah diaktifka pukul 6.00 pagi enggau atur pemindah aset KM GAGAH enggau BENTENG 1203 ngagai endur penusah nyadi ngambika ulih bejalaika operasyen ngiga enggau nyelamat,” ku iya nengah sebengkah penerang sehari kemari.

Ku iya, operasyen nya mega nerima kerejasama ari Raban Polis Marin, TLDM enggau komuniti orang berikan besemak.

Nitihku iya, sebuah kapal berikan menua tu mujur nyelamatka 23 iku mansa peranak Indonesia ti mungkur 16 iku lelaki enggau tujuh iku indu sebedau semua sida diiring ngena Bot PPM PAC 16 ngagai Jeti PPM Kampung Acheh ungkup tuju dokumentasyen enggau pansik ke silik agi.

“Asil pansik keterubah tetemuka penyampau semua PATI ke dipelabaka ba bot nya bisi 37 iku.

Naka ke diatu, bisi 23 iku orang ke kena penusah udah mujur dipansutka seraya ke bukai bedau dikelala lalu operasyen SAR agi dipejalaika,” ku iya nerang.

Ba pengerembai ke sama, KM GAGAH mega bisi ngeripotka tetemuka tiga beg ke ngundan gari ke dipelabaka enggi sida ba palan operasyen SAR lalu proses ngelala deka dipejalaika enggau sida ke agi idup.

Semua sida ke udah diselamatka nya udah dibai ngagai Jeti PPM Kampung Acheh sebedau diserah ngagai piak bekuasa ngambika atur nangkanka nya dipejalaika ba Indu Opis Polis Pelilih (IPD) Manjung.

Pansik tumu mega tetemuka semua PATI ke bisi kaul nya dipelabaka bekejang ari Kisaran, Indonesia kena 9 Mei tu tadi nuju ke Malaysia enggau sekeda palan ke dipelabaka nyengkaum Pulau Pinang, Terengganu, Selangor enggau Kuala Lumpur.

Operasyen SAR mega mungkur mayuh macham aset nyengkaum KD Sri Indera Sakti, Helikopter Fennec TLDM, dua buah Fast Combat Boat (FCB) TLDM, pesawat Bombardier CL-415 Ejensi Penerit Adat Maritim Malaysia enggau Bot PPM PAC 16 dikena bejalaika pengawa meresa enggau matau ba kandang endur nya.

Mohamad Shukri Khotob nyemetak madahka piak iya deka terus chakah agi bejalaika pengawa ngiga nyentukka semua orang ke tusah mujur ditemu.

Iya mega nesau mensia mayuh kelebih agi komuniti maritim ngambika ngenataika sebarang penerang nyema bisi tetemuka sida ke tusah tauka utai ti dipelaba di tasik nengah chara betelefon ngagai Palan Gerakan Maritim Nengeri Perak nengah lumur 05-683 8737 tauka talipaun penusah ngenyit 999 ngambika ulih dipejalaika enggau lengkas. — RBI

BAU, 12 Mei — Tiga iku lelaki peranak menua nya ditan pengudah diperesa positif dadah dalam operasyen penerit atur ti dipejalaika Bagi Pansik Jenayah Narkotik (BSJN), Indu Opis Polis Pelilih (IPD) Bau ngelingi Kampung Serikin, ditu kemari.

Nitihka penerang ari Ketuai Polis Pelilih Bau, Mohd Haide A. Rahman, operasyen ti dipejalaika entara pukul 11.00 pagi ngagai 12.00 tengahari nya mujur ngetan siku lelaki beumur urung 24 taun ti dipelaba bisi kaul enggau pengawa salah guna dadah.

“Udah nya, ba endur ke bukai, dua iku lelaki ke beumur entara 31 ngagai 34 taun ditan,” ku penerang nya.

Penerang nya mega madahka pemutus peresa ai kemi keterubah ba ketiga-tiga saspek tetemuka sida positif dadah.

“Semua saspek ditan ari baruh Seksyen 15(1)(a) Akta Dadah Berbahaya 1952,” ku iya.

Berebak enggau nya, Polis DiRaja Malaysia (PDRM) nyemetak madahka sebarang pengawa ngaul diri dalam aktiviti salah guna dadah deka diambi atur ke terit nitihka penetap undang-undang.

Mensia mayuh ti bisi penerang bekaul enggau aktiviti dadah dipinta ngenataika penerang nya nengah Talian Hotline JSJN Bukit Aman ba lumur 012-208 7222 tauka Talian Hotline JSJN IPK Sarawak ba lumur 017-592 9211. — RBI

BETONG, 12 Nei – Bagi Tasat Jenayah Narkotik Indu Opis Polis Pelilih Menua (IPD) Betong mujur ngetan dua iku lelaki peranak menua tu ke dipelabaka bisi kaul enggau aktiviti dadah ba pengawa ngenyit Ops Tapis Khas di kandang menua Betong.

Ketuai Polis Pelilih Betong, DSP Wan Mohamad Ali Wan Malek madah, kedua-dua saspek ke beumur 29 enggau 48 taun nya mujur ditan urung pukul 11.40 pagi sebedau dibai ngagai IPD Betong ngambika atur silik agi dipejalaika.

Nitihku iya, asil peresa ai kemi ti dipejalaika ba Opis Bagi Tasat Jenayah Narkotik IPD Betong tetemuka kedua-dua saspek positif amphetamine enggau methamphetamine.

“Pansik silik mega tetemuka kedua-dua saspek ngembuan rikod ke udah bekaul enggau penyalah dadah,” ku iya nengah penerang media.

Ku iya, kes tu dipansik ari baruh Seksyen 12(2) Akta Dadah Berbahaya 1952 ketegal ngembuan dadah ti nyendiaka ukum mata duit enda ngelui ari RM100,000 tauka jil nyentuk lima taun nyema dikenuku salah.

Kelimpah ari nya, kes nya mega benung dipansik ari baruh Seksyen 15(1)(a) akta ke sama laban ngejik dadah ngagai tubuh ti mai ukum enda ngelui ari RM5,000 tauka jil nyentuk dua taun, nyema dikenuku salah.

Berebak enggau nya, polis beratika pengawa salah guna dadah ba genturung pendiau enggau berat lalu bebendar madahka sida enda deka belembut ba sebarang pengawa bekaul enggau dadah ba pelilih menua nya.

Mensia mayuh ke bisi penerang bekaul enggau aktiviti dadah ba kandang menua Betong dipinta ngenataika penerang ngagai Balai Polis Betong ba lumur 083-472345 dikena mantu pengawa mansik enggau pengawa ngelaban penyalah dadah. -RBI

MIRI, 12 Mei – Siku lelaki peranak menua tu beumur urung 50 taun bebadi pengudah iya dipelabaka dilantak sebuah entukar ke enda dikelala ba penusah bebadi ba jalai alun di Jalai Padang Bilun Miri besemak enggau Borneo Medical Center (BMC), tumu pagi tu tadi.

Ketuai Polis Pelilih Miri, ACP Mohd Farhan Lee Abdullah madah, penusah nya nyadi urung pukul 1 pagi lebuh tudah betengahka jalai ari kanan ke ngelayang ke kiba.

Nitihka penerang iya, tudah dipelabaka dilantak ba lurung kanan jalai alun ulih sebuah entukar ke bedau dikelala identiti.

“Tudah dientaska bebadi ba palan penusah ke nyadi ketegal balat bakal,” ku iya ba sebengkah penerang.

Ku iya, kes nya dipansik ari baruh Seksyen 41(1) Akta Pengangkutan Jalan 1987.

Berindik enggau nya, piak polis minta mensia mayuh ke bisi penerang bekaul enggau penusah nya datai ke mua mantu tasat nengah chara ngaga kangau enggau Pemesai Pemansik Trafik Insp. Mohd Faizul Ab. Rahim nengah lumur 014-8582582 tauka 085-430479, tauka sebarang balai polis ke besemak.

Berebak enggau nya, penguna jalai alun dilalau ngambika seruran deriba enggau bejimat sereta ngasika atur jalai alun dikena nyeliahka sebarang penusah ke enda manah nyadi. -RBI