Dalam dunya ti jampat mansang, kitai suah diajar nguji utai ti besai ke ngemai pemujur, pengaya, pengangkun.

Taja pia, kitai jarang dikingatka pengidup tu kebendar iya digaga ari utai ti mit ti dikereja kitai ninting hari.

Kitai kiruh merambu utai ke jemah ila nyentukka kitai enda ingat deka beterima kasih ke utai ke diatu.

Kebendar iya, dia meh reti pengidup ti bendar. Tuchum ti diberi kitai, jaku ti manah ti disebut kitai, tauka penyabar ti dipilih kitai lebuh diuji, semua nya engka dipeda mit, tang nya meri empas ti besai ngagai diri empu enggau orang bukai.

Ajar pengidup ti pemadu beguna kebendar iya ukai pasal ni naka penyauh kitai bejalai, tang baka ni kitai ngemai diri.

Bisi orang mujur datai ba tikas ke pemadu atas, tang lenyau nilai mensia.

Bisi mega sida ke idup senang, tang ati sida penuh enggau pemaik sereta berekat. Nyadi, sukat pengidup ukai semina pengulih aja, tang mega pengelurus ati.

Kitai mega suah takut enda mujur. Kebendar iya, pemuntan ukai pengujung, tang pengajar ti pemadu lurus.

Iya ngajar kitai pasal pengelemi, nempa pengeliat ati, sereta muka jalai nuju penemu ti dalam. Enti nadai labuh, kitai enda belajar angkat kering agi.

Dalam pejalai tu, anang enda ingat beterima kasih. Ukai semina lebuh semua utai bejalai enggau manah, tang mega lebuh kitai diuji.

Laban di belakang pekara nya, bisi ajar ti nempa kitai nyadi orang ti lebih tuai runding sereta meretika reti pengidup.

Pengujung iya, pengidup ukai bekaul enggau sapa ke pemadu jampat tauka pemadu besai. Tang pasal sapa ke pemadu ulih nempa dalam pemanah ati, ke pemadu kering dalam penyabar, sereta ke pemadu ikhlas meri.

Enti seharitu berasai tusah, ingat nuan enda ibuh jauh. Semina siti singkang mit ke mua, enggau niat ti manah. Laban ari nya, pejalai ti besai berengkah. -RBI

SIBU, 22 April – Raban ari Opis Pengerara Api enggau Penyah Penusah Malaysia (JBPM) mujur nagang sereta madamka penusah babas angus ke nyadi ba Jalai Kemuyang, ditu, kemari.

Nitihka ripot operasyen, penusah nya ngaul penusah babas angus ba tisi jalai enggau pemesai dipelabaka urung 30 x 30 meter persegi.

Operasyen nya betuaika PBK I Terrance anak Jimbun nyadi Komander Operasyen begulai enggau enam iku raban ari Balai Bomba enggau Penyah Penusah (BBP) Sibu Jaya.

Lebuh datai ba endur nya, tim bomba bejalaika pengawa ‘size-up’ sebedau berengkah enggau operasyen madam ngena arus hos bantu tunggal ari pam jentera bomba.

Api mujur dipadamka enggau penuh enggau nadai sebarang bakal tauka pengerusak reta tengkira diripotka.

Pengudah nentuka gaya nya likun bendar, tim operasyen pulai baru ngagai BBP Sibu Jaya.

Operasyen nya diketuka pengudah api ulih dilara enggau penuh. -RBI

KUCHING, 22 April – Pemeri sepenyampau RM560,000 ngagai 24 gerempung ukai dikuasa perintah (NGO) mandangka penerus legasi pengasih niang Datuk Patinggi Puan Sri (Dr.) Hajjah Laila Taib dalam pengawa mantu komuniti ti begunaka bantu di Sarawak.

Pemeri nya disuaka Sapit Menteri Pengerai Malaysia, Dato Hajjah Hanifah Hajar Taib begulai enggau menyadi indu iya, Puan Jamilah Hamidah Taib enggau menyadi lelaki iya, Dato Sri Mahmud Abu Bekir Taib nengah Amanah Warisan Taib enggau Laila ba Pengerami Ngelancharka Bup Laila Taib: Her Journey of Love and Compassion ti udah nyadi ba Pustaka Negeri Sarawak kena Hari Minggu, 12 April tu tadi.

Inisiatif tu nyadi pengawa ari sida iya sebilik dalam neruska semengat enggau nilai mulia ti udah diterenak niang Datuk Patinggi, kelebih agi dalam ngetanka pengelantang enggau penyerakup rayat nengah sukung ngagai NGO ti chakah gawa ke komuniti, kelebih agi di Sarawak.

Tebal agi NGO ke nerima pemeri nya iya nya gerempung ke kala bekerejasama rat enggau niang Laila Taib sekumbang iya agi idup, lalu enggau nya nyadika bantu nya kelai meri terima kasih sereta ngaku pangku pengawa sida mantu sida ke begunaka bantu. -RBI

BETONG, 21 April — Sapit Premier Sarawak, Datuk Amar Douglas Uggah Embas, bejalaika penemuai kereja ngagai perambu ngaga jalai alun nuju ke Bukit Sadok nyadi sebagi ari pengawa perintah nengeri ti seruran dipejalaika dikena ngenegapka rentayan penyambung di menua pesisir.

Rambau penemuai nya, iya diberi penerang ari Injinir Bagi Menua, Jason Ng Boon Tuan, bekaul enggau status perambu projek jalai pemanjai 3.1 kilometer ngagai Bukit Sadok ti deka dikemansangka nitihka standard R1 Opis Kereja Raya (JKR).

Projek tu ngembuan tuju deka nyendiaka akses ti likun sereta efisyen agi ngagai komuniti lokal, kelimpah ari nyadi jalai besai nuju Replika Kuta Rentap ti benung digaga diatu.

Pemansang infrastruktur nya dikearapka ulih meri empas ke manah ngagai sektor dagang temuai besejarah ba kandang menua nya, lalu enggau nya ulih meri pangka ngagai penumbuh ekonomi kandang menua.

Kelimpah ari nya, iya mega dipadah pasal pejalai pengawa ngaga Jalai Jambu Krampak – Rantau Layang pemanjai 1.8 kilometer, ke diatu benung chakah dipejalai lalu disadang tembu bulan Oktober 2026.

Projek tu mega dikemansang nitihka standard JKR R1 lalu deka meri penguntung terus ngagai peranak ba sekeda kandang endur rumah panjai nyengkaum Ijok, Teguyu, Lempaong, Batu Pesok enggau Rantau Layang nengah pengawa nyendiaka akses ke manah agi ngagai perengka guna pemun enggau rentayan jalai besai.

Pengawa bejalaika projek tu mandangka komitmen perintah Sarawak deka ngenegapka pemansang menua pesisir nengah pengawa ngemanahka infrastruktur asas, kelimpah ari muka mayuh agi peluang ngagai aktiviti ekonomi baka betanam betupi komoditi nyengkaum getah, sawit enggau lada.

Inisiatif tu setipak enggau agenda pemansang inklusif perintah nengeri ti ngemeratka timbang pemansang entara kandang mengeri enggau menua pesisir ungkup pengelantang rayat selampur. — RBI

LIMBANG, 21 April — Raban Penyaga Pengelikun Mensia Mayuh Malaysia (APM) Pelilih Menua Limbang udah bejalaika operasyen bantu bekaul enggau penusah angus ke nuntung genturung pendiau di Rumah Senggat, Batu 8, Jalai Kubong, lemai tu tadi.

Palan Kawalan Operasyen (PKOD) Pelilih Limbang nerima kangau ngenyit pukul 4.53 lemai.

Berindik ari nya, tim APM ke mungkur empat (4) iku raban udah dianjung ngagai palan penusah nyadi lalu datai pukul 5.20, betuaika Kpl (PA) Mohd Arif enggau Midun.

Bepelasarka ripot ari Opis Bomba enggau Penyah Penusah Malaysia (JBPM), penusah angus nya ngaul sebuah rumah panjai struktur setengah tetap.

Sebuah unit endur diau lumur 7 udah abis rusak enggau pemesai dipelabaka 15 x 40 kaki persegi, lalu dua unit ke besepiak mega kena empas iya nya unit lumur 6 enggau urung 10 peratus pengerusak enggau unit lumur 8 urung 5 peratus.

Operasyen bomba dipejalaika JBPM enggau bantu mensia mayuh lalu udah dikuasa penuh pukul 6.37 lemai.

Nadai penusah bakal tauka bebadi nyawa diripotka nyadi ba penusah tu.

Sepenyampau 32 iku orang ke napi penusah ari tiga (3) Ketuai Ruang Bilik (KIR) ti mungkur 12 iku nembiak mit, 16 iku orang besai tuai enggau 4 iku orang tuai.

Semua sida diatu diau sementara ba rumah kaban belayan ba rumah panjai ke sama.

Operasyen bersepadu nya mega mungkur sekeda ejensi pengelikun enggau penyelamat nyengkaum Polis DiRaja Malaysia (PDRM), Opis Pengintu Pengelantang Raban Bansa (JKM), enggau Sarawak Energy (SESCO).

Tetiap ejensi bejalaika tanggungpengawa diri empu dalam pengawa ngatur penusah, mantu orang ke dituntung penusah, enggau pengawa nagang pengelikun ba palan nya.

Pansik tumu dikena ngelala pun penusah angus benung dipejalaika piak bekuasa bekaul.

Mensia mayuh dilalau ngambika seruran bejejaga ari risiko penusah angus lalu tau betanya ngagai APM Limbang nengah lumur 085-210471 tauka talipaun penusah ngenyit MERS 999 nyema bisi sebarang penusah ngenyit nyadi. — RBI

BINTULU, 21 April — Pengericah pengerami Gawai Dayak deka dipeda agi taun tu enggau pengawa ngatur Pasar Gawai Dayak Bintulu 2026 ti deka berengkah 1 ngagai 18 Mei 2026 ba NAIM Street Mall Bintulu Paragon.

Program ke deka diatur Gerempung Pemansang Dayak Bintulu (BANGUN) begulai enggu Dayak Bukit Kelingkang sereta Persatuan Kebajikan Tunjang Masyarakat (TM) nya berengkah ninting hari ari pukul 8.00 pagi nyentuk 11.00 malam nya deka ngempung bemacham aktiviti ke ngerinduka ati bepelasarka budaya Dayak, lalu enggau nya nyadi pelasar dikena ngelakuka pesaka asal menua tu ngagai komuniti pupu bansa.

Entara batang pematak iya nya bansal nyual pemakai enggau ai irup asal, asil pengelandik jari enggau bemacham produk ke nyelai ti mandangka konsep Gawai Dayak.

Kelimpah ari nya, temuai mega deka bepeluang ngulihka servis ngaga pantang ba bansal khas ti disediaka.

Dikena ngerichahka agi pengerami nya, bemacham pengawa pemerindang baka belagu ari raban penanyi tebilang, karaoke kelimpah ari pengawa mandangka seni enggau main asal mega bisi diatur sepemanjai atur pengawa nya.

Enda tau ditinggal, pengawa pemandang ari ejensi perintah enggau peribit mega deka diatur dikena meri penerang ngagai mensia mayuh.

Bala temuai mega bisi peluang bulih perais ti narit ati nengah chabut tikit benasit.

Pengawa ngatur pasar tu dikearap ulih nyadi fokus peranak menua tu enggau temuai, kelimpah ari ngenegapka semengat beserakup sereta angkunka penyelai budaya ti nyadi kelai nengeri Sarawak. -RBI

MIRI, 21 April — Raban bomba ari Balai Bomba enggau Penyah Penusah (BBP) Lopeng udah mujur nagang penusah angus ke nuntung sebuah rumah ba kandang endur Pujut 2C, Jalai Besi, semak Perumahan Kastam, lemai tu tadi.

Palan Operasyen nerima kangau ngenyit pukul 2.55 lemai sebedau raban bomba mupuk ari balai nya pukul 2.56 lemai lalu datai ba endur penusah nyadi pukul 3.03 lemai.

Lebuh datai ba palan nya, raban operasyen ngentaska bisi penusah angus rumah baka ti diripotka.

Operasyen madamka api tekala nya dipejalaika ngena arus 100 kaki enggau dua iti munchung nengah bantu mesin pam dikena nyaga sereta madamka api ari nyerarai.

Api mujur dirara urung pukul 3.30 lemai, sebedau operasyen madamka api enggau kereja meresa pengelikun diteruska nyentukka gaya ba palan penusah nyadi dientaska likun.

Operasyen nya tembu enggau penuh urung pukul 7.20 malam.

Sama bisi ba endur nya Ketuai Zon 6 enggau pemesai kanan JBPM nyengkaum pemesai ari Bahagian Forensik ke tuju mansik enggau silik agi kebuah penusah nya nyadi.

Penyauh ari endur penusah nyadi ngagai BBP Lopeng dipelabaka 7 kilometer.

Nadai ripot bisi bakal tauka bebadi nyawa diripotka dalam penusah tu.

JBPM ngelalau mensia mayuh ngambika seruran nentuka sukut pengelikun penusah angus ba rumah sida empu diberi perati ke berat sereta ngambi atur nyeliah dikena nyeliahka penusah ke sebaka nyadi baru. -RBI

LIMBANG, 21 April — Sebuah rumah panjai di Rumah Senggat Batu 8, Jalai Kubong, di Limbang udah angus tengahari tu tadi, tang nadai penusah bebadi nyawa diripot nyadi.

Palan Operasyen nerima kangau ngenyit urung pukul 3.40 lemai sebedau seraban bomba ari Balai Bomba enggau Penyah Penusah (BBP) Limbang dianjung ngagai palan ke bepalan urung 18 kilometer ari balai nya, lalu datai pukul 4.00 lemai.

Nitihka penerang ari Komander Operasyen, PBK I Dzuryman Suhaini, penusah angus nya ngaul unit rumah panjai setengah tetap iya nya rumah lumur 7 ti udah abis angus enggau pemesai dipelabaka 15 x 40 kaki persegi.

“Api mujur dirara urung pukul 4.25 lemai lalu operasyen tembu abis urung pukul 5.20 lemai pengudah kereja ‘overhaul’ dipejalaika,” ku iya.

Penusah angus nya mega nuntung dua buah rumah ke besepiak, enggau rumah lumur 6 napi pengerusak urung 10 peratus lalu rumah lumur 8 napi pengerusak urung lima peratus.

Raban bomba bejalaika operasyen madamka api ngena dua batang ai pemanjai 200 kaki enggau tiga munchung, ngulihka ai ari paip bomba enggau ngena dua batang ai hos bantu tumu.

Semua orang ke nguan rumah ke bisi kaul nya diripotka selamat. Rumah lumur 7 ke udah abis angus diuan suku indu ke beumur 62 taun, lalu dua buah rumah ke bukai ke kena penusah nya diuan lelaki ke beumur 56 enggau 58 taun.

Sepenyampau enam iku raban bomba ngaul diri dalam operasyen lalu sama bisi mantu ba endur nya, Polis DiRaja Malaysia (PDRM), RELA enggau SESCO.

Kebuah penusah angus nyadi agi benung dipansik. -RBI

MIRI, 21 April – Balai Bomba enggau Penyah Penusah (BBP) Lutong majak ngenegapka tikas nyikap diri enggau nitihka atur pengelikun nengah pengawa ngatur Aum Latih Ngenegapka Pengelikun (OKK) 2026 ti nyadi ba bilik aum balai nya, pagi tadi.

Program ti diatur ari pukul 9.30 nyentuk 11.00 pagi nya ngemeratka pengawa nitihka Standard Tindakan Bomba (STB) kelimpah ngelengkaska perambu latih ti ngaul ejensi enggau premis berisiko ngelingi Miri.

Entara batang isi program nya nyengkaum meri penerang pasal atur latih, mandangka video latih bomba, sereta haribulan enggau jam latih ungkup taun tu.

Bemacham ejensi enggau gerempung bisi datai ngemujurka sesi nya, nyengkaum Kansil Penyangkai Kapal Miri, Myy Mall Management Sdn Bhd, Daiken Miri Sdn Bhd, Emart Tudan, Sepital Pakar KPJ Miri, Universiti Curtin, Supermarket Evervin Sdn Bhd enggau MCOT.

Berebak enggau nya, dua bengkah gerempung iya nya New World Mart (Miri) Sdn Bhd enggau Shin Yang Holding Sdn Bhd enda ulih datai ngulu sesi nya.

Latih tu betuaika Ketuai Pematih, PBT II Henry Jugah, begulai enggau bala pematih ke bukai, iya nya PBK I Iskandar Aus, PBK II Mohammad Faizul Ali enggau PBK II TBKI I Edwin Siba enggau pengawa ngaul kaban Tim Bravo BBP Lutong.

Dikearap ngatur latih ke baka tu ulih nambahka tikas nyikap diri enggau efisyen timbal penusah ngenyit entara ejensi ke bisi kaul, lalu enggau nya nentuka aspek pengelikun ba penusah angus seruran ba tikas ke optimum. -RBI

KUCHING, 21 April — Serakup Graduet Dayak Sarawak (SDGA) ngenataika pengaga ati sereta tabi puji ngagai Penyanding Penemu sida, Sr Gary Ningkan, ke udah dipadu nyadi Sapit Chairman ‘Royal Institution of Surveyors Malaysia’ (RISM) Pampang Sarawak.

Nitihka penerang ari SDGA, RISM nyadi gerempung profesyenal keterubah ngarika juruukur dalam mayuh macham disiplin, nyengkaum juru ukur perengka, juruukur reta, Juruukur Tanah enggau Geomatik sereta Juruukur Begunan.

Penerang nya mega madahka Sr Gary Ningkan ke nyadi Pemansik Berejista, Ejen Hartanah enggau Menijar Hartanah ari baruh disiplin Jurukur Hartanah udah nyadi kaban chakah dalam institusyen nya kenyau ari taun 2018.

“Iya sebedau tu kala mangku pengawa pengelama dua penggal nyadi Chairman Seksyen Jurukur Hartanah lalu bejalaika tanggungpengawa ke beguna amat dalam ngenegapka standard profesyenal sereta nambahka kaul komuniti juruukur di Sarawak,” ku penerang nya.

Penerang SDGA nya nandu, pengawa nyiri iya nya ngayanka pengangkun ngagai pengawa nyadi ketuai, peneleba enggau pemeri iya dalam bidang nyukat reta tengkira.

“Dalam pangku pengawa baru, iya dikearap ulih terus meri pangka ngagai kuing strategik enggau ngenegapka pangku pengawa RISM Pampang Sarawak dalam meransang pemansang profesyen juruukur di nengeri tu,” ku penerang nya nerang.

Kelimpah ari pangku pengawa profesyenal iya, SDGA madahka iya mega siku penyukung ti chakah ngerembaika penyereta komuniti Dayak dalam bidang nyukat, nyengkaum meransang mayuh agi jurukur Dayak nyereta RISM.

Iya mega kaban Panel Penyanding Penemu Industri ungkup program Sarjana Muda Sains dalam Pengurusan Hartanah enggau Pembinaan di Universiti Teknologi Sarawak, ke nyadi program keterubah bekaul enggau reta tengkira ke bansa nya di Sarawak.

SDGA ngarapka pengawa nyiri tu deka nyadi pengepun ngagai mayuh agi raban nembiak Dayak ngemeranka pengawa nyukat sereta bejalaika tanggungpengawa enggau chakah dalam pemansang sosio-ekonomi nengeri tu. -RBI