BINTULU, 27 Jun – Staf Opis Betanam Betupi Sarawak dipinta ngelala tetiap pengelemi dalam sistem ngenataika enggau bejalaika program sereta proaktif ngambi atur ngemanah dikena nentuka tetiap inisiatif ti dipejalaika amat meri empas ngagai rayat.

Menteri Industri Pemakai, Komoditi enggau Pemansang Kandang Menua Sarawak, Datuk Seri Dr Stephen Rundi Utom madah, budaya kereja lama ti semina ngemeratka program enggau nadai beratika pemanah sereta asil enda relevan agi dalam landskap pemansang sektor betanam betupi kemaya hari tu.

Kenu ku iya, Opis Betanam Betupi ngembuan mayuh program enggau perambu, tang semua nya deka nadai reti nyema pengawa bejalaika nya enda mujur nyapai tagit enggau penguntung ti dikearapka.

“Kitai patut ngelala tetiap pengelemi lalu ngemanahka nya.Nadai agi pengawa dagang baka selama.

“Kitai patut ngembuan runding ti jampat sereta nentuka semua pekara ti dikearapka ari kitai ulih dikenataika enggau efektif,” ku iya lebuh bejaku ba pengawa nangguh Seminar Pemansang Modal Mensia enggau Negapka Opis Betanam Betupi Sarawak ditu tadi.

Ku iya, ubah ba budaya gawa patut dipejalaika enggau ngemeratka pengulih prestasi, landik ngenataika enggau empas program, lalu ukai semina bejalaika mayuh macham inisiatif nadai asil ke terang ungkup rayat.

Ku iya, pemujur sesebuah organisasyen enda patut disukat bepelasarka penyampau program ti diperambu tauka rega agih belanja ti dipelanja, tang lebih agi nengah pengulih ti ulih ditisih sereta meri penguntung ke nyata ngagai sektor betanam betupi enggau agro-pemakai nengeri tu.

Ku iya nambah, tetiap pemesai enggau staf begunaka penegap tikas akauntabiliti sereta terus nambahka produktiviti ngambika tetiap polisi enggau agih belanja ke diberi ulih dikena enggau optimum.

Berebak enggau nya, iya nyemetak madahka budaya kereja bepelasarka efisyen, akauntabiliti enggau penau ngenataika pengawa patut ditegapka agi ngambika tetiap agenda pemansang perintah ulih disalin nyadi asil ke nyata.

Iya mega nesau semua staf opis nya ngenegapka semengat kereja beraban sereta ngemeranka budaya bekunsi penemu enggau peneleba laban pemansang sektor betanam betupi begunaka kerejasama rat ba semua renggat.

Nitih ku iya, pengawa nyadi ketuai mega begunaka seruran mendingka penemu pemesai ba semua renggat organisasyen laban pemujur opis nya tanggungpengawa bekunsi.

Iya andal amat chara kereja ti lebih tinggi prestasi sereta beorientasyenka asil ulih nentuka Opis Betanam Betupi terus mengkang nyadi ejensi ketuai dalam meransang pemansang sektor agri-pemakai Sarawak kelimpah ngangkatka pengelantang pendiau komuniti menua pesisir. – RBI

#ruaiberitaiban#newsiban#beritaiban

Rindu | Titih | Kunsika

BETONG, 27 Jun – Siku lelaki midang lalu siku agi bakal pengudah kerita ke ditepan seduai iya aksiden betemuh enggau sebuah lori ke ngundan ikan ba Jalai Pan Borneo semak simpang Jelukong (P-Turn), malam tadi.

Nitihka ripot ari Opis Bomba enggau Penyah Penusah Malaysia (JBPM), Palan Operasyen nerima kangau ngenyit urung pukul 10.00 malam sebedau seraban bomba ari Balai Bomba enggau Penyah Penusah Betong ngesah ngagai palan penusah nyadi.

Lebuh datai ba endur nya urung pukul 10.31 malam, raban bomba tetemuka penusah bebadi ti mungkur sebuah lori enggau sebuah kerita Perodua Ativa .

Bisi dua iku mansa lelaki dalam kerita nya. Siku mansa mujur dipansutka mensia mayuh sebedau penatai raban bomba, lalu siku agi agi tepekul ba penuduk mua kiba.

Raban bomba ti disikap penuh enggau perengka dikena nyaga diri (PPE) terus bejalaika operasyen nyelamat dikena mansutka mansa ti tepekul. Taja pia, mansa dientaska lesi sebedau penatai raban penyelamat.

Tudah ke bebado nya dikelala enggau nama Mohamad Syakir, lalu siku agi bakal lalu diberi perubat ulih tim Opis Menteri Pengerai Malaysia (KKM).

Tubuh tudah udah nya diserahka ngagai Opis Menteri Pengerai enggau Polis Diraja Malaysia (PDRM) ngambika atur nangkanka nya dipejalaika sebedau raban bomba bejalaika pengawa meresi ba palan penusah nyadi.

Operasyen ti betuaika PBK II (TBBK I) Mosihi Bin Buang tembu urung pukul 10.47 malam sebedau tim nya mulaika diri ngagai balai nya.

Sama bisi ba endur nya tujuh iku kaban PDRM enggau tiga iku raban KHM. Kebuah eksiden nyadi agi dalam pansik polis.

#ruaiberitaiban#newsiban#beritaiban

Rindu | Titih | Kunsika

KUCHING, 27 Jun – Angkatan Zaman Mansang (AZAM) Sarawak terus ngenegapka agenda transformasyen digital gerempung lebuh ngelatih bala staf nguasa pengelandik ngasilka isi media rama nengah woksyop “CapCut 101: From Template to Masterpiece”, lalu enggau nya meri kuasa dalam pengawa ngenataika penerang ti lebih kreatif ngagai mensia mayuh.

Sepenyampau 20 iku staf ari mayuh bengkah opis nyereta woksyop nya ti nyadi sebagi ari strategi AZAM ngemansangka kompetensi digital pengereja pengawa setipak enggau aspirasyen gerempung nyadi ketuai komunikasyen ti relevan dalam jeman digital.

Ketuai Pemesai Eksekutif AZAM Sarawak, Ali Suhaili madahka, pengulih ngasilka isi digital kediatu ukai semina nilai tambah, tang nyadi pengelandik pemun ti meseti ba setiap iku staf iya ambika semua penerang dikentaika ngagai organisasyen ngasi.

Kenu ku iya, mensia mayuh kemaya hari tu ukai semina deka macha penerang aja, tang mega deka meda sereta ngasaika empas sesebengkah program nengah isi digital ti bekualiti.

“Kemaya hari tu, mensia mayuh ukai semina deka macha aja, tang mega deka meda sereta ngasaika empas sesebengkah program nengah isi digital ti bekualiti.

“Nya kebuah AZAM terus beranakka puku ba pengawa ngemansangka pengelandik raban sida ngambika tetiap program ti dipejalaika ulih didokumentasyen sereta dikunsi enggau efektif agi,” ku iya.

Ku iya, pengawa beranakka puku ba pengawa ngemansangka kompetensi digital mega udah ngenegapka agi penatai AZAM ba pelasar media rama lebuh gerempung nya diatu bisi lebih 80,000 iku orang nitih nengah Facebook, Instagram, TikTok, YouTube, LinkedIn enggau Threads.

Ku iya, penyampau orang ti majak nambah nya ngayanka pengarap komuniti ngagai isi ti diasilka kelimpah ari ngemendarka mayuh agi cherita pemujur, program pemansang enggau inisiatif komuniti dikenataika enggau lebih luas sereta jampat.

Berebak enggau nya, Pemesai Digital Kreatif AZAM Sarawak ke mega speaker woksyop, Miela Mohammad madah, tanggungpengawa ngasilka isi digital diatu beguna dipegai semua staf lalu ukai agi semina diungkupka ngagai tim komunikasyen organisasyen aja.

Nitih ku iya, tetiap iku pengereja pengawa bejalaika tanggungpengawa nyadi “penusun cherita organisasyen” ti ukai semina bejalaika program, tang mega megai tanggungpengawa ngerikod, dokumentasyen sereta bekunsika empas tetiap inisiatif ngagai komuniti.

“Lebuh mayuh agi pengereja pengawa ngembuan pengelandik ngasilka isi digital, organisasyen ulih ngeluarka isi enggau jampat, konsisten sereta setipak enggau perambu komunikasyen,” ku iya.

Maya woksyop nya, bala penyereta diajar enggau teknik ngedit video ngena aplikasyen CapCut, nyengkaum ngena template, nusui cherita visual, ngedit audio enggau visual kelimpah ari chara pemadu manah dikena ngasilka isi media rama ti narit ati sereta profesional.

Program tu mega nerima timbal positif ari penyereta ti nerangka latih nya mujur nambahka pengandal sida ngasilka video kediri empu enggau enda bepanggai penuh ngagai tim kreatif, kelimpah ari pengelandik ke dipelajar ulih dikena terus dalam pengawa ninting hari.

Inisiatif tu ngayanka komitmen AZAM ti seruran ngenegapka kapasiti digital pengereja pengawa ngambika tetiap program, inisiatif enggau cherita pemujur gerempung ulih didokumentasyen sereta dikenataika ngagai komuniti enggau lebih efektif, lalu enggau nya nyukung agenda pemansang enggau ngenegapka komuniti di Sarawak. – RBI

#ruaiberitaiban#newsiban#beritaiban

Rindu | Titih | Kunsika

JULAU, 26 Jun – Isu pengurang penyampau nembiak ba sekula menua pesisir patut diberi perati enggau berat dikena nentuka penerus operasyen sekula sereta perengka guna ti disediaka perintah ulih dikena enggau penuh.

Kaban Parlimen Julau, Datuk Larry Sng Wei Shien madahka, pekara tu lalu ti mega disebut iya beserimbai enggau Pengerami Ngiling Tikai Sekula Primari (SK) Lubok Assam sehari tu, ke mega nyadi saksi pengawa ti enda ngetu dikena mantu sekula nya nengah pengawa nyendiaka sereta ngemanahka agi peminta infrastruktur ngambika ulih nempa rampa belajar ti lebih kondusif.

Taja pia ku Larry ke mega Chairman Industri Kayu Ramu Malaysia (MTIB), batang pengirau ke ditapi diatu iya nya penyampau nembiak ke besekula ba SK Lubok Assam majak kurang.

“Penyampau nembiak udah nurun ari 29 iku taun nyin tadi ngagai semina 22 iku aja taun tu, lalu nya ngeruga agih belanja enggau perengka guna ke diterima sekula nya.

“Dipelabaka gaya nya deka ngeruga daya idup sekula enti gaya penurun penyampau nembiak ke masuk sekula nya majak nyadi, laban sekula menua pesisir bepanggai ba penyampau nembiak dikena ngintu mayuh macham perengka guna, agih belanja enggau staf pengajar,” ku iya.

Berindik enggau nya, Larry ngarapka apai indai patut berundingka terus nganjung anak sida besekula di SK Lubok Assam, nyengkaum beambi ulih ari perengkaguna alai bemalam ti disediaka, taja pan sida gawa tauka diau ba endur bukai.

“Bala nembiak ke diau ba buding nya mega nerima bantu pemakai ke dipelanja perintah.

“Enti bantu tu enda dikena ketegal kurang nembiak, nya ukai semina ngasuh agih belanja tebasau, tang mega bisi potensial ngeruga operasyen sekula jemah ila,” ku iya nampung.

Iya ngarapka semua piak ulih bekerejasama nentuka sekula menua pesisir baka SK Lubok Assam terus beoperasyen dikena nyamin akses ngagai pelajar ti bekualiti ungkup nembiak di menua pesisir.

Beserimbai enggau program nya mega, Larry udah ngagihka belanja ngagai SK Lubok Assam, JKKK Rh Julin Karangan Assam, JKKK Rh Denish Wong Bar enggau JKKK Rh Rantai Ng Mujok.

Penyampau penuh agih belanja ke dikenataika iya ba program tu iya nya RM64,800. – RBI

#ruaiberitaiban#newsiban#beritaiban

Rindu | Titih | KunsikA

MIRI, 26 Jun — Indu Opis Polis Pelilih (IPD) Miri ngenukuka bisi nerima ripot polis kena 12 Mei 2026, pukul 3.09 lemai, bekaul enggau kes enchuri mutosikal ba kandang menua Tudan, Lutong.

Orang ke ngaga sebana nya sedarka mutosikal iya udah lenyau kena 12 Mei 2026, ke engkah ba mua sebuah rumah ba kandang endur diau Tudan lalu dipelaba dichuri.

Berindik ari penerang enggau pemansik, seraban pemesai polis ti betuaika ASP Goldy Anak Jangan, Ketuai Polis Balai Polis Sentral Miri, begulai enggau raban Balai Polis Sentral Miri (CPJ), mujur nangkap siku lelaki peranak menua nya beumur 31 taun ba kandang menua Kampung Lereng Bukit, kena 26 Jun 2026 urung jam 1.00 pagi.

Bela dirampas sebuah mutosikal Yamaha Y15ZR ke dipelabaka dichuri saspek.

Saspek diatu benung ditan ba rumah pasung Balai Polis Sentral Miri dikena mantu tasat ari baruh Seksyen 379A Kanun Keseksaan.

Polis ngingatka kerejasama ti terus ari komuniti beguna amat dalam mantu polis ngelaban pengawa salah sereta nentuka pengelikun enggau pengelantang komuniti setempat seruran dijaga. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KAPIT, 26 Jun — Program Sarawakku Sayang Bagi Menua Kapit dibuka enggau rasmi sehari tu nyadi siti ari inisiatif Perintah Sarawak dalam ngenegapka pengawa ngenataika servis mensia mayuh sereta ngerapitka ejensi perintah enggau rayat ba renggat pun menua.

Program tu ngempuruka mayuh macham kaunter servis perintah, pengawa pemandang ejensi, pengawa meresa pengerai pechuma, servis meri jaku lalau, peluang dagang enggau mayuh macham aktiviti komuniti ti meri penguntung terus ngagai komuniti setempat ba siti palan ti begempung.

Kaban Kunsil Nengeri (ADUN) Katibas, YB Lidam Assan madah, pengawa bejalaika program tu mandangka komitmen Perintah Sarawak ti deka nentuka rayat di menua pesisir mega ngasaika akses servis ti lebih muntang, jampat sereta komprehensif.

Kenu ku iya, chara renggat baruh nengah program tu ukai semina ngemuntangka pengawa rayat, tang mega ngerapitka kaul dua piak entara perintah enggau komuniti setempat.

“Program tu nyadi pelasar ke pemadu manah endur rayat ngulihka bemacham penerang, servis enggau penguntung terus ari ejensi perintah ba siti endur.

“Penatai rayat amat dikelalu ngerichahka program tu,” ku iya.

Iya mega minta komuniti besemak nguna peluang tu enggau penuh ari program nya ke nyadi ari 26 ngagai 28 Jun 2026.

Dalam jaku dipansutka iya, iya mega bisi ngenataika jaku tesau dalam kelai meri terima kasih ngagai komuniti ngelingi.

“Aram sampal datai kitai ngulu pengawa ‘Sarawak Ku Sayang’ ke berengkah sehari tu nyentuk ngagai 28 Jun 2026.” ku Lidam.

Program tu sebagi ari inisiatif Perintah Sarawak ti seruran dipejalaika dalam meri kuasa ngagai pengelantang pendiau rayat sereta nentuka pemansang ti lebih inklusif sereta sebela di serata nengeri. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUALA LUMPUR, 26 Jun — Kaban Parlimen Sri Aman, YB Dato’ Sri Doris Sophia Brodie nyereta ‘Simposium Harmoni’: Malaysia 100 Taun – Penyerakup Jemah Ila ke diatur Kumpulan Rentas Parti Parlimen Malaysia – Keharmonian Kaum dan Kepelbagaian (KRPPM-KKA), ti nyadi platform beguna dikena ngenegapka penyerakup menua sereta pengelikun pupu bansa.

Simposium tu ngempuruka mayuh tokoh enggau panelis ari mayuh macham penatai nyengkaum YB Dr.Halimah Ali, Kaban Parlimen Kapar; Tan Sri Dato’ Sri Nazir Razak, Chairman Yayasan Tun Razak; Tuan Jason Wee, Direktor Eksekutif Arkitek Diversiti Malaysia enggau iya empu ke nyadi Kaban Parlimen Sri Aman.

Sesi randau nya mega dikemujurka Tuan Aziff Azuddin, Direktor Kanan Pemansik Pemansik IMAN.

Dalam sesi nya, bala panelis berandauka mayuh macham perspektif pasal penyerakup Malaysia jemah ila, nyengkaum pengawa ngenegapka pemereti ati entara bansa, ngerembaika randau entara komuniti enggau merambu chara ti lebih inklusif nuju pengawa nempa bansa ti beserakup sereta lantang lebuh ngintu genap 100 taun menua tu udah merdeka.

YB Dato’ Sri Doris Sophia Brodie dalam penerang iya madahka penyereta dalam simposium tu nyadi pelasar ti beguna dikena besilih penemu sereta bekunsika penemu enggau mayuh bengkah raban dalam pengawa ngenegapka agenda penyerakup bansa.

Iya mega nyemetak madahka pengawa ngetanka penyerakup dalam penyelai mesti seruran ditegapka nengah kerejasama ti seruran dipejalaika entara ketuai politik, institusyen pemansik, gerempung rama enggau rayat selampur.

Kelimpah ari nya, iya mega meri besai terima kasih ngagai pengatur pengawa ketegal kangau sereta peluang ke diberi nyereta randau ke bisi reti.

Simposium tu dipeda nyadi inisiatif strategik dalam ngerembaika entara piak enggau komuniti bekaul penyerakup bansa jemah ila, kelimpah ari ngenegapka pelasar ti merua ke nyadi penegap Malaysia jemah ila — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Photo — Doris Sophia Brodie

KUALA LUMPUR, 26 Jun — Perintah Malaysia majak ngenegapka strategi dikena beambi ulih ari peminta minyak kurang karbon ba dunya ti majak nambah nengah pengawa bejalaika polisi komprehensif ari baruh Polisi Agrikomoditi Nasional 2030 (DAKN 2030).

Sapit Menteri Kebun Bedandang Besai enggau Komoditi, YB Dato’ Sri Huang Tiong Sii, madahka Opis Menteri Kebun Bedandang Besai enggau Komoditi (KPK) udah merambu dua bengkah strategi dikena ngenegapka penuduk Malaysia ba makit dunya, iya nya nengah chara ngenegapka makit ke udah bisi sereta mansik alternatif ke meruan agi.

Nitih ku iya, entara batang fokus strategi tu iya nya pemansang biodiesel rebak kedua bepelasarka bahan mentah ari teda biojisim, nyengkaum optimasyen teda industri minyak sawit baka Palm Oil Mill Effluent (POME) enggau Used Cooking Oil (UCO) nyadi bahan mata besai dikena ngasilka biofuel.

Chara tu ukai semina deka nambahka rega tambah industri minyak sawit menua tu, tang mega ngenegapka daya bepekit Malaysia dalam rentayan bekal minyak gadung global ti majak mansang.

Iya mega nerangka Perintah ngemeratka pengawa ngenyampatka pengawa mansik, ngemansang sereta chara ngelakuka teknologi nukar teda nyadi minyak berega tinggi baka Minyak Sayur Hidrotreated (HVO) enggau Minyak Penerebai Bilun Lestari (SAF).

Inisiatif tu dikearap ulih ngerembaika peluang eksport minyak sawit produk hiliran ti berega tinggi, seraya nyukung agenda pemanah menua sereta ngurangka bepanggai ba bahan api fosil. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SIBU, 26 Jun — Projek ngaga Jalai Teku-Pasai Siong, Jalai Kemuyang Sibu (Pakej 1) pemanjai 6.17 kilometer diatu udah ngerikod penyulut fizikal 25.5 peratus, ngelui ari timpuh asal ti ditetapka iya nya 22.7 peratus.

Sapit Premier Sarawak, Datuk Amar Douglas Uggah Embas madah, pemujur nya mandangka pengelanchar bejalaika projek sereta ba pejalai ti betul ngambika ulih ditembuka nitihka timpuh.

Nitihku iya, projek ke beungkus RM76 juta nya mega mungkur pengawa ngaga struktur jalai tinggi 704 meter meraka kandang tanah kerapa dikena nentuka penegap timpuh panjai enggau pengelikun infrastruktur nya.

“Kami chukup puas ati enggau pejalai kereja ba palan nya.

“Kunteriktor diatu udah dulu ari timpuh urung 2.82 peratus lalu kami andal amat projek tu ulih ditembu nitihka perambu,” ku iya lebuh pengudah ngabas kereja ngagai palan projek, sehari tu tadi.

Iya mega madahka gaya hari ti manah udah mantu ngenyampatka pengawa bejalaika pengawa ba tanah.

Ku iya, pengawa bejalaika projek tu mandangka komitmen Perintah Sarawak ti seruran ngenegapka rentayan infrastruktur menua pesisir sereta nyendiaka perengkaguna ti bekualiti ngagai rayat.

“Enti udah tembu ila, jalai tu deka muka kandang endur baru ti ngembuan potensial pemansang ti besai sereta ngemanahka agi penyambung ngagai Pasai Siong,” ku iya nerang.

Ku iya nambah, jalai nya mega deka nyadi alternatif kedua ti nyambung Pasai Siong enggau pasar Sibu, ti dikearapka ulih nyungkak aktiviti ekonomi menua tu.

Iya ngarapka kunteriktor ulih ngetanka momentum kereja dikena nentuka projek nya tembu nitihka timpuh ke udah ditetapka.

Sama bisi datai Sapit Menteri Pelajar, Inovasyen enggau Pemansang Bakat ke mega Kaban Kunsil Nengeri ( ADUN) Nangka, Datuk Annuar Rapaee. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KAPIT, 26 Jun — Direktor Pejalar Sarawak Encik Omar bin Haji Mahli udah bejalaika penemuai kereja rasmi ngagai SMK Kapit No.2 dikena ngaul diri enggau staf sekula sereta ngenegapka pengawa bejalaika agenda transformasyen pelajar seriris enggau tuju Opis Pelajar Nengeri Sarawak sereta aspirasyen Pelin Pelajar Malaysia (RPM) 2026–2035.

Penemuai nya dipunka enggau sesi ngaul diri enggau pentadbir, pengajar enggau staf sekula ti fokus bekunsi pemansang kemaya hari, isu enggau pemar dalam operasyen sekula, kelimpah ari ngenegapka budaya kereja ke chukup manah ba raban pendidik.

Sesi tu mega nyadi pelasar dikena ngenegapka pemereti ati bekaul enggau pangku pengawa raban pengajar nyukung aspirasyen pelajar bansa bepelasarka kualiti, inklusiviti enggau asil nembiak.

Ba pesan iya, Direktor Pelajar Sarawak nya nyemetak madahka JPNS terus ngemeratka agenda pemansang nembiak holistik ti mungkur penyulut akademik, pemansang ulah, nguasa pengelandik digital enggau literasyen ‘artificial intelligence’ (AI).

Iya mega ngemeratka pemesai guna nempa rampa belajar ti likun sereta kondusif ti nyukung pemansang potensial nembiak enggau komprehensif.

Iya mega ngelimpangka awak beinteraksyen enggau nembiak Pom 5 nengah chara ngenataika jaku peransang dikena nyendiaka diri napi peresa Sijil Pelajaran Malaysia (SPM).

Rambau penemuai nya, iya nesau bala nembiak ngambika seruran bedisiplin, chakah enggau ransing sereta nguna peluang pelajar enggau penuh ngambika ulih nyapai penyulut dalam akademik.

Kelimpah ari nya, sesi khas begulai enggau nembiak Pom 6 Semester 2 mega bisi diatur dikena berandauka kuing pelajar tinggi, pemansang nyadi ketuai enggau nyikap diri napi dunya pasca sekula ti majak kompetitif.

Sesi tu meri ruang ngagai nembiak ngulihka iring terus ari piak pengatur pelajar nengeri.

Nitih ku iya, pengawa bejalaika Pelin Pelajar Malaysia (RPM) 2026–2035 ti diberi kelala Opis Menteri Pelajar Malaysia ngerintaika tujuh batang pengawa strategik ti mungkur pengawa ngangkatka akses enggau kualiti pelajar, pemansang komprehensif potensial nembiak, transformasyen raban pengajar, ngenegapka infrastruktur pelajar sereta negapka tadbir urus sistem pelajar negara.

Pelin tu nyadi pengerembai kunsi dalam pengawa ngerapitka seraka pelajar sereta nentuka sistem pelajar menua mengkang relevan, kompetitif sereta responsif ngagai ubah dunya enggau pemansang teknologi.

Penemuai kereja tu mandangka komitmen ketuai pelajar Sarawak ti majak nyadi dalam ngenegapka agenda reformasyen pelajar nengeri, enggau nya nentuka tetiap institusyen pelajar terus nyingkang senutuk enggau aspirasyen ngadaka rebak ti bepenemu, bepengelandik tinggi sereta kompetitif ba renggat nasional enggau antarabansa. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika