KAPIT, 12 April — Dato Seri Alexander Nanta Linggi, Menteri Kereja Raya ke mega Kaban Parlimen Kapit meri besai terima kasih sereta berasai teperansang meda pengawa ti bisi reti entara anak indu iya, Lilian Binjan Nanta, enggau kaling iya, Jared Jimbau Chabu, ba pengerami melah pinang ti penuh enggau adat enggau main asal di Kapit.

Nitih ku iya, pengerami nya nyadi lebih manah agi lebuh iya dipejalaika penuh nitihka adat enggau main asal komuniti Dayak Iban, lalu enggau nya ngayanka pengaya pesaka budaya, identiti enggau nilai ti majak ditan ari setiap rebak ngagai rebak baru.

Ku iya nambah, entara kenang ti chukup besai reti iya nya pengawa ngena perau ba sepemanjai Sungai Batang Rajang, tradisyen ti nyelai ti penuh enggau simbol sereta pemanah budaya Iban.

Nanta madah munyi nya ba jaku ke ditulis iya ba Facebook iya dikena ngading pemanah adat pesaka Dayak beserimbai enggau pengerami melah pinang anak iya.

Ku iya, munyi sungai ti sunyi, baris perau ti mindah begulai sereta semengat begulai ti terang nyata bendar sepemanjai pejalai ngayanka pemanah enggau integriti budaya komuniti lokal.

Ku iya nerang, tradisyen nya ukai semina nyadi simbolik aja, tang nyadi kelai bebasaka adat, pun budaya enggau penegap kaul diri sebilik ke meruan.

Muak ke lemai, pengawa nerima pengabang diatur dalam gaya ti chukup ramai, rindang sereta lantang enggau penatai diri sebilik, bala bakih enggau komuniti Kapit ti datai begulai ngerami kenang besejarah tu.

Iya mega ngenataika pengaga ati enggau terima kasih ngagai semua piak ti udah nyaup terus tauka enda terus ngagai pemujur pengawa nya.

“Tetiap penatai, pengepuh, sampi enggau sukung ke diberi chukup besai reti lalu ngasuh pengingat tu manis agi dikenang sepemanjai umur,” ku iya.

Iya mega besampi ngambika semua pemanah ati ti dituang dibalas enggau pengasih enggau berekat ti mayuh. -RBI

KUCHING, 12 April — Sapit Menteri Besai, Datuk Amar Haji Fadillah Yusof, madahka misyen PETRA Tim Zon 2026 Sarawak ti berengkah tumu pukul 6.30 pagi tu fokus khas ngagai pengawa ngenegapka sektor kuasa enggau ai ti komprehensif di nengeri tu.

Nitihku iya, misyen nya ukai semina ngaul pengawa matau ba palan, tang mega nyadi pelasar beguna dikena beratika pemanah pengawa bejalaika inisiatif kuasa tau dikena baru enggau sistem bekal ai ti meruan, kelebih agi di Batang Ai, Kuching enggau Samarahan.

Ku iya, program nya mega digulu raban pengatur Opis Menteri Transformasyen Kuasa enggau Transformasyen Ai (PETRA), nyengkaum Sekretari Besai, Dato Sri Mad Zaidi bin Mohd Karli, begulai enggau 29 iku pemekuh media ti bejalai urung 260 kilometer ngena bas.

“Pejalai tu deka ngetu ba R&R Jelukong sebedau kami neruska misyen ngagai Tekat Ai Hidroelektrik Batang Ai ngabas pemansang enggau operasyen kuasa ba kandang menua nya,” ku iya.

Ku iya nambah, Batang Ai nyadi palan strategik ti endur ngaga projek solar melepung hibrid pemadu besai di Malaysia, ti begulaika pemansut hidro enggau solar nyadi singkang dikena ngenegapka transisyen ngagai kuasa gadung.

Ku iya nambah, tekat ai nya mega nempa sejarah nyadi tekat ai ‘concrete-faced rockfill dam’ (CFRD) keterubah di Sarawak enggau Pulau Borneo.

Dalam pemansang ke sama, iya madahka misyen nya mega nyengkaum agenda tanggungpengawa rama korporat lebuh raban nya deka ngemataka pengawa nyuaka pemeri ari Sarawak Energy Berhad (SEB) ngagai rumah sembiang di Batang Ai.

“Bantu tu dikena nyukung aktiviti jalai pengarap sereta mega pengawa masang sistem solar atas perabung dikena nentuka rumah sembiang ngasaika bekal kuasa ti entap sereta meruan agi,” ku iya. -RBI

SARATOK, 12 April — Pengawa ngatur Program Meri Taklimat enggau Penerang Strategi Pemansang Pengudah COVID-19 2030 (PCDS 2030) ungkup sitak Kunsil Nengeri (DUN) N39 Krian dipeda nyadi pelasar ti beguna dalam nerangka tuju pemansang nengeri tu ngagai komuniti lokal.

Pengawa ke diatur ba Balai Mensia Mayuh Sri Krian nya inisiatif Opis Sekretari Politik Premier Sarawak enggau kerejasama Opis Pelilih Saratok sereta Palan Servis ADUN N39 Krian.

Nitihka penerang ari PBB Krian, program nya betuju ngenataika penerang bekaul enggau batang polisi enggau inisiatif Perintah Sarawak terus ngagai rayat.

“Maya program nya, beberapa siri randau udah dikenataika ti mungkur batang polisi enggau inisiatif Perintah Sarawak,” ku penerang nya.

Licha nya dikenataika bala Sekretari Politik ngagai Premier Sarawak enggau pengari ejensi perintah ti bekaul, lalu enggau nya ulih meri tinjau komprehensif sentang pengawa bejalaika agenda pemansang ari baruh PCDS 2030.

Pengawa nutup pengerami nya dipenyadika Kaban Kunsil Nengeri (ADUN) N39 Krian, Friday Belik.

Nitihka penerang nya, dikearapka pengawa ngatur program baka nya ulih meri pemaik ngagai komuniti lokal.

“Dikearapka semua pengawa bekunsi ke udah dikenataika ulih meri penguntung ngagai selampur komuniti ti begunaka bantu,” ku penerang nya nerang.

Sama bisi datai ADUN N38 Kalaka, Tuan Haji Mohamad bin Duri, Sekretari Politik Premier Sarawak iya nya Abdul Samat bin Ghani, John Nyigor, Bell Bernard Aggan enggau Fridah Osman sereta Pemesai Pelilih Saratok, Mohamad Dino bin Amid, begulai enggau ketuai opis perintah, ketuai komuniti enggau ketuai raban bansa. — RBI

LIMBANG, 12 April 2026 — Pemansang Rangau Valley dikearap nyadi pelasar besai penumbuh baru di Limbang nengah konsep pengawa berumah moden, palan pentadbiran enggau pemansang besepadu ti diperambu enggau strategik.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madahka projek nya ngembuan sejarah kediri empu lebuh asal iya dikemansangka ari baruh Perintah Besai, tang langkar iya enda mesra pemeli enggau orang ke nguan projek nya.

Ku iya, Perintah Sarawak udah nya ngambi alih projek nya lalu ngemansangka baru enggau chara ke lebih bekualiti sereta ngemeratka pengelantang rayat.

“Alhamdulillah, sehari tu kitai ulih meda rumah ganti rumah ke udah dikemansangka dulu agi ari tu enggau rampa menua ke manah agi sereta diperambu,” ku iya lebuh bejaku rambau nemuai ngagai palan projek Palan Pentadbiran Bersepadu (IAC) Limbang enggau pengawa mansik baru Projek Pengawa Berumah Lembah Rangau ditu, kemari.

Ku iya, entara batang komponen pemansang nya nyengkaum Palan Pentadbiran Bersepadu (IAC) Limbang, pemansang komersial nyengkaum hotel kelimpah ari rangkaian sambung terus ngagai mengeri Limbang nengah konsep tumpuk pendiau kurang karbon.

“Rangau Valley bepalan ba tengah-tengah entara Limbang lama, Limbang ke diatu enggau Limbang baru, nyadika iya palan penumbuh ke strategik,” ku iya.

Berebak enggau nya, Abang Johari meri jamin pemeli asal rumah ba kandang menua nya semina deka begunaka terus mayar duit injau ke udah bisi taja pan rega makit rumah diatu udah niki ngagai entara RM353,000 ngagai RM361,000.

Iya ngemeratka chara Sarawak ti ngemeratka pengawa berumah bekualiti ari pemansang pemayuh tubuh ti enda ngelantangka peranak.

Berebak enggau nya, iya madahka Padang Bilun Limbang deka dikemesai ngambika bilun ke besai agi baka Boeing ulih sangkai.

Ku iya, nengah inisiatif Air Borneo, tiga buah bilun jet Boeing dipelaba ulih beoperasyen manggai bulan Julai tu dikena nyambung Sarawak enggau Kuala Lumpur, Singapura, Kota Kinabalu enggau Jakarta.

Ku iya, atur nya mega nyukung pemansang sektor dagang temuai pengerai enggau penambah sepital moden ba kandang menua Batu Lintang enggau Terubun Jaya ti disikap enggau perengkaguna perubat pemadu baru sereta pengelandik.

Abang Johari mega meri besai terima kasih ngagai ‘Perbadanan Pembangunan Perumahan’ (HDC), piak pengatur enggau kunteriktor ti mujur nembuka pemar pemansang projek nya.

Sama bisi datai Sapit Premier Sarawak Datuk Amar Awang Tengah Ali Hasan, Sapit Premier Sarawak Datuk Amar Dr. Sim Kui Hian, Sekretari Perintah Nengeri Sarawak Datuk Amar Mohamad Abu Bakar Marzuki, Sapit Menteri Perengka Pengangkut Datuk Hasbi Habibollah, Sapit Menteri Industri Pemakai, Komoditi enggau Pemansang Wilayah Sarawak Datuk Dr Abdul Rahman Ismail enggau Chairmen HDC Abdul Yaakub Arbi. — RBI

JULAU, 12 April – Program Polis Komuniti “Besatu Nagang Jenayah” ke diatur Indu Opis Polis Pelilih (IPD) Julau di Rumah Panjai Debok, Nanga Dong mujur ngempuruka mayuh bengkah ejensi enggau komuniti lokal dalam pengawa ngenegapka pengelikun enggau pengelantang komuniti.

Ketuai Polis Pelilih Julau, DSP Alif Haiqal Ramesh Abdullah, madahka pengawa milih Rumah Panjai Debok nyadi palan ngatur program taun 2026 chukup besai reti laban rumah panjai nya ukai semina endur diau aja, tang mega kelai penyerakup, pesaka enggau penegap komuniti.

Nitih ku iya, ba dunya ke majak mayuh pemar diatu, mensia mayuh enda ulih belampung ati laban penyalah tau nyadi ba dini-dini endur lalu pengawa nagang iya bepun ari penyedar enggau pengawa begulai ba renggat komuniti.

“Aku deka meri pengaga ati enggau terima kasih ke ngagai Datuk Larry Sng Wei Shien ke mega Kaban Parlimen Julau, Tuai Rumah Debok sereta mega JKKK enggau Biro Indu Nanga Dong ketegal kerejasama rat ngemujurka program ke chukup besai reti tu,” ku iya.

Tampung DSP Alif, program tu ngembuan tuju iya nya dikena nambahka penyedar pasal pengelikun, gaya jenayah, penanggul pengerai enggau chara nagang.

“Ari program tu, kitai ulih ngangkatka kerejasama entara komuniti enggau piak bekuasa lalu kuasa ngagai peranak rumah panjai nyadi baris mua pengelikun nengah chara ngerembaika penerang sereta ngelaban pengawa salah.

“Pia mega, ngaga kaul enggau opis perintah, ejensi enggau peranak rumah panjai,” ku iya.

Program nya mega bisi mantaika bemacham isi nyengkaum licha jenayah komersial ari Polis DiRaja Malaysia (PDRM) ti mungkur pengawa nipu nengah ‘online’ enggau penyalah trafik.

Kelimpah ari nya, Ejensi Nagang Dadah Kebangsaan (AADK) Bagi Menua Sarikei bisi ngenataika penerang pasal salah guna dadah enggau utai ke enda dikemendar.

Sama bisi diatur iya nya pengawa meri penerang senentang penusah nginsap enggau vaping ari Opis Pengerai Bagi Menua Sarikei enggau penerang pengelikun penusah angus ari Opis Bomba Bintangor.

Berebak enggau nya, program tu disukung penyereta Agenda Nasional Malaysia Sihat ti nyendiaka bemacham bansal pemandang enggau pengawa meresa pengerai ungkup peranak menua nya.

Ngenang silik agi, DSP Alif Haiqal nyemetak madahka program baka tu ukai semina pelasar dikena ngenataika penerang aja, tang mega ngembuan tuju deka nambahka penyedar, ngenegapka semengat kerejasama sereta nerenakka nilai penyerakup entara komuniti.

“Pengelikun ukai tanggungpengawa polis aja, tang tanggungpengawa semua orang.Kitai patut bejalaika tanggungpengawa begulai dalam nagang penyalah sereta nyaga komuniti,” ku iya nyemetak.

Iya mega meransang peranak rumah panjai ngambika proaktif betanya, bekunsika penerang sereta ngenataika sebarang pengirau ati ngagai piak bekuasa dikena nentuka pengawa salah ulih ditagang tumu.

Berebak enggau nya, iya ngarapka chara kerejasama entara PDRM, pengari rayat enggau opis sereta ejensi perintah ulih dikerembaika agi dikena bejalaika mayuh agi program pengelikun komuniti ba kandang rumah panjai, kelebih agi ba sitak Parlimen P.209 Julau jemah ila. -RBI

JULAU, 12 April 2026 – Kaban Parlimen Julau, Datuk Larry Sng Wei Shien minta komuniti rumah panjai di Nanga Dong ngerebut peluang dalam sektor dagang temuai komuniti nengah chara ngemansangka rumah dagang temuai dikena ngulihka penatai pemisi tambah.

Ku iya, kandang menua Nanga Dong ngembuan potensial ke besai nyadi palan dagang temuai, kelebih agi ba kandang endur ai wong enggau sungai ke suah nyadi palan memarin maya ujung minggu.

“Mayuh temuai datai ukai semina ari Julau aja, tang mega datai ari luar kandang menua tu.Tu peluang ekonomi ke besai sereta patut diambi ulih komuniti menua tu,” ku iya rambau Program Kepolisan Komuniti Begulai Nagang Jenayah di Rumah Debok, Nanga Dong, kemari.

Nitih ku iya, siti ari batang penanggul maya ke diatu iya nya kurang perengkaguna endur diau, seraya mayuh temuai udah ngayanka pengerindu deka bemalam.

Berindik ari nya, iya meri langgur penemu ngambika sekeda bilik puang ba rumah panjai digaga nyadi bilik temuai enggau enda ibuh ngaul selampur rumah.

“Ukai semua pintu bilik patut diubah nyadi rumah temuai, semina sekeda aja chukup nyadika pemungkal. Enti mujur, tentu deka matak mayuh agi orang ngambi bagi,” ku iya nerang.

Ku iya nambah, perintah nengah inisiatif Malaysia MADANI mega nyendiaka bemacham bantu baka Program Sejati MADANI dikena ngangkatmanah perengka guna rumah panjai ngambika lebih lantang sereta engkeman endur nerima penatai temuai.

Taja pia, iya ngaku batang pemar iya nya ari sukut mentaliti sekeda peranak ke agi bedau tebuka ati bekunsi ruang enggau orang luar.

“Pekara tu patut diubah laban enti kitai enda berani berubah, kitai deka muai peluang dikena ngulihka penatai pemisi,” ku iya nyemetak.

Berebak enggau nya, iya mega mantaika pengeran diri deka mantu ari sukut sukung belanja, nyengkaum ungkup pelajar anak mit enggau guna pemun komuniti.

Iya mega nyemetak madahka projek nupi jelu tupi baka manuk, ikan enggau babi udah mayuh dikemeranka sereta napi semekih enggau rega makit ti enda tetap.

“Ba lansa bukai, sektor dagang temuai komuniti baka rumah agi mayuh ruang ke patut dipansik sereta bisi potensial meri pulai ke manah agi,” ku iya.

Ba program ke sama, iya bisi nyuaka agih belanja ngagai sekeda gerempung nyengkaum JKKK Rh Debok Nanga Dong, Biro Indu Rh Debok, Klinik Pengerai Julau, KEMAS Julau, SMK DPHA Gapor, Opis Pelilih Julau enggau Kelab IPD Julau.

Penyampau agih belanja ke diagih sehari nya iya nya RM53,000. -RBI

LONDON, 11 April — Pengarap Arsenal deka menang ba Liga Premier England nerima keruga ke besai pengudah alah 1-2 ngagai AFC Bournemouth ba main ke nyadi ba Stadium Emirates, malam tadi.

Tim temuai ti dilatih Andoni Iraola mandangka main ti chukup manah sereta teratur mai pulai tiga puin ti berega, terima kasih ngagai gol ari Eli Kroupi enggau Alex Scott.

Bournemouth muka gol nengah Kroupi ti ngemasukka gol, lalu enggau nya ngasuh bala peminat Arsenal tekenyit.

Taja pia, Arsenal mujur ngenyamaka gol sebedau jam ngetu lebuh Viktor Gyokeres enggau lantang ngemasukka gol ari sipak penalti.

Taja pan mujur ngenyamaka gol, tang main tim Arsenal dipeda kurang ngasuh ati pechaya enggau gaya main ti lubah sereta kurang kreativiti, lalu enggau nya ngundang ati enda puas ba bala peminat.

Menijar Mikel Arteta ke sebedau tu minta bala peminat meri sukung ke tegap mega dipeda nguji ngelempungka gaya nya lebuh panjung sukung betukar nyadi sebana.

Ba lansa bukai, Bournemouth tampak agi andal sereta ngatur serang sepemanjai main nya.

Alex Scott nyadi hero tim lebuh iya ngemasukka gol pemenang ba minit ke-74 ngalahka penyaga gol Arsenal, David Raya.

Pengalah nya nyadi ketiga main Arsenal dalam empat main kepenudi sida ba semua pekit, lalu enggau nya ngerusak juluk sida ba pengawa berebutka gelar.

Pemutus nya mega muka ruang ngagai Manchester City nutup bida ngagai enam puin enggau main ke deka dipejalaika, sebedau betapi ba Stadium Etihad minggu baru. -RBI

Pengudah sunyi enda lama dalam industri muzik, penyanyi Iban ti bepenau, Dyanne Oshield diatu datai baru ngagai panggau industri muzik menua tu enggau pengawa ngelancharka single pemadu baru iya ti diberi nama “Nuan Nadai Endur Mantah”.

Penatai tu ukai semina ngelancharka lagu baru, tang mega nyadika lambang pengeransing enggau dedikasyen iya ti baru dalam neruska pengawa seni iya ti udah mai iya tebilang sebedau tu.

Nitihka penerang Dyanne, timpuh belelak ke diambi sebedau tu dikena penuh ngagai dagang ke dipejalaika iya, kelimpah ari napi pemar pengerai nyengkaum isu penyakit ampus enggau berat tubuh.

Taja pia, iya diatu udah pulai enggau gaya pengerai ke manah agi asil ari pengawa berubat ke enda ngetu sereta disiplin ngintu diri.

“Pengerai nyadi reta ti beguna ngagai siku penanyi. Enti nadai stamina ti manah, tusah deka meri pemerindang ti pemadu manah,” ku iya nerang lebuh dirandau Ruai Berita Iban.

Besenyata enggau penetap ati ti tinggi, Dyanne mega nengah transformasyen fizikal ti ngalitka ati lebuh iya mujur ngurangka berat tubuh ari 85 kilogram ngagai 70 kilogram nengah chara makai ti dijaga, chara bepuasa beselang-selang sereta matau pengerai ti konsisten.

Single “Nuan Nadai Endur Mantah” ti deka datai mega mai reti ti besai dalam pejalai seni iya.

Lagu tu deka dikeluarka nengah channel Embat Lala ari baruh platform ‘Panggau Buluh Pengerindu’, siti singkang baru enti dibandingka enggau chara iya sebedau tu ti lebih fokus ngagai channel YouTube iya empu.

Taja pan dikeluarka ba baruh platform nya, Dyanne bebendar madahka diri agi mengkang nyadi artis ngatika diri sereta nadai dikaitka enggau sebarang kompeni rekoding, lalu enggau nya meri ruang ngagai iya gawa enggau lebih bibas sereta tulin.

Utai ti narit ati, lagu tu agi ngetanka elemen balada ti nyadi identiti muzikal iya, lalu ditulis sereta dikarang sepenuh iya empu.

“Ditengkebang diri empu ngasuh pengawa nya semak agi enggau semengat peninga lalu ngayanka pengelurus dalam pengawa,” ku Dyanne.

Enda ngetu ba endur nya aja, Dyanne mega merambu singkang ke besai agi dalam karier iya taun tu enggau pengawa ngasilka beberapa iti lagu baru nyengkaum dua iti lagu English ke disadang deka dirikod di Eropah.

Kelimpah ari nya, iya mega deka mantaika lagu dalam gempung jaku English enggau Sepanyol, kelimpah dua iti agi lagu dalam Jaku Iban.

Ke lebih narit ati, siti single ke diberi nama “Cosmic Flame” enggau konsep pop mega benung ba renggat perambu deka dikeluarka.

Lagu tu mega ditengkebang iya empu, enggau pengawa ngaga video muzik disadang deka nyadi di Eropah, lalu enggau nya mandangka pemerat iya dalam rembus ngagai makit entarabansa.

Ku Dyanne madah ngagai Ruai Berita Iban, iya mega merambu pulai ke Eropah urung tengan taun tu, sekalika dalam bulan Jun tauka Julai, ungkup tuju ngerikod sereta ngerembaika agi pejalai seni iya ba renggat global.

Enggau pengeransing baru sereta perambu ti lebih teratur, pemulai Dyanne Oshield dipeda nyadi pengangkat ti balat dianti-anti.

Dyanne Oshield ukai semina nguji ngenegapka penuduk iya dalam industri muzik menua tu, tang mega mengkang komited ngangkatka karya dalam Jaku Iban ngagai panggau ke lebih luas. — RBI

KUCHING, 11 April – Sapit Menteri Pemansang Mengeri enggau Pengeraja Asal Sarawak, Datuk Haji Len Talif Salleh madah, pengawa bejalaika program ngintu rampa menua terus ditegapka nengah pengawa nyiri Ranjer Komuniti sereta ngelancharka kimpin nyaga jelu siga di nengeri tu.

Nitihku iya ti ngarika Premier Sarawak, Datuk Patinggi Tan Sri (Dr) Abang Haji Abdul Rahman Zohari Tun Datuk Abang Haji Openg, iya udah nembuka dua batang agenda iya nya Pengawa Ngenataika Surat Chiri Renjer Komuniti, Flag Off Operasyen Begulai Khazanah (OBK) sereta ngelancharka program “1,000 Site Visit To Save Wildlife” tikas negeri Sarawak di Kampung Semeba, sehari tu.

Ku iya, sepenyampau 325 individu nerima surat chiri nyadi Renjer Komuniti, lalu kimpin “1,000 Site Visit To Save Wildlife” dikenataika Kaunsil Penyaga Kampung Sarawak (SFC) ngaul 1,000 penemuai penerang di serata nengeri dikena ngenegapka pengawa nyaga jelu siga.

“Program tu dipejalaika nengah sesi ngaul komuniti, randau enggau pemandang pelajar ti disukung sistem ngeripot digital ‘Footprints’ dikena nentuka pengawa matau enggau terang,” ku iya.

Ku iya, pengawa bejalaika program nya ngaul endur ke ditagit di kandang menua Kuching (270), Sibu (270), Miri (260) enggau Bintulu (200) dikena nentuka kerejasama rat komuniti ba pengawa nagang aktiviti ke salah sereta nentuka pengelantang biodiversiti menua tu ungkup rebak dudi hari.

Ba pengerami ke sama, pengawa nyuaka Agih Belanja Pemindah Fiskal Ekologi ungkup Pemuliharaan Biodiversiti (EFT) 2026 ngagai Nengeri Sarawak sepenyampau RM13,444,000 mega udah diatur ari Sekretari Besai Opis Menteri Pengeraja Asal enggau Rampa Menua, Datuk Wira Anis Rizana Mohd Zainuddin ngagai Ketuai Bagi Pentadbiran MUDeNR, Haji Mahri Sepawi.

Pengerami nya bela digulu Menteri Pengeraja Asal enggau Pengelikun Rampa Menua, Dato Sri Arthur Joseph Kurup, begulai enggau temuai dipebasa ke bukai nyengkaum pengari ejensi enggau komuniti kandang menua nya. -RBI

PADAWAN, 11 April — Pengawa ngenegapka dokumentasyen tanah Hak Adat (NCR) Bidayuh majak chakah dipejalaika nengah kerejasama rat entara komuniti, ketuai lokal enggau ejensi bekaul dikena nentuka hak ngempu adat terus dijaga sereta diaku nengah chara undang-undang.

Sapit Menteri Perengka Pengangkut (Langit & Jalai) Sarawak ke mega Kaban Kunsil Nengeri (ADUN) N19 Mambong, Datuk Dr Jerip Susil nyemetak madahka pengawa bejalaika dokumentasyen tanah nyadi inisiatif ke besai reti dalam nyeliahka penyarut, tuntut beserak sereta nentuka perambu pemansang ulih dipejalaika enggau lebih teratur, sistematik enggau meruan.

Iya madah munyi nya lebuh bejadika Pengerami Pemadah Projek Dokumentasi Tanah Adat Bidayuh ke diatur Serakup Bansa Dayak Bidayuh (DBNA) ke nyadi ba Kampung Emperoh Garung, sehari tu tadi.

Nitih ku iya, chara ti nyemetak sereta sepenemu begulai ba renggat komuniti rumah panjai meseti nyadi pekara ti dikemerat dikena nyeliahka sebarang saru penemu, kelebih agi bekaul enggau pengawa bejalaika projek sereta aspek pentadbiran enggau bayar.

“Kerejasama rat entara semua piak beguna amat dikena nentuka proses dokumentasyen tanah ulih dipejalaika enggau lanchar sereta meri pemaik ungkup timpuh ke panjai ngagai komuniti,” ku iya.

Berebak enggau nya, iya mega meri langgur penemu ngambika kandang endur ke bisi potensial endur ngemansangka pengawa betanam betupi dikemeratka dalam proses dokumentasyen, laban nya ulih nambahka rega ekonomi tanah sereta ngemuntangka pengawa merambu pemansang jemah ila.

Berebak enggau nya, Presiden DBNA, Datuk Ik Pahon Joyik madahka inisiatif nya pengawa bepelasarka komuniti dikena nentuka hak adat ulih didokumentasyen dalam tukuh pengempu ti entas sereta betukuh, lalu enggau nya meri jamin ngagai rebak dudi hari.

Ku iya nambah, program tu mega nyadi pelasar ke beguna ba pengawa meri penyedar ngagai komuniti senentang pemesai guna dokumentasyen tanah adat nyadi pelasar pemansang ke meruan ngagai komuniti Bidayuh. — RBI