SARATOK, 2 April — Raban Pengelikun Mensia Mayuh Malaysia (APM) begulai enggau Opis Bomba enggau Penyah Penusah Malaysia (JBPM) chakah bejalaika operasyen madamka penusah angus tanah kerapa ke nyadi ba Simpang 4 Skim C, Kampung Kupang kenyau ari ensanus.

Nitihka penerang ari APM Pelilih Saratok, sepenyampau enam iku raban udah dianjung ngagai endur nya mantu operasyen madamka api enggau kerejasama JBPM Saratok sereta peranak menua nya.

Penusah angus nya mungkur tanah gambut enggau kandang endur semak ke mar dijaga, enggau api diripotka majak nyerarai ngagai kandang kampung ke besemak ketegal ribut ke balat.

Beberapa endur dikelala agi balat angus sereta mansutka asap tebal ti tau ngeruga kualiti angin ba kandang endur ke ngelingi.

Operasyen madamka api nya ditangguh lemai ketegal faktor pengelikun enggau gaya hari, lalu deka ditampung baru ba hari siti dikena nentuka api ulih dijaga enggau penuh.

Naka ke diatu, nadai penusah bebadi nyawa diripotka lalu semua raban ke bisi kaul enggau penusah nya selamat.

Berindik enggau nya, mensia mayuh dilalau ngambika enda ngaul diri enggau pengawa betunu chara tebuka sereta seruran bejejaga enggau gaya rampa menua dikena nyeliahka penusah ke enda dikedekaka nyadi.

Enti bisi penusah ngenyit nyadi, mensia mayuh tau betanya ngagai APM Saratok ba lumur 083-436094 tauka talipaun penusah ngenyit 999 minta bantu lengkas. — RBI

MIRI, 2 April — Polis udah mujur nangkap siku lelaki menua tu ke dipelabaka bisi kaul enggau kes enchuri mutosikal di pelilih menua tu, berindik ari pengawa ke jampat berindik ari ripot ke diterima kena 30 Mac tu tadi.

Nitihka penerang polis, ripot motosikal nya lenyau diterima urung pukul 6.00 pagi ba kandang Komersial Mosjaya, Miri.

Berindik ari penerang enggau pemansik, tim kaban ari Pampang Nagang Penyalah Balai Polis Sentral Miri betuaika Ketuai Balai Polis Sentral, ASP Goldy Anak Jangan, bejalaika operasyen lalu mujur nangkap saspek kena kemari urung pukul 4.30 lemai ba Jalai Garnia.

Rambau operasyen nya, polis mega bisi tetemuka sebuah mutosikal Honda Wave ke dipelabaka dichuri saspek ngambika nyadika bukti.

Saspek diatu benung ditan ba ‘Lockup’ Balai Polis Sentral Miri dikena mantu tasat silik ke benung dipejalaika ari baruh Seksyen 379A Kanun Keseksaan.

Berindik enggau nya, piak polis nesau mensia mayuh ngambika terus ngenataika penerang bekaul ngagai piak bekuasa dikena mantu pengawa ngelaban pengawa salah sereta nentuka pengelikun komuniti terus dijaga. — RBI

SERIAN, 2 April — Siku orang tuai ke diripotka lenyau ba kandang kampung semak Sungai Kedup, Siniawan, pagi kemari ditemu peranak genturung pendiau nya enggau selamat.

Pengawa jampat komuniti kandang menua nya mantu piak bekuasa nembuka operasyen ngiga enggau nyelamat (SAR) dalam timpuh kurang ari sejam pengudah ripot nya digaga.

Opis Bomba enggau Penyah Penusah Malaysia (JBPM) Sarawak madahka sida nerima kangau ngenyit bekaul enggau pengelenyau tudah ke beumur 72 taun urung pukul 10.59 pagi kemari.

Tekala nya pengudah nerima penerang nya, seraban ari Balai Bomba enggau Penyah Penusah (BBP) Serian udah dianjung ngelawa endur penusah nyadi dikena ngepunka misi ngiga.

“Operasyen SAR diuluka Pemesai Bomba Kanan I Rosnani Malong begulai enggau empat iku raban ari BBP Serian ti berumban ngelawa kandang kampung nya enggau naka pengelengkas pengudah nerima kangau nya,” ku penerang nya.

Asil ari kerejasama rat entara raban penyelamat enggau komuniti ngelingi, pengujung iya tudah ditemu peranak genturung nya urung pukul 11.52 pagi, urung 53 minit pengudah ripot diterima opis bomba.

Opis Bomba enggau Penyah Penusah Sarawak ngenukuka operasyen rasmi diketuka tekala nya pengudah tudah ditemu lalu dientaska nadai bakal balat.

Piak bekuasa muji pengirau ati peranak rumah panjai ke jampat bejalaika pengawa mantu pengawa ngiga.

Mensia mayuh kelebih agi orang tuai dilalau ngambika seruran madah ngagai diri sebilik tauka bala bakih nyema bisi ati deka tama ngagai kandang kampung nya dikena nyeliahka sebarang penusah ke enda dikedekaka nyadi baru. — RBI

BETONG, 2 April – Karnival Gawai Renggat Bagi Menua di Betong sekali agi diatur nengah Bazaar Gawai Dayak Betong 2026 ti deka berengkah 2 ngagai 16 Mei tu ba Dataran Tasik Medan.

Sepemanjai timpuh ngatur, bemacham aktiviti ti ngerinduka ati deka diatur dikena ngerichahka pengerami Gawai Dayak nyengkaum pemerindang ari artis tebilang, chabut tikit benasit enggau pekit ti ngaul penyereta komuniti menua nya.

Entara batang pengerami iya nya Pekit Nginti kena 9 Mei, Pekit Karaoke Gawai Dayak ti berengkah 10 ngagai 12 Mei enggau Pekit Engkeratong Cilik kena 8 Mei.

Kelimpah ari nya, bala temuai mega deka dipandangka enggau pemerindang pesaka sereta main asal nyengkaum Main Asal Iban ti mandangka penyereta kelab menua tu baka Kelab Kuntau Spring Betawie, SIDS Pampang Betong enggau Kelab Ngepan Betong.

Dikena nambahka pengagit ati, rintai artis tebilang menua tu deka merindang bala temuai sepemanjai karnival nya, nyengkaum Rofina Salang (3 Mei), Swaylin (4 Mei), Pretty Nina (5 Mei), Akus enggau Indai Panda (6 Mei), Pemerindang Band (7 Mei), Richard Lee (9 Mei), Margaret MJ (10 Mei), Rickie Andrewson (14 Mei) enggau Timoty (16 Mei).

Berebak enggau nya, bazaar nya mega bisi nyediaka bemacham bansal nyual pemakai asal, asil pengelandik jari, pekayan enggau produk menua tu empu, lalu enggau nya meri awak ngagai pedagang mit ngulihka penatai pemisi.

Pengawa ngatur karnival tu dikearap ulih nyadi pelasar ke beguna dalam nerenakka penyerakup komuniti sereta ngelakuka budaya Dayak ngagai rebak baru enggau temuai ari menua luar. -RBI

KOTA SAMARAHAN, 2 April — Ketuai Pampang Parti Keadilan Rakyat (PKR) Kota Samarahan madahka diri deka badu mangku pengawa enggau pansut ari parti enggau bebala mayuh berengkah tekala nya.

Ketuai Pampang iya, Nazirol Bin Samaa’ail madahka pemutus nya digaga enggau chara ti berat sereta sepenemu ti ngaul ketuai besai pampang nya nyengkaum sapit chairman, sekretari pampang, sekretari pengatur, ketuai penerang, tukang wang, chairman tetap, auditor, kaban komiti lebih ari 50 iku raban renggat baruh.

Nitihku iya, pekara nya dipejalaika berindik ari pemuntan Kaunsil Ketuai Nengeri (MPN) Sarawak enggau ketuai ‘pusat’ meri timbal bekaul enggau isu sereta enda puas ati ti udah dibantaika nengah jalai rasmi sebedau tu.

“Surat rasmi udah dianjung ngagai MPN lalu pia mega ngagai PKR Pusat, tang bedau bisi timbal diterima.

“Gaya tu ngasuh asa sereta mandangka penemu enggau sada nyawa renggat baruh enda diberi perati ke patut,” ku iya nengah penerang media, kemari.

Iya madah, surat rasmi badu mangku pengawa udah dikenataika ngagai MPN nyadi singkang kepenudi dikena mutuska kaul sida dalam pengawa nyadi ketuai pampang.

Berebak enggau nya, Nazirol madahka pengawa ngelengka pangku pengawa nya mega dikena ngerandang jalai ngagai ketuai baru ti dipeda setipak agi enggau ketuai ba renggat nengeri.

“Kitai nadai ati deka nyadi penekul ngagai sebarang piak. Nya alai, ruang tu dilengka dikena meri awak ngagai ketuai baru mangku pengawa seriris enggau peneka ketuai ke tinggi agi,” ku iya.

Ku iya nambah, pemutus nya digaga dikena nentuka pengelantang pendiau kaban renggat baruh di Kota Samarahan terus dijaga, kelimpah ari nyeliahka sida ari kena pangka agi ketegal enda sepenemu entara pampang enggau ketuai nengeri.

“Singkang tu penegap runding iya nya prinsip pengawa enda ulih diambi mudah.

“Kitai ngarapka ubah tu ulih muka ruang ngagai pengawa ngatur ti lebih menyana ungkup pemaik kaban ba renggat baruh,” ku iya.

Ngenang silik agi, iya madahka fokus sida berengkah ari diatu iya nya terus meri bantu ngagai pemansang komuniti setempat enggau nadai diikat sebarang sekat politik. — RBI

BETONG, 1 April – Pengerami Bejadika Karnival Gawai Renggat Bagi Menua Betong 2026 udah ditetapka kena 2 Mei 2026 (Hari Enam) lalu deka diatur ba palan Bazar Gawai Dayak Betong, lalu enggau nya ngelai pengawa ngepun rasmi pengerami ti dianti-anti komuniti menua nya.

Pia mega, nampung penerang Betong Xcess, Karnival Gawai Bagi Menua Betong 2026 disadang nyadi pengerami ti chukup ngerinduka ati enggau bemacham program ti diperambu dikena ngerichahka agi pengerami Gawai Dayak taun tu.

Karnival taun tu betuaika chairman pengatur, Leo Toni ari Opis Betanam Betupi Bagi Menua Betong.

Berebak enggau nya, Aum Komiti Besai Pengerami Gawai Renggat Bagi Menua Betong bechairmanka ADUN Layar, Datuk Gerald Rentap Jabu ke mega Sapit Menteri Pemansang Nembiak, Lumba enggau Orang Dagang Sarawak dikena ngatur program ti udah diatur.

Entara batang pengerami karnival tu iya nya Bazaar Gawai Dayak Betong ti deka diatur kena 2 Mei nyentuk 16 Mei 2026 di Dataran Tasik Medan, Betong.

Bazar tu dikearapka nyadi pematak temuai enggau pengawa pemerindang ari artis ke dikangau, bemacham pengawa bejualka pemakai asal, ai irup, asil pengelandik jari enggau produk ari orang dagang menua tu.

Sama bisi diatur iya nya Gawai Fun Run kena 9 Mei 2026 ti ngembuan tuju deka ngelakuka gaya pengidup bepengerai ba komuniti lokal.

Kelimpah ari nya, pekit Pekit Kumang Gawai Betong deka diatur kena 23 Mei 2026 ba Dewan TSDA Stephen Kalong Ningkan dikena mantaika pemanah pekayan asal enggau penyelai budaya komuniti Dayak.

Ba haribulan ke sama, Malam Mantar Gawai mega deka diatur ba palan ke sama nyadi pelasar mandangka main asal enggau pemerindang.

Siti agi program ke bisi dirintai iya nya aktiviti Nguji Tuak kena 16 Mei 2026 ti meri awak ngagai temuai ngelala ai irup asal komuniti Dayak.

Pekara ti pemadu dikerinduka pengerami tu iya nya Pengawa Bejalai Bebala Gawai Bagi Menua Betong 2026 ti diperambu kena 6 Jun 2026 ti disereta mayuh bengkah ejensi perintah, gerempung enggau komuniti ti deka mantaika pesaka asal sida empu.

Nyadi pengawa nutup pengerami nya, deka diatur Ngiling Bidai kena 4 Julai 2026 ba Dewan SJK(C) Min Syn, Saratok nyadika kelai pengujung pengerami Gawai.

Dikearapka pengawa ngatur karnival tu ukai semina ulih ngerichahka agi pengerami Gawai Dayak, tang mega nyadi pelasar dikena ngangkatka budaya, ngenegapka penyerakup komuniti sereta nyungkak aktiviti ekonomi kandang menua di Bagi Menua Betong.

KUCHING, 1 April — Ketuai Nembiak Sitak Kunsil Nengeri (DUN) Tamin enggau Exco Nembiak Parti Rakyat Sarawak (PRS), Kr. Nyireng Saleh, nyemetak madahka tuduh pengelemi sistem ti nuntung rayat menua pesisir patut diperatika enggau lenak bepelasarka fakta enggau pengawa ti enda ngetu dipejalaika Perintah Sarawak.

Nitih ku iya, perintah nengeri ari baruh iring Datuk Patinggi Tan Sri Abang Johari Tun Openg udah merambu sereta bejalaika mayuh macham polisi strategik nyengkaum Strategi Ekonomi Digital Sarawak 2030 dikena nentuka pemansang menua pesisir enda tinggal, kelebih agi ba sukut pelajar enggau akses digital.

“Nengah pengawa bejalaika projek baka Rangkaian Jalur Lebar Menua Pesisir Sarawak (MySRBN) enggau inisiatif ari baruh pelin JENDELA, bungkur Internet di menua pesisir terus dikemanah berenggat.

“Tu ngayanka komitmen perintah dalam ngerapitka seraka digital,” ku iya nengah sebengkah penerang sehari tu.

Penerang nya dikena nimbal tuduh Ketuai Raban Nembiak Parti Bansa Dayak Sarawak (PBDS) Jerry Robert ti mantaika pengirau ati bekaul enggau pengelemi sistem ke bisi diatu ke dikumbai agi enda tetangkupka guna rayat menua pesisir, kelebih agi dalam sektor pelajar, pengerai, digital enggau Hak Adat Bansa Asal (NCR).

Ngenang silik agi, Kr. Nyireng madahka bemacham perengka bantu pelajar udah diberi kelala perintah nengeri, nyengkaum nyendiaka laptop enda bebayar, baucher bup enggau bantu belanja ngagai nembiak ba palan pelajar tinggi dikena nentuka akses pelajar ti lebih sebaka.

Ba sektor pengerai, iya nerangka perintah nengah kerejasama enggau Opis Menteri Pengerai Malaysia terus ngenegapka perengka guna pengerai menua pesisir nengah pengawa ngaga enggau ngangkatmanah klinik, nyendiaka klinik mindah kin kitu sereta nambahka raban perubat di menua pesisir.

“Taja pan pemar geografi Sarawak ti besai udah ngeruga pengawa meri servis, tang pengawa ngemanahka agi seruran dipejalaika enda ngetu,” ku iya.

Ari sukut ekonomi digital, iya nyemetak madahka Sarawak diatu ba pelasar ke tegap nyadi ketuai ekonomi digital menua tu, diiring Kaunsil Ekonomi Digital Sarawak (SDEC) ti chakah bejalaika program latih enggau pemansang pengelandik digital ungkup komuniti menua pesisir.

Ngelansa pasal isu tanah NCR, Nyireng nerangka Perintah Sarawak nengah Opis Tanah enggau Survei Sarawak udah bejalaika pengawa nyukat lot perimeter enggau individu enggau sistematik dikena nentuka hak pengempu tanah adat terus dijaga.

“Mayuh tanah NCR udah disukat sereta dikelala, lalu enggau nya meri pengelikun pegai ngagai komuniti,” ku iya.

Berindik enggau nya, iya nyemetak madahka enda betul nyimpulka sistem ke bisi diatu lemi enti enda ngambi kira bemacham inisiatif enggau pemujur ke udah dirikod.

“Perintah Sarawak seruran komited ngenegapka polisi ke udah bisi sereta bejalaika iya ngambika setipak enggau guna rayat.

Kitai ngelaluka penemu ke engkeman, tang semua piak meseti bepelasarka fakta enggau realiti pemansang kemaya hari,” ku iya nyemetak.

Ku iya nambah, Raban Nembiak PRS deka terus bejalaika tanggungpengawa nyadi bakih strategik perintah dalam nentuka agenda pemansang menua pesisir dipejalaika enggau inklusif, meruan sereta meri penguntung ngagai semua rayat. — RBI

BETONG, 1 April — Kaban Parlimen Betong, Dato Dr. Richard Rapu, madahka projek ngaga replika Kuta Rentap di Bukit Sadok deka nyadi pematak ngintu pesaka sejarah enggau pemansang dagang temuai ba sitak nya.

Nitihku iya, pengerami nasih tanah enggau nyerahka palan projek nya nyadika sebengkah agi singkang beguna dalam pengawa meri basa ngagai sejarah enggau pengawa bujang berani menua tu, kelebih agi Rentap ti tebilang ngelaban perintah Rajah Putih ba abad ke-19 suba.

“Bukit Sadok ukai semina endur besejarah aja, tang kelai pemerani enggau semengat ngelaban rayat Sarawak dalam ngetanka menua asal.

“Pengawa ngaga replika kuta tu deka nentuka jerita pengawa ngentanka menua ambi terus dikeingatka rebak dudi,” ku iya.

Bukit Sadok ke urung 831 meter (2,726 kaki) peninggi ari tasik sebedau tu nyadi kuta besai Rentap, lalu enggau nya nyadika palan ke strategik dalam sejarah ngelaban munsuh.

Projek ke beungkus RM16 juta nya dipelaba deka berengkah dalam timpuh ke semak tu, disikap enggau perengka guna sukung dikena ngangkatka peneleba temuai kelimpah ari ngenegapka sektor dagang temuai di Bagi Menua Betong.

Pengerami nya bela digulu Sapit Premier Sarawak ti mega Menteri Wang enggau Ekonomi Baru II sereta Menteri Infrastruktur enggau Pemansang Palan Penyangkai Kapal, Datuk Amar Douglas Uggah Embas, enggau Penyanding Penemu Pansik Saintifik Sarawak, Tan Sri Datuk Amar Dr Alfred Jabu Numpang. Sama bisi datai Leftenan Jeneral (B) Datuk Stephen Mundaw begulai enggau ketuai opis perintah, ketuai komuniti enggau peranak menua nya.

Berebak enggau nya, Dr Richard Rapu madahka pemansang infrastruktur baka Jalai Besai Pan Borneo enggau Jalai Besai Menua Pesisir ti diperambu dikearap ulih nambahka akses ngagai Betong, lalu enggau nya muka mayuh agi peluang ekonomi ngagai peranak menua nya.

“Pengawa tu ukai semina deka ngetanka sejarah enggau identiti budaya, tang mega ulih nyungkak ekonomi menua tu nengah penambah penyampau temuai,” ku iya.

Iya ngarapka projek nya ulih dipejalaika enggau lanchar sereta meri penguntung ke besai ngagai rayat, setipak enggau aspirasyen pemansang Bagi Menua Betong nuju pengelantang enggau pengelantang dalam penyelai. -RBI

PUTRAJAYA, 1 April — Menteri Penyerakup Menua, Datuk Aaron Ago Dagang, madahka Akta Rukun Tetangga 1975 [Akta 751] (Ubah) 2025 diatu udah berengkah dipejalaika enggau rasmi berengkah sehari tu, nyadi singkang ke besai reti dikena ngenegapka pangku pengawa komuniti ke lantang sereta likun.

Nitih ku iya, ubah nya dikemendarka ba Dewan Rakyat kena 2 Disember 2025 lalu udah nya ba Dewan Negara kena 17 Disember 2025 nengah sukung majoriti Kaban Parlimen.

Lalu enggau nya ku Aaron, ngayanka komitmen perintah ti terus meri kuasa ngagai institusyen komuniti ba renggat baruh.

“Pengawa neritka ubah tu siti singkang ke berat dalam ngubah pangku pengawa Kandang Menua Rukun Tetangga (KRT) ngambika lebih dinamik, responsif sereta efektif napi pemar kemaya hari tu,” ku iya nengah sebengkah penerang sehari tu.

Ku iya nambah, entara batang ubah nya nyengkaum koordinasyen timpuh nyiri Kaban Komiti KRT (AJKRT) nengah pengawa ngelanjarka timpuh nyiri, dikena nentuka penerus pengawa nyadi ketuai enggau penegap program komuniti.

Kelimpah ari nya, ubah nya mega mungkur pengawa ngenegapka agih belanja ke udah bisi ngambika mengkang relevan enggau guna ke diatu sereta ulih mutarka pemar rama ke majak nyadi ba renggat komuniti.

Atur tu setipak enggau aspirasyen perintah dalam ngenegapka penyerakup bansa sereta ngenegapka pangku pengawa rayat nyadi tiang pengelantang menua ari baruh penemu Malaysia MADANI. -RBI

Ketuai Polis Pelilih Meradong, DSP Tansli Mering madah, pengawa ngetan nya digaga urung pukul 3 lemai nengah Ops Tapis Khas.

Nitihku iya, suspek udah nya dibai ngagai IPD Meradong ngambika atur silik agi dipejalaika sebedau beperesa nisih ai kemi ba Opis Bagian Tasat Jenayah Narkotik (BSJND) Pelilih Meradong.

“Asil peresa nya tetemuka saspek positif dadah bansa amphetamine enggau methamphetamine,” ku iya ba sebengkah penerang.

Ku iya, pengawa meresa baru rikod ke udah mega tetemuka saspek nadai ngembuan sebarang rikod jenayah sebedau tu tauka penyalah bekaul enggau dadah.

Kes tu dipansik ari baruh Seksyen 15(1)(a) Akta Dadah Berbahaya 1952 ti nyendiaka ukum mata duit enda ngelui ari RM5,000 tauka jil nyentuk dua taun, nyema dikenuku salah.

Berebak enggau nya, polis nyemetak madahka sida enda belembut ba sebarang penyalah bekaul enggau dadah, lalu deka terus chakah agi bejalaika operasyen dikena ngelaban pengawa salah nya di pelilih tu.

Mensia mayuh ti bisi penerang bekaul enggau aktiviti dadah dipinta ngenataika penerang nya ngagai Balai Polis Bintangor nengah lumur 084-693222. -RBI