KUCHING, 29 Mac — Media Borneo nyemetak madahka penetap ati enda mansut tauka ngasilka isi video muzik promosyen pandak (MV Short Promot) ti dipansutka sepenuh iya ngena teknologi pemintar tiru (AI) ti nadai kaul enggau kreatif mensia.

Nengah penerang rasmi, Ketuai Pengatur Pengawa Media Borneo, Nurul Diana Binti Suffian madahka pemutus nya setipak enggau komitmen gerempung nya ti deka negika industri muzik menua tu.

Nitih ku iya, piak iya bepenemu muzik ukai semina produk teknologi aja, tang nyadi pematak semengat, budaya enggau identiti sesebengkah komuniti ti begunaka tengkebang kreatif mensia.

“Media Borneo pechaya keranjai jari ti diasilka mensia mai rega runding, pengasai ati enggau kereja tulin ti enda ulih diganti enggau teknologi enggau penuh,” ku iya.

Iya nambah, singkang nya mega diambi dikena nentuka integriti industri muzik terus dijaga ba jeman pemansang teknologi ti jampat, kelebih agi ari sukut penulin asil, nitihka hak cipta enggau terang ngagai peninga.

“Kitai ngambi chara bejimat nentuka integriti industri muzik enda dikeruga, kelebih agi lebuh bekaul enggau isu pengamat enggau hak cipta,” ku iya nerang.

Berebak enggau nya, Media Borneo mega nandu baru komitmen sida deka terus nyukung artis menua tu nyengkaum artis, penanyi enggau komposer nengah chara nyendiaka pelasar ti ngemeratka penau enggau pengawa kreatif sida.

“Media Borneo mengkang komited nyukung artis menua tu nengah chara nyendiaka pelasar ti ngemeratka penau enggau pengawa kreatif sida,” ku iya nambah.

Berindik enggau nya, Media Borneo deka terus ngemeratka pengawa ngasilka isi ti bekualiti tinggi, tulin sereta relevan, setipak enggau aspirasyen ngenegapka industri kreatif ba renggat kandang menua enggau serantau. – RBI

KUCHING, 29 Mac — Media Borneo madahka berengkah 1 April 2026, timpuh isi Video Muzik Timpuh Pandak (MV-Short Promot) deka diseliris ari 40 sikin nyentuk 1 minit ngagai semina 10 ngagai 20 sikin aja.

Nitihka penerang rasmi ari Ketuai Pengatur Pengawa ba Media Borneo, Nurul Diana Binti Suffian, pengawa tu nyadi sebagi ari inisiatif strategik kompeni dalam ngatur pengawa nyadung isi digital ba selampur pelasar media rama.

Ku iya, chara baru tu ngemeratka pengawa ngena klip pandak (Short teaser clips) ti penuh enggau isi sereta meri empas tinggi, lalu ari nya ulih narit ati bala peninga enggau lebih efektif.

“Kami mega ngarapka iya ulih meransang bala peninga ngalih ngagai platform rasmi baka YouTube meda versyen penuh Video Muzik (MV), lalu enggau nya nyukung penambah peda enggau japai ngagai kompeni muzik enggau pengempu isi asal,” ku Nurul.

Nurul nyemetak madahka semua isi MV-Short Promot ti dipansutka Media Borneo semina ungkup tuju promosyen aja, lalu hak cipta tetap diempu pengempu asal.

Iya nambah, Media Borneo mengkang komited nyukung pemansang industri kreatif menua tu, nentuka strategi isi meri penguntung ngagai semua piak nyengkaum pemain industri, pengempu pengawa, enggau peninga. – RBI

Sapit Premier Sarawak, Datuk Amar Douglas Uggah Embas madah, sekeda endur udah dikelala nyadi ‘hot spot’ nyengkaum Kemuyang, Penasuk enggau kandang menua di Bintulu.

Nitihku iya, Opis Pengerara Api enggau Penyah Penusah Malaysia (JBPM) Sarawak udah nganjung bilun engkabang dikena bejalaika operasyen ngebom ai, kelebih agi ba kandang menua Penasuk enggau Sibu ti ngaul penusah angus tanah gambut.

“Pagi tu tadi, Opis Bomba enggau Penyah Penusah Sarawak nganjung sebuah bilun engkabang bejalaika pengawa ngebom ai ba kandang menua Penasuk.

“Kami mega minta sida ke Sibu laban penusah angus tu nyadi ba tanah gambut ti balat enchabar.”

“Taja pan semina asap aja ke bisi dipeda tang api ulih nyerarai ba baruh tanah lalu ngaul kandang endur ke lebih luas,” ku iya lebuh dikerandau pengarang ba Pengerami Hari Raya Aidilfitri begulai enggau Dato Sri Julaihi Narawi, sehari tu.

Berebak enggau nya, iya madahka Opis Rampa Menua (DOE) Malaysia begulai enggau Opis Pengeraja Asal enggau Rampa Menua (NREB) Sarawak sereta ejensi bekaul nambahka pengawa matau ngena dron ba kandang endur ti berisiko baka Kuala Baram enggau Mukah dikena nyidi kelai tumu penusah angus nyadi.

“Kitai ngena dron dikena matau kandang endur ti berisiko ngambika atur lengkas ulih dipejalai nyema bisi kelai sebun asap,” ku iya nerang.

Berindik enggau nya, iya ngelalau mensia mayuh nyeliahka diri ari betunu chara tebuka sereta nentuka api padam abis sebedau ninggalka kandang endur nya.

“Mensia mayuh dilalau ngambika enda ngaul diri ba pengawa nunu chara tebuka sereta nentuka api dipadamka abis dikena nyeliahka penusah angus balat agi nyadi,” ku iya nyemetak.

Berebak enggau nya, Uggah ke mega Chairman Komiti Mutarka Penusah Ngenyit Nengeri Sarawak (JPBNS) madah, perintah nengeri mega benung matau isu suntuk bekal ai ke udah berengkah nuntung sekeda kandang menua, kelebih agi ba tebing tasik enggau dalam menua, nyengkaum Betong.

“Taja pia, enti gaya hari majak angat dalam kandang berapa hari tu ila, mayuh genturung pendiau kelebih agi di menua pesisir enggau kandang menua dipelabaka deka ngasaika penanggul suntuk bekal ai lalu nya deka nyadi batang fokus ke patut diputarka,” ku iya.

Iya mega nerangka atur nanam awan semina deka dipejalaika nyadi chara kepenudi, bepanggai ba gaya awan ti engkeman. — RBI

MIRI, 29 Mac — Sebuah kerita ngelantak belakang sebuah lori sapu jalai alun udah nyadi ba mua Balai Bomba enggau Penyah Penusah (BBP) Sentral Miri, pagi kemari.

Ba penusah ke nyadi urung pukul 9.12 pagi nya, deriba kerita nya diripotka bisi bakal mimit pengudah enda mujur nyeliahka kerita berat nya.

Tim EMRS ke besemak terus dianjung ngagai endur nya ngambika ulih meri perubat ngenyit.

Nangkan ke nya, tudah ke agi dapat udah nya diengkah ba perengka sukung rekung sebedau dianjung ngagai Sepital Miri ngambika diperubat enggau silik agi.

Syukur amat tudah semina bakal mimit aja lalu palan penusah nya nyadi besemak enggau balai bomba ngemuntangka pengawa meri bantu enggau lengkas. — RBI

MIRI, 30 Mac – Penyelai enggau pemanah rampa menua Ai Wong Three Sisters di Ulu Baram nyadika iya siti ari palan ke jarang ditemu, ukai semina di Sarawak aja tang mega di Malaysia.

Kaban Kunsil Nengeri (ADUN) Telang Usan, Datuk Dennis Ngau madah, sitak nya ngembuan potensial besai dikemansang nyadi taman negara enggau palan dagang temuai antarabansa bepelasarka ekodagang temuai.

Nitih ku iya, kandang endur ke bepalan entara Long Suling, Long Liam Keliman, Long Keluan enggau Long San ngembuan rampa menua ke ngalitka ati enggau struktur ai wong ke nyelai sereta dikelingi kampung asal ke agi dijaga, nyadika iya engkeman dikemansang nyadi palan ekodagang temuai bekelas tinggi.

Ku iya, potensial kandang menua nya mega udah nerima kelala antarabansa lebuh iya dikemeratka Kaunsil Dagang Temuai Sarawak dalam promosyen dagang temuai global, nyengkaum ba World Travel Market di London enggau ITB Berlin di Jerman.

“Tu nyata ngayanka palan tu ngembuan daya penarit global ke besai,” ku iya lebuh bejaku ba Pengerami Makai Lemai SMK Long Lama beserimbai enggau genap 60 taun Jubli Perak, kemari.

Ku iya nambah, pengangkun nyadi taman negara ukai semina deka ngetanka penyelai kandang menua nya, tang mega bisi potensial nyungkak ekonomi menua tu nengah penatai temuai.

Berebak enggau nya ku iya, pemansang ti diperambu enggau meruan deka nentuka penguntung nya ulih diasaika komuniti lokal enggau enda ngeruga pengelantang rampa menua.ADUN Telang Usan…Datuk Dennis Ngau

Info asal kredit TVS

BINTULU, 29 Mac — Perintah Sarawak majak ngenegapka pemansang menua pesisir enggau penembu tiga projek ari baruh Program Transformasyen Menua Pesisir (RTP) di Pelilih Menua Sebauh, lalu ari nya ulih ngangkatka perengka guna pemun enggau pengelantang pendiau peranak menua nya.

Menteri Industri Pemakai, Komoditi enggau Pemansang Kandang Menua Sarawak, Dato Sri Dr. Stephen Rundi Utom madah, projek nya ngaul kereja ngangkatmanah infrastruktur nyengkaum ngaga jalai penama nuju Rumah Egar Abdil di Sungai Sebetau, jalai meraka ari Rumah Sta Liban di Sungai Ensaie Ulu sereta mega perengka guna palan entepan entukar di Rumah Roslind Sanggau Ragai ba Sungai Lanying Gerong.

Nitih ku iya ke mega Kaban Kunsil Nengeri (ADUN) Kemena, pengawa bejalaika projek nya meri empas ke besai ngagai komuniti menua pesisir nengah chara nyendiaka perengka guna ke lebih lantang, likun sereta teratur ari ke udah.

“Perintah Sarawak komited nentuka pemansang menua pesisir dipejalaika enggau komprehensif sereta terus nyengkaum nengah projek RTP ti meri penguntung terus ngagai rayat,” ku iya rambau penemuai kereja ngagai palan projek RTP di Rumah Roslind Sanggau, Sebauh, kena Hari Lima tu tadi.

Berebak enggau nya, iya mega ngemeratka pemesai guna peranak menua pesisir seruran nyikap diri napi pekara ke enda tentu dalam dunya, nyengkaum empas ari penyarut ke nyadi di Asia Barat ke bisi potensi ngeruga rentayan bekal pemakai.

“Isu pengelikun pemakai meseti seruran diberi perati.

“Komuniti mega diperansang ngemeranka chara bekelimat nyadika singkang dikena nyikap diri napi sebarang pengujung,” ku iya nerang.

Ba pemansang ke bekaul, Dato Sri Dr Rundi mega ngemata pengawa nyuaka kereban dikena ngaga rumah ari baruh Projek Bantuan Ehsan Kebakaran Rumah (BEKR) ngagai peranak Rumah Lapie Lai di Sungai Binai, Sebauh ke dituntung penusah angus apin lama ke udah. — RBI

MIRI, 29 Mac — Pengerami Ngintu Genap 60 Taun Jubli Intan SMK Long Lama di Meritz Hotel, Miri malam kemari udah diatur enggau chukup pengeransing, ngempuruka staf sekula, alumni enggau temuai dipebasa dalam pengerami ke chukup besai reti.

Pengerami nya ukai semina ngerami sejarah penyulut sekula nya, tang mega mantaika pemesai guna pelajar nyadi pelasar pemansang nengeri jemah ila.

Pengerami nya dipunka enggau pengawa sembiang, lalu ditangkanka enggau jaku pengelalu ari Chairman Pengatur, Margaret Uding Nawan, lalu ditangkanka enggau jaku pengelalu ari Kaban Kunsil Nengeri (ADUN) Telang Usan Dato Dennis Ngau ke nyadi Penaung Gerempung Alumni SMK Long Lama enggau

Premier Sarawak, Datuk Patinggi Tan Sri (Dr) Abang Haji Abdul Rahman Zohari Bin Tun Datuk Abang Haji Openg mantaika komitmen perintah nengeri dalam ngenegapka sektor pelajar, kelebih agi di menua pesisir.

Iya nyemetak madahka penemu nyadi pelasar ke beguna dalam nempa pengidup rebak baru jemah ila sereta nyadi pelasar ubah pengidup ke manah agi.

Kenu ku iya, pelajar ukai semina medium dikena meri penemu aja, tang mega nyadi kunchi besai ngagai penyulut nengeri tu.

Berindik enggau nya, YAB Premier mega bisi ngenang pasal pengawa perintah Sarawak dalam meri kelala skim pelajar enda bebayar ba renggat pelajar tinggi ungkup nembiak Sarawak ke patut.

Inisiatif tu ngembuan tuju deka ngelempungka tating belanja nembiak sereta nentuka mayuh agi peranak Sarawak bepeluang nampung pelajar ba renggat universiti enggau enda ditating penanggul belanja.

Berebak enggau nya, iya mega bisi madahka agih belanja penyampau RM150,000 dikena nyukung pemansang SMK Long Lama.

Ari penyampau nya, RM60,000 diungkup ngagai sekula, RM45,000 ngagai Gerempung Alumni SMK Long Lama, lalu RM45,000 agi ngagai Gerempung Apai Indai Pengajar (PIBG).

Dikearapka pemeri tu ulih ngemanahka perengka guna sereta ngenegapka pengawa bejalaika aktiviti pelajar ba sekula nya.

Pengerami nya udah nya diteruska enggau pengawa ngelancharka Jubli Intan enggau rasmi, lalu ditangkan enggau pengawa melah kek, nyuaka tepa pengingat enggau sesi begambar beraban nyadika kelai pengingat.

Sama bisi datai Menteri Perengka Pengangkut Dato Sri Lee Kim Shin, Sapit Menteri Pemansang Nembiak Lumba enggau Main enggau Orang Dagang Sarawak Datuk Dr Ripin Lamat, Ketuai Sekretari Politik Premier Sarawak; Dato’ Fazzrudin Abdul Rahman, Dato Anyi Ngau, Kaban Parlimen Baram enggau Galong Luang, Residen Bagi Menua Miri. — RBI

Sumber, photo — Sarawakku

MIRI, 29 Mac — Bagi Pansik Jenayah, Indu Opis Polis Pelilih (IPD) Miri bekerejasama enggau Sarawak Energy Berhad (SEB) Pampang Miri udah bejalaika operasyen besepadu dikena ngelaban aktiviti judi online enda beradat ti beoperasyen ngelingi pelilih Miri, kena Hari Lima.

Asil ari operasyen nya, atur ke terit dipejalaika iya nya mutuska bekal karan ngagai lima (5) buah premis ke dikelala bisi kaul enggau aktiviti judi online enggau nadai lisin ke entas.

Atur ngetuka bekal karan tu dipejalaika ari baruh atur Seksyen 21A(1), Akta Rumah Judi Tebuka 1953, nyadi pengawa ti terus dikena nagang pengawa salah guna premis komersial ungkup pengawa ti enda entas.

Operasyen tu ngayanka kerejasama strategik entara Polis Diraja Malaysia enggau penyendia perengka guna dalam ngenegapka pengawa neritka atur ngelaban aktiviti judi belalai ti majak ngerembai.

Polis DiRaja Malaysia beratika aktiviti judi nengah ‘online’ enggau berat laban meri empas ke enda manah ngagai mensia mayuh, nyengkaum penambah penanggul rama enggau pengawa salah.

Berindik ari nya, pengawa neritka atur baka tu deka terus dipejalaika ari sesiti maya ngagai sesiti maya. — RBI

Sumber, photo — Polis Pelilih Miri

KUALA LUMPUR, 28 Mac – Siku lelaki asal ari China diriman pengelama 14 hari ari baruh Akta Imigresyen berengkah ari 27 Mac nyentuk 9 April dikena mantu pansik ke silik agi, pengudah dipelaba bisi kaul enggau pengawa enda menuku ba sebuah palan bebelika barang di Bukit Jalil.

Ketuai Polis Pelilih Cheras, ACP Mohd Rosdi Daud madah, saspek beumur urung 20 taun ditangkap urung pukul 1.28 lemai berindik ari ripot ke digaga siku orang.

Nitihku iya, penusah nya nyadi urung pukul 11 ​​pagi lebuh siku lelaki benung ba agu lelaki ba ringkat empat premis nya, sebedau sedarka saspek nguji deka ngerikod video ngena telefon binching ari bilik besepiak.

“Asil ari pengawa ngetan nya, polis ngerampas telefon binching saspek lalu pengawa meresa keterubah tetemuka sekeda video ‘kamah’ ba galeri iya,” ku iya nengah siti penerang sehari tu.

Ku iya, asil pansik tumu tetemuka saspek ngaku bisi kaul enggau penyalah nya sereta nadai ngembuan dokumen pejalai ti entas.

Kes tu dipansik ari baruh Seksyen 509 Kanun Keseksaan enggau Seksyen 6(1)(c) Akta Imigresen 1959/63. -RBI

SARIKEI, 28 Mac — Program Aum Besai Tiga Taun Sekali Ke-28 ungkup Serakup Dayak Indu Sarawak (SIDS) Pampang Sarikei udah mujur diatur ba Honey Restaurant, berengkah ari pukul 9.00 pagi ti digulu 130 iku raban.

Program tu berengkah enggau pengawa ngerejista semua kaban sebedau diteruska enggau pengawa belagu lagu kebangsaan Negaraku, lagu nengeri Ibu Pertiwiku enggau lagu rasmi SIDS.

Pengerami nya udah nya ditampung enggau pengawa nyebut leka sampi minta berekat, ditangkan enggau jaku pengelalu ari Chairman SIDS Pampang Sarikei, Rosy Jita Sidok.

Aum nya mega bisi berandauka sekeda agenda besai nyengkaum pengawa ngentaska minit Aum Besai 2023, mantaika ripot Sekretari enggau Tukang Wang, pekara bukai, nyiri Chairman Aum enggau pengawa milih Kaban Komiti (Exco) baru ungkup sesi 2026/2028.

Kelimpah ari nya, pengerami nya mega ngemataka jaku ari Chairman ungkup sesi nya.

Taja pia nadai pengawa bepilih baru digaga, pangku pengawa nya mengkang enda diperebutka.

Sama bisi datai ngerichahka agi program nya, Augustine Lim anak Entoi ke nyadi Chairman SDNU, Bidai anak Gisang ke nyadi Penyanding Penemu, enggau Nanang anak Jelum ke nyadi Sapit Chairman SDNU Sarikei.

Program tu tembu enggau pengawa makai tengahari (merarau), lalu enggau nya ngerapitka kaul pangan diri entara kaban sereta ngenegapka agi pangku pengawa gerempung SIDS ba kandang menua Sarikei. -RBI