LUNDU, 15 Mac — Kaban Kunsil Nengeri (ADUN) Opar, Billy Sujang madahka agih belanja sepenyampau RM350,000 dikena nyukung pemansang enggau ngenegapka pangku pengawa komuniti nengah Gerempung Bansa Dayak Bidayuh (DBNA) Pampang Lundu.

Ku iya, ari penyampau nya, sepenyampau RM300,000 diungkupka dikena ngangkatmanah Begunan DBNA Lundu enggau Dewan DBNA Lundu, lalu RM50,000 nengah agih belanja MRP diungkupka dikena nyukung pengawa bejalaika mayuh macham program komuniti.

Penerang nya dibantai lebuh iya bejadika Aum Besai Tiga Taun Sekali DBNA Pampang Lundu ti diatur ba Dewan DBNA Lundu kena Hari Enam tu tadi.

Nitih ku iya, pengawa ngemanahka perengka guna nya dikearapka ulih nyendiaka palan ti lantang agi sereta kondusif endur bejalaika mayuh macham aktiviti komuniti enggau program pemansang komuniti di kandang menua Lundu.

“Dikearapka agih belanja tu ulih dikena penuh DBNA Lundu nyadi palan aktiviti komuniti ti nyukung pemansang rama, pelajar enggau main asal komuniti setempat,” ku iya.

Dalam jaku dipansutka iya, iya mega ngemeratka pemesai guna DBNA nyadi pelasar ti nyerakupka komuniti Bidayuh di pelilih Lundu, ti mungkur bemacham sub etnik baka Salako, Jagoi enggau Rara.

Ku iya, taja pan mayuh macham dialek enggau penatai budaya ba komuniti Bidayuh tang sida agi bekunsika pesaka asal enggau identiti ke sama ti patut dijaga.

Kenu ku iya, dalam jeman moden kemaya hari tu, pengawa ngetanka jaku, budaya enggau adat komuniti Bidayuh nyadi tanggungpengawa ke berat dikena nentuka pesaka tu enda lenyau ditinggang jeman.

Berebak enggau nya, iya mega ngelaluka pengawa DBNA dalam mantu ngaga dokumentasyen tanah Hak Adat Asal (NCR) komuniti Bidayuh dikena nentuka hak enggau pesaka asal komuniti nya terus diintu sereta dikelala jemah ila.

“Tanah NCR ukai semina pengeraja ekonomi ungkup komuniti, tang nyadi pesaka turun temurun ti ngembuan rega sejarah enggau identiti ungkup komuniti kitai,” ku iya nerang.

Iya mega nyemetak madahka kerejasama rat entara gerempung komuniti enggau perintah beguna amat dikena nentuka agenda pemansang ulih dipejalaika enggau efektif nurun ngagai renggat baruh.

Ku iya, Perintah Sarawak ari baruh iring Menteri Besai Sarawak, Abang Abdul Rahman Zohari Abang Openg seruran ngemeratka pemansang menua pesisir, ngangkatka tikas pengidup rayat enggau ngenegapka komuniti.

Berindik enggau nya, iya minta komuniti Bidayuh di Lundu terus ngenegapka penyerakup enggau semengat kerejasama dikena nentuka komuniti nya terus maju sereta ulih besemekih jemah ila.

Pengerami nya bela digulu Ketuai Komuniti Bidayuh Bagi Menua Kuching, Temenggong Atok Darop, Chairman DBNA Pampang Lundu Cikgu Suimi Kimseng, bala ketuai genturung pendiau, kaban komiti enggau kaban DBNA Lundu. — RBI

KAPIT, 15 Mac — Siku lelaki dikeirauka lemas pengudah perau kayu ke ditepan iya enggau empat iku bakih iya karam di Sungai Batang Rajang semak kandang menua Pantu, urung 1.5 kilometer ari Wharf Kubu, kena malam Hari Lima tu tadi.

Nitihka ripot ari Balai Bomba enggau Penyah Penusah (BBP) Kapit, penusah nya nyadi urung pukul 7 lemai kena 13 March tu tadi lebuh lima iku pekereja tungkang nepan perau kayu deka pulai ke rumah pengudah mandi ba sungai.

Taja pia, perau ke ditepan sida dipelabaka karam pengudah betempuh enggau gelumbang besai lebuh sebuah bot tunda nengah kandang endur nya.

“Empat iku mansa mujur ngelarika diri seraya siku agi diripotka lenyau lalu dikeirauka lemas,” ku penerang nya.

Kangau bekaul enggau penusah nya diterima urung pukul 3.59 lemai Hari Enam tu tadi sebedau operasyen ngiga enggau nyelamat (SAR) dipejalaika.

Operasyen nya berengkah urung pukul 3.30 lemai pengudah raban penyelamat bulih penerang bekaul enggau mansa.

Penerang operasyen mega bisi diatur begulai enggau Polis Diraja Malaysia (PDRM) ba Indu Opis Polis Pelilih (IPD) Kapit sebedau pengawa ngiga nya dipejalaika.

Raban penyelamat bejalaika pengawa nyidi dalam kandang radius satu kilometer ari palan alai mansa dipelabaka labuh ngena chara ‘water surface’ ngelingi Sungai Batang Rajang.

Operasyen SAR hari keterubah taja pia ditangguh pukul 6 lemai lalu deka ditampung baru pagi pagila dikena neruska pengawa ngiga mansa ke agi lenyau. — RBI

KUCHING, 14 Mac – Menteri Kereja Raya, Dato Sri Alexander Nanta Linggi madahka projek Sepital Pengajar enggau Palan Pengerai Primari (PKP) Universiti Malaysia Sarawak (UNIMAS) di Kota Samarahan ti benung dipejalaika Opis Kereja Raya (JKR) nengah Tim Projek Khas 2, ngena chara ngelangkar sereta ngaga enggau ungkus kontrak RM489.49 juta.

Nitih ku iya, pejalai kereja fizikal ba projek nya udah manggai 75.65 peratus naka 25 Februari tu tadi.

Ku iya, projek nya sebengkah ari inisiatif perintah ke ngemeratka ba pengawa ngenegapka perengka guna pengerai sereta nyukung pemansang pelajar perubat di Sarawak.

“Lebuh tembu ila, sepital tu deka nyadi pematak dikena nambahka akses ngagai servis pengerai enggau pemansang penau perubat menua tu,” ku iya nengah penerang Facebook sehari tu.

Dulu agi ari nya, iya bejalaika pengawa ngemata ba palan projek dikena meda pejalai komponen pugu nyengkaum begunan sepital besai, PKP, klinik pakar enggau opis penusah ngenyit.

Sama benung diperatika baru iya nya perengka guna sukung baka palan entepan kerita, kandang endur landskap enggau infrastruktur sukung ke bukai.

Nitih ku iya, perintah komited nentuka projek nya tembu nitihka timpuh ngambika palan nya ulih meri penguntung ngagai rayat sereta nyadi palan pematih perubat ti bekualiti di Sarawak.

“Aku mega ngemeratka ngagai semua piak ti bekaul ngambika terus ngenegapka koordinasyen sereta nentuka setiap isu ngaga projek ulih diputar enggau proaktif dikena nentuka pengelanchar pejalai projek,” ku iya. -RBI

JULAU, 14 MAC – Sebengkah program khas udah dilanggur ari baruh kerejasama Parlimen Julau enggau Opis Perengka Pengangkut Jalai (JPJ) nengah inisiatif MyLesen, dikena ngemuntangka rayat Parlimen Julau ngulihka lisin deriba enggau muntang sereta entas.

Kaban Parlimen Julau, Datuk Larry Sng Wei Shien madahka, program tu nagit penyereta ke beumur 16 taun ke atas enggau tagit lebih 1,000 iku.

“Penyereta bepeluang bisi lisin deriba sereta ngasaika bemacham perengkaguna nyengkaum subsidi minyak nitihka syarat ke udah ditetapka enti sida bisi lisin deriba ke entas.

“Sida ke udah bisi lisin ti entas layak ngena servis sabsidi ke bisi disediaka perintah baka BUDI MADANI RON95,” ku iya ke mega Chairman Kaunsil Industri Kayu Ramu Malaysia (MTIB).

Kelimpah ari nya, program tu mega diselit enggau sesi meri penerang pasal undang-undang jalai alun dikena nentuka penyereta meretika tanggungpengawa deriba enggau likun.

Ba hari ke sama, AGM PDK Julau mega bisi diatur.

Ba AGM nya, sekali agi Datuk Larry dichiri nyadi Chairman PDK Julau ungkup penggal kedua (2026–2028).

“Aku ngarapka PDK Julau deka terus ngenegapka aktiviti ninting taun sereta meri pemaik ngagai semua renggat mensia, nyengkaum raban timpang pendiau (OKU) nengah bantu khas ti disediaka.

“Aku ngarapka PDK Julau ngambika nyingkang ke mua sereta ngelatih mayuh agi nembiak nitihka pematut,” ku iya seraya ngemeratka visyen ngangkatka pengelandik enggau pengelantang pendiau komuniti lokal. -RBI

Malaysia ngembuan mayuh macham bansa buah mangga enggau lebih 30 bansa direjista ari baruh kemata Opis Betanam Betupi Malaysia, nyadika buah tropika nya nyadi komoditi ke beguna dalam industri buah menua tu.

Antara bansa ke pemadu dikerindu iya nya Harumanis (MA128) ke tebilang agi enggau nengeri Perlis. Mangga tu dikelala nyadi ikon premium laban ngembuan bau rengut sereta isi ti lichin enggau lembut.

Kelimpah ari nya, bansa Chokanan (MA224) mega nyadi pilih ke pemadu tinggi dalam sektor komersial. Mangga tu ngembuan kulit ti bechura kuning terang lebuh mansau, enggau isi ti tegap agi sereta asai ti manis.

Siti agi bansa premium ke udah tetemuka endur ba makit Asia Tenggara iya nya Nam Dok Mai, ke dikelala enggau tukuh iya ke panjai sereta asai iya ke manis amat. Bansa tu mega suah dikena ngaga jus sereta nyadika pemakai manis.

Ari sukut musin ngasilka, Harumanis selalu diketau entara bulan April enggau Mei lalu ngetanka kulit iya ti gadung taja pan udah mansau, enggau isi ti amat lembut sereta angi. Varieti Masmuda tu bebida nitihka endur tumbuh, ngembuan kulit ti bechura gadung chelum sereta asai manis enggau masam mimit.

Berebak enggau nya, bansa Sala ke tebilang nitihka musin ngembuan kulit ke bechura kuning enggau isi ke manah sereta begulai enggau asai manis sereta masam mimit.

Industri mangga dipeda bejalaika tanggungpengawa ti beguna dalam sektor betanam betupi menua berindik ari peminta makit ti tinggi, kelebih agi ungkup bansa premium baka Harumanis ti ngembuan rega komersial ti tinggi ba makit menua tu enggau antarabansa. -RBI

PETRA JAYA, 14 Mac – Rayat dipinta meretika gaya ke diatu sereta meri kerejasama penuh enggau atur ngelimat belanja ti dipejalaika perintah berindik ari penyarut geopolitik global ti bisi potensi ngeruga ekonomi menua.

Sapit Menteri Besai, Datuk Seri Fadillah Yusof madahka atur ngelimat belanja nya nyengkaum nyekat penemuai semua kaban pentadbiran perintah ngagai menua luar sereta ngasuh semua opis menteri, ejensi enggau kompeni bekaul enggau perintah (GLC) enda ngatur pengawa rumah tebuka beserimbai enggau Aidilfitri taun tu.

“Chara ti jelan iya sereta bejimat ba pengawa melanja benung dipejalaika dikena nyendiaka diri napi ekonomi dunya ti enda tentu berindik ari penyarut ti benung nyadi ba sekeda menua di dunya,” ku Fadillah.

Iya ke mega Menteri Ubah Kuasa enggau Transformasyen Ai madahka jaku tu nengah facebook iya sehari tu tadi.

Nitih ku iya, pemansang geopolitik ke diatu udah meda beberapa penanggul besai nyengkaum perang entara Rusia enggau Ukraine, penyarut entara Afghanistan enggau Pakistan kelimpah ari penyarut ke ngaul Iran, Israel enggau Amerika Syarikat ke bisi potensi ngeruga penegap politik enggau ekonomi dunya.

“Gaya tu mega meri penekul ngagai rentayan bekal global kenyau ari Selat Hormuz nyadi jalai besai ungkup dagang dunya, kelebih agi ungkup minyak enggau gis, kelimpah ari Malaysia begunaka bekal baka baja enggau kereban beguna bukai ari menua luar,” terang iya.

Tandu Fadillah, ba sektor penerebai bilun, bekal minyak bilun ke agi tepekul ba tasik ngujungka rega tikit bilun niki enggau puku rata 90 peratus, lalu enggau nya ngeruga penguna nyengkaum orang Islam ke deka bejalai haji.

“Perintah mega madahka subsidi petrol aja udah manggai RM2 bilion sebulan tauka RM24 bilion setaun enti penyarut majak nyadi, lalu subsidi diesel manggai RM1.3 bilion sebulan.

“Taja pan betapi enggau pemar dunya, Malaysia agi ba penuduk ke manah agi ari sekeda menua bukai lebuh rega minyak domestik agi ulih ditan ba tikas ke baruh agi ari menua sepiak baka Singapura, Thailand enggau Indonesia.

“Taja pia, gaya rega minyak ti mudah agi di Malaysia mega muka ruang ngagai aktiviti mai minyak nengah chara belalai ngagai menua sepiak, nya alai kerejasama rayat amat diguna dikena nentuka pekara tu ulih ditagang,” tandu iya.

Dulu agi ari nya, ba Program Sumbangsih – Santun Kasih Seindah Syawal ke diatur Pergerakan Wanita Parti Pesaka Bumiputera Bersatu (PBB) Pampang N7 Samariang, iya ngingatka rayat ngambika bekelimat sereta bejimat ba pengawa melanja, nyengkaum bekenaka kuasa karan.

Ba program ke sama, iya begulai enggau Datuk Sharifah Hasidah Sayeed Aman Ghazali ke mega Sapit Menteri ba Opis Premier Sarawak (Undang-Undang, MA63 enggau Kaul Nengeri enggau Perintah Besai) sereta Kaban Kunsil Nengeri (ADUN) N7 Samariang, bela nyuaka bantu duit raya enggau bakul pemakai ngagai 150 penerima dikenang ngelempung tating pengidup maya nyambut bulan Syawal ti deka datai.

“Program tu dikearap ulih meri pengaga ati ngagai bala penerima seraya meransang komuniti terus nambahka pengawa nyuaka pemeri sereta bekunsika rezeki sepemanjai bulan Ramadan,” tandu Fadillah. -RBI

MIRI, 14 Mac – Gerempung Sebop Orang Ulu diatu benung dalam proses ngerejista rasmi lalu dipelaba deka direjister bulan baru tu.

Pengawa tu deka nyadi siti singkang dikena ngenegapka agi pangku pengawa ngetanka pengelantang komuniti sereta ngetanka adat enggau main asal bansa Sebop.

Presiden gerempung tu, Adline Teo madah, pengawa nya beguna amat dikena ngenegapka penyerakup entara komuniti Sebop sereta nentuka pesaka enggau identiti budaya terus dijaga ungkup rebak dudi hari.

Iya madah munyi nya lebuh ngulu sesi interbiu enggau Radio WaiFM Miri ti diatur Dj Brenda Yeo, ke alai iya mega nesau raban nembiak ngemeranka tanggungpengawa positif dalam pengawa ngempung mayuh bengkah komuniti suku bansa di Pulau Borneo.

Nitih ku iya, pesan penyerakup ti dikenataika ukai semina ungkup sebengkah suku bansa aja, tang dituju ngagai selampur komuniti di Pulau Borneo, ambika sama-sama ngetanka adat enggau main asal sereta ngerapitka kaul entara semua suku bansa.

Dulu agi ari nya, aum mit ti ngempuruka raban nembiak enggau rebak tuai ari komuniti Sebop udah diatur kena 11 Mac tu tadi, nyadi pemungkal ti beguna ba pengawa ngenegapka penyerakup sereta ngerembaika kerejasama enggau komuniti ti bekaul enggau Orang Ulu di serata Sarawak.

Aum nya ngayanka semengat begulai entara rebak biak enggau tuai agi tegap dalam ngetanka identiti, adat enggau budaya komuniti Sebop.

Sama bisi ngulu sesi interbiu nya Sekretari Gerempung Orang Ulu Sebop, Gilbert Magok, begulai enggau pengari komuniti enggau Sebop.

Iya ngarapka pengawa nya deka nyadi singkang pemungkal nuju pengidup ti manah jemah ila ungkup komuniti Sebop enggau selampur komuniti Dayak di Sarawak. – RBI

MUKAH 14 Mac – Sepenyampau 96 iku individu enggau 88 buah kerita udah diperesa dalam Ops Nagang Jenayah Bersepadu ti dipejalaika Indu Opis Polis Pelilih (IPD) Mukah, malam ensanus nyentuk tumu pagi tadi.

Operasyen nya berengkah pukul 9 malam Hari Lima lalu tembu pukul 2 pagi Hari Enam tu tadi betuaika Inspektor Nazri Harissman Daee ari Bagi Unit Pemansik Jenayah IPD Mukah enggau pengering 23 iku raban.

Sepemanjai operasyen nya, sepenyampau 16 saman dikeluarka ngagai deriba enggau orang ke ngena mutosikal ketegal mayuh macham penyalah trafik.

Operasyen nya ngemeratka sekeda kandang endur ‘hot spot’ ngelingi Bandar Mukah nyengkaum Jalai Mukah–Oya, Jalai Mukah–Balingian enggau Jalai Mukah–Selangau ti mungkur palan berumah, palan komersil, substesyen kuasa karan, menara kompeni telekomunikasyen, rumah panjai enggau palan ngelantangka ati.

Konsep operasyen tu dipejalaika nengah ‘pengawa nyelat jalai’, ‘snap check’ enggau pengawa matau nagang penyalah nyadi ba pelilih menua Mukah enggau Selangau.

Kelimpah ari nya, operasyen nya mega ngembuan tuju deka nyidi aktiviti salah guna dadah sereta nentuka deriba enggau orang ti ngena mutosikal nitihka atur jalai alun.

Polis madahka operasyen ke baka nya deka terus dipejalaika enda ngetu dikena nentuka pemaik enggau pengelantang komuniti seruran dijaga. -RBI

KAPIT, 14 MAC – Pelajar nyadi pelasar ke pemadu tegap dalam nempa pengidup nembiak rebak baru dudi hari, pia ku Kaban Parlimen Hulu Rajang, Datuk Wilson Ugak Kumbong, ti mega ngemeratka pemesai guna penemu dalam nempa rebak dudi hari, kelebih agi ba raban nembiak Baleh.

Ku iya ke mega nyadi chairman Wang Turu Pelajar Baleh, batang pengarap iya ngambika bala anak Baleh terus maju, ngulihka penemu enggau naka ulih sereta dudi ila meri pangka ngagai pemansang komuniti jemah ila di Baleh.

Kena Hari Lima tu tadi, bala nembiak di Baleh nerima insentif pelajar nengah Wang Turu Pelajar Baleh 2025, inisiatif timpuh panjai ti ngembuan tuju nyukung pengawa belajar, ngelempungka tating ruang bilik sereta meransang raban nembiak nampung pelajar sida.

Wang turu tu disukung Sarawak Energy Berhad (SEB) nengah inisiatif Tanggungpengawa Rama Korporat (CSR) dikena meri bantu belanja ngagai nembiak, kelimpah ari ngangkatka pemansang pelajar sereta ngadaka ketuai jemah ila dalam ngiring komuniti.

Ku Ugak, bantu ke diberi nya ngembuan reti ke besai agi ari semina rega belanja laban nya kelai sukung enggau pengandal ngagai potensi anak Baleh.

Kenu ku iya, meda bala anak Baleh nyingkang ke mua nengah pelajar seruran nyadi pengandal enggau juluk iya.

Ugak mega meri pengaga ati ngagai semua penerima insentif sereta ngelalau sida ngambika terus bebendar nyapai penyulut dalam pelajar sereta mulaika diri gawa ke komuniti. -RBI

SARATOK, 14 Mac – Projek DAIF Sarawak (2022) ungkup pengawa ngaga perengka guna ganti penuh di SK Babang Saratok udah nyapai penyulut fizikal 83.34 peratus naka 25 Februari 2026, enggau pengawa nyerahka projek ungkup renggat keterubah 30 April 2026, lalu renggat kedua 31 Oktober 2026 tu ila.

Opis Kereja Raya (JKR) Sarawak dalam penerang ba facebook madah, projek tu ngaul pengawa nukar penuh enggau ngaga perengka guna baru ba sekula nya.

Antara perengkaguna ke digaga iya nya nganti penuh enam bilik kelas, siti unit prasekula, buding nembiak, enam unit rumah pengajar enggau perengkaguna kebukai ba sekula nya.

Skop projek tu mungkur dua renggat pengawa ngaga iya nya renggat keterubah nyengkaum blok baru tiga ringkat ungkup pentadbiran, akademik enggau kantin, blok setingkat ungkup unit prasekula baru, blok buding setingkat, sebuah blok dewan makai, pia mega blok dua ringkat ke endur enam unit rumah pengajar, rumah jaga, palan ngumpul uras, bilik pam, kereja mekanikal enggau karan (M&E), sereta kereja Injinir Sivil enggau Struktur (C&S) ke bekaul.

Berebak enggau nya, pengawa ngaga renggat kedua mungkur pengawa ngaga padang main bol baru enggau kereja ‘landskap’.

Batang penguntung projek tu iya nya nyendiaka kandang endur belajar enggau ngajar ti likun sereta lantang agi ungkup nembiak, pengajar enggau semua staf sekula. -RBI