CYBERJAYA, 8 April – Suruhanjaya Komunikasyen enggau Multimedia Malaysia (SKMM) udah muka 36 keretas pansik bekaul enggau pengawa ngerembaika berita pelesu bekaul enggau krisis kuasa global ba media rama enggau pelasar digital.

Sepenyampau 22 iku individu ari mayuh bengkah endur di serata menua udah dikangau ngambika dirikod penerang sida dikena mantu pansik, lalu enam keretas pansik udah dianjung ngagai Sapit Pendawa Raya ngambika dipansik enggau dipejalaika enggau silik agi.

Pansik dipejalai ari baruh Seksyen 233 Akta Komunikasyen enggau Multimedia 1998 (Akta 588), ti nyendiaka ukum maksimum RM500,000 tauka jil nyentuk dua taun, tauka kededua nya, enti dikenuku salah.

MCMC nyemetak madahka sebarang pengawa salah guna pelasar media rama tauka digital dikena ngelimpangka runding mensia mayuh endang berat lalu deka diambi enggau atur ke terit.

Mensia mayuh diingat ngambika betanggungjawap lebuh bekenaka media rama lalu anang ngerembaika isi ti tau ngeruga pengelantang enggau atur mensia mayuh. -RBI

MANCHESTER, 8 April — Menijar penyaga Manchester United, Michael Carrick nerima sukung penuh ari pemain ti deka ke iya dipadu chara tetap pengudah ngayanka prestasi ti chukup manah kenyau ari iya megai tim nya dalam bulan Januari tu tadi.

Ex-pemain tengah ke beumur 44 taun nya udah ngiring United menang tujuh kali, dua kali seri enggau semina alah sekali dalam 10 main Liga Premier, lalu ngengkahka tim nya ba penuduk lumur tiga sereta ba jalai ke betul ngambika ulih masuk Liga Champions musim baru.

Pemain sayap Amad Diallo nerangka Carrick nyadi orang ke patut ngiring tim nya, taja pan iya ngaku pemutus kepenudi bepanggai ba piak pengatur kelab nya.

“Ukai pemain nya nentuka kuing iya jemah ila, tang iya chukup manah.

“Iya mayuh mantu tim, bisi peneleba sereta meretika kelab tu,” ku Amad.

Amad mega nyemetak madahka pemanah kaul entara Carrick enggau bala pemain nyadi pekara ti beguna dalam pengawa ngangkatka baru tim nya.

“Kadang-kadang nuan begunaka menijar baka tu ngambika kelab tu ulih pulai ngagai endur ke patut.

“Ba penemu aku, iya orang ke patut,” ku iya.

Siku agi pemain, Bryan Mbeumo mega muji chara Carrick, ti ​​meretika budaya kelab enggau chara berandau enggau bala pemain.

“Iya nemu chara kelab tu gawa sereta chara berandau enggau kami.

“Nya ngemuntangka agi laban iya nemu rampa menua ditu,” ku Mbeumo.

Diatu United benung ngasaika kem latih intensif di Ireland dikena nyendiaka diri napi main ke beguna amat ngelaban Leeds United ba Old Trafford, enggau batang tuju nentuka kelab nya nembuka musim tu ba renggat ke manah ba atas.

Sukung ngagai Carrick mega udah ditambahka agi enggau legenda kelab baka Paul Scholes enggau Nicky Butt, ti pechaya iya patut bulih peluang tetap, ngujungka raban pengatur pengawa agi kakang sebedau pemutus besai ba ujung musim. -RBI

MERADONG, 8 April – Pengawa jampat Tim Petugas Indu Opis Polis Pelilih (IPD) Meradong ba “Ops Tapis” mujur ngetan siku lelaki peranak menua nya dipelaba bisi kaul enggau salah guna dadah di kandang menua Bintangor, urung pukul 12.00 tengahari kemari.

Ketuai Polis Pelilih Meradong, DSP Tansli Mering madah, saspek ke beumur 34 taun nya mujur ditan sebedau dibai ngagai IPD Meradong ngambika dipansik enggau silik agi.

“Asil peresa nisih ai kemi ti dipejalaika ba Opis Bagian Tasat Jenayah Narkotik (BSJND) Pelilih Meradong tetemuka saspek positif amphetamine enggau methamphetamine,” ku iya.

Nitihku iya, pengawa meresa baru rikod ke udah mega tetemuka saspek nadai ngembuan sebarang rikod penyalah jenayah tauka penyalah bekaul enggau dadah.

Kes tu dipansik ari baruh Seksyen 15(1)(a) Akta Dadah Berbahaya 1952, ti nyendiaka ukum mata duit enda ngelui ari RM5,000 tauka jil nyentuk dua taun enti dikenuku salah.

Berebak enggau nya, DSP Tansli nyemetak madahka polis enda belembut enggau sebarang penyalah bekaul enggau dadah lalu deka terus chakah agi bejalaika operasyen dikena nagang pengawa ke bansa nya.

Mensia mayuh ke bisi penerang bekaul enggau aktiviti dadah dipinta ngenataika penerang nya ngagai polis, nyengkaum betanya ngagai Balai Polis Bintangor nengah lumur 084-693222. -RBI

ASAJAYA, 8 April – Sapit Menteri Pengerai Malaysia, Dato Hajjah Hanifah Hajar Taib bejalaika Penemuai Gawa ngagai Klinik Pengerai (KK) Asajaya, Kota Samarahan ngabas diri empu perengkaguna enggau servis ke bisi disediaka ngagai peranak menua nya.

Penemuai nya sebagi ari Jelajah Rangkaian Kesihatan Borneo (JKB) Siri I ti ngembuan tuju ngenyemakka diri sereta meretika gaya ke bendar servis pengerai di Sarawak.

Maya penemuai nya, Hanifah dulu nerima penerang dikena ngulihka peragam keterubah pasal operasyen, guna enggau pemar ke ditapi perengka guna pengerai di KK Asajaya.

Iya mega bisi ngabas perengka guna enggau servis ke bisi disedia dikena nentuka pengawa meri servis pengerai seruran ba tikas ke pemadu manah, seriris enggau komitmen perintah ngenegapka sistem pengerai menua.

Sapit Menteri mega mai enggau iya seraban ari Opis Menteri Pengerai Malaysia (KKM) enggau Opis Pengerai Nengeri Sarawak (JKNS) dikena nentuka pengawa ti lebih komprehensif sereta betul beratika gaya ke bendar di ‘lapangan’, kelimpah ari ngenegapka kaul entara opis.

Iya nyemetak madahka semua penemu ari penemuai JKB deka diberi perati ke patut dikena ngangkatka servis pengerai, kelebih agi di menua pesisir, dikena nentuka pengelantang pendiau rayat terus dijaga.

Sama bisi datai Sapit Ketuai Direktor Pengerai (Pengerai Mensia Mayuh) enggau Direktor Pengerai Nengeri Sarawak, Dr.Veronica Lugah. -RBI

KUCHING, 8 April — Siku lelaki bebadi nyawa pengudah mutosikal ke ditepan iya aksiden enggau lori semin ba lampu trafik Jalai Pelabuhan, ditu, malam kena Hari Satu.

Ba penusah ke nyadi urung pukul 9.50 malam nya, tudah ke 26 tau dientaska bebadi nyawa ba palan penusah nyadi ketegal balat bakal.

Pengari Palan Operasyen Opis Bomba enggau Penyah Penusah Malaysia (JBPM) Sarawak, madahka seraban raban ari Balai Bomba enggau Penyah Penusah Tabuan Jaya dianjung ngagai endur nya pengudah nerima kangau ngenyit.

“Lebuh datai ba palan nya, raban bomba tetemuka tudah enda ngeleda ba baruh lori semin nya.

“Peresa silik ari pemesai perubat udah nya ngentaska tudah udah lesi,” ku iya ba sebengkah penerang.

Tubuh tudah udah diserah ngagai polis ngambika atur silik agi dipejalaika sereta bejalaika pengawa buntas tasat.

Kelimpah ari mantu mindahka mansa, raban bomba mega bisi bejalaika pengawa meresi teda minyak ba jalai dikena nyaga pengelikun penguna jalai alun ke bukai sebedau operasyen tembu enggau penuh urung pukul 11.10 malam. — RBI

SRI AMAN, 8 April — Kaban Parlimen Sri Aman, YB Dato’ Sri Doris Sophia Brodie nemuai seraya gawa, ngabas kereja ngagai palan projek parit ke udah tembu di Rumah Jampang, Munggo Sawa Ulu, pagi kemari.

Projek parit nya dipejalaika ngena ungkus sepenyampau RM285,000 nengah agih belanja Program Transformasyen Menua Pesisir (RTP) 2025, nyadi siti ari pengawa ti seruran dipejalai dalam ngenegapka perengka guna infrastruktur asas di menua pesisir.

Pengawa bejalaika projek tu ngembuan tuju deka nambahka pemanah sistem parit ke udah bisi, lalu ari nya ulih ngurangka risiko ai ampuh enggau penusah ampuh bah ke tau ngeruga pengidup besehari-sehari peranak menua nya.

Rambau penemuai nya, YB Dato’ Sri Doris Sophia Brodie mega bisi ngabas gaya fizikal projek sereta ninga timbal ari peranak senentang pemanah pengawa bejalaika fasiliti nya.

Iya nyemetak madahka pengawa nyendiaka infrastruktur asas ti bekualiti deka terus dikemerat dikena nentuka pengelantang pendiau rayat seruran dijaga, seriris enggau komitmen perintah meransang pemansang menua pesisir ti inklusif sereta meruan. — RBI

MANCHESTER, 08 April – Harry Maguire udah nyain kontrak baru enggau Manchester United nyentuk bulan Jun 2027, nyengkaum pilih ngelanjarka timpuh setaun agi.

Kenyau nyereta kelab nya ba taun 2019, pemain beretan tengah England nya udah bemain 266 kali lalu mantu tim nya ngangkatka trofi Piala Carabao enggau Piala FA.

Maguire nerangka peluang ngarika Manchester United nyadi basa ke pemadu tinggi, kelimpah ari mantaika temegah ati enggau sida sebilik ninting hari.

Iya mega mantaika pengagit ati deka neruska pejalai iya enggau kelab nya enda kurang ari lapan musin sereta terus bemain ba mua bala peminat ke taluk.

Nitih ku iya, tim ke diatu ngembuan potensial enggau juluk ati ke besai deka besemekih ba gelar champion besai, seraya ngemeratka pengarap iya ke alai maya pemadu manah tim nya bedau datai.

Berebak enggau nya, Direktor Main Bol kelab nya, Jason Wilcox, muji Maguire nyadi pemain ti ngembuan mentaliti enggau semengat pengetan ti tinggi, kelimpah ari siku profesyenal ke bendar ti mai peneleba enggau nyadi ketuai ti beguna ngagai skuad biak Manchester United.

Iya nyemetak madahka semua orang ba kelab nya nyengkaum Maguire bebendar deka nentuka pemujur ke konsisten sereta terus ungkup tim nya. -RBI

SRI AMAN, 8 April — Jematan pemanjai 51 meter ke digaga nengah agih belanja Program Transformasyen Menua Pesisir (RTP) 2025 udah dipenyadi Kaban Parlimen Sri Aman, YB Dato’ Sri Doris Sophia Brodie di Kampung Munggo Sawa, kemari.

Projek ke beungkus RM220,000 ke udah tembu penuh ujung taun nyin tadi, diatu meri penguntung ke besai ngagai peranak menua nya, kelebih agi ba pengawa ngemudahka pemindah ninting hari sereta nambahka tikas pengelikun maya meraka sungai, kelebih agi maya musin ampuh bah.

Dalam jaku dipansutka iya, iya nyemetak madahka pengawa nyendiaka infrastruktur pemun baka jematan entara pekara ti dikemerat dalam nentuka pengelantang pendiau komuniti menua pesisir terus ditegapka.

“Pengawa ngaga jematan tu ukai semina ngemudahka akses ungkup peranak, tang mega nyadi penyungkak ngangkatka kualiti pengidup komuniti lokal,” ku iya.

Tekala nya pengudah pengawa bejadika pengerami nya, iya mega bisi ngelimpangka awak begulai sereta ngaul peranak dalam gaya ti lantang ba Rumah Panjai Dennis Unup, Munggo Sawa Ili.

Pengerami nya mega digulu 19 iku Tuai Rumah ari kandang menua Engkeranji, Keranggas, Semulong, Ipoh enggau Muding.

Sama bisi datai Penghulu Angin ari Keranggas, SAO Lingga Tuan James, Dr. Victor Luna enggau sekeda kaban kunsil kandang menua.

Inisiatif tu mandangka komitmen perintah ti terus ngenegapka pemansang menua pesisir, setipak enggau aspirasyen Maju Makmur Sarawak. — RBI

KANOWIT, 7 April – Siku lelaki ke diripotka lenyau kenyau ari kemari ditemu sida sebilik enda benyawa urung pukul 3.28 lemai ba jalai kebun ke bebida ari kandang kebun iya, sehari tu tadi.

Pengari Palan Operasyen Bomba enggau Penyah Penusah (PGO) Sarawak madah, sida nerima kangau ngenyit bekaul enggau penusah nya urung pukul 11.27 pagi sebedau tim ari Balai Bomba enggau Penyah Penusah (BBP) Kanowit dianjung ngagai siti endur ke bepalan urung 45 kilometer ari balai nya.

“Tudah dikelala enggau nama Alam anak Entri, 51, diripotka pansut ari rumah iya nuju ngagai kebun belakang rumah panjai urung dua kilometer penyauh kena pagi 6 April tu tadi, tang nadai pulai baru,” ku penerang bomba.

Nitihku penerang nya mega, pengawa ngiga keterubah dipejalaika peranak rumah panjai pengudah dua iku ukui enggi iya pulai ke rumah lalu tubuh iya nadai enggau urung pukul 11.00 pagi hari ke sama.

Raban ngiga enggau nyelamat (SAR) ti mungkur raban bomba, polis, Raban Penyaga Orang Periman Malaysia (APM) enggau peranak rumah panjai udah nya dibagi ngagai tiga raban bejalaika operasyen ngiga ba kandang kebun buah enggau radius urung empat kilometer.

Pengawa meresa keterubah tetemuka iya nadai agi benyawa lebuh ditemu ba endur nya.

Ku iya, tubuh tudah enda ditegu nganti penerang rasmi ari staf Klinik Pengerai Nanga Tada nitihka atur polis.

Ku iya, urung pukul 5.00 lemai, klinik ngentaska iya udah midang ba palan penusah ke nyadi sebedau tubuh iya diserah ngagai polis ngambika atur nangkanka nya dipejalaika. -RBI

KUCHING, 7 April — Aum Keterubah Penggal Kelima Aum Kunsil Nengeri (DUN) Sarawak deka diatur pengelama lapan hari berengkah 11 ngagai 20 Mei tu.

Nitihka ripot TVS, notis rasmi ti dipansutka Sekretari Kunsil Nengeri Sarawak, Nur Azhar Bujang, madahka sesi nya deka diatur ba Begunan Kunsil Nengeri Sarawak baka ti udah ditetapka.

Nitihka Perintah Tetap DUN, tetiap Kaban Kunsil Nengeri (ADUN) dikemendar nganjung nyentuk 10 iti tanya ngambika disaut ngena chara lisan sepemanjai aum nya.

Berebak enggau nya, ripot ke sama mega bisi nyebut haribulan kepenudi nganjung tanya ngagai Sekretari DUN ditetapka kena tauka sebedau 27 April, maya jam opis.

Sesi tu dikearapka nyadi pelasar ke beguna endur berandauka bemacham isu ti beguna ungkup rayat sereta mega agenda pemansang nengeri Sarawak. — RBI