MERADONG, April 21 – Siku lelaki peranak menua tu beumur 33 taun ditan polis pengudah iya ditemu positif dadah dalam operasyen khas “Ops Tapis” ti dipejalaika Tim Petugas Indu Opis Polis Pelilih (IPD) Meradong, pagi tadi.

Kepala Polis Pelilih Meradong, DSP Tansli Mering madah, pengawa ngetan nya digaga urung pukul 9.30 pagi ba kandang menua Bintangor pengudah saspek dipelaba bisi kaul enggau aktiviti salah guna dadah.

Nitihku iya, saspek udah nya dibai ngagai IPD Meradong ngambika atur silik agi dipejalaika sebedau beperesa nisih ai kemi ba Opis Bagian Tasat Jenayah Narkotik (BSJND) Pelilih Meradong.

“Asil peresa nya tetemuka saspek positif dadah bansa amphetamine enggau methamphetamine,” ku iya ba sebengkah penerang.

Ku iya nambah, pengawa meresa baru rikod ke udah mega tetemuka saspek ngembuan dua rikod penyalah bekaul enggau dadah.

Diatu kes nya benung dipansik ari baruh Seksyen 15(1)(a) Akta Dadah Berbahaya 1952, ti nyendiaka ukum mata duit enda ngelui ari RM5,000 tauka jil nyentuk dua taun, enti dikenuku salah.

Berebak enggau nya, raban polis ngemeratka komitmen sida deka terus ngelaban aktiviti dadah sereta nadai belembut ba sebarang penyalah ke bekaul.

Mensia mayuh ke bisi penerang pasal aktiviti salah guna dadah di pelilih Meradong dipinta datai ke mua lalu nyadung penerang ngagai Balai Polis Bintangor nengah lumur 084-693222. -RBI

SONG, 21 April — Kereja ngaga Jematan Bailey sementara ungkup Perambu Projek Ngaga Jematan Ulu Katibas di Nanga Bangkit diatu benung ba renggat ke penudi lalu nyau deka tembu.

Struktur sementara tu digaga khas nyadi jalai akses ngagai palan projek dikena ngemudahka pejalai injin, nganjung kereban dikena ngaga sereta dikena nyukung pengawa ngaga jematan tetap enggau lanchar.

Ungkup penerang, Jematan Bailey sementara tu khas dikena ngaga aja lalu enda dibuka ngagai mensia mayuh dikena nentuka sukut pengelikun seruran dijaga.

Pengawa ngaga jematan sementara tu siti singkang ti beguna dikena nentuka pejalai projek besai ulih diteruska enggau lanchar agi, likun sereta teratur.

Nengah penembu jalai akses tu, kereja ngaga jematan tetap 125 meter meraka Sungai Katibas dikearap ulih dikelengkas sereta dipejalaika enggau efisyen agi.

Naka ke diatu, pejalai fizikal ke bendar projek nya udah manggai 1.60 peratus.

Berebak enggau nya, Kaban Kunsil Nengeri (ADUN) Katibas Lidam Assan netapka pejalai projek nya chukup meri peransang.

Iya madah, naka ke diatu, jematan sementara nya udah mujur meraka Sungai Katibas, lalu enggau nya ngelai siti pemujur ke beguna dalam pengawa bejalaika projek nya.

“Kekadang tusah deka pechaya, tang penyulut ke dijapai amat meri peransang.

“Jematan sementara nya diatu udah meraka Sungai Katibas, mandangka projek tu ba jalai ke betul,” ku iya.

Berebak enggau nya, iya mega minta semua piak besampi ngambika kereja ngaga nya ulih dipejalaika enggau likun, lanchar sereta produktif nyentukka projek nya tembu penuh.

Enti udah tembu ila, jematan tetap tu dikearapka ulih meri penguntung ke besai ngagai peranak menua nya nengah perengka guna penyambung jalai ke manah agi, likun sereta meransang penumbuh enggau pemansang sosio-ekonomi kandang menua ke ngelingi. — RBI

BETONG, 21 April — Palan Servis Rayat Parlimen P.204 Betong begulai enggau ejensi ti bejalaika pengawa sehari tu udah ngatur sesi nyerahka ungkup Projek Mesra Rayat (PMR) 2025 di Rumah Panjai Sungai Kepayang, Layar.

Projek ti dipejalaika nya mungkur pengawa nyemin palan endur ngengkahka entukar, enggau tuju deka nambahka pengelantang enggau pengelikun peranak menua nya kelimpah nentuka pengawa ngena palan endur ngengkahka entukar lebih teratur sereta sistematik.

Inisiatif tu sebagi ari komitmen ti seruran dipejalai dikena ngenegapka perengka guna asas di menua pesisir, seriris enggau pengawa ngangkatka kualiti pengidup komuniti lokal.

Kaban Parlimen Betong, Dato Dr Richard Rapu madah, pengawa bejalaika projek ke bansa nya dikearap ulih meri pemaik ungkup timpuh ke panjai ngagai komuniti sereta nyukung guna ninting hari peranak menua nya.

“Dikearapka perengka guna ke disedia ulih dikena penuh peranak sereta diintu enggau manah ungkup pengelantang begulai,” ku iya.

Ku iya nambah, piak iya deka terus komited nentuka pengawa bejalaika projek pemansang ti meri empas terus ngagai rayat ba sitak Parlimen Betong. — RBI

KUCHING, 21 April – Pemujur terus dijapai Kaunsil Pemansang enggau Pengintu Tanah (LCDA) ba renggat serantau majak tegap, ti ngungkuka nerima aku ba Anugerah Pemujur Korporat & Kelestarian Asia 2025 di Bali ungkup pemansang enggau penumbuh ti meruan.

Neruska pemujur tu, dua buah anak kompeni ke diempu sepenuh iya, LCDA Holdings Sdn Bhd (LHSB) enggau LCDA Agri Business Sdn Bhd (LABSB), sekali agi ngasuh kaunsil nya temegah ati lebuh sida nerima kelala ti beprestij ba Pengerami Malam Anugerah Pemenang Asia dalam taun 2026 di Jakarta.

Pengerami nyuaka anugerah ke diatur Mediatama Awards Management ke nyadi ba Holiday Inn & Suites Jakarta Gajah Mada ngempuruka pemain industri tebilang ari serata Asia, lalu enggau nya nyadi panggau endur ngaku pemanah enggau inovasyen.

Ketuai Pemesai Eksekutif LABSB, Bibi Umizah Osman ngarika LCDA nerima anugerah ti disuaka Leo Setiawan.

Nitihka penerang ari LCDA, LHSB diberi Anugerah Penyedia Servis Korporat Pilihan Terbaik Asia enggau Penyedia Servis Korporat Terbaik 2026 dikena ngaku pemanah pengawa enggau pengulih ngenataika servis korporat ti bekualiti tinggi.

Berebak enggau nya, LABSB nerima Anugerah Pemansang Ladang Aktiviti Betanam Betupi Pilihan Terbaik Asia 2026 ketegal pemujur ti meransang dalam aktiviti betanam betupi enggau pemansang ladang, kelimpah ari pangku pengawa iya meransang pengawa dagang betanam betupi ti meruan.

LCDA madahka pemujur tu ngayanka komitmen kaunsil ti terus meri kuasa ngagai inisiatif pemansang ti meruan ti meri empas tinggi, kelimpah ari nentuka nilai dikenataika ba selampur portfolio.

Ku iya nambah, anugerah nya nengah proses pematau ti terit ari panel akim enggau sukung gerempung profesional sereta pengari media, bepelasarka kriteria kunsi baka kualiti, prestasi, tanggungpengawa enggau efektiviti.

“Pengawa menilai nya mega ngambi kira penemu ari mayuh bengkah piak nyengkaum mensia mayuh, pengatur organisasyen enggau pemeranak puku dikena nentuka proses milih ti terang, komprehensif sereta bepelasarka integriti,” ku penerang nya.

Pengerami Malam Anugerah Pemenang Asia 2026 nyadi pelasar ke beguna dalam meri puji ngagai gerempung ti mandangka pengawa nyadi ketuai, inovasyen enggau pemanah ba mayuh macham industri ba renggat Asia. -RBI

BAU, 21 April — Raban Penyaga Orang Periman Malaysia (APM) Pelilih Bau nengah Palan Kawalan Operasyen Pelilih Menua (PKOD) nerima kangau ngenyit ari mensia mayuh pukul 12.05 tengahari bekaul enggau penusah pun kayu tumbang di Kampung Sebobok, Bau.

Berindik ari nya, seraban APM Bau dianjung ngagai palan penusah nyadi ngambika bejalaika pengawa netak, ngupas sereta meresi dikena nentuka pengelikun peranak enggau pengelanchar kandang menua nya.

Gaya endur nya diripotka ulih dijaga lalu nadai sebarang bakal diripotka naka ke diatu.

Pengawa ti jampat dipejalaika nya ngayanka APM ti seruran nyikap diri napi penusah ngenyit, setipak enggau pangku pengawa nyadi ejensi baris mua ba pengawa mutarka penusah ngenyit enggau pengelikun mensia mayuh.

Berindik enggau nya, mensia mayuh dilalau ngambika seruran bejaga-jaga, kelebih agi maya gaya hari ti enda tentu ti bisi potensi ngenataika penusah baka pun kayu tumbang.

Sebarang penusah ngenyit tau disalur terus ngagai APM Bau nengah lumur 082-762925 tauka talipaun penusah ngenyit 999. — RBI

KOTA SAMARAHAN, 21 April – Universiti Teknologi MARA Pampang Sarawak mantah dawa bekaul bisi kuasa nyiri vendor balai makai kampus, berindik ari isu rega, pemeresi enggau atur pengawa ti dikemegau ba sebelah media rama ngaul kampus Samarahan nya.

Raban pengatur universiti ba siti penerang rasmi madah, pengawa nyiri vendor dipejalaika nitih atur sereta kompetitif nengah iklan tebuka ba surat berita menua tu enggau media rama.

Iya nyemetak madah, bala vendor ti ngenah pemakai ba Balai Makai Seri Mulu enggau Balai Makai Seri Gading bebida sereta nadai kaul enggau pangan diri.

Bepelasarka penerang nya, pengelantang pendiau nembiak mengkang nyadi pekara dikemerat lalu pengawa matau ti terit seruran dipejalai nyengkaum nentuka rega pemakai di kampus murah agi ari di luar.

Pia mega, sukut kualiti enggau pemeresi bela diberi perati.

Ungkup tuju matau, Komiti Pematau Palan Komersial (JKPRN) ti ditumbuh staf enggau nembiak deka bejalaika pengawa meresa sebarang maya penyuah empat kali sebulan ba semua premis makai.

Bala vendor mega dipinta nitih ke rega ti dipesetuju ba dokumen sebut rega enggau atur pengawa ti terit baka meri kompaun, surat tangkan, ngurangka tanda merit nyentuk ngetu kunterik enti ditemu ngelanggar atur.

Berindik ari sebana pemadu baru ba Balai Makai Seri Gading, JKPRN bisi bejalaika pengawa meresa ngenyit lengkas kena 10 enggau 14 April tu tadi.

Nangkan nya, jaku tangkan tumu bisi dipansut ngagai bala vendor bekaul.

Sida ke bejual mega digerah mandangka tanda rega enggau terang agi nengah chara masang banner, seraya ngeluarka resit nyadi mandatori ungkup tetiap transaksyen dikena nambahka penerang sereta ngemuntang pengawa mansik enti bisi sebana rega ke enda patut.

Berebak enggau nya, universiti nesau semua peranak kampus mantaika sebana sida nengah chara rasmi ke disedia ngambi pengawa mutar ulih dipejalai lengkas sereta efektif agi.

Pengawa mantai sebana mega udah ditambah nengah pengawa nyendia Kod QR ungkup Portal Sebana Palan Komersial ba palan ke strategik ngelingi kampus.

UiTM Sarawak nyemetak madah, raban sida enda belembut enggau sebarang pedagang ti enda nitih ke standard pemeresi enggau etika netap rega barang. -RBI

KUCHING, 21 April — Premier Sarawak, Datuk Patinggi Tan Sri (Dr) Abang Johari bin Tun Datuk Abang Haji Openg, bejadika Pengerami Muzium Pesaka Industri Brooke Dockyard, ditu kemari.

Bejaku ba pengawa nya, Premier Sarawak madahka bisi perambu deka ngemansangka projek tebing sungai sepemanjai 4.8 kilometer ti deka nyambung kandang endur Brooke Dockyard enggau Jematan Satok dikena nempa koridor dagang temuai besepadu bepelasarka pesaka enggau main asal.

Renggat keterubah projek nya dipelaba deka berengkah taun baru enggau agih belanja urung RM160 juta, lalu ditangkan enggau renggat kedua ti beungkus RM400 juta, ti deka ngayanka langkar arkitektur ti nyelai nyengkaum jalai bejalai kaki ti tinggi dikena nyaga pengelantang komuniti lokal.

“Pemansang tu deka meri peneleba ke bebida ngagai temuai, kelimpah nyambung elemen sejarah, budaya enggau pengidup komuniti ba kededua tebing sungai,” ku iya.

Iya mega nambah, Sarawak diatu bulih kelala antarabansa enggau sekeda kelala global nyengkaum Palan Pesaka Dunya Taman Negara Gunung Mulu enggau Taman Negara Niah, kelimpah ari kelai Kuching nyadi mengeri gastronomi.

Ku iya nambah, pengawa ngulihka kelala geopark ari UNESCO ungkup kandang menua Kuching Delta deka muka siti agi dimensi baru dalam ngenegapka penuduk Sarawak nyadi palan dagang temuai tikas dunya.

Berebak enggau nya, iya mega madahka penambah aksesibiliti nengah inisiatif penerebai bilun serantau AirBorneo deka nyadi pelasar ke beguna dalam mai mayuh agi temuai ngagai nengeri tu.

Iya mega meri besai terima kasih ngagai Opis Menteri Dagang Temuai, Industri Kreatif enggau Seni Persembahan Sarawak sereta Opis Muzium Sarawak ti seruran bebendar ngemujurka projek nya.

Sama bisi datai Sapit Premier Sarawak Datuk Amar Prof Dr Sim Kui Hian, Speaker Kaunsil Nengeri (DUN) Sarawak Tan Sri Datuk Amar Mohamad Asfia Awang Nassar, Menteri Dagang Temuai, Industri Kreatif enggau Seni Pemerindang Dato Sri Abdul Karim Rahman Hamzah, Menteri Industri Pemakai, Komoditi enggau Pemansang Kandang Menua Sarawak Dato Sri Dr Stephen Rundi Utom, Menteri Perengka Pengangkut Sarawak Dato Sri Lee Kim Shin, Sekretari Mendam Perintah (Perambu Ekonomi enggau Pemansang) Sarawak Dato Sri Dr Muhammad Abdullah Zaidel, Sapit-sapit Menteri sereta temuai dipebasa bukai. — RBI

TOKYO, 20 April — Ejensi Meteorologi Jepun mansutka gerah tsunami berindik ari penusah tanah berenyang ke nyadi ba tebing tasik timur laut Jipun urung pukul 4.53 lemai jam menua nya, sehari tu.

Opis Kedutaan Malaysia di Tokyo nengah siti penerang ngelalau semua rayat Malaysia enggau temuai ngambika seruran bejaga-jaga sereta nitihka penuh atur ari piak bekuasa kandang menua, kelebih agi ba kandang endur ke kena penusah nya.

Entara pelilih menua ke dikelala bisi risiko iya nya Hokkaido, Aomori enggau Iwate.

Nitihka penerang nya, mensia mayuh dipinta nyeliahka diri ngelawa pantai, lalu nitihka pengerembai berita bekau penusah nya sereta lengkas mindah ngagai endur ke tinggi agi enti diasuh piak bekuasa.

Ba penusah ngenyit, rayat Malaysia tau betanya ngagai Opis Kedutaan Malaysia di Tokyo nengah talipaun opis +81-3-3476-3840 (jam opis) tauka talipaun penusah ngenyit +81-80-4322-3366.

Tanya mega tau dianjung nengah email ngagai [email protected] tauka [email protected].

Ungkup ke diatu, piak bekuasa Jipun terus matau gaya nya lalu pemansang ke nangkanka nya deka dipadah ari setiap maya. -RBI

SIBU, 20 April – Aum Komiti Gerempung Pengajar Sarawak (STU) Ke-4 ungkup sesi 2026-2028 kena 17-18 April 2026 setuju nambahka pengari orang indu pemadu mimit 40 peratus dalam pengawa nyadi ketuai.

Presiden STU Kullin Djayang madahka, atur tu deka ngemunaska diskriminasyen penempa, sereta nempa budaya kereja ti likun ari pengawa ti enda manah ke “ngachau” bepelasarka penempa.

“STU setuju ngemeranka Polisi Penempa, iya nya polisi ari Gerempung Pengajar Antarabansa (EI).

“Semua kaban komiti setuju ngenukuka komitmen STU ngagai prinsip penyemaka, pengelurus enggau inklusif setipak enggau penetap undang-undang menua enggau standard antarabansa.

“Polisi tu ngembuan tuju deka nentuka semua kaban enda ngira lelaki tauka indu nerima hak, peluang enggau akses ke sama ngagai pengawa nyadi ketuai enggau latih,” ku jaku Kullin.

Penemu tu dipesetuju enggau semua pengawa STU ti diiring prinsip kunsi baka penyemaka, basa, meri kuasa enggau akauntabiliti.

Kelimpah ari nya, STU mega ngemeratka penempa dalam semua program enggau polisi, nyengkaum nengah latih, kimpin penyedar enggau ngena komunikasyen inklusif.

“Kerejasama enggau mayuh bengkah piak mega ditegapka dikena ngelaban pengawa ti enda betul ti bekaul enggau penempa dalam sektor pelajar.

“Semua prinsip tu engkeman ungkup tiap gerempung enggau tebal agi gerempung di menua tu,” ku iya. -RBISTU setuju nambahka pengari ari orang indu 40 peratus dalam pengawa nyadi ketuai

KUCHING, 20 April — Projek ngaga Jematan Sejingkat diatu udah ngerikodka penyulut fizikal 84.86 peratus, lalu enggau nya ngayanka penyulut ti meransang nuju penembu penuh.

Direktor Kereja Raya Sarawak, Datu Adj. Prof. Ir. Ts. Gs. Br. PMr. Dr. Cassidy anak Morris Cassidy, udah bejalaika pengawa ngabas palan dikena beratika baru pejalai projek nya sereta nentuka kereja ngaga bejalai nitihka spesifikasyen, standard teknikal enggau timpuh ke udah ditetapka.

Rambau penemuai nya, penerang silik pasal status projek ke diatu diberi Ir. Ts. Wang Say Kwang, mungkur pemansang pemadu baru enggau pemujur penyulut pengawa ngaga.

Berebak enggau nya, iya mega ngemeratka pemesai guna pengawa matau ti seruran dipejalai, nitihka sukut pengelikun enggau kerejasama rat entara semua raban dikena nentuka projek nya ulih ditembu dalam timpuh ti udah ditetapka.

Projek Jematan Sejingkat dikearap ulih ngemanahka agi rangkaian komunikasyen sereta nyukung pemansang sosio-ekonomi kandang menua enti udah tembu ila. — RBI