BALAI RINGIN, 13 Mac — Agih belanja sepenyampau RM50,000 nengah Program Transformasyen Menua Pesisir (RTP) ti dikena ngangkatmanah Balai Mensia Mayuh Rumah Tommy di Kampung Telagus, enggau nya ngenegapka perengka guna komuniti ke guna peranak menua nya.

Kaban Parlimen Sri Aman, Dato Sri Doris Sophia Brodie sehari tu bisi ngelimpangka diri ngabas palan projek ke udah tembu digaga ba rumah panjai ba sitak Kunsil Nengeri (DUN) Balai Ringin.

Penemuai nya betuju deka beratika diri empu asil pengawa bejalaika projek ti dipelanja nengah agih belanja RTP iya ungkup taun 2024, kelimpah ari nentuka perengka guna ti udah diangkatka ulih dikena penuh komuniti setempat.

Berebak enggau nya, penatai iya mega disambut enggau manah peranak Kampung Telagus ti meri pengaga ati ngagai pengawa pemansang ti dipejalaika ba kandang menua nya.

Peranak rumah panjai kelebih agi Biro Indu Kampung Telagus mega bisi nyendiaka bemacham kueh enggau pemakai kelai meri terima kasih enggau pengerami ngagai iya.

Pengerichah enggau semengat diri sebilik ti dibantaika nyata ngayanka kaul rat entara pengari rayat enggau komuniti ngelingi dalam pengawa begulai ngemansangka kandang menua pesisir.

Iya mega ngenataika pengaga ati enggau terima kasih ngagai peranak Kampung Telagus ketegal sambut ti diberi sida ngagai iya lalu ngarapka perengka guna balai mensia mayuh ti udah diangkatmanah nya ulih dikena penuh ungkup mayuh macham aktiviti enggau program komuniti. — RBI

MIRI, 13 Mac — Sapit Menteri Pengerai Mensia Mayuh, Pengawa Berumah enggau Perintah Lokal, Datuk Dr Penguang Manggil dipadu nyadi Chairman Komiti Pengatur Ngintu Gawai Dayak Renggat Sarawak 2026 ungkup nyeraris bemacham program enggau aktiviti serimbai ngintu pengerami besai nya taun tu.

Nya diterang iya empu ba aum media bekaul pengawa ngatur Gawai Dayak Bazaar enggau Ethnocultural Festival serimbai Ngintu Gawai Dayak Renggat Sarawak 2026 ti diatur di Opis Residen Bagi Menua Miri, kena Hari Lima.

Ku Datuk Dr Penguang, sekeda aum udah diatur dikena nyeraris pengawa ngatur program kelimpah nyiri komiti ti deka ngatur bemacham aktiviti sekumbang pengerami nya.

“Pengerami ngintu Gawai Dayak taun ti deka diisi bemacham program main asal enggau pekit ti marit komuniti pupu bansa, lalu ngayanka semangat segulai sejalai sereta pengelain etnik di Sarawak.

“Program besai iya nya Gawai Dayak Bazaar enggau Ethnocultural Festival deka diatur pengelama 23 hari berengkah 1 nyentuk 23 Mei 2026 di Taba Gawai Dayak Bazaar, Permyjaya, Miri,” terang iya.

Iya madah, bemacham aktiviti narit ati deka diatur sekumbang pengerami nya baka pekit karaoke, pekit sape, pekit ngajat enggau betabuh, pekit kuntau, pemerindang live band busking sereta bemacham pekit main asal bukai.

Kelimpah ari nya, pengerami nya mega deka mandangka penyelai ngepan asal Bumiputera ari urung 12 ngagai 15 raban etnik ti bisi di Bagi Menua Miri.

Entara program bukai ti deka diatur nyengkaum pekit Gendang Pampat, Kumang Anembiak Mit, Dayung Sangon, pekit Long Dance, Keligit Orang Ulu, Keling Belawan sereta pekit Kumang Iban ti disadang matak pemekit ari selampur Sarawak.

Pengerami bejadi ditaga 2 Mei 2026, seraya pengawa nangguh kena 23 Mei 2026.

Berebak enggau nya, Datuk Dr. Penguang madah ke pengawa asal Niti Daun deka diatur di Kuching kena 20 Jun 2026 enggau disadang 99 tim ngambi bagi.

Seraya Pengerami Makai Lemai Ngintu Gawai Dayak Renggat Nengeri deka diatur kena 21 Jun 2026 ti disadang digulu bala pemesai menua enggau nengeri nyengkaum Menteri Besai Dato Seri Anwar Ibrahim enggau Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg.

“Nya alai aku mega meransang semua komiti, agensi perintah, gerempung ukai dikuasa perintah (NGO) sereta komuniti lokal meri kerejasama rat ngemujurka pengerami nya,” ku iya.

SIBU, 13 Mac – Sebuah rumah tetap dua ringkat di Jalai Teku diripotka napi pengerusak urung 40 peratus pengudah teparuk enggau penusah angus ti berengkah angus ba dapur, urung pukul 1.30 pagi tadi.

Penusah nya ngujungka sebun asap tebal ba kandang endur berumah, tang nasit api mujur dirara sebedau nyerarai ngagai selampur struktur begunan.

Pengari Palan Gerakan Operasyen (PGO) Opis Bomba enggau Penyah Penusah (JBPM) Sarawak madahka sida nerima kangau ngenyit urung pukul 1.28 pagi.

Seraban semilan iku kaban ari Balai Bomba enggau Penyah Penusah (BBP) Sungai Merah datai ba palan penusah ke nyadi dalam timpuh empat minit aja.

Lebuh datai ba endur nya, raban penyelamat tetemuka api nya kebendar udah mujur dirara peranak tauka mensia mayuh sebedau jentera datai.

“Pengawa meresa tetemuka api dipelabaka bepun ari dapur ba ringkat baruh rumah pemesai 20 x 40 kaki nya.

Api udah dipadam sebedau penatai raban bomba, tang pengawa meresa ke silik agi dipejalaika dikena nentuka gaya nya likun enggau penuh,” .

Taja pan penusah angus nya balat ngerusak dapur tang nadai penusah bakal tauka bebadi nyawa diripotka nyadi.

Semua orang ke nguan rumah nya diripotka selamat.

Raban bomba bejalaika pengawa meresa enggau silik ngena perengka khas dikena nyidi sebarang palan angat ke tau berisiko ngerara api baru sebedau nembuka operasyen. — RBI

BATANG AI, 13 Mac — Komitmen terus ngelawa komuniti bekebun lada diteruska lebuh Direktor Wilayah Sarawak begulai enggau tim ari Lembaga Lada Malaysia (MPB) Opis Pampang Sri Aman bejalaika penemuai lapangan ngagai sekeda ladang lada di sitak Dewan Undangan Nengeri (DUN) Batang Ai enggau Simanggang recent (D).

Penemuai nya ngembuan tuju deka meresa gaya ladang lada terus ba ladang kelimpah ari meri awak ngagai MPB ngaul diri enggau bala pekebun ngambika bulih gambar ti nyemetak agi pasal pemar enggau pemansang industri lada ke diatu di kandang menua nya.

Berebak enggau nya, sesi bejalai kaki begulai enggau orang bumai ari Rumah Anam, Bila Antu Ili, Lemanak mega diatur dalam gaya ti lantang sereta berami.

Sesi nya nyadika pelasar ngagai MPB bekunsika penerang bekaul enggau bemacham inisiatif pemansang industri lada ti diperambu ari baruh Atur Pemansang Malaysia Lumpar Ke-13 (RMK-13).

Entara inisiatif ti dikemerat nyengkaum program Nanam Lada Premium (PLP) enggau Pengurusan Tanaman Lada Matang (PTLM) ti ngembuan tuju deka nambahka produktiviti sereta nentuka pengawa ngatur utai tanam lada lebih sistematik sereta kompetitif.

Chara renggat baruh tu mandangka komitmen MPB ti seruran ngerapitka kaul enggau komuniti bumai kelimpah nentuka pemansang industri lada menua tu majak ngerembai setipak enggau guna enggau realiti renggat baruh.

Program tu mega mandangka pengawa ti majak dipejalaika piak ti bekaul dalam ngenegapka industri lada nyadi siti ari komoditi beguna menua ari baruh kemata Opis Menteri Kebun Bedandang Besai enggau Komoditi. — RBI

SELANGAU, 13 Mac — Siti aum nyeraris pejalai projek di baruh Program Transformasyen Menua Pesisir (RTP) udah diatur ba Opis Pelilih Selangau kena Hari Lima nentuka semua projek dipejalai nitih atur enggau taga ti udah ditetap.

Pegawai Pelilih Selangau, Yalin Asan ngetuai ke aum ti mega digulu Kaban Kunsil Nengeri (ADUN) Tamin, Ir Christopher Gira Sambang.

Aum nya berandauka pengawa nyeraris pejalai projek ngaul sekeda agensi bekaul ti ngempu tanggungpengawa matau sereta ngemata pejalai projek ngambi lanchar enggau nitih langgur.

Entara opis enggau agensi datai baum baka Opis Tanah enggau Survey Sibu, Opis Kereja Raya (JKR) Sibu, Opis Bekal Ai Menua Pesisir (JBALB) Sibu, Kaunsil Pelilih Menua Pesisir Sibu, Komiti Besai Komunikasyen enggau Multimedia Malaysia (SKMM) Sibu, sereta Pegawai ari Palan Servis Kaban Parlimen P.214 Selangau enggau Palan Servis DUN N.59.Tamin.

SAMARAHAN, 13 Mac — Polis benung mansik kes ngenataika pemedis, bakal ba penusah ke nyadi ba Kampung Asajaya Ulu, ditu kena malam 11 Mac tu tadi.

Sapit Ketuai Polis Pelilih Menua DSP Barry Anak William madah, piak polis bisi nerima ripot bekaul enggau penusah nya urung pukul 10.27 malam ari siku lelaki ke beumur 47 taun.

Nitihka penerang iya, orang ke ngaga sebana nya madahka urung pukul 9.30 malam ba hari ke sama, anak iya ditampar siku lelaki menua nya ke dikelala iya, ngujungka nembiak nya bakal ba kuyu kiba.

“Saspek lelaki peranak menua tu beumur 47 taun mega ngaga ripot polis berindik ari penusah nya.

“Pun penusah nya dipelabaka ketegal saspek madahka anak mit nya udah muai angin taya van iya,” ku iya nengah sebengkah penerang.

Ku iya, Polis Diraja Malaysia (PDRM) Pelilih Kota Samarahan udah muka keretas pansik ari baruh Seksyen 323 Kanun Keseksaan ketegal ngasuh bakal.

Enti ditemu salah, individu ke bekaul tau diukum jil nyentuk setaun tauka ukum mata duit nyentuk RM2,000, tauka kedua-dua ukum nya.

Ku iya nambah, keretas pansik nya deka dianjung ngagai Direktor Pendawa Raya Nengeri Sarawak ngambika diberi atur silik pengudah ripot perubat diambi ari sepital ke bekaul.

Berebak enggau nya, iya ngelalau mensia mayuh anang ngaga sebarang petenah tauka ngerembaika penerang ke enda dientaska bekaul enggau penusah nya laban nya tau ngachau proses tasat.

“Raban polis komited nentuka pengelikun enggau pengelantang mensia mayuh seruran dijaga lalu nesau semua piak ti bekaul meri kerejasama penuh ngagai opis bekuasa dikena ngepunka proses tasat,” ku iya. -RBI

MIRI, 13 MAC – Balai Bomba enggau Penyah Penusah (BBP) Lutong nerima pemeri 50 bungkus bubur lambuk ari Miri Marriott Resort & Spa dalam program komuniti ke diatur ba BBP Lutong Equipment Bay kena Hari Lima tu tadi.

Ketuai Balai Bomba enggau Penyah Penusah Lutong, PBT II Henry AK Jugah madah, program nya sebagi ari inisiatif Program Berkhidmat 360 – Berbuat Baik Dalam Setiap Arah, ke ngembuan tuju ngerapitka kaul entara ejensi penyelamat, komuniti enggau sektor korporat.

Nitih ku iya, pemeri nya amat diterima sereta mandangka sukung komuniti ti seruran meri sukung ngagai raban bomba ti seruran sedia meri servis ngagai komuniti.

“BBP Lutong ngenataika pengaga ati enggai terima kasih ngagai Miri Marriott Resort & Spa ke pemeri bubur lambuk, ke lalu nyungkak semengat begulai entara komuniti enggau raban bomba,” ku iya lebuh dikerandau pengudah tembu program nya.

Ba pengerami pandak nya, pengawa nyuaka 50 bungkus bubur lambuk udah disuaka pengari Miri Marriott Resort & Spa ngagai PBK II Awang Arizal Bin Awang Affandy ke nyadi pengari ari Tim Bravo BBP Lutong.

Program tu mega digulu 16 iku pengereja pengawa Miri Marriott Resort & Spa ti betuaika Nana Chan ti nyadi Direktor Sumber Mensia serikat nya.

Entara pemesai BBP Lutong ke bisi datai iya nya PB Francklin Jerry, PBB Gabriel AK Ghundi, PBB Nashrulhisyam Bin Kudri, PBB Abang Azri Bin Abang Raya enggau PBB Georgetian Bin Guden. -RBI

BINTANGOR, 13 Mac — Sempama “sekali ampun bah, semaki pantai berubah” amat betul nerangka ubah pemansang ke diatu diasaika peranak Kampung Pemanca Legak, Telok Pajar, Selidap.

Nitihku siku peranak menua nya, Nicholas Abu Seman, nengah penerang ti dikunsika iya, kala kelia peranak ba kandang menua nya semina bepanggai ba jematan bebelika barang aja nyadika batang jalai tama pansut ari genturung pendiau sida.

Ku iya, jalai nya semina ulih ditengah ngena mutosikal lalu suah tekeruga maya ai pasang raya nyadi, lalu ngujungka peranak pedis mindah sereta bejalaika pengawa sida ninting hari.

“Taja pia, gaya diatu udah berubah lebuh perengka guna jalai alun ke manah agi disediaka, lalu enggau nya meri pengelantang ngagai peranak menua tu” ku iya.

Nengah pemisi perengkaguna tu, peranak diatu ulih ngena perengka pengangkut baka kerita dikena ngangkut barang sereta bejalaika aktiviti ninting hari enggau muntang sereta lantang agi.

Nambahka nya, penanggul jalai nya ampuh ai pasang besai ke sebedau tu suah ngeruga pemindah peranak diatu ukai agi nyadi isu baka ke dulu suba.

Berindik enggau nya, iya meri besai terima kasih ngagai perintah ke udah bebendar nyendiaka perengka guna infrastruktur ke manah agi ngagai rayat, kelebih agi ngagai peranak ke diau di menua pesisir baka Kampung Pemanca Legak, Telok Pajar, Selidap.

“Terima kasih ngagai perintah laban udah nyendiaka perengka guna ke chukup manah ngagai rayat, kelebih agi peranak ke diau di menua pesisir baka Kampung Pemanca Legak, Telok Pajar, Selidap,” ku iya. — RBI

SIBU, 13 Mac — Siku lelaki mujur ditangkap pengudah dipechayaka ngelantak enam buah entukar ke bukai dalam penusah bebadi jalai alun ke nyadi ba Jalai Wong Soon Kai ditu, urung pukul 9.55 malam ensanus.

Bagi Pansik enggau Penerit Adat Trafik, Indu Opis Polis Pelilih (IPD) Sibu madahka penusah nya mungkur tujuh buah entukar.

Pansik keterubah tetemuka sebuah kerita Toyota Vios ke dideriba siku lelaki peranak menua nya beumur 24 taun benung bejalai lurus nuju simpang lampu trafik ba jalai ke dikerandauka nya.

Taja pia, lebuh ti semak enggau simpang jalai nya, entukar nya dipelabaka enda ngetu ba lampu trafik sebedau ngelantak enam buah entukar bukai ba mua iya.

Taja pan eksiden nya enda balat bakal, tang semua perengka pengangkut ke bisi enggau nya diripotka balat bakal ba tubuh sida.

Deriba kerita Toyota Vios nya udah ditan ngambika ulih mantu pansik.

Pemutus peresa ai kemi keterubah tetemuka lelaki nya positif amphetamine.

Berindik ari penusah nya, keretas pansik udah dibuka ari baruh Seksyen 42(1) Akta Perengka Pengangkut Jalai 1987 ketegal deriba enggau enda beradat sereta tau mai penusah ba jalai mensia mayuh.

Enti dikenuku salah, deriba nya ulih diukum jil nyentuk lima taun enggau ukum mata duit enda kurang ari RM5,000 enggau enda lebih ari RM15,000, kelimpah ari dibuai megai lisin deriba dalam timpuh ambis nadai dua taun.

Nitihku Pemangku Ketuai Polis Pelilih Sibu, SUPT Boniface Anak Bajai, pansik silik agi dipejalaika dikena ngelala kebuah kebendar penusah nya nyadi. — RBI

KUCHING, 13 Mac – Aktivis Sarawak, Peter John Jaban ngansak pengelicha Solehah Yaacob ngetu ngerembaika dawa sejarah ti dikumbai iya nadai pelasar laban tau ngeruga pemanah akademik Malaysia sereta nyaru runding mensia mayuh.

Dalam siti penerang, iya mantaika pengirau ati bekaul enggau penerang ti dikaitka enggau Solehah ti didawa ngelakuka sejarah ti nadai bukti ti tegap.

Nitih ku Peter John, pekara tu ukai semina ulih nipu mensia mayuh, tang mega tau mai risiko ngemalu palan pelajar tinggi menua tu.

Peter John Jaban nyemetak madahka dawa ti ngait bujang berani Iban, Rentap nyadi sebagi ari ‘naratif’ Melayu enda betul sereta enda bebasaka identiti enggau pesaka asal komuniti Iban di Sarawak.

Kenu ku iya, Rentap mengkang nyadi kelai pengawa enggau temegah ati komuniti Iban.

Sebarang pengawa nguji deka nerangka baru tauka nguna sejarah tokoh nya enggau nadai bukti ti tegap dianggap nadai tanggungpengawa sereta ngasuh komuniti ringat.

Iya mega nyemetak madahka individu ti ngaga dawa nya pakar dalam jaku Arab enggau linguistik, ukai pakar sejarah, antropologi tauka pakar dalam budaya bansa asal Borneo.

Nya alai, ngerembaika dawa sejarah enggau nadai pansik ti entas tau ngelemika tikas akademik.

Kelimpah ari nya, iya madahka universiti patut negika integriti intelektual nengah pansik ke silik, metodologi ke manah sereta bukti ke dipansik.

“Pekara ti nyelai enti nadai sukung bukti ti tegap, tau ngelemika pengarap mensia mayuh ngagai institusyen akademik,” ku Peter John nyemetak.

Berindik enggau nya, iya ngansak raban pengatur Universiti Islam Antarabansa Malaysia ngambi atur ti tegap sereta bisi tanggungpengawa dikena nentuka bala staf iya nitihka standard profesyenal sereta enda mansutka penerang ba mua mayuh ti tau ngeruga kredibiliti institusyen nya.

Peter John Jaban ke mega pemungkal Dayak Rights Action Force (DRAF), nyemetak madahka rayat Sarawak amat ngemeratka pesaka sejarah sida lalu nulak sebarang pengawa deka ngelimpang tauka nulis baru sejarah tokoh menua tu.

Iya mega ngingatka nama akademik Malaysia meseti dijaga lalu universiti patut dikelala nengah penyulut pansik, ukai nengah dawa ti nadai disukung enggau bukti. -RBI