SIBU, 9 Jun – Gerempung Bakat Dayak Sarikei nengah sukung ari Kaunsil Seni Sarawak deka ngatur Woksop Ngerembaika Pantun Iban Edisyen Ke-2 kena 25 ngagai 26 Julai 2026 ti nyadi pengeran dikena ngenegap, ngetan sereta ngemansangka pesaka asal litericha enggau budaya bansa Iban Sarawak.

Program ke deka diatur ba Rumah Rantai, Luyang Baru, Skim Pengentap Pendiau Sekuau, Sibu tu tebuka ngagai penyereta ari semua serak pengidup enda ngira penatai bansa enggau umur, lalu enggau nya nyadi pelasar meri kelala sereta ngelakuka seni pantun Iban ngagai mensia mayuh ke lebih mayuh.

Sepemanjai woksop tu, bala penyereta deka dipeda enggau teknik ngasilka pantun Iban, gaya nilai estetik litaricha asal sereta pengawa pantun nyadi medium dikena ngenataika penemu, adat enggau budaya dalam raban bansa.

Program nya mega ditambah enggau pengawa ngatur Malam Main Asal kena malam 25 Julai, ti mandangka elemen seni enggau main asal nyadi sebagi ari program nya.

Ba hari keterubah, woksop deka berengkah ari pukul 8.00 pagi nyentuk 5.30 lemai sebedau ditampung enggau Malam Main Asal ari pukul 7.00 malam nyentuk 11.00 malam.

Sesi woksop tu deka disambung ba hari kedua ari pukul 8.00 pagi nyentuk 12.00 tengah hari.

Pengatur pengawa madahka penyereta enda bebayar lalu tetiap penyereta ke nembuka woksop deka nerima setipikit penyereta.

Perengka guna pemakai enggau ai irup mega deka disediaka sepemanjai program nya.

Woksyop tu dikearapka ulih nyadi pelasar ti beguna dalam ngadaka mayuh agi aktivis litericha enggau budaya, kelimpah ari ngenegapka agi pengawa ngetanka pesaka pantun Iban ngambika meruan relevan sereta ditampung rebak dudi hari.

Mensia mayuh ke bisi ati nyereta program tu tau betanya ngagai pengatur nengah lumur 013-350 5707 tauka 014-500 2685 penerang silik enggau ngerejista diri. – RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUALA LUMPUR, 9 Jun – Penusah bebadi bas temuai ti balat ngenyinuka ati ba jalai Genting Highlands sekali agi ngasuh pengirau ati ti balat bekaul enggau pengelikun jalai alun.

Penusah tu ngujungka Opis Menteri Dagang Temuai, Seni enggau Main Asal (MOTAC) ngansak singkang jampat diambi dikena ngenegapka pengawa ngatur perengka pengangkut dagang temuai ambika likun.

Menteri iya, Dato Sri Tiong King Singmadah, aum koordinasyen khas diatur sehari tu ti ngaul Ejensi Perengka Pengangkut Mensia Mayuh Darat (APAD), Opis Perengka Pengangkut Jalai (JPJ), Polis Diraja Malaysia (PDRM), Palan Meresa Perengka Pengangkut Bekomputer (PUSPAKOM) enggau sekeda ejensi bekaul berandauka pejalai pansik penusah aksiden enggau atur ti nangkanka nya ti patut dipejalaika.

Nitihku iya, pansik tumu bekaul enggau penusah aksiden ke nyadi kena 30 Mei tu tadi mandangka bisi peluang sistem brek ba entukar ke bisi kaul nya rusak.

Taja pia, kebuah ke bendar agi nganti penetap kepenudi ari tim teknikal ti bejalaika pansik enggau silik.

Iya mantaika rikod mandangka deriba bas nya bisi enam penyalah sebedau tu ari baruh JPJ enggau 29 rikod penyalah trafik dirikod polis nyengkaum deriba ngelui ari tikas pengelaju, nadai lisin PSV ke entas, deriba nadai lisin, ngelanggar tanda trafik enggau ngena telefon binching lebuh deriba.

“Pekara tu balat ngirauka ati lalu mandangka pematut jampat neritka agi pengawa matau deriba enggau operator perengka pengangkut temuai,” ku iya.

Iya nyemetak madahka pengelikun perengka pengangkut temuai ukai semina ngaul nyawa pesinjir aja, tang mega meri empas terus ngagai imej industri dagang temuai menua tu.

Berindik enggau nya, iya meri langgur penemu ngambika piak ke bekaul beratika pengawa masang perengka guna ngurangka pengelaju baka ‘road humps’ tauka chara nagang trafik ke bukai ba kandang endur ke berisiko tinggi.

Tu kelebih agi ba jalai nurun ke Tanah Tinggi Genting enggau sekeda endur ke strategik ba jalai besai tama enggau pansut ari kandang endur ngelantangka ati.

Ku iya, perambu masang kamera penerit adat enggau sistem matau pengelaju udah kala dibantaika JPJ sebedau tu, tang bedau dipejalaika laban jalai ke dikerandau nya ari baruh pengawa ngatur peribit.

“Diatu semina bisi mimit aja kamera televisyen litar tertutup (CCTV) ba sekeda endur.Nya alai, atur ngerembaika pengawa ngena teknologi matau patut dikelengkas ngambika ulih ngangkatka pengelikun jalai alun,” ku iya.

Iya mega ngingatka atur pengelikun ukai semina patut diberi perati pengudah penusah aksiden nyadi, tang patut dipejalaika enggau proaktif dikena ngurangka risiko sebedau penusah ngenyit nyadi.

Taja pan jalai alun nya ari baruh pengatur peribit, tang iya ngarapka piak pengatur ulih meri kerejasama penuh bepelasarka pemerat mensia mayuh enggau tanggungpengawa rama korporat (CSR) dikena nyaga pengelikun penguna jalai alun enggau temuai.

Berebak enggau nya, iya nyemetak madahka atur ti terit agi patut dipejalaika ngagai sebarang deriba tauka operator ti ngembuan rikod suah ngereja penyalah, enda ngintu perengka pengangkut enggau manah, udah abis timpuh chukai jalai tauka bisi kaul enggau pengawa ngelanggar atur ti tau ngeruga pengelikun mensia mayuh.

“Enti penanggul nya majak nyadi enggau nadai pengawa ngemetulka ti efektif, dia sistem nya empu patut diperesa sereta dikemanahka agi,” ku iya.

Iya mega madahka MOTAC deka ngatur randau silik agi enggau piak pengatur Genting Highlands dikena meresa gaya ngatur pengelikun jalai alun ke diatu sereta ngelala chara ngemanahka ti ulih dipejalaika enggau lengkas.

Ku iya, rayat ukai semina dekaka ripot tauka penerang aja, tang ngarapka pengawa ti tegap ti ulih mutarka penanggul sereta nyeliahka penusah ke sebaka nyadi baru.

“Nentuka pengelikun temuai, ngetanka pemanah nama industri dagang temuai menua enggau ngangkatka kualiti servis pengangkut dagang temuai nyadi tanggungpengawa begulai semua piak.Kitai patut bejalaika pengawa enggau proaktif sereta bepelasarka ngagai chara mutarka penanggul,” ku iya.

MOTAC deka terus matau pengerembai isu tu sereta bekerejasama rat enggau semua ejensi ti bekaul dikena nentuka tikas pengelikun perengka pengangkut dagang temuai di menua tu terus diangkatka ungkup pengelantang pendiau temuai menua tu enggau antarabansa. – RBI

#ruaiberitaiban#newsiban#beritaiban

Rindu | Titih | Kunsika

PUTRAJAYA, 9 Jun — Apresiasyen Rukun Negara terus nyadi pelasar ti beguna dalam nentuka pengelantang, penegap politik enggau pengelantang mensia mayuh ti pupu bansa ba Malaysia, nitihka penerang ari Menteri Penyerakup Menua, Datuk Aaron Ago Dagang.

Iya madah munyi nya berindik ari Aum Kaunsil Penyanding Penemu Penyerakup Menua (MPPN) Bil 1 taun 2026 ti bechairmanka Sapit Menteri Besai, Dato’ Sri Fadillah Yusof, begulai enggau kaban kaunsil ti mungkur tokoh komuniti ari mayuh macham penatai.

Nitih ku Aaron, aum nya ngemeratka komitmen perintah deka terus ngenegapka pengawa ngaga nengeri bansa bepelasarka Konstitusyen Perintah Besai, Rukun Negara enggau Polisi Penyerakup Menua nyadi batang langkar dalam ngetanka penyerakup enggau pengelantang rayat.

Ku iya, entara batang pekara ti dikerandau iya nya pengawa ngenegapka penyerakup bansa dalam napi pemar kemaya hari nyengkaum ‘polarisasi sosial’ enggau ‘disrupsi digital’ ti majak ngeruga landskap pengidup komuniti.

“Chara ti lebih meri empas ngagai pelajar penyerakup enggau literasi sivik patut ditegapka dikena nentuka rayat terus beratika rega penyerakup, bebasaka pangan diri sereta meretika tanggungpengawa diri nyadi rayat,” ku penerang nya.

Aum nya mega bejuraika pengawa bejalaika empat modul Pelajar Am (MPU) baru iya nya Aspirasi Kebangsaan (ANB), Imej Malaysia (CM), Falsafah enggau Penanggul Semasa (FCS), enggau Konstitusyen enggau Mensia Mayuh enggau Integriti (PMB).

Nitih ku Aaron, modul nya deka dipejalaika enggau komprehensif ba palan pelajar tinggi berengkah sesi akademik 2026/2027 nyadi sebagi ari pengawa ngenegapka pemereti ati nembiak rebak baru pasal identiti bansa, nilai penyerakup, integriti enggau prinsip bansa.

Iya nyemetak madahka pengawa ngenegapka penyerakup bansa begunaka sukung enggau kaul ti seruran ari semua piak dikena nentuka pemaik, penegap enggau pengelantang menua terus dijaga ungkup rebak dudi hari. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — Aaron Ago Dagang

BINTULU, 9 Jun — Opis Perengka Pengangkut Jalai (JPJ) Sarawak udah ngambi singkang proaktif dikena nentuka pengawa bejalaika Program Bantu Lisin Deriba (BLM) DUN N.69 Kemena bejalai enggau lanchar nengah aum koordinasyen ke diatur ba Bilik Aum JPJ Bintulu, sehari tu.

Aum nya bechairmanka Direktor JPJ Sarawak, Tuan Norizan Jili, lalu betuju berandauka aspek pengawa bejalaika enggau koordinasyen program dikena nentuka iya ulih dipejalaika enggau sistematik, ngasi sereta nyapai juluk ke udah ditetapka.

Nitih ku JPJ Sarawak, Program Bantu Lisin Deriba iya nya inisiatif ti meri penguntung terus ngagai rayat nengah chara mantu sida ti patut ngulihka lisin deriba ti entas, lalu ari nya ulih nambahka tikas ngasika undang-undang jalai alun sereta ngenegapka budaya deriba ti likun ba penguna jalai alun.

Aum nya mega nyadi pelasar dikena nerangka enggau silik mekanisme bejalaika program, ngelala guna logistik sereta ngenegapka kerejasama strategik entara ejensi enggau raban ti bekaul dikena nentuka pengawa ngenataika bantu ulih dipejalaika enggau efisyen sereta komprehensif.

Sama bisi datai Ketuai Bagi Lisin Deriba JPJ Sarawak, Tuan Yusniman Mohamad, pengari Palan Servis DUN N.69 Kemena enggau Akademi Memandu Bintulu Sdn. Bhd.

Randau ke bisi nyadi mandangka komitmen tinggi semua piak dalam ngemujurka program nya, lalu enggau nya nentuka mayuh agi peranak kelebih agi ba kandang menua Kemena bepeluang ngembuan lisin deriba ti sah sereta diaku.

JPJ Sarawak nyemetak madahka sida deka terus komited ngerembaika akses ngagai lisin deriba ti bekualiti, likun sereta sah ari sukut undang-undang, setipak enggau pengawa perintah dalam ngangkatka pengelantang pendiau rayat sereta ngenegapka mobiliti komuniti di serata nengeri. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

MUKAH, 9 Jun — Dua iku nembiak indu ti diripotka lenyau kenyau ari kemari udah ditemu selamat berindik ari pengawa polis enggau jampat sereta kerejasama mensia mayuh.

Nitihka penerang ti dipansutka Ketuai Polis Pelilih Mukah, DSP Muhamad Rizal Alias, dua iku nembiak ti bisi kaul nya, Easter Agnes Anak David, 14, enggau Frocilea Rajok Anak Jessica, 14, sebedau tu diripotka lenyau kena 8 Jun 2026.

Ku iya, dua iku nembiak nya mujur dipansik raban polis ari Indu Opis Polis Pelilih (IPD) Mukah urung pukul 1.40 lemai, Hari Dua, pengudah raban polis nerima penerang ari mensia mayuh senentang penunga seduai iya ba kandang endur baruh sebuah kedai guntin buk di Bandar Mukah.

“Lebuh ditemu, dua iku nembiak nya benung bejalai enggau siku agi bakih indu ba endur nya sebedau dibai ngagai Sepital Mukah ngambika diperesa pengerai,” ku iya nengah sebengkah penerang ti dipansutka sehari tu tadi.

Nitihka penerang iya, berindik ari penemu nya, kes orang lenyau ti ngaul dua iku nembiak nya dientaska ditutup.

Berebak enggau nya, raban polis meri besai terima kasih ngagai mensia mayuh enggau media ketegal kerejasama enggau bantu sida dalam ngerembaika penerang sepemanjai pengawa ngiga mansa.

Kerejasama ari mayuh bengkah piak nyengkaum komuniti lokal dianggap nyadi pekara ti beguna dalam mantu ngenyampatka pengawa tetemuka dua iku nembiak nya enggau likun. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Photo — Laman Rasmi IPD Mukah

SARIKEI, 9 Jun – Urung 160 iku raban nembiak enggau temuai ke dikangau ari serata Sarawak begempuru ngintu Hari Nembiak Sarikei 2026 (SYD2026), sebengkah gempuru ti nyerakupka rebak baru pengarap Katolik dalam semengat pengarap, begulai enggau pengelantang.

Ngambi rambai jaku “Bersinar Dalam Harapan”, program empat hari nya ukai semina pengawa ninting taun aja, tang nyadi bidang penumbuh semengat ti ngerapitka kaul raban nembiak enggau Kristus nengah sampi, komuniti enggau misyen.

SYD2026 mega nyadi pelasar nyendiaka diri ungkup Hari Nembiak Katolik Malaysia (MCYD), enggau mayuh isi penumbuh enggau randau rohani dikemeratka setipak enggau agenda pemansang nembiak Gerija ba renggat nasional.

Program tu bepalan ba empat pugu pekara pastoral Gerija iya nya Ekologi, Gerija, Ruang Bilik enggau Komuniti Mensia (KORASIA).

Empat elemen tu nyadika pelasar refleksyen, randau enggau peneleba sampi ti meransang raban nembiak nyadi orang ti nyaga rampa menua, kaban Gerija ti regas, saksi pengarap dalam ruang bilik sereta orang ti ngaga komuniti ti bisi penyinu.

Kelimpah ari isi rohani, bemacham aktiviti lumba enggau main sereta Festival Belia mega bisi diatur dikena ngerapitka kaul entara penyereta.

Tu nyengkaum pekit main bol tampar, tarit tali, main asal, catur, e-lumba kelimpah ari aktiviti kreatif baka ngaga Rosario enggau sesi sembiang Taizé.

Pengawa bejadika pengerami nya diintu enggau Ukaristia ti betuaika Bishop Joseph Hii, Bishop Diocese Sibu, ti mantaika sukung penuh ngagai pengawa ngenegapka raban nembiak dalam pengidup Gerija.

Entara pekara ti pemadu negu ati iya nya bekunsi rohani ari Fr. Sylvester Ngau Juk ti ngemeratka kangau ngagai kemisi nengah rambai jaku “Penampak, Regang, Ngerembaika”, ngingatka bala penyereta ngambika terus nyadi ngemai penampak Kristus, ngesan regang sereta madahka Berita Manah enggau nadai penanggi.

Sepemanjai program nya, penyereta mega bisi ngulu sesi puji enggau sembiang ti dipejalaika Focus On Christ (FOC), sesi ngenegapka pengarap raban nembiak enggau sembiang Taizé ti betuaika raban nembiak ari Archdiocese Kuching.

Penteba pengarap mega bisi dikunsi Anna Teresa ari Diocese Sandakan enggau Lucy Gumek ari Archdiocese Kuching ti mega alumni IFFA.

Sida meransang bala penyereta ngambika mengkang tegap dalam pengarap sida, nyadi nembiak Kristus ti tetap ati sereta ngidupka nilai Kristian dalam pengidup sida ninting hari.

Gempuru nya ngempuruka raban nembiak ari mayuh bengkah parish nyengkaum St.Anthony Sarikei, Christ the King Bintangor, St.Mary Sibu, St.Michael Sibu Jaya, Immaculate Conception Kapit, Katedral Sacred Heart, St.Bernard Dalat enggau St. Peter sereta Paul Mukah, kelimpah ari penyereta ari “Keuskupan” Miri enggau beberapa keuskupan lain ba rantau tu.

SYD2026 mega mantaika semengat meri servis ngagai komuniti lebuh Gerempung Indu Katolik St.Anthony ti betuaika Madam Monica Normie nyendiaka pemakai sepemanjai program enggau penuh dedikasyen dalam nyaga pengelantang penyereta.

Pengawa ngatur program nya mega nerima sukung ari mayuh bengkah piak nyengkaum Rimbunan Sawit Berhad, komuniti parish kelimpah ari bantu teknikal ari Tim MCP Beesamah.

Pemujur SYD2026 mega asil ari komitmen Tim Pengatur Besai (MOT), Tim Pengatur Kandang Menua (LOT), raban nembiak enggau alumni ti besaup ngemujurka gempuru nya.

Lebih ari semina program aja, SYD2026 nyadi palan betemu ti beguna ti ngenegapka penyerakup raban nembiak Katolik di Diocese Sibu enggau Sarawak ba selampur.

Asil ari randau enggau penemu bala penyereta deka dibai nyadika program nembiak ngagai Konvensyen Pastoral Malaysia ti deka datai di Sibu.

Setipak enggau semengat, SYD2026 ngayanka lebuh raban nembiak begempuru dalam Kristus, pengadang ukai semina idup, tang mega manchar terang agi ungkup jemah ila Gerija enggau mensia mayuh. – RBI

#ruaiberitaiban#newsiban#beritaiban

Rindu | Titih | Kunsika

KUCHING, 9 Jun — Aktivis hak asasi mensia Sarawak, Peter John Jaban ngansak raban pengatur AirBorneo, kelebih agi Ketuai Pemesai Eksekutif (CEO) kompeni penerebai bilun nya mansutka diri meri penerang bekaul enggau penanggul penerebai bilun ti dikumbai majak ngirauka ati dalam timpuh ke semak tu.

Nengah penerang berita sehari tu, iya madahka peranak Sarawak ba pun ngelaluka penumbuh AirBorneo, ti dipeda nyadi kelai penyulut enggau autonomi nengeri tu dalam sektor penerebai bilun.

Nitihku iya, serikat penerebai bilun enggi perintah menua nya ukai semina dipeda nyadi siti pemujur ti beguna, tang mega kelai aspirasyen Sarawak ngemanahka agi sambung perengka pengangkut langit sereta ngenegapka penuduk dalam industri penerebai bilun serantau.

Taja pia, iya ngumbai pengaga nya diatu tejanggal enggau penambah kes penerebai bilun laun, dikinsil ba minit kepenudi enggau bemacham penanggul operasyen ti nuntung pesinjir di serata Sarawak enggau Sabah.

“Ninting hari media rama penuh enggau sebana ari pesinjir ti tepekul ketegal ubah ngenyit ba taga penerebai bilun.Sida ukai ringat ketegal ti nulak AirBorneo, tang asa ati laban pengadang ti dilempaika ba kompeni baka ke enda dijapai,” ku iya.

Peter John mega ngumbai pengawa nya ke majak nyadi nya meri empas ke besai ngagai pengidup rayat nyengkaum ngasuh sekeda pesinjir enda ulih berubat ke beguna, temu janji dagang, interbiu kereja, penerebai bilun nyambung enggau pengawa begempuru diri sebilik ke udah diperambu tumu.

Iya mega ngenang pasal tuduh siku individu ke dipadah ngembuan mayuh peneleba dalam operasyen penerebai bilun serantau, ke madahka proses transisyen operasyen AirBorneo bedau diputarka enggau penuh.

Entara isu ke dibantaika iya nya didawa enda beratika pengawa ngatur staf darat, pengelemi ba pengawa ngatur opis teknikal enggau operasyen penerebai bilun, sereta pemar bekaul enggau penau ngintu bilun.

Nitih ku iya, tuduh nya mega ngasuh orang betanya pasal tikas penyedia operasyen kompeni nya dalam nangkup peminta industri penerebai bilun, ti dipegai standard pengelikun enggau atur ti terit.

Peter John mega betanya pasal ripot ti madahka semina sebagi ari armada bilun AirBorneo ke benung beoperasyen diatu, lalu enggau nya ngasuh pengirau ati bekaul enggau pengulih kompeni nya ngetanka taga penerebai bilun ke konsisten.

Berindik ari nya, iya ngansak raban pengatur atas AirBorneo datai ke mua meri penerang tebuka ngagai mensia mayuh bekaul enggau kebuah pengawa tejanggal sereta singkang jampat ke dipejalaika dikena mulaika pengarap ati penumpang.

“Lebuh kompeni napi krisis enggau sebana mensia mayuh, ketuai patut mansang ke mua nerangka gaya ke bendar sereta mandangka komitmen ngagai pengawa ti terang sereta akauntabiliti,” ku iya.

Iya nyemetak madahka rayat Sarawak patut nerima penerang ke nyemetak senentang gaya kompeni penerebai bilun ke diatu lalu ngarapka resolusyen jampat dikena nentuka servis pulai ngagai penegap sereta nangkup guna penguna. – RBI

#ruaiberitaiban#newsiban#beritaiban

Rindu | Titih | Kunsika

SERIAN, 9 Jun — Perintah Sarawak ari baruh iring Gabungan Parti Sarawak (GPS) tetap komited ngetan sereta ngenegapka hak Tanah Adat Bumiputera (NCR) nengah mayuh bengkah polisi enggau pengawa ke tegak, lalu enggau nya nulak jaku penyakal ti madahka perintah nengeri enda ibuhka pemerat tanah adat nengeri.

Sapit Premier Sarawak, Datuk Amar Douglas Uggah Embas madah, perintah nengeri seruran beratika isu ke bekaul enggau tanah NCR enggau berat laban tanah nyadi reta ke chukup berega ngagai komuniti Dayak sereta patut diintu ungkup pengelantang rebak dudi hari.

Ku iya, komitmen tu diasaika nengah bemacham inisiatif nyengkaum ubah Kanun Tanah Sarawak ba taun 2018 ti ngaku kandang menua Pulau Galau enggau konsep Pemakai Menua, lalu enggau nya ngenegapka agi pengawa nyaga hak tanah adat komuniti setempat.

“Penyakal suah nuduh perintah enda ibuhka reta enggau pemerat komuniti Dayak.

“Kebendar iya, perintah seruran bebendar nyaga hak tanah adat nyengkaum ngubah undang-undang tanah ngambika ngaku Pulau Galau enggau Pemakai Menua,” ku iya.

Iya madah munyi nya lebuh bejaku ba Pengerami Nyambut Gawai Dayak 2026 Bukit Semuja ke diatur ba Kampung Riih Daso, semak ditu, kemari.

Nitih ku Uggah, pengawa ngaku Pulau Galau enggau Pemakai Menua nengah ubah Kanun Tanah Sarawak (KTN) siti singkang ke berat dalam meri penetap enggau jamin nyaga hak pengempu tanah NCR di serata Sarawak.

Kelimpah ari nya, perintah nengeri mega udah bejalaika bemacham pengawa bukai nyengkaum ngenyampatka proses nyukat tanah, ngaga gazet kandang endur ke bekaul sereta ngeluarka surat pala tanah dikena nentuka hak pengempu tanah adat terus dijaga sereta diatur enggau sistematik agi.

Iya nyemetak madahka semua singkang ke udah dipejalaika perintah nengeri nyata ngayanka dawa penyakal ti madahka perintah enda ibuhka isu tanah NCR nya nadai pengamat.

Ba pemansang ke bekaul, Uggah mega nyemetak madahka nadai siku peranak Sarawak deka dikelaung ari arus pemansang laban perintah nengeri komited nentuka penguntung ari pemansang ulih diasaika enggau sama bela semua rayat enda ngira endur tauka penatai.

Ku iya, prinsip tu nyadi teras Strategi Pemansang Pasca COVID-19 2030 (PCDS 2030) ti ngemeratka pengelantang ekonomi, penyerakup rama enggau pengelantang rampa menua.

“Nadai siku orang deka dikelaung. Tu ukai semina retorik aja, tang dipejalaika nengah polisi, perambu enggau pengawa ti terang ti ngemendarka rayat meda kediri empu asil pemansang ti dipejalaika di serata Sarawak,” ku iya.

Ku iya, komitmen perintah ngagai pemansang inklusif mega disalin nengah pengawa numbuhka ejensi pemansang pelilih menua ti bejalaika tanggungpengawa ngenyampatka pengawa bejalaika projek pemansang di serata Sarawak, kelebih agi di menua pesisir.

Nitih ku iya, tetiap ejensi pemansang pelilih menua mega nerima agih belanja ke besai dikena bejalaika projek infrastruktur, perengka guna mensia mayuh enggau inisiatif ngangkatka ekonomi rayat dikena nentuka pemansang ulih diasai enggau lebih setimbang sereta komprehensif.

Pengerami Gawai Dayak Bukit Semuja 2026 diatur enggau richah enggau penatai bemacham pupu raban bansa ari ngelingi Bukit Semuja enggau kandang menua besemak, lalu enggau nya mandangka semengat beserakup enggau pengelantang ti nyadi pelasar pemansang Sarawak ti meruan.

Sama bisi datai Menteri Pelajar, Inovasyen enggau Pemansang Bakat Sarawak, Dato Sri Roland Sagah Wee Inn; Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom; Menteri Kereja Raya Malaysia, Dato Sri Alexander Nanta Linggi; Sapit Menteri Industri Pemakai, Komoditi enggau Pemansang Kandang Menua Sarawak, Datuk Martin Ben; Sapit Menteri Dagang Temuai, Industri Kreatif enggau Seni Pemerindang Sarawak, Datuk Snowdan Lawan; Kaban Kunsil Nengeri (ADUN) Bukit Semuja, John Ilus enggau Kaban Kunsil Nengeri (ADUN) Serembu, Miro Simu — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SANDAKAN, 9 Jun — Siku ular sawa batik ke ngembuan pemanjai urung 2.5 meter enggau 14 igi telu udah mujur ditangkap dalam operasyen khas ke dipejalaika ba kandang endur kilang di Batu 8, Jalai Lintas Sibuga, sehari tu tadi.

Penusah nya diperatika siku pekereja ti tepedaka ular nya ba kandang endur timbun zink dalam kandang kilang sebedau ngaga kangau enggau Palan Kawalan Operasyen (PKOD) Pelilih Sandakan minta bantu.

Berindik ari sebana, enam iku kaban ke disikap penuh enggau perengka pengelikun diri dianjung ngagai endur nya ngambi bejalaika operasyen ngiga enggau meresa enggau silik ngelingi kandang endur tumpuk zink enggau lubang tanah ke semak.

Asil ari pengawa meresa nya, tim operasyen mujur nangkap siku ular sawa batik ti dipelabaka enggau pemerat urung 10 kilogram.

Pengawa meresa enggau silik agi mega bisi tetemuka 14 igi telu ti dipelabaka enggi ular nya semak enggau palan ditemu.

Penemu telu nya nunjukka kandang endur nya nyangka nyadi palan ular nya beranak, lalu enggau nya begunaka pengawa enggau lengkas dikena nyeliahka sebarang risiko ngagai pengereja pengawa enggau mensia mayuh.

Operasyen nya tembu pengudah ular enggau telu nya mujur dibai lalu kandang endur nya dientaska likun sereta ulih dijaga. Nadai penusah bakal diripotka nyadi maya operasyen nya dipejalaika. – RBI

#ruaiberitaiban#newsiban#beritaiban

Rindu | Titih | Kunsika

SERIAN, 9 Jun – Sepenyampau RM152.7 juta ungkup pengawa bejalaika 64 bengkah projek pemansang dalam kandang menua DUN N.23 Bukit Semuja nengah Greater Kuching Coordinated Development Agency (GKCDA) udah dikemendarka.

Pengawa tu mandangka pengangkun perintah dalam Gempung Parti Sarawak (GPS) seruran ngemai pemansang ngagai menua pesisir.

Sapit Premier Sarawak, Datuk Amar Douglas Uggah Embas madah, agih belanja nya mandangka penegap Perintah Sarawak ari baruh iring Premier Sarawak Datuk Patinggi Tan Sri (Dr) Abang Johari Tun Openg dalam nentuka pemansang dipejalaika enggau chara sebela sereta inklusif di serata kandang menua nengeri tu nyengkaum dalam kandang menua pesisir.

Kenu ku iya, bemacham projek ke udah diperambu sereta dipejalaika diatu berengkah meri pemaik ngagai rayat asil ari polisi enggau perambu pemansang ke udah dipejalaika perintah nengeri kenyau beberapa taun ke udah.

“Baka orang bumai ngetau asil ari pengawa sida ti bebendar, rayat mega diatu berengkah ngasaika asil ari mayuh macham polisi pemansang enggau inisiatif ti dipejalaika Perintah GPS,” ku iya lebuh bejaku ba Pengerami Ngintu Gawai Dayak Bukit Semuja 2026 ba Dewan Babuk Rihih Dalogso.

Ku iya nerang, ari 64 projek ti udah dikelala di Bukit Semuja nya ngaul bemacham sektor kunsi nyengkaum jalai alun, bekal ai, kuasa karan, betanam betupi, perengka guna komuniti enggau infrastruktur pemun ti meri empas terus ngagai pengelantang pendiau rayat.

Ari penyampau agih belanja ke udah dikemendarka, sepenyampau RM15.16 juta udah dipelanja dikena bejalaika projek tu.

Ku Uggah, pengawa bejalaika projek nya ngayanka komitmen Perintah Sarawak ti deka nentuka pemansang ukai semina betumpu ba mengeri besai aja, tang mega diasaika komuniti menua pesisir nengah pengawa nyendiaka perengka guna pemun ke manah agi, tikas pengidup ke manah sereta peluang ekonomi ke lebih luas.

Iya mega nyemetak madah, penyerakup ke diasaika rayat Sarawak kemaya hari tu nyadi siti ari batang pekara ke ngasuh perintah nengeri ulih merambu sereta bejalaika bemacham agenda pemansang enggau ngasi ungkup pemaik rayat.

“Laban kitai beserakup, nya meh ti ngemendarka kitai terus maju, ngemendarka ketuai kitai YAB Premier merambu deka nambahka penatai pemisi, lalu ngemendarka mayuh agi asil diasaika rayat Sarawak,” ku iya.

Berindik enggau nya, iya minta rayat terus ngetanka semengat beserakup sereta meri sukung ngagai agenda pemansang perintah nengeri dikena nentuka mayuh agi inisiatif enggau projek ulih dipejalaika jemah ila.

“Kitai patut terus nyingkang nyadi siti tim enggau siti ruang bilik besai Sarawak dikena nentuka agenda pemansang ulih diteruska ungkup pemaik rebak kemaya hari tu enggau jemah ila,” ku iya nambah.

Ba pengerami ke sama, Uggah mega bisi madahka pemeri RM20,000 ngagai Komiti Pengatur Pengerami Gawai Dayak Bukit Semuja 2026 ti betuaika John Ilus kelai meri terima kasih ngagai pengeransing sida ngemujurka program nya, ti nyadi pelasar dikena ngenegapka penyerakup enggau semengat begulai sejalai entara komuniti.

Pengerami ti diatur dalam gaya ti richah ngempuruka komuniti pupu bansa ari ngelingi Bukit Semuja enggau kandang menua besemak ngintu Gawai Dayak 2026, lalu enggau nya mandangka semengat penyerakup ti nyadi tiang penegap enggau penyulut Sarawak.

Sama bisi datai Menteri Pelajar, Inovasyen enggau Pemansang Bakat Sarawak, Dato Sri Roland Sagah Wee Inn, Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom, Menteri Kereja Raya Malaysia, Dato Sri Alexander Nanta Linggi, Sapit Menteri Industri Pemakai, Komoditi enggau Pemansang Kandang Menua Sarawak, Datuk Martin Ben, Sapit Menteri Dagang Temuai, Industri Kreatif enggau Seni Pemerindang Sarawak, Datuk Snowdan Lawan enggau Kaban Kunsil Nengeri ( ADUN) Serembu, Dato Miro Simuh. — RBI

#ruaiberitaiban#newsiban#beritaiban

Rindu | Titih | Kunsika