SARATOK, 28 Mac – Chara siku lelaki ke nadai kereja ngena dawai enggau pemutar skru enchuri kerita Perodua Kancil pengujung iya tebantai lebuh iya ditan polis ba kandang menua Sessang, Kabong, kemari.

Ketuai Polis Pelilih Saratok, DSP Mathew Manggie madah, saspek lelaki ke beumur 27 taun nya ditan berindik ari ripot ke digaga siku orang pinchin ke beumur 71 taun pun bulan Mac tu tadi.

Tudah ngeripotka kerita iya lenyau pengudah ditinggal ba kandang menua Ulu Roban.

Pansik tumu tetemuka saspek pansut ari rumah iya di Krangas, Roban enggau niat deka enchuri kerita nya.

Saspek madahka iya ngena dawai dikena muka pintu kerita sebedau muai pala kunchi ngena pemutar skru dikena ngidupka injin kerita nya.

Polis mega ngerampas kerita bechura emas Perodua Kancil nya begulai enggau perengka dikena ngereja penyalah nyengkaum pemutar skru enggau dawai besi pemanjai 170 sentimeter ba sebengkah jalai ladang di kandang menua Sungai Pasir.

Kelimpah ari ngaku enchuri kerita, tanya silik agi tetemuka saspek mega bisi kaul enggau kes enchuri mutosikal di Jematan Empaong, Roban.

Saspek ngaku udah ngererak komponen mutosikal nya lalu disimpan ba palan pengentap pendiau iya.

Pengawa meresa rikod ke udah tetemuka saspek bisi dua rikod jenayah ke udah bisi bekaul enggau pengawa enchuri enggau salah guna dadah.

Ke bendar, pemutus peresa ai kemi ke pemadu baru mandangka saspek positif Amphetamine enggau Methamphetamine.

Diatu kes nya benung dipansik nengah Seksyen 379A Kanun Keseksaan lalu saspek deka dibai ngagai kort sehari tu ungkup peminta riman dikena mantu pansik ke silik bekaul enggau kaul iya ba kes jenayah bukai ngelingi pelilih menua nya. -RBI

SANDAKAN, 28 Mac — Pengerami Nyerahka Pangku Pengawa Panglima Wilayah Laut 2 diatur enggau chara istiadat di Opis Markas Wilayah Laut 2 sehari tu, kelai penerus pengawa nyadi ketuai Soldadu Tasik Diraja Malaysia (TLDM).

Pengerami nya nyadi saksi pengawa nyerahka tanggungpengawa ari Laksamana Muda Datuk Yusne bin Mokhtar ngagai Laksamana Muda Ivan Mario Andrew nyadi Panglima Ke-35 Markas Wilayah Laut 2, ti dipenyadika YBhg Laksamana Madya Dato’ Khir Junaidi bin Idris nengah pengerami rasmi nyain setipikit nyerahka kuasa.

Sama bisi diatur iya nya Pengerami ngena pangkat ti ngaul Laksamana Muda Ivan Mario Andrew, Lt Kdr Muhammad Hafiz bin Zakaria TLDM, enggau Lt Kdr Abdul Basit bin Dato’ Kamarudin TLDM, dikena ngaku servis enggau komitmen sida dalam TLDM.

Sepemanjai servis iya, Datuk Yusne bin Mokhtar digambarka siku ketuai ti tau dipechaya ti mujur ngenegapka penyikap operasyen maritim sereta nentuka pengelikun kandang tasik menua seruran dijaga.

Pengerami nya disimpul enggau pengerami ‘Street Lining’ dikena meri basa ngagai iya, lalu enggau nya kelai komitmen TLDM ngambika seruran relevan, ransing sereta bepenau ngetanka kedaulatan menua enggau bansa. — RBI

SARIKEI, 28 Mac — Beberapa buah sekula di kandang menua Meradong enggau ngelingi nya udah dikelala deka diangkatmanah ari baruh agih belanja Program Transformasyen Menua Pesisir (RTP) dikena ngerapitka seraka perengka guna entara sekula mengeri enggau menua pesisir.

Entara sekula ti bisi kaul iya nya Sekula Cina Kebangsaan (SJKC) Min Daik di Meradong ti nerima kereja ngangkatmanah perengka guna fizikal iya, kelimpah ari sekeda sekula bukai baka Sekula Kebangsaan (SK) Sungai Paoh, SK Kuala Mador enggau SK Sungai Baji ti bela dirintai ungkup projek nya.

Sapit Menteri Kebun Bedandang Besai enggau Komoditi ke mega Kaban Parlimen Sarikei sereta Kaban Kunsil Nengeri (ADUN) Repok, Dato’ Sri Huang Tiong Sii madah, pengawa perintah ti majak bejalaika projek betuju nyendiaka palan belajar ti lebih nyamai sereta kondusif ungkup nembiak enggau raban pengajar.

Nitih ku iya, RTP terus bejalaika tanggungpengawa ti beguna ba pengawa ngemanahka infrastruktur pelajar ba kandang menua nya, kelebih agi ba kandang menua pesisir Parlimen Sarikei.

“Pengawa bejalaika tu mungkur pengawa ngaga enggau ngemanah infrastruktur sekula ngambika nyamai agi dikena bala pengajar enggau nembiak,” ku iya.

Iya madah munyi nya ba pengerami nyerahka palan projek nya lalu diarika Wong Soon Mee begulai enggau pemesai Kaunsil Pelilih Menua Meradong enggau Julau (MDMJ), Churchill, ba atur pengawa pandak ke diatur ba sitak nya.

Ku iya nambah, perengka guna ke manah agi ukai semina mantu ngelancharka proses ngajar enggau belajar (PdP), tang mega ulih mantaika pengeransing enggau motivasyen ngagai nembiak ngulihka prestasi ke manah agi.

Berebak enggau nya, iya nerangka projek RTP mega meri empas positif ngagai komuniti lokal laban perengka guna sekula ulih dikena begulai ungkup bemacham aktiviti rama enggau komuniti.

“Tu setipak enggau pengeran perintah ti deka nentuka pemansang menua pesisir dipejalaika enggau chara inklusif sereta meri pemaik komprehensif ngagai rayat,” ku iya. – RBI

SANDAKAN, 28 Mac — Soldadu Tasik Diraja Malaysia (TLDM) mandangka tikas penyikap operasyen ke tinggi nengah pengawa ngatur ‘Fleet Review’ ba kandang tasik Sandakan, ti dipenyadika Panglima Wilayah Laut 2, Laksamana Muda Datuk Yusne Mokhtar, ditu kemari.

Nitihka penerang ari Indu Opis Markas Wilayah Laut 2, pengawa bejalaika Fleet Review nya kelai komitmen ti seruran dipejalaika raban Armada dalam ngetanka kedaulatan kandang tasik menua tu, kelimpah ari meri peluang ngagai ketuai atas TLDM beratika terus tikas operasional aset, penyedia operasyen Tim enggau Armada.

“Pemisi bemacham aset ari sekeda skuadron besai TLDM ngayanka tikas profesionalisme enggau penau raban Armada bejalaika pengawa ke dilempaika ngagai sida,” ku penerang nya.

Entara aset ke bisi kaul iya nya kapal ari Skuadron Kapal Ronda Laju Ke-6 (KD Paus, KD Todak, KD Jerong dan KD Baung), Skuadron Kapal Ronda Ke-13 (KD Sri Perlis dan KD Sri Johor) sereta Skuadron Kapal Bekalan Ke-33 (KD Sri Tiga) kelimpah ari penyereta bot tempur Fast Combat Boat (FCB) enggau Bot Hidrografi.

Penerang nya mega madahka, pekara ke pemadu dikerinduka ba pengawa Fleet Review nya tembu enggau ‘sail pass’ ari skuadron bot perang FCB nyadika tanda pemujur gerempung nya.

“Soldadu Tasik Diraja Malaysia deka terus komited ngenegapka penyikap aset enggau penau operasyen dikena nentuka pengelikun enggau kedaulatan kandang tasik menua tu seruran dijaga,” ku penerang nya nambah. — RBI

Sumber, photo — Markas Wilayah Laut 2

MIRI, 27 Mac — Lemai tu tadi, sesi rekoding dikena promosyen Pengerami Gawai Dayak Renggat Sarawak 2026 udah diatur ba RTM Miri, ti dipenyadika YB Datuk Dr. Penguang Manggil.

Rikod tu deka ditabur nengah WAIfm sereta mega slot berita TV enggau radio RTM, nyadika pengeran dikena meri kelala pengerami Gawai Dayak ngagai mensia mayuh, kelebih agi komuniti Dayak di serata Sarawak.

YB Datuk Dr.Penguang Manggil nyemetak madahka promosyen tu ngembuan tuju deka narit pengerindu mensia mayuh dikena ngerichahka agi Pengerami Gawai Dayak 2026, seraya ngetan sereta negika adat, budaya, enggau pesaka asal ti udah nyadi ke temegah ati komuniti kenyau ari turun menurun.

Pengerami tu mega dikearapka ulih ngenegapka penyerakup, semengat begulai, sereta bepangan entara komuniti.

Sesi promosyen tu nerima kerejasama enggau sukung ti rat ari semua piak ti bekaul, dikena nentuka pesan pasal Gawai Dayak 2026 ulih dikerembaika enggau luas ngagai komuniti.

Sama bisi datai dalam sesi ngerikod nya, Sapit Chairman 2 JK Mit, Pengulu Wilfred Mac, Sekretari, Cr. Martin Dinil enggau; Tukang Wang, Dr. Puan Serawa Budul, Chairman Pengerami Etnobudaya enggau DJ Bana Jimbat. — RBI

Sumber, photo — Sambutan Gawai Dayak Peringkat Sarawak 2026

KUCHING, 27 Mac — Siku nembiak beumur 15 taun diripotka lesi pengudah ditagup baya di Sungai Sarawak, semak Jalai Batu Kawa Lama, Kuching.

Nitihka ripot ari Indu Opis Polis Pelilih (IPD) Padawan, penusah nya nyadi urung pukul 2.45 lemai.

Betindak tekala nya, tim polis begulai enggau Opis Bomba enggau Penyah Penusah Malaysia (JBPM) ngepunka operasyen ngiga enggau nyelamat ba kandang endur ke ngelingi.

Mansa ditemu urung pukul 5.30 lemai, urung satu kilometer ari palan penusah ke nyadi, lalu dientasks lesi ba palan penusah ke nyadi.

Tubuh mansa udah nya dibai ngagai Sepital Besai Sarawak ngambika atur silik agi dipejalaika.

Kes tu diatu diklasifikasyenka nyadi Ripot Pemati Ngenyit (SDR). — RBI

BINTULU, 27 Mac — Tim Charlie ari Balai Bomba enggau Penyah Penusah (BBP) Bintulu udah dianjung nagang penusah angus madang babas ba Bulatan Jalai Kuala Tatau kena lemai Hari Lima.

Lebuh datai ba endur nya, urung 3 kilometer ari stesyen nya, jentera Scania WHK 9413 enggau lori Hicom BHK 537 tetemuka penusah angus nya udah nuntung kandang endur sepemesai sehektar.

Raban bomba tekala nya nimbal ngena dua batang ai sepemanjai 500 kaki enggau dua muncung ai tebuka sereta perengka pengerara api dikena madamka api.

Nengah penerang rasmi BBP Bintulu madahka Operasyen madamka api dipejalaika enggau penuh jaga lalu nadai sebarang bakal diripotka nyadi.

“Raban kami seruran sedia nentuka pengelikun mensia mayuh sereta ngurangka risiko penusah angus nyadi ba kandang menua Bintulu.” ku penerang nya. — RBI

Sumber, photo — BBP Bintulu

KUCHING, 27 Mac — Pengerami nyerahka set drum jenama Pearl ngagai Ujar Jalimin, ti ngarika AWC Sebako udah diatur dikena nembuka kereban muzik Gerija ungkup aktiviti Puji enggau Sembah.

Dalam penerang penuh iya, Kaban Kunsil Nengeri (ADUN) Opar, YB Billy Sujang, madahka dua minggu ke udah iya nyuaka dua unit gitar elektrik dikena nganti perengka elekterik Puji enggau Sembah ti sebedau tu udah rusak ketegal Gerija kena ampuh bah.

“Pengerami sehari tu mega bisi nyerahka set drum jenama Pearl ngagai Menyadi Ujar Jalimin ti ngarika AWC Sebako dikena nembuka perengka muzik Gerija ke mulia Nama Tuhan ungkup Puji enggau Sembah.

“Arapka pemeri kereban muzik tu ulih nyadika pengeransing baru ngagai semua bala umat ngambika terus datai ngagai mua Tuhan”

“Awakka Tuhan merekat semua kitai dalam nama utai ti dikereja kitai ninting hari. Kitai diberekat ngambika merekat.” ku Billy.

Pengawa tu diatur nyadi sebagi ari pengawa ADU. Opar ti seruran dipejalaika dikena nyukung aktiviti rohani enggau pemansang komuniti gerija, kelebih agi pengudah beberapa perengka muzik rusak ketegal ampuh bah sebedau tu. — RBI

SIBU, 27 Mac — Briged Kesembilan Infantri Malaysia (9 Bgd) ngempung raban soldadu ari Batalion Keenam Rejimen Sempadan (6 RS) dikena mantu Opis Bomba enggau Penyah Penusah Malaysia enggau Angkatan Pertahanan Awam Malaysia dalam operasyen ngerara api ti nganguska madang babas di Sibu.

Nitihka penerang ba laman Facebook rasmi Briged Kesembilan Infantri Malaysia, pengawa ngaul Trup Soldadu Darat mega ditambah enggau sekeda Opis enggau ejensi ngelingi dikena ngenyampatka pengawa nagang sereta nagang api ari nyerarai.

“Operasyen bersepadu tu beguna amat dikena nentuka pengelikun komuniti di Sibu,” ku penerang nya.

Penerang nya nambah, pengawa ngaul 6 RS nyata ngayanka tikas penyikap Soldadu Darat Malaysia bejalaika tanggungpengawa mantu piak bekuasa mensia mayuh.

Operasyen nya ngayanka komitmen ti seruran dipejalaika mayuh bengkah ejensi dalam nentuka pengelikun mensia mayuh seruran dijaga, kelebih agi dalam napi penusah angus tebuka ti bisi potensi ngeruga pengelantang pendiau peranak menua nya. — RBI

Sumber, photo — Briged Kesembilan Infantri Malaysia

SARATOK, 27 Mac — Rayat diperansang nganggap tanah nyadi aset strategik timpuh panjai ti ulih mansutka penatai pemisi sereta nentuka penegap ekonomi ruang bilik, lalu ari nya ulih ngenegapka penyukup pemakai nengeri tu.

Menteri Industri Pemakai, Komoditi enggau Pemansang Wilayah Sarawak, Dato Sri Dr Stephen Rundi Utom madahka, pengawa ngempu tanah ukai semina hak reta aja, tang patut dikena enggau manah nyadi pun ekonomi ti produktif.

Iya ti mega nyadi Chairman Lembaga Penyatuan dan Pemulihan Tanah Sarawak (SALCRA) madahka, ba gaya dunya diatu ti betapi enggau mayuh pemar sereta enda meruan, tanah nyadi aset beguna ke ulih meri penguntung timpuh panjai ngagai pengempu tanah.

“Pengawa ngempu tanah ukai semina hak, tang nya nyadi aset strategik ti ulih nentuka penegap ekonomi ruang bilik sereta nyukung agenda penyukup pemakai nengeri, kelebih agi dalam kitai betapi enggau pemar dunya ti majak enda meruan.

“Rayat anang irauka tanah lenyau, tang patut landik ngurus sereta ngena manah tanah nya awak ke ulih nyadi pun penatai ekonomi ti produktif,” ku iya, bepelasarka ripot Unit Komunikasi Awam Sarawak (UKAS) kena Hari Lima.

Dr Rundi madahka pekara nya ba pengerami nyuaka Surat Pala Tanah Seksyen 18 Kanun Tanah Negeri (KTN) ke diatur ba Dewan Serbaguna Ladang Kelapa Sawit Roban Selatan, SALCRA, Saratok, kena Hari Empat.

Ba pengerami nya bisi 280 iku penerima ari 105 buah rumah panjai nerima Surat Pala Tanah ti mungkur 373 iti lot enggau pemesai 626 hektar.

Nitih ke iya, SALCRA udah mujur nyuaka kurang lebih 96 peratus tanah nya ngagai pengempu asal, lalu ke bukai nya agi dalam proses diputarka.

Dr Rundi nyemetak madahka chara betanam betupi moden bekelompok patut ditegapka agi enggau ngemeratka kualiti asil, kelimpah ari ngulihka servis lalau teknikal dikena nambahka produktiviti.

Berebak enggau nya, iya nerangka dalam dunya ti betapi enggau mayuh macham pemar enggau penyarut, pengawa ngempu tanah meri pengelebih ngagai rayat ba pengawa betanamka pun penatai pemakai diri empu, lalu enggau nya deka ulih ngurangka ari bepanggai ngagai pemakai ari luar.

Kelimpah ari nya, iya mega madahka perintah udah ngelala bagi kurang lebih 14,000 hektar tanah alai bumai, kelimpah ari nyediaka infrastruktur enggau mekanisma dikena nyukung pemansang sektor betanam betupi.

Ba pengerami nya ti digulu kurang lebih 500 iku rayat, bisi diatur pengawa keterubah ngelanchar logo genap 50 taun SALCRA ditumbuhka beserimbai enggau Pengerami Jubli Emas agensi nya, kelai penyulut lima dekad dalam pemansang tanah menua pesisir di Sarawak.

Pengerami nya mega mandangka komitmen Perintah Sarawak ba pengawa ngenegapka pengempu tanah sereta nyungkakka pemansang ekonomi menua pesisir ngena chara inklusif enggau meruan.

Sama bisi datai ngagai pengerami nya Sapit Menteri Industri Pemakai, Komoditi enggau Pemansang Wilayah Sarawak, Datuk Martin Ben; Penyanding Penemu ba Opis Premier Sarawak (Industri Pemakai, Komoditi enggau Pemansang Wilayah Sarawak), Tan Sri William Mawan Ikom; Kaban Parlimen Betong, Dato Dr Richard Rapu; Senator Dewan Negara, Pele Peter Tinggom; Kaban Kunsil Nengeri (ADUN) Kabong, Dato Mohd Chee Kadir; ADUN Krian, Friday Belik; ADUN Kalaka, Mohamad Duri enggau Menijar Besai SALCRA, Dato Joseph Blandoi.

Sumber Berita — Utusan Borneo