KUCHING, 26 Feb – Isu hak petroleum Sarawak diatu udah masuk ngagai renggat ke berat lebuh perintah nengeri ngaga pemutus minta penetap undang-undang ba Kort Perintah Besai Malaysia.

Pengawa nya udah nerima sukung tebuka ari Parti Pribumi Bersatu Malaysia (BERSATU) Sarawak ti nerangka nya sebengkah pengawa dikena nerangka penetap konstitusyen, ukai dikena ngepunka penyarut politik.

Nitihka penerang ari parti nya, pengawa mai pekara nya bekaul enggau pengamat sereta guna undang-undang petroleum Perintah Besai ngagai Sarawak setipak enggau semengat Konstitusyen Perintah Besai Malaysia sereta semengat Sempekat Malaysia 1963 (MA63).

BERSATU Sarawak nyemetak madahka hak nengeri tu ba pengeraja asal nyengkaum minyak enggau gis dalam garis entara menua asal sebedau numbuhka Malaysia nyadi pelasar ti beguna dalam struktur Perintah Besai ti patut diterang sereta ditemu enggau nyemetak sereta konklusif.

Parti nya bepenemu, pengawa ti enda tentu lama ba bidang kuasa enggau undang-undang tau ngeruga pengawa pentadbiran, penegap polisi enggau pengarap pemeranak puku ba sektor kuasa iya nya sektor strategik ungkup ekonomi nengeri enggau menua.

“Pengawa ngulihka penerang undang-undang ukai chara mantah Perintah Besai.Tang kebendar, iya ngenegapka sistem Perintah Besai nengah chara nentuka tetiap atur konstitusyen dipebasa sereta dipejalaika enggau lurus,” ku penerang nya.

BERSATU Sarawak mega ngingatka pemutus Kort Perintah Besai deka meri pangka besai ukai semina ngagai Sarawak aja, tang mega ngagai selampur landskap ngatur pengeraja asal kuasa menua.

Berindik enggau nya, parti BERSATU Sarawak minta semua piak bebasaka proses akim lalu enda bepolitikka isu ti mai empas timpuh panjai ngagai penegap menua.

Ba pekara ti lebih besai, BERSATU Sarawak nyemetak madahka penetap konstitusyen ti terang deka nambahka penerang ba pengawa ngatur asil pengeraja asal, ngenegapka pengandal pemeranak puku, sereta nentuka pemansang ti lebih seimbang sereta inklusif ungkup rebak dudi hari.

Nyadi kaban pemungkal Malaysia, parti nya ngemeratka hak konstitusyen Sarawak meseti dipebasa dalam langkar pemerat menua ke besai agi, ngelui ari pemerat politik timpuh pandak. -RBI

BINTANGOR, 26 Feb – Pengawa ngangkatka pengelikun jalai alun di Sarawak majak ditegapka lebuh Opis Kereja Raya (JKR) Sarawak ngelancharka Papan Pal Tatak Pengelaju Jalai Bekuasa Solar di Jalai Tg. Genting kemari.

Inisiatif teknologi gadung nya dipenyadika Direktor Kereja Raya Sarawak, Datu Dr. Cassidy anak Morris, ti nyemetak madahka pengawa ngena teknologi pintar nyadi singkang proaktif dalam nerenakka chara deriba enggau likun sereta ngurangka risiko penusah aksiden ba kandang endur ti berisiko.

Nitih ku iya, papan tanda radar ti bekuasa solar nya ulih mandangka bacha pengelaju perengka pengangkut dalam timpuh nyata, lalu enggau nya meri jaku tangkan terus ngagai deriba enti sida ngelui ari tikas pengelaju ti udah ditetapka.

“Chara tu ukai semina neritka atur enda terus aja, tang lebih agi meri pelajar ti terus ngagai penguna jalai alun ngambi lebih beratika pengelikun,” ku iya.

Pengawa ngena kuasa solar mega ngasuh sistem tu meruan agi sereta enda ngerusak rampa menua, kelimpah ari ulih beoperasyen enggau enda bepanggai ba bekal kuasa karan konvensional.

Pengawa bejalaika projek tu mandangka komitmen Opis Kereja Raya Sarawak ti terus ngenegapka sukut pengelikun infrastruktur nengeri tu, seriris enggau aspirasyen pemansang nuju sistem pengangkut ti lebih likun, efisyen sereta tan.

Sama bisi datai iya nya Injinir Bagi Menua Sarikei Ir. Ts. Kennedy anak Kedo, ADE (Operasyen) Ir Frasser anak George Micheal, raban JKR Sarikei, Penyedia Servis (SP) enggau temuai ke bukai. -RBI

BINTANGOR, 25 Feb – Balai Bomba enggau Penyah Penusah (BBP) Bintangor terus komited ngenegapka pengelikun komuniti nengah pengawa bejalaika Program Penyedar Mensia Mayuh ke diatur pukul 10.00 pagi, Hari Tiga tu tadi.

Program tu mungkur penemuai betemu enggau peranak rumah panjai di Rh Jonathon Ugek, Sungai Janting dalam meri penerang ngagai peranak rumah panjai nya pengawa beguna maya napi penusah ngenyit.

Nitih ku PPgB Mahmudin Narudin, Ketuai Balai Bomba enggau Penyah Penusah Bintangor, chara bakatu beguna dikena nambahka tikas penyedar komuniti, kelebih agi ba kandang rumah panjai, bekaul enggau risiko penusah angus.

“Program tu ngembuan tuju deka meri penerang tumu ngagai peranak bekaul enggau atur nagang penusah angus sereta atur lengkas ti patut dipejalaika enti sema bisi penusah ngenyit nyadi,” ku iya.

Entara isi program nya nyengkaum meri penerang pandak senentang chara nyeliah penusah angus ba premis genturung pendiau sereta mega penerang bekaul enggau pengawa meri kelala sereta ngena perengka pengerara api enggau betul.

Bomba tetap komited bejalaika inisiatif ti seruran dipejalaika setipak enggau rambai jaku Prestasi Tinggi, Cepat enggau Mesra dalam nentuka pengelikun komuniti seruran dijaga. -RBI

MIRI, 25 Feb – Sebuah rumah pekereja empat pintu ba Miri Concrete Sdn Bhd, Jalai Kuala Baram nyau deka lengis angus ba penusah ke nyadi tengahari tu tadi.

Ketuai Balai Bomba enggau Penyah Penusah (BBP) Lutong, PBT II Henry Jugah, madahka piak iya nerima kangau ngenyit urung pukul 4.58 lemai sebedau seraban bomba ngesah ngagai endur nya ke bepalan urung enam kilometer ari balai nya.

“Lebuh datai ba endur nya urung pukul 5.05 lemai, ditemu penusah angus nya ngaul sebuah rumah pengereja pengawa enggau struktur ukai tetap ti ngembuan pemesai urung 50×30 kaki persegi,” ku iya.

Nitihku Henry, rumah nya bisi empat pintu ti mungkur siti unit diuan, siti unit puang enggau dua unit dikena nyadi palan nyimpan barang.

Ku iya nambah, sebuah mutosikal Modenas Kriss 110 mega rusak urung 40 peratus dalam penusah nya.

“Raban bomba bejalaika operasyen madamka api nengah chara nguna hos sepemanjai 400 kaki ngena dua jet ai ari pun penatai tebuka.

Ba penusah nya, sepenyampau lapan iku orang ke nguan rumah nya nyengkaum lima iku lelaki besai tuai, siku indu besai tuai enggau dua iku nembiak mit diripotka selamat enggau nadai sebarang bakal.

Operasyen nya mungkur enam iku raban BBP Lutong enggau bantu tiga iku raban Opis Bomba Komuniti Kampung Muhibbah. Sama bisi ba endur nya raban polis enggau Sarawak Energy Berhad (SEB).

Pun penusah angus enggau anggar pengerugi agi dipansik piak bomba. -RBI

SIMANGGANG, 25 Feb – Pengerami Chap Goh Mei diatu bisi potensial nyadi produk dagang temuai besai di Sri Aman, lalu ari nya ulih ngenegapka penyerakup komuniti pupu bansa sereta nyungkak ekonomi menua tu.

Sapit Menteri Pelajar, Inovasyen enggau Pemansang Bakat, Datuk Francis Harden Hollis, madahka pengerami nya udah mansang nyadi sebengkah pengerami komuniti ti matak penyereta ari semua serak pengidup.

Ku iya, tu ukai semina komuniti Cina aja lalu ninting taun, lebih 5,000 iku temuai ngempuru ba menua Simanggang meda pengawa bejalai bebala mayuh.

“Beribu iku temuai ari raban bansa Iban, Melayu enggau ke bukai ngayanka pengerami tu diatu diterima nyadi sebagi ari identiti komuniti lokal,” ku iya lebuh bejadika Rumah Tebuka Taun Baru Cina enggau Ngelanchar Pesta Chap Goh Mei Bagi Menua Sri Aman di Tokong Ciyun, Hari Dua tu tadi.

Ba pengerami ke sama, Datuk Francis madahka agih belanja ari baruh Projek Mit Menua Pesisir (MRP) sepenyampau RM30,000 ngagai Gerempung Soon Heng Simanggang dikena nyukung pengawa ngatur pengerami taun tu.

Ku iya nambah, Chap Goh Mei patut dipeda nyadi penambah ngagai produk dagang temuai ke udah bisi baka Pesta Benak, ke udah lama nyadi pematak besai pelilih tu.

Sama bisi datai iya nya Residen Bagi Menua Sri Aman, Mahra Salleh, Sapit Residen, Charlie Keling, Pengari Pemesai Pelilih Menua Sri Aman, Joshua Martin, Chairman Kaunsil Pelilih Sri Aman, Anthony Abell Chendan, Chairman Gerempung Soon Heng Simanggang, Tay Chiew Hua enggau Sapit Chairman Temenggong Kueh Aik Seng. -RBI

KUCHING, 25 Feb – Kort Tinggi Kuching nulak peminta Petroleum Sarawak Berhad (PETROS) ti deka nyakal pengawa ngambi pulai jamin bank sepenyampau RM7.95 juta ari Petroliam Nasional Berhad (PETRONAS).

Akim Datuk Faridz Gohim Abdullah dalam prosiding sehari tu netapka dawa nya enda entas sereta enda nitihka konstitusyen.

Iya nyemetak madahka isu ke deka diputuska nya semina bekaul enggau tanya sekalika peminta ngelaban jamin bank nya enda entas tauka enda nitihka undang-undang baka ke dipadah dalam Notis Mosyen (OS) ke difailka PETROS.

Ku iya, peminta PETRONAS ba jamin bank nya entas laban nya setipak enggau ‘terma’ jamin bank iya nya ‘on-demand’ sereta nadai betukuh sereta nadai betukuh sebarang syarat, lalu enggau nya ngemendarka nya dituntut nengah peminta betulis.

Kot mega ngambi kira duit jamin bank nya udah diterima sereta dikena, ti ngasuh peminta injunksi dikena nagang tuntut nya enda praktikal agi.

Iya nandu baru madahka PETROS nadai minta sebarang deklarasyen dikena nyakal pengamat Sempekat Jual Beli Gis (SGSA) tauka minta deklarasyen ti madahka Ordinan Penyampau Gis 2016 (DGO) dikena ba PETRONAS nyentukka iya begunaka lisin nengeri.

Iya mega netapka jamin bank ti dikerandauka nya jamin ti nadai syarat lalu tau dituntut nitihka peminta betulis, enggau enda ibuh ngayanka pengawa ngelanggar kontrak dulu.

Ba prosiding sehari tu, PETROS diarika Tan Sri Cecil Abraham, Sim Hui Chuang, Lim Lip Tze enggau Rosalie Tien lalu PETRONAS diarika Datuk Cyrus Das, Khoo Guan Huat enggau Alex Ngu Sze Sha.

Penyanding Penemu Undang-Undang Nengeri Sarawak, Datuk Seri Fong Joo Chung nyadi pemerati ngarika perintah Sarawak.

Lebuh betemu ba lobi kort, Fong madahka isu konstitusyen deka diputuska Kort Perintah Besai laban Kort Tinggi semina ngaga pemutus komersial lalu enda beratika isu konstitusyen.

Nitih ku iya, pekara nya deka dibai ngagai Kort Perintah Besai kena 16 Mac 2026 enggau peluang haribulan tambah ditetapka udah nya.

Berebak enggau nya, Cyrus madahka PETROS mega diasuh mayar kos sepenyampau RM50,000 pengudah enda mujur ngayanka bukti dawa nya enda masuk akal tauka enda nitihka undang-undang.

Ku iya, kort bepenemu isu konstitusyen nya di luar skop saman asal lalu begunaka pemutus Kort Perintah Besai.

Nya alai ku iya, tanya pasal pengamat Akta Pemansang Petroleum 1974 (PDA) enggau Ordinan Pengagihan Gis 2016 (DGO) deka dibai ngagai tikas ke tinggi agi.

“PETRONAS diperambu deka minta pemendar kena 16 Mac tu ila, seraya Perintah Sarawak mega udah ngaga petisyen sida empu,” ku iya.

SADONG JAYA, 25 Feb — Siku baya besai diripotka mujur ditangkap ba kandang menua Batang Sadong semak Sungai Bulu sehari tu, nitihka posting ti diupload Wan Zai Nal ba platform Facebook.

Pos nya madahka pasal pengawa nangkap reptilia nya ke dipadahka besai nyelai, lalu ngasuh mensia mayuh betanya sekalika baya nya jelu ke diberi nama panggil “Pak Itam” tauka ukai ke dipelabaka bisi kaul enggau penusah nyerang nya minggu nyin kemari. — RBI

SARIKEI, 25 Feb – Tiga iku lelaki bakal mimit ba penusah bebadi jalai alun ti ngaul dua buah entukar semak kandang Kort Sarikei, tengahari tu tadi.

Palan Penyaga Operasi (PKOD) APM Pelilih Sarikei nerima kangau ngenyit ari mensia mayuh urung pukul 1.00 ngalih hari ti madahka sida bisi penusah belantak entara kerita Proton X70 enggau kerita Toyota Hilux ba endur nya.

TIM MyASPA-O Bravo ke bisi tiga iku pemesai tekala nya lalu ngesah urung pukul 1.10 lemai lalu datai ba endur nya semina dua minit udah nya.

Nitihka ripot keterubah, deriba Proton X70, siku lelaki beumur 39 taun, bisi bakal ba kening lalu diberi perubat keterubah ba palan penusah nyadi sebedau dibai ngagai sepital ngambika diperubat enggau silik agi.

Dua iku agi kebukai ke nepan kerita Toyota Hilux ke beumur 34 enggau 49 taun diripotka bisi pedis ba bau enggau dada. Taja pia, kededua sida benung dalam gaya ke entap.

Semua sida tu udah nya dianjung ke sepital ngena ambulans ngambika diperesa sereta diperubat nangkan nya.

Pia mega diripotka dua iku nembiak indu ke nepan kerita Proton X70 nya dibai sida sebilik ngagai sepital. Siku ari seduai nya bakal ba dalam mulut lalu siku agi madahka pedis ba belakang.

Operasyen nya tembu enggau penuh urung pukul 1.48 lemai pengudah semua sida ke aksiden diserah ngagai sepital ngambika dipejalaika enggau silik agi. -RBI

MIRI, 25 Feb — Umur ukai nyadi siti penanggul ngagai penyanyi veteran Iban Urai Rosiana terus chakah nyadi siku pemerindang lalu iya deka datai baru enggau single pemadu baru iya ke diberi nama Dilah Tanah.

Iya madah Lagu berentak slow rock nya ti ditempa Versifier penuh enggau pesan daya pengidup mensia enggau penyedar diri, enggau nya ngingatka orang ngambika seruran ngereja pengawa ti manah enda ngira pangkat, pengaya tauka penuduk.

Ku Rosiana nerangka ngagai Ruai Berita Iban, pengawa nya amat semak ba ati iya laban mai pengingat ti madahka genap iku mensia pengujung iya deka pulai ngagai Tuhan.

“Lagu tu ngenang pasal pengidup lalu ngingatka kitai iya nya utai ke ditaburka kitai, nya meh utai ke diketau kitai, enda ngira ni naka peninggi pangkat tauka pemayuh reta tengkira kitai tetap sama ba mata Tuhan,” ku iya

Nitihku Rosiana Urai, Dilah Tanah mega mantaika pemar vokal iya empu, kelebih agi ba sada nyawa ti tinggi ti begunaka ‘voice control’ ti tegap, tang proses ngerikod bejalai enggau lanchar berindik ari peneleba penengkebang enggau penulis lagu ti meretika penegap vokal iya.

Ba pengerembai ke sebaka, peranak asal Long Pelutan, Baram ke ngepunka karier seni ba taun 1989 mega ngerikod lagu jaku Kayan enggau lagu duet jaku Iban begulai enggau penanyi baru, Mexuari Mullen.

Lagu duet ti diberi nama Maya Pengerindu Tua Ngua ti ditempa Dom Romeo dipelaba deka dikeluarka ba tengan bulan March tu ila.

Rosiana ngarapka lagu duet tu ulih narit ati bala peminat laban mantaika bida enggau gempung nyawa dua rebak ti bebida.

Iya ngarapka pengawa ti diasilka nya ukai semina ulih merindang, tang mega nyadi medium dikena ngenegapka pesaka jaku enggau budaya Iban ngambika seruran relevan sereta dikerinduka rebak dudi hari.

Single Dilah Tanah dipelaba deka dilanchar nengah pelasar media rama enda laun ari bulan Mac tu. — RBI

SIBU, 25 Feb – Opis Kereja Raya (JKR) Sarawak sehari tu ngelancharka sistem kamera litar tetutup (CCTV) enggau teknologi pemintar tiru (AI) ba kandang P-Turn Selangau, siti inisiatif baru dikena ngenegapka pengelikun jalai alun ba jalai berisiko tinggi.

Pengerami ngelancharka nya di Bagi Menua Sibu udah dipenyadika Direktor Kereja Raya Sarawak, Datu Dr.Cassidy anak Morris ti nerangka pengawa masang CCTV AI tu, ngena teknologi pintar ngemendarka pengawa matau trafik dipejalaika enggau lebih sistematik sereta responsif, kelebih agi ba endur ti dikelala ngembuan arus trafik ti tinggi sereta bisi potensial penusah bebadi.

“Pengawa masang CCTV enggau teknologi AI nyadi singkang proaktif dalam ngenegapka pengelikun jalai alun enggau pengawa matau rampa menua mensia mayuh, setipak enggau aspirasyen pemansang nengeri nuju mengeri pintar.

“Kitai dekaka teknologi tu dikena enggau penuh dikena nambahka pemanah pengawa matau lalu berebak enggau nya mantu pengawa nagang penusah aksiden,” ku iya rambau jaku iya ba pengawa nya.

Iya mega ngingatka penguna jalai alun ngambika seruran ngasika atur jalai alun sereta ngemeratka pengelikun ungkup pengelantang begulai.

Sistem CCTV AI dikearapka ulih matau pejalai trafik dalam timpuh ke bendar, lalu enggau nya ulih nyukung pengawa ngemanahka agi pengawa ngatur trafik ngelingi Selangau enggau Bagi Menua Sibu.

JKR Sarawak ngemeratka komitmen terus ngenegapka infrastruktur pengelikun jalai alun nengah chara inovatif enggau beteknologi tinggi setipak enggau agenda pemansang nengeri. RBI