MELAKA, 17 Mac – Siku indu diukum jil pengelama tujuh taun ulih Kort Sesyen Ayer Keroh sehari tu pengudah ngaku salah ngereja ngachau chara seksual ngagai anak iya empu dua taun ke udah.

Orang ke dituduh beumur 44 taun nya nyadi orang ke bisi kaul pengarap, iya nya indai kandung, sengaja ngereja pengawa salah seksual fizikal ngagai siku nembiak lelaki beumur lapan taun.

Pengawa tu digaga enggau chara ti enda patut ngagai anak mit nya ungkup tuju seksual ba sebuah rumah di Taman Peruna, Sungai Udang, pelilih tengah Melaka ditu, urung pukul 10.30 malam ujung bulan Disember 2024.

Tetuduh ke mega indai tunggal taja pia dalam apil iya minta ukum jil ke pandak agi laban iya patut ngidupka ketiga -tiga anak iya pengudah nembuka ukum iya.

Kort udah nya ngukum iya tujuh taun jil berengkah ari haribulan iya ditangkap kena 3 Mac tu tadi.

Sumber enggau gambar kredit Malaysia Gazette

MIRI, 17 Mac — Sepenyampau 400 kontena bubur lambuk udah disadung ngagai staf Sepital Miri kelai terima kasih ngagai servis enggau komitmen sida dalam meri servis pengerai ngagai komuniti.

Pengawa nyuaka nya sebagi ari Program Roadshow Bubur Lambuk ke diatur SABERKAS Pampang Pujut ke diatur ba laman Lobi Blok A sepital nya, ke digulu Kaban Kunsil Nengeri (ADUN) Pujut, Adam Yii Siew Sang.

Program tu ukai semina betuju meri terima kasih ngagai pengorbanan raban sepital, tang mega dikena ngerichahka agi pengerami ngintu bulan Ramadan sereta ngerapitka kaul entara komuniti enggau pengereja pengawa pengerai.

Raban pengatur mega meri besai terima kasih ngagai semua piak ti bisi kaul ngemujurka program nya. — RBI

MIRI, 17 Mac – Projek ngaga palan entepan kerita baru ba Begunan FORUM ditu ke beungkus RM966,896.60 udah tembu penuh kena 3 Oktober 2025 pengudah diserah ngagai kunteriktor kena 11 Julai 2025.

Pengawa bejalaika projek nya meda penambah 155 palan endur entepan kerita baru, lalu enggau nya nambahka penyampau kapasiti ngagai 255 palan dikena nangkup peminta penguna ke majak nambah.

Sapit Menteri ba Opis Premier Sarawak (Kuasa Kerja, Imigresen enggau Pematau Projek), Datuk Gerawat Gala madah, palan nya siti singkang ke beguna dalam ngangkatka pengelantang mensia mayuh, kelebih agi bala temuai enggau penyuwa begunan nya.

“Penambah palan entepan ti lebih teratur sereta chukup ukai semina ulih mantu ngurangka penyekut, tang mega ulih ngemanahka agi arus trafik ba kandang ngelingi,” ku iya lebuh bejadika palan nya sehari tu.

Nitihku iya, inisiatif nya mandangka komitmen perintah ti seruran bejalaika pengawa ngemanahka infrastruktur mensia mayuh ti lebih sistematik, likun sereta ‘mesra’ penguna, setipak enggau guna pemansang mengeri ti majak jampat.

Ku iya nambah, fasiliti nya dikearap ulih meri empas ke manah ngagai aktiviti ekonomi kandang menua sereta ngangkatka imej Begunan FORUM nyadi palan ke lebih kondusif sereta efisyen.

Berebak enggau nya, iya mega ngenataika pengaga ati ngagai semua piak ti bisi kaul ngemujurka projek nya lalu ngarapka perengka guna ti disedia ulih dikena enggau penuh sereta diintu enggau manah ungkup pemaik begulai. -RBI

Malam ti rami ba Meritz Hotel Miri nyadi saksi kenang besejarah lebuh pekit Miss Heritage Sarawak 2026 ngemataka Ratu keterubah iya dalam gaya ti penuh enggau elemen elegan, pesaka enggau temegah ati bekaul budaya, apin lama ke udah.

Ngena peluang tu, Ruai Berita Iban ngerandau sekeda sida ti teulihka pemujur ba pekit nya.

Pengudah nengah renggat nyediaka diri enggau terit, latih tambah enggau pemerindang kepenudi ti ngalitka ati, Jessie Ulung Jeffry dipadu nyadi champian, lalu enggau nya megai tanggungpengawa nyadi duta ungkup budaya enggau komuniti Sarawak.

Penuduk lumur dua diempu Stacy Rosedyana Sigar lalu ditangkanka Chelsea Inez Aran Kong ba penuduk lumur tiga, lalu Phynterliana Agatha Lambeh enggau Jane Pidang Kase bela ba lima penuduk pemadu atas.

Pemenang nya ukai semina ngaku elegan, tang mega ngayanka komitmen bala penyereta ngetanka pesaka asal.

Jessie Ulung Jeffry nyemetak madahka pemujur nya muka ruang dikena meri kelala budaya komuniti iya ke kurang dikelala ngagai mensia mayuh.

“Aku meda pelasar nya nyadi medium ti beguna dikena bekunsi sereta mantaika penyelai pesaka asal, seraya ngelakuka penyelai budaya Sarawak ti kaya enggau main asal sereta identiti iya empu,” ku iya.

Pengawa nya nitih ku iya, dikearap ulih meri penyedar sereta nerenakka asai temegah ati ngagai komuniti nuju pesaka asal nengeri tu.

Berebak enggau nya, Stacy Rosedyana Sigar nerangka penyereta iya nyadi peneleba ti chukup berega, kelebih agi peluang begulai enggau penyereta bukai ari mayuh macham pupu bansa.

“Peneleba nya ngasuh aku nemu penyelai main asal sida empu, lalu enggau nya ulih ngenegapka agi pengangkun aku ngagai pengaya pesaka asal Sarawak,” ku iya nerang.

Ba Chelsea Inez Aran Kong, pesaka main asal Sarawak mesti terus diintu ngambika enda dilalaika singkang jeman.

Iya nyemetak madahka pesaka tu nyadi pelasar penumbuh identiti komuniti kemaya hari tu, lalu rebak baru bejalaika tanggungpengawa ti beguna dalam nentuka iya terus dipejalaika.

“Bepegai ba jaku sempama “enti nuan enda nemu, nuan enda rindu”, aku pechaya, pengawa meri kelala enggau dalam pasal pesaka asal deka nerenakka asai temegah ati enggau tanggungpengawa ngetanka iya ungkup rebak dudi hari,” ku Chelsea madah.

Ungkup selampur, pengawa ngatur Miss Heritage Sarawak 2026 ukai semina nyadi panggau dikena ngerami pemajik enggau penau, tang mega nyadika pelasar ke besai reti dalam ngangkat, ngetan sereta ngelakuka pesaka asal Sarawak ngagai tikas ke tinggi agi. -RBI

SPAOH, 17 Mac — Sebuah begunan lama endur Balai Polis Lama Spaoh angus ba penusah angus ti diripotka nyadi urung pukul 3.15 lemai sehari tu.

Nitihka penerang ari Angkatan Pertahanan Awam Malaysia (APM) Spaoh, sepenyampau 12 iku raban Lain-lain Pangkat (LLP) udah dianjung ngagai palan penusah nya mantu operasyen madamka api, berindik ari endur begunan nya besemak enggau Opis APM Spaoh.

Operasyen nya mega mungkur tim ari Balai Bomba enggau Penyah Penusah Opis Bomba enggau Penyah Penusah Malaysia (JBPM) Betong ti mungkur siku pemesai enggau empat iku raban LLP begulai enggau sebuah entukar Tender Penyah Penusah Bomba (FRT).

Kelimpah ari nya, empat iku raban bomba volunteer, tiga iku kaban RELA enggau empat iku raban polis begulai enggau dua iku pemesai bela ngaul diri dalam operasyen nya.

“Begunan ke digaga sepenuh iya ari kayu dipelabaka 80 peratus angus ketegal penusah angus nya.”

“Nadai penusah bebadi nyawa diripotka nyadi lalu operasyen madamka api bejalai enggau lanchar,” ku penerang nya.

Penerang nya nambah, kebuah penusah angus nyadi agi dipansik piak bekuasa. — RBI

Sumber, photo — Apm Spaoh

MIRI, 16 Mac — Polis udah nangkap siku lelaki peranak menua tu ke dipelaba nyerungkai jamban orang indu sereta ngerikod video siku indu ba penusah ke nyadi ba sebuah kedai besai di Miri.

Ketuai Balai Polis Miri, ASP Goldy Anak Jangan madah, pengawa nangkap nya digaga urung pukul 2.00 lemai ba Lorong 8A, Permy Technology Park ari raban Balai Polis Sentral Miri begulai enggau kaban Pampang Nagang Penyalah (CPJ).

“Saspek diatu benung ditan ba ‘lokap’ Balai Polis Sentral Miri ngambika ulih mantu pengawa mansik silik ari baruh Seksyen 509 enggau Seksyen 377D Kanun Keseksaan,” ku iya ba sebengkah penerang.

Iya nyemetak madahka polis beratika enggau berat sebarang pengawa ti ngeruga privasi enggau pengelikun mensia mayuh, kelebih agi orang indu ba palan mensia mayuh.

“Atur ti terit deka dipejalaika ngagai sebarang individu ti ngereja pengawa jenayah nitihka undang-undang ti dikena,” ku iya.-RBI

KAPIT, 17 MAc – Perintah Sarawak udah ngelancharka enggau rasmi Bantu Barang Pemun Sarawak (SKAS) 2026 ungkup Bagi Menua Kapit, ti nyadika pemujur besai dalam misyen nengeri tu ti benung dipejalaika dikena ngelempungka ungkus pengidup sereta ngangkatka pengelantang rayat.

Pengerami ngelanchar renggat Bagi Menua nya dipenyadika Datuk Jefferson Jamit Anak Unyat, Sapit Menteri ba Opis Premier Sarawak (Undang-Undang enggau Adat Bansa Asal) ke mega Kaban Kunsil Nengeri (ADUN) N.63 Bukit Goram.

Pengerami nya bela digulu ADUN N61 Pelagus Wilson Nyabong Ijang , Pemesai Pelilih Kapit, Thomas Geoffrey Kendawang, Chairman Kaunsil Pelilih Kapit, Ir. Lawrence Andy sereta ketuai komuniti enggau ketuai raban bansa (KMKK).

Program SKAS iya nya pengawa ngempung teknologi digital nengah SPay Global. Penerima ke layak deka nerima bantu dalam tukuh baucher digital, ngemendarka proses ngagih ke lebih terang, efisyen, sereta sistematik.

SKAS iya nya inisiatif pengelantang pendiau ari Perintah Sarawak ti dilangkar dikena nyendiaka jalai pengelikun ungkup raban ti mudah kena tinggang penusah.

Iya ngemeratka pengawa nyendiaka barang ke diguna nengah langkar moden, digital dikena nentuka integriti enggau pengelantang dikena semua rayat Sarawak.

Ba jaku pengelalu iya, Jamit nyemetak madahka chara tu setipak enggau Strategi Ekonomi Digital Sarawak, nentuka bantu perintah datai ba renggat baruh enggau nadai penanggul birokrasi.

“Pengawa bejalaika SKAS ngayanka komitmen perintah nengeri ti enda bebatak asur nentuka nadai orang tinggal dalam pejalai kitai nuju status nengeri bepenatai pemisi tinggi manggai ba taun 2030.

“Nengah chara ngena SPay Global, kami ukai semina meri bantu tekala nya ungkup barang ti beguna tang mega meri kuasa ngagai komuniti menua pesisir ngambika ulih angkunka ekonomi digital,” ku Jamit.

Jamit mega nerangka tuju SKAS iya nya dilangkar khas nagit nyendiaka belanja ungkup ruang bilik ke kurang penatai pemisi (B40), dikena meli barang pemakai ke beguna sereta utai ke diguna ba ruang bilik.

SKAS mega ngembuan tuju deka nentuka peranak ba pelilih menua ulu, baka Kapit, Pelagus, enggau Bukit Goram, bisi akses ke sama rata ngagai inisiatif pengelantang nengeri seraya dalam timpuh ke sama, meransang ekonomi menua tu nengah chara meransang belanja penguna ba pekedai menua tu ke ngambi bagi enggau premis runchit.

​Sapit Menteri nya mega meri puji ngagai Opis Residen Kapit enggau Opis Pelilih Kapit ketegal kerejasama sida.

Iya nyemetak madah, pemujur program ke baka nya balat bepanggai ba chara “ngabas ngagai renggat baruh” (on-the-ground) ari pengari rayat enggau penyereta ke chakah ari bala KMKK nyadung penerang ke betul ngagai rumah panjai enggau palan pengentap pendiau. – RBI

PARIS, 17 Mac – Legenda main bol Eric Cantona ngaga perambu undang-undang entarabansa ti deka minta sebarang presiden tauka ketuai menua ti ngepunka perang nyadi orang keterubah beperang ba garis mua.

Ex-bintang Manchester United enggau Perancis nya madahka, pengawa nya ulih ngasuh ketuai politik betanggungjawap agi ba pemutus sida, ke bisi potensi ngurangka konflik besenyata.

“Aku deka ngaga undang-undang… enti sema siku presiden mutuska deka ngepunka perang, iya patut nyadi orang keterubah mansang ngagai garis mua, ari ke nganjung nembiak ke beumur 18. Enti baka nya, aku berunding deka kurang agi perang,” ku iya lebuh mantaika diri ba randau televisyen Perancis Clique.

Dalam randau nya, Cantona bebendar madahka bala ketuai enda patut ngaga pemutus perang enti nadai ngasaika risiko nya empu ba padang beperang.

“Sida benung megai pengawa, udah nya kitai nganjung nembiak ke beumur 18 taun leso ninggalka rumah sida.Ba sepiak bukai, bisi sida ke bedau manggai umur 18 taun pan indah nembiak ke nadai penyalah pan nyadi tasah,” ku iya.

Penerang nya dipansutka lebuh penyarut geopolitik global majak nyadi kelebih agi ngaul Amerika Syarikat enggau Israel ngelaban Iran, ke udah pulai nyadi perati dunya dalam timpuh ke semak tu.

Cantona mega dikelala nyadi siku ari orang ke pemadu terang bejaku ba isu Palestin, kelimpah ari ke suah mantah utai ke dikumbai iya “dua standard” dalam pengawa merintah dunya.

Kena bulan September 2025, iya mega nanya pengawa FIFA enggau UEFA dalam ngantung Rusia, tang enda ngambi singkang ke sebaka ngelaban Israel.

Sumber Malaysiakini

JULAU, 17 Mac – Projek ngaga jalai ari Jalai Nanga Lasi ngagai Suchong enggau Balut ke beungkus RM82 juta udah dipunka sehari tu nengah pengawa nasih tanah enggau sesi randau ke diatur.

Nengah projek nya, pengawa ngaga jalai sepemanjai urung 8.5 kilometer deka dipejalaika nitihka Standard Jalai JKR R1 berengkah ari Jalai Lasi ke diatu nuju kandang menua Suchong enggau Balut.

Pengawa nasih jalai ungkup projek nya udah dipenyadika Kaban Kunsil Nengeri (ADUN) Meluan, Datuk Rolland Duat Jubin seraya disempulang Injinir Bagi Opis Kereja Raya (JKR) Bagi Menua Sarikei, Ir Ts Kennedy anak Kedo.

Skop projek nya mega mungkur pengawa ngaga enam buah jematan semin tegap, sistem parit enggau entali ai sereta mega pengawa masang perengkq jalai enggau kereja bukai ti bekaul dikena nentuka pengelikun enggau pengelantang penguna.

Projek tu dipejalaika Sara Muhibbah Sdn. Bhd nyadi kunteriktor besai enggau timpuh bejalaika pengawa 36 bulan, lalu Jurutera Infrareka Sdn. Bhd dipadu nyadi penyanding penemu sivil enggau struktur.

Pengawa bejalaika projek tu dikearap ulih meri pemaik ke besai ngagai peranak menua nya nengah penambah aksesibiliti, perengkaguna komunikasyen sereta nyungkak pemansang sosio-ekonomi di kandang menua Julau enggau kandang menua ngelingi nya. -RBI

Gambar kredit Haiqal Mokhtar, Izhar & Syahiran

KAPIT, 17 Mac – Dua Ketuai Ruang Bilik (KIR) ti ngaul enam iku orang tasah laban penusah angus di Kampung Baru ditu nerima pemeri diri sepenyampau RM2,000 dikena mantu ngelempungka tating penusah sereta meli barang ke diguna pengudah lenyau rumah.

Pemeri nya dibantaika Sapit Menteri ba Opis Menteri Besai Sarawak (Undang-Undang enggau Adat Bumiputera), Datuk Jefferson Jamit Unyat, ti nemuai seraya meri penyinu ngagai penusah ke nuntung ruang bilik ke tasah nya.

Ba penusah angus kena pagi Hari Enam tu tadi, sebuah rumah setengah kayu udah angus lengis.

Api nya mega nyerarai ngagai Masjid Jamek Kampung Baru Kapit ngujungka pengerusak balat nyadi kelebih agi ngagai atap.

Berebak enggau nya, Jamit mega bisi meri agih belanja sepenyampau RM20,000 nengah Projek Transformasyen Menua Pesisir (MRP) ungkup kereja ngemanahka masjid nya.

Iya ngarapka bantu nya ulih ngelempungka tating sida ke tasah sereta ngenyampatka pengawa mulaika baru perengka guna mensia mayuh ke udah kena penusah nya. – RBI