MIRI, 12 April — Sarawak majak chakah agi ngenegapka pengelikun pemakai nengeri nengah chara ngemeratka pengawa nambahka pemansut padi sereta ngemansangka industri pemakai ke bisi nilai tambah ti komprehensif.

Menteri Industri Pemakai, Komoditi enggau Pemansang Kandang Menua, Dato Sri Dr. Stephen Rundi Utom madah, Tikas Pengelandik Ngatika Diri (SSL) padi nengeri tu ke diatu urung 21 peratus enti dibandingka enggau 46 peratus sebedau tu begunaka atur lengkas sereta chara ti lebih nembam.

Nitihku iya, perintah nengeri udah ngungkupka RM1 bilion ungkup pemansang infrastruktur betanamka padi, kelebih agi dikena nambahka kapasiti pemansut domestik sereta ngurangka bepanggai ba import padi.

“Penurun SSL tu berindik ari pengawa ngalih ngagai komoditi ti lebih meri penguntung baka minyak sawit.

“Nya alai, chara baru, strategik agi patut dipejalaika dikena ngaduka baru sektor tu,” ku iya.

Iya madah munyi nya rambau sesi bekunsi begulai enggau rayat ba Opis Betanam Betupi Sarawak Bagi Menua Miri, kena Hari Enam tu tadi.

Berebak enggau nya, pengawa ngemayuhka pun penatai pemakai mega ditegapka nengah pengawa ngemansangka kandang endur baru, nyengkaum tagit 20,000 hektar kebun nanas enggau 20,000 hektar nyiur dikena ngenegapka rentayan bekal pemakai sereta ngasilka nilai tambah ekonomi nengeri.

Ngenang silik agi, iya nyemetak madahka sektor betanam betupi Sarawak patut ngalih nuju model ke lebih moden, produktif sereta bepelasarka makit, enggau Opis Betanam Betupi Sarawak bejalaika tanggungpengawa ke besai dalam ngiring komuniti menua pesisir nuju chara betanam betupi ke lebih efisyen sereta kompetitif.

Naka ke diatu, lebih 2,000 iku pemesai opis udah dikerah dikena nentuka pengawa bejalaika polisi perintah ulih dikenataika enggau efektif ba renggat baruh.

Berebak enggau nya, pemujur menua baka Thailand enggau Vietnam patut nyadika penanda dalam pengawa ngenegapka daya besemekih ba sektor betanam betupi menua tu.

Iya nyemetak madahka semua inisiatif tu ti dipejalaika mandangka komitmen perintah Sarawak ti terus nentuka pengelikun pemakai nengeri tu meruan, kelimpah ari nyadika sektor betanam betupi siti ari pemansut besai penumbuh ekonomi jemah ila.

Nitihka ripot ari Unit Komunikasyen Mensia Mayuh Sarawak, atur tu setipak enggau strategi timpuh panjai perintah nengeri dalam ngenegapka pengelikun pemakai enggau meri kuasa ngagai sektor agro-pemakai nyadi tulang belakang ekonomi Sarawak.

KUCHING — Sebuah model bilun perang F4C Corsair Amerika diatu dipandangka tetap ba Galeri Indu Opis Pejilin Sarawak, pengudah diberi ex-Ketuai Pesuruhjaya Pejilin Sarawak, Kapten Zainuddin Tan Sri Hamdan.

Nitihka penerang, model bilun nya sebagi ari koleksyen iya kenyau ari iya berengkah gawa dalam industri penerebai bilun nyadi deriba bilun komersial enggau Malaysia Airlines Berhad.

“Pemeri tu kelai dedikasyen Kapten Zainuddin enggau komitmen ti terus dalam bidang pejilin enggau penerebai bilun.

“Model tu ukai semina disimpan aja, tang lebih agi ngayanka peneleba enggau pemeri iya sepemanjai iya ngaul diri dalam kededua bidang nya,” ku iya.

Pengawa nyuaka model nya diterima Penulung Ketuai Pejilin, Fong Voon Chon sereta dikemataka Ketuai Pejilin Sarawak, John Lim Boon Beng enggau Penulung Ketuai Pejilin Udara Sarawak, Jerome Lim.

Berebak enggau nya, model bilun nya dikearapka nyadi siti ari pematak batang galeri nya kelimpah nyadi malin enggau inspirasyen ngagai kaban pejilin, kelebih agi ba Pejilin Udara di Sarawak.

BINTANGOR, 12 April — Balai Bomba enggau Penyah Penusah (BBP) Bintangor bekerejasama enggau Unit Tabung Darah Sepital Sarikei udah ngatur Program Meri Darah Bil 2/2026 ti nyadi ba lobi balai nya, sehari tu.

Ketuai Balai Bomba enggau Penyah Penusah (BBP) Bintangor, PPgB Mahmudin Narudin, madahka program nya sebagi ari inisiatif Opis Bomba enggau Penyah Penusah Malaysia (JBPM) dalam nyukung kimpin meri darah kelimpah ari ngerapitka servis enggau komuniti.

Nitihku iya, sepenyampau 13 iku pemeri darah bisi datai nyereta program nya, tang semina lapan iku aja ari sida nya layak meri darah pengudah nengah proses meresa pengerai ti udah ditetapka.

“Program tu ukai semina mantu nambahka bekal darah ba sepital, tang mega mandangka komitmen JBPM dalam meri servis beprestasi tinggi, jampat sereta mesra ngagai komuniti,” ku iya.

Ku iya nambah, program ke bela digulu pemesai ari Unit Tabung Darah Sepital Sarikei bejalai enggau lanchar lalu nadai sebarang penusah ke enda manah nyadi.

Program baka tu dikearapka terus dipejalaika ari setiap maya dikena meransang mayuh agi orang datai ke mua nyadi pemeri darah ke ulih nyelamatka orang bukai. -RBI

BAU, 12 April — Empat iku lelaki ke beumur entara 20 ngagai 40 taun ditan dalam operasyen Bagi Tasat Jenayah Narkotik begulai enggau kaban Indu Opis Polis Pelilih Bau di Jalai Kampung Suba Buan, ditu, lemai ensanus.

Ketuai Polis Pelilih Bau, P/SUPT Mohd Haide bin A. Rahman madah, pengawa ngetan nya digaga urung pukul 10.30 malam ngagai 11.45 malam asil ari operasyen ke dipejalaika raban polis.

Nitihku iya, asil peresa nisih ai kemi keterubah tetemuka semua saspek positif dadah.

Semua sida udah nya ditan ari baruh Seksyen 15(1)(a) Akta Dadah Berbahaya 1952 ngambika atur ke bukai dipejalaika.

Berindik enggau nya, iya nyemetak madahka Polis Diraja Malaysia (PDRM) enda belembut ba sebarang tukuh penyalah ngaul diri dalam pengawa salah guna dadah.

Mensia mayuh ke bisi penerang bekaul enggau aktiviti dadah dipinta datai ke mua sereta meri penerang nengah Talian Hotline JSJN Bukit Aman ba lumur 012-208 7222 tauka Talian Hotline JSJN IPK Sarawak ba lumur 017-592 9211 dikena mantu pengawa ngemuntanka penyalah nya. -RBI

SERIAN, 12 April – Kaban Parlimen Serian, Datuk Seri Richard Riot Jaem madah, Dewan Kampung Hulu ke diangkatmanah ngena ungkus RM150,000 nengah Projek Transformasyen Menua Pesisir (RTP) diatu meri penguntung terus ngagai peranak menua nya.

Iya mega meri besai terima kasih ngagai semua piak ke bisi kaul nyengkaum kunteriktor, ejensi bejalaika pengawa enggau ketuai genturung pendiau, ketegal kerejasama rat sida nentuka projek ngangkatmanah dewan nya mujur ditembuka sereta ulih dikena penuh komuniti.

Iya madah munyi nya lebuh bejadika balai nya ba Pengerami Nyambut Syawal 2026, kemari.

Kelimpah ari nya mega, iya madahka pengerami nerima pengabang Aidilfitri ke baka nya bejalaika tanggungpengawa ke besai nyadi pelasar dikena ngerapitka kaul sereta nerenakka semengat beserakup ba peranak menua nya.

Pengerami ke diatur Komiti Pemansang enggau Pengelikun Genturung Pendiau (JKKK) Kampung Hulu nya, richah enggau bemacham aktiviti ke ngerinduka ati.

Tu nyengkaum pekit nganyam senupat, meriam buluh, pekayan Aidilfitri anak mit, bertutung renggat Kampung Hulu enggau chabut tikit benasit.

Sama bisi datai Penghulu Morshidi Bin Mohamad, KK Morshidi Loncheng, Kennidies nyadi pengari Opis Residen, Chairman Masjid Bagi Menua Serian Adha Bin Haji Mehli, Mustazamah Bin Bohari, Pemesai RELA Pelilih Serian enggau ketuai komuniti kandang menua nya. – RBI

LIMBANG, 12 April — Projek pemansang Palan Pentadbiran Bersepadu (IAC) Limbang deka nyadi tanda moden ti deka ngubah rampa pentadbiran pelilih menua nya lebuh iya diperambu tembu penuh dalam bulan November 2026.

Perengka guna bersepadu tu diperambu dikena ngempuruka mayuh bengkah ejensi perintah ba siti endur ke strategik, lalu enggau nya ulih ngangkatka pemanah pengawa meri servis mensia mayuh ngagai rayat.

Chara tu ukai semina ngemudahka pengawa ninting hari komuniti, tang mega optimumka koordinasyen entara jabatan sereta ngenyampatka proses pentadbiran.

Setipak enggau agenda transformasyen servis mensia mayuh Sarawak, pemansang IAC Limbang mega ngemeratka pengawa digitalisasyen sistem, ngena teknologi pintar enggau nanam chara gawa beprestasi tinggi ba raban pengereja pengawa perintah.

Inisiatif tu ngayanka komitmen perintah ti terus ngenegapka pengawa merintah ti efisyen, terang sereta responsif ngagai guna rayat, kelebih agi ba pelilih utara nengeri tu.

Enti udah tembu ila, IAC Limbang dikearap ulih nyadi pelasar ngagai penumbuh sosio-ekonomi kandang menua sereta ngenegapka imej pentadbiran perintah ti moden agi, inklusif sereta beratka rayat. — RBI

MIRI, 12 April – Ketuai Polis Pelilih Marudi, DSP Nor Aizan Jamil madah, tiga iku saspek ke beumur 63, 47 enggau 42 udah ditan riman tujuh hari nyentuk 17 April dikena mantu tasat kes saru timbal di Tinjar, Baram.

Nitihku iya nerangka, niat deka ngiga lauk nya betukar nyadi tragedi lebuh tudah ke beumur 20 taun bebadi pengudah ditimbak bakih iya empu ke salah sangka ngumbai iya jelu babas ba penusah nya malam Hari Empat nyin tadi.

Ku iya, tudah nembiak nya dientaska bebadi ketegal kena timbak ba rusuk kanan maya nerima perubat ba Klinik Pengerai Long Lama.

“Ba penusah ke nyadi urung pukul 8.30 malam kena 9 April tu tadi, tudah enggau tiga iku lelaki bukai nyengkaum siku orang tuai nurun ngiga ba kandang menua Long Tabing Atas Jaya, Tinjar ngena entukar pikap.

“Lebuh datai ba endur nya, saspek ke mai senapang patah dipelabaka bisi tepedaka siku rusa sebedau ngasuh entukar nya ngetu sereta madamka injin,” ku iya nengah sebengkah penerang.

Ku iya, saspek udah nya pansut ari entukar laban deka nyidi jelu nya, seraya nembiak nya enggau dua iku bakih bukai nganti dalam entukar seraya nengau ngena api pichit.

“Pengudah bejalai urung 10 minit sereta urung 80 meter ari entukar, saspek meda api mit ke bekelip ti dipelabaka iya mata rusa lalu nimbak nuju api nya.

“Sepengudah senapang dikachitka, saspek meda tanda penusah ari tunga nya sebedau berumban pulai ngagai entukar lalu nemu tudah nembiak udah kena ditimbak ba rusuk kanan,” ku iya.

Nitihku iya, tudah agi ngeleda maya nya lalu sebana aus sebedau dibai pulai ngagai rumah panjai nukar perengka pengangkut lalu udah nya dianjung berubat ngagai Klinik Pengerai Long Lama.

Taja pia ku iya, tidah udah dientaska lutur ti ngubat iya udah midang urung pukul 9.52 malam.

Ku iya nambah, berindik ari penusah nya, saspek enggau dua iku agi bakih iya nyerahka diri ba Balai Polis Long Lama sebedau ketiga-tiga sida ditan.

“Pansik tumu tetemuka semina saspek aja ke mai senyata api lalu peresa tetemuka lisin senapang patah nya udah abis timpuh.

“Polis mega ngerampas senyata nya begulai enggau kerubung seterum, seterum idup enggau entukar Toyota Hilux ke dikena maya penusah nya nyadi,” ku iya.

Ku iya, pengawa meresa ba palan penusah nyadi tetemuka kandang endur nya ba kebun sawit besemak enggau kampung besai enggau tanah bebukit sereta rampa enda ulih jauh dipeda.

“Tubuh tudah udah dianjung ke Sepital Miri kena bejalaika pengawa beputung tasat dikena ngelala kebuah ke bendar pemidang iya,” ku iya.

Kes tu dipansik ari baruh Seksyen 302 Kanun Keseksaan lalu polis mega deka bejalaika pengawa meresa ai kemi ngagai semua saspek sereta minta bantu tim forensik nembuka pansik.

KUCHING, 12 April – Program ngambi kru kabin ke diatur AirBorneo nerima sambut ke chukup meransang lebuh mujur matak penatai mayuh chalun ke bisi potensial, kemari.

Program ti benung dipejalaika diatu nya nyadi saksi penatai individu ti bepenau ti ngayanka pengerindu enggau pengeransing ti besai deka ngepunka pengawa dalam industri penerebai bilun.

Sepemanjai sesi ke diatur pagi nya, raban pengatur bepeluang betemu enggau mayuh chalun ke ukai semina bisi kualifikasyen, tang mega terang bisi aspirasyen deka nyereta dunya penerebai bilun.

Gaya sepemanjai program nya mega dipeda penuh enggau pengawa positif, kelimpah ari mandangka kualiti chalun ke chukup meri peransang.

AirBorneo mega ngenataika pengaga ati ngagai semua ke bisi datai enggau penuh pengandal sereta bekunsika mimpi enggau tim nya.

Beberapa pekara ti narit ati sepemanjai sesi nya mega bisi dikunsi dikena ngayanka pengagit ati program nya. -RBI

SELANGAU, 12 April — Kaban Parlimen Selangau, Edwin Banta udah bejadika Program Ketuai Begulai Enggau Rayat sereta pengawa bejadika lantai konkrit Rh. Anggit Rumah Panjai, Begeri dalam sebengkah program ti mandangka penerus pengawa perintah dalam ngenegapka pemansang menua pesisir.

Projek ngaga lantai konkrit nya dipejalaika nengah agih belanja Projek Mesra Rakyat (MyKhas) ti nyadi inisiatif dikena ngangkatka perengka guna pemun, pengelantang enggau pengelikun peranak rumah panjai.

Pengawa bejalaika projek tu mega meri empas terus ngagai pengawa ngangkatka kualiti infrastruktur kandang menua.

Pengerami nya mega digulu Ketuai Komuniti enggau Ketuai Kaum (Tuai Rumah) ari kandang menua ngelingi enggau penatai urung 50 iku ketuai raban bansa.

Sesi begulai enggau rayat nyadi pelasar ke beguna dikena ngemuntangka isu pemansang kandang menua sereta begunaka dibantai terus ngagai pengari rayat ngambika diperatika sereta dipejalaika enggau silik agi.

Dalam penemuai kereja ke sama, YB Edwin Banta mega bisi ngabas palan ngaga Rumah Panjai Edward Anti di Jalai Bukut.

Projek tu dipejalaika enggau sukung sereta belanja iya nengah skim pinjau rumah panjai ari Opis Pemansang Pengawa Berumah (HDC).

Program tu mandangka komitmen ti terus ngenegapka agenda pemansang menua pesisir, seraya nentuka pengelantang pendiau rayat terus nyadi pekara ti dikemerat dalam tetiap perambu enggau bejalaika projek di kandang menua Selangau. — RBI

SRI AMAN, 12 April — Pekit Futsal Indu PRS Siri-6 ungkup “Piala Dato’ Sri Doris Sophia Brodie” diatur enggau mujur pengelama dua hari, berengkah 10 ngagai 11 April 2026, enggau penyereta ti meransang sereta ulah lumba enggau main ti tinggi ba bala pesereta.

Tim Indu PRS Bagi Menua Simanggang sekali agi ngayanka pengelebih diri lebuh mujur ngetanka gelar champion pengudah mandangka prestasi ti konsisten sepemanjai pekit nya.

Penuduk lumur dua diempu Tim Indu PRS Balai Ringin, ti mandangka pemanah lebuh mujur niki sesingkang enti dibanding enggau edisyen sebedau tu, lalu penuduk lumur tiga diempu Tim Indu PRS Bagi Menua Senadin.

Sepenyampau 19 tim ari semua bagi Bagian PRS di Sarawak nyengkaum penyereta Tim Exco Indu Pusat nyereta pekit tu, lalu enggau nya ngasuh pekit nya chakah sereta kompetitif agi.

Pengerami rasmi nangguhka pekit nya udah dipenyadi Sekretari Besai Parti Rakyat Sarawak (PRS) ke mega Sapit Menteri Dagang Antarabansa enggau Pemeranak Puku Sarawak Datuk Malcolm Mussen Lamoh ke bisi datai ngarika Presiden PRS, Dato Sri John Sikie Tayai.

Dalam jaku iya, iya nyemetak madahka orang indu nyadi tulang belakang penegap gerempung, bepelasarka rega ke tinggi iya nya pengelurus enggau penaluk, kelebih agi dalam nentuka penerus sukung ngagai Gabungan Parti Sarawak (GPS) ba pengawa bepilih.

Berebak enggau nya, Dato Sri Doris Sophia Brodie ba jaku pengelalu iya madahka Bagi Indu PRS Simanggang deka nyadi tuai rumah Pekit Futsal Indu PRS Siri-7 ba taun 2027.

Iya mega nerangka pengawa ngatur pekit tu kenyau ari taun 2017 ngembuan tuju deka ngerapitka kaul entara kaban Indu PRS ba renggat bagi menua, kelimpah ari ngerembaika jaringan, nerenakka ulah lumba enggau main sereta meri pangka ngagai pengelantang fizikal enggau runding bala pesereta.

Pekit tu terus nyadi pelasar ti beguna dalam ngenegapka pangku pengawa orang indu dalam gerempung, setipak enggau semengat begulai ti diangkatka nengah rambai jaku “You Touch One, You Touch All”. — RBI