BETONG, 7 Mac — Raban indu ari Ranting Rimbas Ulu bepeluang belajarka pengelandik ngaga pizza nengah program ke diatur Indu PBB Pampang N37 Bukit Saban sehari tu, siti inisiatif ke dipechaya ulih muka ruang ngagai mayuh agi raban indu menua pesisir ngambi bagi dalam industri ekonomi enggau menua pesisir.

Program tu dipejalaika bala pengajar ke bepeneleba ari Sekula Pengelandik Yahos, meri eksposur praktikal ngagai asas nyendiaka pemakai ke bisi potensial nyadi pun penatai pemisi.

Sapit Premier Sarawak Datuk Amar Douglas Uggah Embas ke mega Kaban Kunsil Nengeri (ADUN) Bukit Saban, bisi datai ngerichahka program nya begulai enggau Sekretari Politik ngagai YAB Premier Sarawak, Puan Roseline Mapong Sabai, enggau Ketuai Indu PBB Pampang N.37 Bukit Saban, Puan Natasha Nasa Douglas.

Pengawa ngatur program tu ngayanka pengawa ti enda ngetu dikena ngenegapka orang indu nengah latih pengelandik ti praktikal sereta relevan enggau guna ke diatu, kelebih agi dalam mantu komuniti ngulihka penatai pemisi nengah dagang pemakai ti mit.

Inisiatif baka tu mega setipak enggau juluk meransang mayuh agi penyereta orang indu dalam aktiviti ekonomi komuniti, kelimpah ari nempa pengandal pesereta mansik peluang dagang bepelasarka pengelandik. — RBI

KOTA SAMARAHAN, 5 Mac — Ejensi Anti Dadah Kebangsaan (AADK) Pelilih Kota Samarahan nangkap 12 iku individu dalam Operasyen ‘Cegah’ ti dipejalaika ba sekeda endur ti berisiko ngelingi pelilih nya.

Operasyen nya betuaika Encik Mohamed Izuan bin Abdul Rahman, Penulung Direktor Penerit Adat & Pengelikun, enggau sukung raban penerit Adat AADK Sarawak.

Batang fokus operasyen nya dikena nyidi sereta nangkap individu ti bisi kaul enggau aktiviti salah guna dadah ba kandang endur ti dikelala nyadi palan berisiko tinggi.

Pemutus peresa ai kemi keterubah tetemuka semua 12 iku individu nya positif dadah.

Sida tu beumur entara 20 ngagai 50 taun lalu dibai ngagai opis AADK ngambika didokumentasyen enggau atur nangkanka nya nitihka Akta Penagih Dadah (Rawatan dan Pemulihan) 1983 (Akta 283).

Puan Nadia Binti Muhammad Hazmi, Ketuai Pelilih Kota Samarahan nyemetak madahka operasyen tu sebagi ari pengawa AADK ti seruran dipejalaika dikena ngelaban pengawa salah guna dadah sereta nentuka komuniti ngelingi bibas ari gian enggau aktiviti dadah ti enda beradat.

AADK minta mensia mayuh terus meri penerang bekaul enggau aktiviti salah guna dadah dikena mantu piak bekuasa ba pengawa nagang enggau neritka atur.

Penerang enggau sebana ke silik agi Talipun Hos AADK 1-800-22-2235

WhatsApp 019-626 2233 tauka

Laman web https://www.aadk.gov.my/

SRI AMAN, 7 Mac — Siku nembiak lelaki beumur 9 taun bebadi nyawa pengudah tepekul ba penusah angus ti nganguska sebuah rumah setengah tetap dua ringkat di Lorong 1, Taman Sentosa Indah, tumu pagi tadi.

Nitihka penerang ari Opis Bomba enggau Penyah Penusah Malaysia (JBPM) Sarawak, kangau ngenyit bisi diterima urung pukul 3.02 pagi, lalu seraban raban ari Balai Bomba enggau Penyah Penusah Sri Aman dianjung ngagai endur nya enggau dua jentera iya nya FRT Scania BME 7039 enggau EMRS BMY 4446. Operasyen diketuai Komander Operasi, PBK II (TBK I) Nicholas ak Langi.

Lebuh datai ba endur nya, raban bomba tetemuka rumah ke bisi kaul nya udah angus lengis.

Tim Timbal Operasyen (PKO) tekala nya ngaga size-up lalu bejalaika pengawa madamka api ngena teknik serang.

Operasyen nya mungkur hos ke bisi muncung tunggal, 200 kaki enggau dua muncung nyentukka api ulih dijaga sereta padam abis.

Sepenyampau enam iku orang ke nguan rumah nya maya penusah nyadi.

Lima iku mansa mujur ngelarika diri enggau selamat, lalu siku nembiak lelaki 9 taun, tepekul ba ringkat atas lalu dientaska midang.

Mansa udah diserah ngagai piak polis ngambika atur silik agi dipejalaika.

Kelimpah ari nya, lima iku agi orang ke ngani rumah nya bakal angus lalu nerima perubat ke silik agi.

Operasyen nya mega dibantu PDRM, APM, PBS, SESCO enggau KKM.

Pengudah nentuka pengelikun penuh, raban bomba mutuska operasyen lalu mulaika diri ngagai balai.

JBPM Sarawak ngemeratka pemesai guna seruran bejejaga ari risiko angus ba rumah sereta ngingatka mensia mayuh nentuka atur pengelikun dititih. — RBI

ASAJAYA, 7 Mac — Seraban tim ari Balai Bomba enggau Penyah Penusah Opis Bomba enggau Penyah Penusah Malaysia (JBPM) Asajaya bejalaika pengawa matau ba sekeda kandang endur ke berisiko ampuh bah ngelingi Sadong Jaya sehari tu berindik ari gaya hari ke mendung sereta ujan enda ngengetu.

Pengawa matau nya dipejalaika ngena perengka pengangkut LFRT Atego enggau pengering lima iku raban betuaika Komander Operasyen, PBK I Abg Othman Abg Sharbini.

Pengawa matau dipejalaika ba tiga bengkah endur iya nya Kampung Ulu Iboi, Kampung Rangawan enggau Kampung Terasik dikena beratika tikas ai ke diatu ba kandang menua nya.

Maya pengawa matau nya, tim bomba tetemuka tikas ai ba ketetiga genturung pendiau nya udah surut sereta ulih dijaga.

Kelimpah bejalaika pengawa matau, raban bomba mega bisi ngatur randau enggau peranak menua nya sereta ngelalau sida jampat ngaga kaul enggau piak bekuasa nyema tikas ai niki tauka sebarang penusah ngenyit nyadi.

Nitihka perati tim pematau, fenomena tikas ai niki sebedau tu dipelabaka nyadi ketegal ujan bangat enda ngengetu pengelama urung empat jam kelimpah ari faktor ai pasang raya maya nya.

Naka ke diatu, nadai penusah ngenyit diripot nyadi lalu nadai pengawa mindah dipejalaika ba kandang endur ke dipatau. — RBI

KUCHING, 7 Mac — Penusah ampuh bah ngenyit diripot nyadi ba Lorong 4, Kampung Gersik pagi tadi, berindik ari ujan bangat ke nuntung kandang endur nya.

Nitihka penerang ari opis bomba, tim ari Balai Bomba enggau Penyah Penusah (BBP) Petra Jaya udah dianjung ngagai palan penusah nyadi pengudah nerima kangau ngenyit urung pukul 9.41 pagi.

Raban bomba datai ba endur nya urung 11 minit udah nya, pukul 9.52 pagi, lalu nemu tikas ai udah manggai ba tikas patung.

Taja pia, tikas ai diripotka surut maya matau.

Operasyen matau nya ngaul 10 iku raban bomba enggau pengering sebuah jentera Fire Rescue Tender (FRT) enggau sebuah entukar Urvan.

Naka ke diatu, nadai penusah bebadi nyawa diripot nyadi lalu gaya ba kandang endur ke kena penusah nya benung dijaga. — RBI

KOTA SAMARAHAN, 7 Mac — Dua individu diripotka bakal pengudah eksiden ba jalai alun ti nyadi ba Kampung Melayu ditu, sehari tu tadi.

Nitihka penerang ari Angkatan Pertahanan Awam Malaysia (APM) Samarahan, sida nerima kangau ngenyit ari sepital bekaul enggau penusah nya sebedau Skuad Foxtrot dianjung ngagai endur nya meri bantu.

“Lebuh datai ba endur nya, raban tetemuka dua iku mansa eksiden lalu pengawa meresa enggau lengkas dipejalaika dikena beratika gaya sida.

“Siku mansa indu ditemu sebana pedis ba kaki kiba, lalu siku agi mansa lelaki mega diripotka ngasaika pemedis ba dada enggau punggung,” ku penerang nya.

APM madah, pengudah meri bantu tumu ba palan penusah ke nyadi, kededua mansa udah nya dibai ngagai Pusat Jantung, Sepital Besai Sarawak ngambika diperubat enggau silik agi.

“Lebuh datai ba sepital, kededua mansa diserah ngagai piak perubat ngambika ulih dipejalaika enggau silik agi sereta diperubat,” ku penerang nya nerang.

Mensia mayuh ke betapi enggau sebarang penusah ngenyit ba kandang menua Samarahan dilalau jampat betanya ngagai APM Samarahan ba lumur 082-672999 tauka talipaun penusah ngenyit 999 ngambika dibantu enggau lengkas. — RBI

KUALA LUMPUR, 7 Mac — Opis Menteri Pelajar Malaysia (KPM) deka muka peminta ngambi Chalun Pengajar ungkup Program Diploma Pascasiswazah Diploma Pendidikan (PDPP) ba taun 2026 berengkah 9 Mac nyentuk 27 Mac tu.

Nitihka penerang ari KPM, peminta ditesau ari raban graduet ke bisi pengelandik nitihka latih pra-servis nengah program nya, ti dipejalaika penuh jam.

“Program Diploma Pascasiswazah Pendidikan (PDPP) ba taun 2026 deka dipejalaika dalam timpuh setaun ti ngaul tiga semester dikena ngelatih bala pengajar ti deka nyadi pengajar sebedau diengkah dalam servis pelajar,” ku penerang nya.

KPM madahka peminta ulih digaga nengah ‘online’ nengah portal rasmi PDPP ba https://mypdpp.moe.gov.my/pd.

Berindik ari nya, graduet ti nitihka syarat ke patut diperansang ngambi peluang nyereta profesyen pengajar sereta meri bantu ngagai pemansang pelajar menua.

Penerang nya mega nyemetak madahka inisiatif nya setipak enggau aspirasyen ngenegapka sistem pelajar menua ari baruh agenda “Pendidikan Nadi Negara” — RBI

PUTRAJAYA, 7 Mac – Sebuah bot pesiar ba tasik Putrajaya diripotka angus ba penusah ke nyadi ba Palan Ngintu Bot, Presint 19, lemai kemari.

Nitihka penerang ari Opis Bomba enggau Penyelamat Malaysia (JBPM) Wilayah Persekutuan Putrajaya, sida nerima kangau ngenyit bekaul enggau penusah nya urung pukul 5.18 lemai sebedau jentera ari Balai Bomba enggau Penyah Penusah Presint 14 enggau Balai Bomba enggau Penyah Penusah Presint 7 dianjung ngagai palan nya.

Raban bomba ke datai urung pukul 5.27 lemai nya tetemuka penusah angus nya mungkur sebuah bot pesiar ba tasik Putrajaya ke benung ba darat ba palan ngintu maya nya.

Sepenyampau 16 iku raban bomba enggau tiga jentera iya nya Light Fire Rescue Tender (LFRT), Fire Rescue Tender (FRT) enggau Emergency Medical Rescue Services (EMRS) ngaul diri dalam operasyen madamka api nya.

Operasyen ngerara api dipejalaika ngena dua arus hos enggau ai ari tangki jentera, kelimpah ari arus buih dikena nagang sereta madamka api.

Nadai penusah bebadi nyawa diripotka nyadi ba penusah nya.

Sama bisi ba palan nya mantu nagang gaya nya, raban Polis Diraja Malaysia (PDRM) enggau pemesai penerit adat Perbadanan Putrajaya (PPj).

Kebuah penusah angus nyadi agi benung dipansik. — RBI

KUCHING, 7 MAC – Sepenyampau 35,000 iku peranak Sarawak disadang begunaka perubat paliatif manggai ba taun 2030 lalu nyadika nengeri tu entara kandang endur ke pemadu mayuh begunaka servis nya di Malaysia.

Sapit Premier Sarawak, Datuk Amar Prof Dr Sim Kui Hian madah, gaya nya begunaka kerejasama tegap agi entara perintah, sepital enggau gerempung ukai dikuasa perintah (NGO) dikena nentuka pesakit bisi akses ngagai chara berubat ke bekualiti sereta komprehensif.

Nitih ku iya, statistik mandangka semina urung 10 peratus pesakit di Malaysia bisi akses ngagai servis ngintu paliatif, lalu enggau nya ngayanka bida ke besai ti patut diputarka enggau lengkas.

“Pengawa ngintu paliatif ukai semina bekaul enggau pengawa berubat aja, tang nentuka pesakit ti betapi enggau penyakit raya nerima ngintu ti bebasa, sukung runding enggau kualiti pengidup ti manah agi,” ku iya.

Iya madah munyi nya ba Pengerami Nyain Sempekat Pemereti Ati (MOU) ‘‘Strengthening Palliative Care in Sarawak’ entara perintah nengeri enggau Hospis Malaysia dikena ngenegapka servis nyaga paliatif di Sarawak.

Nitihka penerang ari Dr Sim, pemansang ngintu penyakit paliatif di Sarawak bepun ari inisiatif mit ti dipejalaika NGO sebedau ngerembai ngagai kerejasama serantau enggau antarabansa nyengkaum enggau American Society of Clinical Oncology enggau Asia Pacific Hospice Palliative Care Network.

Kerejasama nya mega ngadaka Program Kolaboratif Penjagaan Paliatif Lien-APHN Sarawak ti mantu ngenegapka rentayan sukung ungkup pesakit.

Kelimpah ari nya, sekeda NGO menua tu mega bejalaika tanggungpengawa ti beguna dalam nyendiaka pengawa berubat enggau enda bebayar ba rumah sereta meri sukung ngagai pesakit enggau sida sebilik, nyengkaum Gerempung Kanser Nasional Pampang Sarawak, Two Tree Lodge Hospice, Kuching Life Care Society, Gerempung Rawatan Paliatif Sibu enggau Gerempung Rawatan Paliatif Miri.

Kenyau ari taun 2022 ngagai 2025, Program Ngintu Paliatif Domisili Sarawak udah meri pemaik ngagai lebih 1,000 iku pesakit ba genturung pendiau nya.

Ba pemansang ke bekaul, wad nyaga paliatif ba Sepital Besai Sarawak dipelaba deka dipindah bulan baru ngagai palan nyaga paliatif pesakit dalam 58 katil ti dikemansang Kuching Life Care Society nengah kerejasama sektor awam enggau peribit.

Pengawa nya ukai semina ulih mantu ngurangka penyekut ba sepital, tang mega nyendiaka endur berubat ti lantang sereta nyamai agi ungkup pesakit ti begunaka pengawa ngintu paliatif.

Nengah kerejasama enggau Hospis Malaysia, sekeda inisiatif deka dipejalaika nyengkaum ngenegapka latih raban profesyenal pengerai, ngerembaika servis nyaga paliatif bepelasarka komuniti, kelebih agi di menua pesisir, sereta ngemansangka model nyaga ti meruan agi ti engkeman enggau konteks Sarawak.

Kerejasama tu dipeda nyadi siti singkang ti beguna dalam ngangkatka tikas ngintu orang sakit paliatif di Sarawak, setipak enggau pengawa perintah nengeri ti deka ngenegapka sistem pengerai enggau pengelantang pendiau rayat. -RBI

KUCHING, 6 Mac — Sebuah kompeni di Kuching nempa sejarah lebuh nyadi kompeni keterubah di Sarawak ngasilka kulat butang putih ba menua tu empu.

Direktor Borneo Highland Orchard, Izzy Ng Yi Xin madah, palan betanam nya ti ngeluarka spesis kulat butang putih Agaricus bisporus berengkah beoperasyen bulan Disember tu tadi.

Dalam timpuh tiga bulan keterubah iya beoperasyen, palan nya udah nyapai kapasiti ngasilka lebih 2,300 kilogram kulat butang putih sebulan .

“Kulat ke ditanam menua tu diatu dibekal ngagai makit di Kuching lalu sebagi ngagai Sibu,” ku iya.

Iya madah munyi nya lebuh dikerandau pengarang berita rambau penemuai Menteri Industri Pemakai, Komoditi enggau Pemansang Kandang Menua Dato Sri Dr Stephen Rundi Utom ngagai fasiliti Borneo Highland Orchard ditu, sehari tu tadi.

Ku Ng, kulat tu ulih tan nyentuk tujuh hari enti disimpan ba tikas pengangat baruh ari 4 darjah Celsius.

Nitihku iya, kompeni nya merambu deka ngatur pejalai promosyen di Kuching bulan baru dikena meri kelala kulat ke ditanam menua tu ngagai penguna.