DARO, 3 April — Raban Penyaga Mensia Mayuh Malaysia (APM) Pelilih Daro mujur nagang penusah angus tanah ke nyadi semak jalai besai entara Kampung Kut enggau Kampung Saai, sehari tu.

Nitihka penerang ari Palan Kawalan Operasyen (PKOD) Pelilih Daro, sida nerima kangau ngenyit madahka penusah nya sebedau raban APM terus dipindah ngagai endur nya enggau perengka operasyen.

“Lebuh datai ba endur nya, ditemu api nya ngaul kandang endur ke bisi tanah kerapa. Atur madamka api tekala nya dipejalai lalu api mujur dirara,” ku penerang nya.

Penerang nya nambah, semua kaban enggau perengka operasyen dalam gaya ke manah sepemanjai operasyen nya dipejalaika.

“Gaya ba palan penusah nyadi diatu udah ulih dijaga,” ku penerang nya.

Berindik enggau nya, mensia mayuh diingat ngambika seruran bejejaga sereta lengkas betanya ngagai talipaun penusah ngenyit 999 tauka hotline APM Daro ba lumur 084-823911 ti beoperasyen 24 jam nyema bisi sebarang penusah ngenyit nyadi. — RBI

KUCHING, 3 April — “Arapka pemaik bepun ari tiap iku kitai,” ku Uskup Agung Gereja Roman Katolik Kuching Dato Dr Simon Poh beserimbai enggau pengerami ngintu ‘Good Friday’ enggau Easter 2026, sehari tu.

Iya madahka hari besai ke diintu raban Kristian serata dunya kelebih agi di Sarawak chukup besai reti, sebuah nengeri ti dikelala enggau mayuh bengkah jalai pengarap, budaya enggau penegap penyerakup.

‘Good Friday’ ku iya, dikena ngingatka pemerinsa, regang enggau pemati Jesus Kristus ke nyadi lambang pengerindu enggau pengasih Tuhan ke pemadu tinggi ngagai mensia.

“‘Good Friday’ mai kitai belematika chara kitai ngidupka pengidup kitai, sekalika nya enggau pengasih, pengibuh enggau pemanah ati ngagai orang bukai sereta pengeran berambun nyawa ke kitai sama mensia,” ku iya dalam jaku pesan beserimbai enggau pengerami ngintu ‘Good Friday’.

Iya nyemetak madahka, nilai pengampun ti dipandangka ba jaku kepenudi Jesus ba regang nyadi chunto ti beguna dalam nempa raban bansa ti dalam pemaik sereta bebasa, kelebih agi dalam pupu raban bansa di Sarawak.

Iya mega nerangka regang ti ngayanka gamal Kristus nyadi kelai ti beguna dalam pengarap Kristian, kelai ngingatka pemerinsa Jesus laban deka nebus dosa tauka penyalah mensia.

“Regang ukai semina nyadika lambang tauka pengias aja, tang nyadika pengingat ngagai kitai ngambika idup enggau pengasih, pengampun sereta berambun nyawa baka ti dipandangka Kristus,” ku iya.

Berebak enggau nya, iya nesau raban Katolik di serata dunya ngambika begempung dalam sampi begulai enggau Paus Leo XIV ke pemaik dunya, kelebih agi sida ti tekeruga ketegal perang enggau penyarut.

Dipelabaka kurang lebih 1.4 bilion raban Kristian Katolik ngambi bagi ba pengawa besampi khas ‘Good Friday’, nyengkaum besampika ketuai Gerija, penyerakup raban Kristain sereta ti benung pedis merinsa.

Di Sarawak, pengerami ‘Good Friday’ dikelai enggau hari besai ti meri awak ngagai raban Kristian ngelu pengawa besembiang, besampi begulai enggau diri sebilik sereta beratika reti berambun nyawa enggau pengasih.

Pengerami tu mega disempulang enggau jaku pesan ari bala ketuai nengeri ti minta rayat terus nyaga pemaik enggau pengelantang, ulih nerima penemu pangan diri sereta bebasaka pangan diri kelebih agi nengeri tu diuan pupu raban bansa enggau jalai pengarap.

Kelimpah ari nya, beserimbai enggau ‘Good Friday’ pengawa bepuasa mega enda tau enda ti nyadika tanda nesal ati sereta beserakup enggau Kristus.

KUALA LUMPUR, 3 April — Graduet Setipikit Pelajar Malaysia (SPM) ti bisi ati deka nempa karier dalam sektor betanam betupi moden dilalau minta masuk program Pelajar enggau Latih Teknikal enggau Vokasional (TVET) ti bisi disediaka perintah.

Opis menteri bekaul udah madahka peminta program Sijil Pengelandik Malaysia (SKM) enggau Diploma Pengelandik Malaysia (DKM) dalam sektor betanam betupi udah dibuka berengkah 1 April 2026 ungkup sesi ngambi nembiak bulan Julai/Ogos taun tu.

Program tu ngembuan tuju deka ngasilka pengereja pengawa ti bepengelandik sereta kompetitif dalam sektor agro-pemakai nengah latih bepelasarka pengelandik ti diaku ba renggat menua, setipak enggau guna industri ke diatu.

Nitihka penerang nya, entara syarat ke patut ditetap iya nya peminta meseti peranak menua Malaysia, beumur entara 17 ngagai 30 taun, bepengerai batang tubuh sereta ngembuan pengelandik asas macha, nulis enggau ngira (3M).

“Ungkup peminta ti deka nampung pelajar ngagai tikas ke tinggi agi, sida enda tau enda bisi Setipikit Pengelandik Malaysia ba renggat sebedau tu dalam bidang ke sama.”

“Kelimpah ari nya, graduet Kolej Vokasional ti ngembuan setipikit SKM ti bekaul mega layak minta,” ku penerang nya.

Pesereta ke dipilih deka ngasaika bemacham perengkaguna nyengkaum bayar tuisyen enda bebayar, elawin ninting bulan entara RM200 ngagai RM300, endur diau sereta perengka guna pemakai enggau ai irup ke disedia sepemanjai timpuh latih.

Bemacham bidang latih dalam sektor betanam betupi mega bisi disediaka dikena napi peminta industri, nyengkaum pengelandik teknikal enggau praktikal ti relevan enggau pemansang teknologi betanam betupi ke diatu.

Peminta tau digaga nengah online .
nengah portal rasmi TVET website ba baruh nya.

Mensia mayuh ti begunaka penerang silik tau betelefon ngagai lumur 03-8870 1702 tauka ngelawa laman rasmi www.kpkm.gov.my

Berindik enggau nya, raban graduet SPM dilalau ngerebut peluang tu dikena ngangkatka pengelandik sereta muka jalai kereja dalam sektor betanam betupi, ti majak ngerembai sereta ngembuan potensial ke tinggi. — RBI

DALAT, 3 April — Palan Kawalan Operasyen (PKOD) Pelilih Menua Dalat bejalaika pengawa enggau lengkas pengudah nerima penerang ari mensia mayuh bekaul enggau pun kayu tumbang di Kampung Bakong, Oya.

Nitihka penerang rasmi ari Dalat APM, sebuah kerita ambulans 4×4 ke bisi empat iku raban betuaika Sjn (PA) Hazli bin Rossli dianjung ngagai endur nya.

Lebuh datai ba palan penusah nyadi, ditemu bisi sekeda dan kayu nya patah sereta ngempang sebagi ari jalai.

Skuad Alpha tekala nya bejalaika pengawa netak kayu nya enggau meresi jalai nya likun sereta ulih ditengah perengka pengangkut.

Dalat APM ngemeratka pemesai guna mensia mayuh ngeripot sebarang penusah ngenyit nengah talipaun sida 24 jam ba lumur 084-867357, dikena nentuka pengawa ulih dipejalaika enggau lengkas. — RBI

KOTA SAMARAHAN, 3 April — Perintah nengeri udah ngemendarka agih belanja lebih RM300 juta dikena ngenegapka sistem bekal ai ngelingi Kota Samarahan, nyengkaum Kampung Baru, nyadi chara timpuh panjai dikena mutarka isu pejalai arus ai ke ditapi peranak menua nya.

Kaban Parlimen Samarahan, YB Datuk Hajah Rubiah Wang madah, inisiatif nya mungkur projek nukar paip lama ti enda ulih napi agi pejalai arus ai, kelimpah ari ngangkatmanah sistem ngagih dikena nentuka bekal ai lebih entap sereta komprehensif.

“Perintah meretika enggau penuh penusah ditapi peranak, kelebih agi lebuh penambah penyampau rumah enggau penyampau tubuh meri tekan ngagai sistem bekal ai ke bisi diatu,” ku iya rambau penemuai ngagai Kampung Baru pagi tadi.

Penemuai nya mega digulu Sarawak Water Sdn. Bhd ti diarika Pemangku Ketuai Pemesai Eksekutif, Puan Maselni Binti Jamal, Pemesai Pelilih Menua Samarahan, Encik Ahmad bin Abdul Razak enggau ejensi ke bekaul.

Dalam penerang ti diberi, dipadahka pengawa nyambung paip baru enggau ngangkatmanah sistem paip ngagih diatu nyau deka tembu.

Taja pia, beberapa kandang endur kelebih agi ba ujung kampung agi ngasaika tekanan ai ti baruh.

Nitih ku iya, entara kebuah ke dikelala nyengkaum pengawa ngena pam ai individu enggau enda betagang, ke tau ngeruga tekanan bekal keseluruhan.

Berindik enggau nya, Sarawak Water deka bejalaika pengawa matau enggau meresa premis ti bekaul dikena nentuka agih bekal ai lebih sebela.

Kelimpah ari nya, penanggul paip lama enggau insiden paip meletup ba sekeda endur mega nyadika kebuah bekal ai tejanggal kelebih agi ba ujung rangkaian paip pengagih.

Nerang enggau silik agi, iya madahka projek nukar paip lama dipelaba deka berengkah dalam awak ke semak lalu tembu dalam timpuh 12 bulan, lalu enggau nya meri penguntung timpuh panjai ngagai peranak ba kandang endur ke kena bungkur.

Ku iya nambah, pengawa tu deka ditegapka agi enggau projek ngangkatmanah Loji Meresi Ai Batu Kitang ti dipelaba tembu kena bulan Oktober taun tu, lalu ari nya ulih nambahka kapasiti enggau penegap bekal ai di serata kandang menua Kota Samarahan.

Iya nyemetak madahka piak iya deka terus matau pengerembai isu nya ari sesiti maya ngagai sesiti maya dikena nentuka pengelantang enggau pengelantang rayat seruran dijaga.

Berebak enggau nya, iya mega meri besai terima kasih ngagai semua piak ke bisi kaul enggau peranak Kampung Baru ke udah meri kerejasama enggau penyabar sepemanjai pengawa ngemanahka nya dipejalaika. — RBI

Taja pan dunya napi penanggul bekal kuasa global ti enda tentu, Perintah MADANI mengkang komited nentuka pengelantang rayat terus dijaga enggau nanggung urung 50% ari sabsidi ungkup tiap liter petrol RON95.

Nengah inisiatif BUDI95, rayat Malaysia agi ngasaika rega RON95 iya nya RM1.99 seliter, lalu enggau nya mantu ngurangka tating ungkus pengidup ninting hari.

Pengawa netapka takah guna 200 liter sebulan nyadi atur sementara ti dipejalaika dikena nentuka penegap bekal dalam gaya dunya ke diatu.

Berindik enggau nya, mensia mayuh diperansang beambi ulih ari perengka guna tu enggau bejimat dikena ngatur belanja sereta nyukung pemanah guna minyak menua tu. — RBI

KUCHING, 3 April — Perintah Sarawak terus ngenegapka pengulih mutarka penusah ngenyit nengeri tu nengah pengawa nyerahka rasmi Projek Palan Perintah Penusah Ngenyit Sarawak (SDCC) ti nyadi kemari, lalu enggau nya nambahka tikas penyikap diri napi musin panas enggau angat.

Pengerami nyerahka pangku pengawa nya udah meda Ketuai Direktor Ejensi Mutarka Penusah Ngenyit Menua (NADMA), YBrs. Tuan Meor Ismail bin Meor Akim nyerahka projek nya ngagai Chairman Komiti Mutarka Penusah Ngenyit Nengeri Sarawak (JPBNS), YB Datuk Amar Douglas Uggah Embas.

Sama bisi datai Sekretari Mendam Perintah (Pentadbiran) Sarawak, YBhg. Datu Felicia Tan Ya Hua; Direktor Unit Pengelikun enggau Penerit Adat (UKPS) Sarawak ke mega Sekretari JPBNS, YBrs. Tuan Haji Abdul Wahab bin Haji Rahim enggau ketuai opis ti bekaul.

Dalam jaku dipansutka iya, Datuk Amar Douglas Uggah nyemetak madahka Sarawak diatu ba tikas nyikap diri enggau penuh berindik ari pemungkal musin panas enggau angat ti bisi potensial nambahka risiko penusah angus tebuka.

Iya madah, lapan penusah angus udah dirikod ba sekeda kandang menua iya nya Mukah, Betong, Simunjan, Sarikei, Bintulu, Miri enggau Lawas, tang semua nya mujur dijaga sereta dipadamka abis ulih ejensi ke bekaul.

“Semua komiti mutarka penusah ngenyit ba renggat nengeri, bagi menua enggau pelilih menua udah diasuh matau enggau silik kandang endur berisiko tinggi, kelebih agi kandang endur tanah kerapa,” ku iya.

Berindik enggau nya, iya nesau mensia mayuh anang ngaul diri enggau pengawa betunu chara tebuka ti tau ngepunka penusah angus enda betagang ba gaya hari angat diatu.

Iya nyemetak madahka atur neritka atur deka dipejalaika Opis Rampa Menua (JAS) enggau Kaunsil Pengeraja Asal enggau Rampa Menua (NREB) ngagai sebarang piak ti enda nitihka atur nya.

Berebak enggau nya, isu bekal ai mega udah diberi perati ke serius enggau perintah matau enggau lengkas ari Opis Bekal Ai Menua Pesisir (JBALB) enggau Opis Pengintu Pengelantang Raban Bansa (JKM) dikena nentuka bantu ulih dikenataika ngagai populasyen ke kena empas, kelebih agi ba kandang endur ke kritikal.

Nyadi chara tambah, JPBNS diatu seruran matau pengerembai ‘hot spot’ di menua sepiak dikena nentuka kualiti angin di Sarawak mengkang dijaga.

Mensia mayuh mega dilalau seruran bejejaga sereta meri kerejasama ngagai piak bekuasa dalam nentuka pengelikun enggau pengelantang komuniti terus dijaga sepemanjai timpuh hari angat sereta angat tu. — RBI

KUCHING, 3 April — Kereja ngemanahka paip besai 400mm di Jalai Belatok enggau Jalai Batu Kawa–Matang udah mujur tembu tumu ari timpuh ke ditetap, lalu enggau nya ngemendarka proses mulaika baru bekal ai berengkah tumu agi.

Nitihka penerang ari Sarawak Water Sdn Bhd (Wilayah Selatan), “kereja ngemanahka paip 400mm udah mujur tembu dulu ari timpuh ke udah ditetapka,” lalu enggau nya meri pengelantang ngagai penguna ke kena empas ketegal penusah ke enda diperambu sebedau tu.

Penerang nya nambah, proses mulaika baru bekal ai diatu benung dipejalaika berenggat enggau kandang endur besemak enggau paip besai nerima bekal dulu, ditangkanka kandang endur tanah tinggi enggau kandang endur ba ujung tali ngagihka ai.

“Bekal ai deka dipulaika baru enggau chara berenggat. Kandang endur ke besemak enggau paip besai deka nerima ai dulu, ditangkanka kandang endur tanah tinggi enggau kandang endur ba ujung alur ngagihka ai,” ku penerang nya.

Berebak enggau nya, penguna mega dipadah nyangka bisi penanggul sementara baka angin ngeleda lebuh paip dibuka.

“Nuan engka ngasaika sekeda ‘sputtering’ lebuh nuan keterubah iya ngidupka paip, tu semina proses muai angin ari sistem paip,” ku penerang nya.

Kelimpah ari nya, kualiti ai keterubah iya engka bisi keruh mimit tauka bebali chura, lalu penguna dilalau ngasuh ai nya bejalai beberapa minit nyentukka iya nyadi chiru sebedau ngena iya.

Dikena mantu penguna ke agi dituntung penusah nya, Sarawak Water mega madahka servis tangki ai deka terus dipejalaika ba kandang endur ke dituntung penusah tu enda lama.

“Lori tangki kami deka mengkang ba kandang endur nya enda lama dikena mantu peranak ba kandang endur ke agi dipulaika peneras ai,” ku penerang nya.

Berebak enggau nya, Sarawak Water meri besai terima kasih ngagai penyabar enggau sukung penguna sekumbang timpuh tejanggal seraya nyemetak madahka tim teknikal udah bebendar gawa nentuka penanggul nya diputarka enggau lengkas.

Penguna ke agi betapi enggau penanggul bekal ai tau betanya ngagai Call Center ba lumur 082-222333 tauka nengah WhatsApp ba lumur 019-8866650 minta bantu silik agi. — RBI

SARATOK, 3 April —Sepital Saratok udah mujur ngatur Kus Basic Life Support (BLS) Bil. 1 taun 2026 kena 1 ngagai 2 April nyadi pengawa ti enda ngetu dikena ngenegapka tikas nyikap diri enggau kompetensi raban pengerai dalam napi situasyen penusah ngenyit.

Program dua hari berunggu nya mungkur penyereta 21 iku pesereta lalu dipejalaika enam iku fasilitator ti bepeneleba entara raban sepital.

Kus tu betuaika Ketuai Program, Encik Othman bin Bujang ari Unit Penusah Ngenyit ti nentuka pengelanchar pejalai sepemanjai program nya.

Sepemanjai kus nya, pesereta ngasaika pra-peresa dikena beratika tikas penemu sida ke diatu sebedau ngulu sesi penerang ti mungkur prinsip enggau prosedur BLS.

Pemerat mega diberi ngagai latih praktikal ti betuju ngangkatka pengelandik praktikal pesereta dalam mutarka kes penusah ngenyit enggau sistematik sereta efektif.

Ba hari kedua, pesereta ngasaika tisih kepenudi ti nyengkaum peresa teori enggau praktikal dikena nyukat tikas penguasaan pengelandik ti udah dipelajarka sida.

Pengawa ngatur kus tu ngembuan tuju deka ngenegapka penemu, pengelandik enggau pengandal raban pengerai ba pengawa meri bantu tumu ngagai pesakit enggau jampat sereta betul, lalu ari nya meri pangka ngagai pengawa ngangkatka kualiti servis pengerai.

Sepital Saratok mega meri besai terima kasih ngagai semua piak ti bisi kaul, kelebih agi raban fasilitator ti udah bebendar sereta bebendar ngemujurka program nya.

Semua pesereta ke mujur nembuka kus tu mega diberi pengaga ati, enggau pengarap penemu enggau pengelandik ke diulih ulih dikena enggau optimum dalam nambahka tikas nyikap diri sereta efisyen dalam mutarka kes ngenyit. — RBI

KUCHING, 3 April — Dua iku indu napi pengirau ati lebuh kerita Perodua Axia ke ditepan seduai iya tepawah sebedau bekalih ba penusah aksiden betungga ba Taman Perindustrian Demak, Jalai Bako, lemai kemari.

Ba penusah ke nyadi urung pukul 2.31 lemai nya, dua iku seduai ke beumur 56 enggau 58 taun nya benasit laban semina bakal mimit aja taja entukar ke ditepan seduai balat rusak.

Nitihka penerang ari Opis Bomba enggau Penyah Penusah Malaysia (JBPM) Sarawak, sida nerima kangau ngenyit bekaul enggau penusah nya urung pukul 2.31 lemai sebedau tim raban ari Balai Bomba enggau Penyah Penusah (BBP) Tabuan Jaya dianjung ngagai palan penusah nyadi.

Raban Penusah Ngenyit (PKO) ti betuaika Syamsyul Mustapha datai ba endur nya urung 11 minit udah nya.

“Lebuh datai ba endur nya, ditemu sebuah kerita Perodua Axia udah tepawah lalu bekalih ba bau jalai, ti ngaul dua iku indu,” ku penerang nya.

Kededua seduai diripotka mujur dipansutka mensia mayuh ari kerita nya sebedau raban bomba datai.

Seduai udah nya diberi perubat tumu ba palan penusah ke nyadi sebedau diserah ngagai Opis Menteri Pengerai Malaysia (KKM) ngambika atur silik dipejalaika sereta dibai ngagai sepital ngambika diperesa enggau silik agi.

Piak bekuasa ngelalau penguna jalai alun ngambika seruran bejimat sereta ngasika atur jalai alun dikena nyeliahka penusah ke enda dikedekaka nyadi. — RBI