BAU, 27 Feb — Sepenyampau 13 iku lelaki beumur entara 21 ngagai 35 taun ditangkap dalam operasyen bersepadu ti dipejalaika raban Bagian Pansik Jenayah Narkotik begulai enggau Indu Opis Polis Pelilih Menua ari urung pukul 5.30 pagi nyentuk 9.30 pagi ba kandang pelilih Menua Bau, ditu kemari.

Ketuai Polis Pelilih Bau, P/Supt Mohd Haide bin A. Rahman, madahka operasyen nya mujur nangkap semua saspek ke dipelaba bisi kaul enggau aktiviti salah guna dadah asil ari pengawa peresa ngenyit enggau meresa ba endur ke ditagit.

Nitihku iya, dua ari saspek nya ditan ari baruh Seksyen 12(2) Akta Dadah Berbahaya 1952 pengudah tetiap iku sida ditemu ngembuan bungkus plastik lutsinar ti ngundan gumpal kristal ti dipelaba syabu.

“Asil peresa ai kemi keterubah tetemuka semua 13 iku saspek ditemu positif dadah lalu sida ditangkap ari baruh Seksyen 15(1)(a) akta ke sama dikena mantu pansik ke silik agi,” ku iya ba sebengkah penerang.

Iya nyemetak madahka Polis Diraja Malaysia enda bekompromi ba sebarang pengawa ngaul diri dalam aktiviti salah guna dadah lalu deka terus chakah agi bejalaika operasyen neritka atur ari sesiti maya ngagai sesiti maya.

Mensia mayuh ke bisi penerang bekaul enggau aktiviti dadah tau ngenataika penerang nya ngagai Opis Tasat Jenayah Narkotik di Bukit Aman nengah lumur 012-208 7222 tauka betanya ngagai talipaun Indu Opis Kontinjen Polis Sarawak ba lumur 017-592 9211. — RBI

BINTULU, 27 Feb — Siku lelaki bebadi nyawa pengudah van ke dideriba iya eksiden ba jalai besai besemak enggau Sepital Columbia Asia, Bintulu, ditu kemari.

Mansa beumur31 taun nya, dientas lesi ba palan penusah nyadi ketegal balat bakal pengudah entukar ke dideriba iya dipelabaka enda ulih dijaga sebedau ngelantak pun kayu ba tisi jalai ba penusah nya urung pukul 10.25 pagi.

Pengari Opis Bomba enggau Penyah Penusah Sarawak madah, seraban raban ari Balai Bomba enggau Penyah Penusah Bintulu berumban ngesah ke palan penusah nyadi pengudah nerima kangau ngenyit.

Nitihku penerang nya, raban penyelamat ngena perengka khas mansutka mansa ke tepekul ba penuduk deriba.

Taja pia, raban perubat ari Opis Menteri Pengerai Malaysia ngentaska mansa lesi ba palan penusah nyadi.

Tubuh mansa udah nya diserah ngagai polis ngambika atur silik agi dipejalaika.

Kebuah kebendar penusah tu nyadi agi benung dipansik piak bekuasa. — RBI

SRI AMAN, 27 Feb — Pengawa jampat raban Opis Bomba enggau Penyah Penusah Malaysia mujur napi penusah pun kayu tumbang ngempang jalai ba Jalai Taman Harmoni, Sri Aman, pagi tadi.

Palan Operasyen nerima kangau ngenyit bekaul enggau penusah nya urung pukul 7.54 pagi sebedau tim raban enggau Fire Rescue Tender (FRT) enggau unit EMRS dianjung ngagai endur ke bepalan urung satu kilometer ari stesyen nya.

Operasyen nya betuaika PBK I (TBK I) Mohd Fadhli Buyong. Lebuh datai ba endur nya, raban nya tetemuka pun kayu ke tumbang ngempang jalai.

Raban Bomba tekala nya beratika gaya enggau ngena perengka pengelikun diri penuh sebedau bejalaika pengawa ngupas sereta netak nyentukka penanggul nya diputarka.

Operasyen nya mega nerima bantu ari tiga iku raban Angkatan Pertahanan Awam Malaysia enggau pengari ejensi ke bekaul.

Nadai bakal diripotka nyadi sereta nadai komplikasyen nyadi sepemanjai operasyen nya.

Pengudah nentuka gaya nya likun bendar sereta nadai risiko penusah bukai, tim operasyen nembuka pengawa sida lalu pulai ngagai stesyen. — RBI

BINTULU, 26 Feb — Polis Diraja Malaysia (PDRM) mujur nangkap 10 iku lelaki nyengkaum lapan iku peranak menua tu empu enggau dua iku peranak Indonesia dalam operasyen bersepadu ngelingi Bintulu, Sarawak kena 25 Februari tu tadi.

Semua saspek ke beumur entara 26 ngagai 54 taun dipelabaka bisi kaul enggau aktiviti gian enggau salah guna dadah.

Pemutus peresa polis keterubah tetemuka semua individu ke bisi kaul positif dadah bansa methamphetamine enggau amphetamine.

Pansik tetemuka siku saspek dipansik ari baruh Seksyen 39A(1) Akta Dadah Berbahaya 1952, siku agi ari baruh Seksyen 12(2), lalu lapan iku saspek ke bukai benung dipansik ari baruh Seksyen 15(1)(a) akta ke sama.

Enti diukum, Seksyen 39A(1) nyendiaka ukum jil nyentuk lima taun enggau sipat enda kurang ari tiga kali.

Ungkup penyalah ari baruh Seksyen 12(2) enggau Seksyen 15(1)(a), pesalah ulih diukum mata duit nyentuk RM5,000 tauka dijil nyentuk dua taun, lalu penyalah ari baruh Seksyen 15(1)(a) mega bisi nyendiaka timpuh matau pengelama dua taun.

Ketuai Polis Pelilih Bintulu, Nixon Joshua Ali madah, pengawa nangkap sida nya sebagi ari pengawa polis ke seruran dipejalaika dikena ngelaban pengawa salah guna dadah sereta nagang aktiviti jenayah di pelilih nya.

Iya mega ngelalau mensia mayuh ngambika ngenataika penerang bekaul enggau aktiviti dadah ngagai Bilik Gerakan IPD Bintulu ba lumur 086-318304 tauka Bahagian Tasat Jenayah Narkotik IPD Bintulu dikena mantu opis bekuasa bejalaika pengawa nangkanka nya. — RBI

KUCHING, 26 Feb — Perintah Sarawak nyendiaka Bantu Pengasih Pemati (BIK) sepenyampau RM1,800 ngagai pemegai Kenyalang Gold Card (KGC) ke layak ke udah mati, nyadi inisiatif pengasih dikena mantu ngelempungka tating ruang bilik ke ditinggalka.

Nitihka penerang ti dipansutka Servis Sarawak, peminta bantu nya dibuka ngagai pemegai KGC ti berejista enggau syarat niang nadai nerima bantu pemati ari Opis Perkhidmatan Awam sereta ukai peranak institusyen perintah.

Peminta meseti dianjung dalam timpuh empat bulan tauka 120 hari ari haribulan pemati.

Entara dokumen ke dipinta iya nya surat pemati, salin akaun bank penerima enggau salin kad pengelala tauka pasport penerima.

Peminta ulih digaga nengah ‘online’ nengah portal rasmi Servis Sarawak lalu proses peminta enda bebayar.

Mensia mayuh ti begunaka penerang silik tau betanya ngagai lumur 082-374888 tauka email ngagai [email protected]. — RBI

MELAKA, 26 Feb – Siku nembiak Primari 6 dipelaba kena kachau seksual, ditinggal ba babas semak sekula iya, kena Hari Tiga nyin tadi.

Nembiak nya sebedau tu udah diripotka lenyau lalu ditemu urung pukul 7 malam benung nyabak laban takut.

Nitihka penerang ari dibantaika sebengkah portal berita menua tu, nembiak nya ditemu lenyau lebuh siku pengajar sekula nya meda iya enda nurun kelas tambah pengudah sesi sekula tembu urung pukul 1.05 lemai.

“Pengawa ngiga tudah udah dipejalaika lalu pengawa meresa sistem televisyen litar tertutup (CCTV) sekula tetemuka tudah pansut ari kandang sekula urung tengah hari.

“Nembiak nya madahka diri pansut ari sekula pengudah tepedaka sebuah kerita ke dipelabaka enggi indai iya.

“Taja pia, iya pansut baru pengudah nemu kerita nya dipasang siku lelaki ke enda dikelala,” ku iya.

Sumber madahka tidah nembiak nya tekenyit lebuh lelaki nya ngagai iya ngujungka nembiak nya belanda nuju babas ngiga endur belalai.

Taja pia ku iya, saspek mujur tetemuka tudah sebedau ngasuh iya muka pekayan, lalu mega dipelabaka negu kuyu sereta ngambi beberapa iti gambar sebedau pansut ari endur nya.

Nitihka penerang sumber mega, sida nembiak nya sebilik tetemuka iya lalu dibai ngagai Sepital Melaka ngambika diperesa enggau silik agi.

Berebak enggau nya, Ketuai Polis Pelilih Melaka Datuk Dzulkhairi Mukhtar lebuh dikerandau ngentaska penusah nya lalu kes nya dipansik ari baruh Seksyen 14(a) Akta Penyalah Seksual Terhadap Nembiak Mit 2017. -RBI

SELANGAU, 26 Feb — Dua iku lelaki diripotka bakal ba penusah eksiden kediri ti ngaul sebuah entukar Perodua Aruz ba Simpang Bukut, Jalai Selangau/Mukah, lemai tu tadi.

Nitihka penerang ari Angkatan Pertahanan Awam Malaysia (APM) sida nerima kangau ngenyit ari Klinik Simpang Bukut urung pukul 5.10 lemai sebedau seraban raban dianjung ngagai endur nya.

Raban nya datai urung pukul 5.45 lemai lalu tetemuka kededua mansa ba tisi jalai, benung dibantu mensia mayuh.

Mansa keterubah semina bakal mimit aja. Mansa kedua napi telih tebuka ba jari sereta pedis ba punggung.

Tim APM Selangau meri perubat keterubah iya nya meresi sereta ngerapitka abi telih sebedau mansa dibai ke klinik ngambika diperubat enggau silik agi.

Kededua mansa udah diserah ngagai klinik lalu agi dipatau ngambika diperubat enggau silik agi. Operasyen nya tembu urung pukul 6.16 lemai.

Kes tu dipansik nitihka prosedur standard, lalu pun penusah bebadi nya agi dipansik piak bekuasa. — RBI

KANOWIT, 26 Feb — Beberapa kandang endur ke baruh di pelilih Kanowit diripotka ampuh bah berindik ari ujan semalam-malam, tang gaya kesemua diatu udah ulih dijaga enggau tikas ai ngayanka trend nurun.

Nitihka ripot rasmi ari Angkatan Pertahanan Awam Malaysia (APM), pengawa nyukat kandang ke dipatau udah dipejalaika urung pukul 5.00 lemai ti ngaul kandang endur dalam Parlimen P.210 Kanowit enggau DUN Ngemah.

Pengawa meresa tetemuka tikas ai ba sebengkah ari kandang sekula ngerikod bacha urung 0.1 ngagai 0.3 meter maya nyukat keterubah lalu niki sementara ngagai urung 0.42 meter sebedau berinsur surut.

Berebak enggau nya, dua endur bukai ke diperesa ditemu nadai ai lalu batang jalai nuju sebuah rumah panjai ke sebedau tu kena ampuh mega udah surut abis sereta ulih ditengah.

Operasyen matau ke tembu pukul 6.14 lemai nya ngaul tim siku pemesai enggau tiga iku kaban enggau bantu logistik ari sebuah entukar opis, perengka nyukat tikas ai, kasut pengelikun enggau jaket pengelikun. — RBI

KUALA LUMPUR, 26 Feb – Projek ngaga Klinik Pengerai (KK) enggau Klinik Ngeli di Daro dipelabaka tembu penuh manggai ba taun 2028, lalu enggau nya ulih ngemanahka perengka guna pengerai ungkup peranak Daro enggau Matu.

Pekara nya dipadahka Sapit Menteri Pengerai, Dato Hajjah Hanifah Hajar Taib lebuh nyaut sesi Tanya Lisan di Dewan Rakyat sehari tu tadi.

Ku iya, pengawa ngaga Klinik Pengerai Daro (Bansa 4) diatu benung ba renggat dipejalaika pengudah Surat Setuju Terima (SST) dikeluarka kena 21 Januari 2026, seraya pengawa ngempu palan berengkah kena 4 Februari 2026.

Projek nya, dipejalaika Opis Kereja Raya Sarawak ngagai suku ketiga taun 2028 lalu timpuh ngaga 30 bulan.

Klinik baru nya bepalan urung 5.3 kilometer ari palan sementara nya deka meri servis komprehensif nyengkaum berubat pesakit luar, penusah ngenyit, pengerai indai enggau anak mit, farmasi, fasiliti diagnostik enggau kuarters staf.

Berebak enggau nya, projek Klinik Ngeli Daro diatu benung ba renggat kepenudi nyiri kunteriktor lalu dipelaba nerima SST ba suku ketiga taun 2026 enggau timpuh ngaga pengelama 24 bulan.

Nitih ku iya, enti kededua fasiliti nya tembu ila, 70 pangku pengawa baru deka ditumbuhka, lalu enggau nya ulih ngenegapka pengawa ngenataika servis pengerai sereta nambahka akses ungkup peranak di kandang menua Daro enggau Matu. -RBI

SELANGAU, 26 Feb – Pengawa ngerembaika ngempu lisin deriba ti entas ba raban nembiak menua pesisir majak ditegapka lebuh Program Bantu Lisin Deriba Mutosikal Kelas B2 (BLM) diperambu deka dipejalaika di Selangau enggau Tamin nyengkaum di Bintulu.

Inisiatif ti betuaika Opis Perengka Pengangkut Jalai Raya (JPJ) Sarawak ngemeratka raban nembiak enggau raban ti kurang penatai pemisi, kelebih agi di menua pesisir ti betapi enggau penanggul ngulihka lisin deriba ti entas.

Dikena nentuka pengawa nya bejalai enggau lanchar, aum raban pengatur udah diatur nengah kerejasama Parlimen Selangau enggau Dewan Undangan Nengeri (DUN) Tamin.

Aum nya bechairmanka Pemesai Pelilih Menua Selangau, Yalin Asan, lalu bela digulu Ketuai Bagi Lisin Deriba JPJ Sarawak, Yusniman Mohammad, ti ngenataika penerang senentang prosedur enggau nitihka garis lalau JPJ Malaysia.

Institut Memandu Ngu Chung Beng & Sons Sdn. Bhd dichiri nyadi institusyen latih dikena ngemujurka program nya, enggau pengawa nitihka penuh Kurikulum Pelajar Deriba (KPP).

Ba pemansang ke sama, siti agi aum koordinasyen mega bisi diatur di Bintulu ke diatur Parlimen Bintulu.

Aum nya bechairmanka Yusniman, seraya penerang pengatur dibantaika Ketuai Unit Lisin Deriba JPJ Bintulu, Norhayati Rezali, ti nerangka enggau silik peminta penyereta, taga latih enggau chara bejalaika pengawa.

Program BLM Kelas B2 ukai semina mantu ngulihka lisin, tang mega nyadi singkang strategik dikena ngangkatka pengelikun jalai alun.

Nengah lisin ke entas, orang ke ngena mutosikal ukai semina lebih dilatih sereta bisi disiplin, tang mega bisi peluang ngerembaika akses sida ngagai pengawa sereta ngangkatka status ekonomi sida sebilik.

Pengawa ke diatur di Selangau, Tamin enggau Bintulu dikearapka ulih meri empas ke besai ngagai raban ke ditagit, lalu ari nya ulih ngurangka penyalah trafik enggau penusah bebadi ba jalai alun ba kandang endur ke bisi kaul.