SPAOH, 11 Jun — Sesi Lihat Urus Projek Infrastruktur ari baruh Ejensi Pemansang Bagi Menua Betong (BDDA) ke diatur ba Balai Mensia Mayuh Spaoh sehari tu nyadi pelasar ke beguna dikena ngenegapka koordinasyen enggau ngenataika penerang bekaul enggau pengawa bejalaika projek pemansang infrastruktur ba kandang menua N.37 Bukit Saban.

Program tu udah digulu Kaban Parlimen Betong, Dato Dr Richard Rapu, ngarika Sapit Premier Sarawak ke mega Kaban Kunsil Nengeri (ADUN) N.37 Bukit Saban, Datuk Amar Douglas Uggah Embas.

Nitihka penerang ari Dato Dr Richard Rapu, sesi nya ngembuan tuju deka meri penerang enggau kelala ngagai bala ketuai komuniti enggau raban bekaul enggau perambu sereta bejalaika projek infrastruktur ti deka dipejalaika ba kandang menua nya.

Ku iya, penerang dikenataika ejensi ti bejalaika pengawa nyengkaum Kaunsil Pelilih Betong, BDDA enggau ejensi ti bekaul dikena nentuka tetiap projek ti diperambu ulih dipejalaika enggau teratur, ngasi sereta meri penguntung ti optimum ngagai rayat.

“Nengah sesi baka tu, penemu, langgur enggau timbal ari komuniti ulih digumpul sereta diperesa dikena nentuka pemansang ti dipejalaika nya amat nangkup guna peranak menua nya,” ku iya nengah sebengkah penerang pengudah program nya.

Ku iya nambah, chara ti ngemeratka pengawa ngaul komuniti beguna amat dalam nentuka tetiap inisiatif pemansang ti dipejalaika meri empas positif enggau penguntung timpuh panjai ngagai peranak menua tu.

Iya mega ngarapka pengawa ti terus dipejalaika nengah pengawa bejalaika projek infrastruktur ari baruh BDDA deka terus ngenegapka pemansang infrastruktur, nyungkak pemansang menua pesisir sereta ngangkatka pengelantang pendiau rayat, kelebih agi ba kandang DUN Bukit Saban.

Sesi ngaul diri mega ngempuruka bala ketuai komuniti enggau pengari ari mayuh bengkah ejensi ngulihka timbal terus bekaul enggau projek pemansang ke diperambu ungkup kandang menua nya. — RBI

#ruaiberitaiban#newsiban#beritaiban

Rindu | Titih | Kunsika

BETONG, 11 Jun — Siku orang tuai bebadi nyawa seraya siku agi bakal ba penusah bebadi ba jalai alun ti mungkur sebuah kerita Perodua Axia di Jalai Pan Borneo semak P-Turn Skrang, jalai Sri Aman-Betong, lemai tu tadi.

Palan Operasyen Opis Bomba enggau Penyah Penusah (JBPM) Sarawak nerima kangau ngenyit bekaul enggau penusah nya urung pukul 1.46 lemai.

Berindik ari nya, seraban raban ari Balai Bomba enggau Penyah Penusah (BBP) Betong berumban ngesah ke palan penusah ke nyadi ke bepalan urung 20 kilometer ari balai nya.

Lebuh datai ba palan nya urung pukul 2.07 lemai, raban bomba tetemuka sebuah kerita Perodua Axia dipechayaka tepawah sebedau ngelantak empang jalai ba kandang endur P-Turn Skrang.

Penusah bebadi nya ngaul dua iku mansa lelaki, enggau siku penumpang bakal seraya deriba ditemu tepekul ba penuduk deriba.

Komander Operasyen, PBK II (TBK I) Mohamad Faizal Haji Rashid madah, raban bomba terus bejalaika pengawa meresa keterubah ba endur nya sebedau Unit Servis Perubat enggau Penyelamat Ngenyit (EMRS) meri perubat keterubah ngagai sida ke bakal.

“Mansa ke bakal udah nya diserah ngagai Opis Menteri Pengerai Malaysia (KKM) ngambika diperubat enggau silik agi, seraya raban bomba bejalaika operasyen nyelamat mansutka deriba ke tepekul,” ku iya.

Taja pia, deriba entukar nya dientaska bebadi nyawa ba palan penusah nyadi ulih pemesai perubat KKM pengudah mujur dipansutka ari entukar nya.

Mansa ke parai nya dikelala enggau nama Liang Ak Sait, 64 taun, lalu mansa ke bakal nya Stanley Embawa Anak Liang, 30 taun.

Tubuh mansa udah nya disuaka ngagai Polis DiRaja Malaysia (PDRM) ngambika atur silik agi dipejalaika sereta dipansik dikena ngelala kebuah kebendar penusah nya nyadi.

Pengudah operasyen nyelamat tembu, raban bomba mega bisi bejalaika pengawa meresi kandang jalai dikena muai uras ari penusah bebadi ti tau ngeruga pengelikun penguna jalai alun.

Operasyen ti ngaul Tender Penyelamat Bomba (FRT), sebuah entukar EMRS enggau enam iku raban bomba mujur dijaga urung pukul 3.15 lemai sebedau tembu urung pukul 3.20 lemai.

Sama bisi ba endur nya tujuh iku kaban PDRM enggau tiga iku pemesai KKM begulai enggau sebuah ambulans.

Sepemanjai operasyen nya, raban penyelamat betapi enggau pemar ketegal penyekut jalai alun enggau palan P-Turn ke jauh ari jalai besai. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUCHING, 11 Jun — Sarawak majak ngenegapka agenda pemansang industri ti meruan lebuh ngelancharka Inisiatif Kluster Peralihan Industri Sarawak (TIC) ti deka nyadi pemangkin ngagai transformasyen industri kurang karbon enggau penumbuh ekonomi ti tegap di nengeri tu.

Nitihka penerang ari Sapit Premier Sarawak, Datuk Amar Douglas Uggah Embas, inisiatif ti dilanchar ba Palan Konvensyen Borneo Kuching nya nyadika sebengkah agi singkang strategik Sarawak dalam ngenyampatka transisyen sektor industri nuju pemansang ti meruan agi sereta ulih besemekih ba renggat antarabansa.

Ku iya, Bintulu udah nempa sejarah nyadi kluster industri keterubah di Malaysia nyereta Rentayan Kluster Industri Peralihan ari baruh Forum Ekonomi Dunya, lalu enggau nya ulih nyambung Sarawak enggau 39 kluster industri di 20 buah menua.

Nitihka penerang nya, rangkaian global nya ngarika pemansut ekonomi ti berega USD808 billion, nyendiaka 6.6 juta peluang kereja sereta ngembuan potensi ngurangka nyentuk 870 juta tan pemansut karbon di serata dunya.

“Inisiatif TIC ditumbuhka dikena ngenyampatka transformasyen industri ba koridor penumbuh Bintulu-Samalaju nengah kerejasama rat entara pengemeran industri, ejensi perintah, penyendia teknologi enggau institusyen wang dalam langkar pengawa ti bestruktur,” ku penerang nya.

Penerang nya mega nerangka penyereta dalam rangkaian global ngemendarka Sarawak ngulihka akses ngagai pengelandik antarabansa, teknologi inovatif enggau kerejasama strategik dalam bidang kuasa beresi, hidrogen, ngatur karbon, digitalisasyen enggau pemansang pengereja pengawa.

Kelimpah ari nya, TIC ditumbuhka bepelasarka lima batang pekara iya nya polisi, pembiayaan, teknologi, kerejasama enggau infrastruktur, seriris enggau mayuh bengkah inisiatif strategik nengeri nyengkaum Polisi Transisyen Tenaga Sarawak, Pelin Jalai Ekonomi Hidrogen enggau Strategi Sifar Beresi Sarawak ke diatu benung ditumbuhka.

Nitihka penerang Sapit Premier, inisiatif tu dikearap ulih bejalaika tanggungpengawa ti beguna dalam mantu Sarawak ngetanka status negatif karbon beresi, kelimpah ari muka peluang baru beranakka puku, ngerembaika industri enggau nambahka daya tahan ekonomi nengeri tu.

Pengerami ngelancharka program nya dipenyadika YAB Premier Sarawak Datuk Patinggi Tan Sri (Dr) Abang Abdul Rahman Zohari Tun Openg.

Inisiatif TIC ngayanka komitmen Sarawak ti terus ngetuaika pemansang industri ti kurang karbon, narit puku ti meruan sereta ngengkahka nengeri tu nyadi hab besai ungkup transisyen kuasa enggau transformasyen industri di rantau tu.

Sama bisi datai Sapit Premier Sarawak Datuk Amar Douglas Uggah Embas, Datuk Amar Profesor Dr Sim Kui Hian, Speaker Dewan Undangan Negeri Sarawak Tan Sri Datuk Amar Mohamad Asfia Awang Nassar, Menteri Digital Gobind Singh Deo, Menteri-Menteri Kabinet Sarawak, Sekretari Perintah Sarawak Datuk Amar Mohamad Abu Bakar Marzuki, Sapit Menteri Digital Datuk Wilson Ugak Kumbong, Sapit Menteri Kuasa dan Pengintu Rampa Menua Sarawak Datuk Dr Hazland Abang Hipni, Sapit Menteri Sarawak, Direktor Pengatur Forum Ekonomi Dunia Neo Gim Huay enggau temuai ke bukai. – RBI

#ruaiberitaiban#newsiban#beritaiban

Rindu | Titih. | Kunsika

KUCHING, 11 Jun – Sarawak majak ngenegapka penuduk nyadi ketuai dalam transformasyen industri di rantau tu nengah pengawa ngelancharka Kluster Industri Peralihan Bintulu (TIC), pelasar strategik ti deka nyungkak pemansang industri ti meruan, ngangkatka daya besemekih ekonomi sereta nyukung penumbuh timpuh panjai nengeri tu.

Premier Sarawak, Datuk Patinggi Tan Sri Dr Abang Haji Abdul Rahman Zohari Tun Datuk Abang Haji Openg, madahka landskap dagang dunya diatu majak begunaka pemansut ti nitihka standard rampa menua enggau pemanah rampa menua, kelimpah ari faktor rega aja.

Nitih ku iya, makit antarabansa kemaya hari tu mega beratika baka ni sebengkah produk diasilka nyengkaum proses ngasil, tikas intensiti karbon enggau nitihka standard rampa menua ke udah ditetapka.

Iya madah munyi nya lebuh bejadika pengawa ngelancharka TIC Industrial Clusters in the Next Energy Era di Palan Konvensyen Borneo Kuching (BCCK), sehari tu tadi.

“TIC Bintulu ukai semina inisiatif baru aja, tang pelasar strategik dikena ngenyampatka transformasyen industri, ngangkatka daya besemekih sereta ngengkahka Sarawak ba rintai mua pemansang industri rebak baru,” ku iya.

Iya nyemetak madahka penumbuh ekonomi jemah ila enda agi bepanggai ba projek tauka perengka guna individu, tang deka dipejalaika ekosistem industri ti begempung enggau sektor kuasa, industri, teknologi, penau enggau inovasyen dalam langkar ti komplementer.

Ngelansa pasal pengawa milih Bintulu nyadi palan besai ungkup inisiatif nya, iya madahka mengeri tu kelai ngempung penegap industri Sarawak ke diatu enggau aspirasyen pemansang nengeri tu jemah ila.

“Begulai enggau Samalaju, Bintulu nyadi siti ari koridor kuasa enggau industri ke pemadu strategik di Asia Tenggara,” ku iya.

Nitih ku iya, Bintulu udah lama bejalaika tanggungpengawa ke besai dalam pemansang ekonomi Sarawak nyadi palan siti ari kompleks gis cecair (LNG) pemadu besai di dunya, lalu enggau nya nyadi pintu penama kunsi nyambung pengeraja asal, industri enggau eksport nengeri tu ngagai makit dunya.

Bepelasarka penegap nya, Sarawak ngerembaika agenda industri nengah pengawa bejalaika Koridor Kuasa Tau Dikena Baru Sarawak (SCORE) enggau terus beranakka puku dalam pemansang infrastruktur kritikal, kapasiti kuasa enggau ekosistem industri dikena narit mayuh agi puku sereta ngemayuhka struktur ekonomi nengeri.

Iya mega nyemetak madahka pemansang Samalaju nyadi komponen kunsi strategi nya.

Kandang endur industri nya diatu endur bemacham industri ti ngena kuasa mayuh nyengkaum aluminium, ferroalloy, petrokimia enggau pengawa ngaga beteknologi tinggi, ti udah ngenegapka penuduk Sarawak nyadi hab besai industri enggau kuasa di rantau tu.

Berebak enggau nya, Abang Johari madahka TIC Bintulu ditumbuhka nyadi pelasar kolaboratif ti ngempuruka industri, perintah, institusyen wang enggau bakih teknologi ba baruh visyen ke sama dikena ngenyampatka transformasyen industri.

“Nengah kerejasama strategik tu, Sarawak ulih ngenegapka daya besemekih ekonomi seraya neruska komitmen ngagai agenda pemanah rampa menua enggau pemansang kurang karbon,” ku iya.

Pengawa ngelancharka TIC Bintulu nyadi siti agi singkang beguna dalam pengawa Sarawak ngemansangka ekosistem industri jemah ila ti bepelasarka kuasa beresi, inovasyen teknologi enggau pemansang ti meruan, setipak enggau aspirasyen nengeri tu deka nyadi ekonomi bepenatai pemisi tinggi ti tan sereta kompetitif ba renggat global.

Sama bisi datai Sapit Premier Sarawak Datuk Amar Douglas Uggah Embas, Datuk Amar Profesor Dr Sim Kui Hian, Speaker Dewan Undangan Negeri Sarawak Tan Sri Datuk Amar Mohamad Asfia Awang Nassar, Menteri Digital Gobind Singh Deo, Menteri-Menteri Kabinet Sarawak, Sekretari Perintah Sarawak Datuk Amar Mohamad Abu Bakar Marzuki, Sapit Menteri Digital Datuk Wilson Ugak Kumbong, Sapit Menteri Kuasa dan Pengintu Rampa Menua Sarawak Datuk Dr Hazland Abang Hipni, Sapit Menteri Sarawak, Direktor Pengatur Forum Ekonomi Dunia Neo Gim Huay enggau temuai ke bukai. – RBI

#ruaiberitaiban#newsiban#beritaiban

Rindu | Titih. | Kunsika

BINTULU, 11 Jun – Sepenyampau 140 iku penyereta ngulu Program Licha Pengelikun Penusah Angus ke diatur ba Dewan Mayuhguna Flat Sungai Plan, Jalai Tanjung Kidurong, sehari tu tadi.

Pengawa tu beserimbai enggau Program Satelit Kimuniti Rayat Madani KEMAS Bintulu ke diatur ari pukul 10.00 pagi nyentuk pukul 2.00 lemai nya dikemujur raban Balai Bomba enggau Penyah Penusah (BBP) Kidurong ti betuaika Pemesai Bomba Kanan II (PBT II) Rary Anak Binjie.

Sama bisi enggau ngemujurka program tu iya nya PBB Nazri Bin Joha, PBB Aiman Ahmad Aqil Bin Sahran enggau PBB Carl Aldo Anak Sardi.

Sepemanjai program nya, bala penyereta diberi licha pengelikun penusah angus enggau penerang mindah dalam begunan ti dipejalaika enggau tetap sereta nitihka sukut pengelikun ti udah ditetapka.

Nengah sesi meri penerang nya, peranak diterangka enggau kebuah penusah angus nyadi, chara nagang enggau pengawa ke patut dipejalaika enti sema bisi penusah angus nyadi.

Program tu mujur nambahka tikas penyedar enggau nyikap diri bala penyereta bekaul enggau sukut pengelikun angus, lalu enggau nya ulih mantu ngenegapka budaya pengelikun ba komuniti menua nya.

BBP Kidurong ngarapka program baka tu ulih diteruska ari setiap maya dikena nentuka komuniti seruran nemu sereta nyikap diri napi sebarang penusah ngenyit ke tau nyadi bekaul enggau penusah angus.- RBI

#ruaiberitaiban#newsiban#beritaiban

SIMANGGANG, 11 Jun — Pemujur nyulut dua iku nembiak ari Sekolah Sekondari (SMK) Saint Luke, Sri Aman ke bulih pemutus peresa 9A ba peresa Sijil Pelajaran Malaysia (SPM) 2025 dirami dalam pengawa meri puji khas ke diatur ba sekula nya sehari tu.

Apresiasyen nya disuaka Komiti Pengerai enggau Pengasih Komuniti (JAKKSA) Bagi Menua Sri Aman ngagai Calvin Stevenson Unggang Saleh enggau Nurin Damia Danisyah Karim dikena ngaku penyulut akademik seduai ti udah meri basa ngagai sekula sereta nyadika peransang ngagai nembiak bukai.

Chairman JAKKSA, Gerald Empaling madah, pemujur ke dijapai kedua-dua nembiak nya nyata ngayanka pengepuh, disiplin ke tinggi enggau komitmen ba pelajar ulih ngadaka pemujur ti ngemegahka ati.

Ku iya, pemutus nyulut ke dijapai nya ukai semina mandangka pengeran nembiak nyaga penemu, tang mega nyata nembiak ari menua pesisir mega ulih besemekih sereta nyapai prestasi ke pemadu manah ba renggat nasional.

“Penyulut tu asil ari pengawa bebendar enggau pengeliat ati ti dipandangka kedua-dua nembiak sepemanjai sida besekula.

Pemujur tu patut nyadika teladan enggau peransang ngagai nembiak rebak baru ngambika terus bebendar nyapai penyulut,” ku iya rambau bejaku ba atur pengawa nya.

Gerald ke mega pemekuh undang-undang sereta ex-majistret mega ngemeratka sukung ke tegap ari apai indai, pengajar enggau sekula beguna amat dalam nempa pemujur nembiak.

Berebak enggau nya, iya ngingatka Calvin enggau Nurin ngambika terus ngemeranka ulah ti mulia, ulah ti patut dipuji sereta ulah ti baruh ati dalam nampung pelajar enggau pejalai kereja sida jemah ila.

Nitih ku iya, pemujur ke bendar ukai semina disukat nengah penyulut akademik aja, tang mega nengah pengulih siku orang meri bantu ngagai mensia mayuh enggau menua enggau penuh integriti, tanggungpengawa sereta semengat gawa.

Berebak enggau nya, kedua-dua nembiak nya meri besai terima kasih ngagai penyulut ke udah dijapai sereta ngenataika pengaga ati ngagai apai indai, pengajar enggau semua piak ti seruran meri sukung, peransang enggau iring sepemanjai sida belajar.

Pengerami nyuaka pemeri nya mega digulu Penulung Kanan Pengajar Pentadbiran, Wellesley Albert, Penulung Kanan Pengajar Hal Ehwal Nembiak, Roland Laka, Penulung Kanan Pengajar Kokurikulum, Demendraa John Pillai, sereta mega staf sekula ti begempuru ngerami pemujur ti ngemegahka ati tu. – RBI

#ruaiberitaiban#newsiban#beritaiban

Rindu | Titih | Kunsika

KUCHING, 11 Jun – Aktivis hak asasi mensia Sarawak, Peter John Jaban ngansak Perintah Besai meri kuasa autonomi besai ngagai Sarawak dalam ngatur sistem pengerai nengeri tu berindik ari perambu mai 15,000 indu misi ari Indonesia dikena mutarka penanggul suntuk pengereja pengawa dalam sektor pengerai menua tu.

Nitih ku iya, perambu nya ukai chara ke bendar mutarka penanggul ke ditapi sektor pengerai, tang lebih agi ngayanka pemuntan mutarka batang isu, iya nya pemindah indu misi menua tu ke menua luar ketegal gaji ke manah agi sereta faktor pengelantang pendiau.

Ku iya, Malaysia ukai betapi enggau penanggul suntuk pengereja pengawa ke bepengelandik, tang betapi enggau pemar ngetanka indu misi menua tu ke milih meri servis ba menua baka Singapura, Arab Saudi enggau Australia ke meri gaji ke lebih kompetitif.

Ku iya, pengawa mai pengereja pengawa ari menua luar semina deka nutup penanggul ke nyadi pun enggau nadai mutarka kebuah ke bendar suntuk pengereja pengawa pengerai di menua tu.

Peter mega nyemetak madahka chara nya enda berundingka penyelai guna Sarawak, kelebih agi di menua pesisir enggau menua ulu ti agi betapi enggau penanggul suntuk pengereja pengawa pengerai enggau perengkaguna perubat.

Ku iya, gaya nya mandangka Sarawak patut diberi kuasa ke besai agi dalam ngatur sistem pengerai diri empu, nyengkaum sukut pekara wang, pentadbiran enggau pemansang pengereja pengawa, setipak enggau semengat Sempekat Malaysia 1963 (MA63).

“Enti Sarawak diberi kuasa enggau pemisi ke chukup, nengeri tu ulih bejalaika polisi kediri empu dikena ngelatih, narit sereta ngetanka pengereja pengawa pengerai menua tu nengah skim gaji enggau insentif ke lebih kompetitif ke setipak enggau guna menua tu,” ku iya ba sebengkah penerang.

Iya mega meri perambu ngambika perintah mansik baru struktur gaji indu misi setempat sereta meri kelala elawin khas ungkup pengereja pengawa pengerai ke gawa ba kandang endur ke jauh sereta sepital tekanan tinggi.

Berindik enggau nya, Peter ngansak Perintah Besai nangguhka sebarang pengawa mai indu misi ari menua luar nyentukka pansik komprehensif bekaul enggau pengawa ngetanka pengereja pengawa pengerai menua tu dipejalaika.

Nitih ku iya, Sarawak enda patut terus bepanggai ba chara mutarka timpuh pandak ti dikerandauka ba renggat Perintah Besai, tang patut diberi ruang enggau kuasa ti besai agi dikena ngemansangka sistem pengerai ti nangkup guna rayat nengeri tu.

Iya nyemetak madahka indu misi Malaysia ke udah bulih kelala enggau peluang gawa ba renggat antarabansa patut diberi pengaku ke patut ba menua sida empu dikena nentuka sektor pengerai menua tu terus meruan sereta kompetitif. – RBI

#ruaiberitaiban#newsiban#beritaiban

Rindu | Titih | Kunsika

PUTRAJAYA, 11 Jun – Darjah Panglima Setia Mahkota (P.S.M.) ti mai gelar Tan Sri ngagai Dato’ Haji Mohd Isa bin Dato’ Haji Abdul Samad udah ditarit pulai bekuat kuasa 8 Jun 2026.

Nitihka penerang media ari Opis Menteri Besai sehari tu, pengawa narit anugerah nya udah dikemendarka Yang di-Pertuan Agong Sultan Ibrahim.

Opis Menteri Besai madahka, pengawa nya dipejalaika berindik ari Mohd Isa diukum ketegal penyalah jenayah lalu diatu benung dijil ba Rumah Jil Sungai Buloh, Selangor.

Pengawa nginsil perintah nya setipak enggau Statut Perintah Malaysia Yang Mulia Setia Mahkota, kelebih agi Ayat XXV enggau XXVIA ti netapka sesebengkah perintah tau ditarit pulai enti penerima nya diukum ketegal penyalah.

Penerang nya mega nerangka pemendar Yang di-Pertuan Agong nginsil anugerah nya digaga beserimbai enggau Pengerami Nyuaka enggau Nyuaka Anugerah, Bintang enggau Pingat Perintah Besai kena 7 September 2024 di Istana Negara.

Opis Menteri Besai dalam penerang iya ngemeratka pemutus nya setipak enggau atur statut ti ngatur pengawa meri enggau nginsil anugerah Perintah Besai. – RBI

#ruaiberitaiban#newsiban#beritaiban

Rindu | Titih | Kunsika

BARIO, 11 Jun – Sapit Menteri ba Opis Premier Sarawak (Buruh, Imigresen enggau Pematau Projek), Datuk Gerawat Gala udah ngulu sesi randau enggau begulai enggau komuniti di Bario ti nyadi pengeran iya ngelawa rayat sereta ninga terus penemu enggau peneka komuniti menua nya.

Ku iya, program ke baka nya nyadi medium ke beguna dikena ngulihka timbal terus ari peranak bekaul enggau bemacham isu sereta langgur penemu ke ulih mantu ngangkatka pengelantang pendiau komuniti.

Nitihku iya, gaya ti bebaik sereta baka diri sebilik sepemanjai sesi nya meri awak ngagai iya begulai rat agi enggau komuniti menua nya, lalu ari nya ulih ngerapitka kaul entara ketuai enggau rayat.

“Nengah sesi randau baka tu, kitai ulih ninga sada nyawa rayat sereta meretika utai ke amat diguna sida. Tu beguna amat dikena nentuka tetiap pelin pemansang ke dipejalaika amat meri penguntung ngagai komuniti,” ku iya.

Berebak enggau nya, iya mega ngenataika pengaga ati ngagai komuniti Bario ketegal sukung ti seruran diberi ngagai Perintah Gempung Parti Sarawak (GPS).

Datuk Gerawat ngarapka peranak kandang menua Bario terus nyukung iring YAB Premier Sarawak dikena nentuka agenda pemansang enggau penyulut nengeri tu ulih diteruska ungkup pemaik rayat.

Iya mega nyemetak madahka kerejasama rat entara perintah enggau rayat nyadi faktor ke besai ba pemujur bemacham inisiatif pemansang, kelebih agi ba kandang menua ulu.

Ku iya, pemanah kaul ketuai enggau komuniti patut ditegapka agi dikena nentuka penyulut, pengelantang enggau pengelikun peranak Bario enggau kandang menua ngelingi. – RBI

#ruaiberitaiban#newsiban#beritaiban

Rindu | Titih | Kunsika

MIRI, 11 Jun – Kereja ngemanahka paip ai besai 1100mm ti napi penusah pantis di Miri majak lanchar taja pan ujan mimit ti berengkah labuh urung pukul 8.00 malam tadi.

Menteri Perengka Pengangkut Sarawak, Dato Sri Lee Kim Shin ke bisi ba palan nya kenyau ari pukul 9.00 malam kemari, madahka iya terus matau kediri empu pejalai kereja nya nyentuk pukul 10.15 malam dikena nentuka semua operasyen ngemanah bejalai nitihka perambu.

Rambau penemuai nya, iya mega bisi nyuaka pemakai enggau ai irup ngagai bala pekereja ti bebendar gawa nentuka bekal ai ngagai peranak Miri ulih dipulaika enggau lengkas.

Nitih ku iya, pejalai pengawa ngelama tu chukup ngelantangka ati lebuh tim teknikal mujur tetemuka sebagi ari paip besai ke bisi pantis, seraya kereja numbak agi diteruska.

Berebak enggau nya, pengawa masang “sheet pile” benung dipejalaika dikena nyeliahka tanah tusur sereta nentuka pengelikun kandang endur gawa sepemanjai proses ngemanahka nya.

Iya mega ngenataika pengaga ati ngagai komitmen tinggi ti dipandangka semua pengereja pengawa ti terus gawa enggau enda leju taja pan gaya hari enda manah.

Dikena ngangkatka tikas pengelikun ba kandang endur gawa maya malam hari, iya mega udah ngaga kaul enggau Menijar Wilayah Sarawak Energy ngambika bejalaika atur enggau lengkas ngemanahka sekeda api jalai semak palan bekereja ngambika penampak ke chukup ulih disediaka ngagai bala pekereja.

Pengawa ngemanahka nya deka terus dipatau ari setiap maya dikena nentuka operasyen bejalai enggau lanchar sereta semua utai ke diguna raban pengereja pengawa ba bidang nya ulih ditangkup enggau engkeman.

Iya mega ngenataika pengaga ati ti pemadu tinggi ngagai semua pengereja pengawa, injinir, staf Sarawak Water enggau kunteriktor ti gawa siang malam dalam pengawa mulaika bekal ai ngagai rayat.

“Pengawa kita ti chukup komitmen sereta bebendar gawa ke rayat amat diberi basa.Terima kasih ke dedikasyen ti dipandangka sereta teruska pengawa enggau pemadu manah ungkup pengelantang komuniti,” ku iya. – RBI

#ruaiberitaiban#newsiban#beritaiban

Rindu | Titih | Kunsika