KUCHING, 23 Jun – Sarawak Agrofest 2026 (SAF2026), ekspo betanam betupi pemadu besai di Sarawak deka diatur ba Padang Bilun Lama Bintulu berengkah 25 September nyentuk 4 Oktober 2026.

Edisyen keenam SAF2026 diatur ngena rambai jaku “Inovasyen Betanam Betupi Ungkup Pengelikun Pemakai”, setipak enggau pengawa ngenegapka sektor betanam betupi nengah inovasyen enggau teknologi dikena nentuka bekal pemakai meruan.

Pekara nya dipadahka Menteri Industri Pemakai, Komoditi enggau Pemansang Kandang Menua, Dato Sri Dr Stephen Rundi Utom ba aum pengarang berita SAF2026 ke diatur ba Wisma Bapa Malaysia, Kuching, sehari tu tadi.

Nitih ku iya, SAF2026 dikearapka nyadi pelasar besai ngempuruka pemain industri, ejensi perintah, pemeranak puku, orang dagang enggau komuniti betanam betupi mantaika teknologi pemadu baru, inovasyen enggau peluang pemansang ungkup sektor agro-pemakai di Sarawak.

Ekspo nya mega nyadi pelasar dikena ngenegapka kerejasama strategik entara mayuh bengkah piak dalam pengawa ngangkatka produktiviti betanam betupi, ngenegapka pengelikun pemakai sereta meransang transformasyen sektor betanam betupi nengeri nuju ngagai tikas ke lebih moden sereta kompetitif. – RBI

#ruaiberitaiban#newsiban#beritaiban

Rindu | Titih | Kunsika

KUALA LUMPUR, 23 Jun – Pengawa ngatur koordinasyen infrastruktur jalai alun enggau pengawa bejalaika sistem perengka pengangkut moden di Sarawak terus ditegapka nengah kerejasama rat entara Perintah Besai enggau Nengeri dikena nentuka pengelanchar pejalai rayat enggau pengelikun penguna jalai alun.

Menteri Kereja Raya, Dato Sri Alexander Nanta Linggi madahka pekara nya lebuh iya nyadi chairman aum begulai enggau Opis Menteri Perengka Pengangkut Sarawak ba Opis Menteri Kereja Raya (KKR) berandauka sekeda pekara beguna bekaul enggau koordinasyen infrastruktur jalai alun, kelebih agi ngaul jalai Perintah Besai enggau pengawa bejalaika projek Transit Jampat Autonomi (ART) di Sarawak.

Nitihku iya, entara batang pekara ti dikerandau iya nya perintah nyekat pemerat ti ngaul ‘ART alignment’ ti deka nengah jalai Perintah Besai di nengeri tu.

“Bela bisi dikerandau iya nya koordinasyen ‘ART alignment’ ti nengah jalai Perintah Besai dikena nentuka sukut teknikal, pengelikun enggau pengelanchar trafik ulih dipejalaika enggau komprehensif sereta efektif,” ku iya nengah tulis media rama sehari tu.

Aum nya mega mansik langkar papan tanda ti deka dikena lebuh ART berengkah beoperasyen, nyengkaum sukut pengelikun, sebaka enggau pemereti ati penguna jalai alun.

Kelimpah ari nya, ART mega bisi mantaika simulasyen pejalai perengka pengangkut ba simpang lampu trafik ba jalai nengeri ungkup tuju penerang enggau pansik begulai.

Ku Nanta, kerejasama ti mungkur sektor peribit, Perintah Nengeri Sarawak enggau Perintah Besai beguna amat dalam nentuka tetiap pemansang infrastruktur ulih dipejalaika nitihka perambu sereta meri pemaik maksimum ngagai rayat.

“Koordinasyen baka tu beguna dikena nentuka pemansang infrastruktur ti dipejalaika nya amat meri penguntung ngagai penguna jalai alun, pesinjir perengka pengangkut mensia mayuh, komuniti lokal sereta nyungkak penumbuh ekonomi,” ku iya. -RBI

#ruaiberitaiban#newsiban#beritaiban

Rindu | Titih | Kunsika

KUCHING, 23 Jun — Komiti Pemansang Enggau Pengelikun Genturung Pendiau (JKKK) Rumah Minggat Nanga Bawai, Balleh ngenataika pengaga ati ke pemadu tinggi ngagai penyereta Biro Indu dalam Program Bejalai Bebala Mayuh, Niti Daun Gawai Dayak Renggat Nengeri Sarawak 2026 ke diatur di Tebing Waterfront Kuching baru-baru tu nyadi peneleba ke besai reti sereta semengat baru dalam pengawa ngenegapka budaya menua tu.

Nitihka penerang ari JKKK Rumah Minggat Nanga Bawai, penyereta ukai semina mai peneleba ke berega ngagai bala penyereta, tang mega ngangkatka nama rumah panjai enggau kandang endur sitak Pelagus ngagai palan ke lebih dikemegahka.

“Penyereta tu nyadi peneleba ke chukup besai reti, penuh enggau pengingat manis sereta nyadi pun pengeransing baru terus chakah ngemansangka budaya menua tu,” ku penerang nya.

JKKK mega meri pengaga ati ngagai komitmen, pengeliat ati enggau penyayau budaya ti dipandangka kaban Biro Indu, ti dipadah nyadi peransang ngagai komuniti ngelingi, kelebih agi orang indu menua pesisir ngambika terus regas, besemekih sereta ngetanka pesaka asal aki ini sida.

Berebak enggau nya, JKKK Nanga Bawai Rumah Minggat mega meri besai terima kasih ngagai Kaban Kunsil Nengeri (ADUN) Pelagus, Wilson Nyabong Ijang ti udah meri sukung enggau pengibuh ngagai penyereta komuniti ba program ti beprestij nya.

“Kami amat beterima kasih sereta berasai amat temegah ati laban Biro Indu Rumah Minggat udah diberi peluang ti berega nyereta pengawa tu asil ari sukung ti tegap, pengibuh enggau peransang ti enda ngetu ari Yang Berhormat,” ku penerang nya nampung.

JKKK mega nerangka chara ADUN Pelagus, ti seruran beratika sada rayat sereta muka ruang ke sama rata ngagai komuniti menua pesisir, nyadi pengawa ti chukup dikerindu sereta meri empas positif ngagai pemansang rama kandang menua.

Berebak enggau nya, Biro Indu Nanga Bawai Rumah Minggat mujur teulihka penuduk lumur dua ba pekit nya, siti pemujur ti dipadahka nyadi pekara ti besai ngemegahka komuniti.

“Semua pengawa manah enggau sukung ke udah dituang amat besai reti lalu deka seruran dikenang enggau terima kasih,” ku penerang JKKK nya.

Dikearapka pemujur tu ulih nyadi pemangkin ngagai pengawa ti terus dipejalaika dalam ngasah penau, ngenegapka pengarap diri sereta ngenegapka kaul orang indu dalam aktiviti budaya ba renggat nengeri. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

LONDON, 23 Jun – Manchester United udah ngaga penyulut ke besai dalam pengawa sida ngamatka pengawa ngaga stadium baru ke ulih endur 100,000 penuduk lebuh sida mujur ngulihka majoriti tanah ke diguna ungkup projek besai nya.

Pengawa ngulihka palan pemesai 10.12 hektar semak enggau stadium ikonik Old Trafford muka jalai dikena bejalaika perambu ngaga arena lumba enggau main pemadu besai di United Kingdom (UK), lalu enggau nya ngurangka sekeda penanggul besai ke sebedau tu nuntung projek nya.

Kelab tebilang Liga Premier England nya madahka pengawa meli sebidang tanah tiga segi ti bepalan urung 350 meter barat laut Old Trafford ngemendarka sida neruska projek nya enggau enda ibuh ngulihka tanah tambah ti diempu kompeni logistik Freightliner, ti bepalan besepiak enggau palan pemansang nya.

Sebedau tu, endur terminal kargo ke semak dikelala nyadi siti ari batang pekara ti ngenusahka proses perambu enggau pemansang stadium baru nya.

Ketuai Eksekutif Pemansang Stadium Baru Manchester United, Collette Roche madahka pemujur nya nyadi pekara ke besai reti lebuh kelab nya nyingkang ngagai renggat pemansang ke nangkanka nya.

“Berita sehari tu mandangka penyulut ke digaga kami ba pengawa ngenataika stadium baru tikas dunya ungkup Manchester United lalu nyadi pekara ke besai reti lebuh kami nyingkang ngagai renggat pemansang ke nangkanka nya.

“Pengelandik ngaga stadium baru ke chukup semak enggau Old Trafford ngemendarka kami ngetanka pesaka, main asal enggau semengat ke chukup beguna ngagai bala peminat kami,” ku iya.

Nitihka penerang ari Roche, pengawa ngulihka tanah nya beguna amat dikena ngemansangka stadium moden ti ukai semina nangkup guna kelab nya jemah ila, tang mega terus bebasaka sejarah enggau identiti Manchester United.

Manchester United keterubah iya mantaika perambu stadium baru ke beungkus £2 billion (US$2.6 billion) dalam bulan Mac 2025 nyadi sebagi ari pelin transformasyen timpuh panjai kelab nya.

Kelimpah ari nyadi palan lumba enggau main baru di UK, stadium nya mega nyadi komponen kunsi projek ngangkatmanah baru pemesai 149.73 hektar ti disadang nyengkaum pengawa ngaga 15,000 buah rumah baru sereta nempa dipelabaka 48,000 pengawa puang ba kandang menua tu enggau 90,000 pengawa puang ba renggat nasional.

Pelin besai penuh projek nya, begulai enggau penerang silik pasal timpuh berunding enggau formal, deka dipadah kena 9 Julai ti deka datai. – RBI

Gambar AI

#ruaiberitaiban#newsiban#beritaiban

Rindu | Titih | Kunsika

BAU, 24 Jun – Perintah Sarawak mengkang fokus ngemujurka agenda pemansang enggau pengelantang rayat ari ti berandauka isu ngantung nama chalun sebedau Pengawa Bepilih Nengeri (PRN) ti deka datai.

Premier Sarawak, Datuk Patunggi Tan Sri Abang Johari Tun Openg madah, pekara ti dikemeratka perintah diatu iya nya nentuka semua perambu pemansang ke udah ditumbuhka kenyau ari taun 2020 ulih diteruska dikena nentuka pemaik belama ngagai rayat di serata nengeri.

Nitih ku iya, pemujur Sarawak dalam ngemayuhka pemansut ekonomi udah nyungkak penatai pemisi nengeri, lalu ari nya ngemuntangka bemacham inisiatif ti meri empas tinggi dipejalaika nyengkaum pelajar tinggi enda bebayar, pemansang ekonomi digital enggau nyendiaka mayuh agi peluang gawa bepenatai pemisi tinggi.

“Nama ke beguna diatu iya nya kitai neruska pemansang sereta nentuka rayat teulihka penguntung ari penumbuh ekonomi ke diperambu kitai,” ku iya madah ngagai pengarang berita pengudah bejadika Palan Main Asal Bidayuh (BCC) sereta bejalaika pengawa nyuaka surat pala tanah di Bau, kemari.

Ngelansa pasal penuduk penyandang penuduk Kunsil Nengeri (DUN) Tasik Biru, Datuk Henry Harry Jinep ke bisi kaul enggau spekulasyen ngantung nama baru ba pengawa bepilih nengeri ke deka datai, Abang Johari ke mega Chairman Gempung Parti Sarawak (GPS) nadai meri sebarang ulu lungga.

Iya nyemetak madahka agi kelalu tumu berandauka isu chalun laban haribulan bepilih bedau ditetapka.

“Aku enda nemu kemaya pengawa bepilih, nya alai aku enda ulih nyaut tanya nya,” ku iya enggau mudah.

Berebak enggau nya, Menteri Pelajar, Inovasyen enggau Pemansang Bakat Sarawak, Dato Sri Roland Sagah Wee Inn, dalam jaku iya ba pengerami ke sama meri pengaga ati ngagai pengawa nyadi ketuai Henry, ti dikumbai iya udah mayuh mantu pemansang kandang menua Bau enggau Tasik Biru.

Ku iya, Henry bejalaika tanggungpengawa beguna amat dalam ngamatka bemacham projek pemansang nyengkaum ngaga Palan Main Asal Bidayuh (BCC), bejalaika program nyukat tanah Hak Adat Bumiputera (NCR) sereta mega pemansang infrastruktur ti meri penguntung ngagai komuniti setempat.

Berebak enggau nya, Sagah ngarapka rayat terus meri sukung ngagai Henry dikena nentuka penerus agenda pemansang ba kandang menua nya.

Ku iya, agi mayuh perambu pemansang ke patut dipejalaika lalu penerus nyadi ketuai beguna amat dikena nentuka penguntung ari pemansang terus diasaika rayat jemah ila. – RBI

#ruaiberitaiban#newsiban#beritaiban

Rindu | Titih. | Kunsika

BAU, 23 Jun — Perintah Sarawak majak ngenegapka agenda ngaku Hak Tanah Adat Bansa Asal (NCR) lebuh 2,109 surat pala tanah ari baruh Seksyen 18 Kanun Tanah Sarawak (KTS) ungkup sitak Kunsil Nengeri (DUN) Tasik Biru disua ngagai penerima, ditu kemari.

Pengawa nyerahka pengawa nya udah dipenyadika Premier Sarawak, Datuk Patinggi Tan Sri Abang Johari Tun Openg beserimbai enggau Pengerami Bejadika Palan Main Asal Bidayuh Bau (BCCB) di Bau.

Nitihka penerang ti diambi ari ‘Facebook’ Jiwa Bakti, pengawa nyerahka nya mungkur sekeda komponen besai nyengkaum 1,316 lot tanah individu ari baruh Seksyen 18 (inisiatif baru NCR) ngagai 1,142 iku penerima ari kandang Apar, Tabong, Segong, Tanjong Poting, Grogo, Sibuluh enggau Banan.

Kelimpah ari nya, 793 lot tanah NCR ari baruh kandang Kaunsil Pengintu enggau Penyaga Tanah Sarawak (SALCRA) mega bisi diserah ngagai 655 iku penerima, ti mungkur kandang menua OPE Jagoi (Estet Sawit) enggau OPE Bratak.

Ba pengerami ke sama, Perintah Sarawak mega bisi nyuaka Gazet Rizab Komunal Bumiputera ungkup sitak Banan (Kampung Grogo/Sibuluh) ti mungkur pemesai 121 hektar enggau sitak Senggi-Poak, Jalai Batu Kawa, Tondong (Kampung Atas) ti mungkur pemesai 9.7 hektar.

Perintah Sarawak nyemetak madah, pengawa bejalaika pengawa nyukat enggau ngazet tanah NCR ukai dikena ngerampas tanah adat, tang lebih agi dikena nentuka tanah nya diaku nengah undang-undang, dijaga sereta ulih ditampung ngagai rebak dudi hari.

“Pengawa nyukat enggau ngaga gazet tanah NCR ukai chara ngerampas tanah, tang lebih agi dikena nentuka tanah adat diaku, dijaga sereta ditampung ngagai rebak dudi,” ku penerang nya.

Penerang nya nambah, pengempu tanah ari baruh Seksyen 18 mega ngasaika pengelebih nyengkaum dilepaska premium, nadai chukai tanah enggau jamin ngempu tanah belama.

Inisiatif tu mandangka komitmen Perintah Sarawak ti seruran bejalaika pengawa ngenegapka pengelikun tanah rayat sereta ngangkatka pemanah sosio-ekonomi komuniti Bumiputera di serata nengeri. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SERIAN, 21 Jun — Pengerami Gawai Nyisan Bunos (Birambat) di Kampung Daha Kisau diatur enggau chukup pengeransing sereta nyadi penutup rasmi pengerami Hari Gawai taun tu, lalu enggau nya ngempuruka komuniti menua nya dalam gaya pemanah ati, penyerakup enggau semengat begulai.

Program ke diatur begulai KMKK Bagi Menua Serian, Kampung Daha Kisau enggau Palan Servis N.21 Tebedu nya mega nyadi pelasar ke besai reti dalam ngenegapka kaul komuniti sereta ngetanka pesaka asal bansa Bidayuh ba kandang menua nya.

Nengah penerang ke dikenataika Kaban Kunsil Nengeri ( ADUN) Tebedu, Dr Simon Sinang, nyemetak madahka pengawa ngatur Gawai Nyisan Bunos (Birambat) patut dipajakka nyadi pelasar ke beguna dalam ngenegapka penyerakup komuniti sereta ngetanka adat enggau main asal ari rebak ngagai rebak.

Iya mega nyemetak madahka program baka tu bejalaika tanggungpengawa ke besai dalam ngerapitka kaul sereta ngenegapka pengelantang entara komuniti ari mayuh bengkah renggat.

Nitih ku iya, “Ngarapka Gawai Nyisan Bunos (Birambat) terus nyadi kelai penyerakup, pesaka budaya enggau identiti komuniti Bidayuh kelebih agi, pia mega rayat Sarawak selampur.”

Pengawa ngatur program tu sekali agi ngayanka komitmen komuniti setempat dalam nentuka pesaka asal terus dijaga sereta ditampung ngagai rebak dudi hari, kelimpah ari ngenegapka penyerakup komuniti di Bagi Menua Serian.

Pengerami nya dirami enggau penatai sekeda ketuai nengeri, nyengkaum Sapit Menteri Industri Pemakai, Komoditi enggau Pemansang Kandang Menua Sarawak Datuk Martin Ben, Kaban Kunsil Nengeri ( ADUN) Bukit Semuja John Ilus, Penyanding Penemu ba Opis Premier Sarawak (Pelajar) Datuk Amar Michael Manyin Anak Jawong, Chairman Kaunsil Pelilih Serian Dato Peter Minos.

Sama bisi datai iya nya Henry Bujang, Temenggong, begulai enggau bala ketuai komuniti Bidayuh Bagi Menua Serian. — RBI

JOHOR BAHRU, 22 Jun — Ella Apit, peranak asal Kapit, beumur 29 taun, mantaika penegap ati iya deka terus ransing ngangkatka pesaka budaya Sarawak ngagai renggat nasional enggau antarabansa pengudah dichiri nyadi Ratu Etnik Sarawak Gawai Dayak Tebrau 2026 di Johor kena Hari Minggu tu tadi.

Bekunsi dalam randau enggau Ruai Berita Iban, Ella ke nyadi anak lumur dua ari lima iku diri menyadi madahka kaul iya dalam dunya pekit pemajik ukai pekara ke baru, tang udah berengkah kenyau beberapa taun ke udah nengah bemacham penyereta ba renggat menua tu enggau antarabansa.

Entara pemujur tumu iya nya nyereta Ratu Bumi Malaysia 2021, Miss Malaysia Kebaya 2021, sereta ngarika Malaysia ba pekit antarabansa di India nengah Miss Asia Malaysia 2023.

Iya mega menang gelar ‘1st Runner Up’ Ratu Etnik PRAISE 2025 enggau Ratu Gawai & Keamatan 2025, sebedau dichiri nyadi champian Ratu Etnik Sarawak Gawai Dayak Tebrau 2026.

Sebedau regas ba pekit pemajik gamal, Ella dulu agi ngereja pengawa nyadi model ungkup pengawa mandangka fesyen, sesi begambar katalog enggau mayuh macham pengawa bekaul enggau industri kreatif.

Pengerindu iya ke dalam ba seni enggau budaya ngujungka iya terus chakah ba program budaya, nyengkaum pengerami budaya enggau pengawa mandangka main asal baka ngajat.

Kenu ku Ella, kaul iya diadaka ari penyedar dikena nentuka pesaka asal enda dilalaika, kelebih agi ba raban nembiak rebak baru di luar Sarawak.

“Budaya nyadi identiti kitai. Aku ngarapka ulih terus nyadi sada nyawa enggau mua ti meri kelala pemanah budaya Sarawak ngagai komuniti ke lebih besai,” ku iya nerang.

Ella meri besai terima kasih ngagai Tuhan ketegal berekat enggau peluang ke udah diberi, lalu nyemetak madahka pemujur ke dijapai nya ukai enggi iya aja, tang lebih agi asil ari sukung ke tegap ari semua piak ke seruran bisi di belakang iya sepemanjai pekit nya dipejalaika.

“Terima kasih ngagai Tuhan ketegal berekat enggau peluang ke udah diberi ngagai aku nyentuk aku dipadu nyadi Ratu Etnik Sarawak Gawai Dayak Tebrau 2026.

“Pemenang tu ukai enggi aku aja, tang ngagai semua ke seruran meri sukung, sampi enggau pengeransing sepemanjai pejalai tu,” ku iya lebuh dirandau Ruai Berita Iban

Ella mega meri besai terima kasih ngagai menijar iya, Sawang Purah, enggau tim Pertubuhan Raban Indu Borneo Seremban (PRAISE) ti bisi datai meri sukung taja sida datai ari jauh, pia mega Persatuan Kebudayaan Dan Warisan Malaysia Borneo ( MANTRA) ti seruran meri peransang ti enda ngetu ari jauh.

“Aku beterima kasih ngagai kami sebilik, bala bakih enggau semua piak ti enda ngetu meri sukung enggau pengarap, kelebih agi lebuh nengah pemar sepemanjai penyereta tu” ku Ella.

Berebak enggau nya, Ella ngenataika pengaga ati iya ngagai bala akim iya nya Laddy Nattasha, Alvey Alice John enggau Grandy Adrienne Mina ketegal tisih profesyenal enggau pengandal ke diberi sepemanjai pekit nya.

Iya mega meri besai terima kasih ngagai Gerempung Pengintu Pengelantang enggau Pertubuhan Kebajikan Dan Kebudayaan Borneo- Johor Bahru enggau pengatur ti udah bebendar nentuka pejalai Program tu bejalai enggau lanchar sereta teratur.

Ella mega meri pengaga ati ngagai semua pesereta ke bepekit, nerangka tetiap pesereta udah meri pekit ke chukup manah sereta mandangka pemanah pengawa sida.

“Enda ditinggalka mega ngagai semua pesereta ke udah meri pekit ke besai. Tetiap iku kami udah ngereja pengawa enggau naka pemanah,” ku iya.

Iya mega minta raban nembiak Sarawak di Semenanjung Malaysia berani mantaika penau sida ba panggau ke besai agi, nyengkaum dalam bidang seni, budaya enggau pekit pemajik gamal nyadi pelasar dikena ngemansangka diri.

Dikena nyimpul randau enggau Ruai Berita Iban Ella mega mantaika pengarap iya, pengawa ngatur Gawai Dayak Tebrau Ratu Etnik Sarawak edisyen keterubah di Johor Bahru deka nyadi pemungkal nampung edisyen jemah ila ti deka besai agi sereta meri empas ke tinggi, lalu enggau nya ngenegapka agi pengawa negika budaya etnik Sarawak di luar nengeri asal. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

BAU, 22 Jun – Perintah Sarawak majak ngayanka komitmen dalam mutarka isu tanah Hak Adat Bumiputera (NCR) lebuh sepenyampau 1,316 surat pala tanah ari baruh Seksyen 18 Kanun Tanah Sarawak (KTN) disuaka ngagai 1,142 penerima ba sitak DUN Tasik Biru.

Premier Sarawak, Datuk Patinggi Tan Sri Abang Johari Tun Openg madah, pengawa nyukat, gazet enggau ngeluarka pala tanah NCR dipejalaika enda ngetu dikena nentuka hak ngempu komuniti Bumiputera diaku sereta dijaga ngena undang-undang.

Kenu ku iya, ngembuan surat pala tanah beguna amat laban nya ukai semina meri penetap undang-undang ngagai pengempu, tang mega ulih nyeliahka penyarut adan enggau ngempu tanah jemah ila.

Dikena ngelengkaska agi proses nyukat tanah di serata Sarawak, perintah nengeri mega udah nambahka urung 600 iku jurusukat ke udah diberi setipikit nyadi sebagi ari atur dikena ngenegapka pengawa bejalaika program nyukat tanah NCR.

Pengawa nyuaka surat nya tembu beserimbai enggau Pengerami Bejadika Palan Main Asal Bidayuh (BCC) enggau Pengawa Nyerahka Gazet Rizab Komunal Bumiputera Seksyen 6 Kanun Tanah Sarawak enggau Surat Pala Tanah Seksyen 18.

Ba pengerami ke sama, perintah nengeri mega bisi nyuaka Gazet Rizab Komunal Bumiputera ungkup Kandang Menua Banan (Kampung Grogo/Sibuluh) ti mungkur pemesai 121 hektar enggau Kandang Menua Senggi-Poak, Jalai Batu Kawa, Tondong (Kampung Atas) ti mungkur pemesai 9.7 hektar.

Kelimpah ari nya, sepenyampau 793 lot tanah ba kandang menua SALCRA mega disuaka ngagai 655 iku penerima ti ngaul kandang menua OPE Jagoi enggau OPE Bratak.

Berebak enggau nya, Menteri Pelajar, Inovasyen enggau Pemansang Bakat, Dato Sri Roland Sagah Wee Inn madahka pemujur nya ngayanka pengeran Perintah Sarawak dalam ngaku sereta mutarka isu tanah adat rayat.

Ku iya, pengawa nyerahka pala tanah enggau gazet ti benung dipejalaika enda ngetu nyakal dawa ti madahka perintah enda bebendar bejalaika pengawa nyukat tanah NCR.

Berebak enggau nya, Sapit Menteri Perengka Pengangkut Sarawak ke mega Kaban Kunsil Nengeri (ADUN) Tasik Biru, Datuk Henry Harry Jinep madah, pengawa nyukat tanah NCR ba kandang menua Bau udah berengkah dipejalaika kenyau ari taun 2007 nengah kerejasama entara DBNA enggau Opis Tanah enggau Survei Sarawak.

Nitih ku iya, sepenyampau 4,059 pala tanah udah dikeluarka ba kandang menua Tasik Biru ari taun 2018 ngagai 2024 lalu penyampau nya diatu udah nambah ngagai 6,168 pala tanah pengudah pengawa nyerah ke pemadu baru.

Iya netapka pemujur nya nyadi bukti ke nyata komitmen Perintah Sarawak ari baruh iring Premeir Sarawak Datuk Patinggi Tan Sri Abang Johari Tun Openg dalam ngenyampatka pengawa nyukat, ngeluarka surat tanah NCR ungkup pengelantang rayat enggau dudi hari komuniti Bumiputera. – RBI

#ruaiberitaiban#newsiban#beritaiban

Rindu | Titih | Kunsika

KUCHING, 22 Jun – Gerakan Belia Parti Pesaka Bumiputera Bersatu (PBB) Sarawak bebendar madahka penatai Presiden Parti Demokratik Progresif (PDP) Datuk Seri Tiong King Sing, ba sebengkah program politik Pakatan Harapan (PH) di Johor enda ulih dianggap nyadi sukung tauka penetap rasmi Gempung Parti Sarawak (GPS).

Nengah penerang media sehari tu, Nembiak PBB nerangka penyereta sebarang ketuai dalam program ke baka nya sekalika dalam kapasiti diri empu tauka rasmi enda patut dianggap ngarika GPS tauka mandangka sebarang sejalai politik enggau parti di luar Sarawak.

Nitihka penerang nya, GPS mengkang bepegai ba prinsip lama iya nya enda masuk champur tauka ngaul diri dalam pekara pengawa bepilih di nengeri bukai, lalu penetap tu terus nyadi lalau chara politik gempung nya.

Raban Nembiak PBB mega nerangka program di Johor ke digulu Tiong ke mega Menteri Dagang Temuai, Seni enggau Main Asal Malaysia nya gempuru politik lalu ukai pengawa perintah taja pan Menteri Besai mega bisi datai.

Berindik enggau nya, peragam ti ngumbai Tiong ngulu program nya dalam kapasiti iya nyadi kaban Kabinet nyempulang Menteri Besai nya enda betul.

Penerang nya nyemetak madahka penatai Tiong nya dalam kapasiti diri empu lalu enda ulih dikumbai siti chara meri sukung ngagai Pakatan Harapan.

“Sebarang tuduh ti nyelai nya nadai pelasar sereta enda ngayanka penetap politik GPS ti udah lama dikemeranka enggau konsisten,” ku penerang nya.

Berebak enggau nya, Raban Nembiak PBB bepenemu semua ketuai enggau kaban GPS meseti terus bepegai ba prinsip enggau kuing politik ti udah dipesetuju dalam gempung nya nyengkaum ari sukut pengawa enggau ulah sida.

Nitihka penerang nya, pekara tu berat dikena nentuka pengeransing ngetanka hak Sarawak enggau agenda pemansang nengeri ulih terus dipejalai enggau enda dikeruga polemik ti tau ngeruga fokus ngagai pemerat rayat.

Raban Nembiak PBB mega ngemeratka pemesai guna ngetanka penyerakup enggau sepenemu entara semua parti komponen GPS dikena nentuka mandat enggau tanggungpengawa ngagai rayat Sarawak ulih dipejalaika enggau manah.

“Baris ti tegap sereta beserakup nyadi pelasar ti beguna dikena nentuka agenda enggau tanggungpengawa GPS ngagai rayat Sarawak terus ditegapka agi,” ku penerang nya. – RBI

#ruaiberitaiban#newsiban#beritaiban

Rindu | Titih | Kunsika