SEMPORNA, 11 Jun — Markas Wilayah Laut 2 Soldadu Tasik Diraja Malaysia (TLDM) sehari kemari enggau rasmi bejalaika Pengerami Ngererak Pangkalan Laut Tun Sharifah Rodziah (PL TSR) nyadika pengujung simbolik ngagai servis pengkalan nya pengudah semak sedekad nyadi pengawa nyaga dalam timpuh sedekad kandang tasik menua Timur Sabah.

Pengerami tu penuh enggau istiadat soldadu, dipenyadika Yang Berbahagia Laksamana Madya Dato’ Khir Junaidi bin Idris, Panglima Armada Timur.

Pangkalan nya asal iya nyadi Platform Mobile Offshore Production Unit ti dikelala enggau nama Hercules 259 lalu digaga di Houston, Amerika Syarikat dalam taun 1973.

Nengah kerejasama strategik entara TLDM, PETRONAS enggau Sapura Kencana, pelasar tu udah diubah nyadi Pangkalan Tasik ba baris mua bepelasarka menua nya ti strategik ti terus begunaka TLDM ba menua Sabah.

PL TSR berengkah beoperasyen kena 31 Julai 2015 lalu udah nya dipenyadika Menteri Besai Malaysia ke-6 kena 28 Mei 2016.

Pengkalan tu diberi nama beserimbai enggau bini Menteri Besai Malaysia keterubah, niang Yang Amat Berbahagia Tun Dato’ Seri Hajah Sharifah Rodziah binti Syed Alwi Barakbah.

Sepemanjai timpuh servis, PL TSR udah dikena nyadi pelasar strategik ti nyukung pengawa bejalaika operasyen pengelikun maritim, matau zon maritim ti dikerindu sereta ngenegapka penatai raban pengelikun ba Zon Pengelikun Sabah Timur (ESSZONE).

Endur iya ke strategik ngemendarka pengawa nimbal enggau jampat ngagai sebarang keruga pengelikun, lalu enggau nya nyadi kelai komitmen TLDM ke terus ngetanka kedaulatan menua.

Taja pan operasyen PL TSR udah diketuka, tang fungsyen enggau pangku pengawa iya nyadi pengkalan ke mua deka diambi Kapal Bantu Tun Azizan (KA TAZ) dikena nentuka penerus penatai enggau penyedia operasyen RMN ba kandang endur strategik Sabah Timur.

TLDM deka terus ngenegapka pengulih operasyen setipak enggau guna ke diatu sereta pemansang rampa pengelikun maritim dikena nentuka kedaulatan enggau pengelikun kandang tasik menua seruran dijaga. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — Markas Wilayah Laut 2

SRI AMAN, 10 Jun – Kaban Parlimen Sri Aman, Dato Sri Doris Sophia Brodie nyemetak madahka pengawa bebendar minta sereta negika hak Sarawak baka ke udah ditulis dalam Sempekat Malaysia 1963 (MA63) meseti terus ditegapka nengah penyerakup rayat enggau sukung ke tegap ngagai ketuai nengeri tu ke konsisten ungkup semua.

Bejaku ba Pengerami Belepa, Prihatin Menyantuni Rakyat di Rumah Jarit, Keranggas Mudur, iya madahka rayat Sarawak enda ulih ngambi mudah isu bekaul enggau hak nengeri laban udah bisi beberapa pekara ti majak lenyau kenyau ari penumbuh Malaysia dalam taun 1963 suba.

Nitih ku iya, entara isu ke suah dibantaika iya nya penuduk pengari parlimen ti nadai agi mandangka semengat asal penumbuh Malaysia ti ngaku Sarawak enggau Sabah nyadi kaling pemungkal Persekutuan.

“Diatu Sarawak bisi 31 penuduk parlimen, Sabah 25 penuduk lalu Wilayah Persekutuan Labuan siti penuduk.Penyampau 57 penuduk tu semina ngarika urung 26 peratus ari penyampau 222 penuduk parlimen di menua tu,” ku iya.

Ku iya nerang, pengudah Singapura pansut ari Malaysia dalam taun 1965, sepenyampau 15 penuduk parlimen ke diungkupka ngagai menua nya diagih ngagai Semenanjung Malaysia.

Gaya tu ku iya, ngasuh Sarawak enggau Sabah lenyau peluang ngetanka prinsip satu pertiga penuduk parlimen baka ti diperambu dalam semengat numbuhka Malaysia.

Berindik enggau nya, iya minta rayat Sarawak terus beserakup sereta bediri tegap ngetanka hak nengeri tu dikena nentuka sada enggau pemerat Sarawak terus dipebasa ba renggat Perintah Besai.

Iya mega minta rayat terus nyukung Gempung Parti Sarawak (GPS) ti seruran bebendar ngetanka agenda pemansang enggau hak Sarawak bepelasarka semengat MA63.

Dulu agi ari nya, Dato’ Sri Doris Sophia ngelimpangka diri meri pengaga ati ngagai rayat ba program ke diatur nya.

Pengerami nya bela dibantaika enggau jaku ari Penghulu Angin enggau Tuai Rumah Jarit lalu digulu urung 30 iku Tuai Rumah ari kandang menua ngelingi nya.

Program tu mandangka kaul rat entara ketuai enggau komuniti renggat baruh dalam nentuka tetiap isu ti ngaul pemerat rayat enggau kuing Sarawak jemah ila terus diberi perati ke patut. – RBI

Doris Sophia Brodie

#ruaiberitaiban#newsiban#beritaiban

Rindu | Titih | Kunsika

BINTULU, 10 Jun – Opis Kereja Raya (JKR) Sarawak sehari tu udah nyerahka enggau rasmi dua bengkah projek pelajar besai iya nya Sekula Sekondari (SMK) Samalaju enggau Sekolah Primari (SK) Orang Kaya Mohammad Bintulu ngagai Opis Menteri Pelajar Malaysia ba sebengkah pengerami ke diatur ditu.

Kedua-dua projek nya ti berega sepenyampau lebih RM100 juta, nyadi sebagi ari komitmen perintah ti seruran dipejalaika dikena ngenegapka infrastruktur pelajar sereta nyendiaka perengka guna belajar ti moden, nyamai sereta bekualiti dikena ngadaka rebak dudi hari ti kompetitif.

Pengawa nyerahka projek nya udah dipenyadika Puan Masnah Abu Bakar, Penulung Direktor Kanan, Sektor Infrastruktur enggau Pekara Bebelika Barang (SIP), Opis Pelajar Nengeri Sarawak ti nerima projek nya ngarika Opis Menteri Pelajar Malaysia.

Pengawa nyerahka nya dibantaika Ir. Lau Sie Hung, Injinir JKR Bagi Menua Bintulu, ngarika JKR Sarawak, sereta dikemataka pemesai JKR, pengari kunteriktor enggau staf sekula.

SMK Samalaju, ti dikemansang ngena ungkus belanja RM57.618 juta ulih Empayar Setia Sdn. Bhd, disikap enggau 36 buah kelas, 24 buah kuarters pengajar, dua buah blok buding enggau mayuh macham perengka guna sukung ke bukai.

Sekula nya dikearap ulih nyadi pematak ngagai pemansang komuniti di Samalaju, ke diatu jampat mansang nyadi hub besai ekonomi enggau industri di Sarawak.

Berebak enggau nya, SK Orang Kaya Mohammad Bintulu, ke beungkus RM42.743 juta lalu dipejalaika EPR (Kuching) Sdn. Bhd, mega disuaka ba pengerami ke sama.

Sekula ke ngembuan sejarah lebih seratus taun kenyau ari ditumbuhka dalam taun 1912, diatu ngembuan gamal baru nengah pengawa ngaga kampus moden ba palan baru ke nyendiaka perengka guna belajar ke lebih meruan sereta kondusif.

Iya dipelabaka entara palan pelajar ke pemadu moden sereta narit ati di Sarawak.

Pemujur nembuka kedua-dua projek nya mandangka kerejasama rat entara Opis Menteri Pelajar Malaysia, JKR Sarawak ti nyadi ejensi bejalaika pengawa, kunteriktor, konsultan enggau ejensi teknikal ti bekaul.

Pemujur nya mega ngayanka komitmen semua piak dalam napi pemar bejalaika projek, nyengkaum empas pandemik COVID-19 enggau penambah ungkus kereban dikena ngaga rumah.

Pengawa nyerahka dua buah sekula tu ukai semina ngenegapka perengka guna pelajar ungkup komuniti menua nya, tang mega kelai pengawa beranakka puku perintah ba pemansang modal mensia enggau penyulut pelajar nengeri.

Nengah perengka guna moden sereta rampa belajar ti kondusif, kedua-dua institusyen tu dipechaya ulih ngadaka rebak dudi hari ti bepenemu, ngembuan basa sereta kompetitif. – RBI

#ruaiberitaiban#newsiban#beritaiban

Rindu | Titih | Kunsika

KUCHING, 10 Jun – AirBorneo minta ampun ngagai bala pesinjir berindik ari sekeda penerebai bilun laun sereta dikinsil ti ngeruga perambu pejalai di serata Sarawak enggau Sabah dalam timpuh ke udah.

Ketuai Pemesai Eksekutif AirBorneo Airways Sdn Bhd, Megat Ardian Wira Mohd Aminuddin, madahka kompeni nya meretika penusah, enda tentu sereta asa ati ti diasaika pesinjir enggau sida sebilik ketegal pengeruga nya.

Nitihku iya, penanggul nya bepun ari beberapa buah bilun enda ulih beoperasyen serentak ketegal peminta ngintu enggau pengawa ngemanah teknikal.

Seraya pengelikun mengkang nyadi pekara ti pemadu dikemeratka kompeni nya, AirBorneo ngaku pengawa nya meri empas ngagai komuniti ti bepanggai ba servis penerebai bilun iya ninting hari.

“Raban kami benung gawa enggau enda ngetu ngambika operasyen ulih mulaika pematut enggau naka pengelengkas.

“Kami udah bejalaika perengka guna tambah dikena ngenyampatka proses mulaika bilun ngagai servis, ngenyampatka penatai perengka ganti ti diguna sereta ngurangka risiko penanggul ti nyadi baru,” ku iya nengah siti penerang.

Iya mega madahka AirBorneo benung bejalaika atur timpuh panjai dikena ngangkatka pengandal operasyen kompeni nya.

Entara nya perambu deka meri kelala bilun baru ATR 72-600 berenggat nyadi sebagi ari pengawa ngemaru armada kompeni nya.

Nitih ku iya, taja pan pengawa ngemanahka nya deka begunaka timpuh ngambika ulih dikeamatka enggau penuh, tang nya nyadi puku ti beguna dikena nentuka servis ti likun agi, ulih dikearap sereta bekualiti ngagai pesinjir.

Berebak enggau nya, AirBorneo udah ngaga kaul enggau pesinjir ke kena empas ngambika mantu ngatur baru penerebai bilun, mulaika duit tikit enggau bansa bantu pejalai bukai nitihka pematut.

Kompeni nya mega benung meri bantu baka pemakai, endur diau enggau perengka pengangkut darat ngagai pesinjir ke patut.

AirBorneo nandu baru komitmen sida deka terus nyendiaka peneleba pejalai bilun ti likun sereta ulih dikearapka ngagai rayat Sarawak enggau Sabah sereta nentuka kaul komuniti dijaga.

Kompeni penerebai bilun nya mega meri besai terima kasih ngagai pesinjir ketegal penyabar, pemereti ati enggau sukung ti terus sekumbang timpuh operasyen tejanggal. – RBI

#ruaiberitaiban#newsiban#beritaiban

Rindu | Titih | Kunsika

SAMALAJU, 10 Jun – Projek ngaga Sekula Sekondari (SMK) Samalaju ti dipejalaika Opis Kereja Raya (JKR) Sarawak ti beungkus sepenyampau RM57.618 juta entara inisiatif ti beguna dalam ngenegapka perengka guna pelajar ba kandang menua Samalaju ti jampat mansang.

Sekula tu disikap enggau 36 buah kelas, 24 buah kuarters pengajar, dua buah blok buding enggau bemacham perengka guna sukung moden dikena napi guna belajar enggau ngajar ti lebih kondusif sereta efektif.

Pengawa ngaga SMK Samalaju dikearap ulih nyadi pematak pemansang modal mensia enggau komuniti lokal, setipak enggau penuduk Samalaju nyadi hub industri enggau ekonomi ti majak ngerembai di Sarawak.

Perengka pelajar ke menyana tu ukai semina deka meri penguntung ngagai nembiak, tang mega nyukung utai ke diguna ruang bilik ke diau sereta gawa ba kandang menua nya.

Nyadi ejensi ti bejalaika pengawa, JKR Sarawak tetap komited nentuka tetiap projek infrastruktur pelajar dikemansangka nitihka standard kualiti ti tinggi, setipak enggau pengawa perintah nyendiaka perengka guna ti pemadu manah ungkup pengelantang rayat enggau pemansang rebak dudi hari. – RBI

#ruaiberitaiban#newsiban#beritaiban

Rindu | Titih | Kunsika

MUKAH, 10 Jun – Kaban Kunsil Nengeri (ADUN) Tellian, Royston Valentine ngulu Aum Pengerami Saga Nusantara (SNF) kena lemai Hari Tiga tu tadi ba Palan Pentadbiran Perintah Sarawak, Bagi Menua Mukah.

Aum ke berengkah pukul 3.00 lemai nya diatur dikena berandauka senentang perambu, koordinasyen enggau penyikap bejalaika pengerami berambaika leka jaku “Heritage Meets Heritage: Melanau x Java”.

Aum nya bechairmanka Mohd Amirul Valentine Laiseh enggau kaul mayuh bengkah ejensi enggau raban dikena nentuka pengerami nya bejalai enggau lanchar sereta nyapai juluk ke udah ditetapka.

Pengerami nya dikearapka nyadi pelasar ke beguna dalam ngenegapka kaul budaya rat entara Malaysia enggau Indonesia nengah pengawa bekunsika pesaka asal, seni, main asal enggau pengawa main asal komuniti Melanau enggau Jawa.

Kelimpah ari nya, pengawa ngatur Pesta Saga Nusantara mega dipeda nyadi medium dikena ngelakuka penyelai pesaka asal kededua genturung pendiau ngagai mensia mayuh, lalu enggau nya meri pangka ngagai pemansang sektor dagang temuai enggau ekonomi menua tu.

Pengerami ti deka datai tu dikearapka ulih ngenegapka agi kaul entara garis entara menua sereta nambahka pengangkun ngagai penyelai budaya ti nyadi reta bekunsi di Nusantara. – RBI

#ruaiberitaiban#newsiban#beritaiban

Rindu | Titih | Kunsika

JULAU, 10 Jun – Pelilih Julau udah nyapai siti agi penyulut ke beguna dalam bidang pelajar lebuh palan Pom Enam keterubah ditumbuhka ba SMK Julau.

Pekara tu muka peluang ke besai agi ngagai nembiak menua tu nampung pelajar pra-universiti enggau enda ibuh mindah ngagai luar pelilih menua.

Pekara tu dibantaika Kaban Kunsil Nengeri (ADUN) Meluan, Dato Rolland Duat Jubin rambau Program Nemuai enggau Nyukung Nembiak di Palan Pom Enam SMK Julau ti udah nyadi pagi tadi.

Nitih ku iya, pengawa muka Pom Enam di SMK Julau nyadi siti kenang besejarah ti ngelaika pemansang positif ba landskap pelajar Julau sereta nyata ngayanka komitmen perintah terus dalam pengawa ngenegapka akses ngagai pelajar ti bekualiti ungkup komuniti menua pesisir.

“Pemisi palan Pom Enam tu dikearap ulih nyadi pematak ngagai penyulut akademik, ngadaka mayuh agi graduet menua tu ke bepenemu, kompetitif sereta ulih meri pangka ngagai pemansang ruang bilik enggau komuniti,” ku iya.

Iya mega bepeluang begulai sereta meri sukung ngagai bala nembiak ke nyadi raban keterubah nitihka pelajar Pom Enam ba sekula nya.

Berebak enggau nya, iya ngenataika pengaga ati enggau pengarap ngagai semua piak ti udah bekerejasama ngemujurka pengawa numbuhka palan pelajar pra-universiti ke pemaik nembiak rebak baru Julau.

Sama bisi datai iya nya Les Ak Met, Etam Ak Linggi, Minggu Jampong, Magdeline Ak Jayan, Sandak Ak Remang sereta raban ke sama nyukung pengawa ngenegapka pelajar di pelilih menua tu.

Pengawa muka palan Pom Enam keterubah di Julau dikearap ulih meri empas ke manah ngagai pemansang modal mensia menua nya sereta nyadi pelasar dikena ngadaka nembiak rebak baru ke lebih nyulut sereta kompetitif jemah ila. – RBI

#ruaiberitaiban#newsiban#beritaiban

Rindu | Titih | Kunsika

BINTULU, 10 Jun — Kereja ngintu ‘pavemen’ ari sesiti maya ngagai sesiti maya ba sepemanjai Jalai Sungai Labang – Sungai Seberang, Kod Jalai 803/2 (KM20,000 ngagai KM21,000) di Bagi Menua Bintulu benung chakah dipejalaika baru-baru tu, dikena nentuka infrastruktur jalai alun bekualiti sereta likun.

Nitihka penerang DAL HCM Sdn Bhd nengah laman Facebook rasmi, projek ari baruh ‘Program Penyenggaraan Berkala Pavemen’ (P27) mungkur sekeda skop besai iya nya ‘top-up’ lapis jalai alun, Cold In-Place Recycling (CIPR) enggau pengawa ngaga baru jalai alun.

DAL HCM Sdn Bhd madahka pengawa meresa enggau matau pejalai projek ari sesiti maya ngagai sesiti maya benung dipejalaika enggau enda ngetu dikena nentuka tetiap renggat kereja ulih ditembuka enggau likun sereta nitihka spesifikasyen enggau peminta projek ti udah ditetapka.

Nitihka penerang nya, pengawa matau enggau silik pengawa bejalaika projek beguna dikena nentuka kualiti kereja seraya mega nentuka pengelikun penguna jalai alun enggau raban ba palan nya seruran dikemeratka.

Pengawa bejalaika pengawa ngintu nya dikearap ulih nambahka pengelama struktur jalai, ngemanahka gaya permukaan kaki lima sereta meri pangka ngagai pengelanchar pejalai trafik ba kandang endur nya.

Penguna jalai alun dilalau ngambika seruran nitihka atur pengelikun enggau tanda trafik ti disediaka ba kandang endur projek dikena nentuka pejalai likun sepemanjai timpuh kereja dipejalaika. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

LIMBANG, 10 Jun — Pengawa bejalaika Pelin Pengatur Trafik (TMP) ba Jalai 1-87, Bagi Menua Limbang benung chakah dipejalai dikena nyikap diri napi kereja Cold In-Place Recycling (CIPR) enggau kereja ngaga baru jalai ari baruh Projek AK2026/156.

Nitihka penerang ari DAL HCM Sdn Bhd ba laman Facebook rasmi, pengawa bejalaika TMP nyadi komponen beguna ti mesti dipejalaika sebedau kereja ngaga enggau ngintu jalai berengkah dikena nentuka pengelikun penguna jalai alun, pengereja pengawa projek enggau komuniti setempat seruran dikemeratka.

Ku penerang nya, bemacham chara nagang trafik udah diperambu sereta dipejalaika nyengkaum pengawa masang tanda jaku tangkan, ngatur jalai enggau nagang arus trafik dikena ngurangka pengachau ngagai penguna jalai alun sepemanjai timpuh projek dipejalaika.

“Atur tu beguna dikena nentuka pejalai trafik seruran likun sereta teratur, seraya nyaga pengelikun semua piak ti bekaul enggau kandang endur gawa,” ku penerang nya.

DAL HCM Sdn Bhd mega madahka projek nya ngembuan tuju deka ngangkatka kualiti permukaan jalai alun sereta ngenegapka tikas pengelikun enggau pengelantang penguna jalai alun ba kandang endur ti bekaul.

Berindik enggau nya, mensia mayuh dilalau nitihka semua gerah ngatur trafik, tanda pengelikun enggau takah pengelaju ke udah ditetapka lebuh nengah kandang endur gawa dikena nentuka pejalai projek lanchar sereta nyeliah sebarang penusah ke enda dikedekaka nyadi.

Pengawa bejalaika Projek AK2026/156 dikearap ulih meri pemaik timpuh panjai ngagai penguna jalai alun nengah pengawa nyendiaka infrastruktur ti bekualiti agi, likun agi sereta meruan agi. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SONG, 10 Jun — Mensia mayuh kelebih agi penguna sungai ba kandang menua Sungai Musah, Katibas dilalau nitihka atur pengelikun sereta ngena jalai sementara ti udah disedia sepemanjai pejalai projek ngaga baru Jematan Nanga Musah.

Nitihka notis ti dipansutka Sarawak Rivers Board (SRB), kereja ngererak enggau ngaga baru jematan nya berengkah kena 22 Oktober 2025 lalu diperambu tembu kena 21 April 2027.

Berindik enggau nya, semua penguna perau ti nengah kandang endur nya dipinta nurun ari perau lalu ngena jalai bejalai kaki sementara ti udah disedia dikena nentuka pengelikun sida sepemanjai timpuh projek dipejalaika.

Perau ke nengah kandang endur nya mega dibantu pemesai ke udah dipadu nentuka pemindah ulih dipejalaika enggau likun sereta teratur.

SRB mega ngelalau semua penguna sungai enggau mensia mayuh ba sepemanjai Sungai Musah, Katibas ngambika seruran meri kerejasama sereta ngasika atur pemesai ba endur nya dikena nyeliahka sebarang penusah ke enda dikedekaka nyadi.

Lebuh dikerandau, Kaban Kunsil Nengeri (ADUN) Katibas Lidam Assan madahka sesi ngaul peranak enggau komuniti besemak udah diatur sebedau projek nya berengkah dikena meri penerang pasal chara mindah, ngena jalai sementara enggau atur pengelikun ti meseti dititihka sepemanjai timpuh ngaga.

Ku iya, kerejasama rat entara ejensi ti bejalaika pengawa, kunteriktor enggau peranak menua nya beguna amat dikena nentuka pengelanchar pejalai projek enggau pengelikun semua penguna sungai ti nengah kandang menua nya.

“Nya alai, aku minta semua peranak ke bisi kaul enggau penguna sungai di kandang menua Sungai Musah, Katibas terus meri kerejasama sereta nitihka gerah ke udah ditetapka dikena ngelancharka pengawa bejalaika projek ngaga baru jematan tu,” ku iya.

Iya mega ngenataika pengaga ati enggau terima kasih ngagai peranak menua nya ke udah besabar, mereti sereta meri kerejasama sepemanjai timpuh projek nya dipejalaika.

Berebak enggau nya, iya muji komitmen SRB, kunteriktor ti bejalaika pengawa enggau staf lapangan ti seruran mantu peranak meraka kandang endur ngaga enggau likun sereta nentuka pemindah ninting hari komuniti setempat ulih diteruska enggau nadai pengeruga ke besai.

Nitih ku iya, semua pemar ke ditapi sekumbang timpuh bejalaika projek nya semina sementara aja lalu deka meri pemaik timpuh panjai ngagai peranak menua nya nengah pengawa nyendiaka infrastruktur ke lebih likun, moden sereta bekualiti jemah ila.

Sebedau tu, bisi penerang dikunsi ba media rama bekaul enggau gaya jalai alun di Sungai Musah ti meri tanya ngagai peranak menua nya.

Taja pia, perengkaguna jalai sementara enggau bantu ari orang gawa ba palan nya udah disediaka dikena nentuka pejalai peranak enda tekeruga sekumbang bejalaika projek nya.

Mensia mayuh dilalau ngulihka penerang ari jalai rasmi sereta seruran nitihka atur piak bekuasa ungkup pengelikun pangan diri enggau pengelanchar bejalaika projek pemansang infrastruktur. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika