SPAOH, 28 Mac — Sapit Premier Sarawak, Datuk Amar Douglas Uggah Embas minta komuniti Spaoh terus meri sukung ke tegap ngagai perintah Gabungan Parti Sarawak (GPS) ari baruh iring Premier Sarawak, Datuk Patinggi Tan Sri Abang Johari Tun Openg, dalam pengawa sida ngetanka hak nengeri tu.

Nitihka penerang ba Facebook DUN Bukit Saban, Uggah nyemetak madahka sukung rayat ti seruran diberi beguna amat dikena nentuka agenda pemansang Sarawak enggau peminta hak nengeri tu ulih diteruska ungkup pemaik rayat.

Iya madah munyi nya lebuh bejaku ba Pengerami Nerima Pengabang Spaoh Aidilfitri ke diatur ditu, sehari tu tadi.

Ba pengawa ke sama, Uggah mega ngenataika pengaga ati iya ngagai Perintah Besai ke pemutus ngetanka subsidi diesel di Sarawak ba penyampau RM2.15 seliter, ti ku iya ulih ngelempungka tating pengidup rayat kelebih agi peranak menua pesisir.

Iya mega ngelalau mensia mayuh ngambika bejejaga sepemanjai musin kemarau dikena nyeliahka penusah angus ti tau ngeruga nyawa enggau reta tengkira.

Nambahka nya, iya madahka Ejensi Pemansang Bagi Menua Betong (BDDA) udah ngungkupka belanja sepenyampau RM3 juta dikena mantu raban ke patut ngemanahka rumah sida di Kampung Spaoh, setipak enggau komitmen perintah ngangkatka pengelantang pendiau rayat nengah pengawa nyendiaka rumah ke lebih lantang sereta likun.

Ba atur pengawa nya mega, Uggah bisi nyuaka pemeri ngagai komuniti ngelingi ti ngaul Komiti Pemansang enggau Pengelikun Genturung Pendiau (JKKK), masjid enggau surau ngelingi Spaoh.

Sama bisi datai Kaban Parlimen Betong, Dato Dr. Richard Rapu begulai enggau bini iya Datin Lucy Mary Johnson, Datin Amar Dato Doreen Mayang, Sapit Ketuai Pampang PBB Bukit Saban Abg Madehi Abg Abdul Latip, Sekretari Politik Ngagai Premier Sarawak Puan Roseline Mapong Sabai, Pemesai Pelilih Betong Laga Kueh, Injinir Bagi Menua Betong Jason Ng Boon, Ketuai Opis Tanah enggau Survei Betong TPr Moris Nayup, Sekretari Kaunsil Pelilih Betong Lister Clement Guwie enggau ketuai raban bansa ngelingi Spaoh. — RBI

MIRI, Mac 28 – Program pematut STB udah ngenataika pemujur lebuh pengawa nyuaka chek ngagai Kelab BBP Lutong @ Musolla Al-Azhar BBP Lutong ba sebengkah pengerami ke diatur ba Palan Servis Komuniti DUN N.72 Senadin, pagi tadi.

Chek nya disuaka Dato Sri Lee Kim Shin, Menteri Perengka Pengangkut Sarawak ti mega Kaban Kunsil Nengeri (ADUN) N.71 Senadin ngagai PBT II Henry AK Jugah, Ketuai Balai Bomba enggau Penyah Penusah Lutong.

Pengerami ke diatur pukul 11.00 pagi nya mungkur dua iku kaban iya nya PB Mohammad Haikal Bin Mohammad Bun-Yamin enggau PBB Mohammad Irfan Bin Nordin. – RBI

KUCHING, 28 Mac — Perintah Sarawak benung mansik bansa bantu ti deka dipadahka enda lama agi dikena ngelempungka penanggul rayat berindik ari rega barang ti niki ketegal pemansang dunya.

Menteri Kereja Raya, Dato Sri Alexander Nanta Linggi madah, pekara nya bisi disebut Premier Sarawak Datuk Patinggi Tan Sri Abang Johari tun Openg ba sebengkah pengerami ke diatur ditu, malam Hari Lima.

Nitih ke Nanta, Premier Sarawak seruran ngemeratka pengelantang pendiau rayat sereta sensitif enggau sebana rayat, kelebih agi dalam napi empas ari ungkus pengidup ke diatu.

“Aku chukup temegah ati meda iring tuai Premier Sarawak Datuk Patinggi Tan Sri Abang Johari ti seruran ngemeratka pekara ti diguna rayat sereta enda kala leju mendingka sebana rayat.

“Lebuh ke bejaku, iya (Premier Sarawak) madahka Perintah Sarawak benung mansik bansa bantu ti deka dipadahka enda lama agi dikena mantu rayat ti napi empas ketegal rega barang niki berindik ari pemansang dunya, kelebih agi konflik tauka penyarut ti nyadi di Timur Tengah,” ku iya dalam penerang ti dikunsi dalam Facebook iya, sehari tu.

Nanta ke mega Kaban Parlimen Kapit madah, Abang Johari mega bisi madah pekara nya udah dikerandau enggau Sapit Premier Sarawak Datuk Amar Douglas Uggah Embas ke mega nyadi Menteri Pekara Wang II.

Ku iya, pansik ke silik agi benung digaga ngambika bantu ke diberi nya amat meri penguntung ngagai rayat.

Kelimpah ari nya, Nanta madahka Premier Sarawak mega bisi ngenang pasal gaya geopolitik dunya ti meri empas besai ngagai ekonomi dunya nyengkaum konflik di Asia Barat sereta menua ti ngeluarka minyak baka Venezuela enggau Iran.

“Pekara ti nyadi tu terang amat mandangka bepanggai ba minyak fosil ulih meri empas besai ngagai penegap ekonomi.

“Taja pia, Sarawak diatu ba pelasar ke betul enggau ngalih ngagai energi alternatif baka solar, hidrogen enggau minyak penerebai bilun ti meruan (SAF),” ku Nanta.

Ku iya madah baru, siti aum deka diatur enda lama agi dikena ngenyampatka pengawa ngena SAF ke deka bechairman Premier Sarawak.

Bekaul enggau pekara ke sama, ku iya, sistem perengka pengangkut mensia mayuh nyengkaum Transit Aliran Automasi (ART) mega deka ngena teknologi hidrogen setipak enggau komitmen nengeri nuju ngagai energi beresi.

Chara strategik nya, ku iya, beguna amat dikena nentuka penegap ekonomi sereta pengelantang pendiau rayat Sarawak dalam timpuh panjai.

SONG, 28 Mac — Pengawa ngaga Jalai Banjor ngagai Makut diatu benung dalam proses dipejalaika lalu ngayanka penyulut ti chukup meransang.

Nitihku Kaban Kunsil Nengeri (ADUN) Katibas, YB Lidam Assan, pengawa meresi alai udah ngelui ari kandang Sekolah Kebangsaan (SK) Lubok Bedil naka ke sehari tu.

Berindik enggau nya, iya minta kerejasama penuh ari komuniti besemak ngambika enda ngachau pengelanchar projek nya, lalu enggau nya nentuka kereja ngaga ulih tembu nitihka timpuh ke udah ditetapka.

“Kerejasama ari semua piak beguna amat dikena nentuka projek tu bejalai enggau lanchar sereta meri penguntung ngagai peranak menua nya,” ku iya.

Projek ngaga jalai nya dikearapka ulih ngemanahka agi rentayan penyambung jalai sereta ngemudahka akses ngagai peranak di kandang menua Banjor enggau Makut, kelebih agi ari sukut sosio-ekonomi enggau mobiliti ninting hari. — RBI

MIRI, 28 Mac — Pengawa ngemansangka menua pesisir di Sarawak patut diperesa enggau komprehensif sereta bepelasarka fakta, ukai bepelasarka persepsyen sempit tauka penerang ti ngemaruhka pangku pengawa projek infrastruktur baka jalai alun enggau jematan.

Sapit Menteri ba Opis Premier Sarawak (Buruh, Imigresyen enggau Pematau Projek), Datuk Gerawat Gala madah, penemu ti ngemaruhka pemansang menua pesisir enda ngambi kira selampur polisi enggau strategi pemansang komprehensif ti benung dipejalaika perintah nengeri.

Kenu ku iya, pemansang Sarawak enda bepanggai ba siti projek tauka sektor aja.

“Tang iya, ari baruh pentadbiran perintah nengeri, chara pemansang dipejalaika enggau komprehensif nengah chara begulaika aspek infrastruktur, ekonomi, rama enggau rampa menua.

“Bepuluh taun, komuniti di kandang menua ulu napi pemar kediri, enggau komunikasyen entara genturung pendiau bepanggai ba perau, jalai kampung enggau jalai tebang kayu.

“Ba gaya hari ti enda manah, akses ngagai sekula, sepital enggau pasar suah tekeruga,” ku iya.

Ku iya nambah, gaya tu diatu benung berubah asil ari pengawa bejalaika pengawa ngaga renyatan jalai alun enggau jematan ti muka akses, nyambung komuniti sereta nyadi penyungkak transformasyen rama enggau ekonomi menua pesisir.

“Pengawa ngaga infrastruktur tu ukai semina projek fizikal aja, tang nyadi pelasar pemansang timpuh panjai.”

“Enti nadai perengka guna pemun baka jalai alun enggau jematan, pemansang sektor pelajar, pengerai enggau ekonomi enda ulih dipejalaika enggau manah,” ku iya nerang.

Ku iya nambah, penyulut ke dijapai sehari tu (kemari) asil ari pengawa bejalaika polisi ti konsisten sereta perambu strategik ti bestruktur, nyengkaum nengah ejensi pemansang kandang menua baka Ejensi Pemansang Tanah Tinggi (HDA), Ejensi Pemansang Ulu Rajang (URDA), Ejensi Pemansang Wilayah Utara (NRDA) enggau Kaunsil Pemansang Koridor Wilayah (RECODA).

Chara pemansang nya nyengkaum pemansang infrastruktur fizikal, ngenegapka ekonomi nengah pengawa beranakka puku enggau industri, sereta ngemanahka perengka guna rama nyengkaum pelajar enggau pengerai.

Berebak enggau nya, perintah Sarawak mega udah ngemeratka pengawa ngatur kampung enggau meruan nengah chara ngurangka tikas pemansut kayu, meri kelala kampung ladang, neritka agi pengawa ngeluarka lisin nebang kayu sereta ngerembaika kandang endur nyaga kampung enggau penuh.

“Chara tu nyata ngayanka pemansang ekonomi enggau nyaga rampa menua ulih dipejalaika enggau chara ti sebela,” ku iya.

Nitih ku iya, empas pemansang diatu nyata diasaika rayat lebuh orang bumai ulih ngelakuka asil sida enggau mudah agi, bala nembiak bisi akses ke manah agi ngagai pelajar, lalu pesakit jampat agi nerima perubat, lalu ari nya nyungkak penumbuh ekonomi menua pesisir.

Iya nyemetak madahka pemansang ukai nyadi dalam timpuh ke pandak lalu ukai asil ari siti projek aja, tang enti nadai pelasar baka jalai alun enggau jematan, nadai pemansang ulih berengkah.

Berindik enggau nya, perintah Sarawak deka terus bebendar nentuka pemansang ti inklusif sereta sebela ngambika komuniti menua pesisir mega ulih ngasaika penyulut selampur.

“Penerang ti ngemaruhka pengawa ngemansangka menua pesisir enda relevan lalu semina mandangka pengurang penemu dalam transformasyen pemansang,” ku iya. — RBI

SARATOK, 28 Mac — Pengawa bejalaika ‘Agriculture Community Outreach Programme’ (AgriCOP) ba Rh. Joan, Simpang Kabo, ditu kemari udah mujur nyapai juluk meri kelala teknologi baru sereta ngenegapka pengawa betanam betupi moden ba komuniti menua pesisir.

Pengerami nutup program nya dipenyadika Kaban Kunsil Nengeri (ADUN) Krian YB Friday Anak Belik ti ngemeratka pemesai guna mindahka penemu enggau teknologi ngagai komuniti menua pesisir dikena nentuka sektor betanam betupi mengkang ulih dipejalai sereta kompetitif.

Nitihku iya, inisiatif baka AgriCOP nyadi pelasar strategik dikena ngenyemakka servis perintah enggau rayat, kelebih agi dalam ngerembaika akses ngagai teknologi pemadu baru enggau penerang bekaul enggau pengawa betanam betupi.

Program ke diatur Opis Betanam Betupi Sarawak ngempuruka mayuh bengkah opis enggau ejensi pemansang betanam betupi dalam pengawa meri penerang, bantu enggau servis meri lalau terus ngagai komuniti menua nya.

Entara batang program iya nya sesi meri penerang bekaul enggau bantu betanam betupi ke bisi diatu ti mungkur sektor utai tanam, industri bepelasarka agro enggau pengawa berikan dalam menua.

Kelimpah ari nya, sesi ngaul diri enggau peranak mega bisi diatur dikena ngelala guna enggau potensial pemansang betanam betupi ba kandang menua nya.

Pengawa bejalaika program tu mandangka komitmen perintah ti seruran ngenegapka komuniti menua pesisir nengah chara inklusif sereta fokus ngagai pemansang ti meruan, kelebih agi ba kandang menua Saratok.

Dikearapka program baka tu ulih dipajakka belama nyadi pemangkin ngagai pemansang sektor betanam betupi ti lebih progresif sereta tan di Sarawak.

Sama bisi datai iya nya Direktor Betanam Betupi Sarawak Dominic Chunggat, Superintendent Morris Nayup, Penguasa Tanah enggau Survei Bagi Menua Betong, Encik Leo bin Toni, Pemesai Betanam Betupi Bagi Menua Betong, pemesai kanan ari Indu Opis Betanam Betupi, SAO Andressen ngarika Pemesai Pelilih Saratok enggau Encik Weally ngarika Ketuai Polis Pelilih Saratok. — RBIAGRICOP Negapka Komuniti Menua Pesisir Nengah Teknologi Betanam Betupi Moden Ba Saratok

SERIAN, 28 Mac — Kaban Parlimen Serian Dato’ Sri Richard Riot Jaem sehari tu nyimpul Program Cash and Voucher Assistance (CVA) ti nyadi ba Dewan Serbaguna SJK Chung Hua, Serian, dikena mantu peranak di kandang menua ke dituntung penusah ampuh bah.

Program ke diatur Bulan Sabit Merah Malaysia Pampang Serian nya meda bisi 178 iku penerima ari 12 buah genturung pendiau bisi datai nerima bantu dalam tukuh Bantu Tunai enggau Baucher (CVA).

Tetiap iku penerima nerima bantu beungkus RM370 ti nyengkaum bakul pemakai, kereban rumah, kereban pemun enggau ubat, nyadika penyampau semua bantu ke diagih nya RM65,860.

Semua penerima mega dipadahka baucher ke diagih ulih dikena meli barang ke diguna ba Pasar Besai Sin Joon Miaw berengkah 7 April nyentuk 21 April 2026.

Dalam jaku dipansutka iya, iya ngenataika jaku puji enggau pengaga ati ngagai Bulan Sabit Merah Malaysia Pampang Serian laban udah ngatur program nya, ti dikumbai iya siti inisiatif ti chukup besai reti dalam mantu ngelempungka tating peranak ke dituntung penusah ampuh bah.

Ke bendar, iya mega madahka pampang nya keterubah bejalaika bantu ke baka nya ba kandang menua nya.

Sama bisi ngulu atur pengawa nya, Pengari Residen Bagi Menua Serian, Cik Esther Najoh; pengari Indu Opis Nasional Bulan Sabit Merah Malaysia, Cik Jamilah; Chairman Bulan Sabit Merah Malaysia Pampang Sri Aman, Mr Isaac Stalin; kaban Kaunsil Serian enggau bala ketuai komuniti kandang menua nya. — RBIPengawa Ngagihka Bantu CVA Ngagai Orang Tasah Ampuh Bah Ba Serian

KUCHING, 28 Mac —Opis Menteri Dagang Dalam Menua enggau Kos Pengidup (KPDN) deka neritka tatak ngisi minyak diesel ungkup perengka pengangkut darat di Sabah, Sarawak enggau Wilayah Persekutuan Labuan berengkah 1 April 2026.

Nitihka penerang ari KPDN, tatak nya ditetapka nitihka kategori perengka pengangkut enggau kuantiti maksimum 50 liter, 100 liter enggau 150 liter ungkup tetiap transaksyen meli.

Atur tu dipejalaika dikena nentuka bekal diesel subsidi ke dijual enggau rega RM2.15 seliter enda disalahguna piak ke nadai tanggungpengawa, nyengkaum sindiket mai sechara belalai enggau sektor industri ke enda patut nerima subsidi nya.

KPDN mega nyemetak madahka pengawa neritka atur tu nyadi sebagi ari pengawa perintah ti seruran dipejalaika dikena nagang pengeluar subsidi sereta nentuka penguntung nya diasaika raban ke ditagit.

Berindik enggau nya, semua piak kelebih agi pengemeran perengka pengangkut darat dipinta nitihka atur ti udah ditetapka ungkup pengelanchar bejalaika polisi tu. — RBI

SIBU, 28 Mac — Sepenyampau lapan iku kaban Opis Sukarelawan Malaysia (RELA) Pelilih Sibu udah digerah mantu operasyen madamka api ti nganguska madang babas ke nyadi besemak enggau Institut Memandu Ngu Chu Beng, ditu kemari.

Operasyen nya dipejalaika enggau chara bersepadu enggau ngaul sekeda ejensi pengelikun enggau penyelamat nyengkaum Opis Pengerara Api enggau Penyah Penusah Malaysia (JBPM), Angkatan Pertahanan Awam Malaysia (APM), Polis Diraja Malaysia (PDRM), Raban Soldadu Malaysia (ATM) enggau Bomba Sukarela PBS.

Kerejasama rat entara ejensi ti bekaul mandangka komitmen ti tinggi dalam nentuka api ulih dijaga tekala nya, lalu ari nya ulih ngurangka risiko penusah angus nyerarai ngagai kandang endur ke besemak.

“Operasyen madamka api disadang dipejalaika nyentuk tiga hari, bepanggai ba gaya hari enggau tikas api ba endur penusah nya nyadi” ku penerang nya. — RBI

BINTANGOR, 28 Mac – Balai Bomba enggau Penyah Penusah (BBP) Bintangor chakah bejalaika Kimpin Ngetuka Pengawa Betunu Tebuka dikena meri penyedar mensia mayuh pasal risiko enggau empas negatif aktiviti nya, kelebih agi maya hari panas enggau kemarau.

Nitihka penerang ari Ketuai BBP Bintangor, PPgB Mahmudin Narudin madahka, pengawa betunuka chara tebuka tau ngasuh angin kamah sereta sebun angin ti ngeruga pengerai mensia mayuh.

Ku iya, kelimpah ari nambahka risiko penusah angus ti enda ulih ditagang ti muntang nyerarai ngagai kandang kampung tauka genturung pendiau ti besemak.

Kelimpah ari nya, pengawa raban bomba mega deka nambah enti kes betunu tebuka nyadi mayuh, lalu enggau nya bisi potensi ngeruga pengulih tim nya nimbal penusah ngenyit bukai ke lebih balat agi.

Berindik enggau nya, mensia mayuh dilalau ngambi atur nagang nengah chara nyeliahka sebarang aktiviti betunuka chara tebuka, kelebih agi maya musin panas.

Pengawa nguna baru enggau ngatur uras ti ‘mesra’ rampa menua mega diperansang nyadi chara ti likun agi.

Berebak enggau nya, komuniti mega dipinta lengkas ngeripot sebarang penusah betunu chara tebuka ngagai piak bekuasa.

Enti bisi pun api, pengawa patut dipejalaika dikena madamka api enggau penuh ngena ai dikena nyeliahka api nya nyadi baru.

Mensia mayuh mega dilalau ngambika enda betunuka uras ba endur ke tebuka, tang ngena sistem muai uras ke udah disediaka tauka chara ngaga teda uras.

Sebarang penusah ngenyit bekaul enggau penusah angus ngelingi Bintangor tau dipadah terus ngagai Balai Bomba enggau Penyah Penusah Bintangor ba lumur 084-694444 tauka talipaun penusah ngenyit menua 999.

Kimpin tu sebagi ari pengawa ti seruran dipejalaika opis bomba dikena nentuka pengelikun mensia mayuh sereta nyaga rampa menua ari penusah angus. – RBI